நீரா ராடியாவின் ஒப்புதல் வாக்குமூலம்-1

12-06-2011

என் இனிய வலைத்தமிழ் மக்களே..!

2-ஜி ஸ்பெக்ட்ரம் விவகாரத்தில்தான் எத்தனைவிதமான  திருப்பு முனைகள்!

நீரா ராடியா தொலைபேசி டேப் லீக்-அவுட்டும், சி.ஏ.ஜி. அறிக்கையும் முதல் முக்கியத் திருப்பு முனைகள். சி.ஏ.ஜி. அறிக்கையில் உள்ள கணக்கு வழக்குகள், ஸ்பெக்ட்ரம் வழக்கில் எந்த அளவுக்குப் பயன்பட்டதோ, அதே அளவு நீரா ராடியா டேப் விவகாரங்களையும் பயன்படுத்தியது சி.பி.ஐ... ஆனால், நீரா ராடியா இன்னும் கைது செய்யப்படவில்லை. அவரைக் கைது செய்ய வேண்டும் என்று பலரும் குரல் கொடுத்து வரும் நிலையில், கடந்த டிசம்பர் மற்றும் ஜனவரி மாதங்களில் சி.பி.ஐ. முன்பு, ராடியா நான்கு தடவை ஆஜராகிக் கொடுத்துள்ள வாக்குமூலங்கள் இப்போது வெளியில் கசிந்துள்ளது.

அதன் முழு விவரம்...

நாள்: 21.12.2010

இடம்: சத்ரபூர் பண்ணை வீடு

விசாரணை அதிகாரி:  சி.பி.ஐ. எஸ்.பி. விவேக் ப்ரியதர்ஷி

நீரா ராடியா சொல்கிறார் :

''நான் வசித்து வந்தது இங்கிலாந்தில். என் தந்தை, க்ரவுன் மார்ட் இன்டர்நேஷனல் என்ற நிறுவனத்தை நடத்திவந்தார். அவரிடம் நிறைய வியாபார உத்திகளைக் கற்றுக் கொண்டேன். என் குழந்தைகள் இந்திய கலாசாரத்தையும் பழக்க, வழக்கங்களையும் பின்பற்ற வேண்டும் என்ற எண்ணத்தில், 1994-ல் இந்தியாவுக்குத் திரும்பி வந்தேன். என் மாமனார் லண்டனில், ஏர் இன்டர்நேஷனல் என்ற நிறுவனத்தை நடத்தினார். அவர் மூலமாக விமானப் போக்குவரத்துத் தொழில் ​பற்றி அறிந்துகொண்டேன். அதன்படி, இந்தியாவுக்கு வந்து சஹாரா நிறுவனத்துக்கு விமானத் தொழில் தொடங்குவதற்கு உதவி​னேன்.

டாடாவுக்கு சிக்கல்

பின்னர், வைஷ்ணவி கார்ப்பரேட் கம்யூனிகேஷன் நிறுவனத்தைத் தொடங்​கினேன். 2001-ம் ஆண்டு முதல், டாடா நிறுவனத்துக்கும், 2005-ம் ஆண்டு முதல், யுனிடெக் நிறுவனத்​துக்கும்  பொதுத் தொடர்புப் பணிகளை மேற்கொண்டேன். டாடா நிறுவனத்தில், டாடா டெலி சர்வீஸ் விவகாரங்​களுக்கு உதவினேன். 2005-ம் ஆண்டு, டாடா நிறுவனத்துக்கு, அப்போதைய தொலைத் தொடர்புத் துறை அமைச்சராக இருந்த தயாநிதி மாறன், பல்வேறு பிரச்னைகளை உருவாக்கிக்​ கொண்டு இருந்தார். இதனால், டாடா குரூப் நிறுவனம் இது போன்ற விவகாரங்களுக்கு ஆலோ​சனை கூறவும்... உதவி புரியவும் என்னைக் கேட்டுக் கொண்டனர்.

