கமலஹாசனின் நான்கு நண்பர்கள்(Four Friends) - மலையாள சினிமா விமர்சனம்

04-11-2010

என் இனிய வலைத்தமிழ் மக்களே..!

1989-ம் ஆண்டு 'சாணக்யன்' என்னும் மலையாளத் திரைப்படத்தில்தான் அண்ணன் கமலஹாசன் கடைசியாகத் திறமை காட்டியிருந்தார் என்று நினைக்கிறேன். அதன் பிறகு இத்தனை ஆண்டு காலம் கழித்து இந்தப் படத்தில் நடிக்கிறார் என்கிற செய்திகள் வந்தபோதே படத்தைப் பார்த்தே தீர வேண்டும் என்ற ஆசையுடன், கொஞ்சம் வெறியும் சேர்ந்தே இருந்தது.

இந்தத் தீபாவளிக்கு எனக்குக் கிடைத்த மிகப் பெரிய புஸ்வாணமாக இந்தப் படத்தையே எடுத்துக் கொள்ளலாம். அவ்வளவு பெரிய ஏமாற்றம்.

கமல் அண்ணன் சாதாரணமாக தனது பொன்னான நேரத்தை வீணாக்க மாட்டாரே.. நல்ல படமாகத்தானே இருக்கும் என்று நினைத்தேன். கைக்குட்டைகள் நனையும் அளவுக்கு பிழியப் பிழிய சோக ரசத்தைப் பிழிந்தெடுத்து, நமது சீரியல்களுக்கே சவால் விடும்வகையில் இருக்கிறது படம்.

கமல் இதில் நடிக்க ஒப்புக் கொண்டதற்கு பிரதானமான காரணம் ஒன்று உண்டு. படத்தில் அமீராக நடித்திருக்கும் நடிகர் ஜெயசூர்யா, கமலஹாசனின் வெறி பிடித்த ரசிகர். அவருடைய வீட்டில் பல இடங்களிலும் கமல்ஹாசனின் விதவிதமான புகைப்படங்கள்.

எடுப்பது மலையாளத் திரைப்படம். நடிக்கவிருப்பதோ மலையாள திரைக்கலைஞர்கள். “கமலஹாசனைவிடவும் சிறந்த நடிகர்கள் மலையாள திரையுலகில் இருக்கிறார்கள்..” என்று மலையாள திரைப்பட நடிகர்கள் சங்கத்தின் தலைவர் இன்னசெண்ட் சமீபத்தில்தான் தெரிவித்திருக்கிறார்.

அப்படியிருக்கும்போது கேரளாவில் கமலஹாசனின் தசவாதாரம் படத்தை வெறி கொண்டு பார்க்கும் ஒரு ரசிகன் கேரக்டரில் மலையாள நடிகரே நடிப்பது கமலுக்குச் சிறப்பானதுதானே.. வருகின்ற வாய்ப்பை விட வேண்டாம் என்று கமல் நினைத்திருப்பார் என்று நினைக்கிறேன்.

ஆனால் அந்த அளவுக்கு பில்டப்பை கொடுத்துவிட்டு இந்த அளவுக்கு ஏமாற்றியிருக்க வேண்டாம். ஒரேயொரு காட்சியில்தான் கமல்ஹாசன் தோன்றுகிறார். அதுவும் நடிகர் கமல்ஹாசனாகவே. கமல் அண்ணனின் முகம் தெரிந்தவுடன் இடைவேளை விட்டுவிடுகிறார்கள்..

அதற்கு முன்பு கதை என்னவென்று பார்த்துவிடுவோம். நான்கு கேன்சர் நோயாளிகள்.. தாங்கள் இறக்கப் போவது உறுதியென்றாலும், தங்கள் மரணத்தின்போது சந்தோஷமாகவே இருக்கப் போவதாகச் சொல்லிவிட்டு மலேசியாவுக்கு பயணமாகிறார்கள். கேன்சர் நோயாளிகளில் ஒருவரான குஞ்சக்கோ போபனின் ஒருதலைக் காதலி மலேசியாவில் படிப்பதால் அவளையும் பார்க்கலாம். தாங்களும் டூரை கொண்டாடலாம் என்று நினைத்து செல்கிறார்கள். போன இடத்தில் நடக்கும் எதிர்பாராத விஷயத்தினால் குஞ்சக்கோ போபன் மட்டும் இறந்துவிட.. மிச்சமிருக்கும் 3 நோயாளிகளின் கதி என்ன என்பதைத்தான் மிச்ச, சொச்சம் கதை சொல்கிறது.

இந்தப் படம் Jack Nikolson மற்றும் Morgan Freeman நடித்த Bucket List  படத்தின் காப்பி என்கிறார்கள் மலையாளப் பத்திரிகையாளர்கள். நான் அந்தப் படத்தைப் பார்க்கவில்லை என்பதால் என்னால் உறுதியாகச் சொல்ல முடியவில்லை.

இதில் இவர்கள் கமல்ஹாசனை சந்திப்பது கொச்சி ஏர்போர்ட்டில். மலேசியாவுக்குப் பயணமாவதற்காகக் காத்திருக்கும் நேரத்தில் லவுஞ்சில் அமர்ந்திருக்கும் கமல்ஹாசனை நோயாளிகளில் சீனியரான ஜெயராம், மற்ற  நோயாளிகளான போபன், ஜெயசூர்யா, மீரா ஜாஸ்மின் மூவருக்கும் அறிமுகப்படுத்தி வைக்கிறார்.

தனது ஆதர்ச நாயகனைச் சந்தித்த அதிர்ச்சியில் இருக்கும் ஜெயசூர்யாவின் அந்த ஆக்ஷன் இது மலையாளத் திரைப்படம்தான் என்பதை உணர்த்தியது. இதே இடத்தில் குசேலன் படத்தில் ரஜினியை பார்த்துவிட்டு வடிவேலு செய்யும் அதகளமும் ஏனோ நினைவுக்கு வந்து தொலைத்தது.

அப்போது கமல்ஹாசன் அவர்களுக்குத் தன்னம்பிக்கை ஊட்டும்விதத்தில், இதுவரையில் கேன்சரால் உயிரிழந்த தனது திரையுலக நண்பர்கள் பலரது பெயரைப் பட்டியலிட்டுச் சொல்கிறார். "என்னோட பெஸ்ட் பிரெண்ட்" என்று நடிகை ஸ்ரீவித்யாவைப் பற்றிச் சொல்கிறார். கடைசியாக “இப்போ என்னில் பாதியாக(Best half) இருக்கும் கவுதமிக்கும் கேன்சர்தான்” என்கிறார். “கேன்சர் ஒரு சத்ரு. அதை எதிர்த்து போராடணும்.. மடங்கிப் போகக் கூடாது..” என்று அட்வைஸும் செய்கிறார்.

இந்த ஒரு காட்சியில் அண்ணனின் தரிசனம் என்றாலும் அண்ணன் தனக்குக் கிடைத்த வாய்ப்பை நன்கு பயன்படுத்தி மலையாள நடிகர்களுக்கு கொஞ்சம் ஆப்பை சொருகியிருக்கிறார் என்றே சொல்ல வேண்டும். ஏன் இதே இடத்தில் மம்முட்டியையும், மோகன்லாலையும் தேர்வு செய்திருக்கலாமே..? எதற்காக கமலஹாசன்..?

