தமிழ்ச் சினிமாவுக்கு வரிவிலக்கு - குழப்பமான அரசாணை - யாருக்கு லாபம்..?

26-07-2011

என் இனிய வலைத்தமிழ் மக்களே..!

கருணாநிதி தனது கடந்த கால ஆட்சியில் திரையுலகத்தினருக்கு அளித்த மாபெரும் சலுகை, தமிழில் தலைப்பு வைத்தால் அத்திரைப்படங்களுக்கு முழு வரிவிலக்கு என்று அறிவித்ததுதான்.

இந்த வரிவிலக்கால் கடந்த நான்கரையாண்டு காலமாக வெளிவந்த தமிழ்த் திரைப்படங்களைத் தயாரித்த தயாரிப்பாளர்களும், விநியோகஸ்தர்களும், திரையரங்கு உரிமையாளர்களும், கூடவே தாத்தாவின் பேரன்களும் முழு பலன்களைப் பெற்றார்கள். அதே நேரத்தில் வழக்கமான முறையில் கேளிக்கை வரியைப் பிடித்தம் செய்திருந்தால் அதில் குறிப்பிட்ட தொகை உள்ளாட்சி அமைப்புகளுக்குப் போய்ச் சேர்ந்திருக்கும். இதனால் ஏற்படும்  இழப்பீட்டுத் தொகையை அரசே உள்ளாட்சி அமைப்புகளுக்கு வழங்கும் என்றும் அரசு சொல்லியிருந்த்து. இதனால் திரைப்படங்களின் தயாரிப்புக்கு ஏற்றவாறு மாநில அரசு, உள்ளாட்சி அமைப்புகளுக்கு வரிவிலக்கு அளித்த தொகையை அளிக்க வேண்டிய கட்டாயத்திற்குள்ளானது.

இது ஒரு புறமிருக்க.. தமிழ்ப் பெயர்கள் என்று சொல்லிக் கொண்டு அன்றாடம் பயன்படுத்தும் நடைமுறைத் தமிழை வைத்துக் கொண்டு ஜல்லியடித்தது தமிழ்ச் சினிமாவுலகம். முதல் அம்பு சிவாஜியில் ஆரம்பித்தது. சிவாஜி என்ற எழுத்து நடைமுறைத் தமிழ் என்று விளக்கமளித்த கருணாநிதி அரசு அதற்கு வரிவிலக்கு அளித்தது. அவ்வளவுதான் அதன் பிறகு அனைத்து நடைமுறை தமிழ்களும் சினிமா தலைப்புகளாகி நடைமுறைக்கு வந்துவிட்டன.

சென்ற ஆண்டு வெளிவந்த அம்பாசமுத்திரம் அம்பானி, மதராசபட்டினம்,  தில்லாலங்கடி, பாணா காத்தாடி, மாஸ்கோவின் காவிரி, எந்திரன், பாஸ் என்ற பாஸ்கரன், மைனா, வ குவார்ட்டர் கட்டிங், சித்து +2, கோட்டி, சிக்குபுக்கு, சிங்கம், பையா, குட்டி, கோவா, சுறா, கொலை கொலையாம் முந்திரிக்கா, மிளகா என்று வரிசை கட்டி வந்த திரைப்படங்களிலெல்லாம் தமிழ் மொழியின் வளர்ச்சி, இந்த நடைமுறைத் தமிழ் என்கிற ஓட்டைக்குள் நுழைந்து பதுங்கிவிட்டன..!

இந்த வரிவிலக்கால் யாருக்குத்தான் லாபம் கிடைத்தது..? இந்த அரசாணை வெளியிடப்பட்ட நாளிலிருந்து, 2010 டிசம்பர் 31-வரையிலும், 1,208 தமிழ் திரைப்படங்களுக்கு வரிவிலக்கு அளிக்கப்பட்டுள்ளது. இதனால், அரசுக்கு நிச்சயம் 300 கோடி ரூபாய்வரை வருவாய் இழப்பு ஏற்பட்டிருக்கும் என்று நினைக்கிறேன். அதே சமயம் இத்தொகை முழுவதும் தயாரிப்பாளர்களுக்கும், விநியோகஸ்தர்களுக்கும், திரையரங்கு உரிமையாளர்களுக்கும்தான் கிடைத்திருக்குமே தவிர, படம் பார்க்க வந்த ரசிகர்களுக்கு இதனால் எந்தவித்த்திலும் நன்மையில்லை. மாறாக அவர்களிடமிருந்து கூடுதலான தொகையைத்தான் சுருட்டியிருக்கிறார்கள்.

கருணாநிதி ஆட்சிக்கு வந்த பின்புதான் ஏஸி இல்லாத தியேட்டர்களில் கட்டணம் 50-க்கு கீழேதான் இருக்க வேண்டும். ஏஸி உள்ள தியேட்டர்களிலும் ஊரைப் பொறுத்து 75 ரூபாய்தான் அதிகபட்ச கட்டணம் என்று ஒரு நாள் அறிவித்தார். அவர் அவ்வாறு அறிவித்த அன்று இரவிலேயே சென்னையில் இருந்த மல்டிபிளக்ஸ் திரையரங்க உரிமையாளர்கள், அபிராமி ராமநாதன் தலைமையில் கோபாலபுரத்துக்கு படையெடுக்க, மறுநாளே அந்த உத்தரவில் மாறுதல் செய்யப்பட்டு, இந்த டிக்கெட் விலை கட்டுப்பாடு மல்டிபிளெக்ஸ் தியேட்டர்களுக்கு பொருந்தாது என்று விதிவிலக்கு அளிக்கப்பட்டது.

இன்னும் கொஞ்ச நாட்கள் கழித்து திரைப்படம் வெளியான சில நாட்களுக்கு மட்டும் டிக்கெட் கட்டணத்தை எவ்வளவு வேண்டுமானாலும் உயர்த்திக் கொள்ளலாம் என்று அரசு அறிவித்தது. இதனாலும் அதிகம் பயனடைந்தவர்கள் தியேட்டர்காரர்களும், விநியோகஸ்தர்களும், தயாரிப்பாளர்களும்தான்..!

சிறு நகரங்களில் வெறும் 30 ரூபாய் டிக்கெட்டை வணிகவரித்துறையின் சீல் இல்லாமல் 50 ரூபாய்க்கு கவுண்ட்டரில் கொடுத்து துவக்கப்பட்ட கொள்ளையடிப்பு, புதிய படங்களின்போது 100 ரூபாய்க்கு விற்கப்பட்டு 30 ரூபாய்க்கு மட்டுமே விற்கப்பட்டதாக கணக்குக் காட்டப்பட்டு அந்த 30 ரூபாய்க்கு கொடுக்கப்பட வேண்டிய வரியான 1 ரூபாயும் வரிவிலக்கால் அவர்களிடமே போய்ச் சேர்ந்த்து. கடைசியில் ஏமாந்த்து என்னைப் போன்ற அதீத சினிமா ரசிகர்கள்தான்..!

தியேட்டர்களிடமிருந்து வசூலிக்கப்பட்ட வரியில் 90 சதவீதத் தொகை,  உள்ளாட்சி அமைப்புகளுக்கு சென்று கொண்டிருந்தன. இந்த வரிச் சலுகையால் 300 கோடி ரூபாயை அனாவசியமாக தேவையில்லாமல் அரசு தனது இருப்பில் வைத்திருக்கும் பணத்தில் இருந்து உள்ளாட்சி அமைப்புகளுக்கு எடுத்துக் கொடுத்திருக்கிறது..!

ஒரு பக்கம் தமிழை வளர்க்க உதவும் என்று வாயில் முழம் போட்ட அந்த வார்த்தைகளும் பொய்யாகி, வரி விலக்கினால் சாதாரண பொதுஜனத்திற்கும் எந்தப் பலனுமில்லை என்ற இன்றையச் சூழ்நிலையில் கடந்த 6 மாதங்களாக எத்திரைப்படத்திற்கும் வரிவிலக்கு அளிக்காமல் மெளனம் காத்து வந்தனர் அரசு அதிகாரிகள்.

இதற்கு அச்சாரமாக கடந்த வருடமே தமிழ்த் திரைப்படத் தயாரிப்பாளர் சங்கத்தினர் பெரிய படங்களுக்கு வரி விலக்கு தேவையில்லை. சிறிய பட்ஜெட் படங்களுக்கு மட்டும் கொடுங்கள் போதும் என்று அரசிடம் முறையிட்டிருந்தார்கள். ஏனெனில் பெரிய பட்ஜெட் படங்களை ரிலீஸ் செய்யும்போது தியேட்டர்காரர்கள் அதிக விலைக்கு டிக்கெட்டுக்களை விற்றதன் மூலம் கிடைத்த லாபம் பெரும்பாலும் தியேட்டர் அதிபர்களுக்கும், விநியோகஸ்தர்களுக்குமே போய் சேர, தயாரிப்பாளர்களுக்கு எதுவும் கிடைக்கவில்லை..! அதே சமயம் சிறிய பட்ஜெட் படங்களுக்கு மட்டும் வரி விலக்கு அளித்து, அதன் மூலம் தியேட்டர் கட்டணத்தை குறைத்தால், மக்கள் கூட்டம் அதிகமாக வந்து, சுமாரான வசூலாவது கிடைக்குமே என்று தயாரிப்பாளர்கள் எதிர்பார்த்தார்கள். ஆனால் இதனை திரையரங்கு உரிமையாளர்கள் கூட்டம், முளையிலேயே கிள்ளியெறிந்துவிட்டதால் இந்தக் கோரிக்கை குப்பைக் கூடைக்குப் போனது.

கடந்த 6 மாதங்களாக வெளிவந்த திரைப்படங்களுக்கான வரியை உடனே கட்டும்படி 2 மாதங்களுக்கு முன்பாக பல திரையரங்குகளுக்கு அரசு நோட்டீஸ் அனுப்பியது. சில திரையரங்கு உரிமையாளர்கள் வரித்தொகையைக் கட்டியிருக்கிறார்கள். சிலர் அவகாசம் கேட்டுவிட்டு தங்களது சங்கத்தில் முறையிட்டுக் காத்துக் கொண்டிருக்கிறார்கள்.

இந்த நேரத்தில்தான் கடந்த 21-ம் தேதி நம்ம ஆத்தா, புண்ணியவதி ஜெயலலிதா இது தொடர்பாக புதிய அரசாணை ஒன்றை வெளியிட்டு இன்னும் கொஞ்சம் குழப்பத்தைக் கூட்டியிருக்கிறார்.

அந்த அரசாணையை படித்துப் பாருங்கள் :

2006-ம் ஆண்டு ஜூலை 22-ம் நாள் வணிக வரி மற்றும் பதிவுத் துறையின் சார்பில் வெளியிடப்பட்ட அரசாணை (நிலை) எண்.72-ன் படி தமிழிலேயே பெயர் சூட்டப்படும் புதிய திரைப்படங்களுக்கு கேளிக்கை வரியில் இருந்து முழுமையான வரி விலக்கு அளிக்கப்பட்டது.

2006-ம் ஆண்டு நவம்பர் 20-ம் நாள் வணிக வரி மற்றும் பதிவுத் துறையின் சார்பில் வெளியிடப்பட்ட அரசாணை (நிலை) எண்.147-ன் படி, கேளிக்கை வரிவிலக்கு பழைய திரைப்படங்களுக்கும் நீட்டிக்கப்பட்டது.

2007-ம் ஆண்டு மார்ச் 30-ம் நாள் வணிக வரி மற்றும் பதிவுத் துறையின் சார்பில் வெளியிடப்பட்ட அரசாணை (நிலை) எண்.85-ன் படி, தமிழ்த் திரைப்படங்களின் காப்புரிமை வைத்திருப்போருக்கும் கேளிக்கை வரிவிலக்கு நீட்டிக்கப்பட்டது.

2007-ம் ஆண்டு ஆகஸ்ட் 22-ம் நாள் வணிக வரி மற்றும் பதிவுத் துறையின் சார்பில் வெளியிடப்பட்ட அரசாணை (நிலை) எண்.159-ன் படி, திரையிடப்படும் பழைய மற்றும் புதிய திரைப்படங்களின் தமிழ்ப் பெயர், தமிழ்ப் பண்பாட்டிற்கு உகந்ததாகவும், கண்ணியமானதாகவும் உள்ளதா என ஆய்வு செய்து பரிந்துரை செய்ய ஒரு குழு அமைக்கப்பட்டது..

திரைப்படங்களுக்கு தமிழில் பெயரிடப்பட்டால் மட்டுமே அத்திரைப்படங்களின் கதைக் கரு தமிழ்ப் பண்பாட்டிற்கு உகந்த்தாகவும், கண்ணியமானதாகவும் உள்ளது என உறுதி செய்ய இயலவில்லை. மேலும் சில தரமில்லாத திரைப்படங்கள் தமிழில் பெயரிடப்பட்டதால் மட்டுமே கேளிக்கை வரிவிலக்கு பெற்று விடுகின்றன.

மேற்கண்ட சூழ்நிலையில் கேளிக்கை வரிச்சலுகை பெற திரைப்படங்களுக்கு தமிழில் பெயர் சூட்டப்பட வேண்டும் என்ற நிபந்தனையுடன், கீழ்க்கண்ட கூடுதல் தகுதி வரையறைகளை நிர்ணயம் செய்து ஆணை வெளியிடப்படுகிறது.

(1). அவ்வாறான திரைப்படம், திரைப்படத் தணிக்கை வாரியத்திடமிருந்து “யு” சான்றிதழ் பெற்றிருக்க வேண்டும்.

(2). திரைப்படத்தின் கதையின் கருவானது, தமிழ் மொழி மற்றும் பண்பாட்டின் வளர்ச்சிக்கு உகந்த்தாக இருத்தல் வேண்டும்.

(3). திரைப்படத்தின் தேவையைக் கருதி பிற மொழிகளைப் பயன்படுத்தும் காட்சிகளைத் தவிர பெருமளவில் திரைப்படத்தின் வசனங்கள் தமிழ் மொழியில் இருத்தல் வேண்டும்.

(4). திரைப்படத்தில் வன்முறை மற்றும் ஆபாசங்கள் அதிக அளவில் இடம் பெறுமேயானால், அத்திரைப்படம் வரிவிலக்கு பெறப்படுவதற்கான தகுதியை இழக்கும்.

மேற்கண்ட வரையறைகள், திரைப்படங்களுக்கு கேளிக்கை வரிவிலக்கு கோரப்பட்டு தற்போது நிலுவையில் உள்ள விண்ணப்பங்களுக்கும் பொருந்தும்.

மேலும் கேளிக்கை வரி செலுத்துவதிலிருந்து விலக்களிக்க வரையறுக்கப்பட்ட நிபந்தனைகளை பூர்த்தி செய்கின்ற திரைப்படங்களை பார்வையிட்டு வரி விலக்கிற்கு பரிந்துரை செய்ய ஒரு புதிய தனிக்குழு ஏற்படுத்தப்படும் என அரசு ஆணையிடுகிறது. அவ்வாறான புதிய குழு அமைப்பதற்கான ஆணை தனியே வெளியிடப்படும்.

இப்படியொரு குழப்பமான விதிமுறைக்கு ஐடியா கொடுத்த மவராசன் யாருன்னு தெரியலை. ஆத்தாதான் இதுக்குக் காரணம்ன்னா சீக்கிரமா இந்தம்மாவை பெங்களூர் ஜெயிலுக்குள்ள கொண்டு போடா முருகான்னு திரும்பவும் வேண்டிக்கிறேன்..

இந்த அரசாணையின் வரலாற்றை ஒரு முறை பாருங்கள்..

முதல்ல தமிழில் பெயர் வைத்தால் வரி விலக்குன்னு சொல்லியிருக்காங்க. 2-வதா பழைய திரைப்படங்களை டூரிங் டாக்கிஸிலும் ரூரல் பகுதிகளிலும் திரையிடும்போது அவற்றுக்கும் வரி விலக்குன்னு சொல்லியிருக்காங்க.. 3-வதா பழைய திரைப்படங்களின் காப்பிரைட் உரிமையாளர்களுக்கும் இந்தச் சலுகையைக் கொடுத்திருக்காங்க. 4-வதா தமிழ்ப் பெயர்கள்தானா என்று கண்டறிந்து வரி விலக்கிற்கு அனுமதி வழங்க ஒரு தனிக் குழுவை அமைக்கப் போவதாகச் சொல்லியிருக்காங்க. இது வ குவார்ட்டர் கட்டிங் படத்தின் தலைப்பு பற்றிய சர்ச்சை எழுந்தபோது, தாத்தா செய்த தில்லாலங்கடி வேலை..!

இப்போது விதிக்கப்பட்டிருக்கும் முதல் விதியை கண்மூடித்தனமாக நான் ஏற்றுக் கொள்கிறேன். யு சர்டிபிகேட் இருந்தால்தான் வரி விலக்கு. ஓகே..

இரண்டாவதாக சொல்லப்பட்டிருக்கும் “திரைப்படத்தின் கதையின் கருவானது, தமிழ் மொழி மற்றும் பண்பாட்டின் வளர்ச்சிக்கு உகந்ததாக இருத்தல் வேண்டும்..” என்ற நிபந்தனையை எப்படி செயல்படுத்தப் போகிறார்கள் என்று புரியவில்லை.

தமிழ் மொழி மற்றும் பண்பாட்டை வெளிப்படுத்துவதற்கா இங்கே எல்லோரும் சினிமா எடுத்துக் கொண்டிருக்கிறார்கள்..? முதலில் தமிழ்ப் பண்பாடு என்றால் என்னவென்று இங்கே யாருக்காவது தெரியுமா..? அப்படியொன்று இருக்கிறதா என்ன..?

ஒரு இடைவேளை, 5 பாடல்கள், இதில் 2 குத்துப் பாடல் காட்சிகள், 4 சண்டைக் காட்சிகள், 2 ரீல்களுக்கு ஒரு முறை 1 நகைச்சுவைக் காட்சி என்று அரைத்த மாவை அரைப்பதை போல எதையோ எடுத்து ஓட்டிக் கொண்டிருக்கும் வேளையில் தமிழ்ப் பண்பாடு என்று எதை, எதையோ சொல்லி பயமுறுத்தினால் எப்படி..? இது எப்படி வேலைக்காகும் என்று ஆலோசனையில் இருந்த ஐ.ஏ.எஸ்.ஸுகள் யோசித்திருக்க வேண்டாமா..?

சரி அப்படியே ஒருவர் தமிழ்ப் பண்பாட்டின்படிதான் திரைப்படத்தை எடுத்திருக்கிறேன் என்று சொன்னாலும், அதற்கு மதிப்பீடு அளிக்கப் போவது யார்..? அதற்கான அளவுகோல்கள் என்னென்ன..? அவர்களுக்கு தமிழ்ப் பண்பாடு இதுதான் என்று எப்படி தெரியும்..? யாராவது இதற்கு பதிலளிக்க முடியுமா..? சுத்தம். சரி இதைவிடுங்க..

“திரைப்படத்தின் தேவையைக் கருதி பிற மொழிகளைப் பயன்படுத்தும் காட்சிகளைத் தவிர, பெருமளவில் திரைப்படத்தின் வசனங்கள் தமிழ் மொழியில் இருத்தல் வேண்டும்..” என்ற மூன்றாவது நிபந்தனை எந்த அளவுக்கு இயக்குநர்களுக்கு ஏற்புடையதாக இருக்கும் என்பது சந்தேகமே..!

ஏனெனில் உயர்தர வர்க்கத்தினரின் வீடுகளில் இப்போது தமிழ் மறக்கடிக்கப்பட்டு வருகிறது. பன்னாட்டு நிறுவனங்களின் காவலாளிகள்கூட ஆங்கிலத்தில்தான் பேசுகிறார்கள். இது போன்ற சூழ்நிலைகளை காட்டுகின்றபோது நடைமுறைத் தமிழைக்கூட ஒதுக்கிவிட்டு ஆங்கிலத்தைத்தான் பயன்படுத்தியாக வேண்டும். அதுதான் ஓரளவு சினிமாவுக்கு இயல்பாக இருக்கும். தமிழ்நாட்டிலேயே தமிழ் பேசாமல் இருக்கும் வீடுகளெல்லாம் இருக்கும் நிலையில் அது போன்றவைகளை வெளிப்படுத்த, தமிழை பயன்படுத்த முடியாது என்பதுதான் இயக்குநர்களின் கருத்தாக இருக்கும்.

“திரைப்படத்தில் வன்முறை மற்றும் ஆபாசங்கள் அதிக அளவில் இடம் பெறுமேயானால், அத்திரைப்படம் வரிவிலக்கு பெறப்படுவதற்கான தகுதியை இழக்கும்“ என்ற இந்த 4-வது விதிமுறையினால் நிச்சயம் தயாரிப்பாளர்களுக்கும், சென்சார் போர்டு உறுப்பினர்களுக்கும் சிக்கல்தான்..!

