எதிர்நோக்கிக் காத்திருக்கும் வலையுலகப் பதிவரின் திரைப்படம்..!

05-01-2011

என் இனிய வலைத்தமிழ் மக்களே..!

“நான் சமூகத்தை மீறியவன். தனித்துளி... தனித்துளியாய் இங்கு வந்தேன். ஆடலோடும் பாடலோடும் விடை பெறுவதையே விரும்புகிறேன். சுவாசிப்பதும்,வேட்டை ஆடுவதும் , இன்பம், துன்பம் கொள்வதும், வாழ்வதும் சாவதும் எல்லாம் இயற்கையில். இதில் மதம் என்ன செய்தது? ஆனால் இயற்கையின் தழுவல் நிறைந்திருக்க வேண்டிய மனதில் மதம் அல்லவா குடிகொண்டிருக்கிறது? இந்த முரணை விரும்பாதவன். என் கல்லறையில் எழுதுங்கள் இவன், எந்த நாட்டையும் எந்த மொழியையும், எந்த இனத்தையும், எந்த மதத்தையும் சார்ந்தவன் அல்ல .இயற்கைக்கு சொந்தகாரன். இயற்கையில் நின்று பிளவுபட விரும்பாதவன். வெறும் ஆசை வார்த்தைகளை மட்டும் விதைக்கும் மத, இன, மொழி என  சமூகவாதிகளிடம் நின்று விலகி நிற்பவன். என் சகல இந்திரியங்களின் உணர்வுகளையும் உணர்கிறேன். அது இயற்கையின் உடையது. அதனால் உங்கள் உணர்வுகளையும் அறிவேன். அதுவே எனது எழுத்துகள். எனது எழுத்துகள் அனைத்தும் உங்கள் உணர்வுகளின் முகவரியை சார்ந்தது. அவை அனைத்தும்  உங்கள்  உணர்வுகளின் பிரதிபலிப்பே.”

- இப்படியொரு முன்னுரையோடுதான் அந்த இணையத்தளத்தைப் பார்த்தேன். ஏதோ வித்தியாசமாக இருக்கிறதே.. ஒருவேளை இவரும் பின்னவீனத்துவ வியாதி பீடித்தவராகத்தான் இருப்பாரோ என்றுதான் இவரைப் பற்றி விசாரித்தேன்.

ஏ.சி.வடிவுடையான். திரைப்பட இயக்குநர். விரைவில் வெளிவர இருக்கும் 'தம்பி வெட்டோத்தி சுந்தரம்' படத்தின் இயக்குநர் என்ற தகவல் கிடைத்தது. பேஸ்புக்கில் மேலும் அவரைப் பற்றித் தெரிந்து கொண்டேன். தமிழ்மணத்தின் மூலமாக இவரது வலைத்தளமும் என் கண்ணில்பட்டது. http://vcvadivudaiyan.com/blog உள்ளே புகுந்தால் தலை சுற்றுவதுபோலத்தான் உள்ளது.

காமத்தை தோய்த்தெடுப்பது எப்படி என்று நானெல்லாம் யோசித்து வரும் வேளையில் அதனை வெள்ளாவி போட்டு வெளுத்திருக்கிறார் இங்கே. அகோரிகளை மையப்படுத்தி அவர் எழுதியிருக்கும் தொடர் கட்டுரையைப் படித்துவிட்டு இனி அண்ணனை பார்க்காமல் இருந்தால் அது நமக்குத்தான் கேவலம் என்பதால் நேரில் சந்தித்தே தீர வேண்டும் என்று நினைத்திருந்தேன்.

தம்பி கணபதியின் புண்ணியத்தில் அது கடந்த வாரம் சாத்தியமானது. மதியம் 4 மணி அளவில் அவரது அலுவலகத்தில் சந்தித்துப் பேசினேன். பேச்சுக்குப் பேச்சு, மூச்சுக்கு மூச்சு தனது 'தம்பி வெட்டோத்தி சுந்தரம்' திரைப்படத்தைப் பற்றியே பேசினார்.

“மிக கடுமையாக உழைத்திருக்கிறேன். உருக்கமான கதை.. என்னால் எந்த அளவுக்கு மெனக்கெட முடியுமோ அந்த அளவுக்கு செய்திருக்கிறேன். எங்களது நாஞ்சில் நாட்டில் நடந்த ஒரு உண்மைக் கதையைத்தான் கையாண்டிருக்கிறேன். இந்த மாதக் கடைசியில் படம் ரிலீஸ்..” என்று பேசிக் கொண்டே போனார்.

