ஊழல்களின் தாத்தாவும், தாயும் ஒரே கூட்டணியில்..!

13-12-2010

என் இனிய வலைத்தமிழ் மக்களே..!

நம்முடைய 'ஊழல் தாத்தா' ("தந்தை என்று சொல்ல வேண்டாம்.. அதையெல்லாம் தாண்டிவிட்டார் கலைஞர். இனிமேல் 'தாத்தா'ன்னே கூப்பிடலாம்.." என்று பெரும்பான்மையான பதிவர்கள் வேண்டுகோள் விடுத்துள்ளதால் இனி கலைஞர் கருணாநிதி 'ஊழல் தாத்தா' என்றே அழைக்கப்படுவார்) நேற்று ஒரு அறிக்கை விட்டுள்ளார்.

அந்த அறிக்கையில் வீட்டு வசதி வாரிய வீடுகளை முதலமைச்சரின் தன் விருப்பப் பிரிவில் வீடுகளை ஒதுக்கியதில் ஊழல் என்று புலம்பியவர்களைப் பார்த்து நாக்கைப் பிடுங்கிக் கொண்டு சாவதைப் போல ஒரு கேள்வி கேட்டிருக்கிறார்..!

அந்தக் கேள்விக்குப் போகும் முன் அவருடைய அறிக்கையை கோபித்துக் கொள்ளாமல் வாசித்து விடுங்களேன்..!

“அ.தி.மு.க. ஆதரவு நாளேடுகளில் 9-ந் தேதி "கருணாநிதி ஆட்சியில் கொள்ளை போகும் அரசு நிலங்கள்'' என்ற தலைப்பில் தி.மு.க. எம்.எல்.ஏ. மற்றும் ஐ.ஏ.எஸ். அதிகாரிகளுக்கு வீட்டு மனை வழங்கப்பட்டதாக பெரிய அளவில் செய்தி வெளியிட்டிருக்கிறார்கள்.

இந்த பிரச்சினைக்கு நான் தெளிவாக பதில் அறிக்கை கொடுத்திருந்தபோதிலும், அதே குற்றச்சாட்டு மீண்டும் வந்திருப்பதால், அ.தி.மு.க. ஆட்சிக் காலத்தில் இந்த வீட்டு மனைகள் யார் யாருக்கு வழங்கப்பட்டன என்பதை சுருக்கமாக சொல்கிறேன்.

ஜெயலலிதா ஆட்சியில் தலைமைச் செயலாளராக இருந்த என்.நாராயணன் ஐ.ஏ.எஸ்.க்கு 1993-ம் ஆண்டு 4115 சதுர அடி; முன்னாள் அமைச்சர் கே.ஏ.செங்கோட்டையன் மகன் கே.எஸ்.கார்த்தீசன் என்பவருக்கு பெசன்ட் நகர் பகுதியில் 1995-ம் ஆண்டு 4535 சதுர அடி; முன்னாள் அமைச்சர் நாகூர் மீரான் துணைவியார் நூர் ஜமிலாவுக்கு கொட்டிவாக்கத்தில் 1993-ம் ஆண்டு 2559 சதுர அடி; நாடாளுமன்ற உறுப்பினர் தம்பிதுரை மனைவி டாக்டர் பானுமதி தம்பிதுரைக்கு அண்ணாநகரில் 7 கிரவுண்ட் நிலம்; அ.தி.மு.க.வின் தொழிலாளர் பேரவைக்கு அண்ணா நகரில் 3 கிரவுண்ட் நிலம்; அ.தி.மு.க.வின் முன்னாள் அமைச்சர் எஸ்.எம்.வேலுச்சாமியின் மனைவி பானுமதிக்கு கோவையில் 1993-ம் ஆண்டு வீடு, 2004-ம் ஆண்டு தேவாரம் ஐ.பி.எஸ்., கே.விஜயகுமார் ஐ.பி.எஸ்., ஆர்.நடராஜ் ஐ.பி.எஸ். உட்பட பல ஐ.பி.எஸ். அதிகாரிகளுக்கு சோளிங்கநல்லூரில் தலா 4800 சதுர அடி;