ஏனெனில் கந்தசாமி படத்துக்கும், நடுநசி நாய்கள் படத்துக்கும் யு சர்டிபிகேட் கொடுத்து புண்ணியம் கட்டிக் கொண்டவர்கள் சென்சார் போர்டு உறுப்பினர்கள். இந்த நிலையில் இது போன்ற படங்களை பார்க்கும் தகுதிக் குழு நியாயமாகச் செயல்பட்டு இந்தப் படங்களுக்கு வரிவிலக்கில்லை என்று சொன்னால் அதனை ஏற்றுக் கொள்ளலாம். மாறாக அவர்களும் சென்சார் போர்டு உறுப்பினர்களை போல கண்ணை மூடிக் கொண்டு கையெழுத்திட்டால் இதுவும் பணால்தான்..! சென்சார் போர்டு யு சர்டிபிகேட் கொடுத்தும் தகுதி குழு அதனை ஏற்க மறுத்தால், தயாரிப்பாளர்கள் என்ன செய்வார்கள்..?

ஆக மொத்தம், இந்தப் புதிய அரசாணையால் புதிய குழப்பத்திற்கு அடி போட்டிருக்கிறார் ஜெயல்லிதா. விரைவில் தமிழ்த் திரைப்பட உலகத்தினர் இந்த விதிமுறைகளை நீக்கச் சொல்லி ஆத்தாவைப் பார்க்க படையெடுப்பது உறுதி.

செப்டம்பர் மாதம் நடைபெறவிருக்கும் தமிழ்த் திரைப்படத் தயாரிப்பாளர்கள் சங்கத் தலைவர் பதவிக்கு நிற்கவிருக்கும் எஸ்.ஏ.சந்திரசேகருக்கும், முரளீதரனுக்கும் இந்தப் பிரச்சினை நிச்சயம் தலைவலியைக் கொடுக்கப் போகிறது..

இப்படி திரையுலகில் அனைவருமே அவரவர் சுய லாபத்தைத்தான் குறிக்கோளாக பார்க்கிறார்களே ஒழிய, சமூகம், துறை, கடைநிலை ஊழியர்கள், மற்றும் ரசிகர்களை ஒரு பொருட்டாகவே நினைப்பதில்லை. அரசு இந்தத் திட்டத்தையே நீக்கிவிட்டு திரையரங்கு கட்டணங்களைக் குறைக்க முயன்றால், தமிழ்ச் சினிமாவுலகத்துக்கு எதிர்காலத்தில் பெரும் உதவியாக இருக்கும்..!

திரையரங்கு கட்டணங்களை நாங்கள் குறைக்கிறோம். நீங்களும் வரிவிலக்கு அளியுங்கள். வரிவிலக்கு அளித்த பின்பு வருகின்ற கட்டணத்தையே ரசிகர்களிடம் வசூலிக்கிறோம் என்று சொல்லவும் சினிமாக்காரர்களுக்கும்  மனமில்லை.

இவர்களைச் சொல்லியும் குற்றமில்லை..!

அள்ள அள்ளப் பணம் என்பதைப் போல டிக்கெட் கட்டணத்தை எத்தனை உயர்த்தினாலும் ஆன்லைனில் டிக்கெட்டை புக் செய்துவிட்டு அரக்கப் பரக்க தியேட்டருக்கு ஓடிப் போய் நிற்கும் ரசிக குஞ்சாமணிகள் இருக்கின்றவரையில், பொழுது போக்க தியேட்டர்களுக்கு வர நினைக்கும் அப்பாவி தமிழர்களின் குடும்பங்களுக்கு இது நிச்சயம் சோதனைதான்..! 

Tweet

தமிழ்த் திரைப்பட இயக்குநர் சங்கத் தேர்தல் - தேர்தல் அறிக்கைகள்..!

26-06-2011

என் இனிய வலைத்தமிழ் மக்களே..!

சென்ற 19-ம் தேதியன்று பரபரப்பாக நடந்து முடிந்திருக்கும் தமிழ்த் திரைப்பட இயக்குநர்கள் சங்கத்தின் தேர்தல் முடிந்திருக்கிறது. ஆனாலும் தேர்வு செய்யப்பட்ட நிர்வாகிகள் மட்டும் இன்னமும் பதவியேற்காமல் இருக்கின்ற நிலையில் அதைப் பற்றி எழுதலாம் என்றால் சிக்கலுக்குள் சிக்கலான விஷயமாக இருக்கிறது..!

நிர்வாகிகளின் பதவியேற்பு அடுத்த வாரம் இருக்கலாம் என்று நினைக்கிறேன். அதற்குப் பின்பு மொத்தமாக எழுதலாம் என்று காத்திருக்கிறேன். அதுவரையில் சற்று பொறுத்தருள்க. 

ஆனாலும் உங்களது ஆர்வத்திற்கு கொஞ்சம் தீனி போடும்வகையில் சங்கத் தேர்தலில் போட்டியிட்ட 'ஒருங்கிணைந்த இயக்குநர்கள் அணி'யினரின்  தேர்தல் வாக்குறுதிகளையும், 'புதிய அலைகள்' என்ற பெயரில் போட்டியிட்ட இணை, துணை, உதவி இயக்குநர்கள் அணியின் தேர்தல் வாக்குறுதிகளையும் இங்கே பதிவிடுகிறேன்..!

படித்துவிட்டுக் காத்திருங்கள். ஒரு நல்ல கவர் ஸ்டோரியுடன் வருகிறேன்..!

முதலில் ஒருங்கிணைந்த இயக்குநர்கள் அணியின் தேர்தல் அறிக்கை..!

அன்பான உறுப்பினர்களுக்கு..

வணக்கம்.

நம் சங்கத் தேர்தல் வரும் 19-ம் தேதி நடைபெற இருப்பது தாங்கள் அனைவரும் அறிந்ததே.

முன்னெப்போதும் இல்லாது, இந்தத் தேர்தலில், உங்கள் அனைவரின் மனதிலும் எழுந்த கேள்விகளையும், சந்தேகங்களையும் நாங்களும் அறிந்திருக்கிறோம்.

இயக்குநர்கள் இரு வேறு அணிகளாய்ப் பிரிந்தது ஏன்..?

பத்திரிகைகளில் பரபரப்பான செய்திகள் ஏன்..?

உடனடியான சமரச சமாதானம் ஏன்..?

என்பது போன்ற கேள்விகளும் அவற்றுள் அடங்கும்.

நிற்க..

முதலில் ஒன்றைத் தெளிவுபடுத்த விரும்புகிறோம். தேர்தல் அறிவிப்புக்கு ஒரு மாதம் முன்புவரை எங்களுடன் திரண்டிருக்கும் இந்த இயக்குநர்கள் எவருக்கும் தேர்தலில் நிற்கும் எண்ணமே இல்லை.

ஆனால் இந்தச் சங்கம் எப்படி நடக்க வேண்டும்? என்னவெல்லாம் உறுப்பினர்களுக்குச் செய்ய வேண்டும்? எல்லா இடத்திலும் இயக்குநர் சங்கம் தன்மானம் இழக்காமலிருக்க என்னென்ன செய்ய வேண்டும்?

இப்படி வேண்டும், வேண்டும் எனப் பல வேண்டுதல்களை மனதுக்குள் போட்டு வைத்திருந்த இளம் இயக்குநர்கள் கூடிப் பேசிய பொழுது நினைத்தவையெல்லாம் நிறைவேற வேண்டும் என்றால், பொறுப்புக்கு வர வேண்டும் என்பது மட்டும் தெளிவாகப் புரிந்தது.

புரிந்தவர்கள் எல்லாம் ஓரணியாய் திரண்டோம்.

சிந்தனை தெளிவாய் இருந்ததால் செயல் வேகமாய் நடந்தேறியது.

இசைக் கலைஞர்கள் சங்கத்தின் மூத்தக் கலைஞர்கள் முன்னிலையில் முதல் கூட்டம் போட்டோம்.

வேட்பாளர்களை முதலில் அறிவித்தோம்.

வேட்பு மனுக்களை முதலில் தாக்கல் செய்தோம்.

என்று எல்லாவற்றிலும் முதல், முதல், முதலானோம்.

அதன் பிறகே நமது தோழமை இயக்குநர்களும் திரு.ஆர்.கே.செல்வமணி தலைமையில் மற்றொரு அணியாய் திரண்டனர்.

இந்த நேரத்தில்தான் இதுவரை எந்தத் தேர்தலிலும் இல்லாத அளவிற்கு ஒரே குடும்பமாய் வாழ்ந்திருந்த இயக்குநர்கள் எதிரெதிர் அணியாய் நிற்க - சூழ்நிலை இறுக்கமானது. இதையறிந்து கொண்ட பத்திரிகைகள், இயக்குநர்கள் சங்கத்தில் விரிசல் விழுந்ததாக நாடெங்கும் செய்திகளைப் பரவச் செய்தன.

தேர்தல் களத்தில் நாங்கள் முன் வைத்த காலை பின்னெடுக்கத் தயங்கினோம்.

அனுபவமில்லாதவர்கள்..!

பதவி ஆசை கொண்டவர்கள்..!

யார் தாளத்திற்கோ ஆடுகிறார்கள்..!

என்று தொடர்ச்சியாய் குற்றச்சாட்டுக்கள்..

தயங்கினோம். யோசித்தோம்.

நமக்கு யார் மீதும் புகார்கள் இல்லை. நாம் யாரையும் குறை சொல்லப் போவதுமில்லை. நம் மீது இருப்பதைவிட எதிரணியினர் மீது நமக்கு அதிக மதிப்பிருக்கிறது. தேர்தலில் எதிர்த்து நிற்பதாலேயே ஒருவர், நமக்கு எதிரியாக முடியாது. வென்றாலும், தோற்றாலும் அண்ணன்-தம்பி உறவு மாறாது.

யார் முனைப்புடன் செயல்படுவார்கள் என்பதை ஓட்டுப் போடும் உறுப்பினர்கள் முடிவு செய்யட்டும் என்று தெளிந்த முடிவெடுத்தோம்.

தயக்கம் உடைத்தோம். முன்னைக் காட்டிலும் முழு வேகத்தோடு தேர்தல் பணியாற்றக் கிளம்பினோம்.

திரு.பாலசந்தர், திரு.பாலுமகேந்திரா, திரு.மணிரத்னம் ஆகியோரிடம் சங்கத்தின் செயல் திட்டங்கள் பற்றி நமக்கு இருந்த எண்ணங்களைச் சொன்னோம். மகிழ்ந்தார்கள். வாழ்த்தினார்கள்.

எங்களது வேகம் கண்ட திரு.கே.எஸ்.ரவிக்குமார், திரு.பி.வாசு இருவரும் எங்களை அழைத்து பேச்சுவார்த்தை நடத்தினர்.

எல்லோருமே சொன்ன ஒரு யோசனை..

“இத்தனை வேகமும், விவேகமும், தெளிவான சிந்தனையும் கொண்ட உங்களுக்கு முதிர்ந்த அனுபவம் கொண்ட ஒரு தலைமை இருந்தால் நன்றாக இருக்கும்தானே..”

எல்லோரும் ஒரு சேர யோசித்தோம்.

முடிவில்..

எதிரணியாய் நி்ன்றிருந்த சகோதர இயக்குநர்கள் அனைவரும் தேர்தல் களத்தில் வேட்பு மனுக்களை வாபஸ் பெற.. நம் அணியில் தலைமைப் பதவிக்கான வேட்பு மனுவை மட்டும் வாபஸ் பெற, “ஒருங்கிணைந்த இயக்குநர் அணி”யாய் இதோ இப்போது உங்கள் கண் முன்னே நிற்கிறோம்.

எங்களுக்கும் ஒரே நேரத்தில் இரண்டு நல்லவைகள் நடந்தேறின.

ஒன்று, மூத்த இயக்குநர்களை நாங்கள் எப்போதும் மதிக்கிறோம் என்பது.

மற்றொன்று, எங்கள் அணியில் இருப்பவர்கள் தலைமைப் பதவிக்கு அலைகிறார்கள் என்ற குற்றச்சாட்டை பொய்யாக்கியது.

மகிழ்ச்சியாய் ஒப்புக் கொண்டோம்.

இதுவே நடந்தது..

இதோ, இப்போது உங்கள் முன் தேர்தல் களத்தில் நாங்கள்..

சங்கத் தேர்தலில் நின்று வெல்வது என்பது பதவிக்கு வருவதல்ல. பொறுப்புக்கு வருவது. சங்கத்தில் பொறுப்புக்கு வருவது சுகமல்ல - சுமை. ஆனால், நம் அண்ணன், தம்பிகளுக்காக சுமப்பதும் சுகம். நல்லது நடக்க வேண்டும். நல்லது செய்ய வேண்டுமென்று நினைப்பவர்கள் எல்லாம் வெளியில் நின்று, வெறும் வார்த்தைகளாய் மட்டும் பேசாமல் உள்ளே இறங்கி செயலாற்ற வேண்டும் என்று நினைத்து வந்திருக்கிறோம்.

அப்படியே நீங்களும் நினைத்து எங்களைத் தேர்ந்தெடுப்பீர்கள் என நம்புகிறோம்.

நமது சங்கத்தின் நலன் கருதி, ஓரிருவர் தவிர இயக்குநர்கள் அனைவரும் ஓரணியாய் நிற்கும்போது, இணை, துணை மற்றும் உதவி இயக்குநர்கள் மட்டும் தனித்தனியாகப் பிரிந்து கிடக்கின்றனர்.

அவர்களை மேலும் பிளவுபடுத்தும் நோக்கத்தோடு எங்களது செயல் இருந்துவிடக்கூடாது என்பதாகவும் இணை, துணை மற்றும் உதவி இயக்குநர்களின் நிர்வாகப் பங்களிப்பும் நமது இயக்குநர் சங்கத்திற்கு மிக அவசியம் என்று கருதுவதாலும் 5 செயற்குழு உறுப்பினர் பதவிகளுக்கு எங்கள் அணி போட்டியிடவில்லை என்பதை மகிழ்ச்சியுடன் தெரிவித்துக் கொள்கிறோம்.

முடிக்கும் முன் மேலும் சில வரிகள்..!

எங்கள் அணி சார்பாக நின்று இந்தத் தேர்தலில், போட்டியின்றித் தேர்ந்தெடுக்கப்பட்ட துணைத் தலைவர்கள் திரு.சேரன் மற்றும் திரு.சமுத்திரக்கனியும், பொருளாளர் திரு.ஜனநாதன் அவர்களும் இப்போதே தமது சங்கப் பணிகளைத் துவக்கி விட்டனர்.

அதிலொன்று, சென்னையில் உள்ள மூன்று பல்கலைக் கழகங்களில் பாடப் பிரிவுகளாக உள்ள பல் ஊடகக் கல்வி மற்றும் நவீனத் திரைப்பட சிறப்பு பல்கலைக்கழகச் சான்றிதவ் படிப்பு ஆகிய படிப்புகளை நமது சங்க உறுப்பினர்கள் மிக, மிகக் குறைந்தக் கட்டணத்தில் 4 மாதங்களிலேயே படித்துப் பயன் பெற சம்பந்தப்பட்ட நிர்வாகத்தினரிடம் பேச்சுவார்த்தையை வெற்றிகரமாக நடத்தி முடித்துள்ளனர் என்பதை மகிழ்ச்சியுடன் தெரிவித்துக் கொள்கிறோம்.

இக்கடிதத்துடன் எங்களது தேர்தல் அறிக்கையையும் இணைத்திருக்கிறோம்.

செயலாக்கத் துடிக்கும், ஒருங்கிணைந்த இய்ககுநர்கள் அணியின் அறிக்கையில் உள்ள அத்தனை நலன்களையும் நீங்கள் பெற..

எங்களுக்கு வாக்களியுங்கள்..!

உங்களுக்கு உழைக்கிறோம்…!

நன்றி

அமீர் - சேரன் - ஜனநாதன்
மற்றும்
ஒருங்கிணைந்த இயக்குநர்கள் அணி

தேர்தல் அறிக்கை

1. உயர்ந்து வரும் விலைவாசி, வீட்டு வாடகை மற்றும் போக்குவரத்து செலவுகளைக் கவனத்தில் கொண்டு சம்மேளனத்தின் மூலம் தயாரிப்பாளர்கள் சங்கத்திடம், நமது உறுப்பினர்களுக்கு ஏற்கெனவே நிர்ணயித்த இணை இயக்குநருக்கு ரூ.90,000-ஐ உயர்த்தி இனி ரூ.2,00,000 ஆகவும், துணை இயக்குநருக்கு ரூ.75,000-ஐ உயர்த்தி இனி ரூ.1,50,000 ஆகவும், முதல் நிலை உதவி இயக்குநருக்கு ரூ.50,000-ஐ உயர்த்தி, ரூ.1,00,000 ஆகவும் இரண்டாம் நிலை உதவி இயக்குநருக்கு ரூ.70,000 ஆகவும் உயர்த்தித் தர வலியுறுத்தப்படும்.

2. இணை, துணை, உதவி இயக்குநர்களின் சம்பளம் உயர்த்தப்படுவது போலவே Discussion, Pre-Production, Shooting, Post-Production போன்ற பணிகளுக்கேற்க தினசரி பேட்டாவையும் அதிகப்படுத்தி தொகை நிர்ணயம் செய்து முறையாக வழங்க வழிவகை செய்யப்படும்.

3. இணை, துணை, உதவி இயக்குனர்களுக்கான சம்பளத் தொகை முழுவதும் ரீ-ரெக்கார்டிங் முன்னதாகவே பாக்கியின்றி செட்டில் செய்ய தயாரிப்பாளர்களிடம் வலியுறுத்தப்படும்.

4. நமது சங்கத்தில் இணை, துணை, உதவி இயக்குநர்களுக்கு ஏற்படுத்தப்பட்டுள்ள சங்கம் வழிச் சம்பள முறையில் உள்ள நடைமுறைச் சிக்கல்களைத் தீர்த்து, இத்திட்டம் முழுமையாக நடைமுறைப்படுத்தப்படும். அதற்காக சங்கம் இதுவரை பெற்று வந்த 2 சதவிகித கமிஷன் அறவே ரத்து செய்யப்படும்.

5. இவைகள் அனைத்தையும் நடைமுறைப்படுத்த முதல் முறையாக ஒரு தயாரிப்பாளருக்கும் இணை, துணை, உதவி இயக்குநர்களுக்கும் இடையே முறையான ஒப்பந்தம் போடப்பட்டு அதைக் கட்டாயமாக நடைமுறைப்படுத்த வேண்டுமென தயாரிப்பாளர்களிடம் வலியுறுத்தப்படும்.

6. நமது சங்க உறுப்பினர்கள், தயாரிப்பாளர்களுடன் செய்து கொள்ளும் ஒப்பந்தங்கள் தமிழ், ஆங்கிலம் இரண்டு மொழிகளிலும் இருக்க வேண்டுமென வலியுறுத்தப்படும்.

7. உறுப்பினர்கள், தயாரிப்பாளர்களுடன் செய்து கொள்ளும் ஒப்பந்தங்களில் இடம் பெற வேண்டிய விதிமுறைகள் பற்றி அறிந்து கொள்ளவும், சட்ட நுணுக்கங்கள் பற்றி விளக்கம் பெறவும், நமது உறுப்பினர்களிடம் அவர்களின் உரிமைகளை எடுத்துக் கூறி, அவற்றை ஒப்பந்தங்களில் இடம் பெறச் செய்யவும் நிபுணர் குழு ஒன்று அமைக்கப்படும்.

8. தற்போது ஒரு படத்திற்கான டைட்டில் தமிழ்த் திரைப்படத் தயாரிப்பாளர்கள் சங்கத்திலும், தென்னிந்திய திரைப்பட வர்த்தக சபையிலும், GUILD-லும் பதிவு செய்யப்படுகிறது. அதுபோல இனிமேல், நமது இயக்குநர்கள் சங்கத்திலும் டைட்டில் பதிவு செய்வது கட்டாயமாக்கப்படும். இத்திட்டம் தொடங்கியவுடன் இணை, துணை, உதவி இயக்குநர்கள் மற்றும் இயக்குநர்கள் தாங்கள் யோசித்து வைத்திருக்கும் இரண்டு டைட்டில்களை நமது சங்கத்தில் பதிவு செய்து கொள்ளலாம்.

9. எனவே தமிழ்த் திரைப்படத் தயாரிப்பாளர்கள் சங்கம், GUILD, தென்னிந்திய திரைப்பட வர்த்தக சபை ஆகிய மூன்று அமைப்புகளும் இனிமேல் ஒரு டைட்டிலை பதிவு செய்வதற்கு முன்பு நமது இயக்குநர்கள் சங்கத்திடம் தடையில்லா சான்றிதழ் பெற வேண்டும் என்பதை கட்டாயமாக்க வலியுறுத்தப்படும்.

10. நமது சங்கத்தில் உறுப்பினர் பதிவு செய்து வைத்திருக்கும் டைட்டிலை வேறு எவரேனும் பெற விரும்பினால் அதற்குச் சன்மானமாக குறைந்தபட்சம் 1 லட்சம் ரூபாய் பெற்றுத் தரப்படும்.

11. உறுப்பினர்களின் மருத்துவ உதவிக்கு மட்டும் வருடத்திற்கு 5 லட்சம் ரூபாய் ஒதுக்கப்பட்டு, அத்தொகையை விபத்து மற்றும் அவசர மருத்துவ உதவிக்கு பயன்பெறும் விதத்தில் உறுப்பினர் ஒருவருக்கு அதிகப்பட்சமாக 10000 ரூபாய் சுழற்சி முறையில் வழங்கப்படும்.

