கண்ணா லட்டு தின்ன ஆசையா - சினிமா விமர்சனம்

23-01-2013

என் இனிய வலைத்தமிழ் மக்களே..!

முன்பே எழுதியிருக்க வேண்டியது.. வழக்கம்போல அதுதான் எல்லாரும் எழுதியாச்சே என்ற அலுப்பும், கூடுதலாக சோம்பேறித்தனமும் கூட தள்ளிப் போட்டே வந்துவிட்டேன்.  இன்றைக்குத்தான் திடீர் ஞானதோயம் வந்தது..! என்றாவது ஒரு நாள் விமர்சனங்களை புத்தகமாக போடும்போது தேவைப்படுமே என்று..! அதனால் இப்போது.. இங்கே..!

நல்லதோ கெட்டதோ.. பழைய படங்களை ரீமேக் செய்வதை கொஞ்சம் நிறுத்திக் கொள்வது சினிமாவுலகத்தினருக்கு நல்லது.. பழைய படங்களின் வெற்றிக்கு முதற் காரணமே அப்போதைய காலக்கட்டம்தான்.. அந்தச் சூழலில் மக்களின் வாழ்க்கை முறைக்கேற்ப.. கிடைத்த வசதிகளுக்கேற்ப.. அந்தந்த இயக்குநர்கள் தங்களால் முடிந்த அளவுக்கு எடுத்துக் காண்பித்த திரைப்படங்களில் ஒரு படம் அமோக வெற்றியென்றால்.. அது அந்த இயக்குநருக்கும், கதாசிரியருக்கும் கிடைத்த வெற்றி..! 

அதையே இப்போதும் எடுப்பதற்கு இப்போதென்ன கதை பஞ்சமா இருக்கிறது..? காமெடியில் இன்னும் எடுக்கப்படாதது நிறையவே இருக்கிறது.. அவற்றையெல்லாம் பொறுக்கி எடுத்து படமாக்கவே இப்போதைய இயக்குநர்களுக்கு ஆயுசு போதாது..! மிக எளிதாக ஒரு வெற்றி பெற்ற படத்தின் கதையைச் சுட்டு நோகாமல் நொங்கு திங்க ஆசைப்படுவது நல்ல கலைஞர்களுக்கு அழகல்ல..!

இன்று போய் நாளை வா படத்தினை நான் முதன் முதலில் மதுரை மிட்லண்ட் தியேட்டரில் பார்த்தபோது என் வயதுக்கேற்ற விருப்பத்துடன் மிக மிக ரசித்தேன்..! பாக்யராஜின் முகமும், அவருடைய நிஜ நண்பர்களான பழனிச்சாமி மற்றும் இன்னொரு நண்பரின்(பெயர் தெரியவில்லை) ஆகியோரின் நடிப்பும், முகங்களும் என் பக்கத்து வீட்டுக்காரர்களை போலவே இருந்ததால் என்னைப் போன்ற ஒரு யூத்துகளின் அக்கப்போர் என்று நினைத்து சந்தோஷப்பட முடிந்தது..!

பாக்யராஜாவது பரவாயில்லை.. இதற்கும் முன்பே படங்களில் நடித்திருந்தார். ஆனால் அவருடைய நண்பர்களுக்கு அதுதான் முதல் படம்.. கடைசி படமும் கூட என்று நினைக்கிறேன்..! அதிலும் பழனிச்சாமி படம் முழுவதும் உதட்டுக்கு லிப்ஸ்டிக் போட்டிருப்பார்..! அந்த பெல்பாட்டம் பேண்ட்டும், கண்ணாடியும், அடுக்கடுக்கான சுருள் முடியும்.. ராதிகாவின் இன்னசென்ட் முகமும், கல்லாபெட்டி சிங்காரத்தின் மூச்சுவிட கஷ்டப்பட்டு பேசும் வசனங்களும், அவருடைய அப்பாவின் ஆக்ரோஷத்தனமான முகமும் மறக்க முடியாதுதான்.. கூடவே பக்கத்து வீட்டு அக்காவாக அட்வைஸராக நடித்திருப்பவும் ஒரு சோடாபுட்டி அளவுக்கு கண்ணாடியை போட்டு அமைதியாக நடித்திருப்பார்.. அவர் யார் என்று யாராவது சொன்னால் தன்யனாவேன்..!

