உணர்ச்சி வேகத்தில் என்கவுண்ட்டருக்கு சபாஷ் போடும் பரிதாப மக்கள்..!

09-11-2010

என் இனிய வலைத்தமிழ் மக்களே..!

இந்திய அரசியல் சட்டத்தை நீதித்துறையின் மூலமாக காவல்துறையின் உதவியோடு காப்பாற்றி வருகிறோம் என்று வாய்க்கூசாமல் சொல்லி வரும் நமது ஜனநாயகத்தில் என்கவுண்ட்டர் என்னும் கொலைக்கு மட்டும் விதிவிலக்கு கொடுத்திருக்கிறார்கள் போலிருக்கிறது.

இன்று நடந்த மோகன்ராஜ் கொலை மட்டுமல்ல.. மெரீனா கடற்கரையில் ஒரு விடியற்காலையில் படகருகே நின்று கொண்டு வலையைக் கட்டிக் கொண்டிருந்த வீரமணி என்னும் மனிதனை கொல்லத் துவங்கி இன்றுவரையில் இன்றைய தலைமுறை மனிதர்கள் நினைவில் கொள்ளும் வகையில் காவல்துறை பல்வேறு என்கவுண்ட்டர்களை செய்து கொண்டுதான் வருகிறது.

இதற்கு முன்பாக நக்ஸலைட் வேட்டை என்கிற பெயரில் தர்மபுரி மாவட்டத்தில் தமிழக காவல்துறை ஒரு அழித்தொழிப்பு போராட்டத்தையே நடத்தி முடித்தது. மாற்றுக் கொள்கையுடைய அத்தனை பேரையும் படுகொலை செய்துவிட்டு ஏதோ சாதனை செய்ததுபோல் இன்றுவரையிலும் வெட்கப்படாமல் பெருமைப்பட்டு வருகிறது தமிழகக் காவல்துறை..

ஆனால் எந்த ஒரு என்கவுண்ட்டரிலும் பதிலுக்குப் படுகொலையான போலீஸாரை நீங்கள் பார்த்திருக்கவே முடியாது. அவர்களெல்லாம் கை, கால்கள், முகங்களில் கட்டுப் போட்டு ஒரு போஸ் கொடுத்துவிட்டு இரண்டு நாட்கள் மருத்துவமனையில் இருந்ததாக சர்டிபிகேட் வாங்கிக் கொண்டு வீட்டுக்குச் சென்றுவிடுவார்கள்.

ஆர்டிஓ விசாரணைக்கு அரசு உத்தரவிட்டு, அத்தோடு ஒதுங்கிக் கொள்ளும். சக்தி வாய்ந்தவர்கள் நீதிமன்றங்களுக்குச் சென்று பரிகாரம் தேடி அலையத் துவங்குவார்கள். இது அவர்களது விதி.. தலையெழுத்து..!

இன்று காலையில் நடந்ததையே எடுத்துக் கொள்ளுங்கள். மிக அருகில் நெற்றிப் பொட்டில் வைத்து சுடப்பட்டால்தான் இப்படி பெரும் ரத்தப் போக்கோடு, மூக்கிலும் ரத்தம் வந்த நிலையில் மரணம் வரும் சாத்தியக்கூறுகள் உண்டு.

மிக அருகில் நெற்றியில் வைத்து சுடுமளவுக்கு அப்படியென்ன அக்கப்போரை அத்தனை போலீஸாருக்கு மத்தியில் அந்த மோகன்ராஜ் செய்திருக்கப் போகிறான் என்பதே சந்தேகம்தான். செய்த தவறுக்காக என்னைத் தூக்கில் போடுங்கள்.. என்று கதறியவனா தப்பியோடப் பார்ப்பான்..?