12. படம் சம்பந்தப்பட்டப் பணிகளில்(Pre-Production, Shooting, Post-Prodction and etc..) இருக்கும்போது உறுப்பினர் ஒருவர் விபத்தில் அகால மரணம் அடைந்துவிட்டால் அவருக்கான இழப்பீட்டுத் தொகையாக நமது சங்கத்திலிருந்து 50,000 ரூபாயும், அப்படத் தயாரிப்பாளரிடமிருந்து 50,000 ரூபாயும் பெற்று மொத்தம் ஒரு லட்சம் ரூபாயாக அவரது குடும்பத்தினரிடம் வழங்கப்படும். இது தவிர, உறுப்பினர் யாரேனும் இயற்கையாக மரணமடைந்தால் தற்போது வழங்கப்பட்டு வரும் இழப்பீட்டுத் தொகை 25000 ரூபாயில் இருந்து 50,000 ரூபாயாக உயர்த்தப்படும்.

13. இது போன்ற சங்கடமான நிகழ்வுகளைத் தவிர்க்கும் பொருட்டு நமது சங்க உறுப்பினர்கள் அனைவருக்கும் ஆயுள் காப்பீட்டுத் திட்டமும், உறுப்பினர்களின் குடும்பத்திற்கு மெடி-க்ளைம் பாலிசியும் எடுத்துத் தர தீவிர முயற்சி செய்யப்படும்.

14. இது தவிர, படத் தயாரிப்புக் காலத்தில் இயக்குநர் மற்றும் இணை, துணை, உதவி இயக்குநர்களுக்கு சம்பந்தப்பட்ட படத் தயாரிப்பு நிறுவனம் “குறுகிய கால மருத்துவக் காப்பீடு” செய்ய வேண்டும் என்று கட்டாயப்படுத்தப்படும்.

15. நமது சங்கத்தைச் சேர்ந்த உறுப்பினர்கள், விளம்பரப் படங்களை இயக்கும்போது நமது சங்க உறுப்பினர்களில் இருந்து 2 உதவி இயக்குநர்களைப் பணியில் சேர்த்துக் கொள்ள வேண்டும் என்பது கட்டாயமாக்கப்படும்.

16. நமது உறுப்பினர்கள் வேற்று மொழிப் படங்களிலும் வேலை செய்ய ஏதுவாக பிரதான மொழிகளான ஆங்கிலம் மற்றும் இந்தி ஆகியவை எளிய முறையில் கற்றுத் தர வசதி செய்து தரப்படும்.

பல்கலைக் கழகங்களில் தற்போது மூன்றாண்டு படிப்பாக உள்ள பல் ஊடகக் கல்வி(Multimedia Course) மற்றும் நவீனத் திரைப்பட சிறப்புப் பல்கலைக்கழகச் சான்றிதழ் படிப்பு  (Film Making Advance Special University Certificate Course) ஆகியவற்றை நமது சங்க உறுப்பினர்கள் மிக, மிகக் குறைந்தக் கட்டணத்தில் 4 மாதங்களிலேயே பயிலும்வகையில் ஏற்பாடு செய்யப்படும். இதன் மூலம் பெறப்படும் அங்கீகரிக்கப்பட்ட பல்கலைக்கழகச் சான்றிதழ் இந்தியா மற்றும் வெளிநாடுகளில் வேலை செய்யும் வகையில் மதிப்புடையதாக இருக்கும் என்பது உறுதி செய்யப்படும்.

17. இணை, துணை, உதவி இயக்குநர்கள் பயன் பெறும் வகையில் சினிமாவி்ன் நவீன தொழில் நுட்ப வளர்ச்சி பற்றி இந்திய மற்றும் உலகத் திரைப்பட வல்லுநர்களைக் கொண்டு நமது சங்கத்தி்ன் மூலமாக பயிற்சிப் பட்டறைகள் நடத்தப்படும்.

18. ஒவ்வொரு வருடமும் நமது இணை, துணை, உதவி இயக்குநர்கள் மட்டுமே உருவாக்கக் கூடிய “குறும்பட மற்றும் ஆவணப் போட்டி” நடத்தப்படும். இப்போட்டியில் வெற்றி பெறுபவர்களுக்கு விருதுகளும், பரிசுகளும் வழங்கப்படும்.

19. மேலும், நமது உறுப்பினர்கள் தானே தயாரித்து, இயக்கும் சிறந்த குறும் படங்களைத் தேர்வு செய்து தொலைக்காட்சிகளில் ஒளிபரப்பச் செய்து, அந்தத் தொலைக்காட்சி நிறுவனங்களிடமிருந்து ஊக்கத் தொகையும் பெற்றுத் தரப்படும்.

20. இயக்குநர்கள் மற்றும் இணை, துணை, உதவி இயக்குநர்களில் கடந்த 30 ஆண்டு காலமாக உறுப்பினராக இருந்து, 65 வயது பூர்த்தியடைந்தவராகவும் இருப்பின், அவர்கள் செய்த பணியினைக் கவுரவிக்கும் வகையில், நமது சங்கத்தின் மூலம் ஒரு தொகை நிர்ணயம் செய்து, மாதந்தோறும் அவர்களுக்கு வழங்க வழிவகை செய்யப்படும்.

21. அறிமுக இயக்குநர்களின் குறைந்தபட்ச சம்பளம் 10 லட்சம் ரூபாயாக நிர்ணயம் செய்து அதைத் தயாரிப்பாளர்களிடம் இருந்து பெற்றுத் தர உரிய நடவடிக்கை எடுக்கப்படும்.

22. நமது இயக்குநர்கள் இயக்கும் ஒவ்வொரு திரைப்படத்திற்கும், சங்க வளர்ச்சி நிதியாக குறைந்தபட்சம் 10,000 கட்டாயமாக வசூலிக்கப்படும்.

23. நமது சங்க உறுப்பினர்கள் எடுக்கக் கூடிய விளம்பரப் படம் ஒவ்வொன்றிற்கும் சங்க வளர்ச்சிக்காக ரூ.5,000 கட்டாயமாக வசூலிக்கப்படும்.

24. ஒரு தயாரிப்பாளருக்கும், ஒரு இயக்குநருக்கும் இடையே கருத்து வேறுபாடு ஏற்பட்டு தயாரிப்பில் இருக்கும் படத்தில் இருந்து இயக்குநரை விலக்கி, வேறொரு இயக்குநரை வைத்துப் படத்தைத் தொடர்வதற்கு தயாரிப்பாளர் முடிவு செய்யும்பட்சத்தில் ஏற்கெனவே ஒப்பந்தத்தில் குறிப்பிட்டிருந்தாலும் நமது சங்கத்திடமும், விடுபட்ட இயக்குநரிடமும் முறையான அனுமதி பெற வேண்டும் என்பது கட்டாயமாக்கப்படும்.

25. ஒரு படத்தின் இயக்குநர் அந்தப் படத்தை விருதுகளுக்கு அனுப்ப விரும்பும்பட்சத்தில், சம்பந்தப்பட்ட தயாரிப்பாளர் படத்தின் ஒரு பிரதியை சப்-டைட்டிலுடன் இயக்குநருக்கு வழங்க வேண்டும் என்பதைச் சட்டமாக்க முயற்சிகள் மேற்கொள்ளப்படும்.

26. சர்வதேச விருது, தேசிய விருது மற்றும் மாநில அரசு விருது பெறும் இயக்குநர்கள் தற்போது கெளரவிக்கப்பட்டு வருவதைப் போல், இனி விருது பெறும் இயக்குநர்களின் இணை, துணை, உதவி இயக்குநர்களையும் கெளரவிக்கும்வகையில் சங்கத்திற்கு அவர்கள் செலுத்த வேண்டிய சந்தா தொகையை சங்கமே ஏற்றுக் கொள்ளும்.

27. உலகத் திரைப்பட விழாக்கள், சர்வதேச விருதுகள் மற்றும் தேசிய விருதுகள் பற்றிய தகவல்களை உறுப்பினர்கள் அறிந்து கொள்ளவும், தங்களது திரைப்படங்களை இது போன்ற விழாக்களில் பங்கு பெறச் செய்ய விரும்புபவர்களுக்கு ஆலோசனை வழங்கி நல்வழி காட்டவும் குழு ஒன்று அமைக்கப்படும்.

28. மேலும், நமது சங்கத்தை அமெரிக்கா-ஐரோப்பா மற்றும் உலக நாடுகளில் இருக்கும் திரைப்பட அமைப்புகளுடன் இணைந்து பணியாற்ற முயற்சிகள் மேற்கொள்ளப்படும்.

29. உலகின் தலை சிறந்த சினிமா நூல்கள் உறுப்பினர்களுக்குப் பயன் பெறும்வகையில் தமிழில் மொழியாக்கம் செய்ய முயற்சிகள் மேற்கொள்ளப்படும்.

30. நமது சங்கக் கட்டிடம் கட்டுவதற்காக ஏற்கெனவே திரட்டப்பட்ட நிதியுடன், மேலும் நிதி திரட்டி நிரந்தர சங்கக் கட்டிடம் அமைக்க வழிவகை செய்யப்படும்.

31. சங்கக் கட்டிடப் பணிக்காக அமைக்கப்படும் ஆலோசனைக் குழுவில் கடந்த முறை பொறுப்பில் இருந்த நிர்வாகக் குழுவினரும் இடம் பெற வழிவகை செய்யப்படும்.

32. நமது நிரந்தர சங்கக் கட்டிடத்தில், 24 மணி நேரமும் இயங்கும் ஒரு மினி தியேட்டரும், டிவிடி மற்றும் திரைப்படம் சார்ந்த புத்தகங்கள் அடங்கிய நூலகமும் அமைக்கப்படும்.

33. தமிழ்ச் சினிமாவின் முதல் பேசும்படம் தொடங்கி, இன்றைய சினிமாவரை அனைத்துத் தமிழ்ப் படங்களையும் சேகரித்து பாதுகாக்கும் ஆவணக் காப்பகம் ஒன்று ஏற்படுத்தப்படும்.

34. ஒரு சங்கத்தில் 2000 உறுப்பினர்கள் இருந்தால் கூட்டுறவுப் பண்டக சாலை அமைக்க அரசு அனுமதி தந்துள்ளது. அதன் அடிப்படையில் நமது சங்கம் 2000 உறுப்பினர்களை எட்டிவிட்டபடியால், சங்கத்தின் சொந்தக் கட்டிடத்தில் கூட்டுறவுப் பண்டகசாலை அமைத்து உறுப்பினர்கள் அனைவருக்கும் வீட்டுக்குத் தேவையான பொருட்கள் சலுகை விலையில் வழங்கப்படும்.

35. சங்கத்திற்கென புதிய இணையத்தளம் சீரிய முறையில் உருவாக்கப்படும். உறுப்பினர்கள் அனைவரும் தங்களுடைய கருத்துக்களையும், ஆலோசனைகளையும் எந்நேரமும் அதில் தெரிவிக்கலாம்.

36. உறுப்பினர்கள் தங்களது குறைகளை அலுவலக நேரத்தில் சங்கத்திற்கு வந்து தெரிவிக்கலாம். அதற்காக சங்கத்தில் புகார்ப் பெட்டி ஒன்று வைக்கப்படும். நேரில் வர இயலாதவர்கள், தங்களது புகார்களை சங்கத்தின் இணையத்தளத்தில் பதிவு செய்தால் பரிசீலனை செய்து தக்க பதில் அளிக்கப்படும்.

37. அதே இணையத்தளத்தில் தமிழ்ச் சினிமாவின் முதல் தலைமுறை இயக்குநர்கள் தொடங்கி, இன்றைய இயக்குநர்கள்வரையிலான தகவல் களஞ்சியம் ஒன்று ஏற்படுத்தப்படும்.

38. இனி வரும் காலங்களில், நமது சங்கத் தேர்தலில் போட்டியிடும் வேட்பாளர்கள் மற்றும் வாக்களிப்பவர்களின் தகுதிகள் பற்றிய தேர்தல் விதிமுறைகள் சரி செய்யப்படும்.

39. மேலும், நமது சங்கத்தின் நிர்வாகப் பதவிகளில் இருப்பவர்கள், இரண்டு முறைக்கு மேல் மீண்டும் அதே பதவிக்குப் போட்டியிடக் கூடாது என்பது சட்டமாக்கப்படும்.

நன்றி..!

இனி, புதிய அலைகள் என்ற பெயரில் போட்டியிட்ட இணை, துணை, உதவி இயக்குநர்கள் சங்கத்தின் தேர்தல் அறிக்கை..!

இவர்களின் அறிக்கையை இமேஜ் பைலாக மாற்றி இங்கே பதிவிட்டுள்ளேன்.  (தட்டச்சு செய்ய கொஞ்சம் சோம்பேறித்தனம். பொறுத்தருள்க)

அதனை கிளிக் செய்து பெரிதாக்கிப் படித்துக் கொள்ளுங்கள்..!

Tweet

தமிழ்த் திரைப்பட இயக்குநர் சங்கத் தேர்தல்-2011 முடிவுகள்

22-06-2011

என் இனிய வலைத்தமிழ் மக்களே..!

தமிழ்த் திரைப்பட இயக்குநர்கள் சங்கத் தேர்தல் மிகப் பரபரப்பாக நடந்து முடிந்துள்ளது. இதில் பாரதிராஜா தலைமையில் 'ஒருங்கிணைந்த இயக்குநர்கள் குழு' ஒரு அணியாகவும், 'புதிய அலைகள்' என்ற பெயரில் துணை இயக்குநர்கள் தனி அணியாகவும் போட்டியிட்டார்கள்.

'புதிய அலைகள்' அணி தலைவர், செயலாளர், துணைத் தலைவர்கள், பொருளாளர் பதவிக்குப் போட்டியிடவில்லை. 4 இணைச் செயலாளர்கள் மற்றும் 12 செயற்குழு உறுப்பினர்கள் பதவிக்கு மட்டுமே போட்டியிட்டார்கள்.

ஆனாலும் பாரதிராஜாவை எதிர்த்து எஸ்.முரளி என்னும் துணை இயக்குநர், தலைவர் பதவிக்கு சுயேச்சையாகப் போட்டியிட்டார்.

செயலாளர் பதவியில் அமீரை எதிர்த்து 'தமிழன்' படத்தின் இயக்குநர் அப்துல் மஜீத் சுயேச்சையாகப் போட்டியிட்டார்.

மேலும் 'யார் கண்ணன்', டி.பி.கஜேந்திரன் போன்ற இயக்குநர்களும் சுயேச்சையாகவே செயற்குழு உறுப்பினர்கள் பதவிக்குப் போட்டியிட்டார்கள்.

4 இணைச் செயலாளர்கள் பதவிக்கு 10 பேரும், 12 செயற்குழு உறுப்பினர்கள் பதவிக்கு 34 பேரும் போட்டியிட்டனர்.

கடந்த 19-06-2011 ஞாயிற்றுக்கிழமையன்று சென்னை வடபழனி இசையமைப்பாளர்கள் சங்க கட்டிடத்தில் தேர்தல் நடந்தது. அதன் ஓட்டு எண்ணிக்கை நேற்று(21-06-2011) இரவு 10.30 மணிக்கு முடிவடைந்து, அதிகாரப்பூர்வமான அறிவிப்புகள் இரவு 11 மணிக்குத்தான் வெளியானது.

தற்போதைய தலைவரான பாரதிராஜாவே மீண்டும்   தலைவராகத் தேர்வு  செய்யப்பட்டுள்ளார்.  பாரதிராஜா பெற்ற வாக்குகள் 1033. அவரை எதிர்த்து நின்ற துணை இயக்குநர் எஸ்.முரளி பெற்ற வாக்குகள் 267. செல்லாத வாக்குகள் 11.

சங்கத்தின் செயலாளராக இயக்குநர் அமீர் தேர்ந்தெடுக்கப்பட்டுள்ளார். அவர் பெற்ற வாக்குகள் 901. இவரை எதிர்த்து நின்ற தமிழன் படத்தின் இயக்குநர் அப்துல் மஜீத் பெற்ற வாக்குகள்  375.

சங்கத்தின் பொருளாளராக இயக்குநர் ஜனநாதன் போட்டியிடின்றி தேர்ந்தெடுக்கப்பட்டார்.

இதேபோல் சங்கத்தின் துணைத் தலைவர்களாக இயக்குநர்கள் சேரனும், சமுத்திரக்கனியும் போட்டியிடின்றி தேர்வு செய்யப்பட்டார்கள்.




ஒருங்கிணைந்த இயக்குநர் குழுவின் சார்பில் 4 இணைச் செயலாளர்கள் பதவிக்கு, இயக்குநர்கள் பிரபு சாலமன், எஸ்.எஸ்.ஸ்டான்லி, தம்பித்துரை, சி.வி.வித்யாசாகர் ஆகியோர் போட்டியிட்டார்கள். 

இவர்களில் பிரபு சாலமன்(905), எஸ்.எஸ்.ஸ்டான்லி(716), தம்பித்துரை(696) ஆகியோர் வெற்றி பெற்று வித்யாசாகர் தோல்வியடைந்தார். அவர் இடத்திற்கு 'நேசம் புதுசு' படத்தின் இயக்குநர் வேல்முருகன் 655 வாக்குகள் பெற்று வெற்றி பெற்றார்.

சங்கத்தின் 12 செயற்குழு உறுப்பினர்கள் பதவியில் 7 இடங்களுக்கு மட்டுமே ஒருங்கிணைந்த இயக்குநர்கள் குழு போட்டியிட்டது. மீதமிருந்த 5 இடங்களை துணை இயக்குநர்களுக்காக விட்டுக் கொடுத்தது.  இயக்குநர்கள் குழு சார்பில் இயக்குநர்கள் சிம்புத்தேவன், வசந்தபாலன், வெங்கட்பிரபு, ஏ.வெங்கடேஷ், கதிர், விஜய் ஆனந்த், பாலசேகரன் ஆகியோர் போட்டியிட்டனர்.

ஆனால் 'புதிய அலைகள்' என்ற துணை இயக்குநர்கள் குழு துணைத் தலைவர் மற்றும் இணைச் செயலாளர் பதவிகளிலும் இட ஒதுக்கீடு கேட்டனர். அந்த ஒதுக்கீட்டிற்கு இயக்குநர்கள் குழு ஒத்துக் கொள்ளாததால் செயற்குழு உறுப்பினர்களின் 12 இடங்களுக்கும் புதிய அலைகள் அணி போட்டியிட்டது.

தேர்தல் முடிவில் ஒருங்கிணைந்த இயக்குநர்கள் குழு சார்பாக போட்டியிட்டவர்களில் பாலசேகரன், சிம்புதேவன், வசந்தபாலன், வெங்கட்பிரபு ஆகிய நால்வர் மட்டுமே வெற்றி பெற்றனர்.

மீதமிருந்த 8 இடங்களில் 7 இடங்களில் புதிய அலைகள் அணியும், சுயேச்சையாக களமிறங்கிய  ராஜா கார்த்திக் என்னும் இணை இயக்குநரும் வெற்றி பெற்றனர்.



சங்கத்தின் செயற்குழு உறுப்பினர்களாக கீழ்க்கண்டவர்கள் தேர்வு செய்யப்பட்டுள்ளார்கள்.

1.ஐந்து கோவிலான் - 864
2. விஜயசங்கர் - 700
3. வெங்கட்பிரபு - 673
4.வசந்தபாலன் - 670
5. பாலமுரளிவர்மன் - 666
6. சிம்புதேவன் - 636
7. முகமது அஸ்லாம் - 630
8. ஜெகதீசன் - 621
9. பாலசேகரன் - 618
10. நாகேந்திரன் - 618
11. கமலக்கண்ணன் - 596
12. ராஜா கார்த்திக் - 557

மேலும், விரிவான செய்திகள் விரைவில் வெளிவரும்..!

Tweet

விஜய்யின் காவலனுக்கு நேர்ந்த கதி..!

19-01-2011

என் இனிய வலைத்தமிழ் மக்களே..!

என்ன இருந்தாலும் இளைய தளபதி விஜய்க்கு இந்த நிலைமை வந்திருக்கக் கூடாதுதான். லோ பட்ஜெட் படங்களையும், டப்பிங் ஆங்கிலப் படங்களையும் மட்டுமே திரையிட்டு வரும் சென்னை, ஜாபர்கான்பேட்டை விஜயா தியேட்டரில் 'காவலன்' ரிலீஸ் என்பதையே என்னால் நம்ப முடியவில்லை.

'சுறா' படம் தமிழகம் முழுவதும் 600 தியேட்டர்களுக்கும் மேலாக ரிலீஸ் செய்யப்பட்டது. ஆனால் இப்போது 'காவலன்' திரைப்படம் தமிழகத்தில் 200-க்கும் உட்பட்ட தியேட்டர்களில் மட்டுமே திரையிடப்பட்டிருப்பது எதிர்பாராத அதிர்ச்சி கலந்த ஆச்சரியம்..!

அரசியல்வியாதிகள் நினைத்தால் என்ன வேண்டுமானாலும் செய்யலாம் என்பதற்கு விஜய்க்கு ஏற்பட்டுள்ள இந்தச் சறுக்கலையும் உதாரணமாக்கலாம்..