படத்தின் ஸ்டில்களைப் பார்த்தபோது கரணின் பழகிப் போன திரைப்படங்களில் இருந்து நிறைய வித்தியாசம் தெரிந்தது. தமிழ்ச் சினிமா ரசிகர்களின் நெஞ்சுக்கூட்டைத் துளைத்திருக்கும் அழகி அஞ்சலியின் அழகை முழுக்க முழுக்க முக பாவனையிலேயே எடுத்துக் காட்டியிருக்கிறார். இது வழக்கமான கமர்ஷியல் கம்மர்கட்டு இல்லை என்பது மட்டும் லேசாகப் புரிந்தது.

தனது திரைப்பட அனுபவங்களை வெளிப்படையாகச் சொன்னார். மலையாளத்தின் ஹாட்டான இயக்குநரான ஷாஜி கைலாஷிடம் பத்தாண்டுகள் உதவி இயக்குநராக பணியாற்றியதாகக் கூறினார். தமிழில் 'வாஞ்சிநாதன்', 'சபரி' படங்களுக்கு இணை இயக்குநராகப் பணியாற்றிய கதைகளையும் தெரிவித்தார்.

ஷாஜி கைலாஷின் திரைப்படங்கள் பற்றி இருவரும் பேசினோம்.  தியேட்டரில் இருந்து வெளியே வரும்போது யாராவது சண்டை போட முன் வந்தால் கை நீட்டிவிடும் அளவுக்கு கோபத்தைக் கொப்பளிக்க வைப்பவைதான் ஷாஜியின் திரைப்படங்கள்.

ஷாஜியும், சுரேஷ் கோபியும் இணைந்த அரசியல், போலீஸ் திரைப்படங்கள் மலையாள சினிமாவில் ஒரு டிரெண்ட் செட்டராக அமைந்தவை. அத்திரைப்படங்கள் சிலவற்றில் தான் பணி புரிந்திருக்கிறேன் என்று சொல்லி என்னைப் பொறாமைப்பட வைத்தார்.

கிட்டத்தட்ட 14 படங்களுக்கு மேல் பணியாற்றிவிட்டுத்தான் தனியே படம் செய்ய கிளம்பியிருக்கிறார். இவருடைய முதல் படம் மிகவும் லோ பட்ஜெட்டில் எடுக்கப்பட்டது என்றாலும்கூட அந்தப் படத்தின் மேக்கிங் பார்த்துத்தான் இந்தப் படத்தின் வாய்ப்புக் கிட்டியதாகச் சொன்னார்.

ஷாஜி கைலாஷிடம் பணியாற்றியதன் காரணமாகத்தான் மலையாள இயக்குநர்கள் பாணியில் கதை, திரைக்கதை, உரையாடலுக்குத் தகுதியான எழுத்தாளரை நான் இந்தப் படத்திற்காக நாடியதாகச் சொன்னார். இந்தப் படத்திற்கு திரைக்கதை, வசனம் எழுதும் எழுத்தாளர் நமது வலையுலக பரமார்த்த குருவான திரு.பா.ராகவன்.

நமது குருஜியைப் பற்றி நான் கிண்டலாக பல விஷயங்களைச் சொன்னபோது அதற்கு நேர்மாறாக குருஜி பற்றி நல்ல விஷயங்களைச்(நமக்கா தெரியாது...?) சொல்லித் திருப்பியடித்தார். அவருடைய வேகமான பணியினால்தான் ஷெட்யூல் போட முடிந்தது என்றார். குருஜியின் எழுத்துக்கள் தனது எதிர்பார்ப்புக்கு ஏற்றவகையிலும், படத்தின் கதைக்கு சிறப்புச் சேர்க்கும் வகையிலும் இருந்ததாகச் சொன்னார்.

சரி.. பேச்சை திசை திருப்புவோம் என்று வலையுலகம், இணைய உலகம் என்று திருப்பினால் மறுபடியும் சினிமா பக்கமே கொண்டு வந்து நிறுத்துகிறார். அவ்வளவு வெறியராக இருப்பார் போலிருக்கிறதே என்று நினைத்து கிண்டலடிக்கும்போது, அவருடைய படைப்புலகம் பற்றியும் சொல்ல கொஞ்சம் பயந்துதான் போனேன்..

