ஸ்பெக்ட்ரம் ஊழல் - சீன நிறுவனத்தின் மறைமுக முதலீடு..!

02-02-2011

என் இனிய வலைத்தமிழ் மக்களே..!

2-ஜி ஸ்பெக்ட்ரம் விவகாரத்தில் மறைமுகமாக ஆதிக்கம் செலுத்தியிருக்கும் சீன நாட்டு நிறுவனத்தின் பங்களிப்பு பற்றிய முக்கியமான கட்டுரை இது :

”2-ஜி ஸ்பெக்ட்ரம் அலைக்கற்றை லைசென்ஸ் பெற்ற நிறுவனங்கள், அதிக விலைக்கு அதை வெளிநாட்டு கம்பெனிக்கு விற்றதால் நம்முடைய மத்திய அரசாங்கத்துக்கு இழப்பு ஏற்பட்டது. அரசாங்க கஜானாவுக்கு வந்திருக்க வேண்டிய 1.76 லட்சம் கோடி இழப்பாகி விட்டது. இம்மாதிரியான இழப்புகளைக்கூட நாம் வேறு தொழில் முதலீடுகள் மூலமாக ஈட்டிக் கொள்ள முடியும்.

ஆனால், இப்படிக் கைமாற்றி விடப்​பட்ட நிறுவனங்களின் ஜாதகங்களைப் பற்றி நம்முடைய மத்தியத் தொலைத் தொடர்புத் துறை அதிகாரிகள் ஒழுங்காக விசாரணை நடத்தினார்களா? வெளிநாட்டு மூலதனக் குவிப்பு வாரியமாவது ஆய்வு நடத்தியதா? இவை மிக முக்கியமான விஷயங்கள்…” என்று சொல்லும் டெல்லி அதிகாரி ஒருவர், ”2-ஜி அலைக்கற்றை லைசென்ஸ் பெற்ற ஒரு நிறுவனம், தன்னுடைய கணிசமான அளவு பங்குகளை சீனாவைச் சார்ந்த ஒரு நிறுவனத்துக்கு தாரை வார்த்திருக்கிறது.

இந்தியாவின் எல்லையில் உள்ள அருணாசலப் பிரதேச மாநிலத்தையே தன்னுடைய பகுதியாகச் சொல்லி வம்படி பண்ணும் நாடு சீனா. கடந்த 50 வருஷங்களாக அவர்களுக்கும் நமக்கும் எல்லைத் தகராறு தொடர்ந்து கொண்டே இருக்கிறது. அருணாசலப் பிரதேசம் வழியாக அந்நிய ஊடுருவலை சீனா தொடர்ந்து நடத்திக் கொண்டிருக்கிறது.

இந்தியாவின் பரம எதிரியாகச் செயல்பட்டு வரும் பாகிஸ்தானுக்கு ராணுவ உதவிகள் மட்டுமல்லாமல்… அனைத்து உதவிகளையும் சீனா செய்து வருகிறது. மேலும் ஆஃப்கானிஸ்தானத்து தாலிபன் பயங்கரவாதிகளுக்கு பயிற்சி​யையும் சீனா வழங்கி வருகிறது.

அப்படிப்பட்ட சீனாவின் ‘உளவு நிறு​வனம்’ போல செயல்படுவதாக நாங்கள் சந்தேகப்படும் ஒரு நிறுவனம் 2-ஜி பங்குகளை வாங்கியுள்ளது. இதை வைத்துப் பார்த்தால், இந்தியாவின் தொலைத் தொடர்பு வசதி, தடங்கல் இல்லாமல் நம் போட்டி தேசத்துக்குத் தாரை வார்க்கப்பட்டுள்ளது.

இந்த கம்பெனியின் உரிமையாளர் 1982-ம் ஆண்டுவரை சீன ராணுவத்தில் இருந்தவர். ராணுவத்தில் ஆட்​குறைப்பு செய்கிறோம் என்று சொல்லி விலக்கப்பட்டார். இரண்டு மூன்று ஆண்டுகள் அமைதியாக இருந்து​விட்டு, மின் சாதனங்கள் விற்பனை செய்யும் நிறுவனம் தொடங்கினார். அதிலிருந்து படிப்படியாக வளர்ந்து தகவல் தொழில்நுட்பம், தொலைத் தொடர்பு சாதனங்கள் தயாரிப்புக்குள் நுழைந்தார்.

அவரது கம்பெனி, சீனாவைவிட மற்ற வெளிநாடுகளில் தனது நிறுவனங்களைத் தொடங்குவதிலேயே ஆர்வமாக இருந்தது. 1999-ம் ஆண்டு 10 மில்லியன் டாலர் மதிப்பீட்டில் முதலீடு போட்டு பெங்களூருவில் அந்த நிறுவனம் முதலில் உள்ளே நுழைந்தது. அடுத்து இன்னொரு நிறுவனத்தையும் ஆரம்பித்தார்கள்.

வேலைக்கு ஆள் எடுக்கப்பட்ட 513 பேரில் 178 பேர் சீனா​வைச் சேர்ந்தவர்களாக இருந்தார்கள். பெரும்​பாலும் அயல்நாட்டு நிறுவனங்கள் இங்கே தனது தொழிலைத் தொடங்கினாலும், அதற்கான ஊழியர்களைத் தங்கள் நாட்டில் இருந்து அதிகமாகக் கொண்டு வராது. ஆனால், இந்த நிறுவனம் மட்டும் சீனாக்காரர்களை பெரும்பாலும் கொண்டு வந்து குவித்தது. இதை மத்திய உளவுத்துறை முதல் முறையாக மோப்பம் பிடித்து அரசாங்கத்துக்குத் தெரியப்படுத்தியது.

இப்படிப்பட்ட நேரத்தில்தான் (1999-ம் ஆண்டு டிசம்பர் மாதம் 24-ம் தேதி) இந்தியப் பயணிகள் விமானம் ஆஃப்கான் தலைநகரான காந்தகாருக்கு கடத்திச் செல்லப்பட்டது. இந்த விமானக் கடத்தலுக்கு அதிகமான உதவியைச் செய்தவர்கள் தாலிபன் தீவிரவாதிகள். அவர்கள் கேட்டது மாதிரி இந்தியச் சிறையில் இருக்கிற நான்கு பேரை விடுவிக்க வேண்டியதாயிற்று.

இந்த சம்பவம் நடந்த சில மாதங்களில் ஆஃப்கானிஸ்தானுக்கு சீனாவில் இருந்து ஒரு தொழில் நுட்ப வல்லுநர் குழு சென்றது. அந்தக் குழுவில், பெங்களூரூ நிறுவனத்தில் வேலை பார்க்கும் பல ஊழியர்கள் அனுப்பி வைக்கப்​பட்டார்கள்.