உடன் ஜெயராமும் இன்னொரு நோயாளியாக நடிப்பதால் அவரும் வாய் பிளந்து நிற்கும் நடிகராக இருக்க வேண்டும் என்று எண்ணித்தான் கமலை தேர்வு செய்திருக்கிறார்கள் என்று நினைக்கிறேன். அந்த வகையில் தனக்குக் கிடைத்த ஒரு வாய்ப்பை பயன்படுத்திக் கொண்ட அண்ணன் கமல்ஹாசனை பாராட்டுகிறேன்.

கேரளா முழுவதிலுமே 70 தியேட்டர்களில் ரிலீஸ் செய்திருக்கிறார்கள். ஆனால், படத்தின் ரிசல்ட் கேரளாவிலேயே சொல்லிக் கொள்ளும் நிலையில் இல்லை. அனைவரும் சொல்கின்ற குற்றச்சாட்டு படம் மிகவும் சோகத்தைத் தருகிறது, மெலோ டிராமாவை போல் உள்ளது என்பதுதான்.

உண்மைதான். எம்.பி.பி.எஸ். மூன்றாமாண்டு படித்துக் கொண்டிருக்கும்போதே கேன்சர் நோய் தாக்கியது அறிந்து படிப்பை பாதியில் விட்டுவிட்டு சிகிச்சைக்காக வந்திருக்கிறார் மீரா ஜாஸ்மின். கமல்ஹாசனின் வெறியனாகவும் தியேட்டரில் பிளாக்கில் டிக்கெட் விற்கும் ரவுடியாகவும் ஜெயசூர்யா, பணக்கார வீட்டில் ஒரே மகனான சூர்யா என்ற குஞ்சக்கோ போபன்.. வாரத்துக்கு ஒரு வெளிநாட்டுக்கு பறந்தபடியே இருக்கும் மெகா பிஸினஸ்மேன் ஜெயராம்.. இந்த நால்வரும் சிகிச்சைக்காக ஒரே மருத்துவரிடம் வந்து அடைக்கலமாகிறார்கள். இவர்களையே சுற்றிச் சுற்றி கதை பின்னப்பட்டிருப்பதால் மரணத்தை எதிர்நோக்கியவனிடம் பார்க்கின்ற பரிதாபப் பார்வையை மட்டுமே நம்மால் உணர முடிகிறது.

மருத்துவமனை காட்சிகளில் சலீம்குமார் சம்பந்தப்பட்ட காமெடி காட்சிகள் சிரிப்பிற்குப் பதிலாக அலுப்பையே தருகின்றன. கேன்சரால் பாதிக்கப்பட்ட சிறு குழந்தையின் கதையும் உருக்கத்தைக் கொடுத்து மனதைப் பிசைகிறது. சோகக் காவியத்தையும் மனதோடு ஒன்றுவிடும் அளவுக்கு உருக வைக்கும் டெக்னிக் மலையாளத் திரையுலகில் நான் இதுவரையில் பார்த்ததில் சிபிமலயில் மற்றும் சத்யன் அந்திக்காடு இருவருக்குமே மட்டுமே உண்டு.

சிபிமலயிலின் அத்தனை திரைப்படங்களிலும் சோகத்தின் சுவடுகள் ஒவ்வொரு காட்சியிலும் தென்படும். ஆனால் அதற்காக அவர் கிளிசரினை அளவுக்கதிகமாகப் பயன்படுத்தும் அளவுக்கு மெனக்கெட மாட்டார். வசனத்திலோ, பின்னணி இசையிலோ, காட்சியமைப்பிலோ மனதைப் பிசைந்துவிடுவார். உதாரணம் தனம் படத்தில் முரளியை மடியில் போட்டுக் கொண்டு மோகன்லால் கதறுகின்ற கதறல்.. இப்போது நினைத்தாலும் என் கண்கள் சட்டென கலங்கி விடுகின்றன.

அது போன்ற மனதை ஊடுறுவும் காட்சிகள் அமையாமல் போனதால் சீரியல்களில் வரும் அழுகைக் காட்சிகளாகவே இருப்பதால் பெருவாரியான ரசிகர்களால் இப்படத்தினை ரசிக்க முடியவில்லை என்றே நினைக்கிறேன்.

போதாக்குறைக்கு சாதாரண திரைப்படங்களைப் போல மலேசியாவில் ஒரு சண்டைக் காட்சியையும் வலுக்கட்டாயமாகத் திணித்துவிட அங்கே சோகத்தின் உச்சியில் இருந்த டெம்போ சடாரென்று நழுவி விழுந்துவிட்டது. மறுபடியும் போபன் இறக்கின்றபோதுதான் இது சோகக் காவியம் என்பதே நினைவுக்கு வருகிறது.

ஒவ்வொருவருக்கும் ஒரு கிளைக்கதை என்று வைத்துக் கொண்டு கொண்டு சென்றிருக்கிறார் இயக்குநர். ஜெயசூர்யாவின் குடும்பம் தவிர, மீரா ஜாஸ்மின், போபன் குடும்பத்தினரின் தாக்கம் ஒன்றுமே இல்லை என்றாகிவிட்டது. சீமா சேச்சியை இப்படி ஸ்கிரீனில் பார்த்து பல காலமாச்சு. ஆனாலும் அழுகை.. அழுகை.. அழுகை.. தாங்க முடியவில்லை.

போபனின் மரணத்திற்குப் பிறகு சடாரென்று மாறுதலடையும் ஜெயராம், ஜெயசூர்யாவையும், மீராவையும் ஊருக்கு அனுப்பும் அந்த டிவிஸ்ட் நன்று என்றாலும், அதைவிட ட்விஸ்ட்டாக விமான நிலையத்தில் ஜெயசூர்யாவும், மீரா ஜாஸ்மினும் எடுக்கும் ஓட்டம் சூப்பர்.
 

மலேசியாவின் லங்காவி பிரதேசம் முழுவதையும் படம் பிடித்துக் காட்ட வேண்டும் என்று இயக்குநரின் ஆசையோ என்னவோ? ரோப் கார், அந்த மலைகளுக்கு இடையேயான தற்கொலைப் பாலம் என்று அனைத்தையும் கனஜோராகக் காட்டி அசத்தியிருக்கிறார். அதேபோல் கேரளாவில் அந்த மருத்துவமனையின் இருப்பிடம். அசத்தல்ய்யா.. எந்த ஊருன்னு தெரியலை. இப்படியொரு இடத்துல பத்து நாளாவது இருந்து வரலாம். அந்தப் படகு வீடுகளை எந்தக் கோணத்தில் இருந்து பார்த்தாலும் அற்புதமாக இருக்கின்றன.

என்ன இருந்து என்ன புண்ணியம்..? நான் பார்த்த பத்மம் திரையரங்கில் 30 பேர் வந்திருந்து  அதிர்ச்சியாக்கினார்கள். படம் முடிந்தபோது அதிலும் 10 பேர் காணாமல் போயிருந்தது சுவாரஸ்யம்.

இது போன்ற படங்களை மலையாளத்தில் மட்டும்தான் தைரியமாக எடுக்க முடியும்.. தமிழில் நினைத்துக்கூட பார்க்க முடியாது.. கமல்ஹாசன் தலைகாட்டிய ஒரு திரைப்படம் என்ற வகையில் மட்டுமே இந்தப் படத்தைக் குறிப்பிடலாம் என்று நினைக்கிறேன். ஆனாலும் அடுத்தாண்டு கேரள அரசின் பல விருதுகளை இப்படம் அள்ளப் போவதும் உறுதி. அதிலும் சந்தேகமில்லை.

