தாவூத் இப்ராஹிமின் கூட்டாளிதான் ஸ்பெக்ட்ரம் குற்றவாளி பால்வா..!

18-02-2011

என் இனிய வலைத்தமிழ் மக்களே..!

2-ஜி ஸ்பெக்ட்ரம் ஊழலில் சிக்கியிருக்கும் ஸ்வான் நிறுவனத்தின் தலைவர் சையத் உஸ்மான் பால்வா கைது செய்யப்பட்டது குறித்து எழுதப்பட்ட இந்தப் பதிவிலேயே என்னை ஆச்சரியப்படுத்திய ஒரு விஷயம் இருந்தது. அது  பால்வா நிர்வாக இயக்குநராக இருக்கும் டி.பி.ரியாலிட்டீஸ் நிறுவனத்தின் துணைத் தலைவர் நிழல் உலகத் தாதா தாவூத் இப்ராஹிம் என்று குறிப்பிட்டிருந்ததுதான்.

இது உண்மையாக இருக்குமா என்றெல்லாம் குழப்பம் எனக்குள்ளும் நீடித்திருந்தது. கராச்சியில் தலைமறைவாக இருந்து கொண்டு அவ்வப்போது துபாய்க்கு வந்து தனது சர்வதேச கடத்தல் தொழிலைச் செய்து வருவதாக சிபிஐ குற்றம் சாட்டியிருக்கும் தாவூத் இப்ராஹிம் எப்படி இந்தியாவில் செயல்படும் ஒரு நிறுவனத்தில் துணைத் தலைவராகவும், அதன் தொடர்பிலும் இருக்க முடியும் என்கிற கேள்வி எனக்குள் இன்னமும் இருந்து கொண்டே வருகிறது.

இந்த ஆச்சரியத்தை இன்னமும் அதிகப்படுத்தி அது உண்மைதான் என்று சொல்கிறார் மகாராஷ்டிரா மாநிலத்தின் போலீஸ் டி.எஸ்.பி.சிவானந்தன்.

லேட்டஸ்ட் ஜூனியர்விகடன் பத்திரிகைக்கு அவர் அளித்திருக்கும் பேட்டியில் தாவூத் இப்ராஹிகமோடு ஸ்பெக்ட்ரம் ஊழலில் கைது செய்யப்பட்டிருக்கும் சையத் உஸ்மான் பால்வாவுக்கு தொடர்பு உண்டு என்று அடித்துச் சொல்லியிருக்கிறார்.

அந்தப் பேட்டி இங்கே உங்களுக்காக :

மகாராஷ்டிரா மாநிலத்தில் தற்போது போலீஸ் டி.ஜி.பி-யாக இருப்பவர்  சிவானந்தன் ஐ.பி.எஸ்., கோவையைப் பூர்வீகமாகக் கொண்டவர். கிட்டத்தட்ட 35 வருட போலீஸ் பணியில் இருந்து, இம்மாத இறுதியில் ஓய்வு பெறுகிறார்.

பல வருடங்களுக்கு முன்பு, மும்பையை ரிமோட் கன்ட்ரோலில் இயக்கிவந்த தாவூத் இப்ராஹிம் போன்ற நிழல் உலக தாதாக்களை அடக்கியவர். 300-க்கு மேற்பட்ட என்கவுன்ட்டர்கள் மூலம் மும்பையில் தாதாக்களின் ஆட்டத்தை தணிய வைத்த  பெருமையும் இவருக்கு  உண்டு.

கடந்த பிப்ரவரி 13-ம் தேதி சென்னை வந்திருந்தார் சிவானந்தன். எழும்பூரில் உள்ள போலீஸ் ஆபீஸர்ஸ் மெஸ்ஸில் அவரை நாம் சந்தித்தோம்!

 ''நீங்கள் ரிட்டயர்டு ஆனதும் கோவைக்கு வந்து செட்டில் ஆகப் போகிறீர்களா?''

''இல்லையில்லை... மகாராஷ்டிராவில்தான் வசிக்கப்​ போகிறேன். அந்த மக்களுக்கு என்னை நன்றாகத் தெரியும். இங்கே நான் அறிமுகமில்லையே! அது மட்டு​மில்லாது அங்கே போலீஸார் என்னை ஒரு யூனியன் தலைவராகத்தான் பார்க்கிறார்கள். அவர்களுக்கு என்ன அத்தியாவசிய தேவை ஏற்பட்டாலும் என்னை  உடனே தொடர்பு கொள்கிறார்கள். நானும் முடிந்ததை செய்து கொடுக்கிறேன்.

