ஸ்பெக்ட்ரம் ஊழல் - அந்நிய நாட்டு நிறுவனங்களின் கையில் 2-ஜி..!

14-01-2011

என் இனிய வலைத்தமிழ் மக்களே..!

ஆ.ராசா பதவி விலகி என்ன புண்ணியம்..? கபில்சிபல் வந்த பிறகும் ஸ்பெக்டரம் விவகார முறைகேடு, விசாரணை விஷயத்தில் மத்திய அரசின் பார்வையில் எந்த மாற்றமும் இல்லை என்பதுதான் தொலைத் தொடர்புத் துறை அமைச்சகத்தில் கறைபடாத சில உயரதிகாரிகளின் பெரும் கவலை.

நாடாளுமன்றம் ஸ்தம்பித்த நிலையில் ஆ.ராசா ராஜினாமா செய்ய வேண்டிய உச்சக்கட்ட நெருக்கடி கடந்த நவம்பர் மாதம் 14-ம் தேதி உருவாகியது. அதனால் ராசா பதவி விலகி, தொலைத் தொடர்புத் துறை அமைச்சர் பொறுப்புக்கு கபில்சிபல் கொண்டு வரப்பட்டார். நவம்பர் 29-ம் தேதி டெல்லியில் நிருபர்களைச் சந்தித்தார் கபில்சிபல். அப்போது அவர் சொன்னது கூர்ந்து கவனிக்கத்தக்கது.

“2 ஜி அலைக்கற்றை ஒதுக்கீடு முறையாகச் செயல்படவில்லை. முதலில் வந்தவர்களுக்கு முதலில் ஒதுக்கீடு என்ற கொள்கையால், அரசுக்கு ஆயிரக்கணக்கான கோடி ரூபாய்கள் வருவாய் இழப்பு ஏற்பட்டுள்ளது. இந்தத் துறையில் அனுபவமே இல்லாத பல நிறுவனங்கள் பொய்யான தகவல்களைக் கூறி உரிமம் பெற்றுள்ளன. முதலில் ஒதுக்கீடு பெற்ற நிறுவனங்கள் அதனை மற்ற நிறுவனங்களுக்கு நல்ல லாபத்துக்கு விற்றுவிட்டன. வேறு சில நிறுவனங்களோ சில பிரபல நிறுவனங்களுக்கு பினாமியாகச் செயல்பட்டதாகத் தகவல்கள் கூறுகின்றன. இதையெல்லாம் முழுமையாக விசாரிக்க அரசு முடிவெடுத்துள்ளது.

அந்த அடிப்படையில் 119 நிறுவனங்களுக்கு நோட்டீஸ் அனுப்பியிருக்கிறோம். பதிலளிக்க 60 நாட்கள் அவகாசம் கொடுத்திருக்கிறோம். உரிய அனுபவமும், தகுதியும் இல்லாமல் தவறானத் தகவல்களை அளித்த நிறுவனங்கள் ஒரு புறம்.. உரிமம் பெற்ற பிறகு அவற்றை அதிக லாபத்துக்கு விற்ற நிறுவனங்கள் மறுபுறம்.. இப்படி இரு வேறுவிதமான நிறுவனங்கள் உள்ளன. உரிமம் பெற்ற பிறகும் சேவையை அளிக்காமல் இருக்கும் நிறுவனங்கள் மற்றொரு புறம். இந்த நிறுவனங்களின் பெயர்களை வெளியிடுவது அவசியம் என்று அரசு கருதவில்லை.. உரிய நடவடிக்கைகள் எடுக்கும்போது விவரங்கள் வெளியிடப்படும்..” என்றார்.

இதைத் தொடர்ந்து 119 நிறுவனங்களுக்கு நோட்டீஸும் ஜரூராக அனுப்பினார். “சேவையைத் தொடங்காத ஏழு நிறுவனங்களுக்கான உரிமம் ரத்து செய்யப்படும்..” என்று வேறு அறிவித்தார். இடைப்பட்டக் காலத்தில் ஏனோ அவரது சுருதி திடீரென இறங்க ஆரம்பித்தது.

“இந்த நிறுவனங்களுக்கு அபாரதம் விதிப்போம்..” என்று ஒரு படி இறங்கினார். அடுத்து, “அவர்கள் அபராதத் தொகையைக் கட்டிவிட்டார்கள்..” என்றார். இப்போதோ “ஸ்பெக்டரம் விவகாரத்தில் யாரும் எந்தத் தவறும் செய்யவில்லை. கணக்குத் தணிக்கைக் குழு கூறும் தொகை எங்களை நோகடிக்கிறது..” என்று சொல்ல ஆரம்பித்திருக்கிறார்.

காங்கிரஸ் கட்சியின் நிலைப்பாட்டில் தடுமாற்றம் ஏன் என்பது குறித்து கடந்த 12.01.2011 தேதியிட்ட ஜூனியர் விகடன் இதழிலேயே '2-ஜி ஸ்பெக்டரம் சர்வதேசப் பகீர் உண்மைகள்' என்ற தலைப்பில் பல விவரங்களை அம்பலப்படுத்தியிருந்தோம்.

