இரத்தச்சரித்திரம் - வில்லன் சூரியநாராயணரெட்டி படுகொலை..!

04-01-2011

என் இனிய வலைத்தமிழ் மக்களே..!
 

எது நடக்கக் கூடாது என்று ஆந்திராவின் முன்னாள் முதல்வர்கள் ராஜசேகர ரெட்டியும், சந்திரபாபு நாயுடுவும் நினைத்தார்களோ அது இன்றைக்கு ஹைதராபாத்தில் நடந்தேறிவிட்டது.

சாகத்ய அகாடமி விருது பெற்ற நாஞ்சில் நாடனுக்கு நடந்த பாராட்டு விழாவில் கலந்து கொண்டுவிட்டு 10.45 மணிக்குத்தான் வீடு திரும்பினேன். சாப்பிட்டுவிட்டு வழக்கம்போல ஜிமெயிலை திறந்தவுடன் எனது இரத்தசரித்திரம் பதிவுக்கு சீனு என்னும் தோழர் பின்னூட்டம் போட்டிருந்தார். எப்போதும் வருவது போலத்தான்  இருக்கும் என்று திறந்தால் "பிரேக்கிங் நியூஸ் : சூரி படுகொலை" என்று இருந்தது. ஒரு கணம் நெஞ்சடைத்துவிட்டது.

கொஞ்சம் ஆச்சரியம்.. நிறைய அதிர்ச்சி. ஏனெனில், ரஷ்யன் கல்ச்சுரல் சென்டர் அரங்கத்தில் இருந்து வீடு திரும்பியவரையிலும் நான் இந்தக் கட்டுரையை நினைத்தபடியேதான் வந்தேன். காரணம், விழா முடிந்த பின்பு தோழர் அரங்கசாமியால் எழுத்தாளர் ஜெயமோகனிடம் அறிமுகப்படுத்தி வைக்கப்பட்டேன். அப்போது ஜெயமோகன் "உங்களுடைய இரத்தச்சரித்திரம் கட்டுரை நல்லாயிருந்தது. ரொம்ப நல்லாயிருந்தது" என்று பாராட்டினார்.

ஒரு பெரும் எழுத்தாளர் பாராட்டிவிட்டாரே என்கிற ஒருவித சந்தோஷத்தோடு வீடு வந்து சேர்ந்தவனுக்கு, இப்படியொரு தகவல் கிடைத்தால் அதிர்ச்சியாக இருக்காதா..?

இன்று மதியம் தனது வழக்கறிஞரை அவரது அலுவலகத்திற்குச் சென்று சந்தித்துவிட்டு சனத்நகரில் இருந்து யூசுப்குடா நோக்கிச் செல்லும் பாதையில் இருக்கும் நவோதயா காலனியருகே சிட்டி சென்டர் அருகே காரில் வைத்து துப்பாக்கியால் சுடப்பட்டிருக்கிறார் மெட்டலச்செருவூ சூரியநாராயணரெட்டி.

மதியம் 3.30 மணியளவில் நடந்த துப்பாக்கித் தாக்குதலில் படுகாயமடைந்து மயக்கமடைந்த சூழ்நிலையில் ஜூப்லி ஹிஸ்ல் பகுதியில் இருக்கும் அப்பலோ மருத்துவமனைக்கு கொண்டு வரப்பட்டு தீவிர சிகிச்சைப் பிரிவில் சேர்க்கப்பட்டிருக்கிறார் சூரி. ஏராளமான ரத்தம் சிந்தியிருந்ததால் சிகிச்சை பலனில்லாமல்,  இரவு 7.50 மணியளவில் உயிரிழந்திருக்கிறார் சூரி.

முதலில் இந்தச் சம்பவம் பற்றியச் செய்திகள் கிடைத்ததும் இது நிச்சயம் பரிதலா ரவியின் ஆதரவாளர்கள்தான் செய்திருப்பார்கள் என்று போலீஸ் உட்பட அனைவருமே நம்பித்தான் இருந்தார்கள். ஆனால் அப்பலோ மருத்துவமனைக்கு சூரியைக் கொண்டு வந்து சேர்த்த சூரியின் கார் டிரைவர் சொன்ன தகவல்தான் போலீஸையும் அதிர்ச்சியடைய வைத்துள்ளது.

காரின் பின் சீட்டில் அமர்ந்து வந்த பானுகிரண் என்பவர்தான் சூரியைச் சுட்டார் என்று டிரைவர் சொல்ல இதென்ன புதுக் கதை என்று திகிலடித்துப் போயுள்ளன மீடியாக்கள்.