பதவி முடிந்ததும், முழு வீச்சில் இந்தப் பணியைத் தொடரும் திட்டம் வைத்திருக்கிறேன். போலீஸ்காரர்களின் வாழ்க்கை முறையை மாற்றுவதற்காக தானேயில் ஒரு பள்ளிக்கூடம் துவக்கியிருக்கிறோம். பிரம்மாண்டமான பில்டிங், பிரபல பள்ளிக்கூட பாடமுறை. கடந்த ஐந்து வருடத்தில் 2,000 மாணவர்கள் படித்து வருகிறார்கள். இதில் பாதிப்பேர் போலீஸ்காரர்களின் பிள்ளைகள். இவர்கள் நாளைக்கு டாக்டர், இன்ஜினீயர் படிப்புகளுக்குப் போக  நாங்கள் தூண்டுதலாக இருக்கிறோம்.

போலீஸாருக்கென்று மூணரை கோடி ரூபாய் செலவில் ஆஸ்பத்திரி, விளையாட்டு ஸ்டேடியம், ஹோட்டல் ஊர்ஜிதா, புரவிஷன் ஸ்டோர்ஸ், காபே போன்றவை அமைத்திருக்கிறோம். அவையெல்லாம் மேலும் வளர்ச்சி அடைவதற்கான செயல்பாடுகளை விட்டுவிட்டு இங்கே வர நான் நினைக்கவில்லை!'' 

''2ஜி ஸ்பெக்ட்ரம் ஊழலில் கைதாகி இருக்கும் ஷாகித் பால்வா மும்பையில் பிரபல புள்ளி. நீங்கள் மும்பை கமிஷனர், மாநில உளவுத்துறை தலைவராகவும் இருந்திருக்​​கிறீர்கள். இப்போது டி.ஜி.பி-யாக பதவியில் இருக்கிறீர்கள். பால்வாவுக்கும் நிழல் உலக தாதாவான தாவூத்துக்கும் ரகசிய தொடர்பு இருக்கிறதா?''

''மும்பையில் சாதாரண மக்களுக்குக்கூட இது தெரியும். பால்வாவுக்கும் தாவூத்துக்கும் கனெக்ஷன் உண்டு என்பதை யாரைக் கேட்டாலும் சொல்வார்கள். சாதாரண ஜனங்களுக்குத் தெரிவது போலீஸாருக்குத் தெரியாமல் இருக்குமா? சந்தேகத்தை கிளப்பும் பல தகவல்கள் சி.பி.ஐ. கையில் சிக்கியிருக்கும் என்றே நான் நினைக்கிறேன். அதனால்தான் துணிந்து கைது செய்திருக்கிறார்கள்.

 

பால்வாவுக்கு  மிக செல்வாக்குள்ள அரசியல் தலைவர்களது   ஆசி உண்டு என்பதும் அனைவருக்கும் தெரியும். மாநிலத்தின் சட்டம் - ஒழுங்கு, க்ரைம் விவகாரங்களில் பால்வா ஈடுபட்டிருந்தால், வேடிக்கை பார்த்திருக்க மாட்டேன். ஆனால், அவர் ரியல் எஸ்டேட் பிஸினஸில் பிரபலம்.

உதாரணத்துக்குச் சொல்வதென்றால், ஒரு சாதாரண பொதுஜனம் கஷ்டப்பட்டு 100 சதுர அடி நிலம் வாங்கி அதில் கட்டடம் கட்டப் போனால், அதற்கு ஆயிரம் தடை போடுவார்கள். ஆனால் பால்வா மாதிரியான மனிதர்கள் எவ்வளவு பெரிய பில்டிங்குகளையும் சர்வசாதாரணமாக எழுப்பி விடுவார்கள். எந்தத் தடையும் அவர்களது அதிகாரத்துக்கு குறுக்கே நிற்கமுடியாது. அந்த அளவுக்கு பவர்ஃபுல் கனெக்ஷன்கள் அவர்களுக்கு  இருக்கின்றன. ஆனால் இதெல்லாம் போலீஸ் கன்ட்ரோலில் வராது!''

''பால்வாவின் துபாய் தொடர்புகளை  வைத்து நீங்கள் நடவடிக்கை எடுக்க முடியாதா?''

''என்னை நீங்கள் கொல்ல வந்தால் நான் திருப்பித் தாக்கி  குற்றத்தைத் தடுக்கலாம். ஆனால் ஏ.ஸி. அறையில் உட்கார்ந்து கொண்டு கறுப்பு பணத் தொடர்பு மூலம் மிகப் பெரிய திட்டங்களை கொண்டு வந்து பிஸினஸ் செய்கிறார்கள். அவர்களுக்கு அரசியல் தொடர்புகள் வேறு இருக்கின்றன. மற்றபடி போலீஸுக்கும் அவர்களுக்கும் தொடர்பே இல்லையே?