காங்கிரஸ் பயப்படுவதற்குக் காரணம், இது வெறும் ஊழல் வழக்கு மட்டுமல்ல.. ஸ்பெக்ட்ரம் 2-ஜி உரிமங்களைப் பெற்ற நிறுவனங்கள், அதை அவர்களிடம் இருந்து வாங்கிய நிறுவனங்கள், அவற்றில் முதலீடு செய்திருக்கும் பட்டியலை எடுத்த அதிகாரிகள் அனைவருமே ஆடிப் போயிருக்கிறார்கள்.

இதில் ஒரு நிறுவனத்துக்கு தாவூத் இப்ராஹிமுடன் நெருக்கமான தொடர்பு இருப்பதாக சி.பி.ஐ. நினைக்கிறது. இந்தியாவின் பரம எதிரி நாடான பாகிஸ்தானில் வர்த்தகத் தொடர்புள்ள நிறுவனங்களும் இதில் இருக்கின்றன. பல்வேறு நாடுகளைச் சேர்ந்த தீவிரவாத, மதவாத அமைப்புகளின் பிடியில் உள்ள கம்பெனிகளும் அங்கம் வகிப்பதாக சி.பி.ஐ.க்கு சந்தேகம் வலுத்து வருகிறதாம் என்று அந்தக் கட்டுரையில் நாம் எழுதியிருந்தோம்.

ஸ்பெக்ட்ரம் 2-ஜி லைசென்ஸ் பெற்ற ஒன்பது கம்பெனிகளின் உரிமையாளர்கள் யார், யார் என்பதைப் பெயர், முகவரிகளுடன் பட்டியல் இட்டிருந்தோம்.

மிக மிகக் குறைவான தொகைக்கு 2-ஜி உரிமங்களைப் பெற்ற இந்த நிறுவனங்கள் நேரடியாக மக்கள் சேவையில் இறங்காமல் பல்லாயிரம் கோடி கொள்ளை லாபம் அடிப்பதற்காக பல்வேறு நாடுகளைச் சேர்ந்த கம்பெனிகளுக்குக் கை மாற்றிய விவரங்கள் அடுத்தக் கட்டமாக இப்போது டெல்லியில் கசிய ஆரம்பித்துள்ளன.

300 ரூபாய்க்கு லைசென்ஸ் பெற்றவர்கள் 3 ஆயிரம் ரூபாய்க்கு விற்று லாபம் சம்பாதித்துள்ளனர் என்ற பீடிகையுடன் முக்கியமான விவரங்களை டெல்லியில் சொல்கிறார்கள்.

2-ஜி அலைக்கற்றைகளை ஒதுக்கீடு பெற்ற ஒன்பது நிறுவனங்களில், நான்கு நிறுவனங்கள்தான் முறையான இந்திய முகவரிகளைக் கொடுத்துள்ளன. மற்ற நிறுவனங்கள் அரியானா மாநிலம் குர்ஹான் என்ற இடத்தைத் தேர்ந்தெடுத்து முகவரிகளைக் கொடுத்துள்ளன. நீரா ராடியாவின் தனி பங்களா அந்தப் பகுதியில்தான் உள்ளது. குர்ஹான் முகவரியைக் கொடுத்த நிறுவனங்கள்தான் பெரும்பாலும் அந்த நாட்டு நிறுவனங்களுக்குத் தங்களது உரிமங்களைத் தாரை வார்த்துள்ளார்கள் என்று அதிகாரிகள் பக்கம் முணுமுணுப்பு.

ஸ்வான் டெலிகாம் நிறுவனம், சாகித் பல்வா குடும்பமும், வினோத் கோயங்கோ குடும்பமும் இணைந்து நடத்தும் நிறுவனமாகச் சொல்லப்படுகிறது. ஆனால் ரிலையன்ஸ் அனில் அம்பானி மற்றும் அவரது நண்பர் சரத்பாபுவுக்கு இந்த நிறுவனம் உருவானதில் பங்கு இருப்பதாக இப்போது ஒரு பேச்சு உள்ளது. மேற்படி நிறுவனத்தை ஆரம்பித்த அனில் அம்பானி, பின்னர் பல்வா குடும்பத்துக்கு இந்த ஸ்வானை விற்பனை செய்திருக்கிறார்.

இந்த ஸ்வான், துபாயைத் தலைமையிடமாகக் கொண்ட எடிஸலாட் என்ற நிறுவனத்துக்கு தனது நிறுவனத்தின் 45 சதவிகிதப் பங்குகளை 4500 கோடிக்கு விற்றிருக்கிறது. 5.27 சதவிகிதப் பங்குகளைச் சென்னையைச் சேர்ந்த ஜெனெக்ஸ் எக்ஸிம் நிறுவனத்துக்கு 380 கோடிக்கு விற்றது. எடிஸலாட் நிறுவனம், ஸ்வானிடம் இருந்து வாங்கிய 45 சதவிகிதப் பங்குகளில் 16 சதவிகிதப் பங்குகளை சீன கம்பெனி ஒன்றுக்கு விற்றுள்ளது. இந்தச் சீனக் கம்பெனியை நடத்துவது க்யூவே எனப்படும் பீப்பிள்ஸ் லிபரேஷன் ஆர்மி என்கிற தீவிரவாத நிழல் படிந்த அமைப்பாகும்.