அன்றைய பி.ஜே.பி. அரசாங்கத்துக்கு அப்போதுதான் சீனாவின் இந்த மாயவலை உறைக்க ஆரம்பித்தது. ஏற்கெனவே தாலிபன் தீவிரவாதிகளுக்கு சீனா உதவி செய்து வருவது அனைவருக்கும் தெரியும். ஆனால், பெங்​களூருவில் மையம் கொண்டிருக்கும் நிறுவனமும் அந்த நிழல் படிந்ததுதான் என்பதை மத்திய அரசு உணர்ந்தது. உடனடியாக பெங்களூரு நிறுவனங்கள் இரண்டுக்கும் நோட்டீஸ் அனுப்பி வைக்கப்பட்டது.

‘நாங்கள் பாகிஸ்தானில் வர்த்தகம் செய்கிறோமே தவிர, எங்களுக்கும் தாலிபன்களுக்கும் தொடர்பு இல்லை’ என்று அந்நிறுவனத்தின் சார்பில் மத்திய அரசுக்கு கடந்த 10.12.2001 தேதியன்று பதில் தரப்பட்டது. ஆனால், இதை மத்திய உளவுப் பிரிவு மற்றும் ரா அதிகாரிகள் ஏற்க​வில்லை.

‘இந்தியாவில் இருக்கிற நிறுவனம் ஒன்று ஆஃப்கானிஸ்தானுக்கு எப்படிச் செல்கிறது? அதன் உரிமை​யாளர்கள் யார் என்பதாவது அரசாங்கத்துக்குத் தெரியுமா?’ என்று காங்கிரஸ் கட்சியே அன்று கேள்வி​கள் கேட்டது. நாடாளுமன்றத்தில் இது பற்றிப் பேசிய அன்றைய உள்துறை அமைச்சர் அத்வானி, ‘இது போன்ற    செயல்க​ளில் இனியும் அந்த நிறுவனம் ஈடுபட்​டால், பெங்களூரு கம்பெனியில் இருக்கும் 150-க்கும் மேற்பட்ட சீன நிபுணர்களை இந்தியா நாடு கடத்தவும் தயங்காது!’ என்று பகிரங்க எச்சரிக்கை விடுத்தார்.

‘மிகக் குறைந்த விலையில் தொழில் நுட்ப உபகரணங்​களைக் கொடுத்து உள்ளே நுழைந்து, அதன் பிறகு தனது நீண்ட கால ராணுவத் தேவைகளை சீனா பெற்றுக் கொள்கிறது!’ என்று டெல்லி பத்திரிகைகள் அப்போதே விமர்சனங்கள் செய்தன.

‘இந்தியாவில் வியாபாரம் செய்து வரும் இரண்டு சீன நிறுவனங்களுக்கு எதிராக நடவடிக்கைகளை எடுக்கலாம் என்று அப்போது இருந்த தேசியப் பாதுகாப்புக்கான மத்திய அமைச்சர்கள் குழு முடிவெடுத்தது. மத்திய உளவுத் துறையும் ரா அமைப்பும் இதற்கான ஆதாரங்களை வலுவாக சமர்ப்​பித்துள்ளன.

ஆஃப்கானிஸ்தானின் காபூல் நகரில் 1.30 லட்சம் பேருக்கு தொலைபேசி இணைப்பு கொடுக்கும் நிறுவனம் இந்தியாவில் இருந்து செயல்பட்டால், நாட்டின் பாதுகாப்பு கேள்விக்குறியாகிவிடும்’ என்று ‘இந்தியன் எக்ஸ்பிரஸ்’ அன்றைய தினம் எழுதியது. இதன் பிறகு இந்த நிறுவனம் தன்னுடைய விஸ்தரிப்பைக் குறைத்துக் கொண்டது.

நான்கு ஆண்டுகள் கழித்து அதாவது 2005-ம் ஆண்டில் 60 மில்லியன் டாலர் முதலீட்டில் தனது நிறுவனத்தை விரிவாக்கும் திட்டத்தை நம்முடைய மத்திய அரசாங்கத்துக்கு சமர்ப்​பித்தது. இதை இந்தியத் தொலைத் தொடர்புத் துறை ஏற்கவில்லை. இதை ஏற்கக் கூடாது என்று மத்திய உளவுத்துறையும், ரா அமைப்பும் அறிவுரை கூறியது. இந்திய வெளிநாட்டு மூலதனக் குவிப்பு வாரியமும் இதற்கு மறுப்பு தெரிவித்தது.

‘சீனாவைச் சேர்ந்த தொழில் நுட்ப நிறுவனங்களின் படையெடுப்பில் இருந்து தன்னைக் காத்துக் கொள்ள இந்தியா முயன்று வருகிறது’ என்று ‘ஏசியா டைம்ஸ் ஆன்லைன்’ கருத்துக் கூறியது.  இதைத் தொடர்ந்து இந்த நிறுவனம் தன்னிடம் வேலை பார்த்து வந்த இந்தியர்களைப் படிப்படியாகக் குறைத்துவிட்டு முழுமையாக சீனாக்காரர்களையே நியமிக்​கும் காரியத்தைப் பார்த்தது.  2008-ம் ஆண்டு ஆகஸ்ட் மாதம் மத்திய தொழிலாளர் நல அமைச்சகம், இந்த நிறுவனத்துக்கு தன்னுடைய கடுமையான கண்டனத்தைப் பதிவு செய்தது.

ஆனால் அதன் பிறகு மத்திய அரசாங்கத்தின் தொலைத் தொடர்புக் கொள்கையே மாற ஆரம்பித்தது. அதுவரை 49 சதவிகிதமாக இருந்த அந்நிய மூலதனம் அதன் பிறகு 74 சதவிகிதமாக ஆக்கப்பட்டது. வெளி​நாட்டு கம்பெனிகள் தராதரம் இல்லாமல் தங்களது காலைப் பதிக்க ஆரம்பித்தன. பெங்களூருவில் மையம் கொண்ட சீன நிறுவனத்துக்கும் பயம் இல்லாமல் போனது. முதலில் டாடா நிறுவனம் இந்த சீன நிறுவனத்துடன் கோவாவில் பிசினஸ் தொடர்பு ஏற்படுத்திக் கொண்டது. அதன் பிறகு ரிலையன்ஸ் கை கோர்க்க ஆரம்பித்தது. நீரா ராடியா டாடா நிறுவனங்களுக்காக   சீன நிறுவனத்தை தொடர்பு கொள்ளத் துவங்கினார்.