இந்த நேரத்தில் பஞ்சதந்திரக் கதை ஒன்றுதான் எனக்கு நினைவுக்கு வருகிறது. ஒரு விவசாயி தோட்டத்தில் நாய் ஒன்றையும், கழுதையையும் கட்டி வைத்திருந்தானாம். நள்ளிரவு நேரத்தில் தோட்டத்துக்கு திருடன் வந்தால், நாய் குரைக்கும் என்பது விவசாயி எதிர்பார்ப்பு. ஒரு நாள் நாய் தூங்கிவிட்டது. திருடன் புகுந்துவிட்டான். அவனைப் பார்த்து பதறிய கழுதை கத்தியதாம். அதைக் கேட்ட திருடன் தாவிக் குதித்து ஓடிவிட்டான். கழுதையின் விடாத கத்தலைக் கேட்டு விழித்தான் விவசாயி. 'தூக்கத்தைக் கெடுக்கிறீயே' என்று சொல்லி, தடி எடுத்து கழுதையை விளாசி தள்ளினானாம். அது மாதிரி, அவர்களுக்கென ஒதுக்கப்பட்ட வேலையைத்தான் அவரவர்கள் செய்யவேண்டும். மாறிச் செய்தால், கழுதைக்கு ஏற்பட்ட கதிதான் என்பதை நன்றாகவே புரிந்து வைத்திருக்கிறேன்!''

''பால்வாவின் வளர்ச்சி காரணமாக, வெளிநாட்டு தீவிரவாதம் உள்நாட்டுக்குள் வந்துவிடாதா? கடல் மூலம் மும்பையை நோக்கி வரும் தீவிரவாதம் எந்த அளவில் இருக்கிறது?''

''ஆபத்து எப்போதும் இருக்கிறது. பால்வா 2ஜி-யில் என்ன பண்ணினார் என்பதை சி.பி.ஐ. விசாரிக்கிறது. கூடிய விரைவில் முழு விவரமும் தெரியவரும். தீவிரவாதத்தை முற்றிலும் ஒழிக்க, மகாராஷ்டிரா மாநிலத்தில் தற்போது உளவுப் பிரிவை ஆற்றல் மிக்கதாக உருவாக்கி வருகிறோம். நேரடி தேர்வு மூலம் உளவுப் பிரிவுக்காக பிரத்யேகமாக 2,000 பட்டதாரிகளைத் தேர்ந்தெடுத்து  பயிற்சி தருகிறோம். 'மகாராஷ்டிரா இன்டெலிஜென்ஸ் அகாடமி.காம்' என்கிற இணையத்தளத்தில் போய் பாருங்கள். பிரமித்துப் போவீர்கள்!''

நன்றி : ஜூனியர்விகடன்

ஒரு மாநிலத்தின் போலீஸ் டிஜிபியே தெள்ளத் தெளிவாகச் சொல்கிறார் நாட்டின் மிகப் பெரிய கிரிமினலுடன் தொடர்புடையவர் இந்த பால்வா என்று..! ஆனாலும் அதனை உறுதிப்படுத்தி அவரைக் கைது செய்ய முடியாத சூழல் இருக்கிறது என்பதையும் ஒத்துக் கொள்கிறார். இதற்காக அவர் சொல்லும் காரணம், பால்வாவின் அரசியல் தொடர்புகள். ஆம்.. அரசியல்வியாதிகளின் ஆதரவு இருந்தால் போதும்.. யார் வேண்டுமானாலும் தீவிரவாதியாக மாற்றப்படலாம். யார் வேண்டுமானாலும் புண்ணியவானாக மாற்றப்படலாம்.

தனது அதிகாரத்துக்கு ஒரு எல்லை உண்டு என்பதைச் சொல்லி கழுதை-நாய் கதையை உதாரணமாக்குகிறார் சிவானந்தன். சிரிப்பதைத் தவிர வேறு எதுவும் செய்ய முடியவில்லை.

அடுத்த முறை எங்காவது குண்டு வைக்கும்போது இந்த அரசியல்வியாதிகளின் குடும்பத்தினர் மட்டும் செத்துத் தொலைந்தால் அப்போதும் இப்படித்தான் இருப்பார்களா இவர்கள்..?

Tweet

ஆ.ராசாவின் உதவியால் 37 வயதில் 4500 கோடி சம்பாதித்த சாமர்த்தியம்!

12-02-2011

என் இனிய வலைத்தமிழ் மக்களே..!

தோண்டத் தோண்ட புதையலைப் போல ஸ்பெக்ட்ரம் விவகாரத்தில் சிக்கிக் கொண்டவர்களின் ஆதி அந்தத்தைத் தோண்டினால் இன்னமும் பல ஊழல்களும், முறைகேடுகளும் வெளியே வந்து கொண்டிருக்கின்றன..!

அந்த வகையில் லேட்டஸ்ட்டாக கைதாகியுள்ள ஸ்வான் டெலிகாம் நிறுவனத்தின் தலைவர் ஷாகித் பல்வாவின் கைது பற்றியும், அவரது வளர்ச்சி,  பிஸினஸ், சொத்துகள் பற்றியதுமான கட்டுரை இது..!