தமிழகத்தில் பரவலாக இருக்கும் பெரிய தியேட்டர்கள் அனைத்தும் தொடர்ந்து குறிப்பிட்ட மூன்று பேரன்களின் கட்டுப்பாட்டில் இருப்பது திரைத்துறையையே அவர்களிடம் அடகு வைத்தது போலாகியிருக்கிறது என்று திரையுலகில் அனைவருமே முனங்கிக் கொண்டுதான் இருக்கிறார்கள். (கவனிக்க : முனங்கிக் கொண்டு மட்டுமே.. இது மட்டுமே அவர்களால் முடியும்.. இதற்கு மேல் ஒரு முழுக்கத்தையும் இவர்களால் செய்ய முடியாது..)

ஆனால் இவர்களுடைய திரைப்படங்களில்தான் ஹீரோக்கள் ரேஷன் கடை அநியாயத்தையும், போலி மருந்துக் கொள்ளையையும், மனித உரிமையை மீட்கவும், நிலை நாட்டவும் அந்தரத்தில் பறந்து, பறந்து அடிப்பதுபோல் காட்சிகளை வைப்பார்கள். இதுதான் இவர்களால் முடியும்.

இந்தக் கூத்திற்கு விஜய்யே முன்பு உடந்தையாக இருந்தவர்தான். 'சுறா' படமும் இதே போலத்தான் ஏற்கெனவே கைகளுக்குள் அடங்கியிருந்த தியேட்டர்களில் கோலாகலமாகத் திரையிடப்பட்டது. அப்போது விஜய் அவர்களுக்கு அடங்கியிருந்தார். இப்போது அடங்கவில்லை.

அரசியல்வியாதிகளை எதிர்த்தால் அது இன்னொரு அரசியல்வியாதியாக இருந்தால் அரசியலில் மறைமுகமாக அடிப்பார்கள். கூட்டணி வைத்து முறிப்பார்கள். அரசியலில் இல்லை என்றால் நேரடியாகச் சொல்லியே தாக்குவார்கள். இப்போது விஜய் வாங்கிக் கட்டிக் கொண்டிருக்கிறார்.

'சுறா' படத்தின் பிரமோஷன் வேலைகளுக்காக தன்னை இழு, இழுவென்று இழுத்த சன் டிவி மீது கோபத்தில் இருந்த விஜய், இனி இது போன்ற சேனல்களிடம் அடிமையாக சிக்குவதில்லை என்ற முடிவுக்கு அப்போதே வந்துவிட்டார். தனது நெருங்கிய நண்பர்களுக்குப் போட்டுக் காட்டுவதற்காக 'சுறா' படத்தின் ஒரு பிரிண்டை வரவழைக்க எஸ்.ஏ.சி.யே சன் டிவி அலுவலகத்திற்கு நேரில் சென்று கேட்க வேண்டிய கட்டாயம் வந்ததே அவருக்கு நிச்சயம் எரிச்சலைக் கொடுத்திருக்க வேண்டும்..

பெரும் அசுரர்களான சன் டிவியை பகைத்துக் கொண்டு, கூடுதலாக இப்போது அரசியலிலும் கால் வைப்பதற்கு நேரம், காலம் பார்த்துக் கொண்டிருக்கும் விஜய்யை அவ்வளவு சீக்கிரம் விட்டுவிடுவார்களா என்ன..? கூடவே 'காவலனை' விலைக்கு வாங்க ஆசையோடு காத்திருந்த சன் டிவிக்கு டிமிக்கி கொடுத்ததில் இன்னமும் கடுப்பாகிவிட்டார்கள்..

தன்னை எதிர்ப்பவர்களை முளையிலேயே கிள்ளியெறிவதுதான் அரசியல் புத்திசாலிகளின் தந்திரம். அதைத்தான் கடந்த 30 ஆண்டு காலமாக நம்ம திராவிடத் தாத்தாவும் செய்து கொண்டிருக்கிறார். விஜய் கட்சி ஆரம்பிக்கிறாரோ இல்லையோ.. அப்படியொரு எண்ணம் விஜய்க்குப் பிறகு வேறு எந்த நடிகனுக்கும் ஏற்படக் கூடாது என்பதை அவர்களுக்கு உணர்த்துவதற்காகவே தனது சகல சக்திகளையும் பயன்படுத்தி வருகிறது ஆளும்கட்சி என்பது கண்கூடாகத் தெரிகிறது.

இத்துப் போன 'இளைஞன்' படத்திற்குக்கூட 14 போஸ்டர்களை உதயம் தியேட்டரில் வைக்க விட்டிருக்கும் தியேட்டர் நிர்வாகம் காவலன் போஸ்டர்களுக்குத் தடை விதித்து “ரொம்ப நீளமா இருக்கு தம்பிகளா..?” என்று போலீஸை வைத்து அப்புறப்படுத்தியிருக்கும் செயல் நிச்சயமாக அரசியல்தனமானது.. அற்பத்தனமானது.. தமிழ்நாடு முழுக்கவே காவல்துறை இதுபோல் 'காவலன்' பட போஸ்டர்களை அப்புறப்படுத்தி நாட்டின் சட்டம் ஒழுங்கை காப்பாற்றி வருவதாகப் புலம்பி வருகிறார்கள் விஜய்யின் ரசிகர்கள்..

சன் டிவியின் கட்டுப்பாட்டில் இருக்கும் தியேட்டர்கள் 'ஆடுகள'த்திற்கு என்றாகிவிட்டது. கூடுதலாக சன் டிவியின் கடைக்கண் பார்வையில் பட்டவைகளும் அதற்கே போய்விட்டன. சன் டிவிக்குப் போக மிச்சமிருந்ததில் அடுத்ததாக சுருட்டியது 'இளைஞன்'. முதலமைச்சரின் படம் என்றே விளம்பரப்படுத்தப்படுவதால் கேட்கின்ற தியேட்டர்களை இல்லை என்று சொல்ல முடியாது என்பதால் இதுவும் ஆக்கிரமிப்பானது. கடைசியில் 'சிறுத்தை'. இந்தப் படத்தின் மீது பி அண்ட் சி-யில் இருந்த  எதிர்பார்ப்பு அதனைத் தக்க வைத்துக் கொண்டது.

ஒரு கட்டத்தில் வெறும் 75 தியேட்டர்களே காவலனுக்குக் கிடைத்திருக்கிறது என்பதைப் படித்தபோது ஆச்சரியம்தான் மிஞ்சியது. கடைசியில் அடித்துப் பிடித்து 200-க்கும் மேற்பட்ட திரையரங்குகளைப் பிடித்து வெளியிட்டுள்ளார்கள். இந்த அளவுக்குப் போராடியதை பாராட்டத்தான் வேண்டும். லேட்டாய் வந்தாலும் லேட்டஸ்ட்டாய் இடத்தைப் பிடிப்பதைப் போல பொங்கல் திரைப்படங்களின் வசூலில் முதலிடத்தையும், படம் பரவலாக அனைவருக்கும் பிடித்திருக்கிறது என்ற பெயரையும் பெற்றிருக்கிறது 'காவலன்'. இது ஒன்றே விஜய்க்கு பரம திருப்தியைக் கொடுத்திருக்கும்..

அதே சமயம் ஒருவகையில் விஜய்யும் இதற்கு ஒரு காரணமாக இருக்கிறார் என்பதையும் குறிப்பிட்டாக வேண்டும். கடந்த சில மாதங்களாகவே விஜய்யின் முந்தைய படங்களினால் ஏற்பட்ட நஷ்டத்தை ஈடுகட்ட பணத்தைத் திருப்பித் தரும்படி தியேட்டர் அதிபர்கள் போர்க்கொடி தூக்கியபடியேதான் இருந்தார்கள்.

விஜய் அப்பொழுதே இந்தப் பிரச்சினையை சுமூகமாகப் பேசி முடித்திருந்தால் ஒருவேளை இதைவிடவும் அதிகமான தியேட்டர்களில் காவலனை ரிலீஸ் செய்திருக்கலாம். ஆனால் விஜய்யின் தந்தை எஸ்.ஏ.சி.யின் பிடிவாதம் அவரை இன்னொரு பக்கம் இக்கட்டுக்குள் கொண்டுபோய் தள்ளிவிட்டது.

அத்தோடு கூடவே காவலனின் மொத்த விநியோக உரிமையை ஷக்தி சிதம்பரம் என்றொரு இயக்குநருக்கு தூக்கிக் கொடுத்தது அதைவிட முட்டாள்தனமாகிவிட்டது. அரசனை நம்பி புருஷனை விட்ட கதையாகி ஒரு நாள் தாமதமாகி, ஒரு நாள் வசூலையும் நாசமாக்கிவிட்டது இந்த இயக்குநரின் தில்லாலங்கடி வேலையினால்..

முதலில் எதனை முன் வைத்து, எந்த நம்பிக்கையில் ஷக்தி சிதம்பரத்திற்கு இத்தனை லம்பமாக படத்தினை 60 கோடிக்கு விற்றார்கள் என்றே தெரியவில்லை. இந்தச் செய்தி வெளியே வந்தபோது “ஷக்தி சிதம்பரத்துக்கிட்டே ஏதுய்யா இவ்ளோ காசு..?” என்று திரையுலகமே ஆச்சரியப்பட்டது. ஆனால் கடைசியில்தான் தெரிந்தது ஷக்தி, வெறும் வாயிலேயே முழம் போட்டிருக்கிறார் என்று..

எப்போதும் தயாரிப்பாளர்களிடம் கொடுத்த கடனை வசூலிக்க கடன் பார்ட்டிகள் படத்தின் ரிலீஸ் சமயத்தில்தான் ஆக்ஷன் எடுப்பார்கள். இதையேதான் ஷக்தி சிதம்பரத்திற்கும் நடந்துள்ளது. அவர் தயாரித்து இயக்கிய திரைப்படங்களுக்கு முன்பு கடன் கொடுத்திருந்தவர்கள் இப்போது 'காவலன்' ரிலீஸ் சமயத்தில் கோர்ட்டில் வழக்குப் போட்டு கதையை முடித்துவிட்டார்கள்.

இப்படி கடன் வழக்குப் போட்டுத் தாக்கியது ஒரு புறமிருக்க.. இந்த காவலன் படத்தின் மூலப்படமான மலையாள 'பாடிகார்டை' தமிழில் தயாரிக்கும் உரிமையை ஏற்கெனவே கோகுலம் சிட்பண்ட்ஸ் உரிமையாளர் பெற்றிருந்தார். அவரிடம் சொல்லாமல், ஒப்பந்தப்படி நடந்து கொள்ளாமல் கதாசிரியரும், இயக்குநருமான சித்திக் இதனை தமிழில் வேறு தயாரிப்பாளர் மூலம் தயாரித்ததே தவறு என்று சொல்லி பாதிக்கப்பட்டவரும் வழக்குப் போட்டுவிட்டார்.

"ஒட்டு மொத்தமாக அனைத்திற்கும் சேர்த்து 15 கோடியை லேபில் கட்டிவிட்டு படத்தை ரிலீஸ் செய்து கொள்ளுங்கள்" என்று நீதிமன்றத்தில் உத்தரவாக.. கடந்த 13-ம் தேதியன்று  பணத்தைக் கட்டிவிட்டுத்தான் படத்தை ரிலீஸ் செய்திருக்கிறார்கள்.

இதில் ரிலீஸுக்கு முன்பாக மூன்று நாட்களாக சென்னையில் கடும் பஞ்சாயத்தாம். ஷக்தி சிதம்பரத்தை அடித்துத் துவைத்ததுவரையான சோகக் கதைகள் பத்திரிகைகளில் நிறைய வெளிவந்திருக்கின்றன. இந்த ஒரு படத்தை வைத்தே நிறைய பேரிடம் கடன் வாங்கியிருக்கிறாராம் ஷக்தி. கையில் பணமே இல்லாமல் ஒருவர் இவ்வளவு பெரிய அக்ரிமெண்ட்டை போட்டிருக்கிறார் என்றால் இவரைவிட தயாரிப்பாளர் ரொமேஷ்குமாரைத்தான் குற்றம் சொல்ல வேண்டும்.

லோக்கல் விநியோகத்தில் ஆஸ்கர் ரவிச்சந்திரனிடம் செங்கல்பட்டு ஏரியாவைக் கொடுத்தார்கள். அவரும் கடைசி நேரத்தில்தான் தியேட்டர்களை புக் செய்து கொடுத்தாராம். இத்தனைக்கும் இவர்தான் விஜய்யின் அடுத்தப் படமான 'வேலாயுதம்' படத்தின் தயாரிப்பாளர். 

உலக உரிமை கொடுத்த இடத்திலும் தகராறுதானாம்.. ஏற்கெனவே வாங்க ஆர்வம் காட்டிய ஐங்கரன் பிலிம்ஸை ஓரம்கட்டிவிட்டு யாரோ ஒரு சரவணன் என்னும் புதியவருக்குக் கொடுத்துவிட அவர் கடைசி நேரம்வரையிலும் லைனுக்கு வரவில்லையாம்.. அதனால் அவரை ஓரம்கட்டிவிட்டு வேறொருவரிடம் அக்ரிமெண்ட் போட.. அந்தச் சரவணன் இப்போது கோர்ட்டிற்கு மட்டும் விழுந்தடித்து ஓடோடி வந்திருக்கிறார்.

இத்தனை களேபரங்களையும் சந்தித்து முடிப்பதற்குள் ஒரு நாள் முழுதும் போய்த் தொலைந்திருக்க ஒரு நாள் தாமதத்தினால் விநியோகஸ்தர்களுக்கு ஏற்பட்ட நஷ்டத் தொகையை இப்போது விஜய் தனது சொந்தப் பணத்தில் இருந்து கொடுத்திருக்கிறார். கொடுக்கத்தான் வேண்டும். இப்போதாவது கொடுத்தாரே என்று சந்தோஷப்படும் அதே நேரத்தில்.. தன்னிடம் நஷ்ட ஈடு கேட்ட தியேட்டர் அதிபர்களுக்கு அப்போதே அவர் சிறிதளவாவது பணத்தைக் கொடுத்து செட்டில் செய்திருந்தால் இன்றைய பிரச்சினைகளில் பாதி அன்றைக்கே முடிந்திருக்கும்..

ஒரு படம் தோல்வியடைந்து நஷ்டமானால் அந்தத் தொகை பல லட்சங்களில் இருப்பதினால் இந்த லட்சங்களை அடுத்து இதே போன்ற பெரிய படங்களை வாங்கி விநியோகம் செய்தால் மட்டுமே பெற முடியும் என்பதால் விநியோகஸ்தர்கள் மீண்டும் இந்தப் புதைக்குழியில் இறங்கி, அடுத்தப் படத்தையும் வாங்குகிறார்கள். அதுவும் தோல்வியடைந்தால்..? அதுதான் விஜய் படங்களை வாங்கியவர்களுக்கு நேர்ந்தது.. தொடர்ச்சியான தோல்விகளை விஜய்யே எதிர்பார்க்காதபோது இவர்களைக் குற்றம் சொல்லி என்ன புண்ணியம்..?

ஒப்பந்தப்படி தர முடியாது என்று இருந்தாலும் மனிதாபிமானத்துடன்தான் 'பாபா', 'குசேலன்' படங்களில் பட்ட நஷ்டத்திற்காக சிறிதளவு தொகையையாவது திருப்பிக் கொடுத்தார் ரஜினி. ரஜினிக்கு முன்பாகவே டி.ராஜேந்தரும் தனது படங்கள் தோல்வியடைந்தால் விநியோகஸ்தர்களுக்கு பணத்தைத் திருப்பித் தரும் பழக்கத்தைக் கொண்டிருந்தார். சமீபத்தில் வெளிவந்த சூப்பர்ஹிட் 'எந்திரன்' திரைப்படத்திற்குக்கூட ஒரு பெட்டிக்காக வாங்கிய தொகைக்கும், வசூலான தொகைக்கும் கிடைத்த வித்தியாசம் பல லட்சங்களாக இருந்ததினால் சன் பிக்சர்ஸ் விநியோகஸ்தர்களை அழைத்து சில லட்சங்களை திருப்பிக் கொடுத்து விநியோகஸ்தர்களையும், தியேட்டர் அதிபர்களையும் கூல் செய்து அனுப்பியது.

இதுவெல்லாம் எதற்காகவெனில் அடுத்தப் படத்திற்கு அதே விநியோகஸ்தர்கள் ஆர்வத்துடன் விரைந்து வந்து பிஸினஸை முடித்துவிட வேண்டும் என்கிற பிஸினஸ் நோக்கத்திற்காகத்தான்.. இதுதான் சினிமா வியாபாரத் தந்திரம்..

நேர்மை, நீதி, நாணயம் என்பதையெல்லாம் தாண்டி மனிதாபிமானம் என்ற ஒன்றையும் பார்க்க வேண்டுமே..? சில ஆயிரங்கள் என்றால்கூட தாங்கிக் கொள்ளலாம்.. பல லட்சங்கள் என்றால் எப்படி தாங்குவார்கள்..? விஜய் பணத்தைத் திருப்பிக் கொடுத்து அவர்களிடமே காவலன் பெட்டியை வாங்க வேண்டும் என்று ஒப்பந்தம் செய்திருந்தால் காவலன் படத்தின் ரிலீஸ் தியேட்டர்களின் எண்ணிக்கை வெகுவாக அதிகரித்து இப்போது வசூலும் அதிகரித்திருக்கும். அவர் செய்யாததினால் இப்போது அவருக்குத்தான் பாதிப்பு.

முன்பெல்லாம் படத்தை வெளியிடுவதற்கு முன்பாக பிரிவியூ காட்சியை விநியோகஸ்தர்களுக்கு போட்டுக் காட்டுவார்கள். அதில் படம் பார்க்கும் விநியோகஸ்தர்கள் படம் நிச்சயம் பிய்த்துக் கொண்டு போகும் என்பதுபோல் தெரிந்தால் போட்டி போட்டுக் கொண்டு விலையை உயர்த்திக் கேட்டு பெட்டியை வாங்கிச் செல்வார்கள். இப்போது அப்படியில்லை என்றாகிவிட்டது.

விநியோகஸ்தர்களுக்கான பிரிவியூ ஷோவிலேயே படம் புட்டுக்குச்சு என்று ஆள், ஆளுக்கு வத்தி வைத்துவிடுவதால் படத்தின் வியாபாரம் பாதிக்கப்படுவதாக நினைத்து அந்த முறையை ஊத்தி மூடிவிட்டார்கள். ஒரு சில லோ பட்ஜெட் படங்கள் மட்டுமே இன்றைக்கும் பிரிவியூ ஷோ போடப்பட்டு வியாபாரம் பேசப்படுகிறது.

விஜய் இந்த லெவலையெல்லாம் தாண்டி ரொம்ப வருடங்களாகிவிட்டது.. அவர் நடித்த படம் என்றாலே வசூலுக்குக் குறைவில்லை என்கிற கதையையே உண்மை வார்த்தையாக நம்பித்தான் படம் பார்க்காமலேயே பொட்டியை வாங்கிச் சென்றார்கள்.

இங்கே மாதந்தோறும் ரசிகர்களின் மனநிலை மாறி வருகிறது என்பதை விஜய் இன்னமும் புரிந்து  கொள்ளவில்லை என்று நினைக்கிறேன். மிஷ்கினின் 'சித்திரம் பேசுதடி', 'அஞ்சாதே' திரைப்படங்களில் நடிக்கக் கேட்டும் கதை தனக்கு செட்டாகாது என்று சொல்லி மறுத்துவிட்ட விஜய்யை என்னவென்று சொல்வது..?

இப்படியெல்லாம் கைக்கு வந்த வெல்லக்கட்டிகளை சுவைக்க விரும்பாமல் எல்லோருக்கும் எப்போதும் அருகிலேயே கிடைக்கும் புளியங்கொட்டையையே சப்பிக் கொண்டிருந்தால் எத்தனை நாட்கள்தான் வாய் தாங்கும்..? புளிக்காது.. சமீப காலமாக அவருக்கு அதேதான் நடந்தது.

சிறு குழந்தைகளுக்கு விஜய் பிடித்ததில் ஆச்சரியமில்லை. அவருடைய முகமே அழகு. அந்த அழகு முகம் நிச்சயம் அனைவருக்குமே பிடிக்கும். அந்த அழகை முன் வைத்து குழந்தைகளுக்காக பெற்றோர்களையும் தியேட்டர்களுக்கு இழுத்தார்கள். அவருக்கென்றே தனியாக இருக்கும் ரசிகர்களையும் இழுத்தார்கள். வந்தவரைக்கும் படத்தைப் பார்த்தார்கள். வசூலும் கிடைத்தது.

ஆனால் இந்த வசூல் தொகையைவிட நான்கு மடங்கு அதிக விலை வைத்து பெட்டியை விற்றிருந்தார்கள். வாங்கியிருந்தார்கள். இதுதான் அவர்கள் செய்த தவறு.. சுறாவை விஜய் ரசிகர்களே அதிகம் பேர் பார்க்கவில்லை. அழகிய தமிழ் மகன், வில்லு படங்களின் நகைச்சுவைக் காட்சிகள் அனைவராலும் விரும்பப்பட்டு ஓரளவுக்கு கூட்டம் கூடியிருந்தாலும் வரவைவிட அதிக விலைக்கு வாங்கிய குற்றத்தினால் விநியோகஸ்தர்களும், தியேட்டர்காரர்களும்தான் அல்லல்பட்டார்கள்.