1400 கோடிக்கு 100 சதவிகிதப் பங்குகளை நம்முடைய மத்திய அரசாங்கத்திடமிருந்து வாங்கிய ஸ்வான் நிறுவனம், அதில் பாதிக்கும் குறைவான பங்குகளை 4500 கோடிக்கு விற்பனை செய்திருக்கிறது என்றால், இதில் உள்ள கொள்ளை லாபம் எவ்வளவு என்பதை வெளிப்படையாகவே தெரியும்.

சிஸ்டமா ஷியாம் டெலிகாம் நிறுவனத்துக்கு இந்தியாவில் ஏஜெண்ட்டுகள் மட்டுமே இருக்கிறார்கள். இவர்கள் 2-ஜி லைசென்ஸை வாங்கி 60 சதவிகிதப் பங்குகளை ரஷ்யாவைச் சேர்ந்த எம்.டி.எஸ்.குரூப்புக்கு விற்றுள்ளார்கள். விளாடிமிர் எத்சென்கோவ் என்பவர் இதன் சேர்மனாக இருக்கிறார். மாஸ்கோ முகவரியை இந்நிறுவனம் கொடுத்துள்ளது.

லூப் டெலிகாம் நிறுவனத்துக்கான உரிமங்களை இந்தியாவைச் சேர்ந்த சந்தீப்பாசு, அய்லோன் கிம் இருவரும் விண்ணப்பித்துப் பெற்றுள்ளனர். இவர்கள் தங்களது லைசென்ஸை தைவான் நாட்டைச் சேர்ந்த மொய்லின்யா என்பவருக்கு விற்றுக் கொள்ளை லாபம் அடைந்துள்ளனர்.

யூனிடெக் டெலிகாம் நிறுவனம் ரமேஷ் சந்திராவை சேர்மனாகக் கொண்ட இந்திய நிறுவனம். ஆனால் தங்களது லைசென்ஸின் 67.25 சதவிகிதப் பங்குகளை நார்வே நாட்டின் டெலிநார் நிறுவனத்துக்கு விற்று 10 ஆயிரம் கோடி லாபம் பெற்றுள்ளனர். இந்த நிறுவனத்தின் இன்னொரு பெயர்தான் யூனிநார். இதன் சேர்மன் நார்வே நாட்டைச் சேர்ந்த ஜான் பிரெட்ரிக் பக்காஸ்.

இந்தியாவைச் சேர்ந்த ஸ்டெர்லிங் சிவசங்கரன் தனது எஸ் டெல் நிறுவனத்தின் மூலமாக 2-ஜி லைசென்ஸை பெற்றார். அதில் 26 சதவிகிதப் பங்குகள், பஹ்ரைன் நாட்டைச் சேர்ந்த அல்ரஹிம் கம்பெனிக்கு விற்கப்பட்டது. ஆப்பிரிக்காவைச் சேர்ந்த பட்டல் கோ குரூப்புக்கு 23 சதவிகிதப் பங்குகளை விற்றுள்ளனர். எஸ் டெல் இந்த விற்பனையின் மூலம் மட்டும் 6 ஆயிரம் கோடிக்கு மேல் சம்பாதித்துள்ளதாக சி.பி.ஐ. சந்தேகப்படுகிறது.

இதில் கொடுமையான விஷயம் என்னவென்றால், 26 சதவிகிதப் பங்குகளை எஸ் டெல் நிறுவனத்திடமிருந்து வாங்கியிருக்கும் பஹ்ரைன் நிறுவனம், தன்னுடைய அலுவலகத்தின் நிரந்தர முகவரியைக்கூட கொடுக்காமல், தொடர்புக்கு என்று ஒரேயொரு செல்போன் எண்ணை மட்டுமே கொடுத்திருக்கிறது.

10 ஆயிரம் பெர்சனல் லோன் வாங்கினாலே எத்தனையோ ஆதாரங்களைக் கேட்டு வங்கிகள் துளைத்தெடுக்கும் நிலையில், அரசாங்கத்திடம் ஒரு துக்கடா சான்றிதழ் வாங்குவதற்கே பத்திருபது ஆவணங்களைக் காட்ட வேண்டிய நிலையில் பல்லாயிரம் கோடி மதிப்புள்ள லைசென்ஸ் பெறுவதற்கு வெறுமனே ஒரு செல்போன் நம்பரில் அரசாங்கம் திருப்தியடைந்துவிட்டது.

ஐடியா செல்லுலூர் டெலிகாம் நிறுவனம் தனது 26 சதவிகிதப் பங்குகளை  மொரீஷியஸ் நாட்டைச் சேர்ந்த ஏசியா இன்வெஸ்டர்ஸ் நிறுவனம், மற்றும் டாடா இன்டர்ஸ்ட்ரீஸ் அண்ட் அபெக்ஸ் இன்வென்ஸ்ட்மென்ட்ஸ் நிறுவனத்திற்கும் விற்றுள்ளது.

