‘தேவர் மகன்’ படத்தின் உண்மையான கதாசிரியர் யார்..? சர்ச்சையில் கலைஞானமும், கமலும்..!

20-05-2014

என் இனிய வலைத்தமிழ் மக்களே..!

‘தேவர் மகன்’. கலைஞானி கமல்ஹாசனின் படங்களில் தனித்துவம் வாய்ந்தது. மறக்க முடியாத படமும்கூட.. கமல்ஹாசன், சிவாஜி கணேசன், கவுதமி, ரேவதி, நாசர், காக்கா ராதாகிருஷ்ணன், வடிவேலு, சங்கிலி முருகன், எஸ்.என்.பார்வதி என்று பல பிரபலங்களுக்கு பெயர் சொன்ன படம். 1992-ம் ஆண்டு அக்டோபர் 25-ம் தேதி தீபாவளியன்று வெளியாகி சூப்பர் டூப்பர் ஹிட்டானது.

இந்தப் படத்திற்கு சிறந்த மாநில மொழித் திரைப்படத்திற்கான தேசிய விருது கிடைத்தது. சிறந்த குணச்சித்திர நடிகருக்கான விருதினை சிவாஜி கணேசனுக்குப் பெற்றுக் கொடுத்தது. சிறந்த துணை நடிகைக்கான தேசிய விருது ரேவதிக்குக் கிடைத்தது. சிறந்த ஆடியோகிராபிக்கான விருதும், சிறந்த பாடகிக்கான விருது எஸ்.ஜானகிக்கும் இதே படம் பெற்றுக் கொடுத்தது.

படத்தின் கதை, திரைக்கதையைவிட வசனகர்த்தா கமல்ஹாசன் இந்தப் படத்தில் அதிகம் பேசப்பட்டார். அவ்வளவு வீரியமான வசனங்கள் இந்தப் படத்தில் இருந்தன. கூடவே இளையராஜாவின் இனிமையான இசையும் சேர்ந்து கொள்ள.. இப்போதும் பார்க்கப் பார்க்க திகட்டாத படம்..

மலையாள இயக்குநர் பரதன்தான் இந்தப் படத்தை இயக்கினார். பாதி படம் இயக்கி முடித்தபோதே பரதனுக்கும், கமல்ஹாசனுக்கும் இடையில் கருத்து வேறுபாடு ஏற்பட்டு அவர்களிருவருக்கும் இடையில் பேச்சுவார்த்தையே இல்லாமல் போனது. அப்படியிருந்தும் படத்தை எடுத்து முடித்து வெளியிட்டு ஹிட்டாக்கியது கமல்ஹாசனின் சாமர்த்தியம். ‘தேவர் மகன்’ படத்தின் வெற்றி விழாவில் அருகருகே அமர்ந்திருந்தும் பரதனும், கமல்ஹாசனும் பேசிக் கொள்ளாமலேயே இருந்தது சுவாரஸ்யம்தான்.

இந்தப் படம் இந்த பிரெண்ட்ஷிப்பை படத்தின் ஷூட்டிங்கின்போதே கட் செய்தது எனில்,  இன்னொரு பிரெண்ட்ஷிப்பை பட வெளியீட்டுக்குப் பின்பு கட் செய்தது. அது கமலுக்கும், இசையமைப்பாளர் கங்கை அமரனுக்கும் இடையிலான நட்பு. ‘தேவர் மகன்’ படத்தின் கதை தன்னுடையது என்றும், இதனை கமல்ஹாசன் தன்னுடைய பெயரில் வெளியிட்டிருக்கிறார் என்றும் படம் வெளியானவுடன் புகார் சொன்னார் கங்கை அமரன்.

இதைப் பற்றி கமல்ஹாசனிடம் கேட்டபோது செல்லமாக ஒரு சிரிப்பு சிரித்துவிட்டு “அவரோட கதையாம்மா..?” என்று எதிர்க் கேள்வி கேட்டு பஞ்சாயத்தை முடித்துவிட்டார். அதற்குப் பின்னர் இன்றுவரையிலும் கங்கை அமரனுக்கும், கமலுக்கும் இடையில் பேச்சுவார்த்தை இல்லை.

இதில் இப்போது மேலும் ஒரு டிவிஸ்ட்டாக ‘நக்கீரன்’ பத்திரிகையில் தன்னுடைய திரையுலக வாழ்க்கை அனுபவங்களை ‘சினிமா சீக்ரெட்’ என்ற பெயரில் எழுதி வரும் பிரபல கதாசிரியர் கலைஞானம், ‘தேவர் மகன்’ படத்தின் கதைக் கருவும், சில காட்சிகளும் தன்னுடையது என்கிறார்.

இது குறித்து ‘நக்கீரன்’ இதழில் அவர் எழுதியிருப்பது இது :

பெரிய ஸ்டாரான கமலின் ஓரிரு படங்கள் சரியாகப் போகாத நிலையில் ‘கரகாட்டக்காரன்’ என்னும் பெரும் வெற்றிப் படத்தைத் தந்த கங்கை அமரனை தனது படத்திற்கு டைரக்டராக்கினார் கமல். படத்தின் தயாரிப்பும் கமல்தான்.

ஜல்லிக்காட்டு காளை பின்னணியில் ஆன கிராமியக் கதையை எழுதிய கங்கை அமரன், “இந்தக் கதையின் டிஷ்கஷனுக்கு கலைஞானமும், கலைமணியும் வந்தால் நன்றாக இருக்கும்…” என்று சொல்ல கமலும் டபுள் ஓகே சொல்லிவிட்டார். அழைப்பின்பேரில் நானும் கலைமணியும், கமலின் ஆபீஸுக்குச் சென்றோம். அங்கே தீவிரமாக கதை விவாதம் நடந்து கொண்டிருந்தது. எனக்கும், கலைமணிக்கும் தலா ஐயாயிரம் ரூபாய்க்கு செக் கொடுத்தார் கமல்.

கதை விவாதத்திற்கிடையே என்னிடம் உள்ள கதைகளை சுருக்கமாகச் சொல்வது எனது வழக்கம். அப்படித்தான்.. எனது கல்கத்தா கார் அனுபவமான ‘கான்வாய்’ கதையை கமலிடம் சொன்னேன். அடுத்து ‘எங்க ஊரு ஏட்டையா’ என்கிற கதையையும் சொன்னேன். “ரெண்டு கதைகளையுமே எடுக்கிறேன். ஆனா ரெண்டு, மூணு வருஷம் கழிச்சுத்தான் எடுக்க முடியும்…” என்றார். கமல். “உங்க செளகர்யம் போல செஞ்சுக்கலாம் தம்பி…” என நான் சொன்னேன்.

கமல்-கங்கை அமரன் படத்திற்காக கதை விவாதம் முடிந்தது. படத்திற்கு ‘அதிவீரபாண்டியன்’ என்கிற தலைப்பையும் சொன்னேன். கமல் உட்பட எல்லோருக்கும் பிடித்துவிட்டது. படப்பிடிப்பு துவங்கிருந்த நேரத்தில் சில, பல.. காரணங்களினால் அந்தப் படம் கைவிடப்பட்டது.

உடனடியாக வேறு படம் தொடங்க வேண்டியிருந்த கமல், ஒரு கதையைத் தானே தயார் செய்து, தானே இயக்கித் தயாரிக்க திட்டமிட்டார். எல்லா ஏற்பாடுகளையும் செய்து கொண்டு நட்சத்திரங்கள், துணை நடிகர்கள் என சுமார் 200 பேர்களுடன் கமல் தனது சொந்த ஊரான பரமக்குடி பக்கம் தங்கிவிட்டார்.

முதல் நாள் ஷூட்டிங் முடிந்தது. சிந்தனைவயப்பட்டவராக கமல் தூங்காமல் விழித்திருக்க.. அந்தச் சமயம் கமலை வைத்து படம் தயாரிக்க விரும்பி, அங்கே சென்று கமலை சந்தித்தார் சங்கிலிமுருகன்.

“என்ன கமல்.. ஒரு மாதிரியா இருக்கீங்க..?” என்று சங்கிலிமுருகன் கேட்க, “இன்னிக்கு ஷூட்டிங் முடிஞ்சது. ஆனாலும் எனக்கு திருப்தி வரலை. கதை சரியா இல்லை.. அதான் யோசனையா இருக்கு..” என்று கமல் சொல்லிவிட்டு, “சங்கிலி ஸார்.. கலைஞானம் என்கிட்ட ரெண்டு கதைகளோட லைன் சொன்னார். அதுல ஒண்ணு எனக்குப் பிடிச்சிருக்கு. அதை வைச்சு பண்ணலாமா..? அந்த லைன் சொல்றேன்.. கேக்குறீங்களா..?”

“சொல்லுங்க..”

“ஒரு கிராமத்துல இரு பெரிய புள்ளிகள். கோயிலின் ‘முதல் மரியாதை’ என்னும் ‘பரிவட்டம்’ யாருக்கு என்பதில் இருவருக்கும் இடையே போட்டி. தீர்வு கிடைக்காததால் கோயிலை மூடி ஆளுக்கொரு பூட்டைப் போட்டுவிடுகிறார்கள். ‘தீர்வு கிடைக்கும்வரை கோயிலை திறக்கக் கூடாது’ என பரஸ்பரம் சவால் விடுகிறார்கள். இதுதான் கலைஞானம் அண்ணன் சொன்ன ஒன் லைன்..” என்று கமல் சொல்ல.. “இதை வைச்சு தாராளமா செய்யலாம்..” என்று சங்கிலிமுருகனும் ஆர்வமாகிவிட.. இருவரும் விடிய, விடிய கலந்து பேசியதில் முழு திரைக்கதையையும் கமல் அழகாக எழுதிவிட்டார்.

மறுநாள் படப்பிடிப்பு ஜோராகத் தொடங்கியது. அதுதான் ‘தேவர் மகன்’ திரைப்படம். இந்தச் சமயம், சந்தர்ப்பம் சில சங்கடங்களை உண்டாக்கியது.

‘தேவர் மகன்’ படப்பிடிப்பு தொடர்ந்து நடந்து கொண்டிருந்தது. அப்போது நான் பாக்யராஜுடன் பார்ட்னராக சேர்ந்து ‘அம்மா வந்தாச்சு’ படத்தை எடுத்து அதனை ரிலீஸ் பண்ணும் வேலைகளில் இருந்தோம். இதற்காக நான் பாக்யராஜின் ஆபிஸிலேயே இருந்தேன். அந்த ஆபீஸுக்கு கமல் போன் பண்ணினார்.

“அண்ணே.. என் படத்தில் உங்களுக்கு முக்கியமான வேஷம் இருக்கு. உடனே கிளம்பி வர முடியுமா..?” என கேட்டார். “தம்பீ.. உங்க படத்துல நீங்க எனக்கு வேஷம் தர்றது அளவிலா மகிழ்ச்சி தருது. ஆனா, இங்க எனக்கு ‘அம்மா வந்தாச்சு’ ரிலீஸ் வேலைகள் இருக்கே…?” என்றேன் நான். “அப்போ.. முதல்ல அதைச் செய்யுங்கண்ணே.. நான் வேற ஆளைப் போட்டுக்குறேன்..” என்றார் கமல். (‘தேவர் மகன்’ படத்தில் காக்கா ராதாகிருஷ்ணன் ஏற்றிருந்த வேஷத்திற்காகத்தான் கமல் என்னை அழைத்தார் என்பதை, பிற்பாடு காக்கா ராதாகிருஷ்ணனே என்னிடம் சொன்னார்.)

ஒரு நாள் என்னுடைய ‘மிருதங்க சக்கரவர்த்தி’ படத்தில் என்னால் நடிகராக அறிமுகப்படுத்தப்பட்ட, நடிகர் நாகராஜ சோழன் என்னைச் சந்தித்தார். “அண்ணே, ‘தேவர் மகன்’ படத்ல ஒரு நல்ல கேரக்டர் பண்ணிட்டு வந்தேன்…” என்றார். “அப்படியென்ன கேரக்டர்..?” என கேட்டேன். டேமில் குண்டு வைப்பது உள்ளிட்ட சில சீன்களையும் சொன்னார். இது கமல்கிட்ட நாம சொன்ன கதை மாதிரியிருக்கே..? இதுக்குத்தான் கமல் ‘தேவர் மகனில்’ நடிக்கக் கூப்பிட்டாரோ என எனக்குள் ஒரு சந்தேகம். இருந்தாலும் முழு விபரமும் தெரியாமல் அவசரப்படக் கூடாது என அமைதியானேன்.

சில நாட்கள் கழித்து கமல் அலுவலகத்திற்கு போன் போட்டு மேனேஜர் டி.என்.எஸ்ஸிடம் பேசினேன். நேரடியாகக் கேட்டுவிடக்கூடாது என்பதால் பாலீஷாக சுற்றி வளைத்து பேச்சை ஆரம்பித்தேன். “அதிவீரபாண்டியன்’ படத்துக்கு ஸ்டோரி டிஸ்கஷனில் கலந்துக்கிட்டதுக்காக ஒரு செக் குடுத்துச்சு தம்பி. அது என்ன தேதின்னு சொல்ல முடியுமா..?” என கேட்டேன். தேடிப் பிடித்து செக் தேதியைச் சொன்னவர் “கலைஞானம் ஸார்.. ஒரு செய்தி.. உங்ககிட்ட சொல்ல மறந்திட்டேன்..” என்றார். “என்ன..?” என்றேன். “உங்க தம்பி கமல்.. நீங்க சொன்ன கதையில் இருந்து ‘தேவர் மகன்’ படத்துக்காக ரெண்டு, மூணு சீன்களை எடுத்துக் கொண்டார். உங்ககிட்ட சொல்லச் சொன்னார். நான்தான் மறந்திட்டேன்..”  என்றார். “சரிங்க…” எனச் சொல்லி போனை வைத்துவிட்டேன்.

‘தேவர் மகன்’ படத்தைப் பார்க்காமல் எந்த முடிவுக்கும் வரக் கூடாது. அவசரப்பட்டு அநாகரிகமாக நடந்துவிடக் கூடாது என உறுதியாக இருந்தேன். ‘தேவர் மகன்’ ரிலீஸ். முதல் நாள், முதல் ஷோவே பார்த்தேன். உடனேயே, கமலிடம் பேசுவதற்காக போன் செய்தேன். சிவாஜி பிலிம்ஸின் ‘கலைஞன்’ படப்பிடிற்காக மைசூர் போய்விட்டதாகச் சொன்னார்கள். சென்னைக்கு கமல் வந்த பிறகு சந்திக்கலாம் என இருந்துவிட்டேன்.  ‘தேவர் மகன்’ மிகப் பெரும் வெற்றியுடன் ஓடி முடியும் தருவாய் ஆன நிலையில், அதாவது இரு மாதங்களுக்குப் பிறகு, கமல் சென்னை திரும்பிவிட்டதாக செய்தி கிடைத்த்து.

கமலுடன் பேச விரும்பி பல முறை அவருடைய அலுவலகத்துக்கு போன் செய்தேன். ஆனால் முடியவில்லை. ஒரு நாள் போன் போட்டு உரத்த குரலில் பேசினேன். “கமல் தம்பிகிட்ட போனை குடுங்க. குடுக்கலைன்னா, நான் இப்பவே ஆபீஸுக்கு வருவேன்..” என்று சொன்னதும் உடனே லைனில் வந்தார் கமல்.

“அண்ணே.. வணக்கம்ண்ணே.. கொஞ்சம் பிஸியா இருந்திட்டேன்.. என்னண்ணே..?”

“தம்பீ.. தேவர் மகன் பார்த்தேன். கதையோட ஆரம்பம் என்னுடையதா இருந்தாலும், அதுக்கு நீங்க எழுதின ஸ்கிரீன் பிளே அற்புதம் தம்பி.. உங்களைத் தவிர வேற யாராலும் இப்படி எழுத முடியாது தம்பி..”

“தேங்க்ஸ் அண்ணே.. நாளைக்கு காலைல டி.என்.எஸ்ஸை உங்க வீட்டுக்கு அனுப்புறேன்..”

கமல் சொன்னது போலவே டி.என்.எஸ். என் வீட்டுக்கு வந்தார். செக் ஒன்றை தந்தார்.  ஆனால், அது என் உழைப்புக்கேற்ற  ஊதியமாக இல்லை.  “நான் நாளைக்கு தம்பிய பார்த்து பேசிக்கிறேன். செக்கை நீங்க திரும்ப எடுத்திட்டுப் போயிருங்க..” என்று சொல்லிவிட்டேன்.

மறுநாள் காலை காக்கா ராதாகிருஷ்ணன் எனக்கு போன் செய்து, “கலைஞானம்… ஷூட்டிங்ல கமலுக்கு ஆக்ஸிடெண்ட் ஆயிருச்சுப்பா…” என்றார். எனக்கு வருத்தம் ஏற்பட்டது. ‘கலைஞன்’ படத்திற்காக சென்னை அண்ணா மேம்பாலத்திற்குக் கீழே கமல் குதிரையில் வரும் காட்சியைப் படமாக்கிக் கொண்டிருந்தார்கள், அதிகாலைக்கும் முன்பாக. பாலத்தின் தூண் சுவர் மீது குதிரை மோதியதில் கமல் கீழே விழுந்துவிட்டார். இதில் குறுக்குத் தண்டின் கடைசி தசைப் பகுதியில் இரண்டாக வெடிப்பு ஏற்பட்டுவிட்டது. சிகிச்சைக்காக மருத்துவமனையில் சேர்க்கப்பட்டார் கமல்.  இந்தச் சூழ்நிலையில் அவரைப் போய் பார்த்தால் ‘கதை விஷயமாக இருக்குமோ’ என்று கமல் நினைத்து வருந்தினால்..? அப்படி ஒரு வேதனைக்கு நாம் காரணமாகக் கூடாது என்று இருந்துவிட்டேன். கமல் நலம் பெற என் இஷ்ட தெய்வம் முருகனிடம் வேண்டிக் கொண்டேன். உயர் சிகிச்சைக்காக மும்பை சென்றுவிட்டார் கமல்.

சில வாரங்களுக்குப் பின் டைரக்டர் ரங்கராஜன் தயாரித்து வந்த ‘மகாராசன்’ படத்தில் கமல் சிறப்பு வேடமேற்று நடித்து வந்தார். இன்னும் ஒரு நாள் கமல் நடித்துக் கொடுத்தால் படம் வெளியாகிவிடும் என்ற சூழலில் அதில் நடித்துக் கொடுக்க கமல், மோகன் ஸ்டூடியோ வந்திருப்பதாக எனக்குத் தகவல் கிடைத்தது. நான் அங்கு போனேன். என்னைப் பார்த்ததும் “வாங்கண்ணே…” என எழுந்து கும்பிட்டார் கமல். அரை பாதியாக மெலிந்திருந்த கமலைப் பார்த்ததும் எனக்கு அதிர்ச்சியாக இருந்தது.

“என்ன தம்பி இப்படி மெலிஞ்சீட்டிங்க..?”

“அடிபட்ட காயம் இன்னும் முழுசா ஆறலண்ணே.. தொடர்ந்து ட்ரீட்மெண்ட்ல இருக்கேன்…” என்றபடியே தான் உட்கார்ந்திருந்த சேரை காண்பித்தார். அதில் பெரிய ஓட்டை இருந்தது.

“என்ன தம்பி இது..?”

