புது மாப்பிள்ளையான அண்ணன் சீமான்..!

09-09-2013

என் இனிய வலைத்தமிழ் மக்களே..!

ஒரு தலைவருக்கு கட்சியினரே.. தம்பிமார்களே.. தொண்டர்களே.. நடத்தி வைத்த திருமணம் இதுவாகத்தான் இருக்கும் என்று நினைக்கிறேன். 

சீமான்.. இந்தப் பெயரில் அப்படியென்ன ஈர்ப்போ தெரியவில்லை.. என்றைக்கு ஈழப் பிரச்சினையை இந்த சீமான் பேசத் துவங்கினாரோ அன்றிலிருந்தே அவர் இயக்குநர் என்கிற களத்தில் இருந்து அரசியல் களத்திற்கு கட்டாயமாகவே இடம் மாற்றம் செய்யப்பட்டுவிட்டார்..!

தமிழ்த் திரையுலகம் இராமேஸ்வரத்தில் நடத்திய எதிர்ப்புப் பேரணியில் சீமான் பேசிய பேச்சை நேரலையாக தொலைக்காட்சிகளில் பார்த்த தமிழகத்து மக்களின் மனதில் இன்னொரு அரசியல் பிரமுகராக அன்றைக்கே இடம் பிடித்துவிட்டார் சீமான்..! இன்றைய இளைஞர்களை கவருகின்றவகையிலான அவருடைய பேச்சும், சுபாவமும் அநேகம் பேரை அன்பர்களாக ஆக்கி.. எண்ணிக்கையை ஆயிரத்தில் இருந்து லட்சங்களாக்கியிருக்கின்றன..!

திருமாவளவனும், சீமானும்தான் இன்றைக்கு தமிழகத்து அரசியலில் இளைஞர்களால் எந்த எதிர்பார்ப்பும் இல்லாமல் உள்ளது உள்ளபடியே கொண்டாடப்படுபவர்கள்..!  இவர்களது அரசியல் களம் ஒன்று போலவே இருந்தாலும், ஒரே உறையில் இரண்டு கத்திகள் இருக்க முடியாது என்பதால் தனித்தனி இராச்சியங்களாக இவர்கள் இருப்பதுகூட ஒருவகையில் நல்லதுதான்..!

அரசியலுக்கு வராதபோது சீமானுடன் அவருடைய வீட்டில் இருந்தவர்களெல்லாம் அவருடைய உதவி இயக்குநர்கள்தான்.. அந்த உதவி இயக்குநர்களை பார்க்க வருபவர்கள்கூட அந்த வீட்டில் தங்கிவிட்டுச் செல்வார்கள். அந்த அளவுக்கு அவரது வீடு ஒரு சத்திரம் போலத்தான் இருந்தது..! கட்சி ஆரம்பித்த பின்புதான்.. கட்சிக்கார தம்பிகளும், பிரமுகர்களும் அவரைச் சுற்றிச் சூழ வந்து கொண்டிருக்கிறார்கள்..!

அண்ணனை பல இடங்களில் பேட்டிக்காக சந்தித்திருந்தாலும் முதல்முறையாக அவரைச் சந்தித்தது சில ஆண்டுகளுக்கு முன்பாக இயக்குநர்கள் சங்கத்தில்..!  தாத்தாவுக்கு தமிழ்த் திரையுலகம் பாராட்டு விழா நடத்தியபோது அதற்கான அழைப்பிதழ் வாங்குவதற்காக சங்கத்திற்கு வந்திருந்தார்.. இவருக்கான அழைப்பிதழை அன்று காலைதான் இயக்குநர் எஸ்.எஸ்.ஸ்டான்லி வாங்கிச் சென்றிருந்தார். இப்போது சீமான் நேரடியாக வந்துவிடவே.. ஸ்டான்லிக்கு போனை போட்டு அழைப்பிதழ் கேட்டு.. வரவழைத்து வாங்கிச் சென்றார். இந்தப் பேச்சுக்காகவே சீமானை எனக்கு பிடித்துப் போனது..! ரொம்பவே சின்னப் புள்ளை மாதிரி யார் கண்ணனிடம் கோபித்துக் கொண்டார். 10 அழைப்பிதழ்கள் கேட்டார்.. அவரது கன்னத்தைப் பிடித்து தாஜா செய்து, கொஞ்சி.. சமாளித்து 5 அழைப்பிதழ்கள் மட்டுமே கொடுத்தனுப்பினார் யார் கண்ணன்..! இந்த பாச மழைல இயக்குநர்களை மிஞ்ச முடியாதுய்யா..! 

இப்போதைய சீமான் தமிழகத்தின் முக்கிய அரசியல் பிரமுகராகவும், தளகர்த்தகராகவும் மாறிய பின்பும் அவருடைய வாழ்க்கை முறை மட்டுமே மாறியிருக்கிறது. ஆனால் பழகும்விதம் அப்படியேதான் இருக்கிறது..! அவருடைய உதவி இயக்குநர்கள்.. அன்பர்கள்.. கட்சிக்காரர்கள்.. உறவினர்கள்.. இத்தனை பேர் கேட்டும் திருமணத்திற்கு தலையாட்டாமல் இருந்தவர்.. மத்திய உளவுத்துறையின் உள்ளடி வேலைகளுக்கு பின்புதான் முழித்துக் கொண்டார். தன்னுடைய திருமதியாரை எங்கே, எப்போது பார்த்தார்..? அவர்கள் இருவருக்குமிடையில் காதல் எப்போது பூத்தது என்பது பற்றியெல்லாம் சீக்கிரமாக பத்திரிகைகளில் அவரே சொல்வார். இல்லாவிடில் திருமதி சீமான் சொல்வார். அப்போது தெரிந்து கொள்வோம்..  இப்போது ஓவர் டூ நந்தனம் ஒய்.எம்.சி.ஏ. 

தேனாம்பேட்டை காமராஜர் அரங்கம் பகுதியில் இருந்தே பேனர்கள்.. சென்னையின் பல்வேறு இடங்களில் பிளக்ஸ் போர்டுகள்..! திருநெல்வேலிக்கார நாம் தமிழர் கட்சிக்காரர் ஒருத்தர் சென்னையில் பல இடங்களில் தன் பெயரில் போர்டு வைத்திருக்கிறார்..!  நேற்றைய முன் தினமே பல்வேறு ஊர்களிலிருந்து நாம் தமிழர் தம்பிமார்கள் வரவழைக்கப்பட்டு அவர்கள் ஒவ்வொருவருக்கும் ஒரு பணியை ஒதுக்கிவிட்டார்கள்..

உறவினர்கள் வரவேற்புக்கு தனி டீம்.. விருந்தினரை வரவேற்க தனி டீம்.. மீடியாக்களை அழைத்துச் செல்ல ஒரு டீம்.. சொந்தக் கட்சியினரை சமாளிக்க ஒரு டீம்.. பிற கட்சித் தலைவர்களை உபசரிக்க ஒரு டீம்.. விருந்துக்கு ஒரு டீம்.. பணப்பட்டுவாடாவுக்கு ஒரு டீம்.. அனைத்து ஏற்பாடுகளுக்கும் ஒரு தனி டீம் என்று அனைத்தையும் கச்சிதமாக பார்த்து பார்த்து நடத்தியிருக்கிறார்கள் நாம் தமிழர் அமைப்பினர்..!

ஏற்பாடு செய்திருந்த அரங்கத்தின் மேடையில் ஒரு பக்கம் வள்ளுவரும் மறுபக்கம் அவருடைய பரம எதிரி பெரியாரும் இடம் பெற்றிருந்தார்கள். இன்னும் பல தலைவர்களும் அரங்கத்தின் பல பகுதிகளில் இருந்து மக்களை பார்த்தபடியேதான் இருந்தார்கள்..! ஆனால் முக்கியமாக ஒருத்தரை காணவே காணோம். அது பேரறிஞர் அண்ணா.. அது ஏன் அண்ணா மீது சீமானுக்கும், திருமாவளவனுக்கும் இப்படியொரு கோபம்..? (சமீபத்தில் திருமாகூட அவரது 50-வது பிறந்த நாள் விழாவில் அண்ணாவுக்கு மட்டும் கட் அவுட் வைக்கவில்லையே என்று அவரது அன்புத் தம்பி கருணாநிதி கோபித்துக் கொண்டாராம்..!)  அண்ணா மட்டுமா..? முத்துக்குமார், செங்கொடிகளின் புகைப்படங்கள்கூட இல்லாதது பெரும் குறைதான்..! ஆனால் மேடையில் இயக்குநர் மணிவண்ணன் மற்றும் அவரது மனைவியாரின் புகைப்படங்களை வைத்திருந்தார்கள்..!

கூட்டம் திருமண அரங்கத்தில் நெருக்கியடிக்கும் என்று எதிர்பார்த்தே வெளியில் இரண்டு பக்கமும் ஷாமியானா போட்டு டிவி வைத்து அதில் ஒளிபரப்பு செய்தார்கள். அந்த இடத்துக்கும் கூட்டம் போக மறுத்தது..! அன்பாக சொல்லிப் பார்த்தார்கள். ஒரு சிலரிடம் உரிமையோடு கண்டிப்போடு சொல்லி வெளியில் அனுப்பி வைத்தனர். ஆனாலும் நேரடி அனுபவமே பெரிது என்பதால் கூட்டம் மறுபடியும் மறுபடியும் உள்ளே வந்து நின்று கொள்ள ஒரு கட்டத்தில் கட்சித் தம்பிமார்கள் போய்த் தொலைங்க என்று விட்டுவிட்டார்கள்..!

முதலில் மேடைக்குக் கீழே இருந்த பெரியவர்களையெல்லாம் மேடைக்கு அழைத்து அமர வைத்தார்கள்.. பிரபலங்கள் பலரும் மேடையேறத் துவங்க வருபவர்களை கட்டுப்படுத்த முடியாமல் சங்கடமாகிப் போனார்கள் விழா அமைப்பாளர்கள். மணப்பெண் மேடையேறியபோது பெரும் கைதட்டல்.. மணமகனும், மணமகளும் முகமன் காட்டியபோதும் மீண்டும் ஒரு கைதட்டல். மணமகளின் குடும்பத்தினர் அனைவருமே வந்திருந்தனர். காளிமுத்துவின் இன்னொரு குடும்பத்தினரும் வந்திருந்ததாக கட்சிக்காரர் ஒருவர் கூறினார்.. 

மணவிழாவின் முதல் நிகழ்ச்சியாக இறந்து போன தமிழ்ச் சொந்தங்களுக்காக ஒரு நிமிடம் மவுன அஞ்சலி செலுத்தினார்கள். பின்பு நாம்தமிழர் கட்சியினர் தமிழ் வளர.. தமிழர் வாழ என்று கூறி உறுதி மொழி எடுத்துக் கொண்டனர்..! பெரியவர் பழ.நெடுமாறன் ஒரு தங்கச் செயினை எடுத்துக் கொடுக்க அதனை மணமகள் கழுத்தில் அணிவிக்க ஒரு நிமிடத்தில் திருமணம் நடந்தேறியது..! இதன் பின்பு மாலையையும் மாற்றிக் கொண்டார்கள்..!

உடனேயே மணமக்களை வாழ்த்த ஒரு கூட்டம் மேடையேறத் துவங்க.. அதே நேரம் தலைவர்களும் வாழ்த்துரை வழங்கத் துவங்கினார்கள்..! இரண்டும் ஒன்றாகவே நடக்க சீமானே கொஞ்சம் தவித்துப் போனார். ஆனாலும் முடியவில்லை.. அப்படியே விட்டுவிட்டார்கள்..! சினிமாக்காரர்கள் கொஞ்சம்.. கட்சியினர் அதிகம் என்ற ரீதியில்தான் கூட்டம்..! கட்சியினரே நடத்துவதால் கண்டிப்பாக கூட்டம் அதிகமாக இருக்கும் என்பதை ஊகித்தே பல சினிமாக்காரர்கள் வாழ்த்துகளை எஸ்எம்எஸ்ஸிலேயே அனுப்பிவிட்டார்களாம்..! அண்ணன் சீமான் கொஞ்சம் ரிலாக்ஸாக மணமகனாகவே இருந்துவிட்டார்.. இடையில் சிற்சில இடங்களில் மாப்பிள்ளை மிதப்பில் இருந்ததையும், கெத்தாக மணமகளிடம் பேசுவதையும் பார்க்க முடிந்தது..! 