நீதியரசர் எஸ்.ஆர்.சிங்காரவேலுவுக்கு 2005-ம் ஆண்டு சோளிங்கநல்லூரில் இரண்டு மனைகள், சட்டமன்ற உறுப்பினராக இருந்த கே.செல்வராஜ் என்பவருக்கு 1994-ம் ஆண்டு கொட்டிவாக்கத்தில் 2692 சதுர அடி, முன்னாள் முதலமைச்சரிடம் துணைச் செயலாளராக இருந்த டி.நடராஜன் ஐ.ஏ.எஸ்.க்கு 1995-ம் ஆண்டு திருவான்மியூரில் 6784 சதுர அடி; ஆதி.ராஜாராமுக்கு 1995-ல் 3101 சதுர அடி., 1993-ல் சட்டமன்ற உறுப்பினராக இருந்த சரஸ்வதிக்கு அண்ணா நகரில் 880 சதுர அடி; சட்டப் பேரவை உறுப்பினராக இருந்த மல்லிகாவுக்கு அண்ணா நகரில் 950 சதுர அடி; எம்.ஜி.ஆருடைய ஓட்டுநர் பூபதிக்கு நந்தனத்தில் 3600 சதுர அடி; எஸ்.ஆண்டித்தேவரின் மனைவி பிலோமினாவுக்கு 1994-ல் மதுரையில் 1500 சதுர அடி என்று ஒரு நீண்ட பட்டியல் உள்ளது. 2005-ம் ஆண்டு பலருக்கு இரண்டு மனைகள் கொடுக்கப்பட்ட நீண்ட பட்டியலும் உள்ளது.

எனவே அ.தி.மு.க. ஆட்சியில் அமைச்சர்களின் மனைவி, மகன் பெயர்களிலும், அ.தி.மு.க. தொழிற்சங்க அலுவலகத்தின் பெயரிலும், ஐ.ஏ.எஸ்., ஐ.பி.எஸ். அதிகாரிகள் பெயரிலும், அ.தி.மு.க. சட்டமன்ற, நாடாளுமன்ற உறுப்பினர் பெயரிலும், அ.தி.மு.க. மாவட்ட செயலாளரின் மனைவி பெயரிலும், நீதியரசர்கள் பெயரிலும் இத்தகைய வீடுகள், மனைகள் வழங்கப்பட்டுள்ளன என்பதற்கு ஒரு சிலவற்றை மட்டும் சான்றாக குறிப்பிட்டுள்ளேன்.

தி.மு.க. ஆட்சியில் வீட்டு மனைகள் ஒதுக்கீட்டில் தவறு நடந்துவிட்டதாக முக்கியத்துவம் கொடுத்து வெளியிட்ட பத்திரிகையாளர்களெல்லாம், அ.தி.மு.க. ஆட்சியில் யார் யாருக்கு இத்தகைய வீடுகள், மனைகள் தரப்பட்டன என்ற முழு விவரத்தையும் தங்கள் புலன் விசாரணையின் மூலம் தெரிந்து இனியாவது வெளியிட்டால், அவர்களின் பத்திரிகா தர்மத்தை பாராட்டலாம்..”

இவண்

“ஊழல் தாத்தா” என்கிற கலைஞர் கருணாநிதி

இனி நான்..!

இந்த விபரத்தை நான் வெளியிடாவிட்டால் பத்திரிகா தர்மத்தை கட்டிக் காப்பாற்றாதவனாகிவிடுவேன்..!  ஆகவே வெளியிட்டு விட்டேன்..!

நம்ம தாத்தா எழுதியிருப்பது எல்லாம் சரிதான். ஆனால் இப்படி அ.தி.மு.க. ஆட்சியில் நடந்திருக்கும் முறைகேட்டை இவர் ஆட்சிக்கு வந்தவுடனேயே இதனை வெளிப்படுத்தி இதற்கு நியாயம் கேட்க முனையாமல்.. அதே கொள்கையை இவரும் பயன்படுத்துவது ஏன் என்பதைச் சொல்லவில்லையே..?