இப்போது 'டிராய்’ அமைப்பின் (தொலைத் தொடர்பு ஒழுங்கு முறை ஆணையம்) தலைவராக இருக்கும் டாக்டர் ஜெ.எஸ்.சர்மா, அப்போது, தொலைத் தொடர்புத் துறை செயலாளராக இருந்தார். அவரை சந்தித்துப் பேசுவேன். அப்போது தொலைத் தொடர்பு ஒழுங்கு முறை ஆணையத்தின் தலைவராக இருந்த பிரதீப் பைஜாலையும் சந்திப்பேன்.

2007-ல் நான் நோசிஸ் ஸ்ட்ராடெஜிக் கன்சல்டன்ஸி நிறுவனத்தைத் தொடங்கினேன். இந்த நிறுவனத்தின் இயக்குநராக இருந்தவர் கே.நரூலா. பின்னர் இதே நிறுவனத்தில் பிரதீப் பைஜாலும் பணியாற்ற வந்தார். இவருக்கு என்னுடைய நிறுவனத்தில் 10 சதவிகிதப் பங்குகளைக் கொடுத்தேன்.

2007-ம் ஆண்டு அக்டோபர் மாதம் டாடா நிறுவனம் தொலைத் தொடர்புத் துறையில் கொடுக்கப்பட்ட இரட்டைத் தொழில் ​நுட்ப ஸ்பெக்ட்ரம் உரிமத்துக்கு விண்ணப்பித்து இருந்தது. இந்த உரிமம் கிடைப்பதற்காக என் உதவியைக் கேட்டனர். இந்த உரிமம் டாடாவுக்குக் கொடுக்கப்​​படவில்லை.

தொலைத் தொடர்புத் துறையில் அணுகியபோது, விண்ணப்பம் முதலில் வரவில்லை என்றனர். ஆனால், ரிலையன்ஸ் நிறுவனத்துக்கு இந்த இரட்டைத் தொழில் நுட்ப உரிமம் கொடுக்கப்பட்டு இருந்தது. இதனால், தொலைத் தொடர்புத் துறையில் இருந்த சர்மா போன்ற​வர்கள், டாடா​வுக்கு உரிமம் கொடுக்கப்​படாதது  குறித்து வருத்தம் தெரிவித்​தார்கள்.

இது தொடர்பாக, செல்லு​லர் ஆபரேட்டர்ஸ் அசோஸி​யேசனை சேர்ந்தவர்​கள் தொலைத் தொடர்புத் தாவா தீர்ப்பு ஆணையத்தில் வழக்கு தொடர்ந்தனர். இந்த வழக்கில், டாடா டெலி சர்வீஸ் நிறுவனமும் இருந்தது. இரட்டைத் தொழில் நுட்ப ஸ்பெக்ட்ரம் உரிமத்தை வரவேற்றது டாடா. ஆனால், தொலைத் தொடர்புத் துறை, இந்தக் கொள்கை முடிவை அறிவிப்பதற்கு முன்பேயே, ரிலையன்ஸ் கம்யூனிகேஷன் நிறுவனத்துக்கு இரட்டைத் தொழில் நுட்ப உரிமம் வழங்கிவிட்டதை எதிர்த்தது.

அதன் பிறகு, தொலைத் தொடர்புத் துறை, 10.1.2008 அன்று டாடா டெலி சர்வீஸ் நிறுவனத்துக்கு இந்த உரிமத்தைக் கொடுக்க கொள்கை அளவில் ஒப்புக்கொண்டது. ஆனால், ஸ்பெக்ட்ரம் கொடுப்பதில், சீனியாரிட்டி வரிசையில் இருந்த கம்பெனிகளில் டாடா நிறுவனத்தைக் கீழே வைத்திருந்தனர். முறைப்​படி, மற்ற நிறுவனங்களுக்கு முன்பாகவே டாடா டெலி சர்வீஸ் நிறுவனத்துக்குத்தான் முதலில் கொடுக்கப்பட்டு இருக்க வேண்டும். இரட்டைத் தொழில் நுட்பத்துக்கான உரிமக் கட்டணத்தையும் டாடா நிறுவனம் ஏற்கெனவே செலுத்தி இருந்தது.