நடிகர்கள் சிவகுமார், சத்யராஜ், பிரபு, வாகை சந்திரசேகர், விவேக், சுந்தர்.சி, ராஜேஷ், ஜெயம் ரவி, மயில்சாமி, விக்னேஷ், மனோஜ், உதயா, ராமகிருஷ்ணன், வையாபுரி, ‘செல்’ முருகன், ‘பிளாக்’ பாண்டி, நடிகை சரண்யா, பட அதிபர்கள் கலைப்புலி எஸ்.தாணு, ஆர்.பி.சவுத்ரி, கவிஞர் காசி ஆனந்தன், திரைப்பட இயக்குனர்கள் பாலு மகேந்திரா, பாக்யராஜ், பாலா, பி. வாசு, கே.எஸ்.ரவிக்குமார், அமீர், சேரன், ஆர்.கே.செல்வமணி, பாலாஜி சக்திவேல், எழில், பொன்வண்ணன், ராஜா, சுசி கணேஷ், ஸ்டான்லி, கவுதமன், புகழேந்தி, திரைப்பட பாடலாசிரியர்கள் கவிஞர் நா.முத்துகுமார், கவிஞர் சினேகன், கவிஞர் தமிழச்சி தங்கப்பாண்டியன், திரைப்பட ‘ஸ்ட்ன்ட்’ டைரக்டர்கள் ஜாக்குவார் தங்கம், கனல் கண்ணன், பாடகி சின்னப்பொண்ணு என்று சினிமா கூட்டமும் கூடியிருந்தது..!

பாலாவின் காலில் அடிபட்டிருக்கிறது. இந்த நிலையிலும் மனிதர் நொண்டி நொண்டி நடந்து வந்திருந்தார். அதே நேரம், பேசும்போதெல்லாம் “எங்கள் அப்பா... எங்கள் அப்பா...” என்று சீமான் பாசத்துடனும், நேசத்துடனும் சொல்லிவரும் இயக்குநர் இமயம் பாரதிராஜா வரவில்லை என்பதும் குறிப்பிடத்தக்கது. தனக்குப் பதிலாக தன் மகன் மனோஜை அனுப்பியிருந்தார் பாரதிராஜா. ஆனால் நேற்று முன்தினம் நடந்த தயாரிப்பாளர் சங்கத் தேர்தலில் ஓட்டளிக்க இதே ஒய்.எம்.சி.ஏ.க்கு பாரதிராஜா வந்திருந்தார் என்பதையும் குறிப்பிட்டாக வேண்டும்..!

“சாப்பாடு ரெடியா இருக்கு.. சாப்பிட்டு வாங்க.. நம்ம அண்ணன் சாயந்தரம்வரைக்கும் இங்கதான் இருக்கப் போறாரு..” என்று மைக்கில் பல முறை சொல்லியும் கூட்டம் குறைந்தபாடில்லை. “பொக்கேவை வைத்துக் கொண்டு சாப்பிட போக முடியாது..” என்று ஒருவர் வந்து சத்தம் போட்டுச் சொன்ன பின்னாடி மைக்கில் அட்வைஸ் செய்வதையும் விட்டுவிட்டனர் தோழர்கள்..! 

வாழ்த்த வந்திருந்த என்னுடைய முதலாளியுடன் நானும் மேடைக்குச் சென்று அன்புப் பரிசாக கொண்டு வந்திருந்த ரெட்சன் புத்தகத்தை அண்ணன் சீமானின் கையில் கொடுத்தேன். அடையாளம் கண்டு மகிழ்ச்சியுடன் பெற்றுக் கொண்டார். “ரைட்டு வர்றண்ணே..” என்று சொல்லிவிட்டு அண்ணியாருக்கும் ஒரு கும்பிடு போட்டுவிட்டு இறங்கினேன்..!

மேடையின் ஓரத்தில் சீமானின் பெற்றோர்கள் மனதில் ஒரு பாரம் இறங்கியதை போன்ற திருப்தியுடன் அமர்ந்திருந்தனர்.. பெற்றவர்களுக்கு இதுதானே பெரிய விஷயம்.. மேடையேறிய அனைத்துத் தலைவர்களிடத்திலும் தனது தாய், தந்தையரை அறிமுகப்படுத்தி வைத்தார் சீமான்.. அந்த கணம் அந்தப் பெற்றோரின் முகத்தில் தெரிந்த பூரிப்பும், மகிழ்ச்சியும் எத்தனை கைதட்டல்கள் கொடுத்தாலும் சீமானுக்குக் கிடைக்காத பெருமிதம்..!

வைகோ, தொல்.திருமாவளவன், பேரறிவாளனின் தாயார் அற்புதம் அம்மாள், ‘மாலை முரசு’ இயக்குனர் இரா.கண்ணன் ஆதித்தன், ‘தினத்தந்தி’ இயக்குனர் சி.பாலசுப்பிரமணிய ஆதித்தன், நடிகரும், தி.மு.க. எம்.பி.யுமான ரித்திஷ், தமிழக பா.ஜனதா தேசியச் செயலாளர் டாக்டர் தமிழிசை சவுந்திரராசன், மாநிலச் செயலாளர் வானதி ஸ்ரீனிவாசன், இந்திய கம்யூனிஸ்டு கட்சி துணைச் செயலாளர் மகேந்திரன், பா.ம.க. துணைத் தலைவர் ஏ.கே.மூர்த்தி, சமத்துவ மக்கள் கட்சி பொதுச்செயலாளர் கரு.நாகராஜன், துணை தலைவர் எர்ணாவூர் நாராயணன் எம்.எல்.ஏ., ம.தி.மு.க. துணை பொதுச் செயலாளர் மல்லை சத்யா, விடுதலை சிறுத்தைகள் கட்சி செய்தித் தொடர்பாளர் வன்னியரசு, தமிழக வாழ்வுரிமை கட்சித் தலைவர் வேல்முருகன், மற்றும் சில சிறிய கட்சிகள், அமைப்புகளின் தலைவர்களும் வந்திருந்து வாழ்த்தினார்கள்..! தி.மு.க.வின் சார்பில் ஸ்டாலின் வருவார் என்று எதிர்பார்த்தார்கள். வந்தாரா என்று தெரியவில்லை. தமிழச்சி தங்கபாண்டியன் வந்திருந்தார். கே.கே.நகர் பகுதி தி.மு.க. செயலாளர் தனசேகரனை மேடையில் பார்த்தேன்..! 

அடுத்தது சாப்பாடுதான் என்ற எண்ணத்தோடு வெளியில் வந்தபோது நமது வலையுலகத் தோழர் கவிஞர் மதுமதியை சந்தித்தேன்..! உணவுக்கு செல்லும் வழி எழுதி அதனை செல்லும்வழி தோறும் பேனர் போல் கட்டியிருந்தார்கள். டென்னிஸ் கோர்ட்டை தாண்டி சிறிது தூரம் சென்றவுடன் பெரிய ஷாமியானா அமைத்து சாப்பாட்டு பந்தி அமோகமாக நடந்து கொண்டிருந்தது..! 

சாப்பாட்டிற்காக 300 ஆடுகளை வைகுண்டத்திற்கு நேற்றைக்கே அனுப்பிவைத்துவிட்டதாக ஒரு இணை இயக்குநர் என்னிடம் சொல்லியிருந்த்தால் நானும் இதைத்தான் எதிர்பார்த்திருந்தேன். 200 நபர்களை வேலைக்கு வைத்து பல வேலைகளை செய்து கொண்டிருந்தாலும் நாம் தமிழர் கட்சித் தம்பிமார்கள்தான் சோற்றுத் தட்டைத் தூக்கிக் கொண்டு வந்தார்கள் என்பதை சொல்லித்தான் ஆக வேண்டும்..! முந்தைய தினமே சாப்பாட்டு வேலைகள் ஆரம்பித்து.. 3 ஷிப்ட்டாக நடந்து கொண்டிருந்தது.. நாங்கள் சாப்பிட்டு வெளியில் வரும்போதும் அடுத்த ஷிப்ட்டுக்காக சோறு வெந்து கொண்டிருந்தது..!

நானும் மதுமதியும், அவருடைய நண்பர்கள் இருவருமாக பந்திக்கு முந்தினோம். ஆனால் அங்கே எங்களுக்கு முன்பாக ஒரு ஊரே அமர்ந்து சாப்பிட்டுக் கொண்டிருந்தது..! காத்திருந்தாள் நடக்காது என்பதால் மூடிய இலைகளுக்கு முன்பாக சீட் போட்டு பிடித்துதான் சாப்பிட்டோம்.. இதுல என்னத்த வெக்கப்படுறது..? எல்லா இடத்துலேயும் இதுதானே நடக்குது..?

சோறையே கொட்டினார்கள்.. கறிக் குழம்பு.. வேறு கூட்டு எதுவும் இல்லை. ரசம், மோர் இல்லை. ஆனால் தயிர் மட்டும் வெளியில் கொடுத்தார்கள்.. சோறு வேண்டுமளவுக்கு கிடைக்கும்.. ஆனால் கறிக் குழும்பு ஒன்றுதான் இருக்கிறது என்றவுடன் பாதி பேர் முதல் ரவுண்டிலேயே கிளம்பிவிட்டார்கள்.. எனக்கு இரண்டு சீட்டு தள்ளி உட்கார்ந்திருந்த கவிஞர் மதுமதிக்கு வித்தியாசமான அனுபவம் கிடைத்த்து..!

அவருடைய அருகில் ஒரு தமிழர் வந்து அமர்ந்திருந்தார்.. புல் பூஸ்ட்டில் இருந்தார். கறிக்குழம்பை ஊற்றியவுடன் அதில் கொஞ்சம் கறியை எடுத்து தான் கொண்டு வந்திருந்த பையில் போட்டுக் கொண்டார். மீண்டும் குழம்பு ஊற்றியவரை அழைத்து திரும்பவும் குழம்பை ஊற்றச் சொன்னார். அவரும் ஊற்ற.. அதில் இருந்த கறியை மட்டும் எடுத்து அதை பையில் போட்டுக் கொண்டார்.. மீண்டும் குழம்பு.. மீண்டும் அமுக்கல்.. அடேங்கப்பா.. இந்த விஷயத்துல தமிழனை அடிச்சுக்க ஆள் கிடையாது உலகத்துல..!!!

கை கழுவும் இடத்தில் ஒரு புதுமையைச் செய்திருந்தார்கள். இரண்டு தொட்டி நிறைய தண்ணீரை நிரப்பில் அதில் இருந்து 20 குழாய்களுக்கு கனெக்சன் கொடுத்திருந்தார்கள். வித்தியாசமான செட்டப்பில் இருந்தது.. சூப்பர்.. நிச்சயம் பாராட்ட வேண்டும்..!  கறிக்குழம்பு மட்டுமே என்பதால் தனியாக தயிரை கொடுத்து வயிற்றை கூல் செய்யச் சொன்னார்கள். அதையும் செய்தோம்..! 

சாப்பாடு தயாராகும் இடம் ஒன்றாக இருந்தும் அதனை பந்தி பிரிக்கும் இடம் மூன்றாக இருந்தது.. மூன்றுக்கும் வேறு வேறு பொறுப்பாளர்கள்.. வேலையாட்கள் என்று கச்சிதமாக பிரித்துக் கொடுத்திருந்தார்கள். இந்தக் கூத்தில் அங்கே திடீரென்று வந்து இரண்டு பெண் காவலர்கள் தங்களுக்கு தண்ணீர் பாட்டில் வேண்டும் என்றார்கள். ரெண்டுதான் கேப்பாங்கன்னு நினைச்சா.. எல்லாருக்கும் வேணும்.. ஒரு டஜன் வாங்கிட்டு வரச் சொன்னாங்க என்றார்கள். ஒரு பேச்சும் பேசாமல் 20 கேன் கொண்ட பேக்கையே தூக்கி அவர்கள் கையில் கொடுத்தார்கள் தம்பிமார்கள். அக்காமார்கள் வீர நடை போட்டு அதனை எடுத்துச் சென்றதை கீழே பாருங்கள்..!