ஒருவர் தனது வாழ்க்கையில் தமிழ்நாடு வீட்டு வசதி வாரியக் குடியிருப்பு வீடுகளை ஒரு முறைதான் ஏலத்தில் எடுக்க முடியும் என்கிற விதிமுறையை இவர்கள்தான் வைத்திருக்கிறார்கள். நெருங்கியவர்களுக்கு விற்க முடியவில்லை என்பதால் இவர்களே அந்த விதிமுறையை கொஞ்சம் தளர்த்திக் கொண்டு வீடுகளை விற்றதும் மீண்டும் அதே விதிமுறையை சப்தமில்லாமல் கொண்டு வந்திருப்பதாக இப்போது தெரிகிறது..!

எந்தெந்த ஆண்டுகளில் என்னென்ன விதிமுறைகளை தமிழ்நாடு வீட்டு வசதி வாரியம் கடைப்பிடித்தது என்று கேட்டால் பதில் இல்லை. ஆனால் ஒவ்வொரு ஆண்டும் இந்த முதலமைச்சர் கோட்டாவில் வீடுகளை விற்பனை செய்யும்போது மட்டும் இது போன்ற விதிமுறைகளைத் தளர்த்தி அவர்களுக்குள்ளேயே அட்ஜஸ்ட் செய்து கொண்டுள்ளதாகத் தெரிகிறது..!

இது தொடர்பாக நான் எழுதிய முந்தைய பதிவில்  எழுதியதன் சாரம்சத்தையே புரிந்து கொள்ளாமல் “இது முதலமைச்சரின் விருப்புரிமை. அவர் பார்த்து என்ன வேண்டுமானாலும் செய்வார். நீ யார் கேட்பதற்கு..” என்றே என்னிடம் பலரும் கேட்டார்கள்.

வீட்டு வசதி வாரியத்தின் மூலமாக வீடோ, நிலமோ ஒதுக்கீடு பெற வேண்டுமென்றால் பொது ஒதுக்கீடு தவிர ஒவ்வொரு ஸ்கீமிலும் பதினைந்து சதவிகித அளவுக்கு அரசு விருப்புரிமை ஒதுக்கீடு என்பதை நமது ஆட்சியாளர்கள் அவர்களது வசதிக்காகவே வைத்திருக்கிறார்கள்.

இதில் தி.மு.க., அ.தி.மு.க.வும் கூட்டுக் களவாணிகள்.. ஒருவர் மாற்றி ஒருவர் என்னதான் திட்டிக் கொண்டாலும் உள்ளுக்குள் இப்படியொரு அண்ட்ர்ஸ்டேண்ட்டிங்கில்தான் இருந்திருக்கிறார்கள். நம்மதான் முட்டாப் பயலுகளாட்டம் “ஆத்தா கொஸ்டீன் கேக்குது..! தாத்தா திருப்பியடிச்சிட்டாரு”ன்னு திருப்திப்பட்டிருக்கோம்..!

முதல்வரின் பரிந்துரையிலேயே இது நடந்தாலும்கூட வீட்டு வசதி வாரியம் விதித்திருக்கும் சில விதிகளை மீறி ஒதுக்கீடு செய்ய முடியாது. அதாவது வீட்டு வசதி வாரியம் விதித்திருக்கும் நிபந்தனைகளை பூர்த்தி செய்திருக்கும் ஒருவருக்குத்தான், முதல்வர் தனது விருப்புரிமை கோட்டாவிற்குள் பரிந்துரை செய்ய முடியும்..!

முதலமைச்சர் கோட்டா என்பதற்காக அண்ணா சிலையின் அருகே பிச்சையெடுப்பவனை அழைத்து வீட்டு வசதி வாரிய நிபந்தனைகள் பூர்த்தியாகாமல் வீட்டைக் கொடுக்க முடியாது.. அம்பானிக்கு அக்கா மகனாக இருந்தாலும் இதேபோலத்தான்..!

முதலில் வாரியம் கிளியரிங் சர்டிபிகேட் கொடுத்தால்தான் முதலமைச்சர் அதில் கையெழுத்திட முடியும். அல்லது கையெழுத்திட வேண்டும். இதுதான் அரசு விதி..!

இதைத்தான் பலரும் முதலமைச்சர் நினைத்தால் வீட்டு வசதி வாரிய நிபந்தனைகளை நிறைவேற்றாமல் போனால்கூட வீட்டை வழங்கலாம் என்று எண்ணிக் கொண்டு தாத்தாவுக்கு ஆதரவு கொடுக்கிறார்கள்.. 