அப்போது கொடுக்கப்பட்ட ஸ்பெக்ட்ரம் ஒதுக்கீடுகளில், ஸ்வான் நிறுவனத்துக்கு மட்டுமே டெல்லி சர்க்கிள் உரிமம் கிடைத்தது. ஸ்வான் டெலிகாம் நிறுவனத்தில் இருந்த பங்குகளின் அடிப்படையில், இந்த நிறுவனத்துக்கு எந்த அடிப்படைத் தகுதியும் இல்லை. எனக்குக் கிடைத்த தகவலின்படி, ஸ்வான் டெலிகாம், ரிலையன்ஸ் நிறுவனத்தின் முழுக் கட்டுப்பாட்டில்தான் இருந்தது.

வட கிழக்கு மாநிலங்கள், ஜம்மு-காஷ்மீர், அஸ்ஸாம் போன்ற டெலிகாம் சர்க்கிள்களுக்கு, 2006-ம் ஆண்டு சி.டி.எம்.ஏ. சர்வீஸுக்கான ஒருங்கிணைந்த அணுகுமுறை சேவைகளுக்கான உரிமத்துக்கு டாடா டெலி சர்வீஸ் நிறுவனம் விண்ணப்பித்து இருந்தது. ஆனால், அப்போதைய அமைச்சர் தயாநிதி மாறன், இந்த ஸ்பெக்ட்ரம் உரிமத்தை வழங்க மறுத்தார். இதற்குக் காரணமாக, பைசெல் என்ற நிறுவனம் டாடாவுக்கு முன்பே விண்ணப்பித்து இருந்ததாகச் சொல்லப்பட்டது. அதற்கு வழங்கிவிட்டுத்தான், டாடாவுக்குக் கொடுக்க முடியும் என்று கூறினர்.

ஆனால், பைசெல் நிறுவனத்தின் மனு, உள்துறை அமைச்சகத்தின் பாதுகாப்பு விவகாரங்களில் கிளியரன்ஸ் ஆகாமல் இருந்தது. முதலில் வருவோர்க்கு முன்னுரிமை என்கிற கொள்கையின்படி, பைசெல் நிறுவனத்துக்குக் கொடுக்காமல் டாடாவுக்குக் கொடுக்க முடியாது என்று கூறினார். ஆனால், ஆ.ராசா அமைச்சரான பின்னர், 10.1.2008 அன்று, 25.9.2007-வரை விண்ணப்பித்தவர்களுக்கு உரிமங்கள் வழங்கப்பட்டன.

ரியல் எஸ்டேட் விவகாரம்

என்னுடைய வைஷ்ணவி நிறுவனத்தின் மூலம் 2005 முதல் யுனிடெக் நிறுவனத்துக்கு ரியல் எஸ்டேட் விவகாரங்களில் உதவி புரிந்தேன். டாடா டெலி சர்வீஸ் நிறுவனம், யுனிடெக் ரியல் எஸ்டேட் நிறுவனத்துடன் கூட்டு சேர்ந்தனர்.