புகைப்படங்கள் உதவிக்கு நன்றி : kerala9.com

Tweet

1980-ஹீரோக்கள்-ஹீரோயின்கள் சந்திப்பு - புகைப்படங்கள்

06-09-2010

என் இனிய வலைத்தமிழ் மக்களே..!

நான் சென்ற இட்லி-வடை பதிவில் குறிப்பிட்டிருந்ததைப் போல 1980 ஹீரோக்கள்-ஹீரோயின்கள் சந்திப்பு புகைப்படங்கள் கிடைத்தால் பதிவிடுகிறேன் என்று சொல்லியிருந்தேன்.

அந்தப் புகைப்படங்கள் இப்போதுதான் கிடைத்தது.. ஆனால் இதில் எனக்குத் திருப்திரமான புகைப்படங்கள் இல்லை. என்றாலும், நான் பார்த்த திரைப்படங்களை உங்களுடன் பகிர்ந்து கொள்கிறேன்..

மேலும் புகைப்படங்கள் கிடைத்தால் இந்தப் பதவிலேயே அப்டேட் செய்கிறேன்..

நன்றி..!

Tweet

சிந்துசமவெளி - சினிமா விமர்சனம்

04-09-2010

என் இனிய வலைத்தமிழ் மக்களே..!

டைட்டில் கார்டுக்கு முன்பாகவே “இது நூறு சதவிகிதம் நடப்பதுதான். தினமும் நாம் பார்த்த கேட்ட கதைகளில் ஒன்றுதான்” என்று சொல்லிவிட்டார்கள்.

"ரஷ்ய எழுத்தாளரான இவான் துக்னோவ் என்பவர் எழுதிய 'முதல் காதல்' என்கிற கதையை அடிப்படையாகக் கொண்டு எழுதப்பட்டது இந்தப் படத்தின் கதை" என்று இரண்டாவது டைட்டில் கார்டு போடப்பட்டிருக்கிறது. கூடவே 'நாவல் வடிவம்  - ஜெயமோகன்' என்றும் வருகிறது.

ஆனால் நிஜத்தில் என்னவோ வேறு மாதிரியாகத்தான் இருக்கிறது.

1982-ம் ஆண்டு பி.கே.கிருஷ்ணன் என்பவரின் இயக்கத்தில் வெளி வந்த 'மழு' என்கிற மலையாளத் திரைப்படம், 'மாமனாரின் இன்ப வெறி' என்று தலைப்பு மாற்றம் செய்யப்பட்டு தமிழ்நாட்டில் வெற்றிகரமாக பல ஆண்டுகள் ஓடியது. 

இப்போது இதே படத்தையே லேசுபாசாக தூசுத் தட்டி மறுபடியும் நமக்குக் கொடுத்திருக்கிறார். வருங்கால 'ஆஸ்கார் இயக்குநர்' திரு.சாமி.

ஏற்கெனவே இவர் எடுத்தத் திரைப்படங்களின் அடிநாதங்கள் அனைத்துமே காமத்தைக் கரை சேர்க்கும் விதமாகவே இருந்து தொலைய.. இத்திரைப்படத்தின் தயாரிப்பின்போதும், கடைசியாக திரையிடப்பட்ட இந்த ஒரு மாதக் காலக்கட்டத்திலும் இப்படத்தின் கதை பற்றி முடிந்த அளவுக்கு பரபரப்பை ஊட்டி படத்திற்கும், தனக்கும் விளம்பரத்தைத் தேடிக் கொண்டார்.

நாடோடிகள் என்றொரு திரைப்படத்தைத் தயாரித்துவிட்டு இந்தத் திரைப்படத்தையும் தயாரிக்க முன் வந்திருக்கும் இத்திரைப்படத்தின் தயாரிப்பாளரை எவ்வளவு வேண்டுமானாலும் திட்டலாம்.

வீட்டில் அப்பாவுக்கோ, தாத்தாவுக்கோ, பாட்டிக்கோ கண் வலி.. பேப்பர் படிக்க முடியவில்லை என்று கூறி நம்மிடம் தினத்தந்தியைக் கொடுத்து படித்துக் காண்பிக்கச் சொன்னால் நாம் என்ன செய்வோம்..? எது செய்தி என்று நமக்குத் தெரிந்ததோ, எது செய்திகள் என்று சொல்லப்படுகின்றனவோ அவற்றை மட்டுமேதான் சொல்வோம்..

தினத்தந்தியில் ஏழு காலம் அளவுக்கு கள்ளக்காதல் செய்திகள் இருக்கின்றன என்பதால் அவற்றை நாம் ஊர் முழுக்க கேட்பதுபோலவோ, நம் வீட்டிற்குள்ளேயே அடுத்த நபர்களுக்குக் கேட்பது போலவோ நாம் படிப்பதில்லை. இது நமக்கு நாமே போட்டுள்ள கடிவாளம்.

திருமணம் முடிந்தால் மணமக்கள் இரவில் எந்த அறையில் தங்குகிறார்களோ அந்த அறையில், அவர்களுக்கிடையில் என்ன நடக்கும் என்பது அந்த வீட்டில் இருப்பவர்களுக்கும் தெரியும்.. பக்கத்து வீட்டில் இருப்பவர்களுக்கும் தெரியும்.. ஆனால் குழந்தைகளுக்கு மட்டும்தான் தெரியாது. திருமணம் முழுவதையும் குழந்தைகளிடம் காண்பிக்கும் நாம் இதனை மறைக்கத்தான் செய்கிறோம்.. அது ஒரு சாதாரண நிகழ்வாக ஒதுக்கித் தள்ளுகிறோம். காரணம், அது நம் மனதை பிசாசாக்கிவிடக் கூடாது என்பதற்காகத்தான்.

அதற்காக எந்த அத்துமீறலான காதலும், காமமும் நம் சமூகத்தில் இல்லவே இல்லை என்று நாம் ஒருபோதும் சொல்லிவிட முடியாது. ஆனால் இதையெல்லாம் நாம் வெளிச்சம் போட்டுக் காட்டுகிறேன் என்று சொல்லி படமெடுத்து வைத்தால் இதனைக் குடும்பத்தோடு எப்படி வந்து பார்ப்பது..?

ஏற்கெனவே தியேட்டர்களுக்கு வந்து படம் பார்க்கும் கூட்டம் மாதத்திற்கு மாதம் குறைந்து கொண்டே செல்கிறது. இந்த லட்சணத்தில் இது மாதிரி திரைப்படங்கள் வந்து தொலைவது நிச்சயம் திரையுலகத்தை இருட்டில்தான் தள்ளும்..

எவரோ ஒரு சென்சார் போர்டு உறுப்பினர் சொன்னாராம்.. “காலத்திற்கேற்றாற் போன்ற படம்தான்.. நல்லவிதமாகத்தான் கொடுத்திருக்கிறீர்கள்..” என்று.. படத்தைப் பார்த்த பின்புதான் தெரிகிறது.. சாமியும், அந்த சென்சார் போர்டு உறுப்பினரும் எந்த வகையான மனநிலையில் மாட்டிக் கொண்டிருக்கிறார்கள் என்று..