வெளியே வரும்போது அகில உலக நக்கல் நாயகம் அண்ணன் பாமரனை சந்தித்தோம். வழக்கம்போல தனது பையனுக்கு உலக அறிவைக் காட்டுவதற்கு துணைக்கு அழைத்துக் கொண்டு வந்திருந்தார். சிறிது நேரம் அளவளாவினோம்.. உடன் வந்திருந்த நண்பர்களுக்கு என்னையும் மதுமதியையும் அறிமுகப்படுத்தி வைத்தார். “நல்ல பிளாக்குகளை எனக்குச் சொல்லுங்க தோழர்..” என்றார் பாமரன். “என் பிளாக்கை தவிர மத்தது எல்லாமே நல்லாயிருக்கும் தோழர்..” என்றேன்.. சிரித்துக் கொண்டார்.. உடனேயே சாப்பிட்டே தீர வேண்டும் என்று அவருடைய வயிறு சொன்னதால், எங்களிடமிருந்து விடைபெற்றுக் கொண்டார்..!

மீண்டும் அரங்கம் இருந்த இடத்திற்கே வந்தோம். வழியில் பல இடங்களில் நாம் தமிழர் கட்சி பிரசுரங்கள்.. சீமானின் பேச்சுக்கள் அடங்கிய சிடிக்கள்.. ஈழம் சம்பந்தமான புத்தகங்கள்.. கீ செயின்கள்.. போர்டுகள்.. போஸ்டர்கள்.. பிரபாகரனின் புகைப்படங்கள் என்று திராவிடப் பாரம்பரியம் தாங்கிய அனைத்துவகை விற்பனைகளும் காட்சிக்கு வைக்கப்பட்டிருந்தன.. என் கையும் வழக்கம்போல அரிக்கவே.. 3 புத்தகங்களை வாங்கிவிட்டு மேற்கொண்டும் அங்கே நின்றால் பர்ஸ் காலியாகிவிடும் என்ற எச்சரிக்கை உணர்வோடு கிளம்பினேன்..! 

அப்போதும் ஒரு ஆர்வத்தோடு நம்ம ஏ.சி. குணசீலன் என்ன செய்றாருன்னு தேடிப் பார்த்தேன். நேற்றைக்கு இருந்த ஏ.சி. வேற.. இப்ப இருக்குற ஏ.சி. வேற..! நேற்றைக்கு சென்னை உயர்நீதிமன்றத்தின் நேரடி உத்தரவில் நடக்கும் விழா. இன்றைக்கு கட்சிக்காரர்களின் விழா எதுக்கு வம்பு என்றெண்ணி தனக்கு ஒதுக்கப்பட்டிருந்த டாடா சுமோவின் முன் சீட்டில் அமர்ந்தபடியே வேடிக்கை பார்த்துக் கொண்டிருந்தார். 

அரங்கத்தின் உள்ளேயும் போலீஸ் இல்லை.. சாப்பாட்டு கூடத்திலும் போலீஸ் இல்லை.. டிவி இருந்த பந்தலுக்குள்ளும் போலீஸ் இல்லை. ஆனாலும் ரொம்ப சவுகரியமா அவங்களுக்கு எங்க உக்காரப் பிடிக்குதோ அங்க உக்காந்து வேடிக்கை பார்த்துக்கிட்டிருந்தாங்க..!  சொந்த வூட்டுக் கல்யாணம் மாதிரியே வந்தவர்களும், ஏற்பாடு செஞ்சவங்களும் நாயா உழைச்சுக்கிட்டிருக்கும்போது இதுல இவுகளுக்கு என்ன வேலை..? சந்தோஷம்தான்..!

இப்போதும் அரங்கத்தில் கூட்டம் நிரம்பியிருந்தது.. பரிசு கொடுக்கக் காத்திருந்த கூட்டம் கியூவில் நின்று கொண்டிருந்தது..! ஒவ்வொருவருடனும் தனித்தனி புகைப்படம் எடுத்து அவர்களை சந்தோஷப்படுத்திக் கொண்டிருந்தனர் மணமக்கள்..! இந்த அண்ணனின் சந்தோஷம் இன்றுபோல் என்றும் இருக்கட்டுமே என்று மனதிற்குள் வாழ்த்திவிட்டு மதுமதியுடன் கிளம்பினேன்..!

“இப்ப எங்க போறீங்க..?” என்றேன்.. "புலவர் இராமனுசம் ஐயாவை பார்க்கப் போறேன்.." என்றார் மதுமதி. “அவர் வீடு எங்கேயிருக்கு..?” என்று கேட்ட பின்பு, “நானும் அவரை பார்க்க வர்றனே..?” என்று கூறி அவருடனேயே கிளம்பினேன்..!

அடுத்தப் பதிவு ஐயா புலவர் இராமனுசம் அவர்களுடனான சந்திப்பு பற்றியது..!

புகைப்பட உதவி : பல்வேறு இணையத்தளங்கள். அனைவருக்கும் நன்றி..!

Tweet

சீமானை வீழ்த்த நடக்கும் சதி..!

02-06-2011

என் இனிய வலைத்தமிழ் மக்களே..!

உண்மையாகவே பெரிதும் வருத்தப்படுகிறேன்..!

நிச்சயமாக இந்தச் செய்தி தவறானது என்பதில் நான் நூறு சதவிகிதம் நம்புகிறேன்..!

எனக்கு சீமானுடன் நேரடி பழக்கமில்லை. கை குலுக்கியிருப்பதோடு சரி..! இருந்தாலும் நான் இப்போதும் உறுதியுடன் சொல்கிறேன்.. விஜயலட்சுமி என்னும் இந்த நடிகை சொல்லியிருப்பது அபாண்டமானது..!

ஒரு பெண்ணி்ன் நடத்தையை வைத்து அவரை எடை போட முடியுமா..? அல்லது ஒரு சம்பவத்தினாலேயே அவரை பலி கடாவாக்க முடியுமா..?

முன்பு அப்படியிருந்திருக்கலாம். ஆனால் இப்போது திருந்தியிருக்கலாமே..?

ஏன் சீமானே மாறியிருக்கலாமே.. ஒரு நிமிடத்தில் அப்படி நடந்திருக்கலாமே..?

இப்படியெல்லாம் பகுத்தறிவோடு சிந்திக்காமல் இந்தச் செய்தியைப் படித்த காலை பொழுதிலேயே நான் உணர்ந்துவிட்டேன் இது நிச்சயம் பொய்யான புகாராகத்தான் இருக்கும் என்று..!

முதல் காரணம் செல்வி.விஜயலட்சுமியின் குணநலன்கள் அவர் சின்னத்திரைக்குள் கால் வைத்த தினத்தில் இருந்து என் காதுகளுக்கு எட்டியபடியே இருந்ததினால்தான்..! அவரைப் பற்றிய பல திடுக்கிடும் செய்திகள் பலவிதமான நண்பர்களிடமிருந்து ஒரே மாதிரியாக வந்து சேர்ந்து கொண்டேயிருந்தன.

அது ஒன்றே ஒன்றுதான்.. அவர் தகுதிக்குரியவர் என்று யாரை நினைக்கிறாரோ அவரிடமெல்லாம், “ஐ லவ் யூ..” சொல்வார்..! சிலரை இப்படியே கிறங்கடித்திருக்கிறார். பலர் அது உண்மையோ என்று நம்பி விஜயலட்சுமியுடன் சின்சியராகப் பழகத் துவங்க, சில நாட்களிலேயே வேறொருவருக்கு “ஐ லவ் யூ..” சொல்லிவிட்டு தாவி விடுவார் என்றார்கள்..!

சின்னத்திரை உலகம் மிகவும் சிறியது.. முதல் நாள் ஓரிடத்தில் கேமிரா உதவியாளராகவும், செட் உதவியாளராகவும், தயாரிப்பு உதவியாளராகவும் பணியாற்றுபவர் மறுநாள் வேறொரு படப்பிடிப்பில் கலந்து கொள்ள நேரிடும். மறுநாள் மீண்டும் முதல் நாள் சீரியலுக்கே திரும்பி வர வேண்டியிருக்கும்.. இப்படி இவர்கள் குண்டுச் சட்டிக்குள் ஓடுவதைப் போலவே ஓடிக் கொண்டிருப்பதால் ஒரு ஷூட்டிங்கில் நடப்பது, அடுத்த நாள் வேறொரு ஷூட்டிங்கில் லைவ் ரிலேவாக ஓடிக் கொண்டிருக்கும்.

அவைகளனைத்தையும் மீண்டும் இங்கே சொல்லி அவரைக் கேவலப்படுத்துவது எனது நோக்கமல்ல..! ஆனால் உண்மையே அவருடைய நடத்தையைப் பொறுத்துதான் இருக்கிறது என்பதால் கொஞ்சம் சொல்ல வேண்டியிருக்கிறது..!

சீரியல்களில் நடிக்கும்போது, “நான் உங்களைக் காதலிக்கிறேன்..” என்று சில புரொடெக்ஷன் மேனேஜர்கள், கேமிராமேன்கள், இயக்குநர்களிடத்தில் விஜயலட்சுமி கூறியிருக்கிறார். இரண்டாவது யூனிட் இயக்குநரைக்கூட அவர் விட்டுவைத்ததில்லை.

“ஏன் லேட்டா வர்றீங்க..?” என்று கேட்டால்கூட 'கையைப் பிடித்து இழுத்தார்' என்ற ரேஞ்ச்சுக்கு ராடன் ஆபீஸுக்கு புகாரை அனுப்பி வைப்பார் விஜயலட்சுமி. இந்தத் தொல்லை தாங்காமலேயே அவரிடம் நேராகப் பேசாமல் இடைத்தரகராக இணை இயக்குநர் ஒருவரை வைத்துக் கொண்டுதான் அவரைச் சமாளித்தார்கள் இயக்குநர்கள்..!

அவரைத் தவிர்த்துவிட்டு சீரியலை தொடர முடியாத சூழல் வந்தபோதுதான், வேறு வழியில்லாமல் அனைத்து விவகாரங்களும் ராடன் டிவி நிர்வாகத்தின் முன் வைக்கப்பட்டு பஞ்சாயத்தாக்கப்பட்டது. அப்போதுதான் விஜயலட்சுமி சொன்ன “ஐ லவ் யூ” கதைகள் அனைத்தும் அம்பலமாகின..!

'தங்கவேட்டை' நிகழ்ச்சியின் இயக்குநர் ரமேஷ் மீது தன்னை காதலித்து ஏமாற்றியதாக விஜயலட்சுமி பொய்யாக, போலீஸில் புகார் கொடுக்கும் அளவுக்கு போன பின்புதான் அவரை அந்த இரண்டு தொடர்களிலிருந்தும் தூக்கினார்கள். பாவம் அந்த இயக்குநர் ரமேஷ்.. சில நாட்களாக தலைமறைவு வாழ்க்கை வாழ வேண்டிய கட்டாயத்தில் இருந்தார். பெரும்பாடுபட்டு அந்த வழக்கை வாபஸ் பெற வைத்தார்கள்..!

2008-ம் ஆண்டு கன்னட நடிகர் லோகேஷின் மகன் ஸ்ரூஜன் லோகேஷுடன் விஜயலட்சுமி காதல் கொண்டு நிச்சயத்தார்த்தமும் நடந்தது. பின்பு இந்தக் காதலும் 6 மாதத்தில் முறிந்து போய்விட்டது. ஸ்ரூஜன் வேறொரு சின்னத்திரை நடிகையை திருமணம் செய்து கொண்டு போய்விட்டார். விஜயலட்சுமி மீண்டும் இப்போதுதான் 'பாஸ் என்ற பாஸ்கரன்' படத்தில் தமிழில் ரீ எண்ட்ரீயாகியிருந்தார்..!

இவருடைய இந்த நிலைமையோடு, சீமானின் நிலைமையையும்  கொஞ்சம் நினைத்துப் பாருங்கள்..!

வீடு முழுவதும் உதவி இயக்குநர்கள்.. தற்போதைய நிலையில் 10 இளைஞர்கள், அவருடைய வீட்டில் அவருடனேயே தங்கியிருக்கிறார்கள். ஒரு முறை தேசிய பாதுகாப்புச் சட்டத்தின் கீழ் கைது செய்யப்பட்டு சிறையில் இருந்தார். மீண்டும் ஒரு முறை கைது செய்யப்பட்டு சாதா சிறைவாசம் அனுபவித்தார். அப்போதெல்லாம் இந்த விஜயலட்சுமி எங்கேயும் தென்பட்டதில்லை. 2 ஆண்டுகளாக காதலித்தோம் என்று கதை விடுவதற்கும் ஒரு அளவில்லையா..?