டாடா ரியாலிட்டி நிறுவனம், தலைநகர் பகுதிகளில் நிலங்​களைத் தேடிக் கொண்டு இருந்தது. இந்த சமயத்தில், குஸேகான் மற்றும் யுனிடெக் நிறுவனங்களிடம் நிலங்கள் இருந்தன. அதனால், இந்த இரு நிறுவனங்களையும் நான் அறிமுகம் செய்துவைத்தேன். இதற்காக டாடா சுமார் 1,700 கோடியை யுனிடெக் நிறுவனத்துக்குக் கொடுத்தது. ஆனால், ரியல் எஸ்டேட் மார்க்கெட் நிலைமை சரியாக அமையாது போகவே, இந்த கூட்டு நடவடிக்கை கைவிடப்பட்டது. அதன் பின், டாடா தனியாக ரியல் எஸ்டேட் திட்டங்களில் ஈடுபட்டு வருகிறது. டாடா நிறுவனம் கொடுத்த பணத்தை, யுனிடெக் திருப்பிக் கொடுத்துவிட்டது.

அடுத்து, யுனிடெக் நிறுவனத்தில் யுனிநார் நிறுவனம் முதலீடு செய்தது. யுனிடெக் டெலிகாம் விவகாரங்களை, டி.டி. அசோசியேட்ஸைச் சேர்ந்த தீபக் தல்வாரும், யுனிநார் விவகாரங்களை பெர்ஃபெக்ட் ரிலேஷனைச் சேர்ந்த தீபக் செரியனும் கவனித்தனர். எங்களுடைய நிறுவனம் அதிகாரபூர்வமற்ற வகையிலேயே, சில ஆலோசனைகளை யுனிடெக் நிறுவனத்தின் தலைவர் ரமேஷ் சந்திராவுக்கு வழங்கியது.

டாடா.காம் நிறுவனத்தோடு எனக்கு எந்த விதமான வியாபாரத் தொடர்பும் கிடையாது. ஆனால், அந்த நிறுவனத்தைச் சேர்ந்த நஹாடாவை தொடர்பு கொள்வேன். ஒரு முறை அவர், தங்கள் நிறுவனத்தின் பங்குகளை விற்கப் போவதாகவும், அதற்கான முதலீட்டாளர்களைத் தேடிக் கொண்டு இருப்பதாகவும் கூறினார். இப்படியான பேச்சுவார்த்தைகள் தவிர, வேறு எந்தத் தலையீடும் எனக்கு இல்லை.

ஆனால்...

படம்: என்.விவேக்

வாக்குமூலம் தொடரும்..

நன்றி : ஜூனியர்விகடன்-12-06-2011

Tweet

கொள்ளையடித்தது 30,983 கோடிகள்தானா...? மீதம் எங்கே..?

13-04-2011

என் இனிய வலைத்தமிழ் மக்களே..!

டெல்லி சி.பி.ஐ. நீதிமன்றத்தில் முன்னாள் மத்திய அமைச்சர் ஆ.ராசா உள்ளிட்டோர் மீது தாக்கல் செய்யப்பட்ட குற்றப்             பத்திரி​​கையில் ஐந்து குற்றச்சாட்டுகள் வைக்கப்பட்டன. முதல் இரண்டு குற்றச்சாட்டுகள்  பற்றி, மார்ச் 13, 2011 ஜூ.வி-யில் விரிவாக எழுதி இருந்தோம். அடுத்த மூன்று குற்றச்சாட்டுகள் இங்கே...!

மாற்றுத் தொழில்  நுட்பத்துக்கு இரட்டை ஸ்பெக்ட்ரம் ஒதுக்​கீடு!

ஏற்கெனவே உள்ள மொபைல் ஆபரேட்டர்களுக்கு மாற்றுத் தொழில்நுட்பத்தின்படி, இரட்டை முறையில் ஸ்பெக்ட்ரம் பயன்படுத்​தும் உரிமங்கள்   கொடுக்க   டிராய்   அமைப்பு,   ஆகஸ்ட்   2007-ல்             அனுமதி   கொடுத்தது.