அதிலும் சைலேந்திரபாபு அட்டகாசமாக, அனாயசமாக பொய் சொல்கிறார். அவன் கேரளாவுக்கு தப்பியோடப் பார்த்தான் என்று. அவர்கள் இருந்த சாலை கேரளாவுக்குச் செல்லும் சாலை என்பதால் இவர்களையெல்லாம் தள்ளிவிட்டுவிட்டு கேரளாவுக்கு ஓடியே தப்பித்துவிடுவான் என்பது அவரது கணிப்பாம். இதற்கு ஐ.பி.எஸ். படிக்க வேண்டுமா? பெட்டிக் கடைக்காரனைக் கேட்டாலே சொல்லிவிடுவானே..?

அரசு மருத்துவமனையில் மரணம், அறுவை சிகிச்சை என்றால் குறைந்தபட்சம் நான்கு மருத்துவர்களிடமாவது சான்றிதழ் வாங்க வேண்டும். சிலர் தருவார்கள். பலர் தர மாட்டார்கள் என்பதால் ஒரே ஆளிடம் சான்றிதழ் பெற்றுவிடலாம் என்று தனியார் மருத்துவமனையில் போலீஸ் அதிகாரிகளை அட்மிட் செய்திருக்கிறார்கள். இதனை எந்த போலீஸ் அதிகாரியிடம் வேண்டுமானாலும் கேட்டுப் பாருங்கள். எந்தப் பத்திரிகையாளர்களிடத்தில் வேண்டுமானாலும் வினவிப் பாருங்கள்.. இது திட்டமிட்டப் படுகொலை என்றுதான் சொல்வார்கள்.

மோகன்ராஜ் வாக்குமூலம் கொடுத்திருக்கிறான் நான்தான் கொலை செய்தேன் என்று.. போலீஸில் பிடிபடும் அத்தனை பேரும் சொல்வது இதைத்தான். அடிக்கிற அடியில் இப்போதைக்குத் தப்பித்தால் போதும் என்று ஒப்புதல் வாக்குமூலம் கொடுக்கத்தான் சொல்வார்கள். மோகன்ராஜ் சொன்னது உண்மையாகவே இருக்கட்டும். ஆனால் அவனுக்கான தண்டனையை கொடுக்கத்தான் கோர்ட்டும், நீதித்துறையும் இருக்கின்றனவே..? இந்த கொலையைச் செய்ய காவல்துறைக்கு அனுமதியையும், அதிகாரத்தையும் கொடுத்தது யார்..?

சிறு குழந்தைகள் சம்பந்தப்பட்ட விஷயம் என்றாலே நமது உணர்ச்சிமிகு மனிதர்கள் கொந்தளித்துத்தான் போவார்கள். இது நியாயமானதுதான். பார்த்த இடத்திலேயே கொன்றுவிடு என்றால் அனைத்துக் கொலை வழக்குகளிலும் இதையே பின்பற்றிவிடலாமே.. பின்பு எதற்கு கோர்ட்டும் நீதித்துறையும்..!?

பொதுமக்களின் கொந்தளிப்பைப் பயன்படுத்தி ஒரு கொலையைச் செய்து நல்ல பெயர் எடுத்துக் கொள்ளலாம் என்று நினைத்து போலீஸ் செய்திருக்கும் ஒரு தி்ட்டமிட்ட நாடகம் இது..

நமது மக்களும் நல்லது.. இவனுகளை இப்படித்தான் செய்யணும் என்றெல்லாம் ஸ்வீட் கொடுத்து கொண்டாடுவதாக ஆளும்கட்சியின் டிவியில் திருப்பித் திருப்பிக் காட்டி ஒரு கொலையை நியாயப்படுத்துகிறார்கள்.

இந்த டிவியின் தலைவர் மறக்காமல் அக்டோபர்-2-ம் தேதியன்று காந்தி தாத்தாவின் போட்டோவுக்கும் மாலையைப் போட்டுவிட்டு அஹிம்சையைப் பத்தி தவறாமல் பேசி நம்மை ஹிம்சை செய்வார் என்பது வேறு கதை.. ஆனாலும் இது என்னவொரு பொருத்தம்..