“சேர்ல உட்காரும்போது மறந்துபோய் சாய்ந்து உட்கார்ந்தா, முதுகுத் தண்டுல உராயும். புண் ஆறாது.. அதனாலதான் இந்த ஓட்டை சேர்…” - 

கமல் இப்படிச் சொன்னதும் என் மனம் ரொம்பவே வேதனைப்பட்டது. “தம்பி.. உங்களை நலம் விசாரிக்க மட்டும்தான் வந்தேன். முதல்ல 

உங்க உடம்பை பார்த்துக்குங்க…” என்று சொல்லிவிட்டு வந்தேன்.

அடுத்த ஓரிரு நாளில் சங்கிலி முருகன் என் வீட்டுக்கு வந்தார்.

“அப்பே.. கமல் உங்களை அழைச்சிட்டு வரச் சொன்னார்..” என்றார் சங்கிலி முருகன். அவரது காரில் அவரும், என் காரில் நானும் கமல் ஆபீஸ் போனோம். கமல், மேனேஜர் டி.என்.எஸ். மற்றும் ஊழியர்கள் என்னை எதிர்பார்த்து நின்றிருந்தார்கள். எனக்கு முன் சங்கிலி முருகன் நுழைந்தார். அவர் டைரக்சன் பண்ணினார்.

“டி.என்.எஸ். அந்த பண்டலை எடுத்திட்டு வாங்க..”

கொண்டு வந்தார் டி.என்.எஸ்.

“அதை கமல் தம்பியிடம் கொடுங்க..”

கொடுத்தார்.

“கமல் தம்பி.. அண்ணன்கிட்ட பண்டலைக் கொடுத்து ஆசீர்வாதம் வாங்குங்க..”

கமல் என்னிடம் கொடுக்க நானும் வாங்கிக் கொண்டு கமலை ஆசீர்வதித்தேன். (ஆரம்பத்தில் இருந்து இன்றுவரை கமலை ஆசீர்வதிக்கின்றவன்தானே  நான்…!)

பண்டலில் என்ன இருக்கிறது என நாகரிகம் கருதி நானும் கேட்கவில்லை. அவர்களும் சொல்லவில்லை. விடைபெற்று வீடு வந்து சேர்ந்தேன். பண்டலைப் பிரித்தேன். எனக்கு அதிர்ச்சியாக இருந்தது. சில மாதங்களுக்கு முன் கமல் மேனேஜர் டி.என்.எஸ்., என் வீட்டுக்கு வந்து கொடுத்த.. திறமைக்கேற்ற ஊதியம் இல்லை என நான் திருப்பியனுப்பிய அதே காசோலை தொகையே, இப்போது பணமாக இருந்தது. எனக்கும், கமலுக்கும் இடையே இடைத்தரகர்கள் விளையாடிவிட்டார்கள் என்றாலும், கமல் மீது நம்பிக்கையோடு இப்போதும் காத்திருக்கிறேன்…”

- இதுதான் கதாசிரியர் கலைஞானம் எழுதியிருப்பது.

இவர் சொல்படி பார்த்தால் ‘தேவர் மகனின்’ கதைக் கருவே இவருடையதுதான்.. பின்பு எப்படி கங்கை அமரன் தன் கதை என்று சொல்ல முடியும்..? ஒருவேளை இதுவரையிலும் கலைஞானம் இதனை வெளியில் சொல்லாத காரணத்தினால், கங்கை அமரன் டிஸ்கஷனில் உருவான கதையை இயக்குநர் என்ற முறையில் தன்னுடையது என்கிறாரோ என்னவோ..?

இனி அடுத்த வெர்ஷனை கங்கை அமரன்தான் சொல்ல வேண்டும்..! காத்திருப்போம்..!!!

நன்றி : நக்கீரன் வார இதழ்

Tweet

விஸ்வரூபம் - சினிமா விமர்சனம்

11-02-2013

என் இனிய வலைத்தமிழ் மக்களே..!

இந்தப் படத்திற்கு ஏன் இத்தனை எதிர்ப்புகள்..? இதில் எந்த இடத்திலும் இந்திய முஸ்லீம் சமுதாயத்தைப் பற்றி தவறாக எதுவும் சொல்லப்படவில்லை..! படத்தைப் பார்த்த பின்பும் முழு படத்தையும் தடை செய்ய வேண்டும் என்று கோரியவர்களை  நினைத்து சிரிக்கத்தான் தோன்றுகிறது..! படத்தில் முதல் 30 நிமிடங்களைத் தவிர மற்றவைகள் அனைத்துமே நகைச்சுவைதான்..! இது ஏன் இவர்களுக்கு புரியவில்லை..? எவ்வித எதிர்ப்பும் இல்லாமலேயே இப்படம் வெளி வந்திருந்தால், கண்டிப்பாக சுமாராகத்தான் போயிருக்கும். இன்றுவரையிலான ஹவுஸ்புல் காட்சிகளுக்காக கமல், முதலில் எதிர்ப்புத் தெரிவித்து போராடிய 24 முஸ்லீம் அமைப்பினருக்குத்தான் நன்றி சொல்ல வேண்டும்..!

துவக்கத்தில் கதக் நடனக் கலைஞராக கமல் காண்பிக்கும் நடிப்பும், நடனமும் இன்னமும் அவரை நடிப்பில் வீழ்த்திவிட எந்த நடிகரும் இங்கே இல்லை என்பதை உணர்த்துகிறது..! அந்த  பாடல் காட்சியில் அவர் காட்டும் அபிநயம்.. ஒவ்வொரு வார்த்தைக்கும் அந்த நடனத்துடன் இணைந்து அவர் காட்டும் பாவமும்.. வாவ்.. வாவ்.. எத்தனை முறை பார்த்தாலும் அந்தப் பாடல் காட்சி நம்மை கண்களைவிட்டுப் போகாது என்பது நிஜம்..! இப்படியொரு கலைஞனை நாம் அடைந்ததற்கு பெருமைப்பட்டாக வேண்டும் என்பதையே சொல்கிறது..! இந்தியாவிலேயே இந்தக் கலையில் கமலை மிஞ்ச வேறு யாருமில்லை..! 

இதற்குப் பின்னர் பொதுப்படையாக பார்த்தால், கதை போகும்போக்கு இடைவேளைவரையிலும் ஜெட் வேகம்தான். ஆனால் அதற்குப் பின்பு நொண்டிக் குதிரையாகிவிட்டது..! ஆப்கானிஸ்தான், தாலிபான்கள், முல்லா ஓமர், பின்லேடன் போன்றோரை வைத்துக் கொண்டு இதுவொரு கற்பனை கதை என்று சொல்லி, ஊடுறுவியிருக்கும் திரைக்கதையை நம்பத் தகுந்தவகையில் அமைக்காததுதான் பிற்பாதியின் தோல்விக்கு காரணம்..!

அலெக்ஸ் பாண்டியனில்தான் கடைசியாக இந்த மொக்கை வசனத்தைக் கேட்டிருந்தோம். “கையை அவுத்து விட்டு அப்புறம் அவர்கிட்ட பேசிப் பாரு..” என்ற டயலாக்கை..! நல்லவேளை இந்தப் படத்தில் அந்த சீனில் இருந்த இறுக்கம் மாறாமல், வேகம் குறையாமல் பூஜாகுமாரின் நடிப்பு சிறிதும் சிதறாமல் சீரியஸாகவே அவர் சொல்லும் வசனமும், அப்பாவியான கமல்ஹாசனின் வேண்டுகோளும் இந்தக் காட்சியை ரசிக்க வைக்கிறது..! அந்த அதிரடி துவக்கம் நன்றாகத்தான் இருந்தது..!  அதற்குப் பின்புதான் அனர்த்தமே..!

இத்தனை நாள் மனைவியாக இருந்தவளால் கண்டுபிடிக்க முடியாத ஒரு மர்மத்தை தெரிந்து கொண்டவுடன், மிகச் சாதாரணமாக அதை எடுத்துக் கொண்டு உடன் ஓடுவதும்.. நெற்றியில் ஒரு பிளாஸ்டரை மட்டும் ஒட்டிக் கொண்டு போர்வீரன் தோற்றத்தில் கமல் களத்தில் குதிப்பதும் அதுவரையில் கமல் காட்டியிருந்த நடிப்பு விஸ்வரூபத்தை பொசுக்கென்றாக்கிவிட்டது..!

ஆப்கன் மலைப்பாதையில் முல்லாவுடனான கார் பயணத்தின்போது நேட்டோ கூட்டுப் படைகளின் ஹெலிகாப்டர்கள் தலைக்கு மேலாகச் செல்கிறது. இவர்கள் அவர்களையும் தாண்டி வந்து கொண்டேயிருக்கிறார்கள். இது எப்படி சாத்தியம் என்பதை கமல்தான் சொல்ல வேண்டும்..! அடுத்தக் காட்சியில் வேறொரு இடத்தில் நேட்டோ படைகளினால் சிறு கிராமங்கள் அழிக்கப்பட்டிருக்க, உடனேயே அங்கே அதே ஜீப்பில் பறக்கிறார்கள்..! இது முடிகிற விஷயமா..? சுற்றுப்புறத்தில் ஒரு சிறிய அசைவுகள் இருந்தால்கூட அதைத் தெரிந்து கொள்ளும் அளவுக்கு சக்தி படைத்த நேட்டோ படையினருக்கு இவர்களது ஜீப் மட்டுமே கண்ணுக்குத் தெரியவில்லை என்கிறார்கள்..!

இதுதான் இப்படியென்றால் அமெரிக்காவில் நடந்ததாகச் சொல்லப்படுவது முற்றிலும் லாஜிக்கின் எல்லை மீறல்..! அமெரிக்காவில்.. பட்டப் பகலில்.. கார் சேஸிங்கில் தப்பித்து ஏர்போர்ட்வரைக்கும் போய் விமானத்தைப் பிடிக்க முடியும் என்று கமல் காட்டியிருப்பதை ஆங்கிலப் படங்களில்கூட பார்த்திருக்க முடியாது..! எஃப்.பி.ஐ.க்கே தெரியாமல் அங்கே அல்கொய்தா தீவிரவாதியினரின் கொலைக் கூடமும்.. தற்கொலைப் படையினரின் நடமாட்டமும் இருக்கிறது என்பதைக் காட்டியிருப்பதும் நகைச்சுவைதான்..! 

பூஜாகுமாரின் ஏற்பாட்டில் கமலை பின் தொடரும் ஒற்றன் மிகச் சரியாக அல்கொய்தா டீமின் வாசலைப் போய் தொடுவதுதான் இப்படத்தின் மிகப் பெரிய திரைக்கதை முடிச்சு.. திரைக்கதைக்காக ரொம்ப கஷ்டப்பட வேண்டாம் என்று நினைத்து அப்படியே காட்சிகளை தொடர வைத்திருக்கிறார் போலும்..! அமெரிக்காவில் இருப்பவர்களெல்லாம் கேணையன்கள் போலவும், சீசியத்தின் மகிமையை அவர்களுக்கே உணர்த்தும் பூஜாகுமாரின் கேரக்டரெல்லாம் பயங்கர காமெடி..! ஒரு மிகப் பெரிய அழிவுப் போராட்டத்தில் ஈடுபட்டிருப்பவர் கள்ளக்காதலியிடம் பாஸ்வேர்டை கொடுப்பார் என்பதெல்லாம் நமது தமிழ்ச் சினிமாவில் மட்டுமே வரும்..!

அமெரிக்காவில் வெடிக்கப் போகும் பயங்கரத்தைத் தடுக்க இந்தியாவில் இருந்து வந்திருக்கும் ரகசிய ஏஜெண்ட்டுதான் நம்ம கமல் என்ற உண்மை வெளிப்படும்போது ரொம்பவே கை தட்டினேன்.. அப்பாடா.. இப்படியாச்சும் நாம ஜேம்ஸ்பாண்ட்டை அடிச்சு காலி பண்ணிட்டோம் என்று பெருமை கொள்ளலாம்.. இதோடு சொந்த நாட்டு மக்களிடையேகூட இதுவரையிலும் பேசாத நமது பிரதமர், கமலுக்கு போன் செய்து பேசி அவரைப் பாராட்டுகிறாராம்..! ரொம்பத்தான் பில்டப்பை அள்ளி விட்டிருக்கிறார்கள்..!

ஆப்கனில் இவர்கள் தங்கியிருக்கும் இடத்தை படையினர் முற்றுகையிட்டு அழிக்கும் காட்சிகளெல்லாம் தமிழ்ச் சினிமாவுக்கு நிச்சயம் பிரமாண்டம்தான்..! இது போன்று பணம் செலவழிக்க தயாரிப்பாளர் கிடைத்தால் யார் வேண்டுமானாலும் இது போன்று எடுத்துக் காட்ட முடியும். இதில்கூட ஹெலிகாப்டரில் இருந்து சுடுபவர்களிடமிருந்து தப்பித்து ஓடும் காட்சிகளையெல்லாம் எடுக்காமலேயே இருந்திருக்கலாமோ என்று தோன்றுகிறது.. அந்த அளவுக்கு பிஸ்கோத்து தப்பித்தல்கள்..! 

ஆப்கனில் எடுப்பதாக பிளான் செய்து, பின்பு ஜோர்டானில் சில காட்சிகளை ஷூட் செய்து கடைசியாக சென்னையில் சத்யபாமா கல்லூரிக்கு பின்புறம் நிஜமான செட் போட்டுத்தான் ஹெலிகாப்டர் காட்சிகளை எடுத்திருக்கிறார்கள் என்று கிராபிக்ஸ் செய்தவர்களே வெளியில் சொல்லிவிட்டார்கள். அத்தோடு துரோகியொருவர் தூக்கிலிடப்படும் காட்சியில் கிராபிக்ஸ் வித்தையில் 10 பேர் நின்றிருந்ததை 100 பேராக ஆக்கி நம்மை மறக்கடித்திருக்கிறார்கள்..! இன்னும் சொல்ல வேண்டாததையெல்லாம் சொல்லிவிட்டார் அந்த கிராபிக்ஸ் இயக்குநர்.. அவருக்கு எனது நன்றி..!

கமல்ஹாசனின் ஜிகாதி கேரக்டரும் சில சமயங்களில் காமெடியாக இருக்கிறது.. காஷ்மீரி முஸ்லீம்.. அவருடைய அப்பா ஒரு ஜிகாதி.. அவர் வழியில் இவரும் களத்தில் இறங்குகிறார்.. அல்கொய்தாவுக்கு டிரெயினிங் கொடுக்க வந்திருக்கிறார்.. என்றெல்லாம் கமலின் கேரக்டரை விஸ்வரூபமாக்கினாலும், அவரே ஏதும் தெரியாதவராகத்தான் அங்கே வருகிறார்..! 

முல்லாவின் மனைவியை பரிசோதிக்க வரும் மருத்துவரை முல்லா ஓமர் வெளியே போகச் சொல்லும்போது கமல் காட்டும் முக பாவனை ஐயோ பாவம் என்கிறது..! முல்லாவின் மனைவியை புகைப்படம் எடுக்க கமல் செய்யும் முனைப்புகளும், இதை முல்லா பார்த்த பின்பு அவர் மகனை காப்பாற்றுவதுபோலான கமலின் நடிப்பும் அவர் உண்மையிலேயே ஜிகாதிதானா என்கிற சந்தேகத்தை இப்படத்தை அல்ஜஸீரா டிவியில் போட்டுக் காட்டித்தான் தெரிந்து கொள்ள வேண்டுமா..?

முல்லா அனுப்பும் தற்கொலைப் படை வீரன் எதற்காக செல்கிறான் என்பதையும் தெரிந்து கொள்ளாதவராக கமல் இருக்கிறார்..! காட்டிக் கொடுத்தவரை தாலிபான் படைகள் தூக்கலிடும்போது தனது கூட்டாளியின் மரணத்தை எதிர்நோக்க முடியாமல் தவிக்கிறார். அந்த அப்பாவி தாயார், “உன் சகோதரனின் நிலைமையை பார்த்தாயா.?” என்ற கமலை பார்த்து கேட்கும் கேள்வியைக் கேட்டவுடன் தமிழ்ச் சினிமாவின் பார்மாலிட்டிக்காக சோகத்தைக் கவ்விக் கொண்டு ஓடி ஒளிகிறார் கமல்.. எதிரில் வரும் முல்லாவின் கேள்விக்கு பரிதாபமான முகத்தையே பதிலாகத் தருகிறார்.. இதெல்லாம் எதுக்கு..?

ஆப்கனில் தற்போதைய நிலைமையில் ஊர், ஊருக்கு எந்தந்த வீடுகளில் யார், யார் இருக்கிறார்கள் என்பதையெல்லாம் ஆப்கன் அரசுகளைவிடவும் நேட்டோ படையினர்தான் முழுமையாகத் தெரிந்து வைத்திருப்பதாக ஆப்கன் அரசே சொல்கிறது..! அதையும் மீறி தற்கொலைப் படையினருக்கு வெடிமருந்துகள் வரும் வழி எது என்பதைத்தான் நேட்டோ படையினர் வலைவீசித் தேடி வருகிறார்கள். அவைகளெல்லாம் பாகிஸ்தானில் இருந்து.. அதன் உளவுத் துறை மூலமாக வருகிறது என்பது உலகத்துக்கே தெரிந்தாலும், பூகோள ரீதியாக ஆப்கனுடன் இணைந்திருக்கும் பாகிஸ்தானின் அனைத்து வழிகளையும் அடைத்து வைத்து தாலிபான்களை தனிமைப்படுத்த இப்போதுகூட நேட்டோவாலும், அமெரிக்கவாலும் முடியவில்லை..! நிலைமை அங்கே அப்படி இருக்க… முல்லா மாதிரியான தீவிரவாதிகள் சர்வசாதரணமாக விவசாயி ஒருவரின் வீட்டில் நடக்கும் விருந்தில் கலந்து கொள்வது போலவும், அவர் அபினை கமலுக்கு பரிசளிக்க முன் வருவதும்.. அதை கமல் தனது ஆள் மூலமாக மாற்றுவதுமான காட்சிகளெல்லாம் சுத்த ஜல்லிதான்.

கமலையும் அழைத்துக் கொண்டு பின்லேடனை பார்க்கப் போகும் காட்சியும், அங்கே ஆப்கன் அரசுகளைச் சேர்ந்தவர்களே அவரைப் பார்க்க வருவதாகவும் காட்டிவிட்டு, அவரை பார்த்தபடியே கமல் வெளியேறுவது போலவும் வைத்து பின்லேடனை கமலின் ஆதர்ச நாயகனாக சித்தரிக்கும் வேலையைச் செய்திருக்கிறார்கள்..! இது போன்ற சிற்சில இடங்களில் கூர்ந்து கவனித்தால் கமலின் தனது கேரக்டரின் பில்டப்புகள் வேறு யாருக்கும் கிடைக்காத அளவுக்குக் கொடுத்திருப்பது தெரிகிறது..!

தன்னுடைய பாத்திரப் படைப்பை தனக்குக் கிடைத்திருக்கும் அட்சயப் பாத்திரமாக பாவித்திருக்கும் கமல், மற்றவர்களின் கேரக்டர் ஸ்கெட்ச்சில் செய்திருக்கும் வண்டி, வண்டியான ஓட்டைகள்தான் இப்படத்தை ரொம்பவும் சிலாகிக்க முடியாமல் செய்கிறது..! இப்படத்தில் மிகவும் வீணடிக்கப்பட்டிருப்பவர் நாசர்தான்..! கமல் எப்போதும் தன்னுடைய படங்களில்  நாசருக்கு நல்ல கேரக்டர்கள் கொடுத்து மகிழ்விப்பார். இதில் நாசருக்குக் கிடைத்திருப்பது வெறும் ஜூனியர் ஆர்ட்டிஸ்ட் கேரக்டர்தான்..! 