வீடாகவோ அல்லது நிலமாகவோ வீட்டு வசதி வாரியத்தின் மூலம்  ஒதுக்கீடு பெற வேண்டுமெனில் ஒதுக்கீடு பெறுபவருக்கோ அல்லது அவர் தம் குடும்பத்தில் இருக்கும் இருப்பவருக்கோ மாநகராட்சி, நகராட்சி, முதல் நிலை நகராட்சி எல்லைகளுக்குள் எந்த இடத்திலும் வீடோ, நிலமோ சொந்தமாக இருக்கக் கூடாது.. - இது வாரியம் விதித்திருக்கும் பொதுவான நிபந்தனைகளில் ஒன்று..

இதன்படிதான் தற்போது தாத்தாவின் ஆட்சிக் காலத்தில் உளவுத்துறையின் தலைவர் ஜாபர்சேட்டின் மனைவிக்கும், நக்கீரன் இணை ஆசிரியர் அ.காமராஜின் மனைவி ஜெயசுதாவுக்கும் கொடுக்கப்பட்டிருக்கும் நில விற்பனை முறைகேடான விஷயமாகிறது..

ஏற்கெனவே ஜாபர்சேட்டுக்கு சென்னையில் 2 வீடுகள் உள்ளன என்பது நிரூபணமாகியுள்ளது. அத்தோடு இத்தனை வருஷ காவல்துறை பணிக்குப் பின்பும் ஜாபர்சேட்டுக்கு சொந்தமாக வீடே இருக்காது என்பதை நம்புகின்ற அளவுக்கு முட்டாள்கள் யாரும் தமிழ்நாட்டில் இருக்க மாட்டார்கள் என்று நினைக்கிறேன்..! இதேபோலத்தான் காமராஜூக்கும் ஏற்கெனவே சென்னையில் சொந்தமாக வீடுகள் உள்ளன என்பது தெரிய வந்துள்ளது.

சென்னை உயர்நீதிமன்றத்தில் நீதிபதியாக இருக்கும் சத்தியநாராயணன் தன்னுடைய மனைவி அம்பிகாவின் பெயரில் மதுராந்தகத்தில் ஒதுக்கீடு பெற்றிருக்கிறார். இவர் பொது ஒதுக்கீட்டின்பேரில் குலுக்கல் முறையில்தான் இந்த வீட்டைப் பெற்றிருக்கிறார்.

ஆனால் இந்த நீதிபதி உயர்நீதிமன்றத்தில் தான் நீதிபதியாக பதவியேற்றபோது தன்னுடைய சொத்துக் கணக்கை வெளிப்படுத்தியிருக்கிறார். அதிலே தனக்குச் சென்னையில் சொந்த வீடு இருப்பதாகக் குறிப்பிட்டிருக்கிறார்.

பொது ஒதுக்கீடாக இருந்தாலும்கூட சொந்த வீடு இருந்தால் நிச்சயம் அவருடைய விண்ணப்பம் நிராகரிக்கப்படுதல் வேண்டும். ஆனால் இவர் குலுக்கலில் எப்படி கலந்து கொண்டார்..?

உயர்நீதிமன்ற நீதிபதி பானுமதி சோழிங்கநல்லூரில் இரண்டு ஒதுக்கீட்டை அடுத்தடுத்து பெற்றிருக்கிறார். ஒருவருக்கு ஒரு வீடுதான் என்பதும் வாரியத்தின் தலையாய விதி. அதைப் புறக்கணித்து இப்படி இரண்டு வீடுகளை விற்பனை செய்திருக்கிறார்கள்.

ஆந்திர உயர்நீதிமன்ற நீதிபதியாக இருக்கும் ராஜ இளங்கோ நொளம்பூரில் மூன்று பிளாட்டுக்களை முதலமைச்சரின் விருப்புரிமை கோட்டாவில் பெற்றிருக்கிறார். இவருக்கு ஏற்கெனவே நுங்கம்பாக்கத்திலும், திருவான்மியூரிலுமாக நான்கு வீடுகள் இருப்பதை தனது சொத்துக் கணக்கில் காட்டியிருக்கிறார்.. இவர் எப்படி இந்த லிஸ்ட்டில் வர முடியும்..?