இரண்டு டாடா டெலி சர்வீஸஸ் நிறுவனங்கள் இதற்கு விண்​ணப்​பித்தன. இவர்கள் ஏற்கெனவே சி.டி.எம்.ஏ. தொழில் நுட்பத்தின்படி மொ​பைல் கனெக்ஷன் ஸ்பெக்ட்ரம் உரிமம் பெற்று இருந்தனர். ஆனால், டிராய் செய்த சிபாரிசு தொலைத் தொடர்புத் துறைக்கு வருவதற்கு முன்பே ரிலையன்ஸ் நிறுவனம் (18 சர்க்கிள்கள்), ஷியாம் டெலி லிங்க்ஸ், ஹெச்.எஃப்.சி.எல். இன்ஃபோடெல் போன்ற நிறுவனங்களுக்கு அனுமதி கிடைத்தது. டாடா நிறுவனத்துக்கு கிடைக்கவில்லை. 'டாடா நிறுவனத்தைப் படாதபாடுபடுத்தினர்’ என்று சி.பி.ஐ. குற்றம் சாட்டுகிறது.

'தொலைத் தொடர்புத் துறை அமைச்சராக இருந்த ஆ.ராசாவும் அவரது கூட்டாளி சந்தோலியாவும்... ஸ்வான் டெலிகாமையும், யுனிடெக் டெலிகாமையும் முன்னுக்குக் கொண்டு  வரவே, டாடா டெலி சர்வீஸைப் பின்னுக்குத் தள்ளினார்கள்’ என்கிறது சி.பி.ஐ.

டாடா கொடுத்த விண்ணப்பப் படிவங்கள்​கூட தொலைத் தொடர்புத் துறையில் காணாமல் போய்​விட்டதாக சி.பி.ஐ. தெரிவித்து இருக்கிறது. 'டாடாவுக்கு உரிமங்கள் கொடுக்கப்பட்டால், டெல்லி, மும்பையில் ஷாகித் பால்வாவின் ஸ்வான் டெலிகாமும், சஞ்சய் சந்திராவின் யுனிடெக் நிறுவனமும் பயன் அடைய முடியாமல் போகும் என்று ஆ.ராசா கருதினார். அதனால், டாடா​வின் விண்ணப்பங்கள் மூடி              மறைக்கப்​பட்டுவிட்டன.

அவர்கள் 10.1.2008 அன்று கட்டணம் செலுத்தி, அதற்கான ரசீது கொடுக்கப்பட்டு, சீனியாரிட்டி பட்டியலில் பெயர் இருந்தாலும், டாடா கொடுத்த விண்ணப்பத்தைக் கண்டுபிடிக்க முடியவில்லை. மாயமாக மறைந்துவிட்டது’ என்று சி.பி.ஐ. சொல்கிறது. ஆ.ராசா இந்த அளவுக்கு டாடாவை இழுத்தடித்த பிறகும், அவரை சீராட்டி, பாராட்டி கருணாநிதிக்கு டாடா கடிதம் எழுதியது ஏன் என்ற மர்மம் பற்றி சி.பி.ஐ. ஏனோ குறிப்பிடவில்லை.

ஸ்வான் நிறுவனத்துக்குச் சொந்த​மான டி.பி. ரியாலிட்டியின் சகோதர நிறுவனத்துக்கு ஆர்.கே. சந்தோலியா, அவரது வீட்டை வாடகைக்குக் கொடுத்து இருக்கிறார். அதன் மூலம், மாதம்தோறும் 63,000 ரூபாயை சந்தோலியாவுக்கு ரியாலிட்டி கொடுக்கிறது. 2008 டிசம்பரில் ஸ்வானின் பங்குகள் வாங்கப்பட்டது குறித்து நீளமான பட்டியலை குற்றப் பத்திரிகையில் வைத்துள்ளது சி.பி.ஐ.