முல்லா ஓமராக நடித்திருக்கும் ராகுல்போஸ் அமெரிக்காவில் இருந்து நடத்தும் புனிதப்போர் ஒப்பனைகளெல்லாம் ரொம்பவே ஓவர்.. நமது தமிழ் ரசிகர்கள் எதைக் கொடுத்தாலும் எப்படி கொடுத்தாலும் கொடுப்பது கமல்ஹாசன் என்றவுடனயே தாராளமாக ஏற்றுக் கொள்வார்கள் என்று அவர் நினைத்துவிட்டார்..! அவருடைய ஒரு கண் குறைபாடு.. எந்தவிதத்தில்  யார் மீது பரிதாபத்தை ஏற்படுத்துகிறது என்று கமலே சொன்னால் தேவலை..!

தாலிபான்களை அடையாளம் காட்டும் தமிழ்ப் படமாக இது வெளிவந்திருக்கும் சூழலில், இதைத் தடை செய்ய கூப்பாடுபோட்டு தங்களுடைய ஒட்டு மொத்த பெயரையும் கெடுத்துக் கொண்டார்கள் தமிழக முஸ்லீம்கள்.. இஸ்லாமிய பெருமக்களில் யாரோ ஒரு சில தீவிரவாத கூட்டத்தினர் செய்வதற்கு அனைவருமே பொறுப்பேற்க மாட்டார்கள். ஆனால் உண்மையில் இப்படத்திற்கு எதிர்ப்புக் குரல் கொடுத்திருக்க வேண்டுமெனில் அதனை பிராமண சமூகத்தினர்தான் செய்திருக்க வேண்டும்..!

தமிழ்ச் சினிமாவில் மிக அதிகமாகக் கேவலப்படுத்தப்பட்ட, படும் ஜாதியினர் பிராமணர்கள்தான்..! அதே ஜாதியில் பிறந்த கமல், தன்னுடைய திறமையாலேயே உயர்ந்ததாக இப்போதுவரையிலும் சொல்லிக் கொள்கிறார்..! ஆனால் அந்த பிறவித் திறமையை உள்ளடக்கிய அவருடைய ஜீன், பிராமண வாசம் கொண்டதுதான் என்பதை மட்டும் ஒப்புக் கொள்ளவே மறுக்கிறார்..! 

கேலி, கிண்டல் செய்வதற்கு பிராமணர்களை மட்டுமே குத்தகைக்கு எடுத்திருக்கும் தமிழ்ச் சினிமாக்காரர்கள் மாமிகளை மட்டுமே கிண்டல் செய்வார்களே தவிர, ஒரு போதும் உசிலம்பட்டி மதினிமார்களை ‘டச்’ செய்யவே  மாட்டார்கள். காதலுக்கும், மாமாக்களை தயிர் சாதம் என்பார்கள்.. ஆனால் இவர்கள் தாங்கள் மட்டுமே ஹீரோக்கள் என்பார்கள்..! இதில் இடம் பெற்றுள்ள ‘பாப்பாத்தி’ என்ற வசனம் முற்றிலும் தேவையில்லாதது..!  பொருத்தமில்லாதது..!

கமலுக்கு மாறுவேடம் போட வேறு ஜாதியினரே கிடைக்கவில்லை போலும்.. பூஜாகுமார் பிராமணாள் என்பதால் தானும் பிராமணனாகி வேஷம் போட வேண்டியதாகிவிட்டது என்று கமல் சொல்லலாம்.. கதாசிரியர், இயக்குநர் என்ற முறையில் அவரின் உரிமைதான் இது..! அதில் ஆண்ட்ரியாவையும் பிராமணப் பெண்ணாகக் காண்பித்து ‘பாப்பாத்தி’ என்று அழைத்து சிக்கனை ருசித்துப் பார்க்கும்படி சொல்லி அந்தக் காட்சியின் மூலமாக மனைவி மீது தான் வைத்திருக்கும் அன்பை வெளிக்காட்டுகிறாராம்..!

இடையிடையே பிராமண துவேஷம், தனது நாத்திகக் கொள்கை.. வெளிப்படையான பேச்சாக பூஜாவிடம், “பிராவுக்குக் கீழே வைச்சுக்க..” என்று போகிறபோக்கில் ஏதோ தண்ணியெடுத்துட்டு வா என்பதுபோல சொல்கிறார் கமல்.. இதாவது பரவாயில்லை.. கமல்ஹாசனின் மாமாவாக ஆக்ட் கொடுத்திருக்கும் சேகர் கபூரும், பூஜாவிடம் இதையேதான் திருப்பிச் சொல்கிறார்.. இதில் என்ன சினிமாத்தனம் இருக்கிறது..? 

தனது கடவுள் மறுப்புக் கொள்கையை கிடைக்கும் இடங்களிலெல்லாம் திணித்து வரும் கமல்ஹாசன் இதிலும் அப்படியே.. “எந்தக் கடவுள்..?” என்று சீனுக்கு தேவையில்லாத வசனத்தைக் கேட்டுவிட்டு அடுத்து தொடர்ந்து பூஜாவின் அலுவலகத்துக்குள் நுழைவது. பூஜாவை எஃப்.பி.ஐ. விசாரிக்கையில் தனது பிள்ளையாரை மனதில் வைத்து பேசுவது.. “கடலுக்குள் மூழ்கடிப்போம்..” என்று சொல்வது மூலம் பூஜாவின் கேரக்டரையும் ஒரு சின்னப்புள்ளத்தனமாகக் காட்டியிருக்கிறார்கள். கதை இந்த இடத்தில் மிக சீரியஸாக இருக்கிறது.. புறாக்கள் மூலமாக அமெரிக்காவுக்குள் சீசியத்தை கொண்டு வருகிறார்கள்  என்கிற கதையும், அதன் சூத்திரதாரி இன்னமும் அமெரிக்காவுக்குள்தான் இருக்கிறான்.. அவனைப் பிடிக்க வேண்டும் என்கிற வேகமும் இருக்க வேண்டிய இடத்தில் இது போன்ற தேவையற்ற வசனங்கள் மூலமாக நம்மை வெளியில் தள்ளி, பின்பு மீண்டும் கதைக்குள் நம்மை இழுத்து, பின்பு மீண்டும் வெளியில் தள்ளுவதுமாக வசனங்கள் மூலமாகவே பாதியிடங்களில் நாம் அல்லல்படுகிறோம்..! 

பூஜாகுமார் சிறப்பாகவே நடித்திருக்கிறார். சில டைட் குளோஸப் ஷாட்டுகளில் அழகு மிளிர்கிறது.. ஆண்ட்ரியாவைவிடவும்..! தனது முதல் படத்துக்கு பின்பு இப்படி தமிழ்ச் சினிமாவைவிட்டு வெளியேறியிருக்க வேண்டாம்.. இவருடனான காதல் காட்சிகள், கட்டில் காட்சிகள் கொண்ட பாடல்களை தூக்கிவிட்டுத்தான் சென்சார் சர்டிபிகேட் கொடுத்திருக்கிறார்கள். அந்தப் பாடல் காட்சி நிச்சயமாக இரண்டாம் பாகத்தில் வரும் என்று நான் உறுதியாக நம்புகிறேன். டிரெயிலரில்கூட வருகிறது.. அவருடைய ரசிகர்களின் பெரும் ஏமாற்றம் இதுதான்.. ஒண்ணுக்கு, ரெண்டு ஹீரோயின்ஸ் இருந்தும் நமக்கு ஒண்ணுமில்லையே என்பதுதான்..!

மிகச் சிறப்பான விஷயம் ஒளிப்பதிவும், ஒலிப்பதிவும்தான்..! புதிய ஆரோ 3டி-யில் படம் பார்க்கும்போது மிக அசத்தலாக இருக்கிறது என்கிறார்கள் பார்வையாளர்கள்..! இதுதான் இப்படம் பற்றி இப்போதைக்கு பரவியிருக்கும் ஹாட் டாபிக்.. ஆரோவில் படம் பார்க்காதவர்கள் மீண்டும் ஒரு முறை அந்தத் தியேட்டருக்கு சென்று பாருங்கள்.. நிச்சயம் படம் பிடிக்கும் என்கிறார்கள் ரசிகர்கள். அந்த அளவுக்கு கதையையும் தாண்டி ஒரு விட்டலாச்சார்யாவின் மந்திர வேலையை இந்தத் தொழில் நுட்பம் செய்திருக்கிறது..!

எதிர்ப்புகள்.. சலசலப்புகள்.. கமலின் கண் கலங்கல்.. வேறு நாடு போகிறேன் என்ற ஆவேசம்.. ஜெயலலிதாவின் குள்ளநரித்தனம்.. அரசியல் கட்சிகளின் ஆதரவு, எதிர்ப்புகள்.. ஊடகங்களின் அளவுக்கதிகமான பப்ளிசிட்டி - இத்தனையும் ஏற்படுத்திய தாக்கத்தினால் படத்தின் வசூல் இன்றைய நிலைமையில் 100 கோடியைத் தாண்டிவிட்டது என்று கமல்ஹாசனே சொல்லிவிட்டார். ஆகவே, அவர் இனிமேல் இந்த நாட்டைவிட்டு போக வேண்டிய அவசியமோ, தனது வீட்டை விற்க வேண்டிய தேவையோ இருக்காது என்று நினைக்கிறேன்..!

இந்த அளவுக்கு அவர் மீது நம்பிக்கையும், பாசமும், அன்பும் வைத்திருக்கும் ரசிகர்களிடத்தில் தான் 2-ம் பாகத்தையும் எடுத்து வைத்திருக்கிறேன் என்கிற உண்மையையும் அவர் சொல்லியிருந்தால் நன்றாகவே இருந்திருக்கும். முல்லா ஓமரை ஆப்கனில் போய் சந்தித்து அங்கேயே அவரை அழிப்பது என்ற அந்த 2-ம் பாகம் இன்னும் என்னென்ன எதிர்ப்புகளை சம்பாதிக்கப் போகிறதோ தெரியவில்லை.. இதையே ஒரு பாடமாக எடுத்துக் கொண்டு அந்த 2-ம் பாகத்தை சென்சார் போர்டுகாரர்கள் கண்ணில் விளக்கெண்ணெய் போட்டு பார்ப்பார்கள் என்றே கருதுகிறேன்..!

சென்சார் போர்டு என்றவுடன் இன்னொரு விஷயமும் நியாபகத்திற்கு வருகிறது..! இந்தப் படத்தில் தாலிபான்கள் பயிற்சியெடுக்கும் காட்சியில் ஜார்ஜ் புஷ்ஷின் முக வரைபடத்தை வைத்து அதனை துப்பாக்கியால் சல்லடையாகத் துளைத்தெடுக்கிறார்கள்.. இந்த அளவுக்கு தாலிபான்களுக்கு அவர் மீது கோபமிருக்க நியாயமுண்டு.. ஆப்கனின் தற்போதைய சீரழிவுக்கும் மிக முக்கிய காரணம் ஜார்ஜ் புஷ்தான் என்பதில் சந்தேகமேயில்லை..!

என்னுடைய ஆச்சரியம் என்னவென்றால்.. சென்சார் போர்டின் இந்த ஓர வஞ்சனையை நினைத்துத்தான்..! கருணாநிதி, ஜெயலலிதா, ராம்தாஸ், ஸ்டாலின், வைகோ, அழகிரி போன்று கட்சித் தலைவர்களின் பெயர்களைக்கூட ஒரு தமிழ்ச் சினிமாவின் கேரக்டர்களின் பெயர்களுக்கு சூட்டக் கூடி முடியாத அளவுக்கு தமிழகத்தில் ஜனநாயகம் வாழுகிறது.. இந்தச் சூழலில் அமெரிக்காவில் 2 முறை ஜனாதிபதியாக இருந்தவரை துப்பாக்கியால் சுட்டுக் கொல்லும் நம்பிக்கை கொண்ட காட்சிக்கு பெர்மிஷன் கொடுத்திருக்கிறார்களே என்றால் இவர்களது சென்சார்ஷிப்பை என்னவென்று சொல்ல..!? ஜார்ஜ் புஷ்ஷுக்கென்று ஆதரவாளர்கள் யாரும் இங்கே இல்லை என்பதாலா..?

எனக்கும் ஒரேயொரு கேள்விதான் : 

இது போன்று தமிழக, இந்தியத் தலைவர்களின் போஸ்டர்களையும் தமிழ்ச் சினிமாவில் பயன்படுத்த சென்சார்போர்டு அனுமதி தருமா..? நாளைய பொழுதுகளில் வாச்சாத்தி கொடுமை, வீரப்பன் தேடுதல் வேட்டையில் போலீஸாரால் அப்பாவி மலைவாசிப் பெண்கள் கற்பழிக்கப்பட்டது, கருணாநிதி நள்ளிரவில் கைது செய்யப்பட்ட சம்பவம்.. கோவை வேளாண்மை கல்லூரி மாணவிகள் வந்த பேருந்து எரிப்பு. ஜெயல்லிதாவின் ஊழல் வழக்குகள், கும்பகோணம் மகாமக பரிதாபம்.. போன்றவைகளை படமாக்கினால் ஜெயலலிதா படத்தையும்.. தாமிரபரணி ஆற்றங்கரையில் நடந்த தடியடி, அண்ணாமலை பல்கலைக்கழக மாணவர் உதயகுமாரின் கதை, ஸ்பெக்ட்ரம் ஊழல்,  மதுரையில் தினகரன் பத்திரிகை அலுவலகம் எரிக்கப்பட்ட சம்பவம், அழகிரி-ஸ்டாலின் மோதலால் மதுரையில் நடைபெற்ற பஸ் எரிப்புச் சம்பவங்கள்.. போன்றவைகளை படமாக்கும்போது கருணாநிதி படத்தையும்.. தமிழ் ஈழப் விடுதலைப் போராட்டம் பற்றிய படங்களில் சோனியா, ராகுல், மன்மோகன்சிங், பிரணாப் முகர்ஜி படங்களையும்.. இன்னும் பல்வேறு விஷயங்களுக்காக பல தலைவர்களையும் இதுபோல் கேரக்டர்களாக்கி சல்லடையாக்கலாம்..! அத்தனை கொடுமைகள் இங்கே நடந்திருக்கிறது.. ஜார்ஜ் புஷ்ஷை துளைத்தெடுத்த துப்பாக்கி ரவைகள் இவர்களின் புகைப்படங்களையும் நிச்சயமாக துளைக்கலாம்..! அதற்கான முழுத் தகுதியும் அந்தக் கதைகளுக்கு உண்டு..! சென்சார் போர்டுகாரர்கள் அப்போது இதேபோல் அனுமதி தருவார்களா..? யாராச்சும் கேட்டுச் சொல்லுங்கப்பா..!

Tweet

விஸ்வரூபமான விஸ்வரூபம்..!

31-01-2013

என் இனிய வலைத்தமிழ் மக்களே..!

"யார், யாருக்கோ சாவு வருது..!!!" - குறிச்சு வைச்சுக்குங்க.. யாருக்குன்னு கடைசியா சொல்றேன்..!

ஜனநாயக ரீதியில் தனக்கு ஆட்சி நடத்தவே தெரியாது என்பதை மீண்டும் ஒரு முறை நிரூபித்திருக்கிறார் ஜெயலலிதா.! இவரது பாஸிஸ, அராஜக அரசியலை எதிர்த்தும், இஸ்லாமிய அமைப்புகள் என்று சொல்லிக் கொள்ளும் சில ரவுடிக் கும்பல்களையும் எதிர்த்து இப்போதுவரையிலும் சட்டத்தின் துணை கொண்டு மட்டுமே போராடி வரும் கமல்ஹாசன் என்னும் பிரியத்துக்குரிய கலைஞனுக்கு எனது சல்யூட்..!

அரசியல் வஞ்சத்தை அரங்கத்தில் நேரிடையாக நிறைவேற்றுவதில் ஜெயலலிதாவுக்கு நிகர் அவரேதான்..! வலம்புரி ஜான் என்னும் மதிப்புமிக்க எழுத்தாளரை அவமரியாதை செய்ய வேண்டி, அவர் பெற்ற மகள்கள் மூலமாகவே அவர் மீது கற்பழிப்பு வழக்கை பதிவு செய்ய வைத்த உத்தமத் தலைவி இவரே என்பதால் இது மாதிரியான அரசியல் அதிகாரத் திமிரில் ஆடுவது இவருக்கு ஒன்றும் புதிதல்ல..!

ஆனால் இப்போது இவர் எடுத்திருக்கும் ஆட்டம்தான் கொஞ்சம் புதுசு. ஒரு பக்கம் தனது தலை மீது தொங்கிக் கொண்டிருக்கும் சொத்துக் குவிப்பு வழக்கு.. அதில் இருந்து தப்பிக்க வேண்டி தனது அனைத்து சக்தியையும் ஒருமனதோடு செலுத்திக் கொண்டிருக்கும் ஆத்தாவுக்கு கூடுதலாக கிடைத்துள்ள இணைப்பு வசதி வரும் பொதுத் தேர்தல்தான்..!

இதில் 40-க்கு 35 தொகுதிகளையாவது முழுமையாகப் பெற்றுவிட்டு, இதன் மூலம் மத்தியில் தனது ஆதரவில்லாமல் புதிய பிரதமர் உருவாக முடியாது என்னும் சூழலை ஏற்படுத்தி, அதன் மூலம் ஒருவேளை தானே பிரதமராகலாம்.. அல்லது பெங்களூர் கோர்ட் சிக்கல்களை உடைத்தெறியும் அளவுக்கு நட்பான ஒருவரை கொண்டு வர செய்யும் உத்தியை துழாவிக் கொண்டிருக்கிறார் ஜெயலலிதா..! இதற்கு இப்போதைக்கு அவருக்குத் தேவை ஒட்டு மொத்த தமிழகத்தின் ஆதரவு.. ஏற்கெனவே மின்வெட்டு பிரச்சினையில் மக்கள் ஆதரவு அதோ கதியாக அந்தரத்தில் இருக்க.. போதாக்குறைக்கு காவிரி நீர் பிரச்சனையில் கர்நாடகமும், காங்கிரஸும் செய்யும் தில்லாலங்கடி வேலையினால் விவசாயிகளின் வாயில் தினமும் வெந்து போகும் வெந்தயமாக தான் இருப்பதும் ஆத்தாவுக்கு தெரிந்துதான் இருக்கிறது..! ஒவ்வொரு தொகுதியிலும் தி.மு.க., அ.தி.மு.க. ஓட்டு வித்தியாசத்தை கூட்டியோ, குறைத்தோ வெற்றி தோல்விக்கு வழி வகுப்பது சிறுபான்மையினரான இஸ்லாமிய பெருமக்கள் என்பதை தாத்தாவும், ஆத்தாவும் அறிந்துதான் வைத்திருக்கிறார்கள்..!

இவர்களது ஆதரவை ஒட்டு மொத்தமாக கைப்பற்ற என்ன வழி என்று யோசனையில் தானாகவே வந்து சிக்கியிருக்கிறது விஸ்வரூபம். கூடவே ஜெயல்லிதாவின் இயல்பான கோபம், ஆவேசம், பழி வாங்கும் உணர்வுகளுக்கு ஏற்ப  சேனல் ரைட்ஸ் விவகாரம் வேறு வெடித்து திசை திரும்பி விஜய் டிவிக்கு போய்விட.. இந்தக் கோபமும் ஒன்று சேர்ந்து இப்போது ஆத்தாவின் நேரடி உத்தரவில்.. அவரது கண் அசைவில்தான் கமல்ஹாசன் என்னும் கலைஞன் போராடிக் கொண்டிருக்கிறார்..!