‘ஸ்பெக்ட்ரம் ஒதுக்கீட்டுக்கு நேரடியாக நாங்கள் விண்ணப்பித்தால் பழைய விஷயங்களைத் தோண்டிப் பார்த்து மத்திய உளவுத்துறையும் ரா அமைப்பும் கட்டை​யைப் போட்டு விடும். எனவே, வேறு ஒரு நிறுவனம் லைசென்ஸ் வாங்கட்டும். அதிலிருந்து நாங்கள் வாங்கிக் கொள்கிறோம்’ என்று சீன நிறுவனம் பேரம் பேசி காரியத்தை கனகச்சிதமாக முடித்திருப்பதாகவே நாங்கள் கருதுகிறோம்!” என்று அந்த அதிகாரி சொன்னபோது… நமக்கு மூச்சு முட்டியது.

"இந்தியப் பாதுகாப்புக்கும் இறையாண்மைக்கும் தொடர்ந்து மிரட்டல் விடுத்து வரும் சீனாவின் ஒரு நிறுவனம் இப்படி உள்ளே புகுந்திருப்பது இந்தியா​வின் பாதுகாப்புக்கு என்றைக்கும் அச்சுறுத்தலாக அமையக்கூடும்!” என்று கூறுகிறார் இந்த அதிகாரி. 

இங்கு லைசென்ஸைக் கைப்பற்றியிருக்கும் இந்த சீன நிறுவனம், ஆஸ்திரேலியாவில் ஒரு லைசென்ஸைப் பெற முயற்சித்தபோது கடும் எதிர்ப்புக் கிளம்பியதாம். அதன்​பிறகு அங்கே லைசென்ஸ் பெறவே முடியவில்லை. அமெரிக்காவில் த்ரி.காம் உரிமத்தை வாங்க அதே நிறுவனம் முயற்சித்தபோது அந்நாட்டுப் பத்திரிகைகள் கடுமையாக எதிர்த்து எழுதின. கனடாவைச் சார்ந்த ஒரு நிறுவனத்தை வாங்க 2008-ல் முயன்றபோது அங்கும் எதிர்ப்பு கிளம்பவே, பின் வாங்கினார்கள். ஆனால், இந்தியாவில் எந்த எதிர்ப்புமே இல்லை…” என்றும் அந்த அதிகாரி சொல்கிறார்.

இந்த மாதிரி வெளிநாடுகளில் தடை விழுவதை அறிந்த இந்திய அரசு அந்த பெங்களூரு கம்பெனிக்கு ‘உங்களது உரிமையாளர்கள் யார் என்ற தகவலை ஒரு மாதத்துக்குள் தந்தாக வேண்டும்’ என்று நோட்டீஸ் அனுப்பினார்களாம். ஒரு சீனப் பெயரைக் குறிப்பிட்டு, ”இவர்தான் எங்களது உரிமையாளர். ஆனால், அவருக்கு வருமானத்தில் 1.42 சதவிகித பங்குகள்தான் உண்டு. மற்ற பங்குகள் அனைத்தும் இதில் வேலை பார்க்கும் தொழிலாளர்களுக்கு உரிமையானது” என்று பதில் அளிக்கப்பட்டதாம்.

இது மாதிரியான தகவல்கள் கூட இலங்கை பத்திரிகைகளில்தான் அதிகமாக வெளிவருகின்றன. ஏனென்றால், அந்த சீன நிறுவனம் இப்போது அதிகமாக அங்குதான் நுழைய ஆரம்பித்திருக்கிறது. ”ராசா ராஜினாமாவுடன் முடியும் விவகாரம் அல்ல. அனைத்து நிறுவனங்களின் லைசென்ஸ்களையும் ரத்து செய்வதே, இதற்கு முடிவான தீர்வாக இருக்க முடியும்!” என்று பி.ஜே.பி. சொல்ல ஆரம்பித்திருப்பது இதனால்தான்.

”இந்தியாவுக்கு சுதந்திரம் வாங்கித் தந்த கட்சி, இப்போது சுதந்திர இந்தியாவை எப்படி கட்டிக் காப்பாற்றுகிறது பார்த்தீர்களா!” என்று நமது ஸோர்ஸ் அதிகாரி எழுப்பிய கேள்விதான் காதில் ஒலித்துக்​கொண்டே இருக்கிறது.

நன்றி : ஜூனியர் விகடன் 26-01-2011

Tweet

ஸ்பெக்ட்ரம் ஊழல் - மத்திய தணிக்கைத் துறையால் ஊழல் எப்படி கணக்கிடப்பட்டது..?

01-02-2011

என் இனிய வலைத்தமிழ் மக்களே..!

கொடுத்த காசுக்கு வஞ்சனையில்லாமல் வாதாடும் வக்கீல் என்ற பட்டத்தை அகில இந்தியாவில் கபில்சிபலுக்குத் தரலாம்.

ஸ்பெக்ட்ரம் 2-ஜி அலைக்கற்றை ஒதுக்கீடு முறையாகச் செய்யப்படவில்லை என்று நவம்பர் மாதம் 29-ம் தேதி டெல்லியில் பேட்டியளித்த மத்திய தொலைத் தொடர்புத் துறை அமைச்சர் கபில்சிபல் இப்போது அப்படியே அந்தர்பல்டி அடித்திருக்கிறார்.

அதுகூட பரவாயில்லை.. ஆட்சியைக் காப்பாற்றிக் கொள்ள அவர் எடுத்த நிலைப்பது என்று சொல்லலாம். இப்போதோ, மத்திய கணக்கு மற்றும் தணிக்கைத் துறை அறிக்கை மீது வேகமாகப் பாய்ந்திருக்கிறார் என்பதை என்னவென்று சொல்வது?

“2-ஜி அலைக்கற்றை ஒதுக்கீடு முறையாக நடக்காததால், 1.76 லட்சம் கோடி இழப்பு என்று மத்திய கணக்கு தணிக்கைத் துறை சொல்வது கற்பனையானது. இட்டுக் கட்டிச் சொல்லப்படுவது” என்பது அவரது வாதம். இது கற்பனையான தொகை என்று சொல்வதன் மூலமாக ஸ்பெக்ட்ரம் ஒதுக்கீட்டில் எந்தத் தவறும் நடக்கவில்லை என்ற தோற்றத்தை உருவாக்கும் முயற்சியில் காங்கிரஸ் இறங்கிவிட்டது.

தணிக்கைக் கட்டுப்பாட்டு அதிகாரியின் கணக்கீடு :

2008-ல் புதிதாக நுழைந்த நிறுவனங்களுக்கு 122 உரிமம் வழங்கியது மூலமான இழப்பீடு - 1,02,498 கோடி.

சி.டி.எம்.ஏ. ஆபரேட்டர்களுக்கு இரட்டை உரிமம் வழங்கியதில் இழப்பு - 37,154 கோடி.