ஆ.ராசா, சித்தார்த் பரூவா, ஆர்.கே.சந்தோலியா ஆகிய மூவரை அடுத்து... நான்காவதாகக் கைதாகப் போவது ஆ.ராசாவின் சகோதரராகத்தான் இருக்கும் என்று டெல்லி மீடியாக்கள் நினைத்திருந்தன. அப்படி இல்லாவிட்டாலும்கூட, சென்னையில்தான் அடுத்த கைது இருக்கும் என்று நினைத்திருந்தார்கள்.

ஆனால் துளியும் எதிர்பார்க்காமல் தன் நான்காவது பாய்ச்சலை மும்பையில் காட்டியது சி.பி.ஐ.! ஸ்வான் டெலிகாம் நிறுவனத்தின் தலைவர் ஷாகித் பால்வா கைதானதில் கார்ப்பரேட் உலகத்துக்கு பலத்த அதிர்ச்சி! காரணம் இந்தியாவின் 66-வது பெரிய பணக்காரர் அவர்.

2-ஜி ஸ்பெக்ட்ரம் ஒதுக்கீட்டை அடிமாட்டு விலைக்கு வாங்கி, அபார விலைக்கு விற்றதன் மூலம் இந்த பால்வா குவித்த கோடிகள் எவ்வளவு என்பதைத்தான் தன் கஸ்டடியில் வைத்து விசாரிக்கத் துவங்கியிருக்கிறது சி.பி.ஐ. இவருடைய டி.பி.ரியாலிடி கம்பெனியையும், இதிலிருந்து நிழல் போல உருவான குபீர் கம்பெனிகளையும் மொத்தமாக தன் 'ஸ்கேனரில்' விட்டு சலித்துக் கொண்டிருக்கிறது சி.பி.ஐ.!

 'பால்வாவுக்கு கோடிகள் கொட்டியது எப்படி?' என்பது தவிர, 'கலைஞர் டி.வி-க்கு ஏன் 206 கோடி கொடுத்திருக்கிறார்? உண்மையிலேயே அது கடன்தானா? அல்லது, கடன் போல கை மாற்றப்பட்ட 'நன்கொடை' பணமா?’ என்ற ரீதியில் சி.பி.ஐ. இப்போது பால்வாவை கேள்விகளால் துளைத்தெடுத்துக் கொண்டிருக்கிறது.

அரேபியா மற்றும் மொரீஷியஸ் உள்ளிட்ட நாடுகள் வழியாக மறுபடி இந்தியாவுக்குள் வந்து சேர்ந்த ஸ்பெக்ட்ரம் ஊழல் பணத்தை டி.பி. ரியாலிடியின் இந்த நிழல் கம்பெனிகள் யாருக்கெல்லாம் கைமாற்றிக் கொடுத்தன என்று விசாரிக்கும்போது... திடுக்கிடும் தமிழகத் தொடர்புகள் அடுத்தடுத்து வெளியாகும் என்கிறார்கள்.

யார் இந்த ஷாகித் பால்வா?

'நொட்டை நொள்ளை காரணங்கள் சொல்லி இழுத்தடிக்காதீர்கள். எங்களோடு சேர்ந்து உடனே டெல்லி கிளம்புங்கள். விமானத்துக்கு லேட் ஆகிறது!'' என்று சி.பி.ஐ. கடுமை காட்ட... ''எக்ஸ்க்யூஸ் மீ... விமான நேரம் பற்றி நீங்கள் கவலைப்​படாதீர்கள். உங்களுக்கு ஆட்சேபனை இல்லை என்றால் என் சொந்த விமானத்திலேயே டெல்லிக்குப் போய்விடலாம்!'' என்று சொல்லி, தன்னைக் கைது பண்ணிய டீமையே திகைக்க வைத்திருக்கிறார் பால்வா! அதான் அவருடைய 'பியூட்டி'யே! அப்படியிருக்க பால்வா பற்றி மேலும் விவரமாக நாம் தெரிந்து கொள்ளாவிட்டால் எப்படி?

37 வயதாகும் பால்வா சன்னி முஸ்லிம். பூர்வீகம் குஜராத் என்றாலும் நீண்ட காலமாக மும்பைவாசி. படிப்பைப் பாதியிலேயே நிறுத்திவிட்டுக் குடும்பத் தொழிலான ஹோட்டலில் கவனம் செலுத்தத் தொடங்கினார். இந்தச் சமயத்தில் பால்வாவுக்கு மும்பையைச் சேர்ந்த அண்டர்வேர்ல்ட் தாதாக்களின் தொடர்பு  கிடைத்தது. இதில் தாவூத் இப்ராஹிமும் ஒருவர். இந்தத் தொடர்புகளோடு அரசியல் தொடர்புகளும் ஏற்பட்டது. இதில் முக்கியமானவர் மகாராஷ்டிர மாநில முதல்வராக இருந்த விலாஸ்ராவ் தேஷ்முக். இந்த தொடர்புகள் மூலம் தனது குடும்பத்தின் ஹோட்டல் தொழிலை விட்டுவிட்டு, ரியல் எஸ்டேட் தொழிலில் குதித்தார் பால்வா.