தென்னக சென்சார் போர்டு சர்டிபிகேட் தர மறுத்து ரீவைஸிங் கமிட்டிக்கு மும்பைக்குச் சென்று அங்குள்ளவர்கள் இரண்டு, மூன்று வசனங்களை மட்டுமே கட் செய்து ஏ சர்டிபிகேட் கொடுத்தனுப்பிவிட்டார்கள்.

மகனது டீன்ஏஜ் மனைவியான மருமகளை பெண்டாளத் துணியும் மாமனாரும்.. கணவன் அருகில் இல்லாத சூழலில் உடற்பசியின் தூண்டுதலில் மாமனாரையே கணவனாக்கிக் கொண்டு, கணவனாக இருப்பவனையே விரட்டியனுப்பும் மனைவியும்.. இவர்கள் இருவரின் கூட்டுக் களவாணித்தனத்தை கண்டுபிடித்தாலும், கல்லூரியில் படிக்கின்ற,  போதிய பக்குவமில்லாத காரணத்தாலும்.. கணவன் ஏதும் சொல்ல முடியாமல் தவிக்க.. கடைசியில் இந்த மூவரின் கதி என்னாகிறது என்பதைத்தான் நம்ம அண்ணன் சாமி, திரைக்காவியமாக படைத்திருக்கிறார்.

நம் கண் முன்னே எடுக்கப்பட முடியாமல், தெரியாமல் எத்தனையோ கதைகள் இன்னமும் புதைந்துபோய் கிடக்க அதையெல்லாம் கிண்டாமல், கிளறாமல் வாலிப வயதின் அடையாளத்தையே மறுபடியும், மறுபடியும் உசுப்பிவிட்டு, அதன் ஒரு பகுதியைக் காட்டுகிறேன் என்று சித்து விளையாடுவது இயக்குநருக்கு இதைத் தவிர வேறு எதுவும் தெரியாது என்பதைத்தான் காட்டுகிறது.

ஒரு பக்கம் களவாணியும், வம்சமும் நம் தமிழ் மண்ணைக் கிளறி புத்தம் புது வாசனையையும், புதுவித கிறக்கத்தையும் திரையுலகின்பால் ஈர்த்துக் கொண்டிருக்கும் நேரத்தில் இது மாதிரி நெருஞ்சி முள் திரைப்படங்கள் நமக்குள் உட்புகக் கூடாது.

ஒருவனை கெட்டவன் என்று காட்ட எத்தனை, எத்தனை கொடுஞ்செயல்களை அவன் செய்கிறான் என்பதுபோல் காட்டிவிட்டு கடைசிக்கு முந்தின ரீலில் அவனுக்குத் தத்துவ மழையாக அட்வைஸை அள்ளிப் பொழிந்து, அவனைத் திருத்திவிட்டு இதோ பார் திருந்திவிட்டான். நீங்களும் திருந்திவிடுங்கள். இதுவொரு வாழ்க்கைப் பாடம்.. பலரது கண்களையும் திறக்கவே இப்படியெல்லாம் படம் எடுக்கிறேன் என்று சொல்வதெல்லாம் ச்சும்மா பம்மாத்து.

படத்தின் இரண்டாவது ரீலில் துவங்கி மாமனார் திருந்துவதற்கு முந்தின ரீல்வரையிலும் காமத்தை வசனங்களிலும், காட்சியமைப்பிலும், மாறி மாறி ஓவர் டோஸாக கொடுத்துவிட்டு கடைசியில் அட்வைஸ் செய்வது என்னவோ 1985 காலத்து மலையாள பிட்டு படங்களை பார்த்ததுபோலத்தான் இருந்தது. ஒரு உதாரணமான டயலாக்.. கோஹினூர் பாக்கெட்டை காட்டி “யூஸ் பண்ணிட்டீன்னா தூக்கிப் போட்டுராத.. அதைக் கழுவி, காய வைச்சு, அயர்ன் பண்ணி திருப்பி யூஸ் பண்ணிக்கலாம்..”

லாஜிக் ஓட்டை என்பதெல்லாம் கிளைமாக்ஸில் படகில் ஓட்டை விழுந்து குப்புறக் கவிழ்வதைப் போல காட்சிக்கு காட்சி பல்டிதான்.. லாஜிக் ஓட்டைதான். எப்படியும் காமத்தையும், முறையற்றதையும் காட்டுவதாக முடிவு செய்துவிட்டதால் மக்கள் அதையெல்லாம் கண்டு கொள்ள மாட்டார்கள் என்றெண்ணி இஷ்டத்துக்கு திரைக்கதை எழுதியிருக்கிறார்.

முழுக்க, முழுக்க நம்ப முடியாத திரைக்கதை, ஏற்றுக் கொள்ள முடியாத காட்சியமைப்புகளில் அத்துமீறலான காமத்தால் அத்துமீறியவர்கள் மீண்டும், மீண்டும் அதை அடையத் துடிப்பது ஏன் என்பதற்கான நிஜமான காரணத்தைச் சொல்லவில்லை. இது முழுக்க முழுக்க காமத்தால் நடந்த கதை, நடக்கும் கதை என்றான பின்பு எதற்கு நமது ஒழுக்கம், பண்பாடு பற்றிய பக்கம், பக்கமான வசனங்கள்.

காமத்தில் இருந்து மீள முடியாமல் ஒருவன் தவிக்கும்போது அது ஒரு வகை நோய் என்று நாம் அறிவதில்லை. அதனுடைய சூழலில் இருந்து தப்பிக்கும் வழியைக் கண்டறிந்து நாம் செல்வதுதான் சிறந்தது என்று நாம் நினைப்போம். ஆனால் செய்வதில்லை. ஒரு முறை செய்த தவறுக்கு வேண்டுமானால் சந்தர்ப்பத்தையும், சூழ்நிலையையும் குற்றஞ்சாட்டலாம். ஆனால் தொடர்ச்சியான அந்தக் குற்றத்திற்கு நாமேதான் முழு காரணமாக வேண்டும்..

படத்தை அக்குவேறு ஆணிவேறாக பிய்த்தெடுக்கலாம் போலத்தான் தோன்றியது. ஆனால் இந்தப் படத்துக்குப் போய் எதுக்கு இப்படியொரு பில்டப் என்று சோர்வடையாத எனது கைகளே சொல்கின்றன என்பதால் இத்தோடு நிறுத்திக் கொள்கிறேன்.

ஒன்றே ஒன்று.. இத்திரைப்படத்தில் மருமகளாக நடித்திருக்கும் அனகா என்ற இந்தப் புதுமுகத்திற்கு சரியான வழிகாட்டிகள் கிடைத்து, நல்ல வாய்ப்புகள் கிடைத்தால் நிச்சயம் அவர் கோடம்பாக்கத்தில் ஒரு பெரிய ரவுண்டு வரலாம்.

மற்றபடி குடும்பத்தோடு பார்க்கவே கூடாத, முடியாத திரைப்படங்களில் இதுவும்  ஒன்று.

வேறு ஏதாவது பொழைப்பு இருந்தால் போய்ப் பாருங்கள்..!

Tweet

இட்லி, தோசை, பொங்கல், வடை, சட்னி, சாம்பார்-17-08-2010

17-08-2010

என் இனிய வலைத்தமிழ் மக்களே..!