கடந்த நவம்பர் 7-ம் தேதியன்று சத்யம் தியேட்டரில் தனது விஸ்வரூபத்தை பதிவு செய்திருக்கும் புதிய தொழில் நுட்ப முறையான ஆரோ 3-டி முறையைப் பற்றி பத்திரிகையாளர்களுக்கு விளக்கிச் சொல்லிவிட்டு அவசரம், அவசரமாக கோட்டைக்கு ஓடோடிச் சென்று ஆத்தாவின் முன்பு பவ்யமாக உட்கார்ந்து எழுந்த வந்த கமலை நினைக்கும்போது அன்றைக்கு ஆச்சரியமாகத்தான் இருந்தது..! அவர் எப்போதும் வருடாவருடம் சந்திக்கும் கருணாநிதியைக் கூட அன்றைக்கு அவர் சந்திக்கவில்லை..! 

ஜெயா டிவியுடன் சேனல் ரைட்ஸுக்காக ஒப்பந்தம் போட்டு முடித்து கையெழுத்தாகும் முன்பேயே டிடிஹெச் அறிவிப்பை கமல் வெளியிட்டபோது அவர்களும்தான் சற்று சங்கடப்பட்டார்கள். ஆனாலும் மூன்று நகரங்களில் நடந்த பாடல் வெளியீட்டு நிகழ்ச்சிக்கு வேண்டிய அனைத்து செலவுகளையும் செய்து அதனை தங்களது தொலைக்காட்சியில் வெளியிடவும் செய்தார்கள். பின்பு எப்போது பிரச்சினை துவங்கியது..?

சின்னப் பயல் சிதம்பரத்தை ஆத்தாவுக்கு எப்போதுமே பிடிக்காதுதான்.. இருவருக்குமே நன்கு படித்தவர்கள் என்ற திமிரும்.. இயல்பான ஈகோவும் இன்றுவரையில் இருக்கத்தான் செய்கிறது.. ஒரு விழாவுக்கு அழைத்தால் போனோம்.. வந்தோம் என்றெல்லாம் இல்லாமல் ரஜினியை போலவே அன்றைக்கு ரொம்பவே சிதம்பரத்திற்கு ஜோஸியம் பார்த்துவிட்டார் கமல்.. அரங்கம் நிரம்பி வழிந்து தரையில் உட்காரக்கூட இடமில்லாத நிலையில் இருந்த, அந்தக் கூட்டத்தைப் பார்த்து வார்த்தைகள் ஸ்லிப்பானதுபோல் கமல் பேசிய பேச்சுக்கள்தான் அதன் பின்னான இன்றுவரையிலான தரங்கெட்ட சூழலுக்கு காரணம் என்று யூகிக்கவும் முடிகிறது..!

விஸ்வரூபம் பற்றிய சர்ச்சைகள் பெரிதும் வந்து கொண்டிருந்த நேரத்தில், டிடிஹெச் சமயத்திலேயே இந்த முஸ்லீம் பிரச்சனையும் எழுப்பப்பட்டது..! ஆனால் “படத்தில் ஒன்றுமே இல்லை.. படம் பார்த்த பின்பு குற்றம் சொல்பவர்கள் அண்டா அண்டாவாக பிரியாணிதான் சாப்பிட வேண்டி வரும்..” என்றுதான் கமல் சொல்லியிருந்தார்.  அரசின் நடவடிக்கைகள் நியாயமாக, நடுநிலையாக இருக்கும் அவர் அப்போது பெரிதும் நம்பியிருந்தார்..!

அந்த நம்பிக்கையில் மண்ணையள்ளிப் போட்டு, தான் போட்டுக் கொடுத்த ஸ்கெட்ச்படி இன்றைக்கு விஸ்வரூபத்தை தமிழ்நாட்டில் திரையிட விட மாட்டேன் என்ற சபதத்தையும், வேட்டி கட்டிய தமிழன் பிரதமராக வர வேண்டும் என்றவரை புரட்சித் தலைவிக்கு நன்றி என்றும் சொல்ல வைப்பேன் என்ற ஆணவச் செருக்கில் இன்றைக்கு தனது அராஜகத்தைத் தொடர்ந்து நடத்திக் கொண்டேயிருக்கிறார் ஆத்தா..!

தொடர்ந்து இவைகளையே பேசுவதற்கும், எழுதுவதற்கும், படிப்பதற்கும் எரிச்சலாகத்தான் உள்ளது. ஆனால் பேசாமலும், எழுதாமலும் இருக்கத்தான் முடியவில்லை. ஆனால் பாதிக்கப்பட்டிருப்பவர் நான் பிறந்து வளர்ந்த காலத்தில் இருந்தே என்னை மகிழ்வித்தவர்.. என் கூடவே பயணப்பட்டவர்.. என் துக்கத்தில் பங்கு கொண்டவர்.. என்னை பண்படுத்தியவர்.. எனக்குச் சிலவற்றைச் சொல்லிக் கொடுத்தவர்.. என்றெல்லாம் பல முகங்களைக் கொண்ட ஒரு நல்ல கலைஞனாக இருப்பதினால் என்னுடைய இயலாமை.. அவருக்கு ஏதாவது உதவி செய்ய வேண்டுமே என்ற ஆதங்கமே மீண்டும், மீண்டும் இது பற்றி எழுத வைக்கிறது..!

முஸ்லீம் அமைப்பினர் சொல்லும் தங்கள் மனம் புண்பட்டிருக்கிறது என்பதையே என்னால் ஏற்றுக் கொள்ள முடியவில்லை. கதை நடப்பது ஆப்கானிஸ்தானில்.. அங்கே இருப்பவர்கள் முஸ்லீம்கள்.. தாலிபான்கள் தீவிர முஸ்லீம்கள்.. இஸ்லாத்தை பரப்புபவர்கள்..! இவர்களைக் காட்டும்போது அவர்கள் குரான் படிப்பது போலவும், அதற்குப் பிறகு போர்க்களத்தில் பணியாற்றுவது போலவும் காட்டத்தான் வேண்டும். எவ்வளவு போர்க் காலத்திலும் ஐந்து வேளை தொழுகையை அவர்கள் கைவிட்டதில்லை என்று பல இடங்களில் படித்திருக்கிறேன்.. இதில் தொழுகையை காட்டுகிறார்கள்.. குரானை காட்டுகிறார்கள்.. அப்புறம் துப்பாக்கியையும் காட்டுகிறார்கள்.. சுடுவதையும் காட்டுகிறார்கள் என்று சின்னத்தனமாக ஒப்பாரி வைப்பது எந்த விதத்திலும் ஏற்புடையதல்ல..!

இந்திய இஸ்லாமியர்களைப் பற்றி படத்தில் எதையும் அவர் குறிப்பிடவில்லை என்று படம் பார்த்தவர்கள் சொல்லிவிட்டார்கள்.. ஆப்கான் தாலிபான்களை பற்றி கூறினால், படமெடுத்தால், இங்கே உள்ளவர்களுக்கு ஏன் வலிக்கிறது என்றுதான் தெரியவில்லை. அமைதியே உருவான புத்தரின் அந்த மகா வடிவத்தை.. அற்புதமான கலைச் சிற்பத்தையே தங்களது மார்க்கத்துக்கு எதிரானது என்று சொல்லி குண்டு வைத்து இடித்த இந்த உத்தமர்களை விமர்சிக்கக் கூடாது என்றால் இது சிரிப்பாக இல்லை..?

பகவத்கீதை, குரான், பைபிள் - இந்த மூன்றுமே படிப்பதற்காக மட்டுமே இருப்பவை.. இவற்றை வைத்துக் கொண்டு வேறு என்ன செய்வது..? தலகாணிக்கு பதிலாக பயன்படுத்திக் கொள்ளலாம்..! இதில் இருக்கும் கதைகளை படித்துவிட்டு இது மாதிரி நம்மால இருக்க முடியாது.. ஆனால் இருக்கணும் என்று நினைக்கலாம்..! ஆனால் இதையே உயிரைவிட பெரிசாக நினைப்பதெல்லாம் அவரவர் நிலைப்பாடு.. விருப்பம்.. இதனை அவரவர்கள் தங்களது வீட்டிற்குள் மட்டுமே வைத்துக் கொள்ள வேண்டும்.. தெருவுக்கு வந்துவிட்டால் பக்கத்து வீட்டில் வேறொரு இந்தியன் இருக்கிறான் என்பதை புரிந்து கொண்டு தனது விருப்பத்தை ஓரங்கட்டுவதுதான் சிறந்த மதச் சார்பின்மை..!

குண்டு வைக்கும்போது குரானை காட்டுகிறார்கள்.. முஸ்லீம்களை காட்டுகிறார்கள். இதனாலேயே முஸ்லீம்கள் என்றாலே தீவிரவாதிகள் என்ற பொருளாகிவிடுகிறது என்கிறார்கள்..! நானே இதனைப் பற்றி பல முறை, பல சினிமா விமர்சனங்களில் குறிப்பிட்டுச் சொல்லியிருக்கிறேன். ஆனால் இந்தப் படத்தில் அதனைக் குறிப்பிட முடியாமைக்குக் காரணம் கதையின் களன்தான்..! ஏன் முஸ்லீம்களில் திருடர்கள், கொள்ளைக்காரர்கள், கற்பழித்தவர்கள்,  கொலைகாரர்கள் யாருமே இல்லையா..? அனைவருமே ஒழுக்கமாகத்தான் வாழ்கிறார்களா என்ன..? 

தமிழகத்து சிறைகளில் குண்டு வெடிப்பு கைதிகளைத் தவிர மற்ற பிரச்சினைகளிலும் முஸ்லீம்கள் கைதாகியிருக்கிறார்களே.. வாராவாரம் திருட்டு விசிடி பிரச்சினையில் கைதாகுபவர்களில் 99 சதவிகிதத்தினர், முஸ்லீம்களாத்தான் இருக்கிறார்கள்..!  ஒருவரைக் குறிப்பிட்டால், அந்த சமூகத்தையே சொல்வது போலாகிவிடுமா..? அப்படிப் பார்த்தால் இதுவரையில் வந்த எத்தனையோ தமிழ்த் திரைப்படங்களில் கற்பழிக்கும் காட்சிகளில் நடித்தவர்களில் 99 சதவிகிதத்தினர் இந்து பெயர்கள் கொண்ட வில்லன்களே.. அப்படியனால் அனைத்து இந்துக்களும் கற்பழிக்கும் ஆசை கொண்ட வெறியர்கள் என்று எடுத்துக் கொள்ளலாமா..? 

இது சினிமா.. இரண்டரை மணி நேர ஒரு மாயாஜாலத்தை.. ஒரு கற்பனைக் கதையை.. ஒரு இயக்குநர் தனது படைப்புத் திறமையினால் நடந்தது போல் கொண்டு வந்து காட்டுகிறார்..! நிஜத்தில் நடக்காததை..  அல்லது நடந்ததை.. நாம் உணராததை.. நம் கண் முன்னே காட்டுவதற்குப் பெயர்தானே படைப்பு.. அவன்தானே படைப்பாளி.. இவனை இந்தக் கதையைத்தான் படமாக்க வேண்டும்.. அந்தக் கதையை இப்படி எடுக்கக் கூடாது என்றெல்லாம் தடுப்பது இந்திய அரசியலமைப்புச் சட்டம் அவனுக்குக் கொடுத்திருக்கும் கருத்துரிமை, பேச்சுரிமையை தடை செய்வது போலாகாதா..?

ஒருவரின் கருத்து மற்றவருக்கு கேலியாக இருக்கலாம்.. இன்னொருவருக்கு முட்டாள்தனமாக இருக்கலாம்.. அது அவரவர் விருப்பம்.. இதில் தனி மனித தலையீடு இருக்கவே கூடாது..! மேலே சொன்னபடி குரானை என்னிடம் கொடுத்தால் நான் தலைக்கு வந்து தூங்குவேன்.. கீதைக்கும் இதே கதிதான்.. ஆனால் ஒரு சிலர் அதனை அட்டை டூ அட்டை படிப்பார்கள்.. சிலர் அதனை பரப்புரையே செய்வார்கள்.. ஆனால் அவர்கள் செய்வதுதான் சரி..? நானும் அதைத்தான் செய்ய வேண்டும் என்று எதிர்பார்த்தால் எப்படி..?

இதுவரையிலும் வந்த எத்தனையோ சினிமாக்களில் இந்து கடவுள்களை கேலியாகவும், கிண்டலாகவும் செய்து எத்தனையோ காட்சிகள் வந்திருக்கின்றன.. யாரும் இது பற்றி கண்டு கொண்டதில்லை.. சில வேலை வெட்டியில்லாத இந்து அமைப்புகள் தலைதூக்கும்வரை..! மக்களுக்குத் தெரியும்.. இது கிண்டல்தான் என்று.. இப்படியெல்லாம் கிண்டல் செய்தால் முருகன் வேல் வைச்சு கண்ணைக் குத்துவான் என்றோ.. சிவன் சூலாயுதத்தைத் தூக்கிக் கொண்டு ஓடி வருவான் என்றோ அவர்கள் நினைப்பதில்லை.. இவ்வளவு ஏன்..? கடந்த சில ஆண்டுகளுக்கு முன்பு பட்டிதொட்டியெங்கும் ஓடிக் கொண்டிருந்த பிட்டு படங்களின் தயாரிப்பாளர்களில் பெரும்பாலோர் தங்களது பட நிறுவனத்திற்கு லஷ்மி மூவிஸ், முருகன் பிலிம்ஸ் என்ற ரீதியில் கடவுளர் பெயர்களைத்தான் வைத்திருந்தார்கள்..! தொழில் வேறு.. பக்தி வேறு என்பது அவர்களது அபிப்ராயம்.. இதனால்தான் இப்போதும் சென்னையில் மாநகராட்சியின் கக்கூஸ்களை ஏலத்தில் எடுத்தவர்கள்கூட கக்கூஸ் வாசலில் திருப்பதி பெருமாளின் படத்தை வைத்திருக்கிறார்கள்..

“ உங்களுக்கு சகிப்புத் தன்மை இருக்கு. எங்களுக்கு இல்லை. இஸ்லாமும், குரானும் எங்களுக்கு உயிர் போல..” என்னும் அன்பர்கள், அதனைத் தாங்கள் தங்களது வீடுகளுக்குள்ளேயே வைத்துக் கொள்ள வேண்டும். இதுதான் நியாயமும் கூட..! நாங்கள் யாரும் படம் பார்க்க வாருங்கள் என்று யார் கையையும் பிடித்திழுக்கவில்லை.. எப்போதும் போலவே ஒரு சராசரி சினிமா ரசிகன், இந்தப் படத்தைப் பார்த்துவிட்டு தியேட்டர் வாசலிலேயே பிடித்திருந்தால் பிடித்தது என்றும், இல்லையென்றால் உதட்டைப் பிதுக்கிவிட்டும் அடுத்த வேலையைப் பார்த்து போய்விடுவான்..!

இந்த ஒரு படத்தை பார்த்து முஸ்லீம்கள் அனைவரும் தீவிரவாதிகள் என்று நினைக்க இங்கே யாரும் முட்டாள்கள் இல்லை..! அப்படி நினைத்திருந்தால் இப்போதுபோல் முஸ்லீம் பெருமக்கள் தமிழகத்தில் இந்த அளவுக்கு நிம்மதியுடன் வாழ முடியுமா..? 

அரசியல்வியாதிகள் எங்கே புகுந்தாலும் அது உருப்படாது என்பதற்கு இந்த அமைப்புகளும் ஒரு உதாரணம்..! குரூப் குரூப்பாக பிரிந்து நிற்கும் தலைவர்கள்.. தங்களது சுய லாபத்துக்காக.. அடுத்தத் தேர்தலில்  தி.மு.க., அ.தி.மு.க. அணியில் சேர துடிக்கும் இஸ்லாமிய அமைப்புகள்.. எப்படியாவது கூட்டணி வைத்து எம்.எல்.ஏ.வாகிவிட வேண்டும்.. எம்.பி.யாகிவிட வேண்டும் என்று நினைக்கும் கொள்ளையர்கள்தான் இப்போது அப்பாவி முஸ்லீம்களை முன் வைத்து இந்தப் பிரச்சினையை இழுத்துச் செல்கிறார்கள்.! என்னதான் தலை, தலையாய் அடித்து கூப்பாடு போட்டாலும் ஆத்தாவைவிட்டால் தாத்தா.. தாத்தாவைவிட்டால் ஆத்தா என்றே தேர்வு செய்து வரும் பொதுமக்களில் ஒரு பிரிவினரான இஸ்லாமிய பெருமக்களில் ஒரு சிலரும் இவர்களுக்கு ஆதரவளிப்பது அவர்களது அறிவீனமே..!  

இவர்களது எதிர்ப்பை நான் தவறென்று சொல்லவில்லை. இவர்களது கருத்துரிமையும், பேச்சுரிமையும் கமலுக்கு உள்ளதுபோலவே இருக்கும்தான். ஆனால் அதனை இவர்கள் எவ்வாறு வெளிப்படுத்த வேண்டும்..? தியேட்டர்கள் முன் ஓரிடத்தில் அனுமதி பெற்று ஆர்ப்பாட்டம் செய்யலாம்.. உண்ணாவிரதம் இருக்கலாம்.. கோஷங்கள் எழுப்பலாம்.. “இந்தப் படத்தை நாங்கள் எதற்காக எதிர்க்கிறோம்.. புறக்கணிக்கிறோம்..” என்பதை பிட் நோட்டீஸாக அச்சடித்து படம் பார்க்க வரும் ரசிகர்களின் கைகளில் கொடுக்கலாம்.. இதுதான் ஜனநாயக ரீதியிலான ஒரு போராட்ட வழிமுறை..  இதனைவிட்டுவிட்டு “படத்தையே திரையிட விட மாட்டோம்.. உயிரைக் கொடுத்தாவது தடுப்போம்.. ரகளையில் ஈடுபடுவோம்.. தியேட்டர்களை அடித்து நொறுக்குவோம்..” என்றெல்லாம் செய்வது ரவுடித்தனம்..! இவர்கள் எந்த மதத்தவராக இருந்தாலும் இந்தச் செயல் ஏற்றுக் கொள்ளக் கூடியதல்ல.. விஸ்வரூபத்தில் இவர்கள் இதையே செய்திருக்கலாம்..!

கமல் இன்று முதலீடு செய்திருக்கும் 100 கோடி ரூபாய் அடுத்த வருடம் இதே தமிழ்ச் சினிமாவில் இறக்குமதி செய்யப்பட்டு பல்லாயிரம் பேருக்கு வேலை கிடைக்க வேண்டிய சூழலை ஏற்படுத்தும். 30 ஆயிரத்துக்கும் மேலான தொழிலாளர்களைக் கொண்டு, 1 லட்சத்திற்கும் மேலான சார்நிலை தொழிலாளர்களைக் கொண்ட தமிழ்ச் சினிமா துறையின் வளர்ச்சியை தடுத்து நிறுத்தும் ஒரு போராட்டத்தை இஸ்லாமிய அன்பர்களின் ஆதரவுடன் சில ரவுடிக் கும்பல்கள் இப்படிச் செய்ய நினைப்பது  ஏற்றுக் கொள்ளத்தக்கதல்ல..!