சீமானின் வீடு 24 மணி நேரமும் ஜாபர்சேட்டின் கண் பார்வையில்தான் இருந்தது. அவருடைய உதவி இயக்குநர்கள் அனைவருமே சீமானைப் போன்று தமிழ்த் தேசியம், ஈழம், பிரபாகரன் என்ற எண்ணத்திலேயே இருப்பவர்கள். இது போன்ற சின்னப்புள்ளத்தனத்திலெல்லாம் ஈடுபட சீமானுக்கெங்கே நேரமிருக்கப் போகிறது..?

அத்தோடு கட்சி வேறு ஆரம்பித்த கையோடு எப்பவும் நிருபர்களின் கண் பார்வையிலேயே இருந்தவர் இந்த விவகாரம் உண்மையாக இருந்திருந்தால் இந்நேரம் மாட்டியிருப்பார். சீமானை நன்கு அறிந்தவர்கள் இதனை எடுத்த எடுப்பிலேயே நிராகரிப்பார்கள்..! அவருக்கு காதல், கல்யாணம் இதிலெல்லாம் அக்கறையில்லை என்பது திரையுலகத்தினருக்கே தெரிந்த விஷயம்தான்.

இப்போதுதான் அவருடைய குடும்பத்தினர், நண்பர்கள் மற்றும் கட்சியினரின் வற்புறுத்தலினால் இலங்கை போரில் பாதிக்கப்பட்ட தமிழ் பெண்ணை மணக்கலாம் என்ற அளவுக்கு இறங்கி வந்திருக்கிறார் என்று சிலிர்க்கிறார்கள் அவரது உதவி இயக்குநர்கள்..!

விஜயலட்சுமியுடனான அவரது தொடர்பு ஒன்றே ஒன்றுதான். அது விஜயலட்சுமியின் அக்கா உஷாவின் வரதட்சணை புகார் பற்றியது. விஜயலட்சுமியின் அக்கா கணவர் என்னைப் போன்ற சற்று யூத்தான தமிழ் இளைஞர்களுக்கு நன்று அறிமுகமானவர். 'திருட்டு புருஷன்' என்று ஆண்டு முழுவதும் காலை காட்சியாக ஓடி சாதனை படைத்த திரைப்படத்தின் கதாநாயகன் ராஜ்பாபு. இவர் நடிகை ஜெயப்ரதாவின் சொந்தத் தம்பி.

இவருடனான குடும்ப உறவு முறிந்த நிலையில், தனது அக்காவின் மகனை மீட்டுக் கொடுக்கும்படி 2008-ம் ஆண்டு விஜயலட்சுமி போலீஸில் புகார் கொடுத்திருந்தார். அந்தச் சமயத்தில்தான் சீமானை விஜயலட்சுமி சந்தித்ததாக சீமானின் வழக்கறிஞர் சொல்கிறார். சீமானை விஜயலட்சுமி தெரிந்து வைத்திருந்ததற்கு காரணம் சீமான் இயக்கிய 'வாழ்த்துகள்' திரைப்படத்தில் அவரும் நடித்திருந்ததுதான். இந்தச் சின்னத் தொடர்பை வைத்து 3 ஆண்டுகள் கழித்து சூப்பரான திரைக்கதை அமைத்து கதை கட்டிவிட்டிருக்கிறார்கள் சிலர்..!

நேற்று இந்தத் தகவல் நிருபர்களுக்கு எப்படி சென்றது என்பதும் ஒரு சுவாரசியம்..! காங்கிரஸ் கட்சியில் இருக்கும் ஒரு முன்னாள் எம்.எல்.ஏ. ஒருவர்தான் சினிமா பத்திரிகையாளர்களைத் தொடர்பு கொண்டு இந்த விஷயத்தைச் சொல்லியிருக்கிறார் என்று சினிமா வட்டாரத்தில் சொல்கிறார்கள். பத்திரிகையாளர்கள் கமிஷனர் அலுவலகத்துக்குப் போகும் முன்பேயே, விஜயலட்சுமி புகார் கொடுத்துவிட்டு சென்றுவிட்டார்..!

ஆக முன்பே நன்கு திட்டமிட்டு ஏற்பாடு செய்யப்பட்ட நாடகமாகவே இதனை நான் கருதுகிறேன்..! இதற்கு விஜயலட்சுமி என்ற பெண்ணும் உடந்தை என்பதுதான் வேதனை..!

ஒருவரின் கொள்கைகளை, கருத்துக்களை நேருக்கு நேராகச் சந்திக்கத் தைரியமில்லாத கோழைகள், அவரை எப்பாடுபட்டாவது வீழ்த்திவிட வேண்டும் என்று நினைத்து கேரக்டர் அஸாஸினேஷன் செய்ய முயற்சிப்பது கேவலமானது..!

சமீபத்தில் நடந்து முடிந்த சட்டசபை தேர்தலில் சீமானின் புயல்வேகப் பிரச்சாரத்தில் காங்கிரஸின் டவுசர் கிழிந்தது, அக்கட்சியினருக்கு பெரும் கோபத்தைக் கிளறியிருக்கலாம் என்று நினைக்கிறேன்..!

தி.மு.க. நின்ற இடங்களிலெல்லாம் தோல்வி என்றால் அது ஆட்சியாளர்கள் மீது மக்களுக்கு இருந்த கடுப்பு என்றே எடுத்துக் கொள்ளலாம். ஆனால் காங்கிரஸ் மீது..? அவர்கள் ஆளும் கட்சியினரின் தோழமைக் கட்சி என்ற ஒரு விஷயம் மட்டும்தான். ஆனால் இந்த ஒன்றுக்காகவேதான் காங்கிரஸுக்கு இவ்வளவு பெரிய தோல்வியா என்றால் இதை நான் நம்பவில்லை..!

ஊழலில் கூட்டணி அமைத்தது.. உயர்ந்து கொண்டேயிருந்த விலைவாசி உயர்வைக் கட்டுப்படுத்த திராணியற்ற நிலையில் ஆட்சி நடத்தியது.. கூடவே எண்ணற்ற தமிழ் இளைஞர்களை கொந்தளிக்க வைத்திருந்த முள்ளிவாய்க்கால் படுகொலையில் காங்கிரஸ்-தி.மு.க. கூட்டணி செய்த துரோகமும், அந்தத் துரோகத்தை சீமான் தோலுரித்துக் காட்டியதாலும்தான் தமிழ்நாட்டில் காங்கிரஸுக்கு இந்த அளவுக்கான படுதோல்வி கிடைத்தது என்று நான் உறுதியாக நம்புகிறேன்..!

இல்லையெனில் தி.மு.க. கூட்டணி தோற்றிருந்தாலும், காங்கிரஸுக்கு சுமாராக 15 தொகுதிகளாவது கிடைத்திருக்கும்.. அதிலும் மாதத்தில் 20 நாட்கள் தொகுதியிலேயே இருந்து வீடு, வீடாக சென்று தனது பெயரை நிலை நாட்டி, கோடியை செலவிட்டிருந்த ஹெச்.வசந்தகுமாரும், வேலூரில் சிறந்த எம்.எல்.ஏ. என்று 4 முறையும் பெயரெடுத்திருந்த சி.ஞானசேகரனும், ராமநாதபுரத்தில் மதப் பெரியவர்களின் முழு ஆசியைப் பெற்றிருந்த ஹசன் அலியும் தோற்றிருக்கவே மாட்டார்கள்..!

பாரதீய ஜனதா என்ற கட்சி இடையில் புகுந்து ஓட்டுக்களைக் களவாடிய காரணத்தினால்தான் தற்போதைய 5 சீட்டுக்களே காங்கிரஸுக்கு கிடைத்திருக்கிறது என்பதுதான் உண்மை. பா.ஜ.க.வும் வராமல் இருந்திருந்தால் முட்டைதான் கிடைத்திருக்கும்..! 

ஆக.. காங்கிரஸின் இந்தத் தோல்வியில் சீமானுக்கு பெரும் பங்கு உண்டு என்பது அக்கட்சியினருக்கு கோபத்தைக் கிளப்பி, இப்படியொரு பொய்யான புகார் கொடுக்க பின்புலமாக இருந்திருக்கிறார்கள் என்று சந்தேகிக்க வேண்டியிருக்கிறது..!

இன்று காலையில் இருந்தே சினிமா துறையினர் பலரும் நிச்சயம் இது கட்டுக் கதை என்றே சொல்கின்றனர். இந்த அளவுக்கு சீமானின் நிஜ சுயரூபம் சினிமாவுலகில் தெரிந்திருக்கிறது..! இது ஒன்று போதும் அவருக்கு..!

எனக்கு சாபமிட மனசு வரவில்லை. ஆனாலும் மனம் பொறுக்காமல் சொல்கிறேன்.. விஜயலட்சுமியும், இந்தப் பழிக்குப் பின்னால் இருப்பவர்களும் வருங்காலத்தில் நிச்சயம் வெம்புவார்கள்..!

Tweet

சீமானின் விடுதலை சொல்லும் செய்தி..!

09-12-2010

என் இனிய வலைத்தமிழ் மக்களே..!

வழக்கறிஞர்களும், அரசுத் தரப்பினரும், காவல்துறையினரும் ஆவலோடு எதிர்பார்த்திருந்ததை போலவே நாம் தமிழர் இயக்கத் தலைவர் சீமான் மீது பாய்ந்திருந்த தேசிய பாதுகாப்புச் சட்டத்தை சென்னை உயர்நீதிமன்றம் உடைத்தெறிந்து அவரை விடுதலை செய்ய உத்தரவிட்டுள்ளது.

காங்கிரஸ் கட்சியை எதிர்த்தும், குறிப்பாக ஜன்பத் ரோட்டு அம்மாவையும், அவர்தம் குடும்பத்தையும் குறி வைத்து சீமான் தாக்கியதை ரசிக்காத தமிழக காங்கிரஸ் தலைவர்கள் டெல்லிக்கு கொடுத்த பிரஷ்ஷரில் நமது ஊழல்களின் தந்தை எதையாவது செய்து தான் காங்கிரஸுக்கு நண்பன் என்பதைக் காட்ட நினைத்தார். இதற்காக அவர் கையாண்டது சீமானின் கைது நடவடிக்கையை..!

தமிழக மீனவர்கள் இலங்கை கடற்படையினரால் தொடர்ந்து தாக்கப்படுவதைக் கண்டித்து, கடந்த ஜூலை 10-ம் தேதியன்று சென்னை கலெக்டர் அலுவலகம் முன்பாக நாம் தமிழர் இயக்கத்தின் சார்பில் நடைபெற்ற கண்டன ஆர்ப்பாட்டத்தில் சீமான் பேசிய பேச்சைக் குறி வைத்தே இந்தக் கைது சம்பவங்கள் நடந்தன.

இந்தக் கூட்டத்தில் வன்முறையை தூண்டியதாகவும்-158-ஏ (ஐ.பி.சி.), 2 இனங்களுக்கு இடையே பிரிவினை ஏற்படும் வகையில் பேசுவது, ஐ.பி.சி., 188 - அனுமதித்த நேரத்தைவிட கூடுதல் நேரம் பேசியது ஆகிய 2 பிரிவுகளின் கீழ் சீமான் மீது வழக்குப் பதிவு செய்யப்பட்டது.

சீமான் இதனை எதிர்பார்த்து தலைமறைவானார். அவரைப் பிடிக்க போலீஸ் தரப்பில் மூன்று சிறப்புப் படைகளை அமைத்து வலைவீசி தேடி வந்தனர்.

இந்த நிலையில் ஜூலை 12, 2010 அன்று எப்போதும்போல வீட்டிலோ, அல்லது யார் கண்ணிலும்படாமலோ போலீஸாரை சந்திக்க விரும்பாத சீமான், சென்னை பத்திரிகையாளர் மன்றத்துக்கு நேரில் வந்து பத்திரிகையாளர்களைச் சந்தித்து தனது விளக்கத்தை அளித்த பின்பு போலீஸாரிடம் சரணடைய முடிவெடுத்திருந்தார்.

ஆனால் அவரை பத்திரிகையாளர்களைச் சந்திக்கவே விடக் கூடாது என்கிற நமது மாநிலத்தை ஆள்வோரின் சர்வாதிகார உத்தரவின்படி நிறைய தள்ளுமுள்ளுகளுக்குப் பின்பு பெரியார் சிலை அருகே அவரைக் கைது செய்து கொண்டு சென்றது ஆளும் எஜமானர்களுக்கு விசுவாசமான போலீஸ் படை. 