இரத்தச்சரித்திரம் உண்மைக் கதையில் சொல்லியபடியே அப்போதைய ஆந்திர முதலமைச்சர் ரோசையாவின் கருணையினால் பத்தாண்டுகளை சிறையில் கழித்துவிட்டபடியால் விடுதலைப் பட்டியலில் இடம் பெற்றார் சூரிய நாராயண ரெட்டி. ஆனாலும் பரிதலா ரவியின் படுகொலை வழக்கில் அவருக்கு நான்கு மாதங்கள் கழித்தே ஜாமீன் கிடைத்ததால் 2009, டிசம்பர் 24-ம் தேதியன்று நிபந்தனை ஜாமீனில் சிறையில் இருந்து விடுதலையானார் சூரி.

சூரி சிறையில் இருந்து ஜாமீனில் வெளியே வந்ததில் இருந்து சுடப்படும் நேரம் வரையிலும் அவருடைய நிழல் போல, உதவியாளராக அவருடைய பின்னாலேயே தொடர்ந்து கொண்டிருந்தவர்தான் இந்த பானுகிரண். டிரைவர் தற்போது கொடுத்திருக்கும் வாக்குமூலத்தின்படி அந்த சிட்டி சென்டர் அருகே வந்தவுடன் பானு சூரியின் தலையின் பின்பக்கத்தில் இரண்டு முறையும், நெஞ்சில் ஒரு முறையும் பாயிண்ட் ரேஞ்ச் என்று சொல்லப்படும் மிக நெருக்கத்தில் வைத்துச் சுட்டுவிட்டு காரின் கதவைத் திறந்து கொண்டு ஓடி விட்டதாகச் சொல்லியிருக்கிறார்.

2009-ல் வெளியே வந்த சூரியும் சும்மா இல்லை. பல்வேறு டிவிக்காரர்களை அழைத்து தனது காரிலேயே ஹைதரபாத்தில் ஜாலியாக சுற்றியபடியே பேட்டி கொடுத்துக் கொண்டிருந்தார். டிவி அலுவலகங்களுக்கு நேரில் சென்றும் பேட்டியளித்து வந்தார்.

அதிகம் வெளியில் வர வேண்டாம் என்று அவரது ஆதரவாளர்கள் கேட்டுக் கொண்டும் "இது அனந்தப்பூர் இல்லை.. ஹைதரபாத்.." என்று வெடிச் சிரிப்புடன் சொல்லி வந்திருக்கிறார்.

ஆனாலும் தனது ஆதரவாளர்கள் 3 அல்லது 4 பேர் சூழவோதான் எங்கே சென்றாலும் சென்று வந்திருக்கிறார். ரத்தச்சரித்திரம் திரைப்படத்தைக்கூட பெங்களூருக்குச் சென்றுதான் பார்த்து வந்திருக்கிறார்.

சூரி, தனது பாதுகாப்பில் சற்று அலட்சியமாக இருந்ததற்கு ஒரே காரணம், காங்கிரஸ் கட்சித் தலைமையும், தெலுங்கு தேசக் கட்சித் தலைமையும் இனி பழிக்குப் பழி இருக்காது என்று உத்தரவாதம் வழங்கியிருந்ததுதான்.

ஆனால் திடீரென்று 3 நாட்களுக்கு முன்பு NTV தொலைக்காட்சிக்கு அளித்த பேட்டியில் மட்டும், “இப்போது என்னைக் கொல்ல சதி நடப்பதாக அறிகிறேன். மாநில அரசு எனக்கு போலீஸ் பாதுகாப்பு வழங்க வேண்டும்.. இது பற்றி நான் முதல்வரைச் சந்தித்து முறையிடப் போகிறேன்..” என்று கூறியுள்ளார் சூரியநாராயணரெட்டி.

2 வாரங்களுக்கு முன்புவரையிலும் இருந்த அவருடைய சுதந்திரப் போக்கில் இப்போது ஏற்பட்ட மாற்றத்திற்கு என்ன காரணம்..? யார் அந்த சதிகாரர்கள்..? அதை உணர வைத்தது எது..? என்பதையெல்லாம் இனிமேல்தான் கண்டறிய வேண்டும்..

தற்போது ஆந்திர காவல்துறை பானுகிரணை ஹைதராபாத் முழுவதும் வலை வீசி தேடி வரும் அதே நேரத்தில், "இந்தக் கொலையைச் செய்தது பரிதலா ரவியின் ஆதரவாளர்கள் இல்லை. வேறு எந்தக் கட்சிக்காரர்களும் இல்லை" என்று திரும்பத் திரும்ப மீடியாக்கள் மூலமாகச் சொல்லி வருகிறது.