கமல்ஹாசனை தவிக்க விட வேண்டும் என்ற வெறியோடு இருக்கும் ஜெயலலிதாவின் அரசியல் சூழ்ச்சியில் இஸ்லாமிய அன்பர்களும்  சிக்கிக் கொண்டது அவர்களுக்கே தெரியவில்லைபோலும்.. இன்றுவரையிலும் சொன்னதையேதான் திருப்பித் திருப்பிச் சொல்லி வருகிறார்கள்.. இதுவரையிலும் நான் ஒரு இந்து என்று நினைப்பே வராமல் இருந்த எனக்கு, ஒரு கணத்தில் “இவுங்க மட்டும்தான் சாமி கும்பிடுறாங்களா..? இவங்களுக்கு மட்டும்தான் புத்தகம் இருக்கா..? இவங்களுக்கு மட்டும்தான் பாசம் இருக்கா..? நமக்கெல்லாம் மதம் இல்லையா..?” என்ற ரீதியில் யோசிக்க வைத்துவிட்டார்கள்..! இது என் ஒருவனுக்கு மட்டுமே வந்ததில்லை.. தமிழ்நாட்டில் பெருவாரியான சினிமா ரசிகர்களுக்கு வந்துவிட்டது.. இந்த முட்டாள்தனமான போராட்டத்தினால் இஸ்லாமிய இயக்கங்கள் சாதித்தது இதைத்தான் என்று உறுதியுடன் சொல்லலாம்..!

தன்னுடைய சொத்து முழுவதையும் பணயம் வைத்து ஹாலிவுட் படங்களுக்கு இணையான தொழில நுட்ப நேர்த்தியுடன் ஒரு கலைப்படைப்பை படைத்திருக்கும் கமல் என்னும் கலைஞனை வாழ்த்த உங்களுக்கு மனமில்லாமல் இருக்கலாம்.. அல்லது அது ஒரு கலைத்திறன் சார்ந்தது என்பதைப் புரிந்து கொள்ள முடியாத மூளையும் உங்களுக்கு இருக்கலாம்.. ஆனால் கமல்ஹாசன் என்ற மனிதனுக்கும் தனி கருத்துரிமை, பேச்சுரிமை, எழுத்துரிமை உண்டு என்பதையாவது சற்று சிந்தித்துப் பாருங்கள்..! உங்களது குரான் எப்படி மேம்பட்டது என்று சொல்ல உங்களுக்கு உரிமையுண்டோ, அதே அளவுக்கு அதனை நான் ஏற்றுக் கொள்ள மாட்டேன் என்று சொல்லவும் அவருக்கும் உரிமையுண்டு..!

நேற்று இரவில் உயர்நீதிமன்றத்தில் கிடைத்த தீர்ப்பை பார்த்துவிட்டு உடனுக்குடன் அதனை எதிர்த்து அப்பீல் செய்ய துடியாய் துடித்த இந்த அரசாங்கத்தின் தவிப்பைப் பார்த்தவுடன் “அடப்பாவிகளா..? எம்.ஜி.ஆர். என்ற இதயக்கனி உருவாக்கிய அ.தி.மு.க.வின் பெயரை வைத்துக் கொண்டு தமிழ்ச் சினிமாவை வீழ்ச்சிக்கு கொண்டு போகிறீர்களேடா பாவிகளா..” என்ற என் புலம்பலுக்கு இப்போதுவரையிலும் நல்ல முறையில் தீனி போட்டுக் கொண்டிருக்கிறார் ஆத்தா..!

தற்போது உச்சநீதிமன்றத்தில் மேல் முறையீடு செய்து வரும் திங்கள்கிழமைக்குள் படத்தை ரிலீஸ் செய்ய நினைத்திருக்கும் கமலின் முயற்சி வெற்றியடைய வாழ்த்துகிறேன். உச்சநீதிமன்றமாவது ஒரு கலைஞனின் மனதைப் புரிந்து கொண்டு செயல்பட்டு தீர்ப்பளிக்கும் என்றே நம்புகிறேன்..!

உயர்நீதிமன்ற தீர்ப்பின் நகலை உடனுக்குடன் தர விடாமல் இழுத்தடித்து.. வழக்கில் கமலுக்காக ஆஜராகிய எம்.ஜி.ஆரின் நெருங்கிய நண்பரது மகனான பி.எஸ்.ராமனை மிரட்டி.. காலையில் தியேட்டர்களில் தவியாய் தவிப்புடன் திரண்டிருந்த ரசிகர்களை போலீஸை வைத்து துரத்தியடித்து.. சில தியேட்டர்களில் போலீஸ் துணையுடன் பெட்ரோல் குண்டுகளை வீச வைத்து.. இந்தக் குண்டுகள் வீசப்பட்ட 15 நிமிடத்தில், அந்தச் செய்தியை வாதிட்டுக் கொண்டிருந்த உயர்நீதிமன்ற டிவிஷன் பெஞ்ச் நீதிபதிகளிடம் புகாராக பதிவு செய்து.. சட்டம் ஒழுங்கு கெட்டு விடும். அதனைக் கட்டுப்படுத்தும் அறிவும், ஆற்றலும் எங்க சி.எம்.முக்கு இல்லவே இல்லை என்பதை மறைமுகமாக ஒப்புக் கொண்டு.. பாதிக்குப் பாதி நீதியை அளித்துக் கொண்டிருக்கும் இந்த நீதிபதிகளிடம் மீண்டும் தடை என்று உத்தரவை வாங்கிவிட்டுத்தான் பெருமூச்சு விட்டிருக்கிறார்கள் ஆத்தாவும், அவருடைய சட்டம் படித்த தொண்டரடிப் பொடியாள்வார்கள்..!

இதே வேகத்தை.. துடிப்பை.. தனது சொத்துக் குவிப்பு வழக்கின் மீதும் செலுத்தி விரைவாக.. ஒரு மாதத்திற்குள்ளாக வழக்கு விசாரணையை முடிக்க வைத்து.. நான் குற்றமற்றவள் என்று நிரூபித்து வெளியே வருவேன்னு சொல்ல இந்தம்மாவுக்கு வக்கில்லை.. அறிவில்லை.. ஆனால் ஒரு நல்ல கலைஞனை அவமானப்படுத்த, அழித்தொழிக்க, மட்டும் துடியாய் துடிக்கும் இந்தக் கேவலமான, வெக்கங்கெட்ட, கேடுகெட்ட அரசியல்தனத்தையெல்லாம் பார்க்கத்தான் வேண்டுமா..? இன்னும் எத்தனை முறைதான் இப்படியே எழுதுவது.. பேசுவது..? இந்தக் கொடுமையையெல்லாம் பார்க்குறதுக்கு பதிலா மேல போய்ச் சேர்ந்தா நிம்மதி கிடைக்மேன்னும் அடிக்கடி எனக்குத் தோணுது.. இதுக்காகத்தான் முதல் வரியில் அந்த வார்த்தைகள்..!

Tweet

கமல்ஹாசன் செய்வது சரியா..?

10-12-2012

என் இனிய வலைத்தமிழ் மக்களே..!

“வீட்டில் பெருமாள் படம் காலண்டரில் தொங்குவதால் யாரும் திருப்பதிக்குப் போவதைக் குறைத்துக் கொண்டதாய்த் தெரியவில்லை. கிட்டதட்ட அந்த நிலைதான் சினிமா அரங்க அனுபவத்திற்கும்.. வீட்டில் மின் விசிறி இருப்பினும், காற்று வாங்க கூட்டம் கடற்கரைக்கு வருகிறது. ரேடியோவில் தன் குரல் கேட்டால் புகழ் குறையும் என்று, நினைத்து பாடாமல் இருந்த கர்நாடக பாகவதர்கள்போல் இருப்பது உசிதமல்ல. சமையலறையும் நல்ல சமையலும் பல வீடுகளில் இருப்பதால் ஹோட்டல்களை மூடிவிட்டார்களா என்ன?”

- இத்தனையாண்டு காலமும் இந்தத் தமிழ்ச் சினிமாவுக்கே தனித்த அடையாளமாக இருந்துவரும் தனக்கே திரையுலகத்தில் தடை உத்தரவா என்ற ஆதங்கத்தில் அண்ணன் கமல்ஹாசன் இன்று சொல்லியிருக்கும் வார்த்தைகள் இவை..!

கேபிள் டிவிக்கு மாதந்தோறும் 100 ரூபாய் கொடுக்கவே யோசிக்கும் நடுத்தர மக்களினும் பொருளாதாரத்தில் உயர்ந்த மனிதர்களான, மாதந்தோறும் 1700 ரூபாய் கொடுத்து செட்டப் பாக்ஸ் கனெக்சன் வைத்திருப்பவர்களுக்கு மட்டுமே இந்த வசதி என்பதால் மற்றவர்கள் நிச்சயம் திரையரங்கத்தை நாடி வருவார்கள் என்று அண்ணன் கமல் தரப்பில் 3 நாட்களாக கூக்குரலிட்டும் தியேட்டர் அதிபர்களின் மனதில் அச்சம் நீங்கியபாடில்லை.

திரைத்துறையினர் இது விஷயமாக மீண்டும் நாளை காலையில் கூடிப் பேசப் போகிறார்கள்..! இவர்களது பயமும், அவசரமும் சினிமாத் துறையினரில் பெரும்பாலோருக்கு தெரியும் என்றாலும், பலராலும் எதையும் வெளிப்படையாகச் சொல்லத்தான் முடியவில்லை. சங்கத்தின் முடிவுக்குக் கட்டுப்பட வேண்டும் என்கிற வாடிக்கையான மனநிலை அவர்களைத் தடுத்து வருகிறது..!

ஒரே ஒரு முறைதான் காட்டப் போகிறார்கள். அதுவும் 1000 ரூபாய்க்கு.. ஏழரை கோடி மக்கள் தொகை கொண்ட தமிழ்நாட்டில் இதில் 1 சதவிகிதமான ஏழு லட்சம் பேர் மட்டுமே பார்க்க வாய்ப்பு இருந்தும், இதில் எத்தனை பேர் பார்க்கப் போகிறார்கள் என்றும் தெரியாமலும் இதன் பிரதிபலிப்பு தியேட்டர் வசூலில் எதிரொலிக்கும் என்று கலங்குகிறார்கள் தியேட்டர் உரிமையாளர்கள்.

“நாங்கள் தியேட்டர் வைத்திருப்பதே சினிமாக்களை வெளியிடத்தான். இப்போதைக்கு பெரிய படங்களையும், சின்ன படங்களையும், மீடியம் பட்ஜெட் படங்களையும் படங்களுக்கேற்றவாறு திரையிட்டு வருகிறோம். ஒரு படத்தில் பெறுகின்ற நஷ்டத்தை மற்றொரு படத்தில் ஈடுகட்டும் வகையில்தான் எங்களது தியேட்டர்களில் திரையிடப்படும் படங்களின் தேர்வும் இருக்கிறது. 2 பெரிய பட்ஜெட் படங்களை நாங்களே வாங்கி வெளியிட்டு நஷ்டம் ஏற்பட்டால், அந்த மெகா நஷ்டத்தை ஈடுகட்ட அடுத்த பெரிய படம்தான் தேவை.. அப்போதுதான் எங்களால் விட்ட பணத்தை குறுகிய காலத்தில் உடனேயே மீட்டெடுக்க முடியும்..! 

கமல் சொல்வது போலவே இது பெரிய பணக்காரர்களின் வீட்டு வரவேற்பறையில் தெரியட்டும். ஆனால் அப்போது அந்தக் குடும்பத்தினர் மட்டுமே பார்க்கப் போவதில்லை. குறைந்தபட்சம் தங்களது ஒட்டு மொத்தக் குடும்பத்தையாவது பார்க்க வைத்துவிடுவார்கள். இவர்கள் மல்டிபிளெக்ஸ்களுக்கு வரும் வாடிக்கையான ரசிகர்கள் என்று வைத்துக் கொள்ளுங்கள். இவர்கள் வீட்டில் பார்த்துவிட்டால், பிறகெப்படி தியேட்டருக்கு வருவார்கள்? மல்டிபிளெக்ஸ்களுக்கும் இதனால் நஷ்டம் வருமே..?  

சரி.. கமல் தன் படத்தின் விநியோகத்தை தானே பொறுப்பேற்று தியேட்டர்களை வாடகைக்கு எடுத்து படத்தை ஓட்டினாலும், டிடிஹெச்சில் படத்தை பார்த்துவிட்ட ரசிகர்கள் தாண்டிய பொதுமக்கள் கண்டிப்பாக தியேட்டருக்கு வர மாட்டார்கள். அப்போது டிக்கெட் கட்டண வசூல் குறையும்..  தியேட்டர் கேண்டீன்களுக்கு இழப்பு ஏற்படும்.. அனைத்து படங்களுமே இது போன்றே வெளியிடப்பட்டு, அனைவருமே வாடகைக்கு தியேட்டரை எடுத்து ஓட்டினால், எங்களுக்கு எப்படி லாபம் கிடைக்கும்..? தியேட்டரில் கிடைக்கும் வாடகை அந்த கட்டிடத்தின் நிலைப்பாட்டுக்கு மட்டுமே பயன்படும்.. ஆனால் நாங்களும் லாபம் பார்க்க வேண்டாமா..? தயாரிப்பாளர் மட்டும்தானே இதில் லாபம் பார்க்க முடியும்..? வெறுமனே வாடகையை மட்டும் வைத்துக் கொண்டு தியேட்டர் ஊழியர்களுக்குச் சம்பளத்தைக் கொடுத்துவிட்டு மிச்சம், மீதியை கவர்ன்மெண்டு எம்ப்ளாயிஸ் மாதிரி வீட்டுக்குக் கொண்டு போவதற்கா நாங்கள் தியேட்டர் நடத்துகிறோம்...?” என்கிறார்கள்.

இன்னொரு தரப்பினரோ, “தற்போது ஒரு பெரிய படம் வெளியிடப்பட்டால்.. நன்றாக இருக்கும்பட்சத்தில் அந்தப் படம் குறைந்தபட்சம் 4 வாரங்களாவது பெரிய தியேட்டர்களில் ஓட்டப்படுகிறது. இப்படி டிடிஹெச்சில் போட்டுவிட்டு தியேட்டருக்கு வரும்போது கூட்டம் குறைவாகி அந்தப் படம் 2 வாரங்கள் மட்டுமே ஓடும் சூழல் வரும்.. மிச்சம் இருக்கும் 2 வாரத்தில் வேறு படங்கள், குறிப்பாக சின்ன பட்ஜெட் படங்களுக்கு தியேட்டர்கள் கிடைக்குமே..?” என்கிறார்கள்.

ஆனால் இதையும் மறுக்கிறார்கள் தியேட்டர் அதிபர்கள். “இப்போதும் சின்ன பட்ஜெட் தயாரிப்பாளர்கள் வாடகைக்கும், பெர்சண்டேஜுக்கும்தான் படத்தை திரையிடுகிறார்கள். இதில் எங்களுக்கு என்ன லாபம் கிடைத்துவிடப் போகிறது..? வர்றதுக்கு வாய்க்கும், வயித்துக்குமே போதும்ன்னா நாங்க எதுக்கு இவ்ளோ பெரிய கட்டிடத்தை கோடிக்கணக்குல செலவு பண்ணி கட்டி நடத்தணும்..? பேசாம கல்யாண மண்டபமா மாத்திட்டு வீட்ல ஹாயா உக்காருவோமே..?” என்கிறார்கள்..!

“சினிமாக்களை மட்டுமே நம்பி.. அவர்களுக்காகவே நாங்கள் தியேட்டர்களை நடத்தி வருகிறோம். சினிமா தியேட்டர்களில் வேறு நிகழ்ச்சிகள் நடத்தவும் முடியாது..! கமலை போலவே அடுத்து வரக் கூடியவர்களும் தங்களது படங்களை டிடிஹெச்சில் கொடுத்துவிட்டு பின்பு தியேட்டருக்கு வழங்கி, கூட்டத்தை குறைத்துவிட்டால்,  தியேட்டருக்கு ரெகுலராக வந்துபோகும் பார்வையாளர்களின் கூட்டம் குறையுமே..” என்று திரும்பத் திரும்ப அதே கோணத்திலேயே தங்களது பார்வையைச் செலுத்துகிறார்கள் தியேட்டர் அதிபர்கள்..!

“டிடிஹெச் சந்தாத்தாரர்கள் வெறும் 7 லட்சம் பேர் என்று கணக்கிட்டாலும், இதில் 3.5 லட்சம் பேர் 1000 ரூபாய் கொடுத்துவிட்டாலே, அதில் 35 கோடி வசூலாகிவிடும்..!   கமலுக்கு இப்போதைக்கு இது போதுமானதுதான்..! கமல் நடித்த படம் என்பதால்தான் 1000 ரூபாயை வசூல் செய்கிறது டிடிஹெச் நிறுவனம். இதையே வேறொரு தயாரிப்பாளர் மீடியம் பட்ஜெட் நாயகர்களைக் கொண்டு படமெடுத்து அதனை வெறும் 100 ரூபாய் கட்டணத்திற்கு காட்டினால், அப்போதும் மூன்றரை கோடி ரூபாய் சுளையாகக் கிடைத்துவிடும்..!

ஒரே நாளில், ஒரே செக்கில் 3.5 கோடி ரூபாய் கிடைத்துவிடும் என்று நினைத்து பலரும் இது போன்று மீடியம் பட்ஜெட் படங்களை எடுத்து டிடிஹெச்சுக்கே கொடுத்துவிட்டு காலப்போக்கில் தியேட்டர்களில் படங்களை ரிலீஸ் செய்ய வேண்டிய அவசியமே இல்லை என்ற சூழலை உருவாக்கிவிட்டால், அப்போது நாங்களெல்லாம் என்ன செய்வது..?” என்கிறார்கள்..!

“இது இப்படியே தொடர்ந்து…… தமிழ்நாட்டில் கேபிள் கனெக்சன் வைத்திருப்பவர்களின் எண்ணிக்கை 2 கோடி என்று வைத்துக் கொள்ளுங்கள். ஒரு வீட்டுக்கு 50 ரூபாய் என்று வாங்கிக் கொண்டு புத்தம் புதிய படங்களை வாரந்தோறும் ஞாயிற்றுக்கிழமை மாலை ஒளிபரப்புகிறோம் என்று சொன்னால் வாரத்துக்கு 50 ரூபாய்தானே என்ற எண்ணத்தில் மக்கள் தானாகவே முன் வந்து பணம் கொடுப்பார்கள். அப்போது இந்தத் தொகை 10 கோடி சுளையாகக் தயாரிப்பாளருக்குக் கிடைக்கும். இப்போதெல்லாம் மீடியம் பட்ஜெட் படங்களை 3.5 கோடியில் சுலபமாக தயாரித்துவிடலாம்.. கேபிள் ஆபரேட்டர்களுக்கு கொஞ்சம் தொகையைக் கமிஷனாகக் கொடுத்துவிட்டு இது போன்று மறுபடியும், மறுபடியும் டிடிஹெச்சுகளுக்காகவே படமெடுக்க துவங்கினால் சினிமாக்களை மட்டுமே நம்பி தியேட்டர்களை நடத்தி வரும் நாங்களெல்லாம் என்ன செய்ய..?” என்றும் கேள்வி எழுப்புகிறார்கள்..! இந்த பயம்தான் இப்போது தியேட்டர் அதிபர்களை பேயாய் ஆட்டி வைத்துக் கொண்டிருக்கிறது..!

கமல் மட்டுமே இப்போதைக்கு கலக்ககுரலை எழுப்பியிருந்தாலும், மற்றவர்கள் இந்தப் படத்தின் ரிசல்ட்டை பார்த்துவிட்டு பின்பு யோசிக்கலாம் என்று காத்திருக்கிறார்கள். ஏற்கெனவே தியேட்டருக்கு வரும் ரசிகர்களின் எண்ணிக்கை மாதந்தோறும் குறைந்து கொண்டே செல்கிறது. சமீபத்தில் வெளியான துப்பாக்கி படத்தின் வசூல் ஓஹோ என்று சொல்லும் அளவுக்கு இல்லை என்பதுதான் உண்மை. ஏதோ போட்ட காசு கிடைத்துவிட்டது என்று ஜெமினியும், தாணுவும் பெருமூச்சுவிட்டு ஓய்ந்திருக்கிறார்கள்.

