'நல்லவனுக்கு நல்லவன்' சூப்பர்ஹிட்டுக்கான காரணம்..!

05-03-2009

என் இனிய வலைத்தமிழ் மக்களே..!

மிக நீண்ட பல வருடங்களுக்குப் பிறகு 'நல்லவனுக்கு நல்லவன்' படத்தினை 'கே டிவியில்' பார்த்தேன்.

படம் வந்த புதிதில், "வைச்சுக்கவா உன்னை மட்டும் நெஞ்சுக்குள்ள" என்ற பாடல் விடலைப் பசங்களான என்னைப் போன்றவர்களை பாடாய்படுத்தியது..

பள்ளியில் இருந்து வீடு திரும்பிக் கொண்டிருக்கும் 'பிள்ளைகள்' கூட்டத்திற்கு நடுவே சைக்கிளை ஓட்டிச் சென்று, முன் ஹேண்ட்பாரில் அமர்ந்த நிலையில் "வைச்சுக்கவா உன்னை மட்டும் நெஞ்சுக்குள்ள.." என்று வேண்டுமென்றே பாடிக் கொண்டு சென்ற கலர், கலர் நினைவுகளை உசுப்பிவிட்டது திரைப்படம்.

ஆனால் பெரியவர்களுக்குப் பிடித்தமானதாக ஒரு பாடலும் இந்தப் படத்தில் இருந்தது. அது "சிட்டுக்குச் சின்னச் சிட்டுக்குச் செல்லச் சிறகு முளைத்து.." என்ற பாடல்.

இந்தப் படம் வந்த காலக்கட்டத்தில் தமிழகத்தில் வீட்டை விட்டு ஓடிப் போகும் காதலர்களின் எண்ணிக்கை அதிகமாகி, இதனால் மன அவஸ்தைக்குள்ளான தகப்பன், தாய்மார்களின் கூட்டமும் அதிகரித்திருந்த சூழல்..

"ரஜினி படத்துக்கு வயசான பார்ட்டிக வர மாட்டாங்களே மாப்ளை..! என்னடா இது இன்னிக்கு அதிசயமா இருக்கு?” என்று திண்டுக்கல் கணேஷ் தியேட்டர் வாசலில் நண்பர்களுடன் பிரமிப்பாக பேசிக் கொண்டது நினைவுக்கு வருகிறது.

ரஜினியையும், ராதிகாவையும் தங்களது பிரதிநிதியாக நினைத்து படம் பார்த்து நெகிழ்ந்த தம்பதியினர்தான் லட்சணக்கணக்கில். இந்தப் படத்தின் வெற்றிக்கு மூல காரணமே இதுதான்.. எனக்குத் தெரிந்து ரசிகர்களைத் தவிர்த்து பெருவாரியான பொதுமக்களால் அதிகம் விரும்பப்பட்ட ரஜினியின் திரைப்படங்களில் இதுவும் ஒன்று. இன்னொன்று 'படிக்காதவன்'..

இத்திரைப்படத்தின் மிக முக்கிய முடிச்சே திருநீர்மலையில் நடக்கும் கார்த்திக்கின் திருமணக் காட்சிதான்.

அந்தக் காட்சியில் மட்டும் ஒரு சண்டைக் காட்சியை வைத்திருந்தால் நிச்சயம் படம் பணாலாயிருக்கும்.. அந்த இடத்தில் ரஜினி அவமானத் தோற்றத்தில் ஒரு வார்த்தைகூட பேசாமல், ராதிகாவை அழைத்துக் கொண்டு மெதுவாக தலைகுனிந்து படியிறங்கி வருகின்ற காட்சிதான், படத்தை அப்படியொரு இறுக்கமான சூழலுக்குக் கொண்டு சென்றது.. "பாவி நல்லாயிருப்பானா?!” என்று எத்தனை பெற்றோர்கள் சபித்தார்களோ தெரியாது..! ஆனால் படம் சூப்பர் டூப்பர்..

ரொம்ப வருடங்கள் கழித்து ஏவி.எம். ஸ்டூடியோவில் இயக்குநர் எஸ்.பி.முத்துராமனை சந்திக்க நேர்ந்தபோது இது பற்றி கேட்டேன்.. “அந்த இடத்துல சண்டைக் காட்சி வைத்தால் படம் கெட்டுப் போய், கதையே மாறிரும்னு ஏவி.எம்.சரவணன் ஸார் அபிப்ராயப்பட்டாரு.. எனக்கும் அதுதான் சரின்னு தோணுச்சு.. அப்படியே விட்டுட்டேன்..” என்றார்.

பொழுதைப் போக்க உதவியத் திரைப்படங்களை நினைவில் கொள்வது கடினம். ஆனால் இது போன்று காயங்களை ஆற்ற உதவியவைகள் ரசிகனின் நினைவில் என்றென்றைக்கும் நீங்காமல் இருக்கும்..

Tweet