கவிஞர் மனுஷ்யபுத்திரனைத் தண்டிக்க ஒரு வாய்ப்பு..! முன் வாருங்கள் வலைப்பதிவர்களே..!

05-02-2011

என் இனிய வலைத்தமிழ் மக்களே..!

சுஜாதா அறக்கட்டளை - உயிர்மை

இணைந்து வழங்கும்

சுஜாதா விருதுகள் 2011

தமிழின் நவீனத்துவத்திற்குப் பெரும் பங்காற்றிய அமரர் சுஜாதாவின் நினைவாக அவரது பிறந்த தினமான மே 3-ம் தேதி இலக்கியம் மற்றும் இணையம் சார்ந்து 6 விருதுகள் வழங்கப்படுகின்றன.

ஒவ்வொரு விருதும் 10 ஆயிரம் ரூபாய் பரிசும் பாராட்டுப் பத்திரமும் கொண்டது.

பரிசுக்குரிய தேர்வுகள் போக ஒவ்வொரு பிரிவிலும் 5 விண்ணப்பங்கள் பாராட்டிற்குரியதாக தேர்ந்தெடுக்கப்பட்டு சான்றிதழ் வழங்கப்படும்.

1. சுஜாதா சிறுகதை விருது: சிறந்த சிறுகதைத் தொகுப்பிற்கு

2. சுஜாதா நாவல் விருது: சிறந்த நாவலுக்கு

3. சுஜாதா கவிதை விருது: சிறந்த கவிதைத் தொகுப்பிற்கு

4. சுஜாதா உரைநடை விருது: சிறந்த கட்டுரைத் தொகுப்பிற்கு

5. சுஜாதா இணைய விருது: சிறந்த வலைப்பதிவு (blog) அல்லது இணைய இதழுக்கு (website)

6. சுஜாதா சிற்றிதழ் விருது: சிறந்த சிறுபத்திரிகைக்கு

விதிமுறைகள் :

1. முதல் நான்கு பிரிவுகளில் 2009 டிசம்பர் முதல் 2010 டிசம்பர் வரையிலான காலகட்டத்தில் வெளிவந்த நூல்களில் 3 பிரதிகள் அனுப்பப்படவேண்டும். எழுத்தாளரோ, பதிப்பாளரோ அல்லது வாசகர்களோகூட நூல்களை அனுப்பலாம். எழுத்தாளரைப் பற்றிய தகவல்கள் மற்றும் முகவரி தனித்தாளில் எழுதி நூல்களுடன் அனுப்பவும். நூல்களில் எதுவும் குறிக்கப்படவேண்டியதில்லை.

2. 5-வது பிரிவில் தமிழின் சிறந்த வலைப்பதிவு அல்லது இணையத்தளத்திற்கு வழங்கப்படும். அந்த இணையத்தளத்தை அல்லது வலைப்பதிவை நடத்துபவர்கள் தம்மையும் தமது இணைய பக்கங்களையும் பற்றிய சிறு குறிப்புடன் அதில் வெளிவந்த முக்கியமான ஆக்கங்களின் பத்து சுட்டி(link)களையும் அனுப்ப வேண்டும். அனுப்ப வேண்டிய முகவரி: sujathaawards@gmail.com

3. 6-வது பிரிவில் தமிழில் 2010-ம் ஆண்டு வெளிவந்த சிற்றிதழ்களிலிருந்து பிரதிகள் அனுப்பப்படவேண்டும். அந்த ஆண்டில் குறைந்தபட்சம் மூன்று இதழ்களாவது வெளியிடப்பட்டிருக்க வேண்டும். அந்த ஆண்டில் வெளிவந்த ஒவ்வொரு இதழிலிருந்தும் 3 பிரதிகள் வீதம் அனுப்ப வேண்டும்.

4. விருதுக்குரிய தேர்வுகள் தமிழின் முன்னணி எழுத்தாளர்கள் மற்றும் பத்திரிகையாளர்களால் மேற்கொள்ளப்படும்.

5. தேர்வுக்கான விண்ணப்பங்கள் வந்து சேரவேண்டிய கடைசித் தேதி: மார்ச் 20, 2011.

6. விருதுகள் மே. 3, 2011-ம் தேதி சுஜாதாவின் பிறந்த தினத்தில் வழங்கப்படும்.

விண்ணப்பங்கள் அனுப்ப வேண்டிய முகவரி :

சுஜாதா விருதுகள், உயிர்மை,
11/29 சுப்பிரமணியம் தெரு, அபிராமபுரம், சென்னை-600018,
மின்னஞ்சல் sujathaawards@gmail.com  தொலைபேசி: 91-44-24993448.

சென்ற ஆண்டு இந்தப் போட்டிக்கான விளம்பரம் வெளியிடப்பட்டபோது மனுஷ்யபுத்திரன் மீதிருந்த கோபத்தில் அனுப்பாமல் விட்டுவிட்டேன்.