தியேட்டர்களுக்கு கூட்டம் வராததற்கு தியேட்டர்களில் நடக்கும் அநியாயக் கொள்ளையான கட்டண உயர்வு மட்டுமே காரணம் அல்ல.. மக்களுக்கும் நாள்தோறும், வாரந்தோறும், மாதந்தோறும் பல புதுவித பிரச்சினைகள் வந்து கொண்டேயிருக்கின்றன. தியேட்டர்களுக்கு சென்று ரிலாக்ஸ் செய்யும் எண்ணம் வராத அளவுக்கு ஓட வேண்டிய நிலைமை இப்போது..! 

குடும்பப் பிரச்சினை.. குழந்தைகளின் படிப்புப் பிரச்சினை.. அலைச்சல் என்று பலதையும் மனதில் வைத்துக் கொண்டுதான் “வீட்டோடு ஓய்வை கொண்டாடுவோம்.. டிவியில் நிகழ்ச்சிகளை பார்த்து டென்ஷன் இல்லாமல் இருப்போம்..” என்ற மனநிலை அநேகம் நடுத்தர வர்க்கத்தினருக்கு வந்துவிட்டது..! 

புதுவசந்தம் படம் ரிலீஸான அன்று திண்டுக்கல் லஷ்மி தியேட்டரில் நான் காலை காட்சி படம் பார்த்துவிட்டு அந்த நாள் முழுவதுமான 5 ஷோக்களையும் தொடர்ந்து பார்த்தேன். அதே நேரம் அரசு அலுவலகம் ஒன்றில் வேலை பார்க்கும் அண்ணன் ஒருவர், தனது மனைவியுடன் படம் பார்க்க வந்திருந்தவர்.. மதியம், மாலை, இரவு காட்சிகளையும் தொடர்ச்சியாக என்னுடன் இருந்து பார்த்தார்.. அப்போது அவருக்கும், அவரது மனைவிக்கும் அந்தப் படம் மிகப் பெரிய இளைப்பாறுதலை தந்தது..  ரிலாக்ஸை தந்திருந்தது..! இப்போது இப்படி யாராவது படம் பார்க்கிறார்கள் என்று கேள்விப்பட முடியுமா..?

முந்தானை முடிச்சு படத்திற்கு தினமும் புதுமையான விளம்பரங்கள் தினத்தந்தியில் வந்து கொண்டேயிருந்தன..! ஏதாவது ஒரு ஊரில் தொடர்ச்சியாக 4 ஷோ பார்த்த பெண்கள் புகைப்படத்துடன் பேட்டி கொடுத்திருப்பார்கள். 100 நாட்களும் தொடர்ச்சியாக பார்த்ததாகக்கூட சில பெண்கள் பேட்டியளித்திருந்தார்கள்.. அப்போதைக்கு அது சினிமாவின் விளம்பரத் துறையில் மிகப் பெரிய மாற்றத்தை ஏற்படுத்தியிருந்தது. ஆனால் இன்றைக்கு அப்படியொரு விளம்பரத்திற்குக்கூட ஆட்கள் கிடைக்காது என்பதுதான் உண்மை.!

மக்களுக்கு ஓய்வெடுக்கும் நேரம் குறைந்துபோய் அந்த நேரத்திலும் உழைத்து, உழைத்து பணம் சேர்க்க வேண்டும் என்ற ஆவலும், ஆசையும் வெறியாகிவிட்டிருப்பதை கண்கூடாக உணர முடிகிறது..! இதில் அநாவசியமாக சினிமாவுக்காக ஆயிரம் ரூபாய் தனியாக செலவழிக்க வேண்டுமா என்ற அவர்களது சிந்தனை நியாயமானதுதான். அதே நேரம் தியேட்டர்காரர்களும் தங்களது டிக்கெட் கட்டணத்தைக் குறைத்து 10, 20, 30 என்று வைத்தால் பெரிய பட்ஜெட் படங்களைவிடவும், சின்ன பட்ஜெட் படங்களுக்கு அதிகக் கூட்டம் கூடும் என்பது நிஜம்..! 

முதலில் தியேட்டருக்கு வரும் மக்கள் கூட்டத்தை அதிகப்படுத்த வேண்டும். அதற்கான ஒரே வழி தியேட்டர் கட்டணத்தைக் குறைப்பதுதான்.. இதனைச் செய்யாமல் இப்போது இருக்கும் கட்டணம்தான் நியாயமானது என்று தியேட்டர் அதிபர்கள் சொன்னால், அதற்கான பலனையும் அவர்கள்தான் அனுபவிக்க வேண்டும்..! வேறு வழியே இல்லை..!  திருட்டு விசிடி பிரச்சினைக்கும் முழு முதற் காரணம் இந்தக் கட்டண உயர்வுதான்..  மிகப் பெரிய பட்ஜெட் படங்களுக்கும், மிக முக்கியமான படங்களுக்கு மட்டுமே திருட்டு விசிடி வெளிவந்து கொண்டிருக்கிறது.. அதிகம் அறியப்படாத.. வெளிநாட்டு உரிமை கொடுக்கப்படாத சில சின்ன பட்ஜெட் படங்களை திருட்டு விசிடியில் கொடுத்தால்கூட வாங்கவோ, பார்க்கவோ ஆளில்லை என்பதுதான் மறுக்க முடியாத உண்மை..! டிக்கெட் கட்டணத்தை முறைப்படுத்தி, குறைத்துவிட்டால் திருட்டு விசிடிகள் குறையும் வாய்ப்பு உண்டு.

போட்டியாக ஒருவருக்கொருவர் முறைத்துக் கொண்டிருந்த 2 திரையரங்கு உரிமையாளர் சங்கங்களும் இப்போது ஒற்றுமையாக ஒன்று சேர்ந்து இந்த விஷயத்தில் கை கோர்த்துக் கொண்டிருப்பது கமலே எதிர்பார்க்காத ஒரு விஷயம்..! தற்போது கமல் யாருக்கும் நஷ்டமில்லாமல் தியேட்டருக்கு வாடகை கொடுத்தே படத்தை ஓட்டிக் கொள்கிறேன் என்று சொன்னாலும், டிடிஹெச்சில் படத்தைக் கொடுத்தால், அந்தப் படத்தை நாங்கள் எங்கள் தியேட்டரில் காட்ட மாட்டோம் என்பதுதான் இப்போதுவரையிலும் தியேட்டர் அதிபர்களின் ஒருமித்த முடிவாகவே இருக்கிறது..! கமலும் அவர் கருத்தில் பிடிவாதமாகவே இருக்கிறார்..!

என்னைப் பொறுத்தவரையில் இதில் திரையுலகத்தினருக்கு சாதகமும் உண்டு.. பாதகமும் உண்டு என்றே நம்புகிறேன்..! முன்பே சொன்னதுபோல கேபிள் டிவிக்காரர்கள் மூலமாக பொதுமக்களிடம் 50 அல்லது 100 ரூபாய் வாங்கி படத்தைத் தயாரித்து அவர்களுக்கு மட்டுமே காண்பித்துவிடும் திட்டம் வந்துவிட்டால் அப்போது தியேட்டர்களின் கதி அதோ கதிதான்..! கமல், ஷங்கர், மணிரத்னம் படங்கள் மற்றும் தொழில் நுட்பம் சார்ந்து எடுக்கப்படும் படங்களை மட்டுமே தியேட்டருக்கு சென்று பார்க்க அவரவர் ரசிகர்கள் விருப்பப்படுவார்கள். குடும்பக் கதைகளையும், காமெடி படங்களையும் வீட்டு தியேட்டரிலேயே பார்த்துவிடலாம் என்று பொதுமக்கள் முடிவெடுத்துவிட்டால் தியேட்டர்கள் முற்றாக அழியும் நிலை ஏற்படும்..!

இன்னொரு பக்கம் படம் நல்லாயிருக்கோ.. இல்லையோ.. நல்ல டைரக்டர்.. நல்ல பேனர்.. நமக்குத் தெரிந்த நடிகர், நடிகைகள், சிறந்த இயக்குநர் என்ற நினைப்பில் மக்கள் 50 ரூபாயைக் கொடுத்துவிட்டு ஒரு மொக்கை படத்தை பார்த்துவிட்டு நொந்து போனாலும் பணம் போட்ட தயாரிப்பாளருக்கு முழுத் தொகையும் ஒரே நாளில் கிடைத்துவிடும் சூழல் உருவாகும் என்பதால் நிறைய தயாரிப்பாளர்கள் உடனுக்குடன் தமிழ்ச் சினிமாவில் நுழைவார்கள் என்பதிலும் எனக்கு  ஐயமில்லை..!

ஆக.. இதில் இருக்கும் பாதகங்களை திரையுலகத்தினர் அனைவருமே தங்களுக்கு சாதகமாக ஆக்கிக் கொள்ளும்வகையில் ஒரு கட்டுப்பாடுடன் கூடியவகையில் தியேட்டர்காரர்களுடன்  இணைந்து செயல்படுவதுதான் மிகச் சிறந்தது.. இதில் ஈகோ பார்க்காமல், சினிமா என்னும் துறையை மென்மேலும் வளர்ச்சியடைய வைக்க வேண்டியது கமல் போன்ற மகா கலைஞனின் கையிலும் இருக்கிறது..! 

Tweet

கமல்ஹாசனுக்காக காத்திருந்த தெரு...!

25-05-2012


என் இனிய வலைத்தமிழ் மக்களே..!

வக்காலி.. மன்மோகன்சிங், பிரதீபாபாட்டிலுக்குக்கூட இப்படியொரு அலட்டல் நடந்திருக்காது.. ஆழ்வார்பேட்டை ஆண்டவன் கமலஹாசன் ஒரு ஆர்ட் கேலரியைத் திறந்து வைக்க வந்த நிகழ்ச்சிக்காக, ஆழ்வார்பேட்டை கஸ்தூரிரங்கன் சாலையை துவம்சம் செய்துவிட்டார்கள் நிகழ்ச்சி ஏற்பாட்டாளர்கள்..!

 ஏற்கெனவே பெரும் பணக்காரர்கள் நிரம்பிய அந்தச் சாலையில் கலையார்வம் கொண்ட ஒரு பெரும் பணக்காரர் குறைந்த வாடகையில் கொடுத்த அற்புதமான ஒரு வீட்டில் அழகான தனது கலை வடிவங்களை கண்காட்சிக்கு வைத்திருக்கிறார் கலை ஓவியர் ஸ்ரீதர்.



கமலஹாசனின் அம்மாவும் நீயே அப்பாவும் நீயே பாடல் காட்சி துவங்கி, அவரது பல்வேறு அவதாரங்களின் தொகுப்பு வரையிலும் பலவற்றையும் வரைந்து கமலிடம் வழங்கி அவரது அன்பைப் பெற்றவர் ஸ்ரீதர். அதற்கான நன்றிக் கடனாக அவரது ஆர்ட் கேலரியைத் திறந்து வைக்க இன்று வருகை புரிந்தார் கமல்.

மதியம் 3.30 மணிக்கு நிகழ்ச்சி துவங்கும் என்று சொல்லி 3 மணியில் இருந்தே பத்திரிகையாளர்கள் வந்து காத்திருக்க.. அநத் தெருவையே இந்த நிகழ்ச்சி ஏற்பாட்டாளர்கள் குத்தகைக்கு எடுத்துவிட்டார்கள். வருகின்ற கார்களை பிக்கப் செய்து வேறிடத்தில் நிறுத்திவைக்க கால் டிரைவர்ஸ் யூனிட்டையே களம் இறக்கியிருந்தார்கள். தெருவில் இருந்த வீட்டு ஓனர்களிடம் பேசி, சிறிது நேரத்திற்கு வெளியில் கார்களை நிறுத்த வேண்டாம் என்று அன்புடன் கேட்டுக் கொண்டார்களாம்..!

தெருவின் துவக்கத்தில் இருந்த ஒரு மரத்தில் இருந்து ஏதோவொரு பழங்களை உலுக்கி எடுத்துக் கொண்டிருந்தார்கள். அவர்களையும் அவ்வப்போது கொஞ்சம் நிறுத்திக்கக் கூடாதா என்று கேட்டு அதனையும் சீக்கிரமாகவே முடிக்க வைத்துவிட்டார்கள்..! டூவிலர்கள் நிறுத்த இடமில்லாமல்போக, கூடுதலாக வந்தவைகளை தெருவின் மறுகோடிவரையிலும் கொண்டு போய் நிறுத்தச் சொன்னார்கள். தெருவில் குடியிருப்பவர்கள் வந்த கார்களைகூட ஓரமா நிறுத்துங்களேன் என்று வாலண்டியராக கூவிக் கொண்டிருந்தார்கள்..!

இதோ வர்றார்.. கிளம்பிட்டார்.. வந்துக்கிட்டேயிருக்கார் என்றெல்லாம் கிசுகிசு பாணியில் புரளியைக் கிளப்பிவிட.. பாவம் கேமிராமேன்களும், புகைப்படக்காரர்களும் ஒரு மணி நேரத்திற்கும் மேலாக வாசலில் தேமே என்று தவம் கிடந்தது பரிதாபம்தான்..!





வரப் போவது தெரிந்தவுடன் யார், யார் தெருவில் போய் நிற்பது.. கார் எங்கே வந்து நிற்கும்.. கமல் காரில் இருந்து இறங்கியவுடன் யார் முதலில் வரவேற்பது என்றெல்லாம் நொடியில் பேசி முடித்து பக்காவாக செயல்படுத்தினார்கள்.

50 வீடியோ கேமிராமேன்கள் சூழ்ந்து கொள்ள.. பிளாஷ் மழையில் நனைந்து கொண்டேதான் உள்ளே வந்தார் கமல். தனது புகைப்படத்தில் இரண்டு பக்கமும் மாறி, மாறி நின்றபடியே எழுதியதை, திருப்பித் திருப்பி எழுதி போஸ் கொடுத்தார்..!



ஒரு வித்தியாசத்திற்கு கம்யூட்டரில் இருந்த குத்துவிளக்கு படத்தில் திரி எரியும் இடத்தில் பிரஷ்ஷால் தீபத்தை வரைந்து விழாவைத் துவக்கி வைத்தார்.. சிம்ப்ளி சூப்பர்ப்..! பியானோவை பார்த்தவுடன் ஆர்வத்துடன் உட்கார்ந்தவர்.. ஏதோ பேச்சுக்கு என்பது போல் இல்லாமல், அழகாக பியானோவை வாசிப்பதுபோல் நடித்தது மிகவும் அழகு..!



டிவி, தின இதழ், வார இதழ், இணையத்தளங்கள் என்று 100-க்கும் மேற்பட்ட பத்திரிகையாளர்கள் கூடி நிற்க.. இதில் பாதிப் பேர் இடமில்லாமல் நிற்க வேண்டியிருந்தது..! உட்கார்ந்து பேசினால் நல்லது என்று ஸ்டில் கேமிராமேன்களும், நின்று கொண்டே பேசினால் நல்லது என்று டிவி கேமிராமேன்களும் சொல்ல.. மெஜாரிட்டிபடி நின்றபடியே பேசி முடித்தார் கமல்.



பத்திரிகையாளர்களிடம் பேசுகையில் ஸ்ரீதருக்கும் தனக்குமான நட்பை விளக்கிவிட்டு, அவருடைய அன்புக்காகவே தான் வந்ததாகச் சொன்னார். விஸ்வரூபம் பற்றி நிருபர்கள் கேள்வி கேட்டதற்கு “முக்கால்வாசி முடிஞ்சிருச்சு.. படம் பாருங்க தெரியும்..” என்றார். நிருபர்கள் விடாமல் விஸ்வரூபத்தை கேட்க... “அடுத்து வசனத்தை கேட்பீங்களா? என்று அரங்கத்தை கலகலப்பாக்கினார். விஸ்வரூபத்தின் முதல் காட்சி அடுத்த மாதம் சிங்கப்பூரில் நடைபெறவிருக்கும் இந்திய பிலிம் பெஸ்டிவலில் நடைபெறும் என்று இன்றைக்குத்தான் நியூஸ் கொடுத்தார்கள்..! தான் படங்களில் நடித்ததை தானே பார்க்கும்போதுதான் தனக்குள்ளும் ஒரு ரசிகன் இருக்கிறான் என்பதை உணர்கிறேன் என்றார்..!  ஸ்ருதியின் படங்கள் பற்றி கேட்டபோது, “எனக்கே பார்க்க கொடுமையாத்தான் இருக்கு..” என்றார்.  இதற்கு மேலும் இங்கேயிருந்தால் கேள்விகள் பாயும் வர்றேன் என்று சொல்லிவிட்டு பாய்ந்தோடினார்..!

வழியில் நின்று கொண்டிருந்த பலரிடமும் கை கொடுத்து குலுக்கிவிட்டு அவர் ஓடிய ஓட்டத்திற்கு அப்படியே நடக்க விட்டிருந்தால் 2 நிமிடத்தில் அவர் ஆபீஸுக்கே போய்ச் சேர்ந்திருக்கலாம்.. பிரபலங்களுக்கு இது ஒரு மாதிரியான தொல்லைதான் என்றாலும், அடிக்கடி வெளியில் வந்து பேசிக் கொண்டிருந்தால், இந்த அன்புத் தொல்லையிருக்காது..!

கமல் திரும்பி வந்து காரில் ஏறும்வரையிலும் அத்தெருவில் ஒரு காரையும் ஓரமாக நிறுத்தக் கூட விடவில்லை ஐயாமார்கள்.. ஓடோடிச் சென்று அன்போடு “கொஞ்சம் தள்ளி.. கொஞ்சம் தள்ளி..” என்று சொல்லி வழியை தயார் நிலையில் வைத்திருந்தார்கள்..! கமலின் கார் சென்ற பின்பே டூவிலர்களுக்கும், மற்றவர்களுக்கும் அனுமதி கிடைத்தது..! இதையெல்லாம் யாராவது அரசியல்வியாதிகள் பார்த்தால் என்ன ஆகும்..?

பை தி பை.. லாஸ்ட் பன்ச் என்னன்னா.. நெல்லை சந்திப்பு படத்தின் இசை வெளியீட்டு விழால அரை மணி நேரம் காக்க வைச்சதுக்காக பல பத்திரிகையாளர்கள் விழா துவக்கத்திலேயே விழாவைப் புறக்கணிச்சிட்டு எழுந்திரிச்சு போயிட்டாங்க..! ஆனா இங்க.. கூடுதலா 2 மணி நேரமாகியும் மெதுவா, இருந்து பார்த்து, பேசி, கூடிக் குலாவிட்டுத்தான் போனாங்க..! என்னவொரு மாற்றம் பாருங்க.. வல்லவன் வகுத்ததே வாய்க்கால்ன்னு சொல்லுவாய்ங்க பாருங்க.. அது இதுதான்..!

Tweet

அழுதுவிடுவேன் என்று பயமுறுத்திய கமல்ஹாசன்..!

18-01-2010

என் இனிய வலைத்தமிழ் மக்களே..!

இயக்குநர் சிகரம் கே.பாலசந்தருக்கு அப்பாஸ் அகாடமியின் சார்பில் நேற்று மாலை 6 மணிக்கு பாராட்டு விழா நடப்பதாக நேற்று மாலை 3 மணிக்குத்தான் தெரிந்தது. இப்படியிருந்தா நாடு எப்படி முன்னேறும்..?