இன்னொரு அசிங்கம் சமூக சேவகர்கள் யார் என்பதை அரசு வெளிப்படுத்தியிருக்கும்விதம்..! இனிமேல் நாட்டு மக்களாகிய நீங்கள்.. உங்களுக்கு நீங்களே சமூக சேகவர் என்று எழுதி கையெழுத்திட்டு வைத்துக் கொள்ளுங்கள்.. அந்த சர்டிபிகேட்டே செல்லுபடியாகும். எதற்கும் இந்த அரசிடம் போகத் தேவையில்லை..!

சமூக சேவகர் கோட்டா பிரிவில் யார், யாருக்கு வீடுகளை ஒதுக்கியிருக்கிறார்கள் என்கிற லிஸ்ட்டைப் படித்தால் இப்படித்தான் தோன்றுகிறது..

முதல்வரின் செயலாளர் ராஜமாணிக்கத்தின் மகன் துர்கா சங்கர், இன்னொரு செயலாளர் ராஜரத்தினத்தின் மகன் திருமாவளவன், இன்னொரு செயலாளர் தேவராஜின் மகள் தீபா, முத்துவீரன் ஐ.ஏ.எஸ்.ஸின மகன் நவீன்குமார், உளவுத்துறை ஐ.ஜி. ஜாபர்சேட்டின் மனைவி பர்வீன் ஜாபர், முதல்வரின் மக்கள் தொடர்புத் துறை அதிகாரி மருதநாயகத்தின் மகள்கள் வித்யா, சிவசங்கரி, வீரபாண்டி ஆறுமுகத்தின் மருமகள் பிருந்தா செழியன், பேத்தியான 20 வயது சூர்யா - இப்படி இவர்களெல்லாம் சமூக சேவகர்கள் என்ற லிஸ்ட்டில் வீடுகளைச் சுருட்டியிருக்கிறார்கள்.

முதலில் சமூக சேவகர் என்றால் அதற்கு குறைந்தபட்சத் தகுதியாவது வேண்டாமா..? முதலமைச்சரின் விருப்புரிமை கோட்டாவாக இருந்தாலும் அவர்கள் இந்தப் பிரிவின் கீழ் வரும்போது பிரிவின் தலைப்புக்குத் தகுதியானவர்களாக இருத்தல் வேண்டுமே..?

இவர்களையெல்லாம் எந்த முட்டாளாவது சமூக சேவகர் என்று சொல்வானா..? நான் சொல்ல மாட்டேன். எக்ஸ்னோரா நி்ர்மல், டிராபிக் ராமசாமி, அனாதை இல்லம் நடத்தும் ராதாகிருஷ்ணன், வித்யாசாகர்.. இப்படி சிலரைச் சொல்லுங்கள்.. நிச்சயம் ஒத்துக் கொள்ளலாம்.. மாறாக மேற்கண்டவர்களையெல்லாம் எப்படி சமூக சேவகர்கள் என்ற லிஸ்ட்டில் ஒத்துக் கொள்வது..?

அதுலேயும் பாருங்கள்.. இந்த சமூக சேவகர் சர்டிபிகேட்டுக்கு அலைய வேண்டியதில்லையாம். அவர்களுக்கு அவர்களே கொடுத்துக் கொள்ளலாமாம்..? அதாவது நான் ஒரு சமூக சேவகர் என்று எனக்கு நானே எழுதி, கையொப்பமிட்டுக் கொடுத்தால் அரசு ஏற்றுக் கொள்ளுமாம்..? என்ன கேவலம் இது..? இவங்க என்ன ஆட்சியா நடத்துறாங்க..? இப்படி எவனாவது ஒருத்தன் கேணத்தனமான பேசுவானா..?