சீமானை நீதிமன்றத்தில் ஆஜர்படுத்தி தொலைதூரத்தில் வைத்தால்தான் தொல்லைகள் கொஞ்சம் தீரும் என்று நினைத்து வேலூரில் தனிமைச் சிறையில் அடைத்தனர்.

இதன் பின்பு ஜூலை 17-ம் தேதி சீமானை தேசிய பாதுகாப்புச் சட்டத்தின் கீழ் ஓராண்டு விசாரணையில்லாமல் சிறையில் வைக்க உத்தரவிடப்பட்டது.

இதனை எதிர்த்து சீமானின் சகோதரர் ஜேம்ஸ் பீட்டர் சென்னை ஐகோர்ட்டில் வழக்கு தொடர்ந்தார். வழக்கு விசாரணையில் சீமான் இந்திய இறையாண்மைக்கு எதிராகப் பேசவில்லை என்கிற விஷயத்தைவிட, சீமான் மீது பிறப்பிக்கப்பட்ட தேசிய பாதுகாப்புச் சட்டமே செல்லாது என்றுதான் சீமான் தரப்பு வழக்கறிஞர் அதிகமாகப் பேசியிருக்கிறார்.

சீமானுக்கு எதிராகப் பிறப்பிக்கப்பட்ட “தேசிய பாதுகாப்புச் சட்ட மீறலினால் கைது” என்கிற அந்த உத்தரவில்  கையொப்பமிட்டவர் அன்றைய சென்னை மாநகர காவல்துறையின் கூடுதல் ஆணையராக இருந்த சஞ்சய் அரோரா.

அப்போது சென்னை மாநகர ஆணையராக இருந்த ராஜேந்திரன் லண்டனில் நடைபெற்ற ஒரு மாநாட்டுக்காக சென்றிருந்ததால் ஆணையர் பணியினரை சஞ்சய் அரோராவே கூடுதல் பொறுப்பாக மேற்கொண்டது உங்களுக்கு நினைவிருக்கலாம்.

ஆனால் “இப்படியொரு உத்தரவில் கையொப்பமிட மாநகர காவல்துறை ஆணையருக்கு மட்டும்தான் தகுதியும், அனுமதியும் உண்டு. கூடுதல் ஆணையருக்கு இல்லை. ஆகவே இந்த உத்தரவே செல்லாது. எனவே சீமானை விடுதலை செய்ய வேண்டும்” என்பதுதான் சீமான் தரப்பு வழக்கறிஞரின் இறுதியான வாதம்.

இதற்கு இவர் கொடுத்த வலுவான ஆதாரம்.. தேசிய பாதுகாப்புச் சட்டத்தை மீறியதற்காக கைது செய்யப்படும் உத்தரவைப் பிறப்பிக்க மாநகர ஆணையர்களுக்கு மட்டுமே அதிகாரம் உண்டு என்று உச்சநீதிமன்றம் வேறொரு வழக்கில் முன்பு ஒருமுறை பிறப்பித்த உத்தரவை இந்த நீதிமன்றத்தில் தனது தரப்பு ஆதாரமாகச் சமர்ப்பித்துள்ளார் சீமான் தரப்பு வழக்கறிஞர்.

“அன்றையக் கூட்டத்தில் சீமான் பேசியதில் எந்த தவறும் இல்லை. இந்திய இறையாண்மைக்கு எதிராக அவர் எதையும் பேசவில்லை..” என்றெல்லாம் சீமானின் வழக்கறிஞர் வாதாடியிருந்தாலும், இந்த ஒரு விஷயமே தற்போது சீமானை விடுவிக்கப் போதுமானதாக இருந்திருக்கிறது.

இந்த வழக்கில் ஆஜரான அரசுத் தரப்பு வழக்கறிஞரோ, மாநகர காவல்துறை ஆணையர் பதவியில் இல்லாதபோது, கூடுதல் ஆணையருக்கு முழு அதிகாரமும் உள்ளதாக வாதாடியிருக்கிறார்.

இரு தரப்பு வாதத்தையும் கேட்ட நீதிபதிகள், தேசிய பாதுகாப்பு சட்டம் பிரயோகிப்பதற்கு, மாநகர காவல்துறை ஆணையருக்கு மட்டுமே அதிகாரம் உள்ளது என்று ஏற்கனவே உச்சநீதிமன்றம் தீர்ப்பளித்ததை மட்டுமே சுட்டிக் காட்டி சீமானுக்கு எதிரான தேசிய பாதுகாப்பு சட்டத்தின் நடவடிக்கையை ரத்து செய்து, அவருக்கு விடுதலையளித்து உத்தரவிட்டுள்ளனர்.

சீமான் கடந்த ஜூலை மாதம் 12-ம் தேதியிலிருந்து இன்று டிசம்பர் 9-ம் தேதிவரையிலும் கிட்டத்தட்ட 5 மாதங்கள் சிறையில் இருந்திருக்கிறார். நாளை உறுதியாக விடுதலையாக இருக்கிறார்.

இப்போது எனது கேள்வி..! உயர்நீதிமன்ற வழக்கறிஞர் ஒருவரிடம் இருக்கின்ற உச்சநீதிமன்ற தீர்ப்புகள், தகவல்கள், ஆலோசனைகள் அரசுத் தரப்பு வழக்கறிஞருக்கு முன்கூட்டியே தெரியாதா..?

இருவரும் ஒரே அளவிலான வழக்கறிஞர்கள்தானே.. இப்போதெல்லாம் உச்சநீதிமன்றத்தின் பல்வேறு வகையான தீர்ப்புகள் ஆண்டு வரிசைப்படியும், குற்றப் பிரிவுகள் வரிசைப்படியும்தான் புத்தகங்களாக வெளி வந்திருக்கிறதே.. போதாக்குறைக்கு இணையத்தில் ஒரு நொடியில் பிரிண்ட் அவுட் எடுக்க முடிகிறதே..

இத்தனை வசதிகள் இருந்தும் உச்சநீதிமன்ற உத்தரவை சீமான் தரப்பு வக்கீல் தாக்கல் செய்யும்வரையில் அரசுத் தரப்பு வக்கீல் என்ன செய்து கொண்டிருந்தார்..? இது பற்றி அரசுக்கு ஆலோசனையே தரப்படவில்லையா..?

ஒருவேளை அரசு வக்கீலுக்கு இது பற்றிய தகவல்கள் தெரியாது என்று சொன்னால் அவர் இந்தப் பதவிக்கே லாயக்கிலாதவராகிவிடுவாரே..? முன்பே தெரியும் என்றால் வேண்டுமென்றே பொய் சொல்கிறார் என்றாகிவிடுமே..?

சீமானை சிறை வைத்தது ஜூலை 12. அவருக்கான தேசிய பாதுகாப்புத் தடைச் சட்ட உத்தரவு பிறப்பிக்கப்பட்டது ஜூலை 17. ஆக 5 நாட்கள் இடைவெளியில்தான் இந்த உத்தரவு வெளியாகியுள்ளது.

அப்படியிருக்கும்போது இப்படியொரு உத்தரவை பிறப்பிக்கப் போகும் முன் அரசின் உள்துறை இலாகாவினர், சட்டத் துறையை அணுகி மாநகர ஆணையர் இல்லாத நிலையில் அது மாதிரியான உத்தரவை கூடுதல் ஆணையர் இடலாமா..? அதற்குச் சட்டத்தில் இடமுண்டா.. இல்லையா..? என்றெல்லாம் ஆலோசனை கேட்டிருக்கக் கூடாதா..?

ஏனெனில் ஆணையரும், கூடுதல் ஆணையரும், அரசுத் தரப்பு வக்கீலும், உள்துறை இலாகாவினரும் அரசு சம்பளம் பெறுபவர்கள். அரசுக்கு ஆலோசனை சொல்லக் கூடியவர்கள். அதற்கான பொறுப்பானவர்கள். இவர்கள் எடுக்கும் எந்தச் செயலும் மக்களைப் பாதித்தால் அதற்கு முழுப் பொறுப்பாக வேண்டியது தமிழக அரசுதானே...!

உள்துறைச் செயலாளர் இது பற்றிய நோட்டீஸை காவல்துறை ஆணையர் அலுவலகத்துக்கு அனுப்பும்போதே சட்டத் துறையினரிடம் கலந்தாலோசித்துவிட்டு அதன் பின்பு நடவடிக்கைகளை மேற்கொள்ளும்படி அறிவுறுத்தியிருந்தால் தனக்கு அத்தகைய அதிகாரம் இருக்கிறதா இல்லையா என்பது அப்போது கூடுதல் ஆணையருக்குத் தெரிந்திருக்குமே..? இதனால் சீமான் கைது பிரச்சினையே வராமல் போயிருக்குமே ..?

ஒருவேளை உள்துறையிடமிருந்து வந்த உத்தரவை அப்படியே எந்திரம்போல் கூடுதல் ஆணையர் செயல்படுத்தியிருந்தால் இதற்கான நியாயங்கள் இவரிடமிருந்துதான் முதலில் பெறப்பட வேண்டும்..

இது பற்றி சட்டத் துறையிடம் விளக்கம் கேட்கச் அறிவுறுத்தாமல் இருந்திருந்தால் தமிழக அரசின் உள்துறையும், உள்துறை பொறுப்பை வகிக்கும் முத்தமிழ் அறிஞரும் இதற்குப் பதில் சொல்லியே ஆக வேண்டும்..!

ஏனெனில் இந்த முறைகேடான உத்தரவால் சீமான் என்ற மனிதரின் தனி மனித உரிமை மிகவும் பாதிக்கப்பட்டுள்ளது.

சீமான் இந்த முறைகேடான சட்ட விதிமுறை மீறலால் கடந்த 5 மாதங்களாக சிறையில் அடைக்கப்பட்டுள்ளார். அவரது பொன்னான 150 நாட்கள் வீணாகியிருக்கின்றன. இந்த நாட்களுக்கு இப்போது யார் பொறுப்பாவது..?

அவர் வெளியில் இருந்திருந்தால் சில லட்சங்களை தனது குடும்பத்திற்காக சம்பாதித்திருப்பார். அந்தச் சூழல் அப்போது இருந்தது. சிறையில் அடைக்கப்பட்ட காரணத்தினால் அவர் இழந்த லட்சங்களை இப்போது அரசு இவருக்கு நஷ்டஈடாகத் திருப்பித் தருமா..?

நான் முதல் பத்தியில் குறிப்பிட்டிருப்பதைப் போல இந்த வழக்கின் விவாதங்களை வைத்து சீமான் நிச்சயம் விடுதலையாவார் என்றுதான் சினிமா வட்டாரத்திலும், பத்திரிகைகள் வட்டாரத்திலும், வழக்கறிஞர்களின் சேம்பரிலும் பேசப்பட்டு வந்தது.

இப்படி ஒரு சமூகத்தின் அனைத்துப் பிரிவினருக்குமே இது சட்ட விரோதச் செயல் என்று தெரிந்திருக்கும் அளவுக்கு தனது சட்ட விரோதச் செயலை ஒரு மாநில அரசே முன் வந்து செய்திருப்பது மிகக் கேவலமானது..!

இப்படி இல்லாத ஒரு அதிகாரத்தைக் கையில் எடுத்துக் கொண்டு வேறொரு ஆட்சியினர் தற்போதைய முதலமைச்சரின் குடும்பத்தில் ஒருவரை உள்ளே தூக்கிப் போட்டால், தற்போதைய முதலமைச்சர் என்ன செய்வார்..?

விதி என்று சொல்லி சிறைக்கு நேரில் வந்து அழைத்துப் போவாரா..? மாட்டார் அல்லவா..? முரசொலியில் நாலு பக்கத்துக்கு கவிதை எழுதி தீட்டியிருப்பாரே..! தனது உடன்பிறப்புக்களை உசுப்பிவிட்டு தமிழகத்தை ரத்தக் களறியாக்கிருப்பாரே..!

அன்றைக்குத் தன்னை நடுராத்திரியில் காவல் துறையினர் கைது செய்தபோது அவரும், அவரது குடும்பத்தினரும், கட்சியினரும் என்னமாய் துடித்தார்கள். துவண்டார்கள். வானமே இடிந்து விழுந்துவிட்டதைப் போல எப்படி கூப்பாடு போட்டார்கள்..?

ஏன் சீமான் என்றொரு மனிதன் மட்டும் இவர்களது கண்ணுக்கு மனிதனாக, ஒரு தமிழனாகத் தெரியவில்லை..!

அவருக்கு மட்டுமே சிந்துவது ரத்தம்.. மற்றவர்களுக்கு என்றால் அது தண்ணீரா..?