ஜெயலலிதா ஆட்சியில்தான் வீரப்பன் வேட்டை என்கிற பெயரில் மலைவாழ் கிராமங்களே இல்லாமல் அழித்தொழிக்கப்பட்டது. பச்சை சட்டை அணிவித்து மனைவிகள் முன்பாகவே கணவர்களை நிற்க வைத்து புகைப்படம் எடுத்து, “கடைசியாக ஒரு முறை உன் கணவனை பார்த்துக் கொள்..” என்று சொல்லி அழைத்துச் சென்று சுட்டுக் கொன்றது தமிழக அதிரடிப் படை போலீஸ்.

இன்றைக்கு எத்தனையோ குடும்பங்களைச் சிதைத்து, அப்பாவி மக்களை நரகத்திற்குக் கொண்டு போய் குடி வைத்திருந்ததும் இதே தமிழகத்து போலீஸ்தான். அப்போதும் அவர்கள் சொன்ன வார்த்தை இதே என்கவுண்ட்டர்.

அடுத்து வந்திருக்கும் தற்போதைய ஆட்சியிலும் வரிசையாக ரவுடிகள் பட்டியலில் இடம் பெற்றிருந்த மனிதர்களை ஒவ்வொருத்தரையாகச் சுட்டுக் கொன்று சாதனை படைத்திருக்கிறது தமிழக போலீஸ்.

இத்தனைக்கும் இந்த அரசு ஏதோ அஹிம்சையைத் தவறாமல் கடைப்பிடிக்கும் அரசாம். இதற்கு முந்தைய ஜெயலலிதா அரசு ஹிம்சை அரசாம். இப்படியும் சில கிறுக்குகள் சொல்லிக் கொள்கிறார்கள்..

எந்த மனிதனும் குற்றவாளியாகவே பிறந்து வருவதில்லை. அத்தனை பேரும் சமூகச் சூழலின் காரணமாகத்தான் குற்றவாளியாக ஆகிறார்கள். மோகன்ராஜ் வேன் டிரைவர். இதற்காக எல்லா வேன் டிரைவர்களும் இப்படியில்லை. சமூகத்தில் இப்படியும் நடக்கத்தான் செய்யும்.. எந்த நாட்டில்தான் இது நடக்காமல் இல்லை..!?

என் வீட்டிலேயே இந்தக் கொடுமை நடந்திருந்தாலும் நான் இதைத்தான் சொல்வேன். நீதிமன்றத்தில் நிறுத்தி தண்டனை வாங்கிக் கொடுத்திருக்க வேண்டிய விஷயம் இது..

இதேபோல் இனிமேற்கொண்டு வருகின்ற அத்தனை என்கவுண்ட்டர்களுக்கும் காவல்துறை இதேபோலத்தான் கற்பனைக் கதைகளை அள்ளி விடுவார்கள். அத்தனைக்கும் பொதுமக்கள் ஆட்டு மந்தைகளைப் போல தலையை ஆட்டத்தான் செய்வார்களா..?

இது இரண்டு கொலைதான். ஆனால் சேலத்தில் நான்கு கொலைகளைச் செய்ததாக பாரப்பட்டி சுரேஷ்குமார் என்ற தி.மு.க. உடன்பிறப்பை கைது செய்து உள்ளே வைத்திருக்கிறார்களே...? எதுக்கு நேரத்தை வீணாக்க வேண்டும். தைரியமிருந்தால் அவரையும் இதேபோல் என்கவுண்ட்டர் செய்யும் தைரியம் இந்த காவல்துறையினருக்கு உண்டா..? வராதல்லவா..?

அப்படியானால் என்ன காரணம்..? கேட்பதற்கு ஆளில்லாதவன்.. அட்ரஸ் இல்லாதவன்.. சுட்டுக் கொன்றால் எவனும் கேட்க மாட்டான். போட்டுத் தள்ளு என்றார்கள். முடித்துவிட்டார்கள். இது என்னாங்கடா இது உடன்பிறப்புக்கு ஒரு நீதி..? அடுத்தவனுக்கு ஒரு நீதியா..?