புத்தகக் கண்காட்சியின் இறுதி நாள் விழாவில் கலந்து கொண்டு அரங்கத்தின் பூட்டைப் பூட்டிச் சாவியை ஒப்படைக்கும் நிகழ்வுக்கு என்னை அழைத்திருந்தும் எனது ஆசானுக்கு நடக்கும் இந்த விழாவில் கலந்து கொள்ள வேண்டியிருந்ததால் எனது சக தோழர்களை அங்கே அனுப்பிவைத்துவிட்டு நான் மட்டும் இந்த நிகழ்ச்சிக்குப் பயணமானேன்.

காமராஜர் அரங்கத்தில் 90 சதவிகிதம் நிரம்பியிருந்தது. இத்தனைக்கும் நிகழ்ச்சிக்கு டிக்கெட் போட்டிருந்தார்கள். எப்படி இந்தக் கூட்டம் திரள்கிறது என்றால் அதற்கு முக்கியக் காரணம் திரையிசைப் பாடல்களை கேட்கத்தான்..!

மெல்லிசை மாமன்னர் எம்.எஸ்.விஸ்வநாதன், உலக நாயகன் கமல்ஹாசன், இயக்குநர்கள் கே.பாக்யராஜ், வசந்த் ஆகியோர் மட்டுமே கலந்து கொண்டனர். அழைப்பிதழில் பெயர் போடாததாலும், யாரையும் குறிப்பிட்டு பெயர் சொல்லி அழைக்காததாலும் பலரும் அழைப்பிதழ்கள் வாங்கிய கையோடு மறந்து போய்விட்டனர் போலும்.. இதனை ஒளிபரப்பும் உரிமையை வாங்கியிருந்தது மெகா டிவி என்பதும் பலர் வராததற்கு ஒரு காரணமாக இருக்கும் என்று நினைக்கிறேன்..!

கணேஷ் கிருபா இசைக் குழுவினர் இயக்குநர் சிகரத்தின் படங்களில் இருந்து மட்டும் பாடல்களை ஒலித்தனர். இவர்களைவிட வந்திருந்தவர்களை தனது வசீகரத் தமிழால் கட்டிப் போட்டிருந்தார் நிகழ்ச்சித் தொகுப்பாளர் பி.ஹெச்.அப்துல் ஹமீது..

1982-1983-களில் இவருடைய குரலுக்காகவே  ஞாயிற்றுக்கிழமைதோறும் இலங்கை வானொலியில் மதியம் 3.30  மணிக்கு ஒளிபரப்பாகும் லலிதா ஜூவல்லர்ஸ் வழங்கும் 'பாட்டுக்குப் பாட்டு' நிகழ்ச்சியை தவறவிடாமல் கேட்டவன் நான்.

ஒவ்வொரு பாடலுக்கு முன்பும், அந்தப் பாடல் பற்றிய சில சுவையான விஷயங்களை எடுத்துச் சொல்லி அதற்கொரு சுவையூட்டினார். 'வறுமையின் நிறம் சிகப்பு' படத்தின் 'சிப்பி இருக்குது முத்து இருக்குது' பாடல் எம்.எஸ்.வி.க்கும், கவியரசருக்கும் இடையே மிகச் சரியான போட்டியாக அமைந்திருந்த கதையைச் சொன்னார்.

இயக்குநர் சிகரத்தின் புகழ் பெற்ற பாடல்களுக்கு இசையமைத்திருக்கும் மெல்லிசை மாமன்னர் தன்னுடைய பாடல்களை தாளம் போட்டு ரசித்தபடியே லயித்துப் போய் உட்கார்ந்திருந்தார். வந்திருந்த கூட்டத்தின் ஒட்டு மொத்த பாராட்டும் 'நிழல் நிஜமாகிறது' படத்தின் 'கம்பன் ஏமாந்தான்'  பாட்டிற்கு கிடைத்தது.! வாழ்க கவியரசர்..!

வயதான சூழலினால் சீக்கிரமாகவே விட்டுவிட வேண்டும் என்ற ஒற்றைக் கோரிக்கையோடு விழாவுக்கு வந்திருந்த மெல்லிசை மாமன்னரை ஒரு மணி நேரத்திற்கு மேல் காக்க வைத்துவிட்டு அரங்கத்திற்கு வந்தார் கே.பி. வாசலிலேயே பூரண கும்ப மரியாதையோடு கே.பி.யையும், அவரது துணைவியாரையும் வரவேற்றார்கள் ரசிகர்கள்.

மீண்டும் கச்சேரி களை கட்ட.. மெல்லிசை மன்னரின் பாடல்கள் அரங்கத்தை ஆட்டுவித்தது..! புத்தம்புதுப் பாடல்கள் எத்தனைதான் வந்தாலும், பழைய பாடல்கள் ரசிகர்களுக்குக் கொடுக்கின்ற கிறக்கமே வேறாக இருக்கிறது..!

'அவள் ஒரு தொடர்கதை'யின் 'தெய்வம் தந்த வீடும்', 'நீர்க்குமிழி'யின் 'ஆடி அடங்கும் வாழ்க்கையடா' பாடலும் தொடர்ச்சியான அப்ளாஸ்களை குவித்தன. நிகில் முருகனின் திடீர் அரங்க விஜயம் எனக்கு முதலில் சந்தேகத்தைத் தெரிவித்தாலும் பின்பு கலைஞானியின் வருகையைத் தெளிவாக உணர்த்தியது.

'ஏக் துஜே கலியே'வின் 'தேரெ மெரெ பீச் மெய்' பாடல் ஒலித்துக் கொண்டிருந்தபோது அரங்கத்திற்குள் நுழைந்தார் கலைஞானி. மழு, மழுவென்று ஷேவ் செய்திருந்து, அவருடைய கண்கள் மட்டும் இப்போதெல்லாம் நிறைய பேசுவதுபோல் தெரிகிறது..!

கமலுக்காக மட்டும் 'புன்னகை மன்ன'னின் 'சிங்களத்து சின்னக் குயிலே' பாடலைப் பாடிய கையோடு மேடையேறினார்கள் பிரமுகர்கள்.

முதலில் வாழ்த்திப் பேசிய எம்.எஸ்.வி., “நான் பாலசந்தருடன் இணைந்து பணியாற்றியதையே பெரும் பாக்கியமாக கருதுகிறேன். அவர் பல்லாண்டு, பல்லாண்டு வாழ வாழ்த்துகிறேன்..” என்று ரத்தினச் சுருக்கமாகப் பேசிவிட்டுப் போனார்.

அடுத்துப் பேச வந்தார் கலைஞானி கமல். “எத்தனையோ மேடைகளில் என் குருநாதரைப் பற்றிப் பேசிட்டேன். இப்பவும் பேசிக்கிட்டுத்தான் இருக்கேன். நான் இந்த சினிமா துறைல ஒரு நல்ல டெக்னீஷியனாத்தான் வரணும்னு நினைச்சேன். அப்படி நினைச்ச சூழல்லதான் கே.பி. ஸார் என்னைக் கூப்பிட்டு படத்துல நடிக்க வைச்சார். அப்போகூட இந்த ஒரு படத்தோட ஓடிரலாம்னுதான் நினைச்சிருந்தேன். அப்படி ஓடியிருந்தன்னா இன்னிக்கு என்னை யாருக்குமே அடையாளம் தெரிஞ்சிருக்காது.. ரோட்டுல சாதாரணமா நடந்து போயிக்கிட்டிருந்திருப்பேன்..! ஆனா கே.பி. ஸாராலதான் என் வாழ்க்கையே மாறிப் போனது..!

ஒரு நாள் ஸ்டூடியோவுக்குப் போயிருந்தப்போ நம்ம டைரக்டரும், எம்.எஸ்.வி.யும் உக்காந்து பாட்டு போட்டுக்கிட்டிருந்தாங்க. நானும் அதை வேடிக்கை பார்த்தேன். அரை மணி நேரம்தான்.. அரை மணி நேரத்துல அத்தனை பாட்டையும் போட்டு முடிச்சிட்டாங்க. அன்னிக்கு ரிக்கார்டிங் செஞ்ச ஒரு பாட்டையும் நான் கேட்டேன். ஆனால் சத்தியமா அது நான் சினிமால பாடப் போற பாட்டுன்னு எனக்குத் தெரியலை.. அதுக்குப் பின்னாடிதான் தெரிஞ்சது..

படத்துல நடிச்சு முடிச்சதுக்கப்புறமும் கே.பி. ஸார் என்கிட்ட பேசும்போது, 'அடுத்து என்ன பண்ணப் போற?'ன்னு கேட்டார். 'டெக்னீஷியனா போகப் போறேன்'னு சொன்னேன். 'மடையா.. மடையா.. டைரக்டர்ன்னா எப்போ வேண்ணாலும் டைரக்ஷன் செய்யலாம். ஆனால் நடிப்புன்னு அதை ஆரம்பத்துலேயே செஞ்சுடணும்.. இப்பவே விட்ராத.. என்ன.. நான் சொல்றது புரியுதா..? இப்போ நடிக்கிற வேலையைப் பாரு..'ன்னு என் வாழ்க்கையைத் திசை திருப்பிவிட்டார். அன்னிக்கு அவர் செஞ்ச அந்த வேலைதான் இன்னிக்கு இந்த மேடைவரைக்கும் என்னைக் கொண்டு வந்து விட்டிருக்கு.  இதுக்கான நன்றியை நான் எத்தனை வருஷமானாலும் செலுத்தலாம்.. ஆனா.. அழுகக் கூடாதுன்னு பார்க்குறேன்.. முடியலை..” என்று சொன்னவர் நிஜமாகவே கண் கலங்கிப் போனார்.

மேலும் தொடர்ந்தவர், “அவரிடமிருந்து எத்தனையோ பேர் கிளம்பி வந்திருக்காங்க.. நிறைய பேரை அறிமுகம் செஞ்சு வைச்சிருக்காரு என்னை மாதிரி. அத்தனை பேரும் இன்னிக்கு பிஸியா இருக்காங்க.. பிஸியா இருக்குற அளவுக்கு அவங்களை வளர்த்தும் வைச்சிருக்காரு.. அவங்க எல்லார் சார்பாவும் நான் வந்திருக்கேன்னு நீங்க நினைச்சுக்குங்க. என்னுடைய நன்றியும் அவர்கள் அத்தனை பேரின் சார்பா சொல்றதுதான்..” என்று தழுதழுத்த குரலில் சொல்லிவிட்டுப் போனார்..!

அடுத்துப் பேச வந்தவர் கே.பாக்யராஜ். “கே.பி. ஸார் இயக்கி நான் பார்த்த முதல் திரைப்படம் நீர்க்குமிழிதான். அந்தப் படத்தை பார்த்துட்டு வீட்டுக்கு வந்து சாப்பிட்டுட்டு மறுபடியும் மனசு கேக்காம அடுத்த ஷோவுக்கும் ஓடிட்டேன்.. கே.பி. ஸார்கிட்ட எனக்குப் பிடிச்ச விஷயமே அவரோட டயலாக்ஸும், சிச்சுவேஷன் காமெடியும்தான்..

நீர்க்குமிழில நாகேஷ் சாகப் போறாருன்றதை அவர்கிட்ட சொல்லாம மறைமுகமா சொல்ற சீனை அவ்ளோ டச்சிங்கோட செஞ்சிருக்காரு டைரக்டர்.. எதிர் நீச்சல் படத்துல நாகேஷ் சாப்பிட்டிருக்க மாட்டார். யாராவது ஒருத்தராவது தன்னை சாப்பிட கூப்பிட மாட்டாங்களான்னு ஏக்கத்துல இருப்பார். அப்போ முத்துராமன்கிட்ட போய் 'சேட்டன் நீங்க சாப்பிட்டீங்களா?'ன்னு மூணு தடவை கேட்பாரு.. முத்துராமனும் மூணு தடவையும் பதில் சொல்லிட்டு எரிச்சலாகி நிக்கும்போது, 'நான் மூணு தடவை கேட்டனே சேட்டன்.. நீ பதிலுக்கு ஒரு தடவையாவது நீ சாப்பிட்டியா மாதுன்னு என்னைக் கேக்கலியே'ன்னு சொல்லுவாரு நாகேஷ்.. இந்த சென்டிமெண்ட் காட்சி எனக்கு ரொம்பப் பிடிச்சது.

அதே மாதிரி என்னையெல்லாம் தூக்கிச் சாப்பிடுற மாதிரி அவள் ஒரு தொடர்கதைல பர்ஸ்ட் நைட் சீன் ஒண்ணு வைச்சிருப்பாரு டைரக்டர்.. அதுல அந்தக் கட்டில் ஆடுற சத்தத்தை மட்டும்தான் காட்டிருப்பாரு.. முதல் தடவையா பார்க்கும்போது அந்தச் சத்தத்தோட அர்த்தம் வேற மாதிரி இருந்தது. ஆனால் இன்னொரு தடவை பார்க்கும்போதுதான் அதுல இருந்த ஒரு சென்டிமெண்ட்ஸ் புரிஞ்சது..

கே.பி. ஸார் இந்த வயசுலேயும் உழைக்கிறாருன்னா அது மிகப் பெரிய விஷயம்.. நான் 'உத்தமபுத்திரன்' ஷூட்டிங்ல இருந்தப்போ அவரோட புது நாடகத்தைப் பார்க்க வரும்படி அழைப்பு வந்திருந்துச்சு.. அதுக்காக ஷூட்டிங்கை அட்ஜஸ்ட் பண்ணி அவசரம், அவசரமா ஓடிப் போய் நாடகத்தைப் பார்த்தேன். பெர்பெக்ஷனா பண்ணியிருந்தாரு..

கே.பி. ஸார்கிட்ட இன்னொரு விஷயமும் இருக்கு.. அது அவர் படத்துல இருக்குற நகைச்சுவை. அவர் சீரியஸ் படமும் பண்ணியிருக்காரு.. நகைச்சுவை படமும் பண்ணியிருக்காரு.. ஆனால் எங்க டைரக்டருக்கு(பாரதிராஜாவுக்கு) நகைச்சுவைன்னா பிடிக்காது. தள்ளி வைச்சிருவாரு.. நான் ஒன்றரை பக்கத்துக்கு எழுதிக் கொடுத்தால்கூட அதை அப்படியே கிழிச்சிருவாரு.. நானும் இதுக்காக அவர்கிட்ட சண்டையெல்லாம் போட்டிருக்கேன். கமலுக்குக்கூட நல்லா தெரியும். ஆனா அவருக்கு அது செட்டாகலை. பட்... கே.பி. ஸாரின் இந்தத் திறமை ரொம்ப ஆச்சரியமானது. சீரியஸா படம் எடுக்கிறவரும், நகைச்சுவையா படம் எடுக்க முடியுதுன்னு அது இவராலதான்..” என்றார்..

தொடர்ந்து பேச வந்தார் கே.பி.யின் ஆஸ்தான சீடர் வசந்த். “எனக்கும் என் குருநாதருக்கும் இடைல இருக்குறது 31 வருட பழக்கம்.. இத்தனை வருடப் பழக்கத்துல சொல்றேன்.. இவரை மாதிரி ஒரு பெர்பெக்ஷனான இயக்குநரை நீங்க பார்க்கவே முடியாது.. ஸ்கிரிப்ட்ல ஒரு சின்ன தப்புகூட இருக்க முடியாது. அத்தனையையும் பார்த்து பார்த்து செய்வார்.. அவரோட பையன்கூட ஒரு பேட்டில சொல்லியிருந்தார்.. கே.பி. வீட்லகூட டைரக்டர் மாதிரியேதான் இருப்பாரு.. அதேதான்.. 24 மணி நேரமும் இயக்குநர் மாதிரியே இருக்கிறவரு என் குருநாதர்தான்.

இங்ககூட பாருங்க.. இவ்ளோ பேரு வந்திருக்கீங்க.. எத்தனை பேரு பார்த்தீங்கன்னு தெரியலை..  'இயக்குநர் சிகரத்திற்க்கு' அப்படீன்னு மேடைல எழுதியிருக்காங்க.. அதுல 'க்'-கனா வராது.. வரக்கூடாது. தப்பா எழுதிட்டாங்க. கே.பி. ஸார் வந்து உக்காந்தவுடனேயே என்னைக் கூப்பிட்டு அந்தத் தப்பைக் குறிப்பிட்டுக் காட்டினார். இப்படித்தான் தப்பெல்லாம் இவர் கண்ணுல மட்டும் பட்டிரும்.. எப்படித்தான் படுமோ தெரியலை. ஆனால் நல்லதெல்லாம் படாது. தப்பு மட்டும் கரெக்ட்டா இவர் கண்ணுல மாட்டிரும்..

ஒரு பங்ஷனுக்குக் கிளம்பினால்கூட முன்கூட்டியே தயார் செஞ்சுட்டுத்தான் கிளம்புவார். பேசணும்னால்கூட முன் கூட்டியே குறிப்பெடுத்து வைச்சுக்குவாரு. இப்போ டைப் பண்ணி பிரிண்ட் அவுட்டை எடுத்திட்டுத்தான் வர்றாரு..

நான் இப்போ இந்த மேடைல என் குருநாதருக்குச் சொல்ற விஷயம் ஒண்ணு இருக்கு. அது நான் அவரை முதன்முதலா எங்க சந்திச்சேன்றதை சொல்லணும்.. எனக்கு அஞ்சு அல்லது ஆறு வயசு இருக்கும்போது இங்க இருந்த எங்க சொந்தக்காரங்க வீட்டுக்கு வந்திருந்தேன். அப்போ அவங்க வீட்ல எல்லாரும் ஷூட்டிங் பார்க்க போனாங்க. போறப்போ என்னையும் கூட்டிட்டுப் போனாங்க.. வாஹினி ஸ்டூடியோன்னு நினைக்கிறேன்.

அங்க போனப்பத்தான் முதல்முதல்லா கே.பி. ஸாரை பார்த்தேன். சிகரெட்டா பிடிச்சு ஊதித் தள்ளிக்கிட்டிருந்தாரு.. என் கஸின்ஸ் அவர்கூட நின்னு போட்டோ எடுத்துக்கிட்டாங்க. அப்போ நான் ரொம்பச் சின்னப் பையன்றதால என்னைத் தள்ளிவிட்டுட்டாங்க.. ஆனா கே.பி. அப்ப 'அவனையும் கூப்பிடுங்க.. இங்க நில்லுப்பா..' என்று சொல்லி என்னையும் இழுத்துப் பிடிச்சு பக்கத்துல நிறுத்தி வைச்சு போட்டோ எடுக்க வைச்சாரு.. அன்னில இருந்து இன்னிக்கிவரைக்கும் அவர் கூடவே நிக்குறேன்.. இதுவே நான் பெற்ற பெரும் பாக்கியமா கருதுறேன்..” என்று நெகிழ்ந்தார்.

இறுதியாக ஏற்புரை ஆற்ற வந்த கே.பாலசந்தர் சற்று டென்ஷனாகவே இருந்தார்.. வயதின் காரணமாக உடல் தளர்ந்து, நடை சற்று மெதுவாக இருந்தாலும் பேச்சின் வேகம் மட்டும் குறையவில்லை..

“நம்ம அப்துல் ஹமீது எங்க மேடைல மைக் பிடிச்சு நின்னாலும் அந்த பங்ஷன் சக்ஸஸ்தான்.. அந்த அளவுக்கு அவரது தமிழ் அனைவரையும் கட்டிப் போடுகிறது. சிறந்த பேச்சாளர்.. அவருடைய மேடை ஒருங்கிணைப்பில் இந்த விழா நல்லபடியா நடக்கிறது பெரிய சந்தோஷம்..