ஆனால் இப்போது அந்தக் கோபம் இன்னும் அதிகமாகிவிட்டதால், இந்த ஆண்டுக்கான சிறந்த வலைப்பதிவருக்கான போட்டியில் கலந்து கொள்ள உத்தேசித்துள்ளேன்.

சென்ற ஆண்டு நமது சக வலைப்பதிவர் லேகா அவர்கள் சிறந்த வலைப்பதிவருக்கான சுஜாதா விருதைப் பெற்றார். அவருடைய வலைப்பதிவு முகவரி இது : http://yalisai.blogspot.com.

பணம் நமக்கு முக்கியமில்லை. ஆனால் விருது மிக, மிக முக்கியம். அதுவும், 'எனது வாத்தியார்' மன்னிக்கவும்.. 'நமது வாத்தியார்' சுஜாதாவின் பெயரில் அமைந்திருக்கும் இந்த விருதினைப் பெறுவதற்கு நிச்சயம் நாம் பெருமைப்பட வேண்டும்.

ஸோ.. இந்த ஆண்டு நான் களத்தில் குதிக்கத் தயாராகிவிட்டேன். என்னுடன் இந்த விருதுக்குப் போட்டியிட விரும்பும் அகில உலக வலைப்பதிவர்கள் அனைவரும் உடனடியாகக் களத்தில் குதிக்கும்படி அன்போடு கேட்டுக் கொள்கிறேன்.

வலையுலகச் செய்திகளின்படி தற்போதைக்கு ஆக்டிவ்வாக 2000 பதிவர்கள் ஒரு நாள்விட்டு ஒரு நாளாவது பதிவுகளை இட்டு வருகிறார்கள். அவர்கள் அனைவரும் இந்த உயிர்மையின் சுஜாதா விருதுக்கு தங்களது பெயரைத் தட்டிவிட்டு போர்க்களத்தில் குதிக்க வேண்டும்.

ஒருவர் 10 லின்க்குகளை தரலாம் என்று சொல்லியிருக்கிறார்கள். ஒரு லின்க் சுமாராக 10 பக்கங்கள் என்றால்கூட ஒரு பதிவருக்கு 100 பக்கங்கள். 1000 பேர் போட்டியிட்டாலும் அது ஒரு லட்சம் பக்கங்களைத் தாண்டிவிடும்.

தமிழின் முன்னணி எழுத்தாளர்களும், பத்திரிகையாளர்களும்தான் சிறந்த பதிவரைத் தேர்ந்தெடுக்கப் போகிறார்களாம். இவர்கள் எத்தனை பேராக இருந்தாலும் சரி.. ஒரு லட்சம் பக்கங்களையும் படித்து முடிக்கிறார்களோ இல்லையோ.. இத்தனையையும் படிக்க வைத்துவிட்டாரே என்று மனுஷ்யபுத்திரன் மீது மான நஷ்ட வழக்கு போட வைக்க வேண்டும்.

இப்படி நாம் ஒன்று திரண்டு போட்டியிட்டு உயிர்மையின் உயிரை எடுக்க வேண்டிய கட்டாயம், தற்போது நமக்கு வந்துள்ளது என்பதை சக பதிவர்கள் புரிந்து கொள்ள வேண்டும்.

எனது பதிவுகளில் ஒரு லின்க்கிற்கு குறைந்தபட்சம் 30 பக்கங்கள் என்று வைத்துக் கொண்டால்கூட என்னுடைய வலைப்பதிவு செய்திகளே 300 பக்கங்களைத் தாண்டிவிடும். ஸோ.. பிரதான உயிரெடுப்பானாக நானே இருந்து தொலைகிறேன். நீங்களும் கொஞ்சம் முன் வந்து கை கொடுங்கள் தோழர்களே..!

உயிர்மையின் உயிரை எடுக்கவும், மனுஷ்யபுத்திரனை போட்டுத் தாக்கவும் ஏன் இவ்வளவு வெறி என்கிறீர்களா..? மிகவும் அவசரமான அவசியம் ஒன்று இருக்கிறது...

'தேகம்' என்ற நாவலைப் பதிப்பித்து வெளியிட்ட குற்றத்திற்காக உயிர்மைப் பதிப்பகத்தின் உரி்மையாளரும், கவிஞருமான மனுஷ்யபுத்திரனைத் தண்டிக்க, இதைவிடவும் ஒரு சிறந்த வழி நமக்கு வேறெதுவும் கிடைக்காது. ஆகவே தோழர்களே.. இந்தப் பொன்னான வாய்ப்பை தயவு செய்து நழுவவிட்டு விடாதீர்கள்..!

ம்.. உடனே.. இன்றைக்கே மடல் அனுப்பத் துவங்குங்கள்..!

அனைவரும் வெற்றி பெற எனது வாழ்த்துக்கள்..!

கவிஞர் மனுஷ்யபுத்திரன் மன்னிப்பாராக..!

Tweet