இது போலவே எத்தனை வழக்குகளில் குற்றஞ்சாட்டப்பவர்களை கைது செய்திருக்கிறார்களோ, அத்தனை பேரையும் என்கவுண்ட்டரில் போட்டுத் தள்ளிவிட்டால் போலீஸுக்கும் நேரம் மிச்சமாகுமே..! கோர்ட், கேஸ் என்று அவர்களும் அலைய வேண்டாம்..!! கோர்ட்டில் நீதிபதிகளுக்கும் வேலை கொடுக்க வேண்டாம். அவர்களும் ஷட்டில்காக் விளையாடப் போய்விடலாமே.. எதற்காக இப்படி ஜனநாயகம் என்ற பெயரில் ஊரை ஏமாற்றும் செயல்..!?

ஒரு பக்கம் அப்பாவிகள் பலரும் சிறையில் இருக்கிறார்கள் என்று பல தாய்மார்கள் சிறை வாசலில் கண்ணீரும், கம்பலையுமாக இருக்கிறார்கள். இன்னொரு புறம் என்கவுண்ட்டரில் சுட்டுக் கொல்லப்பட்ட அப்பாவிகளின் குடும்பங்கள் இன்றைக்கும் அனாதைகளாக்கப்பட்டு பரிதவிப்பில் உள்ளன.

எப்போதுமே தமிழனுக்கு தனக்கென்று வந்தால்தான் அது நோய் என்றும், பிரச்சனை என்றும் தெரிய வரும். தன் வீட்டு கக்கூஸ் நிரம்பி வழிந்தால்தான் ஆளைக் கூப்பிடத் தோன்றும். பக்கத்து வீட்டில் வாடை அடித்தால்கூட அவனுக்கு ஒரு ஆலோசனை சொல்ல மனசு வராது. அது அவன் விஷயம். இது நம்ம விஷயம் என்ற குறுகிய மனப்பான்மையும், தான், தன் சுகம் என்ற சுகபோகமும் நம்மை ஆட் கொண்டுள்ளது.

இல்லாவிட்டால் ஒருவேளை செத்த மோகன்ராஜ் நமது குடும்பத்தில் ஒருத்தனாக இருந்து தொலைந்து, இப்போது இப்படி செத்திருந்தால் நாம் என்ன செய்வோம் என்று யோசிக்காமல் இருந்திருப்பார்களா..?

குற்றஞ்சாட்டப்பட்டவன் என்பதாலேயே ஒருவன் குற்றவாளியாகிவிட முடியாது.. குற்றவாளி என்பதை உச்சநீதிமன்றம் வரையிலும் சென்று நிரூபித்தால் மட்டுமே அவன் குற்றவாளி..! அவனே ஒத்துக் கொண்டாலும் நீதிமன்றம் ஒத்துக் கொண்டால்தான் அவனை சிறையில் வைக்க முடியும்..! இதுதான் சட்டம்..!

சட்டமாவது, கிட்டமாவது.. அவனே ஒத்துக்கிட்டானே.. தூக்குல போடு என்று சொல்லும் இதே பொதுஜனம்தான் சின்ன அடிதடி கேஸில் சிக்கினால்கூட “சின்னப் பையன். விட்ருங்க.. தெரியாம செஞ்சுட்டான்..” என்று போலீஸில் சென்று கெஞ்சுவார்கள். “தண்ணியடிச்சதால ஏதோ மப்புல மண்டையை உடைச்சுப்புட்டான். மன்னிச்சு விட்ருங்கய்யா” என்று காலைப் பிடித்துக் கதறுவார்கள்..!

ஒரு நாள் இவர்களையெல்லாம் இதே என்கவுண்ட்டர் துப்பாக்கி குறி வைக்கும்போதுதான் இதன் வலி அவர்களுக்குப் புரியும்..!

Tweet