சமூக சேவகர் என்ற பிரிவையே ஏன் இந்தப் பட்டியலில் வைத்திருக்கிறார்கள்.? கஷ்டப்படும் சமூக சேவகர்களுக்கு இப்படி வீடுகளைக் கொடுத்தால் அவர்கள் மென்மேலும் அவர்களது சேவையில் ஈடுபடுவார்களே என்றுதான்..! ஆனால் இப்படி தெரிந்தவர்கள், கூட இருக்கிறவர்கள், காபி, டீ வாங்கித் தருபவர்கள், அவர்களுடைய பிள்ளைகள் என்று எல்லாருக்கும் இந்தப் பிரிவின் கீழ் வீடுகளை ஒதுக்கியிருப்பது முறைகேடு இல்லையா? இது அதிகாரத் துஷ்பிரயோகம்தானே..!

ஆனால் இதற்குப் பதிலளித்திருக்கும் வீட்டு வசதி வாரிய அமைச்சர் “சமூக சேவகர் சான்றிதழ் குறித்தெல்லாம் அரசு என்னென்ன விதிமுறைகளைப் பின்பற்றியிருக்கிறதோ, அதனைப் பின்பற்றித்தான் சான்றிதழ் பெற்று ஒதுக்கீடுகள் நடந்திருக்கின்றன..” என்று கூறியிருக்கிறார்..

இது ஒன்றே போதும் இந்த ஆட்சியின் லட்சணத்தைத் தெரிந்து கொள்ள..! சமூக சேவருக்கான அளவுகோல் என்ன? அர்த்தம் என்ன..? விதிமுறைகள் என்ன..? என்பதுகூட தெரியாத கபோதிகள்தான் இப்போது நம்மை ஆண்டு கொண்டிருக்கிறார்கள் என்பது இதிலிருந்தே கண்கூடாகத் தெரிகிறது..!

இந்த முட்டாள்கள்தான் திருப்பித் திருப்பிச் சொல்கிறார்கள் இந்தியாவிலேயே நாங்கள்தான் ஒழுக்கமான, நேர்மையான ஆட்சி நடத்தி வருகிறோம் என்று..!

இதில் இன்னொரு கூத்தாக கோடிக்கணக்கான ரூபாயைக் கண்ணால்கூட பார்க்க முடியாதவர்களெல்லாம் இந்த வீடுகளை வாங்கியிருக்கிறார்கள் என்பதுதான்.

ஜெ.ராதாகிருஷ்ணன் என்னும் ஐ.ஏ.எஸ். அதிகாரி 59.29 லட்சம் மதிப்புள்ள நிலத்தைப் பெற்றுள்ளார்.

தற்போதைய தொழில் துறை இணைச் செயலாளர் திருவான்மியூர் திருவள்ளுவர் நகரில் 76.58 லட்சம் ரூபாய் மதிப்புள்ள வீட்டு மனையைப் பெற்றுள்ளார்.

உளவுத்துறை ஐ.ஜி. ஜாபர்சேட் தனது மனைவியின் பெயரில் வாங்கியிருக்கும் வீட்டு மனையின் விலை 1.15 கோடி ரூபாய்.

முதல்வரின் பி.ஏ. ராஜமாணிக்கத்தின் மகன் துர்கா சங்கர் பெற்றிருக்கும் வீட்டு மனையின் மதிப்பு 1.12 கோடி ரூபாய்.

நக்கீரன் இணை ஆசிரியர் அ.காமராஜ் தனது மனைவி ஜெயசுதாவின் பெயரில் வாங்கியிருக்கும் வீட்டு மனையின் மதிப்பு 1.15 கோடி ரூபாய்.

மேலும் முதல்வர் அலுவலகத்தில் பணியாற்றும் உதவி பி.ஆர்.ஓ.க்களான பாலசக்திதாசனும், மாறனும் முகப்பேர் ஏரித் திட்டத்தில் வீடு வாங்கியுள்ளார்கள். இதன் மதிப்பு கிட்டத்தட்ட 75 லட்சம் ரூபாய்..!

மேலும், முதல்வரின் வீல்சேரை தள்ளிக் கொண்டு வரும் பாண்டியன், கணேசன், வினோதன் ஆகிய மூவருமே இந்த முறையில் வீடுகளைப் பெற்றிருப்பதை சென்ற பதிவிலேயே குறிப்பிட்டிருந்தேன்..