6.2 மெகா ஹெர்ட்ஸுக்கு ஜி.எஸ்.எம். ஆபரேட்டர்கள் மின் காந்த அலைக்கற்றைகளை ஆக்கிரமித்துக் கொண்டது மூலமான இழப்பு - 36,993 கோடி

ஆக மொத்த இழப்பு - 1,76,645 கோடி.

இந்த நிலையில் இந்தக் கணக்கின் உண்மை குறித்து சென்னையின் முன்னணி ஆடிட்டும், 2-ஜி பிரச்சினை குறித்துத் தொடர்ந்து அலசி, ஆராய்ந்து கருத்துத் தெரிவிக்கும் எம்.ஆர்.வெங்கடேஷிடம் இது குறித்துக் கேட்டோம்.

“மத்திய அமைச்சர் கபில்சிபலின் வாதம் தவறானது. மத்திய கணக்கு மற்றும் தணிக்கைத் துறை ஏதோ ஒரு கதையை எழுதவில்லை. அது தனது குற்றச்சாட்டை ஆதாரத்துடன் வைக்கிறது. அது ஓர் அரசியல் கட்சியல்ல. அரசாங்கத்தின் நடவடிக்கைகளைக் கண்காணிக்க அரசியமைப்புச் சட்டம் உருவாக்கிய அமைப்பு. எனவே, அவர்கள் எந்த உள்நோக்கமும் இல்லாமல், இந்தக் குற்றச்சாட்டை வைக்கிறார்கள். அப்படித்தான் வைக்க முடியும்.

3-ஜி ஒதுக்கீட்டில் அரசுக்கு 1 லட்சம் கோடிக்கு மேல் வருமானம் கிடைத்தது. ஆனால், 2-ஜி ஸ்பெக்ட்ரம் ஒதுக்கீட்டில் அரசுக்குக் கிடைத்த பணம் 10,772 கோடி மட்டுமே. எவ்வளவு வித்தியாசம் பார்த்தீர்களா..? 2-ஜி ஏலம், அகில இந்திய அளவில் முறைப்படி நடந்திருந்தால்.. மத்திய அரசுக்கு என்ன வருமானம் கிடைத்திருக்கும் என்பதுதான் தலைமைக் கணக்கு அதிகாரியின் அறிக்கையில் குறிப்பிடப்பட்டிருக்கிறது.

அந்தக் கணக்கீட்டின்படி 1.76 லட்சம் கோடிக்கு மேல் விற்று லாபத்தை அடைந்திருக்க முடியும் என்று அந்த அறிக்கை சொல்கிறது. அதன்படி 2-ஜி ஒதுக்கீட்டில் விதிமுறைகள் சரிவரப் பின்பற்றாததால் அரசுக்குக் குறைந்தபட்சமாக 57,666 கோடி முதல் 1,76,645 கோடி வருமான இழப்பு ஏற்பட்டிருக்கிறது என்பதுதான் அந்த அறிக்கையின் சாரம்சம்..” என்ற வெங்கடேஷிடம்,

“இந்த வரையறையைத்தான் கபில்சிபல், கருணாநிதி போன்றோர் தவறானது என்கிறார்களே..?” என்றோம்.

“நான்கு விதமான கணக்குகளை அந்தத் துறை போட்டுப் பார்த்தது. முதல் கணக்கீட்டு முறையில் 3-ஜி ஏலம் மூலம் கிடைத்த வருமானத்தின் அடிப்படையில் 2-ஜிக்கும் ஏலம் நடந்திருந்தால், அரசுக்குக் கிடைத்திருக்க வேண்டிய வருமானத் தொகையை மதிப்பீடு செய்துள்ளார்கள்.
 

உதாரணத்துக்கு ஒரு வீட்டின் மதிப்பைக் கணக்கிடும்போது அதன் பக்கத்து வீடு என்ன விலைக்குப் போயிருக்கிறது என்பதைப் பார்த்து மனையின் அளவு, வீட்டின் அளவு மற்றும் வயது போன்றவற்றின் அடிப்படையில் குத்துமதிப்பாக, அதன் மதிப்பு கணக்கிடப்படும்.

அது போலவே, 3-ஜி போல், 2-ஜிக்கும் ஏலம் நடந்திருந்தால், அரசுக்குக் கூடுதலாக 1,76,645 கோடி வருமானம் கிடைத்திருக்கும் என்பது அதன் கணக்கீடு.

இரண்டாவது கணக்கீடு. முன்னாள் அமைச்சர் ஆ.ராசா, அவசரம், அவசரமாக அலைக்கற்றை ஒதுக்கீடு செய்து முடித்த பிறகு எஸ்டெல் என்ற நிறுவனம், 2007-ம் ஆண்டு நவம்பர் 5-ம் தேதி பிரதமர் மன்மோகன்சிங்கிற்கு ஒரு கடிதம் எழுதியது.

அதில், “அலைக்கற்றை ஒதுக்கீட்டுக்கு எவ்வளவு தொகை நிர்ணயிக்கிறார்களோ, அதைவிட இந்திய அளவிலான உரிமம் ஒன்றுக்குக் கூடுதலாக 6000 கோடி தயாராக இருக்கிறோம்” என்று குறிப்பிட்டிருந்தது..

இதே நிறுவனம், அதே ஆண்டு டிசம்பர் 27-ம் தேதி பிரதமருக்கு மீண்டும் ஒரு கடிதம் எழுதி, “இப்போது இந்திய அளவில் ஓர் அலைக்கற்றை ஒதுக்கீட்டுக்கான தொகையைவிடை கூடுதலாக 13,752 கோடி தரத் தயார்..” என்று குறிப்பிட்டிருந்தது.

மேலும் போட்டி நிறுவனங்கள் இதைவிட அதிகமாகக் கொடுத்தால், அதைவிடவும் அதிகத் தொகையைத் தரவும் தயாராக இருப்பதாகவும் குறிப்பிட்டிருந்தது. இவர்கள் கேட்டதைப் போல கொடுத்திருந்தால் அரசுக்கு 67,374 கோடி கிடைத்திருக்கும். அந்தத் தொகையும் வருமான இழப்புதானே..?

2-ஜி உரிமம் பெற்றவற்றில் யூனிடெக் மற்றும் ஸ்வான் நிறுவனங்கள் அவற்றின் ஒரு பகுதி பங்குகளை வெளியில் விற்று விட்டார்கள். இதில் கொடுமை என்னவென்றால், இந்த நிறுவனங்களுக்கு அசையும் சொத்து என்றோ அசையா சொத்து என்றோ எதுவும் கிடையாது. 2-ஜி உரிமம் மட்டும்தான் அவற்றின் சொத்தாக இருந்தன.