ஐக்கிய அரேபிய நிறுவனமான எடிஸாலட் நிறுவனம், ஸ்வான் டெலிகாமின் பங்குகளை 3,200 கோடிக்கு வாங்கியது. சென்னையைச் சேர்ந்த ஜினெக்ஸ் எக்ஸ்ம் வென்சர் நிறுவனம் 380 கோடிக்கு ஸ்வானின் பங்குகளை வாங்கியது. இந்த பணம் வந்த வழியையும் சி.பி.ஐ. குற்றப் பத்திரிகையில் வைத்து இருக்கிறது.

தகுதியில்லாத நிறுவனங்கள்!

ஸ்வான் டெலிகாம் பிரைவேட் லிமிடெட் என்கிற நிறுவனத்தைத் தொடங்கி, இதன் மூலம் ஸ்பெக்ட்ரம் உரிமம் பெற அரசியல் செல்வாக்கோடு ரிலையன்ஸ் இறங்கியது. இதற்கு ரிலையன்ஸின் மற்ற நிறுவனங்கள் பணம் முதலீடு செய்துள்ளன.

இந்த விவரங்களை முழுமையாக சி.பி.ஐ. பட்டியல் போட்டு, 45 பக்கங்களுக்குப் படம் போட்டு விளக்கி இருக்கிறது. இதில், ரிலையன்ஸின் நிர்வாகிகள் கௌதம் டோஸி, சுரேந்திர பைப்பாரா, ஹரி நாராயணன் ஆகியோர் சம்பந்தப்பட்டு இருக்கிறார்கள். அதனால், இவர்கள் மூன்று பேரும் குற்றவாளிகளாக சேர்க்கப்பட்டு உள்ளனர். அனில் அம்பானியை விசாரித்த சி.பி.ஐ., அவரிடம் பணி புரிபவர்களை மட்டுமே குற்றவாளிகளாகச் சிக்க வைத்துள்ளது.

இதேபோல், ரியல் எஸ்டேட் நிறுவனமாக இருந்த யுனிடெக் நிறு​வனத்தின் சில துணை நிறுவனங்கள், டெலிகாம் உரிமத்துக்கான தகுதியைப் பெறுவதற்காக, சில மோசடியான தகவல்​களைக் கொடுத்து இருப்பதாகவும் சி.பி.ஐ. கண்டுபிடித்து உள்ளது.

அந்தத் தகவல்களை ஆராயாமல், தொலைத் தொடர்புத் துறை அனுமதி கொடுத்துள்ளது. ஸ்பெக்ட்ரம் உரிமங்களுக்கான விண்ணப்பம் செய்த​போது, ஸ்வானுக்கும் யுனிடெக் நிறுவனத்துக்கும் முறையான தகுதிகள் இல்லை. இவர்களது விண்ணப்பங்கள் ஆரம்பத்திலேயே நிராகரிக்கப்பட்டு இருக்க வேண்டும். ஆனால், இவர்களுக்கு உரிமங்கள் கொடுக்கவே கட்-ஆஃப் தேதி முதல் ஸ்பெக்ட்ரம் விலை மதிப்புவரை அனைத்திலும் தில்லுமுல்லுகள் நடந்து உள்ளதாக சி.பி.ஐ. தனது குற்றப் பத்திரிகையில் குறிப்பிடுகிறது.

நுழைவுக் கட்டணத்தில் தில்லுமுல்லு!

அரசுக்கு ஏற்பட்ட இழப்பீடு குறித்து சி.பி.ஐ. ஒரு கணக்கைச் சொல்கிறது!

செல்லுலார் சேவை நிறுவனங்களிடம் இருந்து ஒரு மெகா ஹெட் வீதம் ஆண்டுதோறும் வசூல் செய்யப்படும் வருவாய்ப் பங்குத் தொகை 2002-03 முதல் 2007 வரை கணக்கிடும்போது, கிட்டத்தட்ட மூன்று மடங்கு அதிகரித்து உள்ளது. இதை  வைத்துக் கணக்கிடும்போது, 2008-ம் ஆண்டு புதிய உரிமங்கள் வழங்கப்பட்டதில், 22,535 கோடி நுழைவுக் கட்டணத்தில் நஷ்டம்.