 கைது செய்ய முடியாமல் திணறும் கர்நாடக போலீஸ்..!

ஆடு திருடிய வழக்கு என்றாலே ஆளைப் பிடித்து உள்ளே போட்டுவிட்டுத்தான் மறுவேலை பார்க்கும் போலீஸார், குண்டுவெடிப்பு வழக்கில் தேடப்படும் ஒருவரை கைது செய்ய முடியாமல் தவிப்பது விந்தைதான்.

2008-ம் ஆண்டு ஆகஸ்ட் 16-ம் தேதி பெங்களூரில் நடந்த குண்டுவெடிப்பு வழக்குத் தொடர்பாக கேரளாவின் மக்கள் முன்னணியின் தலைவரான அப்துல் நாசர் மதானி 31-வது குற்றவாளியாகச் சேர்க்கப்பட்டிருக்கிறார்.  இவரைக் கைது செய்ய பிடிவராண்டு பிறப்பித்து ஒரு மாதமாகியும் கர்நாடக போலீஸார் கேரளாவில் முகாமிட்டு பத்து நாட்களுக்கு மேலாகியும் இன்னமும் அவரைக் கைது செய்ய முடியவில்லை. முடியவில்லை என்பதற்கு உண்மையான காரணம் இந்தக் கைதால் மாநிலத்தில் சட்டம் ஒழுங்கை சீர்கெடுத்து விடு்மோ என்கிற பயம் இரு மாநில அரசுகளுக்கும் இருப்பதுதான். 

மதானி தாக்கல் செய்த முன் ஜாமீன் மனுவை பெங்களூர் தனி நீதிமன்றமும், உயர் நீதிமன்றமும் தள்ளுபடி செய்தன. அவரை கைது செய்ய பெங்களூர் மெட்ரோபாலிட்டன் நீதிமன்றம் வாரண்ட் பிறப்பித்தது.  இதையடுத்து அவரை கைது செய்வதற்காக பெங்களூர் மத்திய குற்றப் பிரிவு போலீஸ் கமிஷனர் சித்தராமைய்யா தலைமையில் 6 போலீ்ஸ் அதிகாரிகள் கடந்த 10-ம் தேதி கொல்லம் சென்று இன்னமும் காத்துக் கொண்டிருக்கின்றனர். ஆயிரக்கணக்கான தொண்டர்கள் மதானியின் வீட்டருகே குவிந்ததால் பிரச்சினை பெரிதாகும் என்று நினைத்து கைது நடவடிக்கைக்கு கேரள போலீஸார் அனுமதிக்க மறுத்துவிட்டனர்.

கேரள உள்துறை அமைச்சர் கொடியேறி பாலகிருஷ்ணனோ “மதானி தகுந்த நேரத்தில் கைது செய்யப்படுவார். அதைச் செய்ய வேண்டியது கர்நாடக போலீஸார்தான். சட்டம் ஒழுங்கையும் நாங்கள் பார்க்க வேண்டியுள்ளது. எனவே கைதை இன்னும் அனுமதிக்காமல் உள்ளோம்” என்று கூறினார்.

இப்போது முன் ஜாமீன் கோரி உச்சநீதிமன்றத்தை அணுகியுள்ளார் மதானி. கொல்லம் மாவட்டமே இப்படி டென்ஷனில் சாமியாடிக் கொண்டிருக்கும் சூழலில், சுப்ரீம் கோர்ட்டில் மனு விசாரணைக்கு வரும்வரை மருத்துவமனையில் இருக்கலாமே என்ற யோசனையில் கொல்லம் மருத்துவமனையில் அட்மிட்டாகிவிட்டார் மதானி.

இதுவே சாதாரணமான ஒரு பொதுஜனமாக இருந்தால் நிலைமை என்னவாகியிருக்கும்..?



சந்தித்து கொண்ட காதலியும், மனைவியும்..!

சென்ற மாதம் பாலிவுட்டில் பரபரப்பான நியூஸே இதுதான்.. ஒரு காலத்தில் எலியும், பூனையுமாக இருந்த ஜெயாபச்சனும், எவர்கிரீன் ஹீரோயினும், அமிதாப்பின் முன்னாள் காதலியுமான ரேகாவும் ஒரு நிகழ்ச்சியில் சந்தித்துக் கொண்டதுதான்..!

கெளதம் ராஜயக்ஷயா என்பவர் எழுதிய புத்தகத்தின் வெளியிட்டு விழாவுக்கு வந்திருந்த ஜெயாவும், ரேகாவும் சந்திக்காமலேயே போவதற்கு வாய்ப்பிருந்தும், ரேகாவின் விருப்பத்தின்பேரில் சந்தித்தது வீடியோவில் பார்த்தாலே தெரிகிறது.. ரேகாதான் ஜெயாவிடம் சரண்டராயிருக்கிறார் என்று மறுநாள் அனைத்து பத்திரிகைகளும் புள்ளி வைத்து கோலம் போட்டு எழுதியிருந்தன.

1981-ல் வெளிவந்த யாஷ்சோப்ராவின் சில்சிலா என்ற திரைப்படத்தில்தான் ஜெயாபச்சனும், ரேகாவும் கடைசியாக இணைந்து நடித்திருந்தார்கள். இதில் இவர்களுடன் அமிதாப்பும் நடித்திருந்தார். கிட்டத்தட்ட இவர்களது முக்கோணக் காதல் கதையை ஒட்டியே படத்தின் கதையும் இருந்து தொலைந்து படத்திற்கு நல்ல பெயர் கிடைத்தது. ஜெயாவுக்கும் அமிதாப் கிடைத்தார். ரேகாதான் பாவம்..!

புகைப்படக்காரர்களுக்கு அன்றைக்கு செமத்தியாக தீனி கிடைத்தாலும், கஜோல், பத்மினி கோலாப்பூரி, ஹேமமாலினி லதா மங்கேஷ்கார், ஆஷா போன்ஸ்லே, என்று இன்னொரு ஹாட்டான பார்ட்டிகளெல்லாம் இதே விழாவுக்கு வந்திருந்தும் அவர்களை படம் எடுக்க ஆளில்லாமல் போனதால் அவர்கள்தான் படு அப்செட்டாம்..!



ஈழத் தமிழன் சிவந்தனின் நடைப்பயணம்..!

மகிந்த ராஜபக்சே என்னும் இதயமில்லாத மனிதனின் பேராசையாலும், கொடுங்கோன்மையாலும் ஈழம் என்கிற கனவை தற்போதைக்கு சிதையுண்டு போனாலும், லட்சக்கணக்கான தமிழ் இளைஞர்கள் மத்தியில் அந்தக் கனவு இன்னமும் நெருப்பாய் கனன்று கொண்டுதான் இருக்கிறது.