வீடியோகான் நிறுவனம் தனது 60 சதவிகிதப் பங்குகளை கொரிய நாட்டைச் சேர்ந்த கே.ஆர்.கிம் என்பவருக்குச் சொந்தமான கிம்கோ நிறுவனத்துக்கு 7 ஆயிரம் கோடிக்கு விற்றுள்ளது.

ரிலையன்ஸ் டெலிகாம் நிறுவனம் அமெரிக்காவைச் சேர்ந்த டைகர் டிரஸ்ட் மூலமாக 50 சதவிகிதப் பங்குகளை வாங்கியுள்ளது.

டாடா வாங்கிய லைசென்ஸ்களின் பெரும் பகுதியை எஸ்.டி.எல். என்ற ரஷ்ய நிறுவனம் வாங்கியுள்ளது.

இதையெல்லாம் பார்க்கும்போது இந்தியாவின் தொலைத் தொடர்புத் துறை முழுமையாக அந்நிய நாட்டு கம்பெனிகளுக்குத் தாரை வார்த்துத் தரப்பட்டுள்ளதாகவே தெரிகிறது.

ஜனாதிபதி, பிரதமர், ராணுவத் தலைமையகம், உள்துறை, புலனாய்வுப் பிரிவுகள், அரசாங்க ரகசியங்கள், அறிவியல் கண்டுபிடிப்புகள் மற்றும் ராணுவ வலிமைகள் உள்ளிட்ட அனைத்துத் தகவல்களையும் பரிமாறக் கூடிய தொலைத் தொடர்புச் சேவைக்குள் அந்நிய நாடுகள் படுகேஷுவலாக நுழைந்திருக்கின்றன.

டெல்லியில் இருந்து லாகூருக்கு ஒரு பஸ் விடப்பட்ட நேரத்தில், இது அடுக்குமா? தீவிரவாதிகள் சுலபமாக வந்து போவதற்கு அரசாங்கமே வழி செய்வதுபோல் ஆகிவிடாதா? என்று கொதிப்பு கிளம்பியது நினைவில் இருக்கிறதா..?

இப்போதோ அந்நிய நாடுகள், அவர்கள் நாட்டில் இருந்தபடியே தகவல்களை ஜம்மென்று உருவிக் கொள்ளலாம் என்ற ஆபத்தான தொலைத் தொடர்பைத்தான் உருவாக்கிக் கொடுத்திருக்கிறார்கள் என்று வேதனைப்படுகிறார்கள் இந்தத் துறையின் உள்விஷயங்கள் அறிந்தவர்கள்.

கபில்சிபல் அமுக்கி வாசிப்பதன் பின்னால் இருக்கும் அபஸ்வரங்கள் இவை எல்லாம்தானா..?

நன்றி : ஜூனியர் விகடன் - 19-01-2011

Tweet

ஆ.ராசாவின் தலித் கேடயத்தால் ஏமாற்றப்பட்ட தலித் மக்கள்..!

21-12-2010

என் இனிய வலைத்தமிழ் மக்களே..!

ஸ்பெக்ட்ரம் ஊழல் விவகாரம் வெடித்ததில் இருந்தே ராசாவைக் காப்பாற்றுவதற்காக கலைஞர் பயன்படுத்தும் வார்த்தை ராசா ஒரு தலித் என்பதால்தான் அவரைக் குறி வைத்து அனைவரும் தாக்குகிறார்கள் என்பதுதான்..!

கலைஞர் மட்டுமல்ல.. அவருடைய அடிப்பொடிகள்கூட இதே வார்த்தையைத்தான் பயன்படுத்தி வருகின்றன. ஊழல் செய்கின்ற அரசியல்வியாதிகள் யாரும் ஜாதியை வைத்து பணத்தைக் கொள்ளையடிப்பதில்லை. தங்களுக்கு இருக்கின்ற திறமையை வைத்துதான் செய்கின்றனர். இதற்கும் ஜாதிக்கும் யாதொரு தொடர்புமில்லை என்பது அவர்களுக்கே தெரியுமென்றாலும் கட்சிப் பாசம் அவர்களைக் கண்ணை மறைக்கிறது.

இவர்கள் தலித் தலித் தலித் என்று கூக்குரலிட்டு ராசாவைக் காப்பாற்ற முனைந்தாலும், இதே தலித் ராசா, தனது பெரம்பலூர் தொகுதியைச் சேர்ந்த தலித் விவசாய மக்களை எப்படியெல்லாம் ஏமாற்றி அவர்களிடமிருந்து நிலங்களை ஏமாற்றி பிடுங்கியிருக்கிறார் என்பது இப்போது வெளிச்சத்திற்கு வந்திருக்கிறது..!

பெரம்பலூரில் அமையவுள்ள எம்.ஆர்.எப்., டயர் தொழிற்சாலைக்கு பொதுமக்களிடம் நிலம் ஆர்ஜிதம் செய்து வழங்கியதில்தான் அந்தப் பகுதி தலித் விவசாய மக்களை பெருமளவுக்கு ஏமாற்றியிருக்கிறார் தலித் அமைச்சரான ராசா.