இதில் மிக சுவாரஸ்யமான விஷயம் ஒன்று.. வீடுகள் இவர்கள் பெயருக்கு பட்டா மாற்றப்பட்டு கொடுக்கப்பட்ட அன்று மாலையே, வேறு ஒருவருக்கு இந்த மூவருமே வீட்டை விற்றிருக்கிறார்கள்.. இது எப்படி இருக்கு..? பின்பு எதற்கு இவர்கள் வீட்டை வாங்கினார்கள்..? ஒரு காரண, காரியம் வேண்டாமா..?

முதலில் இந்த சப்-இன்ஸ்பெக்டர்களுக்கு இந்த வீட்டை வாங்கும் அளவுக்கு பணம் எங்கேயிருந்து வந்திருக்கும்? வரும்? என்றெல்லாம் நமது தாத்தா யோசித்திருக்க மாட்டாரா..?

கையில் கோடிக்கணக்கணக்கில் பணம் வைத்திருப்பவன்.. ஏன் வேலை மெனக்கெட்டு இங்க வந்து நம்ம வீல்சேரைத் தள்ளுகிறான் என்ற யோசனை நம்ம ஊழல் தாத்தாவுக்கு ஏன் எழவில்லை..? “இதெல்லாம் முறைப்படிதான் நடந்ததது. நடக்கிறது..” என்று ஒற்றை வரியில் தாத்தா முடித்திருக்கிறார்.

அப்படியானால் இப்போது அவர்களுக்குப் பணம் கொடுத்தது யார்..? யாரிடம் அவர்கள் விற்பனை செய்தார்கள்..? இதற்காக அவர்கள் பெற்றுக் கொண்ட சன்மானம் என்ன என்கிற கேள்விகள் நமக்குள் எழுபவை நியாயம்தானே..?

சொந்தப் பயன்பாட்டுக்கு மட்டுமே என்று இருந்த நிபந்தனையையும் இவர்களுக்கு வேண்டியவர்களுக்குக் கொடுக்க வேண்டுமே என்கிற ஒரே காரணத்துக்காக திருத்தி, அந்த ஒரு ஒதுக்கீட்டுக்கு மட்டும் என்று வாய் மொழியாகச் சொல்லி, நிபந்தனைகள் தளர்த்தப்பட்டிருப்பதை பகிரங்கப்படுத்தாமல், இணையத்திலும் தெரிவிக்காமல் மிகக் கமுக்கமாக அவர்களுக்குள்ளேயே விஷயத்தைப் பகிர்ந்து கொண்டு வாரியத்தின் நிலங்களையும், வீடுகளையும் விற்றிருக்கிறார்கள்..!

இப்போது நம்ம ஊழல் தாத்தா சொல்கிறார்.. “நிபந்தனைகள் தளர்த்தப்பட்டுத்தான் விற்கப்பட்டன” என்று.. “ஏன்யா தளர்த்துன?ன்னு கேட்டால் “அதிகமான நிலங்கள் விற்பனையாகாமல் இருந்தன. அதனால்தாதன்” என்று மீண்டும் வாய் கூசாமல் புளுகிறார்..

ஒரு நாளைக்கு இவர் எவ்வளவு பொய்தான் பேசுவார்..? இப்போதே இப்படியென்றால் தனது பொது வாழ்க்கையில் எத்தனை பொய்களை அள்ளி வீசியிருப்பார் இவர்.. அண்டப் புளுகன், ஆகாசப் புளுகன் என்றுகூட நாம் இவரைக் கூப்பிடலாம்..!

வீட்டு வசதி வாரிய வீடுகளையாவது விற்பனையாகாமல் இருக்கின்றன என்று சொன்னால் நம்பலாம். ஏனெனில் கமிஷனில் கட்டப்படும் அந்த வீடுகள் எந்த லட்சணத்தில் இருக்கும் நமக்கே தெரியும். ஆனால் நிலங்கள்.. வெற்று இடங்கள்.. யோசித்துப் பாருங்கள்..!

நிலமாக விற்பனை செய்ய முன் வந்தால் எத்தனை பேர் ஓடி வருவார்கள்..? பொது ஏலத்தில் விட்டால் ரியல் எஸ்டேட்காரர்கள் வந்து குவிந்துவிடுவார்களே..! ஏலத்தில் விட்டால் ஏலத் தொகை கூடிக் கொண்டே அல்லவா போகும்..? சென்னை மற்றும் அதன் சுற்றுப்புறங்களில், அதுவும் திருவான்மியூர் பகுதிகளில் நிலம் விற்பனையாகவில்லை என்று எந்த மடையனாவது சொல்வானா..?