இலங்கையில் தமிழர் தாயகத்தில் இடம் பெற்ற தமிழின அழிப்பைக் கண்டித்தும் இதற்கு உடனடியாக விசாரணை நடத்தி இன அழிப்பில் ஈடுபட்டவர்களை சட்டத்திற்கு முன் நிறுத்த வேண்டுமென்றும், முகாம்களில் அடைத்து வைக்கப்பட்டுள்ள முன்னாள் போராளிகள் மற்றும் அரசியல் கைதிகள் விடுதலை செய்யப்பட வேண்டும் என்ற கோரிக்கைகளை முன்வைத்தும் சென்ற மாதம் 23-ம் நாள் வெள்ளிக்கிழமை நள்ளிரவு லண்டனில் இருந்து ஜெனீவாவில் உள்ள ஐ.நா. தலைமையகத்தை நோக்கி நடைப்பயணம் மேற்கொண்டு வருகிறார். லண்டனில் இருந்து பிரான்ஸ், இத்தாலி வழியாக கிட்டத்தட்ட 900 கிலோ மீட்டர்கள் தூரத் தொலைவை கடந்து ஜெனீவாவை அடையவிருக்கும் சிவந்தனின் இந்த நடைப்பயணத்திற்கு எனது மனப்பூர்வமான பாராட்டுக்களைத் தெரிவித்துக் கொள்கிறேன்.

ஒரு நாளைக்குக் கிட்டத்தட்ட 12 மணி நேரம் நடந்து சென்று கொண்டிருக்கும் சிவந்தனுடன் ஒவ்வொரு நாட்டிலும், ஆங்காங்கே பல ஈழத் தமிழர்களும் அந்த நாட்டு எல்லை வரையிலும் அவருடன் நடந்து சென்று அவரை ஊக்குவித்து வருகிறார்கள்..! இன உணர்வு என்பது இருக்கிறது.. இனத்தைக் காக்க போராட வேண்டிய தைரியமும், ஆற்றலும் நம்மிடையே உண்டு என்பதை நமக்கே சொல்லிக் கொடுத்துக் கொண்டிருக்கும் இந்த சிவந்தனை எத்தனை பாராட்டினாலும் தகும்..!

சிவந்தனின் நடைப்பயணத்தில் அவர் ஒரு நாளைக்குக் கடக்கும் தூரத்தை வைத்து எத்தனை நாட்களில் அவர் ஜெனீவாவை வந்தடைவார் என்று கணிக்க முடியாததால் தற்போதைக்கு தேதியை உறுதிப்படுத்த முடியாமல் உள்ளது என்கிறார்கள். ஜெனீவாவின் ஐ.நா. மனித உரிமைகள் சபை தலையமைகத்தின் முன்பாக இருக்கும் ஈகப் பேரொளி முருகதாசன் திடலில், ஈழத் தமிழர்களின் மாபெரும் கண்டனக் கூட்டமும் நடைபெறவிருக்கிறது.

ஐ.நா.வின் போர்க் குற்ற விசாரணைக் குழுவையே எதிர்த்து போராட்டம் நடத்தி ஐ.நா. அலுவலகத்தையே மூட வைக்கின்ற அளவுக்கு வெறியர்களாக உள்ள சிங்கள இனவாத ஆட்சிக்கு எதிராக ஐ.நா. கடும் நடவடிக்கைகளை எடுத்தே தீர வேண்டும். சிவந்தன் ஐ.நா.விடம் சமர்ப்பிக்கவுள்ள மனுவில் ஈழத் தமிழர்கள் மட்டுமல்ல.. தமிழகத்தில் உள்ள ஈழத்து ஆதரவு தமிழர்களின் உளப்பூர்வமான ஒப்புதலும் இருக்கிறது.

http://www.vgtv.no/?id=31467&category=1

கணவன் மனைவி சண்டை - ஒரே நாளில் காணாப் போச்சு..!

கணவன், மனைவி சண்டையென்றால் சில நிமிடங்கள். சில நாட்கள் என்பதெல்லாம் நிஜம்தான் போலிருக்கிறது.

முதல் நாள் காலை, தனது கணவரான ராகுல் மகாஜன் தன்னை அடித்து உதைத்து, முடியைப் பிடித்திழுத்து வீட்டிற்கு வெளியே தள்ளிவிட்டதாக போலீஸ் ஸ்டேஷன்வரைக்கும் சென்று புகார் பாடினார் ராகுலின் மனைவி டிம்பி.

லட்டு மாதிரி கிடைத்த செய்தியை வடக்கத்திய சேனல்காரர்கள் விட்டுவிடுவார்களா என்ன..? காலையில் இருந்து மறுநாள் காலைவரையிலும் இதை ஓட்டியே பொழைப்பை ஓட்டினார்கள்.

மறுநாளே இன்னுமொரு ஷாக் அவர்களுக்கு.. தம்பதிகள் இருவரும் ஜோடியாக சித்தி விநாயகர் கோவிலுக்கு வந்து பயபக்தியுடன் சாமி கும்பிட்டதை பார்த்து ஒரு கணம் திகைத்துதான் போனார்கள்.

அந்த புகார் என்னாச்சு என்ற கேள்விக்கு.. “அதை நீங்களும் மறந்திருங்க.. நாங்க மறந்திட்டோம்.. இது எங்க பெர்ஸனல் வாழ்க்கை.. இதுல இதுக்கு மேல தலையைக் கொடுக்காதீங்க” என்றார் ராகுல். இதை மட்டும் செய்திகளின் ஊடேயே காட்டிவிட்டு சமர்த்தாக ஒதுங்கிக் கொண்டன சேனல்கள்..

இந்த மீடியா தெய்வங்களுக்கு யாராவது தாலி அறுத்தால்தான் செய்தி போலிருக்கிறது.



கணவருக்கான அப்ரண்டீஸ் வேலையில் தேறிவிட்டார் சயீப்..!

போன மாதம் நான் எழுதிய கணவர்களைத் திருடும் நடிகைகள் -பாலிவுட் சர்வே  என்ற பதிவைப் படித்துவிட்டு அதிகமாகத் திட்டியும், குறைவாகப் பாராட்டியும் மடல் அனுப்பிய பிரசாத் என்னும் மும்பை நண்பர், இந்த லின்க்கை எனக்கு அனுப்பி வைத்துள்ளார்.

ஏதோ ஒரு விழாவில் கலந்து கொள்ள ஜோடியாக வருகிறார்கள் சயீப் அலிகானும், கரீனாவும்.. உள் அரங்கத்தில் மீடியாக்களின் பார்வைக்கு வந்தவுடன் கரீனாவுக்கு தனது உடை லூஸாகிவிட்டது போல் தோன்றியதாம்.. கணவர் வேலைக்குத் தற்போது டிரெயினிங் எடுத்துக் கொண்டிருக்கும் அப்ரண்டீஸான சயீப்பிடம் கரீனா ஏதோ சொல்ல.. கர்மசிரத்தையாக எஜமானியின் மேலாடையை இன்னும் கொஞ்சம் டைட் செய்கிறார் சயீப்..!

அப்ரண்டீஸ்லேயே இப்படின்னா பெர்மனன்ட்டுன்னு அப்பாயிண்ட்மெண்ட் கிடைச்சுட்டா இவர் நிலைமை என்னாகும்..?



வி.ஏ.ஓ. விண்ணப்பத்தினை பூர்த்தி செய்த கதை..!

ஏழு கழுதை வயசான பின்னாடிதான் நமக்குப் புத்தி வந்திருக்கு. கோடம்பாக்கமே கதி என்று சுற்றிய பின்பும், பத்திரிகையுலகில் அடுத்தப் புயல் நான்தான் என்று பிலிம் காட்டியபோதும், சீரியல் உலகில் எனக்கு நானே சீரியல் லைட் பிடித்தபோதும் வராத அறிவு இப்போது வந்திருக்கிறது.