60 தலித் விவசாய மக்களை உருட்டிப் புரட்டி அவர்களுடைய நிலங்கள் அனைத்தும் தலித் அமைச்சர் ராசாவின் குடும்ப நிறுவனமான கிரீன் ஹவுஸ் புரமோட்டர்ஸ் நிறுவனத்தால், குறைந்த விலைக்கு வாங்கப்பட்டுள்ளது.

பெரம்பலூர் மாவட்ட மேம்பாட்டுக்காகவே, தான் எம்.ஆர்.எப்., டயர் தொழிற்சாலையை பெரம்பலூர் தொகுதிக்குள் கொண்டு வந்ததாகப் பெருமையுடன் கூறிக் கொண்டார் தலித் அமைச்சரான ராசா. ஆனால் உண்மையில் தனது குடும்பத்தின் வளத்தைப் பெருக்கிக் கொள்ளவே திட்டமிட்டு இதனைச் செய்திருப்பதாக இப்போதுதான் தெரிய வந்துள்ளது.

இந்த எம்.ஆர்.எப். நிறுவனத்துக்காக நாரணமங்கலம் என்ற இடத்தில், அந்த கிராம மக்கள் 156 பேரிடம் 600 ஏக்கர் நிலம் "கிரீன் ஹவுஸ் புரமோட்டர்ஸ்' என்ற நிறுவனத்தின் ஏஜன்டுகளான செந்தில் முருகன், செல்வராஜ் ஆகியோர் மூலம் 2007-08ம் ஆண்டுகளில் வாங்கப்பட்டது.

இந்த கிரீன் ஹவுஸ் புரமோட்டர்ஸ் நிறுவனம் என்பது ராசாவின் "நெருங்கிய' நண்பர்  சாதிக் என்பவரை எம்.டி.யாகவும், ராசாவின் அண்ணன் கலியபெருமாள், ராசாவின் அக்கா கமலா உள்ளிட்ட சிலரை இயக்குனர்களாக கொண்ட நிறுவனம்.

முதலில் தொழிற்சாலை அமைக்க நிலம் கொடுப்பதற்கு, நாரணமங்கலத்தை சேர்ந்த செந்தில்முருகன் என்பவர் மக்களை திரட்டி எதிர்ப்பு தெரிவித்துள்ளார்.  அவரை சாதிக் சரிக்கட்டிய பின்பு, பின்னர் செந்தில் முருகனே முன்னின்று நாரணமங்கலம் கிராம மக்களை பல்வேறு வகைகளில் மிரட்டியும், குறைந்த விலை கொடுத்தும் (ஏக்கருக்கு 65 ஆயிரம் முதல் 3.5 லட்ச ரூபாய்வரை) நிலத்தை வாங்கி கொடுத்துள்ளார்.

அப்போது நிலம் கொடுக்கும் குடும்பத்தில் ஒருவருக்கு எம்.ஆர்.எப்., நிறுவனத்தில் கண்டிப்பாக வேலைவாய்ப்பு வழங்கப்படும் என்று மாவட்ட நிர்வாகத்தாலும், நிலம் வாங்கிய ஏஜெண்டுகளாலும் உறுதிமொழி கொடுக்கப்பட்டுள்ளது. இவ்வாறு 60 பேரிடம் நிலம் வாங்கப்பட்டுள்ளது.

விவசாயத்தை பெரிதும் நம்பியிருந்த பலர் விவசாய நிலத்தை கொடுக்க மறுத்துள்ளனர். அவர்களை மாவட்ட நிர்வாகம், அரசு அதிகாரிகள், போலீஸ் என அரசு இயந்திரத்தை முழுமையாகவும், முறைகேடாக பயன்படுத்தியும், தொடர்ந்து மிரட்டல் விடுத்தும் செந்தில் முருகன், ஹபிபுல்லா, செல்வராஜ் ஆகியோர் வாங்கியுள்ளனர். வாங்கிய பின்பு குறிப்பிட்ட ஏக்கர் நிலங்களை கிரீன் ஹவுஸ் புரமோட்டர்ஸ் நிறுவனத்திற்கு கை மாற்றி கொடுத்துள்ளனர்.

இதற்காக இவர்கள் சாதிக்கிடம் ஏக்கருக்கு ஆறு லட்ச ரூபாய் வாங்கியுள்ளனர். சாதிக்கோ இவர்களிடம் வாங்கிய நிலத்தை எம்.ஆர்.எப்., நிறுவனத்திடம் ஒரு ஏக்கருக்கு 15 முதல் 18 லட்ச ரூபாய்வரை விற்பனை செய்துள்ளார். அதுவும் 435 ஏக்கர் நிலம் மட்டுமே அந்நிறுவனத்துக்கு வழங்கப்பட்டுள்ளது. மீதியுள்ள 165 ஏக்கர் நிலம் இன்னமும் செந்தில் முருகன், செல்வராஜ் ஆகியோர் பெயர்களில்தான் உள்ளது என்பது  குறிப்பிடத்தக்கது.