இதே மாதிரி, இரட்டைத் தொழில் நுட்பத்துக்கான நுழைவுக் கட்டணத்தை உயர்த்தாத காரணத்தால், 8,448 கோடி அரசுக்கு இழப்பு. ஒட்டு  மொத்தமாக, அரசுக்கு 30,983 கோடி நஷ்டம் என்கிறது சி.பி.ஐ.

தொலைத் தொடர்புத் துறை, ஒருங்கிணைந்த அணுகுமுறை சேவைகளுக்கான நுழைவுக் கட்டணத்தை 1,650 கோடி என நிர்ணயித்தது. இது 2001-ல் நான்காவது செல்லுலார் மொபைல் டெலிபோன் சர்வீஸுக்கு(சி.எம்.டி.எஸ்.) விடப்பட்ட ஏலத் தொகை. இந்த ஏலத் தொகையை உயர்த்தாமல், 2008-ல் கொடுக்கப்பட்ட உரிமங்களுக்கு நுழைவுக் கட்டணம் நிர்ணயித்தது தவறு என்கிறது சி.பி.ஐ..

'தொலைத் தொடர்புத் துறை எதிர்பாராத அளவுக்கு வளர்ச்சியைப் பெற்றுள்ளது. அதனால், 2001-க்குப் பிறகு ஏற்பட்டுள்ள தொலைபேசிகளின் அடர்த்தி, வளர்ச்சி, ஆண்டுதோறும் வசூல் செய்யப்படும் வருவாய்ப் பங்குத் தொகை ஆகியவற்றைக் கணக்கிட்டு, இந்த ஏலத் தொகையை அரசு உயர்த்தி இருக்க வேண்டும்.

2003-ல் பீகார், ஒரிஸ்ஸா, வட கிழக்கு மாநிலங்களில் யாருமே ஏலம் எடுக்க முன்வரவில்லை. இதனால், 2001-ம் ஆண்டு முறையே பின்பற்றப்பட்டது. ஆனால், கடுமையான போட்டி உருவான பிறகும் அதையே எப்படிப் பின்பற்ற முடியும்?’ என்று சி.பி.ஐ. கேள்வி எழுப்புகிறது.

'நிதி அமைச்சகம், சட்ட அமைச்சகம், அதற்கும் மேலாக பிரதமர் கூறிய ஆலோசனைகளையெல்லாம் ஆ.ராசா புறக்கணித்தார். எல்லோருடைய கருத்துகளையும் மீறி தன்னிச்சையாக ஆ.ராசா முடிவு எடுத்தார். தனக்கு வேண்டியவர்களான ஸ்வான் டெலிகாம் ஷாகித் பால்வா, வினோத் கோயங்காவோடு, யுனிடெக் நிறுவனத்தின் சஞ்சய் சந்திராவும் பயனடையவே, அரசுக்கு ஆ.ராசா நஷ்டம் ஏற்படுத்தினார்!’ என்கிறது  சி.பி.ஐ.

இந்த விவகாரத்தில் கட்டுக்கட்டான ஆவணங்களை மட்டுமின்றி, பிரதமர் மன்மோகன் சிங் மற்றும் சட்ட அமைச்சராக இருந்த பரத்வாஜ் தவிர, குற்றப் பத்திரிகையில் குறிப்பிடப்பட்டுள்ள அனைவரையும் சாட்சிகளாக நிறுத்துகிறது.

தொலைத் தொடர்புத் துறை அதிகாரிகள், டிராய் தலைவர்கள், சொலிசிட்டர் ஜெனரல் வாஹன்வதி, முன்னாள் தொலைத் தொடர்புச் செயலாளர் மாத்தூர், சட்டத் துறை செயலாளராக இருந்த டி.கே. விஸ்வநாதன், முன்னாள் நிதிச் செயலாளர் டி.சுப்பா ராவ் என்று பெரிய படையே சிறப்பு நீதிமன்றத்துக்கு வர இருக்கிறது.