ஆரம்பத்தில் தேஷ்முக்குடான தொடர்புகளைக் கொண்டு இந்தத் தொழிலை விரிவுபடுத்தினார். மும்பையில் ரியல் எஸ்டேட் உச்சத்தைத் தொடும் முக்கியப் பகுதிகளில் ஆங்காங்கே குடிசைவாசிகள் குடியிருந்தனர். இவர்களை அரசியல் துணையோடு காலி செய்துவிட்டு அங்கு அடுக்கு மாடிக் கட்டடங்களைக் கட்டினார் பால்வா. இப்படி இவர் அகற்றிய குடிசைப் பகுதிகள் ஏராளம். 61  மில்லியன் சதுர அடியில் அமையும் 'மும்பை இந்தியா டவர்’ என்ற 135 மாடி அடுக்கு மாடிக் கட்டடம் போன்ற பணிகளில் இவரது நிறுவனம் ஈடுபட்டு வருகிறது. இதில் யார் யார் முதலீடுகள் இருக்கிறது என்பதும் மர்மமான விஷயம்தான். இது குறித்தும் பால்வாவிடம் விசாரணை நடக்கிறது.

2006-ல் வினோத் கோயங்கா என்கிற ரியல் எஸ்டேட் பிரமுகர் இவரோடு கூட்டு சேர்ந்தார். கோயங்காவுக்கு வேறு விதமான அரசி​யல் தொடர்புகளும் உண்டு. இருவரும் இணைந்து டபுள் பவரோடு பல காரியங்களைப் பார்த்தார்கள்.

கோயங்காவோடு கூட்டணி சேர்ந்த நேரம், மும்பையில் லி மெரிடியன் ஹோட்டலைக் கட்டும் கான்ட்ராக்ட் கிடைக்க, 'டயனமிக்ஸ் பால்வா குழுமம்’ என்ற நிறுவனம் உதயமானது. இந்தக் கட்டுமானம், இவர்களுக்கு மும்பையில் ஒரு அடையாளத்தைக் கொடுக்க... 'பிஸினஸுக்கு முக்கியம், நிறுவனத்தின் இமேஜ்’ என்பதை உணர்ந்த பால்வா, ஒரு விளம்பர நிறுவனத்தை அணுகினார். அந்த விளம்பர நிறுவனம் சொன்ன ஆலோசனையின்படி பால்வாவும் கோயங்காவும் தங்கள் கம்பெனியின் பெயரை முதல் வேலையாக 'டி.பி. குரூப்’ என்று மாற்றினார்கள்.

மத்தியில் ஆ.ராசா தொலைத் தொடர்புத் துறை அமைச்சராக ஆனதைத் தொடர்ந்தே இவருக்கு சுக்கிர தசை. இந்த நிறுவனத்துக்கு எப்படிப் பணம் வருகிறது, எங்கிருந்து வருகிறது என்று புரிந்துகொள்ள முடியாத அளவுக்குக் கடந்த ஐந்து ஆண்டுகளில் அசுர வளர்ச்சி கண்டது.

வெவ்வேறு பெயர்களில் பல நிறுவனங்களைத் துவக்கினார் பால்வா. கட்டடம் கட்டும் தொழிலைத் தாண்டி பழங்கள், காய்கறி, சினிமா என்று பல தரப்பட்ட நிறுவனங்களைத் தங்கள் கட்டுப்பாட்டுக்குள் கொண்டுவந்தார். அல்லது, அந்த துறைகள் மூலமாக பணம் வந்து சேர்ந்தது போல கணக்கு காட்டும் வேலையை நடத்தினார்.

'லோடா குழுமம்’ என்ற நிறுவனம் 127 மாடிகள் கொண்ட ஒரு கட்டடத்தை மும்பையில் கட்டப் போவதாக அறிவிக்க.... பால்வா, தன்னை இந்தத் தொழிலின் பிஸ்தா என்று காட்டிக்கொள்ளும் பொருட்டு, அதைவிட சுமார் இரண்டு மடங்கு உசரக் கட்டடம் கட்டுவதற்கு 'ஹயாத் ஹோட்டல்’ குரூப்புடன் ஒப்பந்தம் போட்டு, இந்தத் தொழில்காரர்கள் அத்தனை பேரையும் மூச்சடைக்க வைத்தார்!

கடந்த ஆண்டு மும்பையில் பல கட்டுமான நிறுவனங்கள், நிதி நெருக்​கடியில் ஆட்டம் காண... பால்வாவின் வருமானம் மட்டும் இரண்டு மடங்காக உயர்ந்தது! பரம்பரையாக கட்டுமானத் தொழிலில் இருந்தவர்​களெல்லாம் டிபி குரூப் கொழித்த விதம் கண்டு முழி பிதுங்கிப் ​போனார்கள்.