“இதுவரையில் 9 புத்தகங்களை வெளியிட்டுள்ளேன். இப்ப ரெண்டு புத்தகம் ரெடியா இருக்கு. கற்பகம் புத்தகாலயம் மூலமாத்தான் வெளியிட்டிருக்கிறேன். அவசியம் வாங்கிப் படிங்க..” என்று சொல்லி தன்னுடைய புத்தகங்களின் பெயர்களை மனப்பாடமான ஒப்பித்தார். ஒவ்வொன்றும் ஒரு ரகமாம். தலைப்பே சொல்கிறது..

தீ வளர்க்கும் தியானம்

விடிந்தது எழுந்து நில்
 

வெட்டவெளி தேவதை
 

காமசூத்ராவை கடந்து வா
 

நீ வாழும் உலகம்
 

மனம் ஒரு வெற்றுக் காகிதம்
 

காமமும் தியானமும்
 

சற்று மாறுதலாய் யோசி வாழ்க்கை மாறும்
 

எண்ணம் என்ற வெற்றிப் படகு

இதில் சுயமுன்னேற்ற நூல்களும், சிறுகதைத் தொகுப்புகளும் உள்ளனவாம். “புத்தகக் கண்காட்சியில் அவசியம் வாங்குகிறேன்” என்றேன். கவனிக்க.. "படிக்கிறேன்.." என்று உறுதியளிக்கவில்லை. ஏனெனில் அவரது வலைத்தளத்தில் வாசித்தவைகளை அவதானித்தபோதே இது நம்ம அறிவுக்கு எட்டாதது என்பது போலவே தோன்றியது.

பதிவுலகம் பற்றிப் பேசும்போது “நிறைய விமர்சனங்களைத் தேடித் தேடிப் படித்தேன். இப்போதும் படித்து வருகிறேன்..” என்றார். “அப்ப நல்ல எதிர்பார்ப்போடத்தான் இருக்கீங்க..?” என்றேன். புரிந்து கொண்டு சிரித்தார். “பிடிக்கலைன்னா முதல் வரியிலேயே மொக்கைப் படம் என்று எழுதும் சிலரது நேர்மை தனக்குப் பிடித்திருப்பதாகச்” சொன்னார். “இதையெல்லாம் வெளில சொல்லிராதீங்க ஸார். பய புள்ளைக ஆட ஆரம்பிச்சிருவாங்க..” என்றேன்.

“பத்திரிகைகளைப் புரட்ட நேரம் கிடைக்காததால் வலைப்பதிவுகள் மூலமாகவே பல விஷயங்களைத் தெரிந்து கொள்வதாகவும், இதற்காகவே வலைப்பதிவுகள் பக்கம் அவ்வப்போது வந்து செல்வதாகவும்” கூறினார். “இனிமேல் வரவே வராதீங்க.. முழு மூச்சுடன் சினிமாவே முக்கியம்னு மூழ்கிருங்க.. இந்தப் பக்கம் வந்து உங்களுடைய பொன்னான நேரத்தைச் செலவழித்து ஓய்ஞ்சிராதீங்க..” என்றேன். “அப்படியில்லை. நானே இப்போது எனது எழுத்துக்களை வலைப்பதிவில்தானே பதிந்து வருகிறேன். அதற்காகவாவது வருவேன். எழுதுவேன். பதிவர்களைச் சந்திக்கும் ஆர்வத்துடனும் இருக்கிறேன்..” என்றார்.(தானே தனக்குச் சூனியம் வைச்சுக்குவேன்னு அடம் பிடிக்கிறார்)

மனிதர் எளிமையாக இருக்கிறார். கவர்ச்சியான பேச்சு. மென்மையான, நாகரிகமான நடத்தை. சில இயக்குநர்களிடம் காணாத தன்மையுடன் சட்டென நெருக்கத்தைக் காட்டுகிறார். அவருடன் இருந்த இரண்டரை மணி நேரத்தில் சட்டென நெருங்கிய தோழனாகிவிட்டார். அவருடைய திரைப்படம் வெற்றி பெற வாழ்த்துச் சொல்லிவிட்டு விடைபெற்று வந்தேன்.

எழுத்தாளர், இயக்குநர் என்பதையும் சக வலைப்பதிவராகவும் அவர் எழுத்துலகிலும், சினிமாவுலகிலும் சிறப்பிக்கட்டும். நல்ல நண்பர் ஒருவரை அடையாளம் காட்டிய வலையுலகத்திற்கும், அழைத்து அறிமுகப்படுத்திய நண்பர் கணபதிக்கும் எனது நன்றி.. 

தம்பி வெட்டோத்தி சுந்தரம் படம் பற்றி இயக்குநர் ஏ.சி.வடிவுடையானே சொல்கிறார்  :

Tweet