 

சூரியின் சொந்த மாவட்டமான அனந்தப்பூரில் காவல்துறை இப்போதே பலத்த போலீஸ் பாதுகாப்பை செய்து வருகிறது. பரிதலா ரவியின் வீட்டுக்கு மூன்றடுக்கு போலீஸ் பாதுகாப்புக் கொடுக்கப்பட்டுள்ளதாம். பரிதலா ரவியின் மனைவி சுனிதாவிடம் சூரியின் படுகொலை பற்றி கருத்து கேட்டதற்கு அவர் எந்தவித பதிலையும் இதுவரையில் சொல்லவில்லை. விடியட்டும் என்று ஆந்திராவே காத்திருக்கிறது.

ஏற்கெனவே நாளை புதன்கிழமையன்று தெலுங்கானா பிரச்சினைக்காக அமைக்கப்பட்ட கிருஷ்ணா கமிட்டி அறிக்கை தாக்கல் செய்ய இருப்பதால் ஏற்படவிருக்கும் ரகளைகளை எதிர்பார்த்து துணை நிலை ராணுவத்தின் பல படைகளை ஆந்திரா முழுவதும் இறக்கி விட்டிருக்கும் ஆந்திர மாநில அரசு, இந்தக் கொலையினால் இன்னும் கொஞ்சம் அதிர்ச்சியைச் சந்தித்திருக்கிறது.

உண்மையாகவே இதுநாள்வரையிலும் சூரியின் தீவிர ஆதரவாளராக இருந்த பானுகிரண், ஒரே நாளில் எப்படி கொலையாளியாக மாறினார் என்பது அனைவருக்குமே சந்தேகம்தான். இன்றைய ஆந்திர அரசியல் நிலவரப்படி இந்தக் கொலையின் பின்னணியில் காங்கிரஸ் கட்சியின் பெரிய கை ஏதாவது இருக்கும் என்று நீங்களோ நானோ சந்தேகப்பட வேண்டாம். ஏற்கெனவே பட்டாச்சு..

ஜெகன்மோகன்ரெட்டிக்குச் சொந்தமான சாக்ஷி டிவி மட்டுமே “இந்தக் கொலையின் பின்னணியில் காங்கிரஸ் கட்சியின் பெரிய கைகள் இருக்கின்றன..” என்ற செய்தியைத் திரும்பத் திரும்பச் சொல்லி வருகிறது. 

இன்றைக்கு விசாகப்பட்டிணத்தில் நடந்த கட்சிப் பேரணிக் கூட்டத்தில் கலந்து கொண்டுவிட்டு விமான நிலையம் திரும்பிக் கொண்டிருந்த ஜெகன்மோகன்ரெட்டியிடம் சூரி கொலை செய்யப்பட்ட செய்தி சொல்லப்பட பையன் ஆடிப் போய்விட்டாராம். உடனடியாக ஜெகன்மோகன்ரெட்டிக்கு கூடுதல் போலீஸ் பாதுகாப்பு கொடுக்கப்பட்டுள்ளதாம்.

சூரியிடம், பரிதலா ரவியை போட்டுத் தள்ளச் சொன்னதே ஜெகன்மோகன்ரெட்டிதான் என்பது இப்போதுவரையிலும் பரிதலா ரவியின் குடும்பத்தினரும், அவரது ஆதரவாளர்களும் சொல்லி வரும் குற்றச்சாட்டு.

அனந்தப்பூர் வழியாக கர்நாடகாவில் இருக்கும் தங்களது குடும்ப கனிமச் சுரங்கங்களை சுமந்து வரும் லாரிகளை வழிமறித்து கப்பம் கட்ட வைக்கும் எதேச்சதிகாரத்தை எதிர்த்துத்தான் பரிதலா ரவியுடன் தனது வயதுக்கேற்ற வேகத்தில் மோதினார் ஜெகன்மோகன்ரெட்டி.

ஆனால் “உன் அப்பனே என்னைப் பார்த்து பயந்தவன். உன் சேட்டையை கடப்பா மாவட்டத்தோட வைச்சுக்க.. மவனே எல்லை தாண்டீன்னா எதுவும் நடக்கும்..” என்று ஒரு பொதுக்கூட்டத்தில் எச்சரிக்கைவிடும் அளவுக்கு பரிதலா ரவியைச் சூடாக்கினார் ஜெகன்மோகன்ரெட்டி.