எம்.ஆர்.எப்., நிறுவனத்துக்காக நாரணமங்கலம் கிராம மக்களிடம் நிலம் வாங்கி கொடுத்தது மூலம் சாதாரண நிலையில் இருந்த செந்தில் முருகனும், செல்வராஜும் தற்போது கோடீஸ்வரர்களாக பெரம்பலூரில் வலம் வருகின்றனர்.

தங்களிடம் நிலம் வாங்கியவர்கள் திடீரென பணக்காரர்களாக வலம் வருவதை கண்ட நாரணமங்கலம் கிராம மக்கள், இது குறித்து விசாரித்தபோதுதான், “தங்களை மிரட்டி குறைந்த விலைக்கு வாங்கிய நிலத்தில் 435 ஏக்கரை எம்.ஆர்.எப்., நிறுவனத்துக்கு, ஐந்து முதல் 25 மடங்குவரை கூடுதல் விலை வைத்து விற்பனை செய்தது தெரிய வந்துள்ளது.

இதில் கொடுமையான விஷயம் என்னவென்றால், நிலம் கொடுத்தவர்களில் 60 பேர் விவசாயத்தை மட்டும் நம்பியிருந்த ஏழை தலித் மக்கள். அவர்களின் அறியாமையை பயன்படுத்தியும், அரசு அதிகாரிகள் மற்றும் போலீசார் மூலம் மிரட்டியும், ஒரு ஏக்கர் நிலத்தை 65 ஆயிரம் முதல் 2.50 லட்ச ரூபாய் வரை குறைந்த விலைக்கு வாங்கியுள்ளனர். இதற்கு முன்னாள் அமைச்சர் ராஜாவின் அதிகாரம் முழுமையாக பயன்படுத்தப்பட்டுள்ளது.

எம்.ஆர்.எப்., நிறுவனம், தங்களது நிலத்தை அதிக விலை கொடுத்து வாங்கியதை அறிந்த நாரணமங்கலம் கிராம மக்கள், தமிழக விவசாயிகள் சங்கம் உள்ளிட்ட பல்வேறு விவசாய சங்கங்களின் உதவியோடு, மாவட்ட கலெக்டரிடம் மனு கொடுத்து ஆர்ப்பாட்டம் நடத்தினர்.

இப்படி நிலம் வாங்கிய விஷயத்தில், "தலித்' அமைச்சரான ராசா, தான் சார்ந்த தலித் மக்களுக்கே துரோகம் இழைத்துள்ளார் என்று, அவரது தலித் சமுதாய மக்களே  குற்றம் சாட்டுகின்றனர்.

ரமேஷ் என்னும் தலித் விவசாயி கூறுகையில், “என்னிடமிருந்த 5.79 ஏக்கர் நிலத்தை 4.70 ஏக்கர் நிலம்தான் என்று மிரட்டி வாங்கி கொண்டனர். ஏக்கருக்கு 2.50 லட்ச ரூபாய் மட்டுமே கொடுத்தனர். ஆனால், அவர்கள் டயர் கம்பெனிக்கு, ஏக்கர் நிலத்தை 15 முதல் 18 லட்ச ரூபாய்க்கு விற்பனை செய்து கொள்ளை லாபம் சம்பாதித்து விட்டனர். நிலத்தை விற்க முடியாது என்று நான் சொன்ன போது, வி.ஏ.ஓ., முதல் ஆர்.டி.ஓ.வரையிலான அதிகாரிகள் என்னை மிரட்டி வலுக்கட்டாயமாக நிலத்தை எழுதி வாங்கி கொண்டனர். ஆனால், சொன்னபடி டயர் கம்பெனியில் வேலையும் வாங்கி தரவில்லை.” என்கிறார்.

பாப்பா என்னும் தலித் பெண்மணி, “வேலை தருவோம்னு சொன்னாங்க. அதை நம்பி எங்களிடம் இருந்த 1.90 ஏக்கர் விவசாய நிலத்தை ஏக்கர் 75 ஆயிரம் ரூபாய்க்கு கொடுத்தோம். நிலத்தை வித்த பணமும் செலவாகி விட்டது; பிழைக்க வழியில்லை. எங்களுக்கு உரிய நியாயம் கிடைக்கணும்.” என்று இப்போது அழுகிறார்.

தலித் விவசாயியான தங்கராஜ், “ என்னிடம் இருந்த ஆறு ஏக்கர் நிலத்துக்கு ஏக்கருக்கு ஐந்து லட்ச ரூபாய்னு விலைபேசி, பத்திரத்தில் கையெழுத்து போட்டவுடன், ஏக்கருக்கு 2.50 லட்ச ரூபாய்தான் கொடுத்தாங்க. பணம் குறையுதேன்னு கேட்டதுக்கு செந்தில் முருகன் மிரட்டினார்.  தலித் என்பதால்தான் அவருக்கு அமைச்சர் பதவியே கிடைச்சது. அதை பயன்படுத்தி, எங்களை போன்ற தலித் மக்களை ஏமாற்றி நிலங்களை அபகரிக்க துணைபோனவரை என்ன சொல்றதுன்னே தெரியல. இருந்த நிலம் பறிபோனதால, கூலி வேலைக்கு போய் கஷ்டப்படுகிறேன்.” என்கிறார்.