தனிப்பட்ட வகையில் 4,500 கோடி அளவுக்கு சொத்து வைத்திருக்கும் இவரை இந்தியாவின் 66-வது பணக்காரராக 'ஃபோர்ப்ஸ்' பத்திரிகை சேர்த்தது. அதோடு, இவரது தொழில் கூட்டாளியான வினோத் கோயங்காவும் பால்வாவோடு சேர்ந்து இந்த பட்டியலில் இடம் பிடித்தார்.

பால்வாவுக்கு கார்களின் மீது அதீத மோகம்! இவர் விரும்பிப் பயன்படுத்துவது, 1 கோடி மதிப்புள்ள பி.எம்.டபிள்யூ 7 சீரிஸ். திருமண​மாகி இரண்டு குழந்தைகள் இருக்கிறார்கள் பால்வாவுக்கு. ஆனால், புது மாப்பிள்ளை மாதிரி கட்டுக் குலையாமல்தான் இருப்பார் மனுஷர். அடுத்தவர்களைக் கவரும்படி உடம்பை கச்சிதமாக வைத்துக்கொள்ள வேண்டும் என்பதில் அந்தளவுக்கு அக்கறை காட்டுவார். தினமும் உடற்பயிற்சி செய்யத் தவறுவதில்லை.

ஆ.ராசாவுடன் இந்த 'பில்டிங்' கூட்டணிக்கு அறிமுகம் ஏற்பட்டது தனி கதை! ''மத்திய சுற்றுச் சூழல் துறை அமைச்சராக ராசா இருந்தபோது இந்த பால்வா குரூப்புடன் அறிமுகம் ஏற்பட்டது. முக்கியமான இடங்களில், உயர்ந்த கட்டடங்கள் கட்டும்போது சுற்றுச் சூழல் துறையின் தயவு தேவை. இந்த அனுமதியைப் பெற்றுத் தருவதற்காக இந்தத் துறையில் ஏராளமான இடைத் தரகர்களும் இருப்பார்கள்.

ஆனால், ஷாகித் பால்வா, வினோத் கோயங்கா போன்ற படே முதலைகள் நேரடியாகவே அதிகாரத்தின் உச்ச மையத்தை சந்தித்துப் பரிமாற்றங்களை நடத்திக் கொள்ள ஆரம்பித்தன. அங்கே இங்கே கொடுத்து, பல இடங்களில் கை மாறி வரும்போது அடைகிற லாபம் குறைகிறது என்பதால்... இப்படி நேரடி சந்திப்புகள் ஊக்குவிக்கப்பட்டன. அப்படித்தான் நடந்தது அறிமுகம்!'' என்று கூறும் டெல்லி அதிகாரிகள் சிலர்,

''பணப் பரிமாற்றம் மட்டுமின்றி பார்ட்டி கலாசாரமும் இது மாதிரி விஷயங்களில் கொடி கட்டிப் பறக்கும். மும்பை, டெல்லி  குர்ஹான், நொய்டா பகுதியில் பல கேளிக்கை விடுதிகளை இந்த ரியல் எஸ்டேட் குரூப் தங்கள் தொடர்பில் வைத்திருந்தது. ஒரு அமைச்சருக்கும் ஒரு தொழில் அதிபருக்குமான தொடர்புகளைத் தாண்டி இறுக்கமான நட்பாக மாற்றியதும் இந்த மாதிரி பார்ட்டிகளாக இருக்கலாம். அதுவே, பிறகு ஆ.ராசா இடம் மாறி தொலைத்தொடர்புத் துறைக்கு அமைச்சராக வந்த பிறகு இறுக்கம் அடைந்திருக்கலாம்!'' என்றும் கூறுகிறார்கள் இந்த அதிகாரிகள்.

பொதுவாக, டெல்லி வட்டாரங்களில் தேன் ருசிக்க ஆசைப்படும் அரசியல்வாதிகள் தங்கள் துறையில் உள்ள டாப் லெவல் அதிகாரிகளையும் அதில் கூட்டாளிகள் ஆக்கிக் கொள்வதுதான் வழக்கம். அலுவலக வளாகத்துக்குள் படு பிசினஸ் லைக்காகப் பேசிக்கொள்ளும் இவர்கள், வெளியில் வந்ததும் தோளில் கைபோடாத குறையாக இழைந்து குழைவார்கள். அப்படிப்பட்ட குழைவான சந்தர்ப்பங்களை ரியல் எஸ்டேட் முதலைகள் தங்களுக்கு சாதகமாக மாற்றிக் கொண்டிருக்கலாம்.