இது சூதாட்டம் மாதிரிதானே.. கிடைத்தால் கிடைக்கும்.. கிடைக்காவிட்டால் இல்லை.. இதில் யாரும், யாரையும் குற்றம் சொல்ல முடியாதுதான்.. சில  சமயங்களில் ஒரு படம் எதனால் ஜெயிக்கிறது..? ஒரு படம் எதனால் தோற்கிறது என்பதையும் சொல்ல முடியாமல் போகிறது.. இந்த லட்சணத்தில் அகோரப் பசி கொண்டு.. அத்தனையையும் அள்ளிவிட வேண்டும் என்ற நினைப்பில் பணம் இருக்கிறதே என்பதற்காக கொண்டு வந்து கொட்டும் விநியோகஸ்தர்களால்தான் இந்த நிலைமை என்கிறார்கள் திரையுலகப் புள்ளிகள்.

இந்தப் படம் இவ்வளவுதான் வசூலிக்கும் என்று குத்துமதிப்பாகச் சொல்லி கேட்டுக் கொண்டிருக்கும்போதே எங்கிருந்தோ இறக்கப்படும் பணம் அதிக விலைக்குப் பேசி முடிக்க ஏதுவாகிறது.. இது தோல்வியடைந்தாலும், வெற்றியடைந்தாலும் அடுத்தப் படத்திற்கு முந்தைய இந்தப் படத்தின் விலையையே அடிப்படை விலையாக வைத்து இதற்கதிமான விலையைத்தான் சொல்கிறார்கள். தற்போது எடுக்கப்பட்ட படத்தின் தன்மையைக் கருத்தில் கொள்ளாமல் பிஸினஸ் பேசுகிறார்கள் என்கிறார் ஒரு விநியோகஸ்தர். இப்படித்தான் பல படங்கள் அதிக விலைக்கு வாங்கியவர்களுக்கு நஷ்டத்தைக் காட்டுகின்றன என்பதுதான் உண்மை.

தோல்விப் படம் என்று எப்படிச் சொல்கிறார்கள். போட்ட காசுகூட தேறலை என்பதுதான் முக்கியமான ஆதாரம். விஜய்யின் படங்களில் மிகப் பெரும் முதலீடே அவருடைய சம்பளம்தான். இப்போது 25 முதல் 30 கோடிவரையிலும் சம்பளமாகப் பெறுகிறாராம் விஜய்.. இந்தச் சம்பளத்தைவிட்டுவிட்டு மற்றத் தயாரிப்புச் செலவுகளை வைத்துப் பார்த்தால் விஜய்யின் ஒரு படத்தினை 8 கோடிக்குள் அடக்கிவிடலாம். விஜய்யின் சம்பளத்தையும் சேர்த்து 38 கோடி. ஆனால், தனித்தனியாகவோ, ஒரு பெட்டியாகவோ விற்கும்போது மொத்தமாக 75 கோடிக்கு என்று கணக்கிட்டு விற்கிறார்கள். இங்கேதான் வாங்கியவர்களுக்கு அடி விழுகிறது.

படத்தின் ஒட்டு மொத்த வசூல் 40 கோடி என்று வைத்துக் கொள்ளுங்கள். விநியோகஸ்தர்கள், தியேட்டர் அதிபர்களுக்கு ஏற்பட்ட நஷ்டம் 35 அல்லது 40 கோடி ரூபாய். தனித்தனிப் பெட்டியாக விற்கப்பட்டிருக்கும் ஒவ்வொரு தியேட்டர்களுக்கும் தோராயமாக 10 முதல் 15 லட்சங்கள்வரையில் நஷ்டம். ஆனால் உண்மையில் தயாரிப்பாளருக்கு இதனால் என்ன நஷ்டம்..? ஒன்றுமில்லை. அவர்தான் மொத்தமாக 75  கோடிகளுக்கு விற்று 47 கோடிகள் அளவுக்கு லாபம் பார்த்துவிட்டாரே..?

இந்த 35 முதல் 40 கோடி நஷ்டத்தை ஈடுகட்ட கொஞ்சம் பண உதவி கேட்டு வந்தால், “கொஞ்சம் பொறுங்க.. அடுத்தப் படத்தோட விநியோக உரிமை உங்களுக்குத்தான்.. அதையும் வாங்கிக்குங்க. அடுத்ததுல அள்ளிரலாம்..” என்று ஆசை வார்த்தை காட்டுகிறார்கள்.

நஷ்டம் லட்சங்களில் அல்லது கோடிகளில் இருப்பதால் விநியோகஸ்தர்களும் ஆசைப்பட்டு அடுத்தப் படத்தையும் வாங்கித் தொலைக்கிறார்கள். இப்போதும் தயாரிப்புக்கு மேல் சில கோடிகளை விலையேற்றம் செய்துதான் விநியோகஸ்தர்கள் மற்றும் தியேட்டர் அதிபர்களின் தலையில் கட்டுகிறார்கள்.

இந்தப் படமும் வாங்கிய அளவுக்கு வசூலாகவில்லை என்றால் என்ன செய்வார்கள்..? மீண்டும் ஓடி வருவார்கள். மீண்டும் ஒரு சமாதானம். அடுத்தப் படம்.. ஆசை வார்த்தை.. இதே கதைதான் சங்கிலித் தொடர்போல் தொடர்ந்து நடந்து வருகிறது.. வந்திருக்கிறது.

இந்த விநியோகஸ்தர்களும், தியேட்டர் அதிபர்களும் ஒரே தயாரிப்பாளரிடம் கொடுத்தப் பணம்தான் அவர்கள் அடுத்து திரையுலகத்திற்குள் இறக்குவதற்காக, புழக்கத்தில் விடக் காத்திருக்கும் பணம். அந்தப் பணம் வரவில்லையென்றால் அவர்களால் அடுத்தப் படத்திற்கு முதல் போட முடியாது. பொட்டி மீது பணத்தை வைத்து அவர்களால் வாங்க முடியாது. அடிபட்ட விநியோகஸ்தர்களும், தியேட்டர்காரர்களும் ஒதுங்கினால் அவர்களிடம் கடன் வாங்கியோ, உதவி செய்தோ படம் தயாரிக்கக் காத்திருக்கும் அடுத்தத் தயாரிப்பாளரும் பாதிக்கப்படுவார். இது போன்று திரையுலகத்திற்குள்ளேயே இந்தப் பணச் சுற்று நிறுத்தப்பட்டிருக்கிறது.

கொடுக்க வேண்டாம் என்பதை அவுட்ரேட்டின் விதிமுறையாக வைத்திருப்பதே கொடுமைதான். சூதாட்டத்தில் விழுந்தால் மரணம்.. எழுந்தால் நடனமாடலாம் என்றால் மனிதர்கள் தவறுவது இயல்புதானே.. இந்த விதிமுறையை நீக்கிவிட்டு நஷ்டமடைந்தால் அதில் திரையுலகின் அனைவரும் பங்கு பெற வேண்டும். அதேபோல் லாபமடைந்தால் அதிலும் அனைவருக்கும் பங்கு கிடைக்க வேண்டும் என்பது போன்ற விதிமுறைகள் இருந்தால்தான் இப்போது கொஞ்சமாக செத்துக் கொண்டிருக்கும் தமிழ்ச் சினிமாவுலகம் கொஞ்சமாவது பிழைக்க முடியும்..

பெரிய நடிகர்கள் தங்களது படங்கள் விற்பனையாகும் அளவுக்கு ஏற்றாற்போல் தங்களது சம்பளத்தையும் வகுத்துக் கொள்ள வேண்டும் என்றுதான் பெரிய தயாரிப்பாளர்கள் விரும்புகிறார்கள். ஆனால் பூனைக்கு யார் மணி கட்டுவது என்று நினைத்து அமைதி காக்கிறார்கள். நடிகர் சங்கம் இதனை ஏற்க மறுக்கிறது. “எங்களுக்கு மார்க்கெட் இருக்கும்போது நாங்கள் சம்பாதித்தால்தான் உண்டு..” என்கிறார்கள். விஜய் விவகாரத்தில்கூட நடிகர் சங்கம் இப்போதும் அவர் பக்கம்தான் பேசுகிறது. பணம் கொடுக்கத் தேவையில்லை என்கிறது சங்கம்.

“நீங்க கொடுத்தீங்கன்னா நாளைக்கு எங்ககிட்டேயும் கேப்பாங்க..” என்கிறார்களாம் பெரிய நடிகர்கள். பசையுள்ள புதிய, பெரிய தயாரிப்பாளர்களோ பெரிய நடிகர்களை வைத்துப் படமெடுக்க பெட்டியோடு காத்திருப்பதால் வந்தவரையிலும் அள்ளுவோம் என்று நினைக்கிறார்கள் அவர்கள்.

இப்படி தொலை நோக்குப் பார்வையில்லாமல் வியாபார ஒப்பந்தங்களையும், விதிமுறைகளையும் வைத்துக் கொண்டு இன்னும் எத்தனை நாட்கள் தமிழ்ச் சினிமாவுலகத்தைத் தள்ளிக் கொண்டு போக முடியும் என்று தெரியவில்லை.

இப்போது ஒரு திரைப்படம் எத்தனை நாட்கள் ஓடியது என்பதெல்லாம் தேவையே இல்லை என்றாகிவிட்டது.. எத்தனை கோடிகளை வசூல் செய்தது என்பதே முக்கியமாகப் போய்விட்டதினால், இங்கே யாருக்கும் இதனைப் பற்றிக் கவலையில்லை. நஷ்டமானவர்களைத் தவிர..!


காவலன் திரைப்படத்தின் விமர்சனம் இங்கே :

Tweet

அலட்டல் பேட்டியால் மிஷ்கின் அவஸ்தை..!

11-11-2010

என் இனிய வலைத்தமிழ் மக்களே..!

இந்த மேட்டர் எப்படியென் கண்ணுக்குப் படாமல் போனது என்று தெரியவில்லை. ஜஸ்ட் மிஸ்ஸிங்..

தமிழ்த் திரையுலகின் சமீபத்திய சலசலப்பு, இயக்குநரான மிஷ்கின் சென்ற வார ஆனந்த விகடன் இதழில் உதவி இயக்குநர்களைப் பற்றிக் குறிப்பிட்ட சில வார்த்தைகள் அவர்களை மனவருத்தமடைய செய்துவிட்டது.

அந்தப் பேட்டியில் மிஷ்கின் சொல்லியிருப்பது இதுதான்..

“தமிழ் சினிமாவில் திரைக்கதை எழுதறவங்க குறைஞ்சுட்டாங்களே..?” என்ற கேள்விக்கு இப்படி பதில் சொல்லியிருக்கிறார் மிஷ்கின் :

“அதுதான் சார் என் கோபமும். இப்ப புத்தகம் படிக்கிற பழக்கம் குறைஞ்சிருச்சு. இன்னைக்கு வர்ற உதவி இயக்குனர்களை நினைச்சா எனக்கு கோபம் வருது. இப்ப என்ன புத்தகம் படிச்சுட்டு இருக்கீங்கன்னு கேட்டா, பாரதிராஜா, இளையராஜாவெல்லாம் படிச்சுட்டா சினிமாவுக்கு வந்தாங்கன்னு கேட்கிறான் ஒருத்தன். கெட்ட வார்த்தையிலேயே திட்டி அனுப்பிச்சுட்டேன்.

அவங்க வாழ்க்கையை, கிராமங்களை, மனிதர்களை படிச்சவங்க. படிக்காம படைப்பாளி ஆக முடியாது. சினிமா எடுக்கணும்னு சென்னைக்கு வர்ற சராசரி 21 வயது இந்திய இளைஞனுக்கு என்ன அனுபவம் இருக்கும்? வீட்டுக்கு பக்கத்தில் யாராச்சும் ஓடிப் போயிருப்பாங்க. அப்பா அம்மாவை போட்டு அடிச்சிருப்பாரு. இரண்டு கொலை தற்கொலை பார்த்திருப்பாங்க. ஒரு காதல் பண்ணியிருப்பான். ஆயிரம் தடவை சுய இன்பம் அனுபவிச்சிருப்பான். இதை தாண்டி என்ன வாழ்க்கை அனுபவம் இருக்கும்..? ஒரு சினிமா கோடிப் பேர் அண்ணாந்து பார்க்கும் விஷயம். நீங்க எல்லோரையும் பாதிக்கணும். அப்போ எவ்வளவு அனுபவம் வேணும். அதற்குப் புத்தகம் படிக்கணும். கத்துகிற ஆர்வம் இல்லாததால்தான் டிவிடி  பார்த்து சினிமா எடுக்க வேண்டியிருக்கு. சினிமான்னு இல்லை. தன்னைப் புதுப்பிக்காத கற்றுக் கொள்ளாத எந்தத் துறையும் விளங்காது.”

இதை படித்துவிட்டுதான் பெரும் கோபத்தில் கொந்தளித்துவிட்டார்கள் உதவி இயக்குநர்கள்.

இரண்டு, மூன்று நாட்களாக தங்களுக்குள்ளேயே கூடிப் பேசிக் கொண்டிருந்த உதவி இயக்குநர்கள் 70 பேர் கொண்ட குழுவாக உருமாறி நேற்று மாலை வடபழனி, குமரன் காலனியில் உள்ள தமிழ்நாடு திரைப்பட இயக்குநர்கள் சங்கத்தை முற்றுகையிட்டு மிஷ்கின் தங்களை அவமரியாதை செய்து பேட்டியளித்துள்ளார். அவர் மீது நடவடிக்கை எடுக்க வேண்டும் என்று கோரி மனுவைக் கொடுத்து அங்கேயே அமர்ந்து போராட்டத்திலும் ஈடுபட்டுவிட்டார்கள்.

இந்தப் பேட்டியை முன்பே படித்திருந்த இயக்குநர் சங்கத்தின் முக்கியஸ்தர்களெல்லாம் ஏற்கெனவே மிஷ்கின் மீது காண்டுவில்தான் இருந்தார்கள். சமீபத்தில் நடந்த இயக்குநர்கள் சங்கத்தின் ஆண்டு விழாவுக்குக்கூட மிஷ்கின் தனது சார்பாக ஒரு சின்ன பங்களிப்பைக்கூட வழங்க முன் வராத கோபமும் அவர்களுக்கு இருந்தது.

நேற்றைய போராட்டத்திற்கு முன்பாகவே இயக்குநர்களின் கோபத்தையும், மற்றும் உதவி இயக்குநர்களின் ஆவேசத்தையும் கேள்விப்பட்ட இயக்குநர்கள் சங்கத்தின் செயலாளர் ஆர்.கே.செல்வமணி மிஷ்கினிடம் தனது கண்டனத்தைத் தெரிவித்திருந்தாராம்.

சங்க செயற்குழுவில் இது பற்றி பேசப்படும் கட்டாயம் இருப்பதாகச் சொன்னதால். வேறு வழியில்லாமல் மிஷ்கின் ஒரு மன்னிப்பு கடிதத்தை இயக்குநர்கள் சங்கத்தில் ஒப்படைத்திருக்கிறார்.

அந்தக் கடிதத்தில் இருந்த வாசகங்கள் மறுபடியும் மிஷ்கின் சொல்லியிருப்பதை பிரதிபலிப்பதைப் போல் இருந்ததால் இதனை ஏற்க மறுத்த, உதவி இயக்குநர்கள் “மிஷ்கின் நேரில் வந்து மன்னிப்பு கேட்க வேண்டும்.. விளக்கமளிக்க வேண்டும்” என்றெல்லாம் கொந்தளித்திருக்கிறார்கள். “மிஷ்கின் மூணாறில் இருக்கிறார். வந்தவுடன் பேசுவோம்” என்றெல்லாம் ஒரு வழியாகச் சொல்லி தற்போதைக்கு இந்தப் பிரச்சினைக்கு ஒரு புள்ளிஸ்டாப் போட்டு வைத்திருக்கிறார்கள்.

ஆனாலும் மிஷ்கினை சங்கத்திற்கு இழுத்து மன்னிப்பு கேட்க வைக்காமல் விடப் போவதில்லை என்று உதவி இயக்குநர்களில் ஒரு சாரார் முனைப்புடனேயே உள்ளார்கள்.

இந்த நிலையில் தமிழ்ச் சினிமாவில் இணை இயக்குநராகப் பணியாற்றி வரும் இனிய நண்பர் பாலமுரளிவர்மன் தனது பேஸ்புக் பக்கத்தில் மிக அருமையாக மிஷ்கினுக்கு ஒரு பதிலடி கொடுத்திருக்கிறார். அது உங்களுக்காக இங்கே :

மிஷ்கின் எனப்படும் மனநோயாளிக்கு...- பாலமுரளிவர்மன்.

“இந்த உலகின் மிக முக்கியமான பிரச்னையாக இருப்பது எதுவென்றால், முட்டாள்கள் அதீத தன்னம்பிக்கையோடும் அறிவாளிகள் அவநம்பிக்கையோடும் தம்மீதே கொண்டிருக்கும் சந்தேகங்களோடும் வாழ்வதுதான்.”-ஷேக்ஸ்பியர்.

இதே சிக்கல் திரையுலகிலும் நீடிக்கிறது. தமிழ்த் திரையுலகில் ஒருவன் வெற்றியாளனாக உருவாகும் முன் சந்திக்கின்ற எண்ணற்ற போராட்டங்களுக்குள் முதன்மையானது, புத்திசாலிகளுக்கும் தன்னை புத்திசாலியாக காட்டிக் கொள்பவர்களுக்கும் இடையேயான போராட்டம்தான்.

உடம்பெல்லாம் வாயாக, வாயெல்லாம் கொழுப்போடு திரியும் இந்த மிஷ்கின் சாதித்தது என்ன? இந்த சமூகத்தில் எதை மாற்றியமைத்துவிட்டார்? மாபெரும் படைப்பாளியான ரித்விக் கடாக் ஒரு முறை சொன்னார். “மக்கள்தாம் எப்போதுமே மகத்தானவர்கள் என நான் நம்புகிறேன். அவர்கள்தாம் தங்களை தாங்களே மாற்றியமைத்துக் கொள்கிறார்கள். நான் எதையும் மாற்றியமைப்பதில்லை.”
 

இதுதான் தன்னுடைய கலையையும், மக்களையும் மதித்து நேசிக்கும் உயரிய கலைஞனின் பண்பு. மகத்துவமிக்க படைப்புகள் மக்களிடமிருந்துதான் உருவாகின்றன. வாழ்க்கையை விட்டுவிட்டு வேறு எதை உன்னதமாக படைத்துவிட முடியும். இத்தகைய உயர்வான குணங்களை மனநோயாளியான உன்னிடம் எதிர்பார்க்கக் கூடாது என்பது எமக்குப் புரிகிறது. ஆனால் திரைப்பட இயக்குனர் என்பவன் இந்திய நாட்டின் பிரதமர் அல்ல என்கிற எதார்த்தத்தை நீ புரிந்து கொள்ளவேண்டும்.

உன்னைப் போன்றவர்களும் உண்டுக் கொழுப்பதற்காக தன் உயிர் உருக்கி, உடல் வருத்தி உழைக்கின்ற ஏழை விவசாயியைவிட நீ ஒன்றும் கிழித்துவிடவில்லை என்பதை தினமும் கொழுத்த வாயை திறப்பதற்கு முன் நீ எண்ணிப் பார்க்க வேண்டும்.

அத்தகைய உயர்வான விவசாய குடும்பங்களிலிருந்தும் உழைக்கும் மக்களிடமிருந்தும் உருவாகி தங்களது வாழ்க்கையை படைப்பாக்க வேண்டுமென்கிற லட்சிய வேட்கையுடன் உதவி இயக்குனர்களாக வந்திருக்கிற எளிய குடும்பத்து இளைஞர்களை நீ இழிவான குடிபிறப்பிலிருந்து வந்தவன் என்பதற்காக உனக்கு சமமாக கருதி இளக்காரமாக பேசுவதை எங்களால் அனுமதிக்க முடியாது.

நீ நிமாய்கோஷ் போலவோ, எழுத்தாளர் ஜெயகாந்தன், அவள் அப்படித்தான் ருத்ரய்யா மாதிரியோ தமிழ்த் திரைப்படத்திற்கான புதிய பரிணாமத்தை கொடுத்தவனா? அல்லது பாரதிராஜா, மகேந்திரன், பாலுமகேந்திரா மற்றும் பாலா போல திரைப்படத்தின் போக்கை திசை திருப்பிவிட்டவனா? புடோவ்கின், ஐசன்ஸ்டீன் போல திரைப்படத்திற்கென கோட்பாடுகளை உருவாக்கி தந்தவனா? உனக்கேன் இவ்வளவு நீளமான நாக்கு?

பெண் சுகத்துக்காகவும், பெட்டி நிறைய பணம் சம்பாதிக்கவும் உன்னைப் போன்றவர்கள் சினிமாவை தேர்ந்தெடுத்திருக்கலாம். என் போன்றவர்கள் சமூக மாற்றத்திற்கான களமாக திரைப்படத்தை கையில் எடுத்திருக்கிறோம். எனக்கு சினிமா ஒரு ஆயுதம். நான் திரைத்துறைக்கு வராமல் போயிருந்தால் ஆயுதம் தூக்கியிருப்பேன். அடக்கி ஒடுக்கப்படும் எம்மக்களுக்கான கருவியாக சினிமாவை கருதும் என் போன்ற இளைஞர்களும் இருபத்தியொரு வயதுள்ள எல்லா சராசரி இந்திய இளைஞர்களும் நீ சொன்ன இலக்கணத்திற்கு பொருந்த மாட்டார்கள்.