பாப்பண்ணன் என்னும் தலித் விவசாயி, “முதல்ல அரசுதான் நிலத்தை வாங்கி கொடுப்பாங்கன்னு சொன்னாங்க. ஆனால், சாதிக் மூலமாக நிலத்தை வாங்கி கொடுக்க அரசு அதிகாரிகளும், அப்போதிருந்த கலெக்டரும் எப்படி அனுமதிச்சாங்கன்னு தெரியவில்லை. என்னிடமிருந்த 2.5 ஏக்கர் நிலத்துக்கு ஏக்கருக்கு 95 ஆயிரம் ரூபாய்தான் கொடுத்தாங்க. இப்பிரச்னையில் முதல்வர் கருணாநிதி தலையிட்டு தீர்த்து வைக்க வேண்டும்.” என்கிறார்.

தலித் விவசாயியான செந்திலின் சோக அனுபவம் கொஞ்சம் வித்தியாசமானது :

“என்னிடம் 3.5 ஏக்கர் நிலம் இருந்தது. அதை நான் கொடுக்க விரும்பவில்லை. ஆத்திரமடைந்த செந்தில் முருகனும், செல்வராஜும் சேர்ந்து என் மேல் பி.சி.ஆர்., கேஸ் போட வைச்சு சிறையில போட்டுட்டாங்க. அதன்பின் என்னுடைய அம்மாவையும், சகோதரிகளையும் மிரட்டி என்னை பணிய வச்சாங்க. ஜாமீனில் 5.30 மணிக்கு சிறையில் இருந்து வெளியே வந்த என்னை, இரவு 9.30 மணிக்கு செட்டிக்குளம் பத்திரப் பதிவு அலுவலகம் அழைத்து சென்று, நிலத்தை எழுதி வாங்கிட்டாங்க.” என்கிறார்.

இப்படி எம்.ஆர்.எப்., நிறுவனத்துக்கு நிலம் கொடுக்க மறுத்தவர்களை மிரட்டி பணிய வைக்கும் இடமாக பாடாலுர் போலீஸ் ஸ்டேஷனும், ஆர்.டிஓ. அலுவலகமும் பயன்படுத்தப்பட்டுள்ளது.

இதற்காக 2007 முதல் 2008-ம் ஆண்டுவரை பணியில் இருந்த உயர் போலீஸ் அதிகாரிகளும், உயர் அரசு அதிகாரிகளும் கோடிக்கணக்கான மதிப்புள்ள நிலம், வீடு, பணம் அன்பளிப்பாக பெற்றுள்ளனர் என்று நாரணமங்கலம் பொதுமக்களும், விவசாய அமைப்புகளும் குற்றம் சாட்டியுள்ளன.

நாரணமங்கலத்தில் டயர் நிறுவனம் அமைய நிலம் கொடுத்தவர்களுக்கு நியாயம் கிடைக்க வேண்டி போராடி வரும் விவசாய அமைப்புகளுக்கு, ராசாவின் நண்பர் சாதிக் தரப்பிலிருந்து, "ராசா மீண்டும் அமைச்சராகி விடுவார். அப்புறம் நடக்குறதே வேற..' என்ற தொனியில் மிரட்டல்கள் வந்துள்ளன.

ராசா மீது "2-ஜி' ஸ்பெக்ட்ரம் விவகாரத்தில் குற்றச்சாட்டப்பட்டபோது, தமிழக முதல்வர் கருணாநிதி, "ராசா ஒரு தலித் என்பதால் பழி சுமத்தப்படுகிறது' என, வேலூரில் நடந்த நிகழ்ச்சியில் பேசினார்.

ஆனால், நாரணமங்கலத்தில் தலித் மக்களிடம் இருந்த நிலங்களை குறைந்த விலைக்கு மிரட்டி வாங்க, தலித் கோட்டாவில் அமைச்சர் பதவி பெற்ற ராசாவின் அதிகாரம்தான், முழுமையாக, முறைகேடாக பயன்படுத்தப்பட்டிருக்கிறது. 

“பெரம்பலூருக்கு சிறப்புப் பொருளாதார மண்டலம் கொண்டு வந்தேன். அரசு கலைக் கல்லூரி கொண்டு வந்தேன். மருத்துவக் கல்லூரி கொண்டு வந்தேன். பாலிடெக்னிக் கொண்டு வந்தேன். எம்.ஆர்.எப். டயர் கம்பெனி கொண்டு வந்தேன்...” - இதெல்லாம் அமைச்சர் ராசா தான் தொகுதிக்குச் செய்ததாகச் சொன்னவைகள். ஆனால் சொல்லாத இன்னொரு விஷயமும் இருக்கு. அது சி.பி.ஐ.யை கொண்டு வந்தது என்று சொல்லி நக்கலாகச் சிரிக்கிறார்கள் பெரம்பலூர் மாவட்ட அதிமுகவினர்.