என் வாழ்க்கையில் நான் செய்த மிகப் பெரிய பாக்கியம் எம்.எஸ்.வி. போன்றவர்களுடன் இணைந்து பணியாற்றியதுதான். அதுதான் என்னுடைய பொற்காலம்.. அதற்குப் பிறகு இளையராஜா, ரகுமான்வரையிலும் பலரிடமும் நான் பணியாற்றிவிட்டேன். என் வயதில் பாதியுள்ளவர்களிடம்கூட நான் இணைந்து வேலை பார்த்திருக்கேன். எல்லாம் எனக்குக் கிடைத்த பாக்கியம்தான்..

நான் அறிமுகப்படுத்தியவர்களால் நான்தான் அதிகமாக சந்தோஷமும், பெருமையும் அடைந்திருக்கிறேன். நான் எங்க போனாலும் 'ரஜினியை அறிமுகப்படுத்தினவரு இவருதான்'. 'கமலஹாசனை அறிமுகப்படுத்தினவரு இவருதான்'னு என்னையச் சொல்றாங்க.. என் முகத்துல அவங்களோட ஆஸ்தான ஹீரோக்களைத் தேடுறாங்க. இதுவே எனக்குப் பெருமைதான்..

இங்கே பாக்யராஜ் எனக்காக வந்திருக்காரு. நானும் அவரும் பல மேடைகளில் பேசியிருக்கிறோம். ஆனால் இதுதான்.. இப்பத்தான் முதல் முறையா என்னை வாழ்த்தி என் முன்னாடியே பேசியிருக்காரு. அவருக்கு எனது நன்றி..!

நான் எப்பவும் தப்பைக் கண்டுபிடிச்சிருவேன்னு வசந்த் சொன்னான். அது என்னவோ தெரியலை.. என்ன படிச்சாலும், எங்க படிச்சாலும் சரி.. தமிழ்ல தப்புன்னா உடனே என் கண்ணுக்குத் தெரிஞ்சிருது கலைஞர் மாதிரி. அதுக்காக கலைஞரோட ஒப்பிடுறேன்னு நினைக்கக் கூடாது.. இந்த விஷயத்துல மட்டும்தான்னு சொல்ல வந்தேன்.. இந்த மாதிரி பெர்பெக்ஷன்தான் ஒரு இயக்குநருக்கு வேணும்..!

நான் இன்னிக்கு ரொம்ப மகிழ்ச்சியா இருக்கேன். நான் மகிழ்ச்சியா இருப்பதைப் பார்த்து என் மனைவி மகிழ்ச்சியா இருக்கிறாள். இதுவே எனக்கு மகிழ்ச்சியைத் தருகிறது..!..” என்று நெகிழ்வாகச் சொல்லி முடித்தார்..!

விழாவை ஏற்பாடு செய்த கணேஷ் கிருபா இசைக் குழுவின் தலைவர் கிருபா, பழம்பெரும் நடிகர் யதார்த்தம் பொன்னுச்சாமியின் பேரனாம்.. இந்தத் தகவலை அப்துல் ஹமீதுதான் தெரிவித்தார்.

விடைபெற்ற கே.பி. நிகழ்ச்சியில் பங்கு கொண்ட அத்தனை பேரையும் அருகில் அழைத்து தனது வழக்கப்படி கை குலுக்கி நன்றி சொல்லிவிட்டுத்தான் வெளியேறினார்.

இந்த நிகழ்ச்சியின் மெகா ஸ்பான்ஸர் என்ற முறையில் மெகா டிவியின் ஓனரான தமிழக காங்கிரஸ் கட்சியின் தலைவர் தங்கபாலுவின் மகன் கார்த்திக்கும் விழாவில் கலந்து கொண்டார். நானும் யாரோ என்றுதான் நினைத்துக் கொண்டிருந்தேன். மேடையேற்றும்போதுதான் தெரிந்தது தங்கபாலுவின் மகன் என்று..

இந்தத் தம்பி, எம்.எஸ்.வி.யின் அருகில் 2 மணி நேரமாக உட்கார்ந்திருந்தும் ஒரு வார்த்தைகூட தன்னுடன் பேசாமல் இருந்ததைக் கண்டு பாவம் எம்.எஸ்.வி.யே நொந்து போயிருப்பார் என்று நினைக்கிறேன்..

தம்பி இப்படியிருந்தா எப்படி அடுத்த இளைஞர் காங்கிரஸ் தலைவராக உருவெடுப்பது..? இன்னும் நிறைய டிரெயினிங் வேணும் போலிருக்கே..?

டிஸ்கி-1 : இது போன்ற தேட்ஸ்தமிழ்.காம்-ல் வரக் கூடிய செய்திகள் காலத்தின் கட்டாயத்தின் காரணமாக இனிமேல் இங்கேயும் இடம் பெறும் என்பதைத் தெரிவித்துக் கொள்கிறேன். பொறுத்தருள்க..!

டிஸ்கி-2 : புகைப்படங்கள் இதுவரையில் கிடைக்கவில்லை. கிடைத்தால் வலையேற்றுகிறேன்..!

Tweet

கமலஹாசனின் நான்கு நண்பர்கள்(Four Friends) - மலையாள சினிமா விமர்சனம்

04-11-2010

என் இனிய வலைத்தமிழ் மக்களே..!

1989-ம் ஆண்டு 'சாணக்யன்' என்னும் மலையாளத் திரைப்படத்தில்தான் அண்ணன் கமலஹாசன் கடைசியாகத் திறமை காட்டியிருந்தார் என்று நினைக்கிறேன். அதன் பிறகு இத்தனை ஆண்டு காலம் கழித்து இந்தப் படத்தில் நடிக்கிறார் என்கிற செய்திகள் வந்தபோதே படத்தைப் பார்த்தே தீர வேண்டும் என்ற ஆசையுடன், கொஞ்சம் வெறியும் சேர்ந்தே இருந்தது.

இந்தத் தீபாவளிக்கு எனக்குக் கிடைத்த மிகப் பெரிய புஸ்வாணமாக இந்தப் படத்தையே எடுத்துக் கொள்ளலாம். அவ்வளவு பெரிய ஏமாற்றம்.

கமல் அண்ணன் சாதாரணமாக தனது பொன்னான நேரத்தை வீணாக்க மாட்டாரே.. நல்ல படமாகத்தானே இருக்கும் என்று நினைத்தேன். கைக்குட்டைகள் நனையும் அளவுக்கு பிழியப் பிழிய சோக ரசத்தைப் பிழிந்தெடுத்து, நமது சீரியல்களுக்கே சவால் விடும்வகையில் இருக்கிறது படம்.

கமல் இதில் நடிக்க ஒப்புக் கொண்டதற்கு பிரதானமான காரணம் ஒன்று உண்டு. படத்தில் அமீராக நடித்திருக்கும் நடிகர் ஜெயசூர்யா, கமலஹாசனின் வெறி பிடித்த ரசிகர். அவருடைய வீட்டில் பல இடங்களிலும் கமல்ஹாசனின் விதவிதமான புகைப்படங்கள்.

எடுப்பது மலையாளத் திரைப்படம். நடிக்கவிருப்பதோ மலையாள திரைக்கலைஞர்கள். “கமலஹாசனைவிடவும் சிறந்த நடிகர்கள் மலையாள திரையுலகில் இருக்கிறார்கள்..” என்று மலையாள திரைப்பட நடிகர்கள் சங்கத்தின் தலைவர் இன்னசெண்ட் சமீபத்தில்தான் தெரிவித்திருக்கிறார்.

அப்படியிருக்கும்போது கேரளாவில் கமலஹாசனின் தசவாதாரம் படத்தை வெறி கொண்டு பார்க்கும் ஒரு ரசிகன் கேரக்டரில் மலையாள நடிகரே நடிப்பது கமலுக்குச் சிறப்பானதுதானே.. வருகின்ற வாய்ப்பை விட வேண்டாம் என்று கமல் நினைத்திருப்பார் என்று நினைக்கிறேன்.

ஆனால் அந்த அளவுக்கு பில்டப்பை கொடுத்துவிட்டு இந்த அளவுக்கு ஏமாற்றியிருக்க வேண்டாம். ஒரேயொரு காட்சியில்தான் கமல்ஹாசன் தோன்றுகிறார். அதுவும் நடிகர் கமல்ஹாசனாகவே. கமல் அண்ணனின் முகம் தெரிந்தவுடன் இடைவேளை விட்டுவிடுகிறார்கள்..

அதற்கு முன்பு கதை என்னவென்று பார்த்துவிடுவோம். நான்கு கேன்சர் நோயாளிகள்.. தாங்கள் இறக்கப் போவது உறுதியென்றாலும், தங்கள் மரணத்தின்போது சந்தோஷமாகவே இருக்கப் போவதாகச் சொல்லிவிட்டு மலேசியாவுக்கு பயணமாகிறார்கள். கேன்சர் நோயாளிகளில் ஒருவரான குஞ்சக்கோ போபனின் ஒருதலைக் காதலி மலேசியாவில் படிப்பதால் அவளையும் பார்க்கலாம். தாங்களும் டூரை கொண்டாடலாம் என்று நினைத்து செல்கிறார்கள். போன இடத்தில் நடக்கும் எதிர்பாராத விஷயத்தினால் குஞ்சக்கோ போபன் மட்டும் இறந்துவிட.. மிச்சமிருக்கும் 3 நோயாளிகளின் கதி என்ன என்பதைத்தான் மிச்ச, சொச்சம் கதை சொல்கிறது.

இந்தப் படம் Jack Nikolson மற்றும் Morgan Freeman நடித்த Bucket List  படத்தின் காப்பி என்கிறார்கள் மலையாளப் பத்திரிகையாளர்கள். நான் அந்தப் படத்தைப் பார்க்கவில்லை என்பதால் என்னால் உறுதியாகச் சொல்ல முடியவில்லை.

இதில் இவர்கள் கமல்ஹாசனை சந்திப்பது கொச்சி ஏர்போர்ட்டில். மலேசியாவுக்குப் பயணமாவதற்காகக் காத்திருக்கும் நேரத்தில் லவுஞ்சில் அமர்ந்திருக்கும் கமல்ஹாசனை நோயாளிகளில் சீனியரான ஜெயராம், மற்ற  நோயாளிகளான போபன், ஜெயசூர்யா, மீரா ஜாஸ்மின் மூவருக்கும் அறிமுகப்படுத்தி வைக்கிறார்.

தனது ஆதர்ச நாயகனைச் சந்தித்த அதிர்ச்சியில் இருக்கும் ஜெயசூர்யாவின் அந்த ஆக்ஷன் இது மலையாளத் திரைப்படம்தான் என்பதை உணர்த்தியது. இதே இடத்தில் குசேலன் படத்தில் ரஜினியை பார்த்துவிட்டு வடிவேலு செய்யும் அதகளமும் ஏனோ நினைவுக்கு வந்து தொலைத்தது.

அப்போது கமல்ஹாசன் அவர்களுக்குத் தன்னம்பிக்கை ஊட்டும்விதத்தில், இதுவரையில் கேன்சரால் உயிரிழந்த தனது திரையுலக நண்பர்கள் பலரது பெயரைப் பட்டியலிட்டுச் சொல்கிறார். "என்னோட பெஸ்ட் பிரெண்ட்" என்று நடிகை ஸ்ரீவித்யாவைப் பற்றிச் சொல்கிறார். கடைசியாக “இப்போ என்னில் பாதியாக(Best half) இருக்கும் கவுதமிக்கும் கேன்சர்தான்” என்கிறார். “கேன்சர் ஒரு சத்ரு. அதை எதிர்த்து போராடணும்.. மடங்கிப் போகக் கூடாது..” என்று அட்வைஸும் செய்கிறார்.

இந்த ஒரு காட்சியில் அண்ணனின் தரிசனம் என்றாலும் அண்ணன் தனக்குக் கிடைத்த வாய்ப்பை நன்கு பயன்படுத்தி மலையாள நடிகர்களுக்கு கொஞ்சம் ஆப்பை சொருகியிருக்கிறார் என்றே சொல்ல வேண்டும். ஏன் இதே இடத்தில் மம்முட்டியையும், மோகன்லாலையும் தேர்வு செய்திருக்கலாமே..? எதற்காக கமலஹாசன்..?

உடன் ஜெயராமும் இன்னொரு நோயாளியாக நடிப்பதால் அவரும் வாய் பிளந்து நிற்கும் நடிகராக இருக்க வேண்டும் என்று எண்ணித்தான் கமலை தேர்வு செய்திருக்கிறார்கள் என்று நினைக்கிறேன். அந்த வகையில் தனக்குக் கிடைத்த ஒரு வாய்ப்பை பயன்படுத்திக் கொண்ட அண்ணன் கமல்ஹாசனை பாராட்டுகிறேன்.

கேரளா முழுவதிலுமே 70 தியேட்டர்களில் ரிலீஸ் செய்திருக்கிறார்கள். ஆனால், படத்தின் ரிசல்ட் கேரளாவிலேயே சொல்லிக் கொள்ளும் நிலையில் இல்லை. அனைவரும் சொல்கின்ற குற்றச்சாட்டு படம் மிகவும் சோகத்தைத் தருகிறது, மெலோ டிராமாவை போல் உள்ளது என்பதுதான்.

உண்மைதான். எம்.பி.பி.எஸ். மூன்றாமாண்டு படித்துக் கொண்டிருக்கும்போதே கேன்சர் நோய் தாக்கியது அறிந்து படிப்பை பாதியில் விட்டுவிட்டு சிகிச்சைக்காக வந்திருக்கிறார் மீரா ஜாஸ்மின். கமல்ஹாசனின் வெறியனாகவும் தியேட்டரில் பிளாக்கில் டிக்கெட் விற்கும் ரவுடியாகவும் ஜெயசூர்யா, பணக்கார வீட்டில் ஒரே மகனான சூர்யா என்ற குஞ்சக்கோ போபன்.. வாரத்துக்கு ஒரு வெளிநாட்டுக்கு பறந்தபடியே இருக்கும் மெகா பிஸினஸ்மேன் ஜெயராம்.. இந்த நால்வரும் சிகிச்சைக்காக ஒரே மருத்துவரிடம் வந்து அடைக்கலமாகிறார்கள். இவர்களையே சுற்றிச் சுற்றி கதை பின்னப்பட்டிருப்பதால் மரணத்தை எதிர்நோக்கியவனிடம் பார்க்கின்ற பரிதாபப் பார்வையை மட்டுமே நம்மால் உணர முடிகிறது.

மருத்துவமனை காட்சிகளில் சலீம்குமார் சம்பந்தப்பட்ட காமெடி காட்சிகள் சிரிப்பிற்குப் பதிலாக அலுப்பையே தருகின்றன. கேன்சரால் பாதிக்கப்பட்ட சிறு குழந்தையின் கதையும் உருக்கத்தைக் கொடுத்து மனதைப் பிசைகிறது. சோகக் காவியத்தையும் மனதோடு ஒன்றுவிடும் அளவுக்கு உருக வைக்கும் டெக்னிக் மலையாளத் திரையுலகில் நான் இதுவரையில் பார்த்ததில் சிபிமலயில் மற்றும் சத்யன் அந்திக்காடு இருவருக்குமே மட்டுமே உண்டு.

சிபிமலயிலின் அத்தனை திரைப்படங்களிலும் சோகத்தின் சுவடுகள் ஒவ்வொரு காட்சியிலும் தென்படும். ஆனால் அதற்காக அவர் கிளிசரினை அளவுக்கதிகமாகப் பயன்படுத்தும் அளவுக்கு மெனக்கெட மாட்டார். வசனத்திலோ, பின்னணி இசையிலோ, காட்சியமைப்பிலோ மனதைப் பிசைந்துவிடுவார். உதாரணம் தனம் படத்தில் முரளியை மடியில் போட்டுக் கொண்டு மோகன்லால் கதறுகின்ற கதறல்.. இப்போது நினைத்தாலும் என் கண்கள் சட்டென கலங்கி விடுகின்றன.

அது போன்ற மனதை ஊடுறுவும் காட்சிகள் அமையாமல் போனதால் சீரியல்களில் வரும் அழுகைக் காட்சிகளாகவே இருப்பதால் பெருவாரியான ரசிகர்களால் இப்படத்தினை ரசிக்க முடியவில்லை என்றே நினைக்கிறேன்.

போதாக்குறைக்கு சாதாரண திரைப்படங்களைப் போல மலேசியாவில் ஒரு சண்டைக் காட்சியையும் வலுக்கட்டாயமாகத் திணித்துவிட அங்கே சோகத்தின் உச்சியில் இருந்த டெம்போ சடாரென்று நழுவி விழுந்துவிட்டது. மறுபடியும் போபன் இறக்கின்றபோதுதான் இது சோகக் காவியம் என்பதே நினைவுக்கு வருகிறது.

ஒவ்வொருவருக்கும் ஒரு கிளைக்கதை என்று வைத்துக் கொண்டு கொண்டு சென்றிருக்கிறார் இயக்குநர். ஜெயசூர்யாவின் குடும்பம் தவிர, மீரா ஜாஸ்மின், போபன் குடும்பத்தினரின் தாக்கம் ஒன்றுமே இல்லை என்றாகிவிட்டது. சீமா சேச்சியை இப்படி ஸ்கிரீனில் பார்த்து பல காலமாச்சு. ஆனாலும் அழுகை.. அழுகை.. அழுகை.. தாங்க முடியவில்லை.

போபனின் மரணத்திற்குப் பிறகு சடாரென்று மாறுதலடையும் ஜெயராம், ஜெயசூர்யாவையும், மீராவையும் ஊருக்கு அனுப்பும் அந்த டிவிஸ்ட் நன்று என்றாலும், அதைவிட ட்விஸ்ட்டாக விமான நிலையத்தில் ஜெயசூர்யாவும், மீரா ஜாஸ்மினும் எடுக்கும் ஓட்டம் சூப்பர்.
 

மலேசியாவின் லங்காவி பிரதேசம் முழுவதையும் படம் பிடித்துக் காட்ட வேண்டும் என்று இயக்குநரின் ஆசையோ என்னவோ? ரோப் கார், அந்த மலைகளுக்கு இடையேயான தற்கொலைப் பாலம் என்று அனைத்தையும் கனஜோராகக் காட்டி அசத்தியிருக்கிறார். அதேபோல் கேரளாவில் அந்த மருத்துவமனையின் இருப்பிடம். அசத்தல்ய்யா.. எந்த ஊருன்னு தெரியலை. இப்படியொரு இடத்துல பத்து நாளாவது இருந்து வரலாம். அந்தப் படகு வீடுகளை எந்தக் கோணத்தில் இருந்து பார்த்தாலும் அற்புதமாக இருக்கின்றன.

என்ன இருந்து என்ன புண்ணியம்..? நான் பார்த்த பத்மம் திரையரங்கில் 30 பேர் வந்திருந்து  அதிர்ச்சியாக்கினார்கள். படம் முடிந்தபோது அதிலும் 10 பேர் காணாமல் போயிருந்தது சுவாரஸ்யம்.

இது போன்ற படங்களை மலையாளத்தில் மட்டும்தான் தைரியமாக எடுக்க முடியும்.. தமிழில் நினைத்துக்கூட பார்க்க முடியாது.. கமல்ஹாசன் தலைகாட்டிய ஒரு திரைப்படம் என்ற வகையில் மட்டுமே இந்தப் படத்தைக் குறிப்பிடலாம் என்று நினைக்கிறேன். ஆனாலும் அடுத்தாண்டு கேரள அரசின் பல விருதுகளை இப்படம் அள்ளப் போவதும் உறுதி. அதிலும் சந்தேகமில்லை.

புகைப்படங்கள் உதவிக்கு நன்றி : kerala9.com

Tweet