முதல்முறையாக நமது ஊழல் தாத்தாதான் இப்படி புளுகியிருக்கிறார்.. இவரது இந்த அண்டப்புளுகின் மூலம் கிடைத்த நிலத்தில்தான் ஜாபர்சேட், நக்கீரன் இணை ஆசிரியர் அ.காமராஜ், முதல்வரின் பி.ஏ. ராஜமாணிக்கத்தின் மகன் துர்காசங்கர் மூவரும் கூட்டணி வைத்து அடுக்கு மாடி குடியிருப்பு ஒன்றைக் கட்டி வருகிறார்கள்..!

கட்டி முடித்து தனித்தனி பிளாட்டுகளாக விற்று காசு பார்க்கப் போகிறார்கள்.. ஆனால் அரசுக்கு..? எத்தனை கோடி நஷ்டங்கள்..? இந்த விருப்புரிமை கோட்டாவில் இல்லாமல் பொது ஏலத்தில் இந்த நிலத்தை.. அதுவும் திருவான்மியூர் நிலத்தை விற்பனைக்குக் கொண்டு வந்திருந்தால் வாரியம் நிர்ணயித்திருக்கும் விலையைவிடக் கூடுதலாகவே கிடைத்திருக்குமே..? ஏன் செய்யவில்லை..?

நியாயமான முறையில் நடக்காதபட்சத்தில் இதனை நாம் சந்தேகக் கண்ணோடுதானே பார்க்க வேண்டியிருக்கிறது..! 

முதலமைச்சரின் விருப்புரிமை கோட்டாவில் வீடோ, வீட்டு மனையோ கேட்டு விண்ணப்பம் கொடுத்த பலருக்கும் பெயரைத் தவிர முகவரியே இல்லையாம்.. தேதிகூட போடாமல்தான் விண்ணப்பக் கடிதமே கொடுத்திருக்கிறார்களாம்.. அவர்களுக்கு ஒதுக்கீடு செய்து அரசு போட்ட அரசாணையிலும் இதே நிலைதான்..

லீஸ் மற்றும சேல் அக்ரிமெண்ட்டில் மனையோ அல்லது வீடோ வாங்குபவர்களின் புகைப்படத்தை ஒட்ட வேண்டும் என்பது அரசு விதிமுறை. போட்டோ ஒட்டுவதற்காகவே அதில் இடமும் இருக்கிறது. ஆனாலும் சில அக்ரிமெண்ட்டுகளில்ல் படங்களும் மிஸ்ஸிங்காம்..! இப்படியேதான் பத்திரப் பதிவுத் துறையில் பதிவாகியுள்ளது.

தி.மு.க. ஆட்சியிலாவது பரவாயில்லை. தனித்தனி அரசாணைகள் போட்டிருக்கிறார்கள். ஆனால் அதிமுக ஆட்சியில் மொத்தமாகத்தான் அரசாணையை வெளியிட்டிருக்கிறார்கள். 2005-ம் ஆண்டு 21 பேருக்கு ஒரே ஆர்டரில் சமூக சேவகர்களுக்கான வீட்டை ஒதுக்கீடு செய்து கொடுத்திருக்கிறார்கள்.

அப்பாடா.. ஊழல்களின் தாயான செல்வி ஜெ,ஜெயலலிதாவும், ஊழல்களின் தாத்தாவான கலைஞர் மு.கருணாநிதியும் இந்த ஒரு விஷயத்திலாவது நேர்க்கோட்டில் வந்திருக்கிறார்களே.. அந்தவரையிலும் சந்தோஷம்..!

வாழ்க திராவிடம்..! வாழிய தமிழகம்..!! வளர்க அரசியல்வியாதிகள்..!!!

செய்திகள் உதவி : பல்வேறு பத்திரிகைகள், மற்றும் இணையத்தளங்கள்

இதையும் படியுங்கள் :

இந்தியாவின் ஊழல்களின் தந்தை கலைஞர் கருணாநிதி..!

Tweet