காலம்போன கடைசியில் தற்போது டி.என்.பி.எஸ்.சி. அறிவித்திருக்கும் வி.ஏ.ஓ. போஸ்ட்டுக்கு விண்ணப்பித்தால் என்ன..? தேர்வு எழுதினால் என்ன..? பாஸ் செய்தால் என்ன..? வேலை கிடைத்தால் பொழைப்பைப் பார்க்கப் போனால் என்ன என்று புத்தி வந்திருக்கிறது.

அப்ளிகேஷனில்தான் கொஞ்சம் பிரச்சினை..! முக்கியமான தலைமை அஞ்சலங்களிலும், சென்னையில் டி.என்.பி.எஸ்.சி. அலுவலகத்திலும் மட்டுமே விண்ணப்பங்கள் கொடுக்கப்படுகின்றன. விண்ணப்பத்துடன் தரப்படும் குறிப்பேடு டி.என்.பி.எஸ்.சி. வெளியிடும் அனைத்துப் பதவிகளுக்குமான பொது குறி்ப்பேடு. இந்த வி.ஏ.ஓ. பதவிக்கான தனிக் குறிப்பேடு அல்ல.

அந்தக் குறிப்பேட்டில் விண்ணப்பத்தினரை பூர்த்தி செய்வது  எப்படி என்றுதான் விளக்கம் கொடுத்திருக்கிறார்களே தவிர, வி.ஏ.ஓ. பதவிக்கான விதிமுறைகள் எதுவும் அதில் இல்லை..

இதை எங்கடா போய் வாங்குறதுன்னு போன் செஞ்சு கேட்டா.. “பேப்பர்ல விளம்பரம் வந்துச்சே.. அதுல பாருங்க ஸார்.. நாங்க தனியால்லாம் அடிக்கலை. பேப்பர் கிடைக்கலைன்னா. நீங்க நெட்ல இருந்து டவுன்லோடு செஞ்சுக்குங்க”ன்னு அலட்சியமா சொல்லிட்டு போனை வைச்சுருச்சு ஒரு தாய்க்குலம்..

எனக்குப் பரவாயில்லை.. டவுன்லோடு செஞ்சுட்டேன்.. எங்கிட்டோ காரியாப்பட்டில இருக்கிறவன் என்ன செய்வான்..? அந்த விளம்பரம் வந்த அன்னிக்கு பேப்பரை வாங்காதவன் எங்கெங்க தேடியிருப்பான்..? அவனுக்கெல்லாம் எப்படி கிடைக்கும் இது..?  

இந்த லட்சணத்துல அந்த அப்ளிகேஷன் 30 ரூபா. முப்பது ரூபாயை மட்டும் வாங்கத் தெரிஞ்சவங்களுக்கு விதிமுறைகளை இணைச்சுக் கொடுக்கணும்ன்ற குறைந்தபட்ச அறிவுகூட இல்லையா..? எப்படித்தான்யா இந்த அதிகாரிகளைத் திட்டுறது..?

சதாவின் உண்மையான அழுகை..!

இது ஹைதராபாத்தில் இருந்து எனது தம்பி செந்தில்குமார் அனுப்பியது. எந்தக் காலத்தில் எடுத்ததோ தெரியவில்லை.

போய்யா போ என்று வலிப்பு நோய் வந்ததைப் போல ஜெயம் படத்தில் நடிப்பைக் காட்டிய சதா என்னும் நமது முன்னாள் தமிழ் நடிகை தெலுங்கில் ஒரு படத்தில் நடிக்கும்போது பாடல் காட்சியில் யூனிட்காரங்க தன்னைப் படுத்திய பாட்டை பார்த்து திடீரென்று அழுது தீர்த்து “நடிக்க மாட்டேன்” என்று சொல்லிவிட்டு ஓடிய ஒரிஜினல் காட்சிதான் இது..! என்ன படம் என்பதை யாராவது சொன்னால் தெரிந்து கொள்கிறேன்..!

நிஜமாகவே இந்தப் பொண்ணு ஸ்கிரீனைவிட  நிஜத்துல  நல்லாவே கண்ணீர் விடுதுங்க..!



தாத்தா நெல்சன் மண்டேலாவுக்கு வந்த சோதனை..!

வயசான காலத்துல ஒரு மனுஷனுக்கு இப்படியெல்லாம் பிரச்சினை வந்தா எப்படிங்க..?

தென்னாப்பிரிக்காவின் காந்தி தாத்தாவான நம்ம நெல்சன் மண்டேலாவின் புறக்கணிக்கப்பட்ட மகள் நான் என்று போன வருடம் இறந்து போன தென்னாப்பிரிக்க பெண்மணி ஒருவர் சொல்லியிருப்பதுதான் சென்ற வாரம் தென்னாப்பிரிக்காவில் ஹாட் நியூஸ்.

மாபூலே என்னும் அந்தப் பெண்மணி சென்ற ஆண்டு இறந்து போனார். அவர் எழுதி வைத்திருக்கும் கடிதங்களும், விட்டுச் சென்ற ஆதாரங்களும்தான் இப்போது மண்டேலாவின் நியாயவான் கோட்டையை கொஞ்சம் அசைத்திருக்கிறது.

தனது தாயாரான செய்பதி மோனாகலிக்கும், மண்டேலாவுக்கும் 1945-ம் ஆண்டில் உறவு இருந்ததாகவும், அதன் பலனாய் பிறந்த தன்னை இத்தனை நாட்களாக மண்டேலா ஏற்றுக் கொள்ளாமல் புறக்கணித்துவிட்டதாக எழுதி வைத்திருக்கிறார் மாபூலே.

பேக்கரியில் வேலை பார்த்து வந்த மாபூலே, தனது ஆறு பிள்ளைகள் மற்றும் 12 பேரப் பிள்ளைகள் சூழ வாழ்ந்தாலும் தனது தந்தை மண்டேலா என்பதை நிரூபிக்க முடியாத பெரும் வருத்தத்தில் இருந்திருக்கிறார். இதற்காக மண்டேலாவையும், அவரது குடும்பத்தினரையும் சந்திக்க பல முறை முயன்றும் முடியவில்லை என்றும் வருத்தப்பட்டுச் சொல்லியிருக்கிறார். தான் இறப்பதற்கு ஒரு மாதத்திற்கு முன்பு மாபூலே, மண்டேலாவுக்கு எழுதிய உணர்ச்சிகரமான கடிதத்தையும் அந்தப் பத்திரிகைகள் வெளியிட்டுள்ளன.

“அன்புள்ள அப்பா.. நம்முடைய நீண்ட கால உணர்ச்சிப்பூர்வமான, ரகசியமான உறவு முறையை இப்போது நான் தொட்டிருப்பதற்காக உங்களிடம் மன்னிப்பு கேட்டுக் கொள்கிறேன். இப்போதும் உங்களிடம் நான் வைக்கும் கோரிக்கை என்னவெனில், உங்களைச் சந்திக்க எனக்கு அனுமதி தரும்படி இப்போதும் வேண்டுகிறேன். ஏனெனில் நீங்கள்தான் எனது தந்தை. நான் தங்களுடைய ரத்த வாரிசுதான் என்பதை நான் உறுதியாக நம்புகிறேன்..” இப்படி எழுதப்பட்டிருக்கிறது அந்த பாசக் கடிதம்..!