யூனிடெக் பங்குகள் விற்பனை செய்யப்பட்டதின் விலையின் அடிப்படையில் பார்த்தால், அரசுக்கு வருமான இழப்பு 69,626 கோடி. இது மூன்றாவது முறையிலான இழப்பீட்டுக் கணக்கு.

நான்காவது முறைப்படி ஸ்வான் பங்குகள் விற்பனை செய்யப்பட்ட விலையின் அடிப்படையில் பார்த்தால், மத்திய அரசுக்கு 57,777 கோடி வருமான இழப்பு ஏற்பட்டிருக்கக் கூடும் என்ன தலைமைத் தணிக்கை அதிகாரியின் அறிக்கையில் குறிப்பிடப்பட்டிருக்கிறது.

ஏன் இப்படி பல்வேறு அளவீடுகளை தலைமை தணிக்கை அதிகாரி எடுத்துக் கொண்டிருக்கிறார் என்றால், காலக் கடிகாரத்தை பின்னோக்கிச் செலுத்த முடியாது. அந்த வகையில் 3-ஜி ஏல விலை நிலவரம் மற்றும் எஸ்டெல் நிறுவனத்தின் கூடுதல் தொகை தரும் கோரிக்கை, ஒதுக்கீடு பெற்ற நிறுவனங்களின் பங்குகளின் விற்பனை போன்றவற்றை அளவீடாக வைத்து, அரசுக்கு ஏற்பட்டிருக்கும் இழப்பீட்டை தலைமைத் தணிக்கை அதிகாரி மதிப்பீடு செய்திருக்கிறார்.

இதில், ஏதாவது ஒன்றை எடுத்துக் கொண்டால்கூட அரசுக்குக் குறைந்தபட்சம் 57,666 கோடி இழப்பு ஏற்பட்டுள்ளது என்பதை யாராலும் மறுக்க முடியாது. கபில்சிபல் தனது கட்சியைக் காப்பாற்ற இப்போது பேசலாம். அதற்காக உண்மை செத்துவிடாது.” என்றார்.

நன்றி : ஜூனியர் விகடன் - 23-01-2011
 

ஸ்பெக்ட்ரம் 2-ஜி லைசென்ஸ் உரிமங்களைப் பெற்ற கம்பெனிகளின் உரிமையாளர்கள் பற்றிய விவரங்கள் இது :

1. ஸ்வான் நிறுவனம் :

சாகித் பல்வா குடும்பமும் வினோத் கோயங்கா குடும்பமும் இணைந்து நடத்தும் கம்பெனி. மும்பையில் ரியல் எஸ்டேட் துறையில் கொடி கட்டிப் பறக்கும் பலே கம்பெனி. '

'இந்திய உளவுத் துறை எடுத்து வைத்திருக்கும் சான்றுகளின்படி இதன் முக்கியத் தொடர்பில் தற்போது கராச்சியில் வசிக்கும் - பகீர் மனிதர் ஒருவரும் இருக்கிறார்!'' என்றும் சொல்லப்படுகிறது.

கம்பெனி உரிமையாளரான சாகித் உஸ்மான் பல்வா உலக கோடீஸ்வரர்கள் பட்டியலில் 937-வது நபராக இருக்கிறார். இவரது இருப்பிடம் மும்பை. இதே கம்பெனியின் இன்னொரு சேர்மனான வினோத் கே.கோயங்கா இருப்பதும் மும்பையில்தான்.

2. சிஸ்டமா ஷியாம் டெலிகாம் நிறுவனம் :

எம்.டி.எஸ். குரூப்புடன் இணைந்த நிறுவனம் இது. டவர் 334, உதயோக்  பவன், குர்ஹான், ஹரியானா மாநிலம் என்ற முகவரியில் திடீரென முளைத்த நிறுவனம் இது. இதன் இயக்குநர்களில் இந்தியர்கள் யாரும் இல்லை!

3. லூப் டெலிகாம் நிறுவனம் :

இதன் இந்திய இயக்குநராக சந்தீப் பாசு என்பவரும் பங்குதாரராக அய்லோன் என்பவரும் இருக்கிறார்கள். மும்பை மாகிம் வெஸ்ட் பகுதியில் இவர்கள் இருந்திருக்கிறார்கள். 2-ஜி விண்ணப்பத்தை உத்யோக் விஹார், குர்ஹான் பகுதியில் இருந்து அனுப்பியிருந்தார்கள். இதன் நிஜ உரிமையாளர்கள் வெளிநாட்டைச் சேர்ந்தவர்களாம்!

4 .யூனிடெக் நிறுவனம் :

ஒன்பது உரிமையாளர்கள் கொண்ட நிறுவனமாக இது உள்ளது. ரமேஷ் சந்திரா (சேர்மன்), அஜய்சந்திரா (எம்.டி., எச்.ஆர்.டி), சஞ்சய் சந்திரா (எம்.டி., அட்மின்), சஞ்சய் பகதூர், அனில் ஹரீஸ், ரவீந்தர் சின்கானியா, அம்ப்வானி, மினோத் பாஷி, மகந்தி ஆகிய ஒன்பது பேர்தான் சூத்திரதாரிகள்.

''இந்த நிறுவனத்துக்கு முழுக்க முழுக்க நீரா ராடியா ஏஜென்டாக செயல்பட்டுள்ளார். இதுதான் மிகப் பெரிய வெளிநாட்டு நிறுவனத்தின் துணைப் பெயரில் உருவானது!'' என்கிறது சி.பி.ஐ.

5. எஸ்.டெல் நிறுவனம் :

'ஸ்டெர்லிங்' சிவசங்கரன் என்றால் முன்பு தமிழகம் நன்கு அறியும். முரசொலி மாறனின் நண்பராக இருந்தவர். மெர்க்கண்டைல் வங்கியை வாங்கிய பிரச்னையில் இவர் செம ஹாட்டாக நியூஸில் அடிபட்டார். இன்றைய 'கலைஞர்' டி.வி-யின் உருவாக்கத்திலும் இவரது பங்கு நிறைய இருந்ததாகச் சொல்வார்கள். நிலம் விவகாரம் ஒன்றில் புகார்கள் கிளம்பி அவர் தவிர மற்ற பல நிர்வாகிகளும் கைதான பழங்கதையும் உண்டு. அந்த சிவசங்கரனின் நிறுவனம்தான் இது

சிவசங்கரன் (சேர்மன்), வி.சீனிவாசன் (சி.இ.ஓ), பி.சுவாமிநாதன் (தலைவர்)... மற்றும் இயக்குநர்களான பீட்டர் கலிபோல்ஸ், எஸ்.சரவணன், எஸ்.நடராஜன், அலி யூசுப், அப்துல் ரஹ்மான் ரஷிம், டாக்டர் காசன் முராத் ஆகியோர் அடங்கிய டீம் இந்த நிறுவனத்தை நடத்துகிறது.