என்னை உனக்கு தெரியுமா? எங்களோடு கைகோர்த்து களமாடுகிற தம்பிகளை நீ அறிவாயா? உன்னைப் போல சுயநலமாக ஒரு நாளும் நாங்கள் இருந்ததில்லை. மக்கள் பிரச்னைகளுக்காக எந்த நிலையிலும் தெருவில் இறங்கி போராடுகிறோம். நீ என்றைக்காவது முன் வந்திருக்கிறாயா? உன் தலைக்கொழுப்பு உன்னை தரையில் இறங்க அனுமதித்திருக்கிறதா?

இயக்குனர் சங்கத்தின் 40-வது ஆண்டுவிழா நடந்தபோதே இறுமாப்புடன் விலகி இருந்தவன்தானே நீ! உன்னைப் பற்றிய உனது மதிப்பீடுதான் எவ்வளவு மடத்தனமானது? இரண்டு லட்ச ரூபாய்க்கு புத்தகங்கள் வாங்கினேன் என்று சொல்லிக் கொள்கிறாயே அந்த புத்தகங்கள் உனக்கு கற்றுக் கொடுத்தது என்ன?

படிப்பு மனிதனை பண்படுத்ததானே செய்யும். தன் அகங்காரத்தை ஒடுக்கி உனக்குள் உன்னை தேடச் செய்யவில்லையெனில் நீ ஏதோ தவறான புத்தகங்களை படிக்கிறாய் என்பது புரிகிறது. அதிகம் படிக்க படிக்க மனம் விழிப்பு கொள்ளும். வாய் தானாக மூடிக் கொள்ளும் ஆனால் நீ ஒவ்வொரு முறையும் திருவாய் திறப்பதில் ஒன்று புரிகிறது. வாங்கிய புத்தகங்களை நீ படிப்பதே இல்லை. மேசை மீது பரப்பி வைத்துக் கொண்டு வருகிறவர்களிடம் எல்லாம் நடைபாதை வியாபாரி போல விரித்துக் காட்டுவதிலேயே நிறைவு பெற்று விடுகிறாய்.

இதுவரை உனக்கு இரண்டு படங்கள் வெளிவந்திருக்கின்றன. மூன்றாவதில் பெரும் சிக்கல். இடைவெளிக்குப் பின் நான்காவதாக ஒரு படம். இதைத் தவிர வேறென்ன செய்து விட்டாய்? உன்னுடைய படங்கள் எங்கிருந்து எடுக்கப்பட்டன என்பது பற்றி திரையுலகில் பெரிய பட்டிமன்றமே நடக்கிறது. நீ ஒரு கை தேர்ந்த திருடன் என்பது எல்லோருக்கும் தெரிந்திருக்கிறது. பிறகு எதற்காக இவ்வளவு ஆணவம்?

உனக்கு நினைவிருக்கிறதா? நாங்கள் ஐந்துபேர் உன்னை ஒரு நாள் சந்தித்தோம். இயக்குனர் திரு.சேரன் குறித்து எவ்வளவு கேவலமான தொனியோடு நீ பேசினாய் ? “சேரனுக்கே ஒண்ணும் தெரியலங்க . யுத்தம் செய் ஷூட்டிங்ல மொத அஞ்சுநாள் ரொம்ப தடுமாறி போயிட்டாரு, எதுவுமே அவருக்கு புரியல, எம் பேட்டனையே அவரால புரிஞ்சுக்க முடியல. என்னடா இந்த மனுசன் இப்படி இருக்காரேனு நெனச்சேன், அப்பறந்தான் கொஞ்ச கொஞ்சமா புரிஞ்சிக்கிட்டு செட்டானாரு”

சொன்னியா இல்லியா...? நல்ல தாய் தகப்பனுக்கு பொறந்திருந்தா உன்னால இத மறுக்க முடியாது. தமிழ்த் திரையில் அண்ணன் சேரன் ஆழமான தடம் பதித்தவர். அவருடைய எல்லா படைப்புகளுமே தமிழர் வாழ்வை உணர்வுப்பூர்வமாக எங்கள் நெஞ்சில் விதைத்தவை. அவரைப் பற்றியே ஏளனமாக பேசிய போதுதான் உன்னுடைய மனவிகாரத்தை நாங்கள் புரிந்து கொண்டோம்.

இங்கே இருக்கிற உதவி இயக்குனர்களுக்கு வாழ்க்கை அனுபவம் இல்லை என்கிறாய்! அமெரிக்காவில் மாதம் இரண்டரை லட்சம் ரூபாய் சம்பாதிக்கும் இளைஞன் தன் வேலையை விட்டுவிட்டு உன்னிடம் உதவி இயக்குனராக வரப் போவதை சொன்ன நீ, “அவன் பேசுறத கேக்குறப்பவே தெரியுது. நிச்சயமா நான் சொல்றேன் அவன் டைரக்டராயிடுவாங்க” என்றாய். “எத வெச்சு சொல்றீங்க?” நான் கேட்டதும் ஒருகணம் என்னை உற்றுப் பார்த்துவிட்டு “எனக்கு தெரியும்” என்றாய்.

இங்கிருக்கிறவர்களுக்கே வாழ்க்கை அனுபவம் இல்லை எனும்போது, இவர்களே மனிதர்களை படிக்காதவர்களாக உன் பார்வைக்கு படும்போது, அமெரிக்காவில் இருப்பவனுக்கு மட்டும் என்ன அனுபவ அறிவு  இருந்துவிட முடியும் ?

யாராவது ஒரு உதவி இயக்குனர் தனியாகச் சிக்கிவிட்டால், மேதாவித்தனத்தை காட்டுவதுதான் ஒரு இயக்குனருக்கு பெருமையா?
“தம் அடிப்பியா? சரக்கடிப்பியா? இதெல்லாங்கூட செய்யாம நீ என்னடா அஸிஸ்டென்ட் டைரக்டர்? எதுக்கு சினிமாவுக்கு வந்த?” என்று கலங்கடித்திருக்கிறாயே..? உன்னளவில் வாழ்க்கை அனுபவம் என்பது குடிப்பதும் புகைப்பதும்தானா?

நீ முதலில் ஒன்றை புரிந்து கொள். பாட்டும் இசையும், கூத்தும் கலையும் எம் தமிழர் மரபில் உயிரோடு கலந்தவை. எங்கள் வாழ்க்கையை தீர்மானிக்கும் ஆதார காரணிகளாக இருப்பதும் கலைகள்தான். உதவி இயக்குனர்கள் மட்டுமல்ல. ஒவ்வொரு தமிழனுக்கும் அவனது வாழ்க்கை அனுபவச் செறிவோடுதான் நிறைவடைகிறது. எல்லோரிடமும் ஓராயிரம் கதைகள் நிறைந்து கிடக்கின்றன. சொல்லவும், எழுதவும், திரைப்படமாக உருமாற்றுவதற்குமான வாய்ப்பு எல்லாருக்கும் வாய்ப்பதில்லை.

நீ என்னோடு புறப்பட்டு வர முடியுமானால் சொல். தஞ்சை, மதுரை, திருநெல்வேலி உள்ளிட்ட தமிழகத்தின் கடைக்கோடி சிற்றூர்களுக்கும் செல்வோம். எங்கள் மனிதர்களை பார். எம்மக்களின் வாஞ்சை மிகுந்த நேசத்தை உணர். இவர்களை பற்றியா இந்த வெள்ளந்தியான மனிதர்களின் குடும்பப் பின்னணி பற்றியா கொச்சைப்படுத்தினோமென்று குறுகிப் போவாய்- நீ மனிதனுக்குப் பிறந்திருந்தால்!.

தமிழ்நாட்டில் பிறந்தவர்கள் மீது நீ ஏன் வார்த்தைகளை அமிலமாக அள்ளி வீசுகிறாய்? உன்னுடைய உள்மனதில் இருப்பது என்ன? நீ யார்? எவ்விடத்திலிருந்து புறப்பட்டவன்? உன்னுடைய வேர் எங்கிருக்கிறது? எல்லாம் எங்களுக்கு தெரியும். உன்னுடைய திரைப்படங்களில் நீ ஏன் பெரும்பாலும் மலையாளிகளுக்கே முன்னுரிமை கொடுக்கிறாய் என்கிற உண்மையும் எங்களுக்கு தெரியாமல் இல்லை.

இங்கே பிழைக்க வருபவர்கள் எங்களுக்கு எதிரிகள் அல்ல. மாறாக எங்களை எதிரியாக கருதுகிற எவனுக்கும் இங்கு இடம் தர முடியாது. இனியும் உன் தடித்த நாக்கும் எங்களுக்கு எதிராக நீளுமானால் நீ தமிழ்நாட்டிலிருந்து இருப்பிடத்தை மாற்றிக் கொள்ள நேரிடும் என்பதை மனதில் கொள்.

முந்தைய தலைமுறை போல இன்றைய இளம் தலைமுறை பெருந்தன்மை என்ற பெயரில் உறங்கிக் கிடக்காது என்பதை சூடு சொரணை உள்ள தமிழனாகவும், உருப்படியான உதவி இயக்குனராகவும் உனக்கு சொல்லிக் கொள்கிறேன். அரையிருட்டு அறைக்குள்ளும் கருப்புக் கண்ணாடி அணிந்து கொள்ளும் உனக்கு எல்லாமே இருட்டாகத்தான் தெரியும்.

கண்களை விரி ! காதுகள் திற ! வாயை மூடு !
 

நன்றி பாலமுரளிவர்மன்..!

'சித்திரம் பேசுதடி', 'அஞ்சாதே' படங்களுக்குப் பின்புகூட கொஞ்சம் தன்மையுடன் பேசி வந்த மிஷ்கின், 'நந்தலாலா' படத்திற்குப் பின்புதான் இப்படி தடாலடியாகப் பேசி வருகிறார் என்று நினைக்கிறேன்.

புத்தகம் படி என்பது நல்ல அட்வைஸ்தான். ஆனால் முழுக்க, முழுக்க புத்தகமே திரையுலகத்திற்கு வழிகாட்டியாக இருந்துவிடாது. அவரவர்க்குள்ளும் ஒரு மேக்கிங் திறமை இருந்தாக வேண்டும்..! மிஷ்கினுக்கு அதுவும் இருக்கிறது.. படிப்புத் திறனும் இருக்கிறது.. தன்னைப் போலவே அத்தனை பேரும் இருக்க வேண்டும் என்று எதிர்பார்ப்பது நல்ல விஷயந்தான் என்றாலும் அதனை தன்மையாகச் சொல்ல வேண்டும்.

வடிவேலு என்னும் மனிதன் எத்தனையோ தமிழர்களையும், தமிழ் தெரிந்த மக்களையும் தியேட்டர்களில் சிரிக்க வைத்தபடியேதான் உள்ளார். ஆனால் அவர் பேசுகின்ற பேச்சை வைத்துப் பார்த்தால் அவர் எவ்வளவு படித்திருக்க வேண்டும்..? இல்லையே.. இங்கே அவருக்கு கிடைத்திருப்பது நடிப்பு அனுபவமும், கதை சொல்லியின் திறமையும்தான். அதனைக் கச்சிதமாகப் பயன்படுத்தி வருகிறார்.

இப்போது இருக்கின்ற உதவி இயக்குநர்களுக்கு எதுவுமே தெரியாது என்பதைப் போல இருக்கும் அவரது பேட்டி நகைச்சுவையானது. தமிழ்ச் சினிமா இயக்குநர்களுக்கு என்ன தேவையோ அது 80 சதவிகித உதவி இயக்குநர்களுக்கு நிச்சயம் இருக்கிறது. மிச்சமிருக்கும் 20 சதவிகித இயக்குநர்களுக்கு தமிழையும் தாண்டி அனைத்து மொழிகளிலும் மக்களை ரசிக்க வைக்கும் திறமையும் இருக்கிறது. இதில் மிஷ்கினும் ஒருவர்.

கதையாடலுக்காக புத்தகங்கள் மிக அவசியம். ஆனால் திரைக்கதையாடலுக்கு புத்தகங்கள் தேவையில்லை. வெற்றி பெற்ற, புகழ் பெற்ற, காவியப் படங்களின் திரைக்கதைகள்தான் அதற்குத் தேவை. ஒரு வெற்றி பெற்ற படத்தின் கதை என்பது இரண்டு வரிதான். ஆனால் அதனை விரிவாக்கம் செய்து கொண்டு செல்லும் சினிமா மொழியான திரைக்கதையை எந்தப் புத்தகத்திலும் சொல்லிக் கொடுத்துவிட முடியாது.

சினிமா என்னும் கனவுத் தொழிற்சாலையில் 21 வயதிலேயே  நுழைந்துவிட வேண்டும். கிளாப் அடிப்பவனாக, கன்ட்டினியூட்டி எழுதுபவனாக.. பிராப்பர்ட்டீஸ் பார்ப்பவராக, சீன்களை பிரிக்கும் திறன் படைத்தவராக, ஷூட்டிங் ஷெட்யூஸ் போடுபவராக, பிராம்ட் இயக்குநராக, இணை இயக்குநராக.. இப்படி ஸ்டெப் பை ஸ்டெப்பாக அவன் அடியெடுத்து வைப்பதற்கு வயதும், அனுபவம் ஒருசேர கிடைத்தால் நிச்சயம் அவன் சிறப்பான இயக்குநராக வர முடியும்.

இதனால்தான் இந்த வயதிலேயே மிக அதிகம் பேர் இணைந்துவிடுகிறார்கள். ஒரு டிகிரியை முடித்துவிட்டு வருபவர்களும், பிளஸ்டூவை மட்டும் முடித்துவிட்டு நேராக வருபவர்களும் உண்டு. அத்தனை பேருமா இயக்குநர்களாக முடியும்..? அவர்களுக்கே தெரியும்.. அது முடியாது என்று..! அவர்களிடத்தில் அந்தத் திறமை இல்லையெனில் மேற்கொண்டு ஒரு ஸ்டெப்பும் வைக்க முடியாது. இதுவும் அவர்களுக்கே தெரியும்.

மூத்த உதவி இயக்குநர்கள், இணை இயக்குநர்கள், போன்ற மிகப் பெரிய அனுபவசாலிகளை வைத்துத்தான் பெரிய இயக்குநர்களே இப்போது திரைப்படத்தை இயக்கிக் கொண்டிருக்கிறார்கள். இவர்களெல்லாம் 24 அல்லது 25 வயதில் சினிமாவுலகத்திற்குள் வந்தவர்கள்தான்..! புத்தக அறிவோடு, அவர்களுடைய பீல்டு அனுபவமும்தான் அவர்களுக்கு இப்போது சோறு போடுகிறது.

21 வயதில் வராதே என்றால் வேறு எந்த வயதில் உதவி இயக்குநராகப் பணிக்கு வருவது? 30 வயதில் பீல்டுக்குள் வரும் ஒரு உதவி இயக்குநர், 25 வயது இணை இயக்குநருக்குக் கீழ் வேலை செய்வாரா..? முதலில் யார் புதிய உதவி இயக்குநராக பணியில் சேர்ந்தாலும் அவனது முதல் வேலை நட்சத்திரங்கள் அணியும் உடைகளை காட்சிக்கு, காட்சி குறித்து வைத்துக் கொள்ளும் கன்ட்டினியூட்டி பார்ப்பதுதான்.

இதன் பின்புதான் படிப்படியாக அடுத்த வேலைக்குப் போக முடியும்.. எடுத்த எடுப்பிலேயே யாரும் இணை இயக்குநராக இங்கே சேர்த்துக் கொள்ளப்படுவதில்லை. விதிவிலக்குகள் இருக்கலாம். தற்போது அதுதான் நடந்து வருகிறது. குறும்படங்கள், ஆவணப் படங்கள், விளம்பரப் படங்கள் எடுத்து வரும் இயக்குநர்கள்தான் இப்படி அவதாரமெடுத்து வருகிறார்கள். ஆனால் இவர்களிடம் சினிமா மேக்கிங் பற்றிய அனுபவம் உண்டு. 

மிஷ்கினே சொல்லியிருப்பதுபோல் அமெரிக்காவில் வேலை பார்த்தவன் இங்கே வந்து நிமிடத்தில் இயக்குநராகிவிட முடியும் என்றால், வாய்ப்பு கிடைத்தால் இங்கேயிருப்பவனும் அதேபோல் ஆகலாம். பண பலமும், ஆள் பலமும், விளம்பரத் திறமையும் இருந்தால் யார் வேண்டுமானாலும் இங்கே இயக்குநராகலாம்.! ஆனால் இங்கேயிருப்பவனுக்கு ஒன்றுமே தெரியாது. அமெரிக்காவில் இருந்து வருபவனுக்கு எல்லாமே தெரியும் என்று மிஷ்கின் சொல்வது மேல்தட்டு வர்க்க பூர்ஷ்வாத்தனம்!

இந்த வயதில் இணைந்து கொண்டு மேலும், மேலும் படங்களில் வேலை செய்யும்போது உலக அறிவோடு நிச்சயம் சினிமா அனுபவமும் சேர்ந்தே அவனுக்குக் கிடைக்கத்தான் போகிறது. எதுவுமே இல்லாமல் எவனும் இங்கே அடுத்த ஸ்டெப்பை எடுத்து வைக்க முடியாது.

இனிமேற்கொண்டும் தமிழ்ச் சினிமாவில் கதையில் புதுமையையும், திரைக்கதையும் புத்தம் புதுசையும் ஒரேசேர கொடுப்பவனே ஜெயிக்க முடியும். உதாரணம் 'மைனா' படம். நான்கு படங்களை இயக்கிய பிரபுசாலமனுக்கு ஐந்தாவது படமே மிகப் பெரும் புகழைப் பெற்றுத் தந்திருக்கிறது. எத்தனை ஆண்டு கால உழைப்பு..!? இதை முதல் முறையிலேயே அனுபவித்தவர்களும் உண்டு. பாலாவைப் போல, சசியைப் போல.. பாண்டிராஜை போல.. சசிகுமாரை போல.. ஆனால் இவர்களெல்லாம் திரையுலக அனுபவத்தில் தோய்த்தெடுத்தவர்கள்.

“1000 தடவை சுய இன்பம் அனுபவிச்சு இருப்பான்” என்பதெல்லாம் ரொம்பவே ஓவர்.. சாருநிவேதிதாவுடன் இணைந்த பின்பு இப்படியெல்லாம் மிஷ்கின் பேசாமல் இருந்தால்தான் ஆச்சரியம். அதனால் எனக்கு இது ஆச்சரியமில்லை. ஆனால் உதவி இயக்குநர்களிடத்தில் இந்த ஒரு வார்த்தைக்கு தீக்குளித்ததைப் போன்ற வெறுப்பு.. முற்றிலுமாகத் தவிர்த்திருக்க வேண்டிய வார்த்தைகள் இது..!

மிஷ்கினின் இந்த பேச்சு வன்மையாகக் கண்டிக்கத்தக்கது...!

Tweet

சென்னையில் அடுத்த மாதம் உலகத் திரைப்பட விழா..!

06-11-2010

என் இனிய வலைத்தமிழ் மக்களே..!

வருடாவருடம் சென்னைவாழ் திரைப்பட ரசிகர்கள் ஆவலுடன் எதிர்பார்க்கும் உலகத் திரைப்பட விழாவுக்கான அறிவிப்பு நேற்று முன்தினம் வெளியிடப்பட்டுள்ளது.

கடந்த ஏழாண்டுகளாக இந்தத் திரைப்பட விழாவை நடத்தி வரும் சென்னையைச் சேர்ந்த International Cine Appreciation Forum அமைப்பு 8-வது ஆண்டாக இந்த முறையும் தொடர்ந்து இந்தத் திரைப்பட விழாவை நடத்துகிறது.

வரும் டிசம்பர் 15-ந் தேதி முதல் 23-ந் தேதி வரை 9 நாட்கள் இந்த விழா நடைபெற இருக்கிறது. இதில், 43 நாடுகளை சேர்ந்த 130 படங்கள் திரையிடப்படுகின்றன. இதில், 14 தமிழ்ப் படங்களும் அடங்கும்.

முதல் படமாக அர்ஜென்டினாவில் தயாரான `பசில்` என்ற படம் திரையிடப்படுகிறதாம். இந்தாண்டும், சென்ற ஆண்டும் கேன்ஸ், பெர்லின், வெனீஸ் ஆகிய சர்வதேச பட விழாக்களில் பங்கேற்ற சில படங்கள் இந்தப் பட விழாவில் திரையிடப்பட உள்ளதாகத் தெரிகிறது.

உட்லண்ட்ஸ், உட்லண்ட்ஸ் சிம்பொனி, ஐநாக்ஸ், பிலிம் சேம்பர் ஆகிய தியேட்டர்களில், படங்கள் திரையிடப்பட உள்ளன.