அரசுகள் நினைத்தால் தனி மனிதனின் உரிமைகளை முடக்கலாம் என்பதற்கு எத்தனையோ உதாரணங்களை இந்தியாவிலும், தமிழகத்திலும் இதற்கு முன்பும் நாம் கண்டிருக்கிறோம். இப்போது சீமானை வைத்து நாம் அறிந்து கொள்கிறோம்..!

தமிழக அரசின் தற்போதைய அவலட்சணமான நிர்வாக முறைகேட்டுக்கு இதுவும் ஒரு உதாரணம்..!

டிஸ்கி : சீமானின் பேச்சு சட்ட விதிமீறலா? இந்திய இறையாண்மையை மீறியதா என்கிற விஷயத்திற்குள் நான் போகவில்லை. கைதே சட்ட விரோதம் என்கிறபோது அதைப் பற்றி எதற்குப் பேச வேண்டும்..?

Tweet

40-வது ஆண்டு விழா - சர்ச்சையில் தமிழ்நாடு திரைப்பட இயக்குநர்கள் சங்கம்

27-10-2010

என் இனிய வலைத்தமிழ் மக்களே..!
 

தனது பெருமைக்குரிய உறுப்பினர் 'செந்தமிழன்' சீமான் சிறைக் கொட்டடியில் வாடிக் கொண்டிருக்கும் அதே நேரத்தில், தமிழ்த் திரைப்பட இயக்குநர்கள் சங்கம் தனது 40-வது ஆண்டு விழாவை வெற்றிகரமாக நடத்தி முடித்திருக்கிறது.

சென்ற 23-ம் தேதியன்று சென்னை நேரு உள்விளையாட்டரங்கில் நடைபெற்ற இந்த விழா நிகழ்ச்சிகளின் பூரிப்பில் இயக்குநர்கள் திளைத்திருந்தாலும், பல மூத்தக் கலைஞர்களும், பல திரைப்படத் தொழிலாளர்களும் பெரும் அதிருப்திதான் அடைந்திருக்கிறார்கள்.

பொதுவாக சங்கத்தின் ஆண்டு விழா என்றாலே அச்சங்கத்தின் துவக்கத்திற்குக் காரணமானவர்களையும், மூத்தவர்களையும் மேடையேற்றி கெளரவப்படுத்துவதுதான் வாடிக்கை. அது சங்கத்திற்குப் பெருமையும்கூட. இதனைப் பற்றித் துளியும் கவலைப்படாமல் தனது விழாவினை சன் டிவி சொல்லிக் கொடுத்தது போலவே நடத்தி முடித்திருக்கிறார்கள் என்று பொருமுகிறார்கள் சில மூத்த இயக்குநர்கள்.

தமிழ்த் திரைப்பட இயக்குநர்கள் சங்கத்திற்கு சொந்தமாக கட்டிடம் இல்லாததால் அதற்கான நிதியைத் திரட்டும் பொருட்டே இந்த விழாவை ஏற்பாடு செய்ததாக முன்பே தெரிவிக்கப்பட்டுவிட்டது.

ஒரு மாதத்திற்கு முன்பாக விழா பற்றி பத்திரிகையாளர்களிடம் பேசிய சங்கத் தலைவர் பாரதிராஜா, “சொந்தக் கட்டிடம் கட்டுவதற்காகத்தான் இந்த விழாவையே நடத்துகிறோம்..” என்று தெள்ளத் தெளிவாகத் தெரிவித்துவிட்டார். விழாவை தொலைக்காட்சியில் ஒளிபரப்பு செய்யும் உரிமையை விற்பதன் மூலம்தான் அத்தொகை கிடைக்கும் என்பதால் முன்னணி சேனல்கள் இரண்டுமே இதற்காக போட்டியிட்டன.

ஆளும் கட்சி கோதாவில் களமிறங்கிய 'கலைஞர் டிவி' ஒன்றரை கோடியைத் தாண்டிப் பேசவே இல்லையாம். எப்படியும் தங்களுக்குத்தான் என்று நினைத்து கொஞ்சம் அலட்சியமாக அவர்கள் இருந்துவிட கிடைத்த கேப்பில் சன் டிவி ஒரே தவணையில் இரண்டே முக்கால் கோடி தருவதாகச் சொல்லி உரிமையைக் கைப்பற்றியது. இந்த ஒப்பந்தம் கையெழுத்தாவதைக்கூட பத்திரிகைகள் முன்பாகவே நடத்தினார்கள்.

மிகப் பெரும் தொகை என்பதால் சன் டிவி சொல்லிக் கொடுத்தது போலவே நிகழ்ச்சிகளை வடிவமைத்திருந்தனர். இதில்தான் சங்க நிகழ்ச்சிகளெல்லாம் வடிகட்டப்பட்ட முக்கியமான மார்க்கெட்டிங் விதிமுறைகள் புகுத்தப்பட்டு கதை கந்திரலோகமானது என்கிறார்கள். காலை, மாலை நிகழ்ச்சிகள் இரண்டிலுமே சன்னின் தற்போதைய டார்கெட்டான 'எந்திரனின்' பாடல்கள் மற்றும் அது தொடர்பான ஆடல், பாடல் காட்சிகள் தவறாமல் இடம் பெற்றிருந்தது.

காலை நிகழ்ச்சிகளில் தமிழில் முக்கியமான இசையமைப்பாளர்களை வைத்து பாட்டுக் கச்சேரி லெவலுக்கு ஒன்றை நடத்தினார்கள்.

நிகழ்ச்சியின் துவக்கத்தில் தனது பேவரிட் சில்க் ஜிப்பா உடையில் மேடையில் ரகளை செய்து கொண்டிருந்த கங்கை அமரன், 'ஆயிரம் தாமரை மொட்டுக்களே..' பாடல் தனது அம்மா பாடிய கும்மிப் பாட்டு ஒன்றின் காப்பி என்கிற உலக மகா உண்மையை போட்டுடைத்தார். 'சாமி வருகுது..' என்று துவங்கும் அந்தக் கும்மிப் பாட்டையும் பாடிக் காட்டினார் கங்கை அமரன். தொடர்ந்து அவர் பேசும்போது தனது உயர்வுக்கும், வளர்ச்சிக்கும் உரமேற்றி அஸ்திவாரமிட்டவர் பாரதிராஜாதான் என்று நன்றிக் கடன் செலுத்தினார். கூடவே அவர் இயக்கிய முதல் படமான 'கோழி கூவுது' படம் சிவாஜி நடித்த பழைய 'புதையல்' படத்தின் கதைதான் என்று சொன்னது அனைவரையும் ஆச்சரியப்பட வைத்த விஷயம்.

அனுராதா ஸ்ரீராம் 'ஏழு ஸ்வரங்களுக்குள் எத்தனை பாடல்' என்ற அபூர்வ ராகங்கள் படப் பாடலை பாடினார். இதன் பின்பு 'தனக்கு மிகவும் பிடித்தமான பாடகி சமீபத்தில் மறைந்த சொர்ணலதா' என்று கூறி சொர்ணலதா பாடிய பாடல்களில் இருந்து சிலவற்றை பாடினார்.

வாலியையும், எம்.எஸ்.வி.யையும் மேடையேற்றி கெளரவப்படுத்தினார்கள். வாலி பேசும்போது “நான் எம்,எஸ்.வி.யை சந்திக்கின்றவரையிலும் சோத்துக்கே சிங்கியடித்ததேன். எம்.எஸ்.வி.யை சந்தித்த பின்பு சாப்பிடுவதற்கே நேரமில்லாமல் தவித்தேன்” என்றார். இதனை எம்.எஸ்.வி. மரியாதை பொருட்டு மறுத்தாலும், வாலி “அண்ணா.. அண்ணா..” என்று எம்.எஸ்.வி.யை அழைத்தது அனைவரையும் நெகிழ வைத்தது.

மேலும் வாலி பேசுகையில், “என்னதான் நல்ல பாடலை கவிஞன் எழுதிக் கொடுத்திருந்தாலும், எத்தனை சிறந்த இசையமைப்பில் அது பதிவாகியிருந்தாலும் ஒரு நல்ல இயக்குநர் அதை நல்லவிதமாகப் படமாக்கினால்தான் அந்தப் பாடல் வெற்றியடையும். இல்லையெனில் அது விழலுக்கு இறைத்த நீர்தான். இதை இன்றைய இயக்குநர்கள் புரிந்து கொள்ள மறுக்கிறார்களே...?” என்று சொல்லி வருத்தப்பட்டார்..

கேரள கலையுலகம் சார்பாக வந்திருந்த மெகா ஸ்டார் மம்முட்டி, முழுவதும் தமிழிலேயே பேசி ஆச்சரியப்படுத்தினார். “நானும் தமிழில் பல படங்களில் நடித்திருக்கிறேன். என்னை இயக்கிய இயக்குநர்களில் அதிகம் ஆச்சரியப்படுத்தியவர் ஆர்.கே.செல்வமணிதான். இரவு, பகல் பாராமல் ஷூட்டிங்கை நடத்துவார். எப்போது தூங்குவார், எப்போது விழிப்பார் என்றெல்லாம் தெரியாமல் நான் ஆச்சரியத்துடன் அவரை பார்ப்பேன். அந்த அளவுக்கு அவர் ஒரு ஸ்பீடு இயக்குநர்” என்று பாராட்டிவிட்டுப் போனார்.

இந்தக் கலை நிகழ்ச்சியை முன்னிட்டு புகைப்படக் கண்காட்சி ஒன்றும் அமைக்கப்பட்டிருந்தது. அதனை நடிகர் நெப்போலியன் திறந்து வைத்தார். அந்தக் கண்காட்சியில் தமிழ்த் திரையுலகின் பல இயக்குநர்கள் சம்பந்தப்பட்ட புகைப்படங்கள் வைக்கப்பட்டிருந்தன. இருந்தாலும் மிகக் குறைவான அளவே புகைப்படங்கள் இருந்ததாலும், குறுகிய இடத்தில் செய்யப்பட்டிருந்ததும் பார்வையாளர்களுக்கு முழு திருப்தியை அளிக்கவில்லை.

நடிகர் நெப்போலியன் பேசும்போது, "தனது இன்றைய மத்திய இணை அமைச்சர் வரையிலான உயர்வுக்கு முழுக் காரணமே பாரதிராஜாதான். அவர் மட்டும் இல்லைன்னா நான் இந்த அளவுக்குக்கூட உயர்ந்திருக்க முடியாது" என்று குரு காணிக்கையைச் செலுத்தினார்.

நடிகை சரண்யா தான் திரையுலகில் அறிமுகமானவிதத்தைச் சொன்னபோது பலருக்கும் ஆச்சரியத்தை அளித்தது. “முக்தா ஸார் எடுக்குற படத்துக்கு புதுமுகம் தேடுறாங்கன்னு சொன்னாங்க. எங்கப்பா என்னை முக்தா ஸார் வீட்டுக்குக் கூட்டிட்டுப் போனாரு. அப்போ அங்க ஒரு மூலைல மணிரத்னம் உக்காந்து ஒரு புத்தகத்தைப் புரட்டிக்கிட்டிருந்தாரு. அப்போ எனக்கு அவர்தான் மணிரத்னம்ன்றது சுத்தமா தெரியாது. முக்தா ஸார் வந்து 'இவர்தாம்மா டைரக்டர் மணிரத்னம்'னு சொன்னப்போ ரொம்ப ஷாக்காயிட்டேன். அப்புறம் அவர்கிட்ட, "ஸார் நான் உங்க பேன் ஸார்.. உங்க 'மெளனராகம்' படம் எனக்கு ரொம்பப் புடிச்ச படம் ஸார்"ன்னு சொன்னேன். நான் சொன்னதுக்கெல்லாம் தலையை ஆட்டிட்டு 'ஓகே' 'ஓகே'ன்னு சொன்னாரு.. என்னை எப்படியும் செலக்ட் பண்ண மாட்டாருன்னு நினைச்சேன். பட் செஞ்சுட்டாரு.. எனக்கு ரொம்ப ஆச்சரியந்தான்” என்றார்.

நடிகர் பிரபு பேசும்போது “நான் இதுவரைக்கும் 55 இயக்குநர்களை அறிமுகப்படுத்தியிருக்கேன். என்னதான் நான் நல்லா நடிச்சிருந்ததா நினைச்சிட்டிருந்தாலும் எனக்குள்ள இருக்குற திறமையை வெளிக்கொணர்ந்தது இயக்குநர்கள்தான். இது எனக்கு மட்டுமல்ல. என் அப்பாவுக்கும் பொருந்தும்” என்றார்.