ராசாவின் அதிகாரத் திமிர், ஊழல்கள் பற்றி மார்க்சிஸ்ட் கம்யூனிஸ்ட் கட்சியின் விவசாயிகள் பிரிவின் பெரம்பலூர் மாவட்டச் செயலாளர் செல்லத்துரை சொன்னது அத்தனையும் அதிர்ச்சி ரகம்..

“மத்தியிலும், மாநிலத்திலும் தனக்குள்ள அதிகாரத்தைப் பயன்படுத்தி அவர் போட்ட ஆட்டம் சொல்லி மாளாது. அவர் தன்னுடைய தாய், தந்தை பெயரில் வைத்திருக்கும் அறக்கட்டளை பெயரில் முக்கிய சாலைகளின் அருகில் நிலங்களை வாங்குவார்.

அந்த நிலத்துக்குப் பக்கத்தில் உள்ள நிலங்களை எல்லாம் அவரது நண்பர் சாதிக் வளைப்பார். யாராவது நிலம் தர மாட்டேன் என்று சொன்னால் போலீஸ், ஆர்.டி.ஓ. என்று எல்லா துறையும் அவர்களை மிரட்டும். அவர்கள் சொன்ன ரேட்டுக்கு நிலத்தைக் கொடுத்தாக வேண்டும் என்று கட்டாயப்படுத்தி பிடுங்கிக் கொள்வார்கள்.

நிலம் வாங்கி முடிந்ததும் பெரம்பலூரில் அரசு கலைக் கல்லூரி வருகிறது. மருத்துவக் கல்லூரி வருகிறது என்று அறிவிப்பு வரும். அதிகாரிகள் இடம தேடுவார்கள். கிடைக்காது. உடன் ராசா தன்னுடைய தாய், தந்தை பெயரில் உள்ள அறக்கட்டளையில் இருந்து நிலத்தை தானமாக வழங்குவார்.

உடனேயே அரசு அந்த நிலத்தை எடுத்துக் கொள்ளும். இதனால் அரசுக்குக் கொடுத்த நிலங்களின் அருகிலேயே அவருடைய நண்பர் சாதிக் வாங்கி வைத்திருக்கும் நிலங்களின் மதிப்பும் ஏகத்துக்கு உயர்ந்துவிடும்.

பெரம்பலூர் - துறையூர் சாலையில் குரும்பலூர்ங்கிற இடத்துல 500, 600 ஏக்கர் இடத்தை வாங்கினாங்க. அப்ப விவசாயிகள்கிட்ட அரசாங்கம் கல்லூரி கட்டுறதுக்காக இந்த இடத்தை எடுத்துக்கும். அதுக்கு முன்னால நீங்க இந்த இடத்தை வித்தீங்கன்னா நல்ல விலைக்குக் கிடைக்கும். இல்லைன்னா கவர்ன்மெண்ட்டு ஐயாயிரமோ, பத்தாயிரமோ கொடுக்கும்னு சொல்லி மெரட்டுவாங்க..

இப்படியே வாங்கி முடிச்சதுக்கப்புறம் பாரதிதாசன் பல்கலைக்கழக உறுப்புக் கல்லூரி வரப் போகுதுன்னு ஒரு அறிவிப்பு வந்துச்சு.. அதுக்கு ஆண்டிமுத்து-சின்னப்பிள்ளை அறக்கட்டளை சார்பா இலவசமா 8.51 ஏக்கர் இடம் கொடுத்து போர்டும் வைச்சுட்டாங்க. அந்த இடத்தைச் சுத்தி ஏக்கர் வெறும் இருபத்தைந்தாயிரத்துக்கு வாங்கின இடம், இப்ப அஞ்சு லட்சத்துக்குப் போவுது.

அதே மாதிரி பெரம்பலூர்-செட்டிக்குளம் ரோட்டுல ராசாவின் சொந்த ஊரான வேலூருக்குப் பக்கத்துல அரசு பாலிடெக்னிக் கல்லூரி வந்துச்சு. அங்கேயும் இதே டெக்னிக்குதான். அதுக்கும் இடம் ஆண்டிமுத்து-சின்னப்பிள்ளை அறக்கட்டளையால் வழங்கப்பட்டதுதான்..” என்றார்.

இப்படி ரியல் எஸ்டேட் மூலமாக பெரும் பணம் சம்பாதித்துடன் தொகுதிக்கு தான் பெரும் சாதனையைச் செய்ததாக காட்டியிருக்கும் தலித் அமைச்சர் ராசா நிச்சயமாக ஒரு கில்லாடி தலித்துதான்..!

கொள்ளையடிப்பதில் தலித் என்ன? தலித் அல்லாதவர்கள் என்ன..? அத்தனை கொள்ளையர்களும் ஒன்றுதான் என்பதை இப்போதாவது அனைத்துத் தரப்பினரும் உணர வேண்டும்..!

கட்டுரைக்கு உதவியவை : பல்வேறு பத்திரிகைகள், இணையத்தளங்கள்

Tweet