இந்த அமைப்பில் துணைத் தலைவராக இருப்பவர் நடிகர் எஸ்.வி.சேகர். சென்ற ஆண்டு அதிமுகவுடன் உரசலில் இருந்ததால் தி.மு.க.வுடன் மிக நெருக்கத்தில் இருந்தார் சேகர். அதனால் துவக்க விழாவுக்கு மு.க.ஸ்டாலினை அழைத்து வந்ததில் சேகருக்கு பெரும் பங்கு இருந்தது. ஆனால் சென்ற ஆண்டு இந்த நிகழ்வை நடத்துவதற்கு 50 லட்சம் ரூபாய் நிதியுதவி கேட்டிருந்தார்கள். அந்தப் பணம் ஏனோ அப்போது கிடைக்கவில்லை.

தற்போது எஸ்.வி.சேகருக்கும், தி.மு.க. தலைமைக்கும் டெர்ம்ஸ் சரியில்லாத சூழல் இருப்பதால் எஸ்.வி.சேகர் ஒதுங்கிக் கொள்ள பி.வாசுவையும், குஷ்புவையும் துணைக்கு அழைத்துப் போய் முதல்வரிடம் சென்று 50 லட்சம் ரூபாய் வழங்கும்படி கோரி்க்கை வைத்தார்கள்.

எஸ்.வி.சேகர் வராததாலோ என்னவோ கலைஞர் இந்த முறை மனமிரங்கி 25 லட்சம் ரூபாயை அள்ளிக் கொடுத்துள்ளார். பாவம் எஸ்.வி.சேகர்.. தனக்கு மரியாதை இவ்ளோதானா என்று இப்போது நினைத்துப் பார்த்து குமுறியிருப்பார் என்று நினைக்கிறேன்.

போதாக்குறைக்கு சென்ற ஆண்டு நடந்த திரைப்பட விழாவில் அவருடைய மகன் ஹீரோவாக நடித்த வேகம் படத்தை தமிழ்ப் படங்கள் பிரிவில் திரையிட்டு பலரது சாபத்தையும் வாங்கிக் கட்டிக் கொண்டார்.

இந்தாண்டும் 14 தமிழ்த் திரைப்படங்கள் திரையிடப்பட உள்ளன. எந்தெந்த படங்களை அரசியல் காரணங்களுக்காகத் திரையிட்டு நம் வயித்தெரிச்சலைக் கொட்டிக் கொள்ளப்  போகிறார்களோ தெரியவில்லை. கண்டிப்பாக “பெண் சிங்கம்” இடம் பெறும் என்றே நினைக்கிறேன். இது ஒன்றே போதும் எனக்கு..! எப்படியெல்லாம் திட்டியெழுதுவது என்று பதிவர்கள் ஐடியா கொடுத்தால் எனக்குப் பெரும் உதவியாக இருக்கும்..!!!

தனியார் அமைப்பு நடத்தும் இந்த விழாவுக்கு தமிழக அரசு மக்கள் பணத்தில் இருந்து 25 லட்சம் ரூபாயைத் தூக்கிக் கொடுத்திருக்கின்ற காரணத்தால் நுழைவுக் கட்டணத்தைக் குறைப்பார்களா? நீக்குவார்களா? என்றெல்லாம் நீங்கள் கேள்வி கேட்கக் கூடாது.. அப்படியெல்லாம் செய்தால் அது அவர்களது தொழிலை பாதிக்கும்.. இந்தாண்டும் நுழைவுக் கட்டணம் 500 ரூபாய் நிச்சயம் உண்டு.

இந்தாண்டு புதிய விஷயமாக திரையுலக பிரமுகர்களுக்காக மட்டும், ஐநாக்ஸ் தியேட்டரில் தினமும் இரவு 9 மணிக்கு உலக அளவில் பேசப்பட்ட 7 படங்கள் திரையிடப்படுகின்றனவாம்.

சென்ற ஆண்டு இத்திரைப்பட விழாவில் துணை இயக்குநர்களுக்கு பாஸ் கொடுத்த விவகாரத்தில் தமிழ்த் திரைப்பட இயக்குநர்கள் சங்கமும், பெப்ஸியும் கடுமையான அதிருப்தியில் இருந்தன. அதனால் இந்த முறை மிகவும் கவனமாக ஏற்பாடுகளைச் செய்து அதில் ஓரளவுக்கு வெற்றியும் பெற்றிருக்கிறார்கள் விழா அமைப்பாளர்கள்.

பட விழாவை சிறப்பாக நடத்துவதற்காக, தமிழ் பட உலகை சேர்ந்த சில முக்கிய பிரமுகர்களை கொண்ட ஆலோசனை குழுவை  முதல் முறையாக அமைத்திருக்கிறார்கள்.

இந்த ஆலோசனை குழுவில், தமிழ் திரைப்பட தயாரிப்பாளர்கள் சங்க தலைவர் ராம.நாராயணன், தென்னிந்திய நடிகர் சங்க தலைவர் சரத்குமார், டைரக்டர் பி.வாசு, நடிகைகள் ராதிகா சரத்குமார், சுஹாசினி, ரேவதி, ரோகிணி, குஷ்பு, பிலிம் சேம்பர் தலைவர் கல்யாண், இந்திய திரைப்பட சம்மேளன தலைவர் எல்.சுரேஷ், எடிட்டர் லெனின், பி.கண்ணன், ரவி கொட்டாரக்கரா, காட்ரகட்ட பிரசாத், நடிகர்கள் யூகிசேது, மோகன், டைரக்டர் கவுதம் வாசுதேவ் மேனன் ஆகியோர் இடம் பெற்றுள்ளனர்.

இதனால் இந்தாண்டு விழாவில் துணை இயக்குநர்களுக்கு நுழைவுக் கட்டணத்தில் சலுகை இருக்கும் என்று எதிர்பார்க்கிறேன்.

நிறைவு விழாவில், 2 சிறந்த படங்கள் தேர்ந்தெடுக்கப்பட்டு, முதல் பரிசு பெறும் படத்துக்கு ரூ.2 லட்சமும், இரண்டாவது பரிசு பெறும் படத்துக்கு ரூ.1-1/2 லட்சமும் வழங்கப்பட இருக்கிறதாம்.

பத்து நாட்கள் தொடர்ந்து நடக்கும் இந்த விழாவில் அனைத்துப் படங்களையும் பார்த்து மனதில் ஏற்றிக் கொண்டோ அல்லது தினம்தோறும் அவைகளைப் பற்றிப் பதிவு போட்டுக் கொண்டோ டென்ஷனில் பைத்தியம்போல் அலைய வேண்டியிருக்கும் என்று நினைக்கிறேன்..!

நிஜமாகவே பைத்தியம் பிடித்துவிடாமல் இருக்க, எல்லாம்வல்ல என் அப்பன் முருகனை இப்பொழுதே வேண்டிக் கொள்கிறேன்..!

Tweet

40-வது ஆண்டு விழா - சர்ச்சையில் தமிழ்நாடு திரைப்பட இயக்குநர்கள் சங்கம்

27-10-2010

என் இனிய வலைத்தமிழ் மக்களே..!
 

தனது பெருமைக்குரிய உறுப்பினர் 'செந்தமிழன்' சீமான் சிறைக் கொட்டடியில் வாடிக் கொண்டிருக்கும் அதே நேரத்தில், தமிழ்த் திரைப்பட இயக்குநர்கள் சங்கம் தனது 40-வது ஆண்டு விழாவை வெற்றிகரமாக நடத்தி முடித்திருக்கிறது.

சென்ற 23-ம் தேதியன்று சென்னை நேரு உள்விளையாட்டரங்கில் நடைபெற்ற இந்த விழா நிகழ்ச்சிகளின் பூரிப்பில் இயக்குநர்கள் திளைத்திருந்தாலும், பல மூத்தக் கலைஞர்களும், பல திரைப்படத் தொழிலாளர்களும் பெரும் அதிருப்திதான் அடைந்திருக்கிறார்கள்.

பொதுவாக சங்கத்தின் ஆண்டு விழா என்றாலே அச்சங்கத்தின் துவக்கத்திற்குக் காரணமானவர்களையும், மூத்தவர்களையும் மேடையேற்றி கெளரவப்படுத்துவதுதான் வாடிக்கை. அது சங்கத்திற்குப் பெருமையும்கூட. இதனைப் பற்றித் துளியும் கவலைப்படாமல் தனது விழாவினை சன் டிவி சொல்லிக் கொடுத்தது போலவே நடத்தி முடித்திருக்கிறார்கள் என்று பொருமுகிறார்கள் சில மூத்த இயக்குநர்கள்.

தமிழ்த் திரைப்பட இயக்குநர்கள் சங்கத்திற்கு சொந்தமாக கட்டிடம் இல்லாததால் அதற்கான நிதியைத் திரட்டும் பொருட்டே இந்த விழாவை ஏற்பாடு செய்ததாக முன்பே தெரிவிக்கப்பட்டுவிட்டது.

ஒரு மாதத்திற்கு முன்பாக விழா பற்றி பத்திரிகையாளர்களிடம் பேசிய சங்கத் தலைவர் பாரதிராஜா, “சொந்தக் கட்டிடம் கட்டுவதற்காகத்தான் இந்த விழாவையே நடத்துகிறோம்..” என்று தெள்ளத் தெளிவாகத் தெரிவித்துவிட்டார். விழாவை தொலைக்காட்சியில் ஒளிபரப்பு செய்யும் உரிமையை விற்பதன் மூலம்தான் அத்தொகை கிடைக்கும் என்பதால் முன்னணி சேனல்கள் இரண்டுமே இதற்காக போட்டியிட்டன.

ஆளும் கட்சி கோதாவில் களமிறங்கிய 'கலைஞர் டிவி' ஒன்றரை கோடியைத் தாண்டிப் பேசவே இல்லையாம். எப்படியும் தங்களுக்குத்தான் என்று நினைத்து கொஞ்சம் அலட்சியமாக அவர்கள் இருந்துவிட கிடைத்த கேப்பில் சன் டிவி ஒரே தவணையில் இரண்டே முக்கால் கோடி தருவதாகச் சொல்லி உரிமையைக் கைப்பற்றியது. இந்த ஒப்பந்தம் கையெழுத்தாவதைக்கூட பத்திரிகைகள் முன்பாகவே நடத்தினார்கள்.

மிகப் பெரும் தொகை என்பதால் சன் டிவி சொல்லிக் கொடுத்தது போலவே நிகழ்ச்சிகளை வடிவமைத்திருந்தனர். இதில்தான் சங்க நிகழ்ச்சிகளெல்லாம் வடிகட்டப்பட்ட முக்கியமான மார்க்கெட்டிங் விதிமுறைகள் புகுத்தப்பட்டு கதை கந்திரலோகமானது என்கிறார்கள். காலை, மாலை நிகழ்ச்சிகள் இரண்டிலுமே சன்னின் தற்போதைய டார்கெட்டான 'எந்திரனின்' பாடல்கள் மற்றும் அது தொடர்பான ஆடல், பாடல் காட்சிகள் தவறாமல் இடம் பெற்றிருந்தது.

காலை நிகழ்ச்சிகளில் தமிழில் முக்கியமான இசையமைப்பாளர்களை வைத்து பாட்டுக் கச்சேரி லெவலுக்கு ஒன்றை நடத்தினார்கள்.

நிகழ்ச்சியின் துவக்கத்தில் தனது பேவரிட் சில்க் ஜிப்பா உடையில் மேடையில் ரகளை செய்து கொண்டிருந்த கங்கை அமரன், 'ஆயிரம் தாமரை மொட்டுக்களே..' பாடல் தனது அம்மா பாடிய கும்மிப் பாட்டு ஒன்றின் காப்பி என்கிற உலக மகா உண்மையை போட்டுடைத்தார். 'சாமி வருகுது..' என்று துவங்கும் அந்தக் கும்மிப் பாட்டையும் பாடிக் காட்டினார் கங்கை அமரன். தொடர்ந்து அவர் பேசும்போது தனது உயர்வுக்கும், வளர்ச்சிக்கும் உரமேற்றி அஸ்திவாரமிட்டவர் பாரதிராஜாதான் என்று நன்றிக் கடன் செலுத்தினார். கூடவே அவர் இயக்கிய முதல் படமான 'கோழி கூவுது' படம் சிவாஜி நடித்த பழைய 'புதையல்' படத்தின் கதைதான் என்று சொன்னது அனைவரையும் ஆச்சரியப்பட வைத்த விஷயம்.

அனுராதா ஸ்ரீராம் 'ஏழு ஸ்வரங்களுக்குள் எத்தனை பாடல்' என்ற அபூர்வ ராகங்கள் படப் பாடலை பாடினார். இதன் பின்பு 'தனக்கு மிகவும் பிடித்தமான பாடகி சமீபத்தில் மறைந்த சொர்ணலதா' என்று கூறி சொர்ணலதா பாடிய பாடல்களில் இருந்து சிலவற்றை பாடினார்.

வாலியையும், எம்.எஸ்.வி.யையும் மேடையேற்றி கெளரவப்படுத்தினார்கள். வாலி பேசும்போது “நான் எம்,எஸ்.வி.யை சந்திக்கின்றவரையிலும் சோத்துக்கே சிங்கியடித்ததேன். எம்.எஸ்.வி.யை சந்தித்த பின்பு சாப்பிடுவதற்கே நேரமில்லாமல் தவித்தேன்” என்றார். இதனை எம்.எஸ்.வி. மரியாதை பொருட்டு மறுத்தாலும், வாலி “அண்ணா.. அண்ணா..” என்று எம்.எஸ்.வி.யை அழைத்தது அனைவரையும் நெகிழ வைத்தது.

மேலும் வாலி பேசுகையில், “என்னதான் நல்ல பாடலை கவிஞன் எழுதிக் கொடுத்திருந்தாலும், எத்தனை சிறந்த இசையமைப்பில் அது பதிவாகியிருந்தாலும் ஒரு நல்ல இயக்குநர் அதை நல்லவிதமாகப் படமாக்கினால்தான் அந்தப் பாடல் வெற்றியடையும். இல்லையெனில் அது விழலுக்கு இறைத்த நீர்தான். இதை இன்றைய இயக்குநர்கள் புரிந்து கொள்ள மறுக்கிறார்களே...?” என்று சொல்லி வருத்தப்பட்டார்..

கேரள கலையுலகம் சார்பாக வந்திருந்த மெகா ஸ்டார் மம்முட்டி, முழுவதும் தமிழிலேயே பேசி ஆச்சரியப்படுத்தினார். “நானும் தமிழில் பல படங்களில் நடித்திருக்கிறேன். என்னை இயக்கிய இயக்குநர்களில் அதிகம் ஆச்சரியப்படுத்தியவர் ஆர்.கே.செல்வமணிதான். இரவு, பகல் பாராமல் ஷூட்டிங்கை நடத்துவார். எப்போது தூங்குவார், எப்போது விழிப்பார் என்றெல்லாம் தெரியாமல் நான் ஆச்சரியத்துடன் அவரை பார்ப்பேன். அந்த அளவுக்கு அவர் ஒரு ஸ்பீடு இயக்குநர்” என்று பாராட்டிவிட்டுப் போனார்.

இந்தக் கலை நிகழ்ச்சியை முன்னிட்டு புகைப்படக் கண்காட்சி ஒன்றும் அமைக்கப்பட்டிருந்தது. அதனை நடிகர் நெப்போலியன் திறந்து வைத்தார். அந்தக் கண்காட்சியில் தமிழ்த் திரையுலகின் பல இயக்குநர்கள் சம்பந்தப்பட்ட புகைப்படங்கள் வைக்கப்பட்டிருந்தன. இருந்தாலும் மிகக் குறைவான அளவே புகைப்படங்கள் இருந்ததாலும், குறுகிய இடத்தில் செய்யப்பட்டிருந்ததும் பார்வையாளர்களுக்கு முழு திருப்தியை அளிக்கவில்லை.

நடிகர் நெப்போலியன் பேசும்போது, "தனது இன்றைய மத்திய இணை அமைச்சர் வரையிலான உயர்வுக்கு முழுக் காரணமே பாரதிராஜாதான். அவர் மட்டும் இல்லைன்னா நான் இந்த அளவுக்குக்கூட உயர்ந்திருக்க முடியாது" என்று குரு காணிக்கையைச் செலுத்தினார்.

நடிகை சரண்யா தான் திரையுலகில் அறிமுகமானவிதத்தைச் சொன்னபோது பலருக்கும் ஆச்சரியத்தை அளித்தது. “முக்தா ஸார் எடுக்குற படத்துக்கு புதுமுகம் தேடுறாங்கன்னு சொன்னாங்க. எங்கப்பா என்னை முக்தா ஸார் வீட்டுக்குக் கூட்டிட்டுப் போனாரு. அப்போ அங்க ஒரு மூலைல மணிரத்னம் உக்காந்து ஒரு புத்தகத்தைப் புரட்டிக்கிட்டிருந்தாரு. அப்போ எனக்கு அவர்தான் மணிரத்னம்ன்றது சுத்தமா தெரியாது. முக்தா ஸார் வந்து 'இவர்தாம்மா டைரக்டர் மணிரத்னம்'னு சொன்னப்போ ரொம்ப ஷாக்காயிட்டேன். அப்புறம் அவர்கிட்ட, "ஸார் நான் உங்க பேன் ஸார்.. உங்க 'மெளனராகம்' படம் எனக்கு ரொம்பப் புடிச்ச படம் ஸார்"ன்னு சொன்னேன். நான் சொன்னதுக்கெல்லாம் தலையை ஆட்டிட்டு 'ஓகே' 'ஓகே'ன்னு சொன்னாரு.. என்னை எப்படியும் செலக்ட் பண்ண மாட்டாருன்னு நினைச்சேன். பட் செஞ்சுட்டாரு.. எனக்கு ரொம்ப ஆச்சரியந்தான்” என்றார்.

நடிகர் பிரபு பேசும்போது “நான் இதுவரைக்கும் 55 இயக்குநர்களை அறிமுகப்படுத்தியிருக்கேன். என்னதான் நான் நல்லா நடிச்சிருந்ததா நினைச்சிட்டிருந்தாலும் எனக்குள்ள இருக்குற திறமையை வெளிக்கொணர்ந்தது இயக்குநர்கள்தான். இது எனக்கு மட்டுமல்ல. என் அப்பாவுக்கும் பொருந்தும்” என்றார்.

நடிகர் சங்கத் தலைவரான சரத்குமார், தன் பங்குக்கு “உன்னையறிந்தால் நீ உன்னையறிந்தால்..” பாடலை பாடி அசத்தினார். ஆனால் அவரது மனைவியான நடிகை ராதிகா பேசிய பேச்சுதான் கொஞ்சம் ஓவராகிப் போனது காலை நிகழ்ச்சிகளுக்கே திருஷ்டிபட்டது போலானது.

தான் அழகாக இல்லாமல் இருந்தும் தன்னை பாரதிராஜா தேர்வு செய்தது தனக்கு மிகப் பெரிய அதிர்ச்சிதான் என்றவர், ஷூட்டிங்கின்போது “உனக்கெல்லாம் நடிப்பு சொல்லித் தரணும்ன்னு என் தலையெழுத்து..” என்று பாரதிராஜா புலம்பியதையும் சிரித்தபடியே சொன்னவிதத்தில் பாரதிராஜாவே நெளிந்துதான் போனார்.

மாலை நிகழ்ச்சிகளில் கே.பாலசந்தர், பாரதிராஜா இருவரைப் பற்றியும் இயக்குநர் வசந்த் எடுத்திருந்த டாக்குமெண்ட்ரிகளைத் தவிர வேறெந்த நிகழ்ச்சியும் இல்லாதது மிகப் பெரும் ஏமாற்றமே. இவர்களின் திரைப்படப் பாடல்களுக்கு நடிகர், நடிகைகள் நடனமாடினார்கள்.

தமிழ்த் திரையுலகின் முன்னோடி இயக்குநர்கள் ஒவ்வொருவரையும் அறிமுகப்படுத்தி வைத்து அவர்களைப் பற்றிய வாழ்க்கைக் குறிப்புகளை ஒரு ஆவணப் படமாக எடுத்துக் காட்டியிருந்தால் சங்க ஆண்டு விழாவின் நோக்கம் சிறப்பானதாக இருந்திருக்கும்.

அதனைச் சுத்தமாக மறந்துவிட்டு சன் டிவியின் மார்க்கெட்டிங்கிற்காக ஆடல், பாடல் நிகழ்ச்சிகளை மட்டுமே வைத்தது பலருக்கும் அதிருப்தியை அளித்தது.

தமிழ்ச் சினிமாவில் துவக்கக் காலப் புள்ளியான மாடர்ன் தியேட்டர்ஸில் பணியாற்றிய முக்தா சீனிவாசனையாவது மேடையேற்றி கெளரவப்படுத்தியிருக்கலாம் என்பது மூத்தக் கலைஞர்களின் அங்கலாய்ப்பு. விழாவுக்கு வந்திருந்த முக்தாவும் தனக்கு எதுவும் கிடைக்க வாய்ப்பில்லை என்பதை உணர்ந்து பாதியிலேயே வெளியேறினார். அதேபோல் நிகழ்ச்சிக்கு வந்திருந்த மூத்த இயக்குநர்களில் ஒருவரான ஏ.ஜெகநாதனையும் மேடையேற்றவில்லை.