6. ஐடியா செல்லுலார் நிறுவனம் :

இதன் இந்திய உரிமையாளர்களாக 12 பேரின் பெயர்கள் உள்ளன. குமாரமங்கலம் பிர்லா இதன் சேர்மனாக இருக்கிறார். ராகேஷ் ஜெயின், பிஸ்வாஜித் அன்னசுப்பிரமணியம், பிரகாஷ், தர்ஜானி வாகிப், பி.முராரி, ஜான் விட்டலங்க நவரோ, ராஜஸ்ரீ பிர்லா, சூரிபுத்த அன்ஸா, அருண் தியாகராஜன், சஞ்சய் அஹா, பார்கவா (இயக்குநர்கள்) ஆகியோர் பெயர்கள் உள்ளன. குஜராத் மாநிலம் காந்திநகர் முகவரியில் இருந்து இந்நிறுவனம் செயல்பட்டுள்ளது. இவர்கள் தங்களது பங்குகளை வெளிநாட்டுக்கு விற்றுள்ளனர்.

7. வீடியோகான் நிறுவனம் :

வேணுகோபால் என்.தத் என்பவர் இதன் சேர்மன். பிரதீப் என்.தத், கே.சி.ஸ்ரீவத்சவா, சத்யபால் தல்வார், எஸ்.பத்மநாபன், மேஜர் ஜெனரல் எஸ்.சி.என். ஜட்டார், அருன் எல்.போங்னிவார், ராடி ஷியாம் அகர்வால், குனிலா நார்ஸம், பி.என்.சிங், அஜய் சாப் ஆகியோர் பெயர்கள் இதன் முக்கிய நிர்வாகிகள் பட்டியலில் உள்ளன. இதற்கான தலைமை அலுவலகம் டெல்லியில்!

8. ரிலையன்ஸ் டெலிகாம் : 

அனில் அம்பானி - அதிகம் சொல்ல வேண்டியதில்லை!

9. டாடா டெலிகாம் : 

ரத்தன் டாடா - தனியாகச் சொல்ல வேண்டியதில்லை

Tweet

ஸ்பெக்ட்ரம் ஊழல் - அந்நிய நாட்டு நிறுவனங்களின் கையில் 2-ஜி..!

14-01-2011

என் இனிய வலைத்தமிழ் மக்களே..!

ஆ.ராசா பதவி விலகி என்ன புண்ணியம்..? கபில்சிபல் வந்த பிறகும் ஸ்பெக்டரம் விவகார முறைகேடு, விசாரணை விஷயத்தில் மத்திய அரசின் பார்வையில் எந்த மாற்றமும் இல்லை என்பதுதான் தொலைத் தொடர்புத் துறை அமைச்சகத்தில் கறைபடாத சில உயரதிகாரிகளின் பெரும் கவலை.

நாடாளுமன்றம் ஸ்தம்பித்த நிலையில் ஆ.ராசா ராஜினாமா செய்ய வேண்டிய உச்சக்கட்ட நெருக்கடி கடந்த நவம்பர் மாதம் 14-ம் தேதி உருவாகியது. அதனால் ராசா பதவி விலகி, தொலைத் தொடர்புத் துறை அமைச்சர் பொறுப்புக்கு கபில்சிபல் கொண்டு வரப்பட்டார். நவம்பர் 29-ம் தேதி டெல்லியில் நிருபர்களைச் சந்தித்தார் கபில்சிபல். அப்போது அவர் சொன்னது கூர்ந்து கவனிக்கத்தக்கது.

“2 ஜி அலைக்கற்றை ஒதுக்கீடு முறையாகச் செயல்படவில்லை. முதலில் வந்தவர்களுக்கு முதலில் ஒதுக்கீடு என்ற கொள்கையால், அரசுக்கு ஆயிரக்கணக்கான கோடி ரூபாய்கள் வருவாய் இழப்பு ஏற்பட்டுள்ளது. இந்தத் துறையில் அனுபவமே இல்லாத பல நிறுவனங்கள் பொய்யான தகவல்களைக் கூறி உரிமம் பெற்றுள்ளன. முதலில் ஒதுக்கீடு பெற்ற நிறுவனங்கள் அதனை மற்ற நிறுவனங்களுக்கு நல்ல லாபத்துக்கு விற்றுவிட்டன. வேறு சில நிறுவனங்களோ சில பிரபல நிறுவனங்களுக்கு பினாமியாகச் செயல்பட்டதாகத் தகவல்கள் கூறுகின்றன. இதையெல்லாம் முழுமையாக விசாரிக்க அரசு முடிவெடுத்துள்ளது.

அந்த அடிப்படையில் 119 நிறுவனங்களுக்கு நோட்டீஸ் அனுப்பியிருக்கிறோம். பதிலளிக்க 60 நாட்கள் அவகாசம் கொடுத்திருக்கிறோம். உரிய அனுபவமும், தகுதியும் இல்லாமல் தவறானத் தகவல்களை அளித்த நிறுவனங்கள் ஒரு புறம்.. உரிமம் பெற்ற பிறகு அவற்றை அதிக லாபத்துக்கு விற்ற நிறுவனங்கள் மறுபுறம்.. இப்படி இரு வேறுவிதமான நிறுவனங்கள் உள்ளன. உரிமம் பெற்ற பிறகும் சேவையை அளிக்காமல் இருக்கும் நிறுவனங்கள் மற்றொரு புறம். இந்த நிறுவனங்களின் பெயர்களை வெளியிடுவது அவசியம் என்று அரசு கருதவில்லை.. உரிய நடவடிக்கைகள் எடுக்கும்போது விவரங்கள் வெளியிடப்படும்..” என்றார்.

இதைத் தொடர்ந்து 119 நிறுவனங்களுக்கு நோட்டீஸும் ஜரூராக அனுப்பினார். “சேவையைத் தொடங்காத ஏழு நிறுவனங்களுக்கான உரிமம் ரத்து செய்யப்படும்..” என்று வேறு அறிவித்தார். இடைப்பட்டக் காலத்தில் ஏனோ அவரது சுருதி திடீரென இறங்க ஆரம்பித்தது.

“இந்த நிறுவனங்களுக்கு அபாரதம் விதிப்போம்..” என்று ஒரு படி இறங்கினார். அடுத்து, “அவர்கள் அபராதத் தொகையைக் கட்டிவிட்டார்கள்..” என்றார். இப்போதோ “ஸ்பெக்டரம் விவகாரத்தில் யாரும் எந்தத் தவறும் செய்யவில்லை. கணக்குத் தணிக்கைக் குழு கூறும் தொகை எங்களை நோகடிக்கிறது..” என்று சொல்ல ஆரம்பித்திருக்கிறார்.