இப்போது இந்தக் கதைக்கு வருவோம்..! 

படத்தின் ஹீரோ சேதுவின் எதிர் வீட்டுக்கு வரும் விசாகாவை காதலிக்க போட்டி போடும்  சந்தானம், பவர் ஸ்டார் சீனிவாசன், சேது மூவரில் ஹீரோதான் ஜெயிக்க வேண்டும் என்பது தமிழ்ச் சினிமாவில் எழுதப்படாத விதி என்பதால் கிளைமாக்ஸிலும் ஹீரோவையம், ஹீரோயினையும் சேர்த்துவைப்பதோடு மங்களம் பாடியிருக்கிறார்கள்.

சந்தானம் இப்போதெல்லாம் ஸ்கிரீனில் தோன்றியவுடனேயே கையைத் தட்டத் துவங்குகிறார்கள். அவர் என்ன டயலாக் பேசுகிறார் என்பதையே கேட்க விரும்பாலேயே கையைத் தட்டி மற்றவர்களையும் கேட்க விடாமலேயே செய்கிறார்கள்..! இதிலும் அப்படியே..? ஆனாலும் வடிவேலு எப்போதும் தன்னை ஒரு நிஜ காமெடியனாக நினைத்து, தன்னை தாழ்த்தியே திரைக்கதை எழுதிக் கொள்வார்.. ஆனால் சந்தானமோ அப்படியே உல்டாவாக தன்னைத் தவிர சினிமாவில் இருக்கும் ஆடு, மாடு, கழுதையைக் கூட திட்டிக் கொண்டே இருக்கிறார்..  ஆனாலும் மக்கள் ரசிக்கத்தான் செய்கிறார்கள்..!

அண்டாவுக்குள் உட்கார்ந்து சாதகம் செய்யும் காட்சியும், அதையொட்டி காமெடிகளும் அல்லல்பட வைப்பதால் ரசிக்க முடிகிறது.. சில நேரங்களில் சந்தானம் சீரியஸாக பேசுகிறாரா அல்லது காமெடியாக சொல்கிறாரா என்பதை அவர் காமெடியாக கடைசியாக பேச்சை முடிக்கும்போதுதான் தெரியும்.. அதே பாணியில் தண்ணியை வாங்கிக் கொடுத்து குடிக்க வைத்து ஆஸ்பத்திரிக்கு அழைத்து வந்து விசாகாவின் முன்னிலையில் மூக்கடைக்கும் காட்சி  நிசமாகவே விறுவிறுப்புதான்..!

ஆளுக்கொன்றை எடுத்துக் கொள்ளும்போது ஜெயிப்பது சந்தேகமேயில்லாமல் பவர் ஸ்டார்தான்..! அவ்வப்போது அவர் காட்டும் கோணங்கித்தனமான முக பாவனைகள்.. வீட்டுக்கு போய் டான்ஸ் கற்றுக் கொள்ள பிளான் செய்து தனது ரசிகர்களை வைத்து அவர் செய்யும் டிராமா.. டான்ஸ் ஆட அவருக்குள் ஒரு வேகம் வந்து ஆடிக் காட்டும் அந்த ஸ்டைலெல்லாம் தமிழ்ச் சினிமாவுக்கு புதிது என்பதால் தியேட்டரில் இன்னமும் கல்லா கட்டிக் கொண்டிருக்கிறார் பவர் ஸ்டார்.!