இதுவாவது பரவாயில்லை. 'வீரபாண்டிய கட்டபொம்மன்', 'கர்ணன்', 'ஆயிரத்தில் ஒருவன்' என்று வரலாற்றுச் சிறப்புமிக்க தமிழ்த் திரைப்படங்களை இயக்கியிருக்கும் பி.ஆர்.பந்தலுவின் நூற்றாண்டு இந்த வருடம் கொண்டாடப்படுகிறது.

அவர் பிறந்த கன்னட தேசத்தில் ஒரு மாதம் முழுக்க கர்நாடக அரசு பந்தலுவை கெளரவிக்கும் பொருட்டு மாநிலம் முழுவதும் விழாக்களை நடத்தியது. ஊருக்கு ஒரு தியேட்டரில் பந்தலு இயக்கிய திரைப்படங்களை வெளியிட்டு கெளரவித்தது.

ஆனால், தமிழ்த் திரைப்பட இயக்குநர்கள் சங்கம், பந்தலுவைப் பற்றி இன்றுவரையிலும் மூச்சு விடாமல் இருப்பது கொடுமையிலும் கொடுமை என்றார்கள் சினிமா பத்திரிகையாளர்கள். "இந்த விழாவிலாவது பந்தலுவுக்கு சிறிதளவு நேரம் ஒதுக்கி அவரைப் பெருமைப்படுத்தும்விதத்தில் ஏதாவது செய்திருக்கலாம்.." என்றார் ஒரு மூத்த சினிமா பத்திரிகையாளர்.

என்னதான் பணத்தை அள்ளிக் கொடுக்கிறார்கள் என்றாலும் சங்கத்தின் தனித்தன்மையை விட்டுக் கொடுப்பதா என்றும் கொந்தளித்தார்கள் சில உதவி இயக்குநர்கள். “நடிகை ரோஜாவும், இயக்குநர் செல்வமணியும் மேடையேறி, தாங்கள் காதலித்தது, கல்யாணம் செய்தது.. சண்டை வந்து பிரிய நினைத்தது என்பதையெல்லாம் விலாவாரியாக எடுத்துரைத்தது ரொம்பவே டூ மச்.  “இதெல்லாம் சங்க ஆண்டு விழாவுக்கு ரொம்ப முக்கியமா ஸார்..? யார் ஸார் இதையெல்லாம் கேட்டது..?” என்றார் ஒரு உதவி இயக்குநர்.

மாலை நிகழ்ச்சிகளில் சுந்தர்.சி., டி.பி.கஜேந்திரன் நடித்த படு மொக்கையான ஒரு நாடகத்தை போட்டு நேரத்தை வீணடித்துவிட்டார்கள். 

இசைஞானி இளையராஜாவும், பாரதிராஜாவும் தாங்கள் எங்கே முதல்முதலாக சந்தித்துக் கொண்டோம் என்று துவங்கி, பல விஷயங்களை பேசி முடிக்க கூட்டம் கலகலத்துப் போனது. ஆனாலும் இவர்கள் இருவரும் இறுதிவரையில் முகத்தோடு முகம் பார்த்து பேசாமல் இருந்தது ஏன் என்றுதான் தெரியவில்லை. தனது நிகழ்ச்சி முடிந்ததும் இளையராஜா சொல்லாமல், கொள்ளாமல் அரங்கத்தில் இருந்து வெளியேற.. பாரதிராஜா அவரை பார்த்தபடியேதான் இருந்தார். இதேபோல் 3 மணி நேரத்திற்கும் மேலாக அருகருகே அமர்ந்திருந்தும் சந்தானபாரதியும், வாசுவும் பேசிக் கொள்ளாமலேயே எழுந்து சென்றதையும் பார்க்க நேர்ந்தது.

பல இளைய இயக்குநர்கள் ஓடியாடி உழைத்துக் கொண்டிருந்ததை கண்கூடாக பார்க்க நேர்ந்தது. லிங்குசாமி, பாலாஜி சக்திவேல், வசந்த், எழில், கெளதம்மேனன் போன்றோர் பல வேலைகளை இழுத்துப் போட்டுக் கொண்டு செய்தனர். கெளதம் மேனன் மேடை அமைக்கும் பொறுப்பை முழுமையாகத் தானே ஏற்றுக் கொண்டாராம். இதற்காகக் தன்னுடைய சொந்தப் பணத்திலிருந்து கிட்டத்தட்ட 10 லட்சம் ரூபாயை செலவழித்திருக்கிறார் என்று நம் காதைக் கடித்தார் நிகழ்ச்சி ஏற்பாட்டாளர் ஒருவர்.

பிரபலமான ஹிந்தி இயக்குநர் கோவிந்த் நிகாலனிக்கு மணிரத்னம் சங்கத்தின் சார்பாக வாழ்நாள் சாதனையாளர் விருதை வழங்கி கெளரவித்தார். அதேபோல் தெலுங்கு, கன்னடத்தில் இருந்தும் பிரபல இயக்குநர்களை வரவழைத்திருந்தார்கள்.

தெலுங்கில் கே.விஸ்வநாத், கோதண்டராமிரெட்டி, ராகவேந்திரராவ், கன்னடத்தில் துவாரகீஷ் நாகபரணா, கே.எஸ்.ராவ், மலையாள இயக்குநர் ஹரிஹரன் ஆகியோருக்கு சாதனையாளர் விருது வழங்கப்பட்டது.

தமிழில் இயக்குநர்கள் பாலுமகேந்திரா, இராம.நாராயணன் ஆகியோர் விருதுகளைப் பெற்றார்கள். “இவர்களைவிட மூத்தவர்களான  ஏ.சி.திருலோகசந்தர், சி.வி.ராஜேந்திரன், சித்ராலயா கோபு, மகேந்திரன், என்று பலரும் இருக்கிறார்களே..? அவர்களையும் மேடையேற்றி கெளரவித்திருக்கலாமே..?” என்றார் ஒரு திரைப்பட விமர்சகர்.

விருதுகளை கொடுக்கும்போது யார், யாருக்குக் கொடுக்கிறார்கள் என்பதே தெரியாத அளவுக்கு நிகழ்ச்சியைத் தொகுத்து வழங்கியதை மன்னிக்க முடியாதது. விருந்தினர்களை இவ்வளவு நேரம் காக்க வைத்து அனுப்ப வேண்டுமா என்றெல்லாம் பலரும் முணுமுணுக்கும் அளவுக்கு நிகழ்ச்சியின் நேரம் அனுமார் வால் போல் நீண்டு கொண்டே போனது.

கார்த்திக்கும், ராதாவும் மேடையேறி பேசிக் கொண்டிருந்தபோதுதான் சூப்பர்ஸ்டார் ரஜினி அரங்கத்தில் நுழைந்தார். கூட்டம் எழுப்பிய கரவொலி அடங்க சில நிமிடங்கள் ஆகியது. “இப்போ ஒரு சுனாமி வந்த மாதிரியிருக்கே..” என்று டைமிங்காக கார்த்திக் சொன்னது அசத்தல் கமெண்ட்..

இடையில் நடிகர் ராதாரவி நடத்திய 'ரத்தக்கண்ணீர்' நாடகத்தின் சில பகுதிகள் ரசிகர்களின் கைதட்டலை மொத்தமாக அள்ளியது. லேட்டஸ்ட் அரசியல் கருத்துக்களைப் புகுத்தி தனது வழக்கமான பாணி நகைச்சுவையைத் தெளித்திருந்தார் ராதாரவி. இறுதியில் “நீங்க எந்தக் கட்சில சேரப் போறீங்க..?” என்று கேட்டதற்கு “நம்ம நிலைமைதான் இப்படியாயிருச்சே..” என்று இரட்டை விரல்களைக் காட்டிவிட்டுப் போனபோது ரஜினியே கை தட்டினார். ஆனால் எதற்காக இரட்டை விரல்களைக் காட்டினார் என்பது அடுத்த நாள் அவர் அ.தி.மு.க.வில் மீண்டும் தன்னை இணைத்துக் கொண்ட செய்தி வந்தபோது புரிந்தது.

ரஜினி இறுதிவரையில் அமைதியாக அடக்கமாக அமர்ந்திருந்தது அனைவரையும் கவர்ந்தது. ஆனால் அந்த அடக்கம் ஏன் என்று கடைசியில்தான் தெரிந்தது. இந்தக் கலை விழாவின் ஹைலைட்டே அவரும் அவருடைய குருநாதர் கே.பாலசந்தரும் கலந்து கொண்ட நேருக்கு நேர் நிகழ்ச்சிதான்.

எது மாதிரியும் இல்லாத புது மாதிரியாய் அமைந்திருந்த இந்த நிகழ்வில் ரஜினி சங்கடப்பட்டது மூன்று கேள்விகளுக்குத்தான். “பஸ் கண்டக்டராக இருந்தபோது யாரையாவது காதலித்திருக்கிறாயா?” என்று கேட்டதற்கு “ஆமாம்..” என்றவர் யார்? என்ன? என்ற மேல் விபரங்களைச் சொல்ல மறுத்து “வேண்டாமே..” என்று தன்மையோடு மறுத்தார்.

அதேபோல் “இந்த கேரக்டரை நாம பண்ணியிருக்கலாமே என்று நீ நினைச்சிருப்பியே.. அதை லிஸ்ட் போடு..?” என்று கேட்டபோது அதற்கும் “வேண்டாம் ஸார்..” என்று மென்மையாக மறுத்தார். “உன்னை அவமானப்படுத்திய விஷயம்?” என்று கேட்ட இன்னொரு கேள்விக்கும் இதேபோல் பதில் சொல்ல மறுத்துவிட்டார்.

கே.பி.யின் நறுக்குத் தெரித்தாற்போன்ற கேள்விகளுக்கு பதில் சொல்லும்போது இடையில் வந்த பதிலில் கிடைத்தது சூப்பர் ஸ்டார் ஏப்ரல் மாதத்தில் அரங்கேறப் போகும் கே.பி,யின் மேஜர் சந்திரகாந்த் நாடகத்தில் நடிக்கவிருப்பதுதான். 

இந்த நிகழ்ச்சி முடியவே இரவு 11.30 மணியாகிவிட்டதால் கூட்டம் பெரிதும் கலைந்துவிட்டது. ரஜினியின் பேட்டியின்போதே காலரியில் பாதி காலிதான். இத்தனை நேரத்திற்கும் நிகழ்ச்சியை இழுத்துக் கொண்டே போனால் எப்படி முணுமுணுப்புகள் அரங்கத்தின் உள்ளேயும், வெளியேயும் புகைந்து கொண்டேயிருந்தது.

விழாவில் இயக்குநர்கள் பாலா, மணிரத்னம், அகத்தியன் மூவரையும் பெருமைப்படுத்தும்விதத்தில் தங்கத்தில் செய்யப்பட்ட இயக்குநர் சங்கத்தின் அடையாள அட்டை தரப்பட்டது. இதன் பின்பும் நிகழ்ச்சிகள் தொடர்ந்து நடைபெறும் என்று கூட்டத்தை இருக்க வைத்தாலும்.. பசியிலும், களைப்பிலும் மக்கள் கலைவதை உணராமல் மைக்கில் தொடர்ந்து இதையே சொல்லிக் கொண்டிருந்ததுதான் கொடுமையானது.

நிகழ்ச்சிக்கு வந்திருந்த சில உதவி இயக்குநர்களிடம் பேசியபோது “இரண்டே முக்கால் கோடி ரூபாய்க்காக 'சங்கத்தின் ஆண்டு விழா' என்ற போர்வையில் இதனை நடத்தியதற்குப் பதிலாக 'கலை விழா' என்றே சொல்லி நடத்தியிருக்கலாம். 'சங்க ஆண்டு விழா' என்று எதற்காகச் சொல்ல வேண்டும்..?  எங்களுடைய முன்னோடி இயக்குநர்களையும், சங்கத்தின் வரலாற்றையும் முன்னிறுத்தாமல் வெற்று கலை நிகழ்ச்சிகளை நடத்தியதில் எங்களுக்குக் கொஞ்சமும் திருப்தியில்லை..” என்றார்கள்.

இந்த நிகழ்ச்சியைப் பற்றித்தான் விமர்சனங்கள் எழுந்தன என்றாலும் கடைசியில் இயக்குநர்கள் சங்கத்தின் தற்போதைய நிலையைப் பற்றிக்கூட அங்கே பலராலும் பேசப்பட்டது. முதலிலேயே இந்தக் கலை விழாவை சீமான் வெளியில் வந்த பின்பு வைத்துக் கொள்ளலாம் என்று பலரும் சொல்லியிருக்கிறார்கள். அவர் வெளியில் வரவே நிச்சயம் 1 ஆண்டு ஆகும் என்று இயக்குநர்கள் சங்கத்தின் பொறுப்பில் இருப்பவர்கள் சொன்னதைக் கேட்டு சீமானின் ஆதரவாளர்களே கொதிப்படைந்துவிட்டார்களாம்.

தமிழ்த் திரையுலகம் மட்டுமன்றி அதையும் தாண்டி பொதுமக்கள் மத்தியில் நல்ல பெயரெடுத்திருக்கும் சீமான் இயக்குநர்கள் சங்கத்தின் கவுரமிக்க ஒரு உறுப்பினர். அவர் அவருடைய அரசியல் கொள்கைக்காக ஜெயிலுக்குப் போயிருக்கட்டும். அதற்காக நம் குடும்பத்துப் பையனை புறக்கணித்துவிட்டு நாமே விழா நடத்துவது ஏற்புடையதுதானா..? என்றெல்லாம் கேள்விகள் உதவி இயக்குநர்கள் மத்தியில் பரவியிருந்தது.

இந்தக் கொதிப்பை உணர்ந்ததினால்தான் இந்த நிகழ்ச்சிக்கு முதல்வரை அழைக்கவில்லையாம். நிகழ்ச்சிக்கு முதல்வர் வந்திருந்து, அந்த நேரத்தில் உதவி இயக்குநர்கள் அவர் முன்பாகவே ஏதாவது தகராறு செய்துவிட்டால் அது சங்கத்திற்கு கேவலமாகிவிடுமே என்ற எண்ணத்தில்தான் முதல்வரை விட்டுவிட்டதாக சங்கத்தில் தொடர்புடைய ஒருவர் கூறினார்.

இதேபோல் உடல் நலக்குறைவால் மணிவண்ணனும், சீமான் விஷயத்தில் கோபம் கொண்டு வெளிநாட்டில் 'ஆதிபகவன்' ஷூட்டிங்கை வைத்துக் கொண்டு அமீர் எஸ்கேப்பானதாகச் சொல்கிறார்கள். தங்கர்பச்சானும் இதனாலேயே வரவில்லை என்கிறார்கள். இதேபோல் ஷங்கரும் அரங்கத்தில் தென்படவில்லை.

அதேசமயத்தில் இன்னொரு அதிர்ச்சியடைய வைத்த செய்தி. சங்கத்தின் பொருளாளரான இயக்குநர் ஆர்.சுந்தர்ராஜன் நிகழ்ச்சிக்கு வரவில்லை. நெருக்கி விசாரித்தபோது அவர் சில மாதங்களுக்கு முன்பாகவே தனது பொருளாளர் பதவியை ராஜினாமா செய்துவிட்டு போய்விட்டதாகத் தெரிவிக்கிறார்கள்.

ஆனால் அவரது ராஜினாமாவின் பின்பு பெரும் கதையே இருப்பதாக சுந்தர்ராஜன் தரப்புத் தெரிவிக்கிறது. பல ரசாபாசங்களும் நடந்திருப்பதாகச் சொல்கிறார்கள். இதனாலேயே சுந்தர்ராஜனுக்கு உடல் நிலை பாதிக்கப்பட்டு மருத்துவமனையில் அனுமதிக்கப்பட்டு அறுவை சிகிச்சையும் செய்ய வேண்டி வந்ததாம்.

இதில் ஒரு ஸ்கூப் நியூஸ்.. நேரு ஸ்டேடியத்தில் இயக்குநர்கள் நிகழ்ச்சி நடந்து கொண்டிருந்த அதே நேரத்தில், ராஜாஅண்ணாமலைபுரம், குமாரராஜா முத்தையா அரங்கத்தில்  எம்.எஸ்.விஸ்வநாதன் அறக்கட்டளை நடத்திய கண்ணதாசன் விழாவுக்கு ஆர்.சுந்தர்ராஜன் வந்திருந்தது சுவையான விஷயம்..!
 
சரி. இவர்தான் வரவில்லையென்றால், சென்ற தேர்தலின்போது ஆர்.சுந்தர்ராஜனிடம் பொருளாளர் பதவிக்குப் போட்டியிட்டுத் தோற்றுப் போன வி.சேகரும் அரங்கத்தில் தென்படாதது ஏனென்று தெரியவில்லை.

தற்போது சங்கத்தின் புதிய பொருளாளராக 'பெண்ணின் மனதைத் தொட்டு' படத்தின் இயக்குநர் எழில் நியமிக்கப்பட்டிருக்கிறாராம். ஆனால் இந்த மாற்றத்திற்கு சங்கத்தின் செயற்குழு, பொதுக்குழுவில் இதுவரை அனுமதி வாங்கவில்லையாம்.. இயக்குநர்கள் சங்கத்தின் இந்த விவகாரம், விரைவில் வெடிக்கத்தான் போகிறது என்கிறார்கள் சங்கத் தொடர்புடையவர்கள்.

இந்த நிகழ்ச்சி முடிந்த இரண்டு நாட்கள் கழித்து நேற்று வடபழனி கிரீன்பார்க் ஓட்டலில் நிகழ்ச்சியை வெற்றிகரமாக நடத்தியதற்காக இயக்குநர்கள் சங்கத்தினர் அனைவரும் வெற்றி விழா கொண்டாடியிருக்கிறார்கள். நள்ளிரவு தாண்டியும் 'தீர்த்தவாரி' நடந்து முடிந்ததாம்.

இதைக் கேள்விப்பட்டும் சில உதவி இயக்குநர்கள் கொதிப்பில் இருக்கிறார்கள். “யார் வீட்டுக் காசு இது..? அவனவன் பொண்டாட்டி தாலியை அடகு வைச்சு ஐம்பதாயிரம் ரூபா பணத்தைக் கட்டி மெம்பர்ஷிப் ஆயிருக்கான் ஸார்.. இவங்க அந்தக் காசுல இப்படி கூத்தடிச்சா என்ன அர்த்தம்..?” என்கிறார்கள் கோபத்தோடு.

நிகழ்ச்சியில் பங்கு கொண்டவர்களோ, “பாரதிராஜா என்ற ஒரு மனிதர் மட்டும் இல்லாவிட்டால் இந்த நிகழ்ச்சி இந்த அளவுக்கு சிறப்பா நடந்திருக்குமா? கொஞ்சம் யோசிச்சுப் பார்க்கச் சொல்லுங்க அவுங்களை.

பாரதிராஜா கூப்பிட்டாருன்றதாலதான் மணிரத்னமே ராத்திரி 12 மணிவரைக்கும் உக்காந்திருந்தாரு. ரஜினி வந்திருந்தாரு. வந்த ரஜினி இப்படியொரு பேட்டிக்கு ஒத்துக்கிட்டாரே. வேற யாருக்கு இதையெல்லாம் ஏற்பாடு செய்யற அளவுக்கு தகுதியும், திறமையும் இருக்கு? தெலுங்கு, கன்னட இயக்குநர்களெல்லாம் வந்திருந்தாங்களே.. எப்படி? பாரதிராஜான்ற பேருக்காகத்தானே..?

பாரதிராஜாவை உதவி இயக்குநர்கள் அனைவரும் 'அப்பா' என்றுதான் அழைக்கிறார்கள். அந்த அளவுக்கு அவர் மீது பாசத்துடன் இருக்கிறார்கள். இந்த விழாவில் பணியாற்றிய அனைவருமே உதவி இயக்குநர்கள்தான். அத்தனை பேருக்குமே நிகழ்ச்சியில் பணியாற்றியதற்காக சிறிதளவு தொகை சம்பளமாக வழங்கப்பட்டுள்ளது. வேலையே இல்லாமல் கஷ்டத்தில் இருந்த அவர்களுக்கு, அடுத்த இரண்டு மாதங்கள் குடும்பத்தை நடத்தும் அளவுக்கு இப்போது உதவி செய்திருப்பதே பாரதிராஜாதான். அவரைப் போய் தப்பா பேசுறாங்களே..?

கொஞ்ச நஞ்சமில்ல ஸார்.. இப்போ இரண்டே முக்கால் கோடி ரூபாய் சங்கத்துக்கு நிதியா கிடைச்சிருக்கு.. இதுக்கு முன்னாடியும் அமைப்பு இருந்துச்சு. நிர்வாகிகள் இருந்தாங்க. அவங்களால செய்ய முடிஞ்சதா? இல்லீல.. இப்ப பாரதிராஜா செஞ்சுட்டாருன்னு சொன்ன உடனேயே பொறாமைல வயிறு எரியறாங்க..” என்று பொரிந்து தள்ளுகிறார்கள்.

10 தமிழர்கள் இருந்தாலே எட்டுவிதமான கருத்துக்கள் அலைமோதும். இதில் 2000 பேர் இருக்கிறார்கள். சர்ச்சைகளும், கலகலப்புகளும் எழத்தான் செய்யும். ஏதோ நல்லவிதமாக பில்டிங் கட்டி முடித்தாலே போதும்தான்..!

புகைப்படங்கள் உதவிக்கு நன்றி : www.indiaglitz.com

Tweet