காங்கிரஸ் கட்சியின் நிலைப்பாட்டில் தடுமாற்றம் ஏன் என்பது குறித்து கடந்த 12.01.2011 தேதியிட்ட ஜூனியர் விகடன் இதழிலேயே '2-ஜி ஸ்பெக்டரம் சர்வதேசப் பகீர் உண்மைகள்' என்ற தலைப்பில் பல விவரங்களை அம்பலப்படுத்தியிருந்தோம்.

காங்கிரஸ் பயப்படுவதற்குக் காரணம், இது வெறும் ஊழல் வழக்கு மட்டுமல்ல.. ஸ்பெக்ட்ரம் 2-ஜி உரிமங்களைப் பெற்ற நிறுவனங்கள், அதை அவர்களிடம் இருந்து வாங்கிய நிறுவனங்கள், அவற்றில் முதலீடு செய்திருக்கும் பட்டியலை எடுத்த அதிகாரிகள் அனைவருமே ஆடிப் போயிருக்கிறார்கள்.

இதில் ஒரு நிறுவனத்துக்கு தாவூத் இப்ராஹிமுடன் நெருக்கமான தொடர்பு இருப்பதாக சி.பி.ஐ. நினைக்கிறது. இந்தியாவின் பரம எதிரி நாடான பாகிஸ்தானில் வர்த்தகத் தொடர்புள்ள நிறுவனங்களும் இதில் இருக்கின்றன. பல்வேறு நாடுகளைச் சேர்ந்த தீவிரவாத, மதவாத அமைப்புகளின் பிடியில் உள்ள கம்பெனிகளும் அங்கம் வகிப்பதாக சி.பி.ஐ.க்கு சந்தேகம் வலுத்து வருகிறதாம் என்று அந்தக் கட்டுரையில் நாம் எழுதியிருந்தோம்.

ஸ்பெக்ட்ரம் 2-ஜி லைசென்ஸ் பெற்ற ஒன்பது கம்பெனிகளின் உரிமையாளர்கள் யார், யார் என்பதைப் பெயர், முகவரிகளுடன் பட்டியல் இட்டிருந்தோம்.

மிக மிகக் குறைவான தொகைக்கு 2-ஜி உரிமங்களைப் பெற்ற இந்த நிறுவனங்கள் நேரடியாக மக்கள் சேவையில் இறங்காமல் பல்லாயிரம் கோடி கொள்ளை லாபம் அடிப்பதற்காக பல்வேறு நாடுகளைச் சேர்ந்த கம்பெனிகளுக்குக் கை மாற்றிய விவரங்கள் அடுத்தக் கட்டமாக இப்போது டெல்லியில் கசிய ஆரம்பித்துள்ளன.

300 ரூபாய்க்கு லைசென்ஸ் பெற்றவர்கள் 3 ஆயிரம் ரூபாய்க்கு விற்று லாபம் சம்பாதித்துள்ளனர் என்ற பீடிகையுடன் முக்கியமான விவரங்களை டெல்லியில் சொல்கிறார்கள்.

2-ஜி அலைக்கற்றைகளை ஒதுக்கீடு பெற்ற ஒன்பது நிறுவனங்களில், நான்கு நிறுவனங்கள்தான் முறையான இந்திய முகவரிகளைக் கொடுத்துள்ளன. மற்ற நிறுவனங்கள் அரியானா மாநிலம் குர்ஹான் என்ற இடத்தைத் தேர்ந்தெடுத்து முகவரிகளைக் கொடுத்துள்ளன. நீரா ராடியாவின் தனி பங்களா அந்தப் பகுதியில்தான் உள்ளது. குர்ஹான் முகவரியைக் கொடுத்த நிறுவனங்கள்தான் பெரும்பாலும் அந்த நாட்டு நிறுவனங்களுக்குத் தங்களது உரிமங்களைத் தாரை வார்த்துள்ளார்கள் என்று அதிகாரிகள் பக்கம் முணுமுணுப்பு.

ஸ்வான் டெலிகாம் நிறுவனம், சாகித் பல்வா குடும்பமும், வினோத் கோயங்கோ குடும்பமும் இணைந்து நடத்தும் நிறுவனமாகச் சொல்லப்படுகிறது. ஆனால் ரிலையன்ஸ் அனில் அம்பானி மற்றும் அவரது நண்பர் சரத்பாபுவுக்கு இந்த நிறுவனம் உருவானதில் பங்கு இருப்பதாக இப்போது ஒரு பேச்சு உள்ளது. மேற்படி நிறுவனத்தை ஆரம்பித்த அனில் அம்பானி, பின்னர் பல்வா குடும்பத்துக்கு இந்த ஸ்வானை விற்பனை செய்திருக்கிறார்.

இந்த ஸ்வான், துபாயைத் தலைமையிடமாகக் கொண்ட எடிஸலாட் என்ற நிறுவனத்துக்கு தனது நிறுவனத்தின் 45 சதவிகிதப் பங்குகளை 4500 கோடிக்கு விற்றிருக்கிறது. 5.27 சதவிகிதப் பங்குகளைச் சென்னையைச் சேர்ந்த ஜெனெக்ஸ் எக்ஸிம் நிறுவனத்துக்கு 380 கோடிக்கு விற்றது. எடிஸலாட் நிறுவனம், ஸ்வானிடம் இருந்து வாங்கிய 45 சதவிகிதப் பங்குகளில் 16 சதவிகிதப் பங்குகளை சீன கம்பெனி ஒன்றுக்கு விற்றுள்ளது. இந்தச் சீனக் கம்பெனியை நடத்துவது க்யூவே எனப்படும் பீப்பிள்ஸ் லிபரேஷன் ஆர்மி என்கிற தீவிரவாத நிழல் படிந்த அமைப்பாகும்.

1400 கோடிக்கு 100 சதவிகிதப் பங்குகளை நம்முடைய மத்திய அரசாங்கத்திடமிருந்து வாங்கிய ஸ்வான் நிறுவனம், அதில் பாதிக்கும் குறைவான பங்குகளை 4500 கோடிக்கு விற்பனை செய்திருக்கிறது என்றால், இதில் உள்ள கொள்ளை லாபம் எவ்வளவு என்பதை வெளிப்படையாகவே தெரியும்.

சிஸ்டமா ஷியாம் டெலிகாம் நிறுவனத்துக்கு இந்தியாவில் ஏஜெண்ட்டுகள் மட்டுமே இருக்கிறார்கள். இவர்கள் 2-ஜி லைசென்ஸை வாங்கி 60 சதவிகிதப் பங்குகளை ரஷ்யாவைச் சேர்ந்த எம்.டி.எஸ்.குரூப்புக்கு விற்றுள்ளார்கள். விளாடிமிர் எத்சென்கோவ் என்பவர் இதன் சேர்மனாக இருக்கிறார். மாஸ்கோ முகவரியை இந்நிறுவனம் கொடுத்துள்ளது.

