இந்திய மாநிலத்தின் முதல்வருக்கு 4 மனைவிகள்... தமிழகம் பரவாயில்லை..!

11-10-2009

என் இனிய வலைத்தமிழ் மக்களே..!

மாலைப் பத்திரிகைகளை லேசாக புரட்டிக் கொண்டிருந்தபோது கண்ணில்பட்ட இந்தச் செய்தியைப் படித்து ஏற்கெனவே கொதிப்பில் இருக்கும் என் நெஞ்சு இப்போது கொழுந்துவிட்டு எரிந்து கொண்டிருக்கிறது.

அந்தச் செய்தியை நீங்களும் படித்து என் வயிற்றெரிச்சலில் பங்கெடுத்துக் கொள்ளுமாய் அன்போடும், பணிவோடும் கேட்டுக் கொள்கிறேன்..

இந்தியாவின் வடகிழக்குப் பகுதியில் இந்திய-சீன எல்லையில் உள்ளது அருணாச்சலப்பிரதேச மாநிலம். மலையும், மலைசார்ந்த பிரதேசமுமான இம்மாநிலம் பெண் சுதந்திரம் என்றால் என்னவென்று தெரியாத பூமியாக இருக்கிறது என்பதுதான் இன்றைய லேட்டஸ்ட் செய்திகள்.


இம்மாநிலத்தில் வருகின்ற 13-ம் தேதி சட்டசபைத் தேர்தல் நடைபெற இருக்கிறது. மொத்த சட்டசபைத் தொகுதிகளின் எண்ணிக்கை 60. இங்கு தற்போது காங்கிரஸ் கட்சியின் ஆட்சியின் நடைபெறுகிறது.

முதல்மந்திரியாக டோர்ஜிகாந்து பதவியில் உள்ளார். 2 முறை இவர் போட்டியில்லாமல் சட்டசபைக்கு தேர்ந்தெடுக்கப்பட்டார். இப்போது 3-வது முறையாகவும் முக்தோ தொகுதியில் இருந்து போட்டியில்லாமல் தேர்ந்து எடுக்கப்படவுள்ளாராம். இவரை எதிர்த்து இத்தொகுதியில் யாருமே போட்டியிட முன் வரவில்லையாம்.

விஷயம் அதுவல்ல.. இந்த மாநிலத்தின் அரசியல்வியாதிகள் தாங்கள் தாக்கல் செய்துள்ள வேட்புமனுவில் தங்களது குடும்பத்தை பற்றித் தெரிவித்திருக்கும் சில உண்மைகள் தற்போதைய பரபரப்பிற்குக் காரணம்.



முதல் மந்திரி டோர்ஜி காந்து தாக்கல் செய்துள்ள தனது வேட்புமனுவில் தனக்கு 4 மனைவிகள் இருப்பதாகவும், அவர்கள் அனைவரது பெயரிலும் சொத்துக்கள் இருப்பதாகவும் குறிப்பிட்டிருக்கிறார். மொத்தமாக குடும்பச் சொத்து 43 கோடிக்கு இருக்கிறதாம். இவருக்கு மொத்தமாகச் சேர்ந்து 4 பையன்களும், 2 பெண் குழந்தைகளும் உள்ளனர்.

இந்த முதல் மந்திரியைப் போலவே இந்த மாநிலத்தில் போட்டியிடும் மற்ற வேட்பாளர்களில் பெரும்பாலானோர்க்கு ஒன்றுக்கு மேற்பட்ட மனைவிமார்கள் இருப்பது தற்போது வேட்பு மனு தாக்கலின்போது தெரிய வந்துள்ளது.


மாநிலத்தின் முன்னாள் முதல் மந்திரியான கெகாங் அபாங்குக்கும் 4 மனைவிகள்தானாம்.. இவர் காங்கிரஸ் வேட்பாளராக டுடிங்-யிங்-ரியாங் தொகுதியில் போட்டியிடுகிறார்.

இதேபோல் முன்னாள் துணை முதல் மந்திரி ஹேமாங்தோலாவுக்கு 3 மனைவிகள். இவர் சாயாங் தொகுதியில் காங்கிரஸ் வேட்பாளராகப் போட்டியிடுகிறார்.

செபா மேற்கு தொகுதியில் போட்டியிடும் முன்னாள் மந்திரி ஹோரி நாதூங் என்பவருக்கு 2 மனைவிகள் உள்ளனர்.