தொலைத் தொடர்புத் துறைக்குத் தொடர்பே இல்லாத பில்டிங் கம்பெனிகள் 2-ஜி ஸ்பெக்ட்ரம் ஒதுக்கீட்டை பெற்ற மர்மத்தின் முக்கிய முடிச்சு இங்கேதான் ஒளிந்திருக்கிறது. பதவியில் இருக்கும் அரசியல்வாதிக்கு நல்ல புத்தி சொல்ல வேண்டிய அதிகாரிகளும் ஆரம்பத்திலிருந்தே கூட்டாளிகளாக இருந்துவிட்டதால்... கிடுகிடுவென்று தப்பான பாதையில் முன்னேறிப் போய்விட்டார்கள்!'' என்று விளக்கம் கொடுக்கிறார்கள் இந்த நேர்மையான டெல்லி அதிகாரிகள்.

''பால்வாவுக்கு சொந்தமான ஸ்வான் டெலிகாம் நிறுவனம், இந்தியாவில் 13 சர்க்கிள்களில் தனது சேவையை நடத்த அரசுக்கு செலுத்திய தொகை 1,537 கோடிதான். '2001-ம் ஆண்டு நிலவரத்தை அடிப்படையாக வைத்து நிர்ணயிக்கப்பட்ட விலை. வெளிப்படையான நடைமுறைகள் எதையும் பின்பற்றாமல், ஏதோ ஓட்டப் பந்தயம் ரேஞ்சுக்கு முதலில் வந்து ஒப்பந்தப் புள்ளியை கொடுத்தவர்களுக்கே முன்னுரிமை என்பது மாதிரி ஏற்றுக்கொள்ள முடியாத அழுகுனி விதிமுறைகளை வைத்து ஸ்வான் நிறுவனத்துக்கு இந்த உரிமங்களைக் கொடுத்தார் ஆ.ராசா.

சேவையைத் துவங்கும் முன்னரே, 45 சதவிகித உரிமத்தை அரபுநாட்டின் எட்டிஸாலட் என்ற நிறுவனத்துக்கு 4,200 கோடிக்கு விற்பனை செய்தது. நோகாமல் நோம்பு கும்பிடுவது மாதிரி, இதில் பால்வா 2,663 கோடி லாபம் பார்த்தார்!'' என்பது சி.பி.ஐ-யின் பல குற்றச்சாட்டுகளில் ஒன்று.

இதைப் போலவே 22 சர்க்கிள்களில் தொலைத்தொடர்பு சேவையைத் துவங்க உரிமம் வாங்கிய இன்னொரு நிறுவனமான யூனிடெக் இதே ரீதியில் 4,442 கோடி லாபம் பார்த்தது.

பால்வாவுடன் தொடர்புடைய சினியுக் ஃபிலிம்ஸில் சோதனை நடத்தியபோதே பல விஷயங்களை சி.பி.ஐ. தோண்டி எடுத்துவிட்டது. ரியல் எஸ்டேட், கட்டுமானம், ஹோட்டல், சினிமா, காய்கறி என்று பல துறைகளில் பால்வாவுக்கு நிறுவனங்கள் இருக்கின்றன. அதாவது, அங்கிருந்தெல்லாம் பணம் நியாயமான வழிகளில் வருகிற மாதிரி 'பிளாக் அண்டு ஒயிட்' கணக்கு எழுதி வைத்திருக்கிறார்கள்.

''கலைஞர் டி.வி-க்கு ஒரே நிறுவனத்தில் இருந்து பணம் கொடுத்தால் சந்தேகம் வரலாம் என்றோ... என்னவோ தன்னுடைய பல கம்பெனிகளையும் பயன்படுத்தியிருக்கிறார் பால்வா!'' என்று சொல்கிறார்கள் சி.பி.ஐ. அதிகாரிகள்.

''இதன் முதற்கட்டமாக, டி.பி.எஸ். ரியாலிட்டி, டி.பி. இன்ஃப்ராஸ்ட்ரக்சர் போன்ற 19 நிறுவனங்களிடம் இருந்து, அவருடைய டைனமிக்ஸ் ரியாலிட்டிக்கு சிறுகச் சிறுக பல கோடிகள் மாற்றப்​பட்டிருக்கிறது. பிறகு அந்தப் பணம் குசேகான் என்ற கம்பெனிக்கு 209 கோடியை மொத்தமாகக் கைமாற்றி இருக்கிறது. அதிலிருந்து, சினியுக் நிறுவனத்துக்கு ஏறக்குறைய இதே தொகை கைமாறி... அதன் பிறகே, கலைஞர் டி.வி-க்கு 206 கோடி போய் சேர்ந்திருக்கிறது!'' என்பதுதான் சி.பி.ஐ. கையில் உள்ள ஆவணங்களில் ஒளிந்திருக்கும் ரகசியமாம்.