லூப் டெலிகாம் நிறுவனத்துக்கான உரிமங்களை இந்தியாவைச் சேர்ந்த சந்தீப்பாசு, அய்லோன் கிம் இருவரும் விண்ணப்பித்துப் பெற்றுள்ளனர். இவர்கள் தங்களது லைசென்ஸை தைவான் நாட்டைச் சேர்ந்த மொய்லின்யா என்பவருக்கு விற்றுக் கொள்ளை லாபம் அடைந்துள்ளனர்.

யூனிடெக் டெலிகாம் நிறுவனம் ரமேஷ் சந்திராவை சேர்மனாகக் கொண்ட இந்திய நிறுவனம். ஆனால் தங்களது லைசென்ஸின் 67.25 சதவிகிதப் பங்குகளை நார்வே நாட்டின் டெலிநார் நிறுவனத்துக்கு விற்று 10 ஆயிரம் கோடி லாபம் பெற்றுள்ளனர். இந்த நிறுவனத்தின் இன்னொரு பெயர்தான் யூனிநார். இதன் சேர்மன் நார்வே நாட்டைச் சேர்ந்த ஜான் பிரெட்ரிக் பக்காஸ்.

இந்தியாவைச் சேர்ந்த ஸ்டெர்லிங் சிவசங்கரன் தனது எஸ் டெல் நிறுவனத்தின் மூலமாக 2-ஜி லைசென்ஸை பெற்றார். அதில் 26 சதவிகிதப் பங்குகள், பஹ்ரைன் நாட்டைச் சேர்ந்த அல்ரஹிம் கம்பெனிக்கு விற்கப்பட்டது. ஆப்பிரிக்காவைச் சேர்ந்த பட்டல் கோ குரூப்புக்கு 23 சதவிகிதப் பங்குகளை விற்றுள்ளனர். எஸ் டெல் இந்த விற்பனையின் மூலம் மட்டும் 6 ஆயிரம் கோடிக்கு மேல் சம்பாதித்துள்ளதாக சி.பி.ஐ. சந்தேகப்படுகிறது.

இதில் கொடுமையான விஷயம் என்னவென்றால், 26 சதவிகிதப் பங்குகளை எஸ் டெல் நிறுவனத்திடமிருந்து வாங்கியிருக்கும் பஹ்ரைன் நிறுவனம், தன்னுடைய அலுவலகத்தின் நிரந்தர முகவரியைக்கூட கொடுக்காமல், தொடர்புக்கு என்று ஒரேயொரு செல்போன் எண்ணை மட்டுமே கொடுத்திருக்கிறது.

10 ஆயிரம் பெர்சனல் லோன் வாங்கினாலே எத்தனையோ ஆதாரங்களைக் கேட்டு வங்கிகள் துளைத்தெடுக்கும் நிலையில், அரசாங்கத்திடம் ஒரு துக்கடா சான்றிதழ் வாங்குவதற்கே பத்திருபது ஆவணங்களைக் காட்ட வேண்டிய நிலையில் பல்லாயிரம் கோடி மதிப்புள்ள லைசென்ஸ் பெறுவதற்கு வெறுமனே ஒரு செல்போன் நம்பரில் அரசாங்கம் திருப்தியடைந்துவிட்டது.

ஐடியா செல்லுலூர் டெலிகாம் நிறுவனம் தனது 26 சதவிகிதப் பங்குகளை  மொரீஷியஸ் நாட்டைச் சேர்ந்த ஏசியா இன்வெஸ்டர்ஸ் நிறுவனம், மற்றும் டாடா இன்டர்ஸ்ட்ரீஸ் அண்ட் அபெக்ஸ் இன்வென்ஸ்ட்மென்ட்ஸ் நிறுவனத்திற்கும் விற்றுள்ளது.

வீடியோகான் நிறுவனம் தனது 60 சதவிகிதப் பங்குகளை கொரிய நாட்டைச் சேர்ந்த கே.ஆர்.கிம் என்பவருக்குச் சொந்தமான கிம்கோ நிறுவனத்துக்கு 7 ஆயிரம் கோடிக்கு விற்றுள்ளது.

ரிலையன்ஸ் டெலிகாம் நிறுவனம் அமெரிக்காவைச் சேர்ந்த டைகர் டிரஸ்ட் மூலமாக 50 சதவிகிதப் பங்குகளை வாங்கியுள்ளது.

டாடா வாங்கிய லைசென்ஸ்களின் பெரும் பகுதியை எஸ்.டி.எல். என்ற ரஷ்ய நிறுவனம் வாங்கியுள்ளது.

இதையெல்லாம் பார்க்கும்போது இந்தியாவின் தொலைத் தொடர்புத் துறை முழுமையாக அந்நிய நாட்டு கம்பெனிகளுக்குத் தாரை வார்த்துத் தரப்பட்டுள்ளதாகவே தெரிகிறது.

ஜனாதிபதி, பிரதமர், ராணுவத் தலைமையகம், உள்துறை, புலனாய்வுப் பிரிவுகள், அரசாங்க ரகசியங்கள், அறிவியல் கண்டுபிடிப்புகள் மற்றும் ராணுவ வலிமைகள் உள்ளிட்ட அனைத்துத் தகவல்களையும் பரிமாறக் கூடிய தொலைத் தொடர்புச் சேவைக்குள் அந்நிய நாடுகள் படுகேஷுவலாக நுழைந்திருக்கின்றன.

டெல்லியில் இருந்து லாகூருக்கு ஒரு பஸ் விடப்பட்ட நேரத்தில், இது அடுக்குமா? தீவிரவாதிகள் சுலபமாக வந்து போவதற்கு அரசாங்கமே வழி செய்வதுபோல் ஆகிவிடாதா? என்று கொதிப்பு கிளம்பியது நினைவில் இருக்கிறதா..?

இப்போதோ அந்நிய நாடுகள், அவர்கள் நாட்டில் இருந்தபடியே தகவல்களை ஜம்மென்று உருவிக் கொள்ளலாம் என்ற ஆபத்தான தொலைத் தொடர்பைத்தான் உருவாக்கிக் கொடுத்திருக்கிறார்கள் என்று வேதனைப்படுகிறார்கள் இந்தத் துறையின் உள்விஷயங்கள் அறிந்தவர்கள்.

கபில்சிபல் அமுக்கி வாசிப்பதன் பின்னால் இருக்கும் அபஸ்வரங்கள் இவை எல்லாம்தானா..?

நன்றி : ஜூனியர் விகடன் - 19-01-2011

Tweet