நடிகர் சங்கத் தலைவரான சரத்குமார், தன் பங்குக்கு “உன்னையறிந்தால் நீ உன்னையறிந்தால்..” பாடலை பாடி அசத்தினார். ஆனால் அவரது மனைவியான நடிகை ராதிகா பேசிய பேச்சுதான் கொஞ்சம் ஓவராகிப் போனது காலை நிகழ்ச்சிகளுக்கே திருஷ்டிபட்டது போலானது.

தான் அழகாக இல்லாமல் இருந்தும் தன்னை பாரதிராஜா தேர்வு செய்தது தனக்கு மிகப் பெரிய அதிர்ச்சிதான் என்றவர், ஷூட்டிங்கின்போது “உனக்கெல்லாம் நடிப்பு சொல்லித் தரணும்ன்னு என் தலையெழுத்து..” என்று பாரதிராஜா புலம்பியதையும் சிரித்தபடியே சொன்னவிதத்தில் பாரதிராஜாவே நெளிந்துதான் போனார்.

மாலை நிகழ்ச்சிகளில் கே.பாலசந்தர், பாரதிராஜா இருவரைப் பற்றியும் இயக்குநர் வசந்த் எடுத்திருந்த டாக்குமெண்ட்ரிகளைத் தவிர வேறெந்த நிகழ்ச்சியும் இல்லாதது மிகப் பெரும் ஏமாற்றமே. இவர்களின் திரைப்படப் பாடல்களுக்கு நடிகர், நடிகைகள் நடனமாடினார்கள்.

தமிழ்த் திரையுலகின் முன்னோடி இயக்குநர்கள் ஒவ்வொருவரையும் அறிமுகப்படுத்தி வைத்து அவர்களைப் பற்றிய வாழ்க்கைக் குறிப்புகளை ஒரு ஆவணப் படமாக எடுத்துக் காட்டியிருந்தால் சங்க ஆண்டு விழாவின் நோக்கம் சிறப்பானதாக இருந்திருக்கும்.

அதனைச் சுத்தமாக மறந்துவிட்டு சன் டிவியின் மார்க்கெட்டிங்கிற்காக ஆடல், பாடல் நிகழ்ச்சிகளை மட்டுமே வைத்தது பலருக்கும் அதிருப்தியை அளித்தது.

தமிழ்ச் சினிமாவில் துவக்கக் காலப் புள்ளியான மாடர்ன் தியேட்டர்ஸில் பணியாற்றிய முக்தா சீனிவாசனையாவது மேடையேற்றி கெளரவப்படுத்தியிருக்கலாம் என்பது மூத்தக் கலைஞர்களின் அங்கலாய்ப்பு. விழாவுக்கு வந்திருந்த முக்தாவும் தனக்கு எதுவும் கிடைக்க வாய்ப்பில்லை என்பதை உணர்ந்து பாதியிலேயே வெளியேறினார். அதேபோல் நிகழ்ச்சிக்கு வந்திருந்த மூத்த இயக்குநர்களில் ஒருவரான ஏ.ஜெகநாதனையும் மேடையேற்றவில்லை.

இதுவாவது பரவாயில்லை. 'வீரபாண்டிய கட்டபொம்மன்', 'கர்ணன்', 'ஆயிரத்தில் ஒருவன்' என்று வரலாற்றுச் சிறப்புமிக்க தமிழ்த் திரைப்படங்களை இயக்கியிருக்கும் பி.ஆர்.பந்தலுவின் நூற்றாண்டு இந்த வருடம் கொண்டாடப்படுகிறது.

அவர் பிறந்த கன்னட தேசத்தில் ஒரு மாதம் முழுக்க கர்நாடக அரசு பந்தலுவை கெளரவிக்கும் பொருட்டு மாநிலம் முழுவதும் விழாக்களை நடத்தியது. ஊருக்கு ஒரு தியேட்டரில் பந்தலு இயக்கிய திரைப்படங்களை வெளியிட்டு கெளரவித்தது.

ஆனால், தமிழ்த் திரைப்பட இயக்குநர்கள் சங்கம், பந்தலுவைப் பற்றி இன்றுவரையிலும் மூச்சு விடாமல் இருப்பது கொடுமையிலும் கொடுமை என்றார்கள் சினிமா பத்திரிகையாளர்கள். "இந்த விழாவிலாவது பந்தலுவுக்கு சிறிதளவு நேரம் ஒதுக்கி அவரைப் பெருமைப்படுத்தும்விதத்தில் ஏதாவது செய்திருக்கலாம்.." என்றார் ஒரு மூத்த சினிமா பத்திரிகையாளர்.

என்னதான் பணத்தை அள்ளிக் கொடுக்கிறார்கள் என்றாலும் சங்கத்தின் தனித்தன்மையை விட்டுக் கொடுப்பதா என்றும் கொந்தளித்தார்கள் சில உதவி இயக்குநர்கள். “நடிகை ரோஜாவும், இயக்குநர் செல்வமணியும் மேடையேறி, தாங்கள் காதலித்தது, கல்யாணம் செய்தது.. சண்டை வந்து பிரிய நினைத்தது என்பதையெல்லாம் விலாவாரியாக எடுத்துரைத்தது ரொம்பவே டூ மச்.  “இதெல்லாம் சங்க ஆண்டு விழாவுக்கு ரொம்ப முக்கியமா ஸார்..? யார் ஸார் இதையெல்லாம் கேட்டது..?” என்றார் ஒரு உதவி இயக்குநர்.

மாலை நிகழ்ச்சிகளில் சுந்தர்.சி., டி.பி.கஜேந்திரன் நடித்த படு மொக்கையான ஒரு நாடகத்தை போட்டு நேரத்தை வீணடித்துவிட்டார்கள். 

இசைஞானி இளையராஜாவும், பாரதிராஜாவும் தாங்கள் எங்கே முதல்முதலாக சந்தித்துக் கொண்டோம் என்று துவங்கி, பல விஷயங்களை பேசி முடிக்க கூட்டம் கலகலத்துப் போனது. ஆனாலும் இவர்கள் இருவரும் இறுதிவரையில் முகத்தோடு முகம் பார்த்து பேசாமல் இருந்தது ஏன் என்றுதான் தெரியவில்லை. தனது நிகழ்ச்சி முடிந்ததும் இளையராஜா சொல்லாமல், கொள்ளாமல் அரங்கத்தில் இருந்து வெளியேற.. பாரதிராஜா அவரை பார்த்தபடியேதான் இருந்தார். இதேபோல் 3 மணி நேரத்திற்கும் மேலாக அருகருகே அமர்ந்திருந்தும் சந்தானபாரதியும், வாசுவும் பேசிக் கொள்ளாமலேயே எழுந்து சென்றதையும் பார்க்க நேர்ந்தது.

பல இளைய இயக்குநர்கள் ஓடியாடி உழைத்துக் கொண்டிருந்ததை கண்கூடாக பார்க்க நேர்ந்தது. லிங்குசாமி, பாலாஜி சக்திவேல், வசந்த், எழில், கெளதம்மேனன் போன்றோர் பல வேலைகளை இழுத்துப் போட்டுக் கொண்டு செய்தனர். கெளதம் மேனன் மேடை அமைக்கும் பொறுப்பை முழுமையாகத் தானே ஏற்றுக் கொண்டாராம். இதற்காகக் தன்னுடைய சொந்தப் பணத்திலிருந்து கிட்டத்தட்ட 10 லட்சம் ரூபாயை செலவழித்திருக்கிறார் என்று நம் காதைக் கடித்தார் நிகழ்ச்சி ஏற்பாட்டாளர் ஒருவர்.

பிரபலமான ஹிந்தி இயக்குநர் கோவிந்த் நிகாலனிக்கு மணிரத்னம் சங்கத்தின் சார்பாக வாழ்நாள் சாதனையாளர் விருதை வழங்கி கெளரவித்தார். அதேபோல் தெலுங்கு, கன்னடத்தில் இருந்தும் பிரபல இயக்குநர்களை வரவழைத்திருந்தார்கள்.

தெலுங்கில் கே.விஸ்வநாத், கோதண்டராமிரெட்டி, ராகவேந்திரராவ், கன்னடத்தில் துவாரகீஷ் நாகபரணா, கே.எஸ்.ராவ், மலையாள இயக்குநர் ஹரிஹரன் ஆகியோருக்கு சாதனையாளர் விருது வழங்கப்பட்டது.

தமிழில் இயக்குநர்கள் பாலுமகேந்திரா, இராம.நாராயணன் ஆகியோர் விருதுகளைப் பெற்றார்கள். “இவர்களைவிட மூத்தவர்களான  ஏ.சி.திருலோகசந்தர், சி.வி.ராஜேந்திரன், சித்ராலயா கோபு, மகேந்திரன், என்று பலரும் இருக்கிறார்களே..? அவர்களையும் மேடையேற்றி கெளரவித்திருக்கலாமே..?” என்றார் ஒரு திரைப்பட விமர்சகர்.

விருதுகளை கொடுக்கும்போது யார், யாருக்குக் கொடுக்கிறார்கள் என்பதே தெரியாத அளவுக்கு நிகழ்ச்சியைத் தொகுத்து வழங்கியதை மன்னிக்க முடியாதது. விருந்தினர்களை இவ்வளவு நேரம் காக்க வைத்து அனுப்ப வேண்டுமா என்றெல்லாம் பலரும் முணுமுணுக்கும் அளவுக்கு நிகழ்ச்சியின் நேரம் அனுமார் வால் போல் நீண்டு கொண்டே போனது.

கார்த்திக்கும், ராதாவும் மேடையேறி பேசிக் கொண்டிருந்தபோதுதான் சூப்பர்ஸ்டார் ரஜினி அரங்கத்தில் நுழைந்தார். கூட்டம் எழுப்பிய கரவொலி அடங்க சில நிமிடங்கள் ஆகியது. “இப்போ ஒரு சுனாமி வந்த மாதிரியிருக்கே..” என்று டைமிங்காக கார்த்திக் சொன்னது அசத்தல் கமெண்ட்..

இடையில் நடிகர் ராதாரவி நடத்திய 'ரத்தக்கண்ணீர்' நாடகத்தின் சில பகுதிகள் ரசிகர்களின் கைதட்டலை மொத்தமாக அள்ளியது. லேட்டஸ்ட் அரசியல் கருத்துக்களைப் புகுத்தி தனது வழக்கமான பாணி நகைச்சுவையைத் தெளித்திருந்தார் ராதாரவி. இறுதியில் “நீங்க எந்தக் கட்சில சேரப் போறீங்க..?” என்று கேட்டதற்கு “நம்ம நிலைமைதான் இப்படியாயிருச்சே..” என்று இரட்டை விரல்களைக் காட்டிவிட்டுப் போனபோது ரஜினியே கை தட்டினார். ஆனால் எதற்காக இரட்டை விரல்களைக் காட்டினார் என்பது அடுத்த நாள் அவர் அ.தி.மு.க.வில் மீண்டும் தன்னை இணைத்துக் கொண்ட செய்தி வந்தபோது புரிந்தது.

ரஜினி இறுதிவரையில் அமைதியாக அடக்கமாக அமர்ந்திருந்தது அனைவரையும் கவர்ந்தது. ஆனால் அந்த அடக்கம் ஏன் என்று கடைசியில்தான் தெரிந்தது. இந்தக் கலை விழாவின் ஹைலைட்டே அவரும் அவருடைய குருநாதர் கே.பாலசந்தரும் கலந்து கொண்ட நேருக்கு நேர் நிகழ்ச்சிதான்.

எது மாதிரியும் இல்லாத புது மாதிரியாய் அமைந்திருந்த இந்த நிகழ்வில் ரஜினி சங்கடப்பட்டது மூன்று கேள்விகளுக்குத்தான். “பஸ் கண்டக்டராக இருந்தபோது யாரையாவது காதலித்திருக்கிறாயா?” என்று கேட்டதற்கு “ஆமாம்..” என்றவர் யார்? என்ன? என்ற மேல் விபரங்களைச் சொல்ல மறுத்து “வேண்டாமே..” என்று தன்மையோடு மறுத்தார்.