இதனாலேயே தனது குடும்பத்தில் படுகொலைகள் விழுகலாம் என்ற மாநில உளவுத்துறையின் எச்சரிக்கைக்குப் பயந்துதான் ஜெகன்மோகன்ரெட்டியை பத்திரமாக பெங்களூரில் வைத்திருந்து பாதுகாத்து வந்தார் ராஜசேகரரெட்டி.

எத்தனை நாட்கள்தான் அண்டை மாநிலத்தில் குப்பை கொட்டுவது என்று நினைத்த கோபத்தில்தான் ராஜசேகரரெட்டிக்கே தெரியாமல் செர்லபள்ளி சிறைச்சாலைக்கு ஒரு பகல் நேரத்தில் மாறுவேடத்தில் நேரில் வந்து சூரியைச் சந்தித்து பரிதலா ரவியைப் போட்டுத் தள்ளும் அசைன்மெண்ட்டை ஜெகன்மோகன் ரெட்டி கொடுத்தார் என்கின்றன ஆந்திர மாநில புலனாய்வு பத்திரிகைகள். உண்மையில் பரிதலா ரவியின் மரணத்திற்குப் பின்பே தைரியமாக ஆந்திராவில் கால் பதித்தார் ஜெகன்மோகன்ரெட்டி.

எப்படியும் பழிக்குப் பழி வருமே என்று பயந்துதான் தெலுங்கு தேசக் கட்சித் தலைவர் சந்திரபாபு நாயுடுவிடம் நேரில் பேசி 2009-ல் நடந்த சட்டமன்றத் தேர்தலில் பரிதலா ரவியின் மனைவிக்கு சீட் கொடுக்க வேண்டாம் என்றும், தன் பக்கம் சூரியின் மனைவிக்கு தானும் சீட் கொடுக்க மாட்டேன் என்றும் ஜென்டில்மேன் அக்ரிமெண்ட்ஷிப் போட்டு மகனைப் பாதுகாத்து வந்தார் ராஜசேகர ரெட்டி.

ராஜசேகர ரெட்டியின் மரணத்தின்போதும் அது ஏன் பரிதலா ரவியின் கொலைக்குப் பழிக்குப் பழியான கதையாக இருக்கக் கூடாது என்று ஆந்திரப் பத்திரிகைகள் எழுதின. இதனை முதலில் மறுத்து வந்த ஜெகன்மோகன்ரெட்டி, சமீபத்தில் இத்தாலி அம்மாவுடன் பிணக்கு ஏற்பட்டவுடன்தான் “எனது தந்தையின் இறப்பு திட்டமிட்ட படுகொலையாக இருக்கலாம் என்ற சந்தேகம் இப்போது வருகிறது..” என்று சவுண்டுவிட துவங்கியிருக்கிறார்.

இன்றைக்கு நடந்திருக்கும் இந்தப் படுகொலையினால் புதன்கிழமையன்று வெளியாகவிருக்கும் கிருஷ்ணா அறிக்கை வெளியீடு ஒருவேளை தள்ளிப் போனாலும் போகலாம். அல்லது கிருஷ்ணா அறிக்கையின் தாக்கத்தை இந்தப் படுகொலை ஆந்திர மக்களிடமிருந்து கொஞ்சம் விலக்கி வைக்கும் என்கிற தந்திரத்தோடு நடத்தப்பட்டிருக்கலாம் என்கிறார்கள்.

அத்தோடு தனிக்கட்சி நடத்தும் முஸ்தீபுகளோடு மாநிலம் முழுவதும் ரவுண்டு வரும் ஜெகன்மோகன்ரெட்டிக்கு ஆளும் தரப்பு விடும் எச்சரிக்கையாகவும் இதனை எடுத்துக் கொள்ளலாம் என்கிறார்கள். எவ்வளவு பாதுகாப்பு இருந்தாலும் சிக்னல் கொடுத்தால் போதும் என்கிற இந்த எச்சரிக்கை ஜெகன்மோகன்ரெட்டிக்குத்தான் என்கிறார்கள் இந்தப் பழிக்குப் பழி வாங்கும் ரத்தச்சரித்திரத்தின் கதையை முழுமையாகத் தெரிந்தவர்கள்.

ஏனெனில் இந்தப் பழி வாங்கும் போராட்டத்தின் உச்சக்கட்ட குறியில் தற்போது உயிருடன் இருப்பவர் ஜெகன்மோகன்ரெட்டி மட்டுமே..!!!

Tweet