தற்போதைய சட்டப் பேரவையின் துணை சபாநாயகர் நகரா மார்டேவுக்கு 2 மனைவிகள்.. இவர் ஏற்கெனவே மந்திரியாகவும் பதவி வகித்தவராம்.

கோன்சா கிழக்குத் தொகுதியில் போட்டியிடும் டி.எல்.ராஜ்குமாருக்கு 2 மனைவிகள். இவரும் நீண்ட காலம் மந்திரியாக இருந்தவர்.

இதேபோல் பாரதீய ஜனதா கட்சியிலும் பல தார கணவர்கள் வேட்பாளர்களாக நிறுத்தப்பட்டுள்ளனர்.

சட்டா நகரில் பாரதீய ஜனதா சார்பில் போட்டியிடும் லெசிலெகுக்கு 3 மனைவிகள். திருணாமூல் காங்கிரஸ் சார்பில் போட்டியிடும் தலோமுக்லிக்கு 2 மனைவிகள்..

மலைவாழ் மக்கள் அதிகம் வாழும் அருணாச்சலப்பிரதேசத்தின் கலாச்சாரம் மற்ற இந்திய மாநிலங்களிலிருந்து வேறுபட்டது என்கிறார்கள்.


இங்கு செல்வாக்குமிக்க மனிதர்கள் ஒன்றுக்கு மேற்பட்ட பெண்களை திருமணம் செய்து கொள்வது வழக்கமாக இருந்து வருகிறது என்கின்றன அம்மாநில பத்திரிகை செய்திகள்.

இந்தியாவில் மாநிலத்திற்கு மாநிலம் இந்த பலதார மணம் விஷயத்தில் சட்டம் வேறுபட்டிருக்கிறதா என்று தெரியவில்லை.

அரசியல் சட்டத்தை வகுத்தவர்களில் அதிகம்பேர் ஆண்களாகவே இருந்து தொலைத்துவிட்டதினால் அதில் ஆண்களுக்கு சாதகமாக "முதல் மனைவி எதிர்ப்புத் தெரிவிக்கவில்லையெனில், பல தார மணம் தவறில்லை.." என்று ஒரு உட்பிரிவைச் சேர்த்து ஆண்களுக்கு பாதுகாப்பு வழங்கிவிட்டார்கள்.

இதன்படி ஒரு அரசு ஊழியர் ஒன்றுக்கும் மேற்பட்ட மனைவிகள் கொண்டவராக இருப்பதை இந்திய அரசியல் சட்டம் அனுமதிக்கவில்லை என்பது உறுதியாகத் தெரிகிறது. தமிழ்நாட்டிலும் அந்த சட்டம் இருக்கிறது. அதில் இருக்கும் உட்பிரிவான "முதல் மனைவி ஆட்சேபிக்க வேண்டும்" என்ற வரிகளை வைத்துத்தான் நமது கழகத்தின் தலையில் இருந்து வால்வரையிலும் இதுநாளும் தப்பித்து வந்திருக்கிறார்கள்.

ஆனாலும், "முதல் மனைவி ஆட்சேபம் தெரிவிக்காவிட்டாலும்கூட ஒன்றுக்கு மேற்பட்ட திருமணம் உண்மையாக இருந்தால், அவர்களை அரசுப் பணியில் இருந்து நீக்கலாம்.." என்று தமிழக அரசின் பணியாளர் நடத்தை விதிகளில் விதிமுறை இருப்பதாக சிலர் சொல்கிறார்கள்.

"அப்புறம் எப்படி ஒருத்தர், ஐந்து முறை முதல்வரானார்..?" என்று திருப்பிக் கேட்டதற்கு "ஸாரி எங்களுக்குத் தெரியாது.." என்கிறார்கள்.

"இதை அக்கட்சிகளின் மகளிரணியினரே கேட்காமல் வாயைப் பொத்திக் கொண்டிருக்க.. உனக்கெதுக்குடா இந்த வேலை..?" அப்படீன்னு நீங்க கேக்குறீங்களா..?

ஓகே.. எனக்கெதுக்கு பொறாமை..?

ஆனாலும் என் 'வயித்தெரிச்சல்' இவங்களை சும்மாவிடாதுன்றதை மட்டும் சொல்லிக்கிறேன்.. -))))))))))

Tweet