அதேபோல் “இந்த கேரக்டரை நாம பண்ணியிருக்கலாமே என்று நீ நினைச்சிருப்பியே.. அதை லிஸ்ட் போடு..?” என்று கேட்டபோது அதற்கும் “வேண்டாம் ஸார்..” என்று மென்மையாக மறுத்தார். “உன்னை அவமானப்படுத்திய விஷயம்?” என்று கேட்ட இன்னொரு கேள்விக்கும் இதேபோல் பதில் சொல்ல மறுத்துவிட்டார்.

கே.பி.யின் நறுக்குத் தெரித்தாற்போன்ற கேள்விகளுக்கு பதில் சொல்லும்போது இடையில் வந்த பதிலில் கிடைத்தது சூப்பர் ஸ்டார் ஏப்ரல் மாதத்தில் அரங்கேறப் போகும் கே.பி,யின் மேஜர் சந்திரகாந்த் நாடகத்தில் நடிக்கவிருப்பதுதான். 

இந்த நிகழ்ச்சி முடியவே இரவு 11.30 மணியாகிவிட்டதால் கூட்டம் பெரிதும் கலைந்துவிட்டது. ரஜினியின் பேட்டியின்போதே காலரியில் பாதி காலிதான். இத்தனை நேரத்திற்கும் நிகழ்ச்சியை இழுத்துக் கொண்டே போனால் எப்படி முணுமுணுப்புகள் அரங்கத்தின் உள்ளேயும், வெளியேயும் புகைந்து கொண்டேயிருந்தது.

விழாவில் இயக்குநர்கள் பாலா, மணிரத்னம், அகத்தியன் மூவரையும் பெருமைப்படுத்தும்விதத்தில் தங்கத்தில் செய்யப்பட்ட இயக்குநர் சங்கத்தின் அடையாள அட்டை தரப்பட்டது. இதன் பின்பும் நிகழ்ச்சிகள் தொடர்ந்து நடைபெறும் என்று கூட்டத்தை இருக்க வைத்தாலும்.. பசியிலும், களைப்பிலும் மக்கள் கலைவதை உணராமல் மைக்கில் தொடர்ந்து இதையே சொல்லிக் கொண்டிருந்ததுதான் கொடுமையானது.

நிகழ்ச்சிக்கு வந்திருந்த சில உதவி இயக்குநர்களிடம் பேசியபோது “இரண்டே முக்கால் கோடி ரூபாய்க்காக 'சங்கத்தின் ஆண்டு விழா' என்ற போர்வையில் இதனை நடத்தியதற்குப் பதிலாக 'கலை விழா' என்றே சொல்லி நடத்தியிருக்கலாம். 'சங்க ஆண்டு விழா' என்று எதற்காகச் சொல்ல வேண்டும்..?  எங்களுடைய முன்னோடி இயக்குநர்களையும், சங்கத்தின் வரலாற்றையும் முன்னிறுத்தாமல் வெற்று கலை நிகழ்ச்சிகளை நடத்தியதில் எங்களுக்குக் கொஞ்சமும் திருப்தியில்லை..” என்றார்கள்.

இந்த நிகழ்ச்சியைப் பற்றித்தான் விமர்சனங்கள் எழுந்தன என்றாலும் கடைசியில் இயக்குநர்கள் சங்கத்தின் தற்போதைய நிலையைப் பற்றிக்கூட அங்கே பலராலும் பேசப்பட்டது. முதலிலேயே இந்தக் கலை விழாவை சீமான் வெளியில் வந்த பின்பு வைத்துக் கொள்ளலாம் என்று பலரும் சொல்லியிருக்கிறார்கள். அவர் வெளியில் வரவே நிச்சயம் 1 ஆண்டு ஆகும் என்று இயக்குநர்கள் சங்கத்தின் பொறுப்பில் இருப்பவர்கள் சொன்னதைக் கேட்டு சீமானின் ஆதரவாளர்களே கொதிப்படைந்துவிட்டார்களாம்.

தமிழ்த் திரையுலகம் மட்டுமன்றி அதையும் தாண்டி பொதுமக்கள் மத்தியில் நல்ல பெயரெடுத்திருக்கும் சீமான் இயக்குநர்கள் சங்கத்தின் கவுரமிக்க ஒரு உறுப்பினர். அவர் அவருடைய அரசியல் கொள்கைக்காக ஜெயிலுக்குப் போயிருக்கட்டும். அதற்காக நம் குடும்பத்துப் பையனை புறக்கணித்துவிட்டு நாமே விழா நடத்துவது ஏற்புடையதுதானா..? என்றெல்லாம் கேள்விகள் உதவி இயக்குநர்கள் மத்தியில் பரவியிருந்தது.

இந்தக் கொதிப்பை உணர்ந்ததினால்தான் இந்த நிகழ்ச்சிக்கு முதல்வரை அழைக்கவில்லையாம். நிகழ்ச்சிக்கு முதல்வர் வந்திருந்து, அந்த நேரத்தில் உதவி இயக்குநர்கள் அவர் முன்பாகவே ஏதாவது தகராறு செய்துவிட்டால் அது சங்கத்திற்கு கேவலமாகிவிடுமே என்ற எண்ணத்தில்தான் முதல்வரை விட்டுவிட்டதாக சங்கத்தில் தொடர்புடைய ஒருவர் கூறினார்.

இதேபோல் உடல் நலக்குறைவால் மணிவண்ணனும், சீமான் விஷயத்தில் கோபம் கொண்டு வெளிநாட்டில் 'ஆதிபகவன்' ஷூட்டிங்கை வைத்துக் கொண்டு அமீர் எஸ்கேப்பானதாகச் சொல்கிறார்கள். தங்கர்பச்சானும் இதனாலேயே வரவில்லை என்கிறார்கள். இதேபோல் ஷங்கரும் அரங்கத்தில் தென்படவில்லை.

அதேசமயத்தில் இன்னொரு அதிர்ச்சியடைய வைத்த செய்தி. சங்கத்தின் பொருளாளரான இயக்குநர் ஆர்.சுந்தர்ராஜன் நிகழ்ச்சிக்கு வரவில்லை. நெருக்கி விசாரித்தபோது அவர் சில மாதங்களுக்கு முன்பாகவே தனது பொருளாளர் பதவியை ராஜினாமா செய்துவிட்டு போய்விட்டதாகத் தெரிவிக்கிறார்கள்.

ஆனால் அவரது ராஜினாமாவின் பின்பு பெரும் கதையே இருப்பதாக சுந்தர்ராஜன் தரப்புத் தெரிவிக்கிறது. பல ரசாபாசங்களும் நடந்திருப்பதாகச் சொல்கிறார்கள். இதனாலேயே சுந்தர்ராஜனுக்கு உடல் நிலை பாதிக்கப்பட்டு மருத்துவமனையில் அனுமதிக்கப்பட்டு அறுவை சிகிச்சையும் செய்ய வேண்டி வந்ததாம்.

இதில் ஒரு ஸ்கூப் நியூஸ்.. நேரு ஸ்டேடியத்தில் இயக்குநர்கள் நிகழ்ச்சி நடந்து கொண்டிருந்த அதே நேரத்தில், ராஜாஅண்ணாமலைபுரம், குமாரராஜா முத்தையா அரங்கத்தில்  எம்.எஸ்.விஸ்வநாதன் அறக்கட்டளை நடத்திய கண்ணதாசன் விழாவுக்கு ஆர்.சுந்தர்ராஜன் வந்திருந்தது சுவையான விஷயம்..!
 
சரி. இவர்தான் வரவில்லையென்றால், சென்ற தேர்தலின்போது ஆர்.சுந்தர்ராஜனிடம் பொருளாளர் பதவிக்குப் போட்டியிட்டுத் தோற்றுப் போன வி.சேகரும் அரங்கத்தில் தென்படாதது ஏனென்று தெரியவில்லை.

தற்போது சங்கத்தின் புதிய பொருளாளராக 'பெண்ணின் மனதைத் தொட்டு' படத்தின் இயக்குநர் எழில் நியமிக்கப்பட்டிருக்கிறாராம். ஆனால் இந்த மாற்றத்திற்கு சங்கத்தின் செயற்குழு, பொதுக்குழுவில் இதுவரை அனுமதி வாங்கவில்லையாம்.. இயக்குநர்கள் சங்கத்தின் இந்த விவகாரம், விரைவில் வெடிக்கத்தான் போகிறது என்கிறார்கள் சங்கத் தொடர்புடையவர்கள்.

இந்த நிகழ்ச்சி முடிந்த இரண்டு நாட்கள் கழித்து நேற்று வடபழனி கிரீன்பார்க் ஓட்டலில் நிகழ்ச்சியை வெற்றிகரமாக நடத்தியதற்காக இயக்குநர்கள் சங்கத்தினர் அனைவரும் வெற்றி விழா கொண்டாடியிருக்கிறார்கள். நள்ளிரவு தாண்டியும் 'தீர்த்தவாரி' நடந்து முடிந்ததாம்.

இதைக் கேள்விப்பட்டும் சில உதவி இயக்குநர்கள் கொதிப்பில் இருக்கிறார்கள். “யார் வீட்டுக் காசு இது..? அவனவன் பொண்டாட்டி தாலியை அடகு வைச்சு ஐம்பதாயிரம் ரூபா பணத்தைக் கட்டி மெம்பர்ஷிப் ஆயிருக்கான் ஸார்.. இவங்க அந்தக் காசுல இப்படி கூத்தடிச்சா என்ன அர்த்தம்..?” என்கிறார்கள் கோபத்தோடு.

நிகழ்ச்சியில் பங்கு கொண்டவர்களோ, “பாரதிராஜா என்ற ஒரு மனிதர் மட்டும் இல்லாவிட்டால் இந்த நிகழ்ச்சி இந்த அளவுக்கு சிறப்பா நடந்திருக்குமா? கொஞ்சம் யோசிச்சுப் பார்க்கச் சொல்லுங்க அவுங்களை.

பாரதிராஜா கூப்பிட்டாருன்றதாலதான் மணிரத்னமே ராத்திரி 12 மணிவரைக்கும் உக்காந்திருந்தாரு. ரஜினி வந்திருந்தாரு. வந்த ரஜினி இப்படியொரு பேட்டிக்கு ஒத்துக்கிட்டாரே. வேற யாருக்கு இதையெல்லாம் ஏற்பாடு செய்யற அளவுக்கு தகுதியும், திறமையும் இருக்கு? தெலுங்கு, கன்னட இயக்குநர்களெல்லாம் வந்திருந்தாங்களே.. எப்படி? பாரதிராஜான்ற பேருக்காகத்தானே..?

பாரதிராஜாவை உதவி இயக்குநர்கள் அனைவரும் 'அப்பா' என்றுதான் அழைக்கிறார்கள். அந்த அளவுக்கு அவர் மீது பாசத்துடன் இருக்கிறார்கள். இந்த விழாவில் பணியாற்றிய அனைவருமே உதவி இயக்குநர்கள்தான். அத்தனை பேருக்குமே நிகழ்ச்சியில் பணியாற்றியதற்காக சிறிதளவு தொகை சம்பளமாக வழங்கப்பட்டுள்ளது. வேலையே இல்லாமல் கஷ்டத்தில் இருந்த அவர்களுக்கு, அடுத்த இரண்டு மாதங்கள் குடும்பத்தை நடத்தும் அளவுக்கு இப்போது உதவி செய்திருப்பதே பாரதிராஜாதான். அவரைப் போய் தப்பா பேசுறாங்களே..?

கொஞ்ச நஞ்சமில்ல ஸார்.. இப்போ இரண்டே முக்கால் கோடி ரூபாய் சங்கத்துக்கு நிதியா கிடைச்சிருக்கு.. இதுக்கு முன்னாடியும் அமைப்பு இருந்துச்சு. நிர்வாகிகள் இருந்தாங்க. அவங்களால செய்ய முடிஞ்சதா? இல்லீல.. இப்ப பாரதிராஜா செஞ்சுட்டாருன்னு சொன்ன உடனேயே பொறாமைல வயிறு எரியறாங்க..” என்று பொரிந்து தள்ளுகிறார்கள்.

10 தமிழர்கள் இருந்தாலே எட்டுவிதமான கருத்துக்கள் அலைமோதும். இதில் 2000 பேர் இருக்கிறார்கள். சர்ச்சைகளும், கலகலப்புகளும் எழத்தான் செய்யும். ஏதோ நல்லவிதமாக பில்டிங் கட்டி முடித்தாலே போதும்தான்..!

புகைப்படங்கள் உதவிக்கு நன்றி : www.indiaglitz.com

Tweet