மாபூலேவுக்கு தான் மண்டேலாவின் மகள் என்கிற விஷயமே 1998-ம் வருடம் அவரது பாட்டியான வின்பிரட் மோனாகலி சொல்லித்தான் தெரியுமாம். அவருடைய தாயார் செய்பதி மோனாகலியோ, 1992-ம் ஆண்டு இறக்கின்றவரையிலும் மாபூலேயின் அப்பா பற்றிய எந்தத் தகவலையும் சொல்ல மறுத்துவிட்டாராம்..

மண்டேலா வெற்றிகரமான இளம் வழக்கறிஞராகப் பணியாற்றியபோது அப்படி, இப்படி இருந்ததெல்லாம் ஆப்பிரிக்க கண்டம் முழுவதுமே தெரிந்ததுதான் என்றாலும் வாரிசுகள் என்று கிளம்பி வந்திருப்பது இதுதான் முதல் முறை என்கிறார்கள்.  இதையேதான் மண்டேலாவின் பேரன் மண்ட்லாவும் பத்திரிகையாளர்களிடம் சொல்லியிருக்கிறார். “இது மாதிரி நிறைய பேர் இதுவரையிலும் எங்களிடம் வந்து சொல்லியிருக்கிறார்கள். நாங்களும் மண்டேலா பேமிலிதான் என்று.. எத்தனை பேரைத்தான் எங்களால் ஒத்துக் கொள்ள முடியும்.. எங்க தாத்தா கிளியரா சொல்லிட்டாரு.. மூணே மூணு கல்யாணம்தான் என்று.. ஸோ.. அவ்வளவுதான்.. மாபூலே விஷயத்துல அவர் உசிரோட இருந்தால்கூட டி.என்.ஏ. டெஸ்ட் எடுத்துப் பார்க்கலாம். இப்போதான் அவர் இல்லையே.. பின்பு எப்படி உறுதி செய்வது..?” என்று சொல்லியிருக்கிறார்.

நெல்சன் மண்டேலா தரப்பில் இருந்து இதுவரையிலும் எந்தப் பதிலும் இதற்கு வரவில்லை. ஆனாலும் மாபூலே தெரிவித்திருக்கும் செய்திகளின் அடிப்படையில் அதனை ஆராய்ந்து பார்த்த நெல்சன் மண்டேலா பவுண்டேஷனின் அதிகாரிகள் இதில் அதிகம் உண்மையிருப்பதாக மண்டேலாவின் புதல்வி ஜிண்ட்ஜிக்கு கடிதம் அனுப்பிவிட்டு பதிலுக்காகக் காத்திருக்கிறார்களாம்..

நடிகை கவிதாவின் ஓப்பன் ஸ்டேட்மெண்ட்..!

குழந்தை நட்சத்திரமாக அறிமுகமாகி டீன் ஏஜில் வழக்கமாக கதாநாயகியாக உருவெடுத்து, ஆடிக் களைத்த பின்பு அம்மா கேரக்டரிலும் நடித்து முடித்து, இந்தியத் திரையுலகத்தின் வழக்கமான ரிட்டையர்ட்மெண்ட்டுக்கு அப்புறமான வேலை என்பதைப் போல தற்போது அரசியலில் தலையெடுத்திருக்கும் கவிதா அம்மணியைப் பற்றி தெலுங்குலகில் தற்போது பரபர செய்திகள்.

நடிகை ரோஜா தெலுங்கு தேசத்தில் விலகிய பிறகு, தற்போது அக்கட்சியில் ஸ்டார் அந்தஸ்தில் இருக்கின்ற கவிதாவுக்கு வாய் ரொம்பவே ஜாஸ்தி என்கிறார்கள் டாலிவுட் பத்திரிகையாளர்கள்.

தெலுங்கு தேசத்தில் சேரும்போதே சிரஞ்சீவி கட்சியில் இணைவதற்கு தன்னிடம் பணம் கேட்டதாக ஒரு புயலைக் கிளப்பி சிரஞ்சீவிக்கு எதிராக முதல் கரும்புள்ளியைக் குத்திவிட்டவர் இவர்தான்..!

தன்னுடைய வீட்டில் பணியாற்றிய இளம் பெண்களைத் தரக்குறைவாக, ஜாதிப் பெயரைச் சொல்லித் திட்டியதாகவும் இவர் மீது வழக்குப் பதிவாகியுள்ளது..! அவ்வளவு பேச்சு பேசுவார் என்கிறார்கள்.

தமிழில் ஏதோ ஒரு படத்தில் நடிக்கின்றபோது உடன் நடித்த வடிவுக்கரசியுடன் லேசான மோதலில் ஆரம்பித்து கடைசியில் அது கை கலப்பு வரையிலும் போனது கோடம்பாக்கத்து நியூஸ்..!

தமிழைவிட தெலுங்கில்தான் அம்மணி நிறைய படங்களில் நடித்திருக்கிறார். பூர்விகமும் அதுதான். தான் தயாரித்த அதிகமான படங்களில் கவிதாவை நடிக்க வைத்திருக்கும் தெலுங்கு தயாரிப்பாளர் அம்பிகா கிருஷ்ணா கவிதாவைப் பற்றிச் சொல்கையில், ஒரு ஊதுபத்தி எரிஞ்சு முடியறதுக்குள்ள கவிதாகிட்ட நாம 50 கெட்ட வார்த்தையாவது கத்துக்கலாம். அவ்வளவு நல்ல வார்த்தைகள் வரும் அந்தம்மாகிட்டேயிருந்து..” என்று சொல்லியிருப்பது ஹாட் நியூஸ்..

இதுதான் இப்படியென்றால் சமீபத்தில் மிக நீண்ட நாட்கள் கழித்து சென்னைக்கு ஷூட்டிங்கிற்காக வந்த கவிதா, ஒரு மதிய நேரத்தில் தான் தங்கியிருந்த ஹோட்டல் பாரில் கொஞ்சூண்டு ஏற்றிக் கொண்டு விட்ட சவுண்ட்டில் பாரில் வேலை செய்தவர்களே அரண்டு போய், “இனிமே அந்த சினிமா கம்பெனிக்கு இங்க ரூம் தரக்கூடாது” என்று கண்டிஷனாகச் சொல்லியே விட்டார்கள்.

இது இப்படியிருக்க.. அம்மணி இதன் பின்பு ஒரு பத்திரிகைக்கு அளித்த பேட்டியில் மிகச் சாதாரணமாகச் சொல்லியிருப்பதுதான் டாலிவுட்டை கொஞ்சம் கலக்கியிருக்கிறது. “நான் வாய்ப்புக்காக எந்த அளவுக்கும் இறங்கி வருபவள் அல்ல.. இதுவரைக்கும் என் விருப்பமில்லாமல் எவனும் என்னைத் தொட்டதில்லை..! பட வாய்ப்புக்கிற்காக எந்தத் தயாரிப்பாளரிடமும் நான் படுத்ததில்லை..” என்று ஓப்பன் டாக்கில் அள்ளிவிட.. அரசியல் அரங்கைவிட டாலிவுட்டே கொஞ்சம் பதைபதைத்துதான் போயிருக்கிறது..!

பார்த்ததில் பிடித்தது

பிரபல மலையாள நடிகர் உண்டபக்ருவும், அவரது மனைவி காயத்ரியும்..!

நன்றி..!

மீண்டும் அடுத்த வாரம் சந்தி்ப்போம்..!

Tweet