இவரின் ஸ்வான் டெலிகாம் கம்பெனி, 2-ஜி ஸ்பெக்ட்ரம் அனலில் சிவக்க ஆரம்பித்தபோதுகூட பால்வா அசரவில்லை. காரணம், மகாராஷ்டிர அரசியலில் வெகு காலமாக செல்வாக்கு பெற்றிருக்கும் ஒரு மெகா தலையின் ஆதரவு இவருக்கு இருந்ததுதான் என்கிறார்கள்.

ஸ்வான் டெலிகாம், எட்டிஸாலட், டிபி குரூப் என்று சங்கிலி பிடித்த மாதிரி நிகழ்ந்த வளர்ச்சி பற்றி இவரது தொழில் போட்டியாளர்களும் இவரைப் பற்றி சி.பி.ஐ-க்குப் போட்டுக் கொடுத்தபடி இருக்கிறார்கள் இப்போது..!

தற்போது ஆ.ராசாவை மேலும் நான்கு நாள் கஸ்டடி எடுத்திருக்கும் சி.பி.ஐ., ஷாகித் பால்வாவையும் அதே நான்கு நாட்கள் தன் வசம் எடுத்திருக்கிறது. கோடிகளைக் கொட்டிய கொண்டாட்டமான இந்த நட்பின் பின்னணியை சி.பி.ஐ. தோண்டித் துருவும்போதுதான்... 2-ஜி பணம் இன்னும் எங்கெல்லாம் பாய்ந்திருக்கிறது என்பது தெளிவாகும்!'' என்றும் சொல்கிறார்கள் இந்த அதிகாரிகள்.

யார் அந்த மந்திரி?

சில மாதங்களுக்கு முன்பு மும்பை டிபி ரியாலிட்டி நிறுவனத்துக்குள் வருமானவரித் துறை அதிகாரிகள் நுழைந்து, கேள்விகளால் துளைத்து எடுத்தார்களாம். அப்போது மத்திய அமைச்சர் ஒருவர் போன்செய்து, 'மேற்கொண்டு விசாரிக்க வேண்டாம். அந்த அலுவலகத்தை விட்டு வெளியேறி விடுங்கள்’ என்று உத்தரவு போட்டாராம். ''விசாரணையை முடுக்கிவிட வேண்டிய ஒருவரே, முடக்கியது ஏன்?'' என்று இப்போது பிரச்னை கிளம்ப ஆரம்பித்திருக்கிறது. அவர் யார் என்றும் இப்போது மீடியாக்கள் விசாரிக்கத் தொடங்கியுள்ளன.

சுப்ரீம் கோர்ட்டில் கலைஞர் டி.வி.!

''கலைஞர் டி.வி-யின் உருவாக்கத்தில் ஸ்பெக்ட்ரம் பணம் விளையாடி இருக்கிறதா?'' என்பது குறித்த கேள்வி உச்ச நீதிமன்றத்திலும், சி.பி.ஐ. நீதிமன்றத்திலும் எதிரொலிக்கத் தொடங்கி இருக்கிறது. பிப்ரவரி 10-ம் தேதி, இந்த வழக்குத் தொடர்பான அறிக்கையை சி.பி.ஐ. உச்ச நீதிமன்றத்தில் தாக்கல் செய்தது.

அந்த அறிக்கையில், ''அரசியல் தலைவருக்கு சொந்தமான டி.வி-க்கு (கலைஞர் டி.வி. என்று பெயரைச் சொல்லாமல்!) பால்வா பணம் கொடுத்திருக்கிறார்!'' என்று கூறப்பட்டது. உடனே நீதிபதிகள், ''இதில் மேலும் விவரங்களை ஒரிரு நாளில் விசாரித்துப் பெறமுடியவில்லை என்றால், ஆ.ராசாவை எத்தனை நாள் வேண்டுமானலும் கஸ்டடியில் எடுத்து, உண்மைகளைப் பெறுங்கள்!'' என்று கூறியிருக்கிறார்கள்.

அதே நாளில் சி.பி.ஐ. நீதிமன்றத்தில் ஆ.ராசா தொடர்பான கஸ்டடி குறித்து விசாரணை நடந்தது. ''கூடுதலாக நான்கு நாட்கள் ஆ.ராசாவை விசாரிக்க வேண்டும். ஒரு டி.வி-க்கு பணம் தரப்பட்டது பற்றி இனிமேல்தான் விசாரிக்க வேண்டும்!'' என்று சி.பி.ஐ. தரப்பு கோரிக்கை வைத்தது. 'கருணாநிதி தனது பதிலை வெளிப்படையாக சொல்லியாக வேண்டிய நெருக்கடிக்குத் தள்ளப்பட்டுள்ளார்’ என்கிறார்கள் டெல்லியில்!  இது குறித்து கலைஞர் டி.வி-யின் இயக்குநர்களில் ஒருவரான சரத்குமார் ரெட்டியிடம் சி.பி.ஐ. விரைவில் விசாரிக்கும் என்கிறார்கள்.

நன்றி : ஜூனியர் விகடன் - 16-02-2011

Tweet