எப்போதும் தன்னை  ஒருவன் தாழ்த்திக் கொண்டே போய்.. காமெடிக்காரனாகவே காட்டிக் கொண்டால் தமிழ் ரசிகர்களுக்கு மிகவும் பிடிக்கத்தான் செய்யும். கடந்த 3 வருடங்களாக தமிழ் ரசிகர்கள் பவர் ஸ்டாரை எந்த அளவுக்கு இழித்தும், பழித்தும் பேசியும் அதை அவர் காதில் போட்டுக் கொள்ளாமல் தனக்கான நேரம் வரும்வரைக்கும் காத்திருந்து இப்போது கொடுத்திருப்பது சரியான பதிலடி..! வெல்டன் பவர் ஸ்டார்..!

விஜய் டிவியின் நீயா நானாவில் அவரை எவ்வளவு கேவலப்படுத்த வேண்டுமோ அத்தனையையும் செய்தார்கள்.. ஆனாலும் அசராமல் தான் சூப்பர் ஸ்டாருக்கே போட்டி என்று சொன்ன அவரது தைரியம் நிஜமாகவே குருட்டு தைரியமில்லை.. தன்னம்பிக்கை..! தன்னையும் ரசிக்க நாலைந்து பேர் இருப்பார்கள் என்பதை புரிந்து கொண்டு அவர்களை இப்போதுவரையிலும் இழந்துவிடாமல் ரசிகராகவே வைத்திருப்பதுதான் பவர் ஸ்டாரின் சாமர்த்தியம்.. 

புதுமுக நடிகர் சந்தானத்தின் பால்ய நண்பர்.. தான் படம் தயாரித்தால் நீதான் ஹீரோ என்று முன்பே சொல்லி வைத்திருந்த்தை இப்போது படமாக எடுத்தபோது உறுதிப்படுத்தியிருக்கிறார் சந்தானம். இதுவல்லவோ நட்பு..! சந்தானமும், பவர் ஸ்டாரும் முன்னே போய்க் கொண்டிருக்க.. இவர்களாலேயே சேது கொஞ்சம் தெரிகிறார்.. இன்னும் இவருக்கு நிறைய வாய்ப்பிருக்கிறது..!

ஹீரோயின் விசாகாவை எங்கேயிருந்து பிடித்தார்கள் என்று தெரியவில்லை. அசத்தல் முகம்.. அழகு பதுமை.. ரம்மியமா இருக்கே பாப்பா என்று நினைத்து பரவசப்பட்ட 2 நிமிடத்திற்குள் குத்துப் பாட்டில் ஆட வைத்துவிட்டார்கள். என் நினைப்பில் மண்ணையள்ளிப் போட்டு குடும்ப குத்துவிளக்கு இமேஜை துடைத்தெறிந்த இயக்குநருக்கு எனது வன்மையான கண்டனங்கள்..! அதிலும் மூவரிடமும் ஆடும்போதுகூட தனது சிரிப்பிலும், நடிப்பிலும் மில்லி மீட்டர் அளவைக்கூட குறைக்கவில்லையே.. இதுக்காகவே இவருக்கு ஒரு “ஓ” போட வேண்டும்..!

படத்தின் இன்னொரு பலம் சில, பல வசனங்கள்..! எல்லாத்தும் மேலாக கடைசியாக சந்தானம் சொல்லும் “நானாவது காமெடியன்னு தெரிஞ்சே காமெடியனா இருக்கேன். ஆனா நீ அதுகூட தெரியாமலேயே காமெடி பண்ணிக்கிட்டருக்க..?” என்று பவர் ஸ்டாரை  இன்றைய உண்மை நிலையை பொட்டில் அடித்தாற்போல் சொல்லியிருக்கும் வசனத்திற்குத்தான் தியேட்டரே அதிர்கிறது..!

இதையேதான் இப்படத்தின் ஆடியோ ரிலீஸ் பங்ஷனிலும் சந்தானம் சொன்னார். அப்போதும் எவ்வித ரியாக்ஷனும் காட்டாமல் தலைக்கு 500 கொடுத்து அழைத்து வரப்பட்ட தனது ரசிக குஞ்சுகளின் கைதட்டலில் சொக்கிப் போய் உட்கார்ந்திருந்தார் பவர் ஸ்டார்..! இனியாவது தான் ஒரு நடிகர் என்று நினைத்து கொஞ்சம் மரியாதையுடன் நடந்து கொண்டால் அவருக்கும் நல்லது.. திரையுலகத்துக்கும் நல்லது..!

சர்ச்சை நடிகர் சிம்பு இதிலும் அவராகவே வருகிறார். தன்னைப் பற்றி தானே எடுத்துச் சொல்லிக் கொண்டு இவர்களுக்கு அட்வைஸ் செய்து அனுப்பி வைக்கும் நல்ல நடிகரான கேரக்டர்.. இதையே நிஜத்திலும் இவர் செய்தால் நன்றாகவே இருக்குமே..? சிம்புவை கடத்தி வருவதற்கு ஒரு டீமை ரெடி செய்வது மட்டுமே இப்படத்தின் சொதப்பலான திரைக்கதை..! அதையும் சண்டைக் காட்சியுடன் லின்க் ஏற்படுத்திக் கொடுத்து திரைக்கதையை அடுத்தக் கட்டத்திற்கு நகர்த்த உதவியிருப்பதால் சரி போகட்டும் என்று விட்டுவிடலாம்..!

லவ் லெட்டரு கொடுக்க ஆசைப்பட்டேன் பாடலைவிடவும் பாடலை எடுத்தவிதம் மிக அழகு..! நல்ல ரசனையான இயக்குநரிடம்தான் மாட்டியிருக்கிறார்கள் இவர்கள்..! நான்கூட முதலில் சந்தேகப்பட்டேன்.. சந்தானம் இத்தனை இயக்குநர்களிடம் பணியாற்றியிருக்கிறார்.. இவரை எங்கேயிருந்து தேடிப் பிடித்தாரென்று யோசனையாகவே இருந்தது.. சில விளம்பரப் படங்களை இயக்கிய அனுபவம் மட்டுமே கொண்ட இப்படத்தின் இயக்குநர் மணிகண்டனுக்கு எனது வாழ்த்துகளும், பாராட்டுக்களும்..!

இன்றைய யூத்துகளுக்கு ஏற்றாற்போன்று ஒரு நடிகர், நடிகையரை வைத்து, நல்ல முறையில் இயக்கம் செய்து.. வசூலையும் வாரிக் குவித்திருக்கும் இந்தப் படம் இந்தாண்டின் முதல் பிளாக்பஸ்டர்தான்..! 

ஆனால் இதிலும் ஒரு சின்ன நெருடல்.. பவர் ஸ்டார் தனது அடுத்தப் படமான யா, யா-வில் தனது சம்பளமாக 50 லட்சத்தைக் கேட்டு அதையும் தயாரிப்பாளர் கொடுத்துவிட்டதாகக் கேள்விப்பட்டேன்.. இது உண்மையெனில் தமிழ்ச் சினிமாவின் தொடர்ச்சியான சீரழிவுக்கு பவர் ஸ்டாரும், இந்தத் தயாரிப்பாளரும் ஒரு காரணம் என்றுதான் சொல்ல வேண்டும்..!

காற்றுள்ளபோதே தூற்றிக் கொள் என்று தயாரிப்பாளர் கூறினாலும், இதன் லாபத்தை தியேட்டர்கள் மற்றும் விநியோகஸ்தர்களின் தலையில் கட்டி, அவர்கள் பார்வையாளர்களின் தலையில் சுமத்தி.. கடைசியாக தியேட்டர்களுக்கு வரும் ரசிகர்களின் கூட்டத்தை குறைக்கும் பணியில் இவர்களும் இணைகிறார்கள் என்பதுதான் உண்மை..! 

இதை யார் தட்டிக் கேட்பது..?   

Tweet