இதில் முக்கியமான ஏழு பேர் ஆ.ராசாவுக்கு எதிராக மாஜிஸ்திரேட் முன்பு வாக்குமூலங்களும் கொடுத்து இருக்கிறார்கள். இதில் சி.பி.ஐ. ரெய்டுக்கு உள்ளான ஏ.கே.ஸ்ரீவத்சவா மற்றும் சுமார் ஒன்பது வருடங்களாக, கூடுதல் பிரைவேட் செக்ரெட்டரி அந்தஸ்தில் ஆ.ராசாவுடன் பணியாற்றிய ஆசிர்வாதம் ஆச்சாரி என்பவரும் வாக்குமூலம் கொடுத்து உள்ளனர். (இதில் ஆசிர்வாதம், கடந்த நாடாளுமன்றத் தேர்தலில் பா.ம.க. அல்லது காங்கிரஸ் சார்பில் போட்டியிடவும் முயற்சி செய்தவர் என்பது தனி விவகாரம்)

இந்த இருவரது வாக்குமூலங்களை  வைத்து ஆ.ராசாவுக்கு எதிராக வழக்கை சி.பி.ஐ. வலிமைப்படுத்தி உள்ளது. மோசடி, கூட்டுச் சதி, தில்லுமுல்லு, திட்டமிட்டு ஏமாற்றுதல், போலி ஆவணங்கள் கொடுத்தது, லஞ்ச ஊழல் போன்ற குற்றச்சாட்டுகள் வைக்கப்பட்டுள்ளன. இதில் குற்றம் நிரூபிக்கப்பட்டால், ஒரு வருடத்தில் இருந்து அதிகபட்சம் ஏழு வருடங்கள்வரை தண்டனை கிடைக்கும் என்று சொல்லப்படுகிறது.

ஆனால், சாட்சிகளில் எத்தனை பேர் பல்டி அடிப்பார்கள், யார் பிறழ் சாட்சிகளாக மாறுவார்கள் என்பதைப் பொறுத்தும்... இனி தாக்கல் செய்யப்பட இருக்கும் கூடுதல் குற்றப் பத்திரிகையைப் பொறுத்தும், 2-ஜி ஸ்பெக்ட்ரம் வழக்கின் இறுதித் தீர்ப்பு அமையும். இதுவரை கலைஞர் டி.வி. பெற்ற 200 கோடியைத் தவிர, வேறு எந்த ஆதாயங்களையும் சி.பி.ஐ. இந்தக் குற்றப் பத்திரிகையில் முன் வைக்கவில்லை.

இந்த வழக்கைப் புலன் விசாரணை செய்த விவேக் ப்ரியதர்சினியிடம் இது குறித்துக் கேட்டபோது, ''பொறுத்திருங்கள்... அடுத்தடுத்த குற்றப் பத்திரிகைகளில் ஒவ்வொன்றாக வெளிவரும்!'' என்கிறார்.

காத்திருப்போம்!

 சி.பி.ஐ-யைத் தொடர்ந்து அமலாக்கத் துறை!

2-ஜி ஸ்பெக்ட்ரம் ஒதுக்கீடு விவகாரத்தில் நடந்த முறைகேடுகளை சி.பி.ஐ-யும், பணப் பரிமாற்றம் தொடர்பான மோசடிகளை அமலாக்கப் பிரிவினரும் விசாரித்து வருகின்றனர்.

சி.பி.ஐ. கடந்த 2-ம் தேதி முதல் கட்ட விசாரணை அறிக்கையை நீதிமன்றத்தில் தாக்கல் செய்தது. இதைத் தொடர்ந்து அமலாக்கப் பிரிவு அதிகாரிகள், வெளிநாட்டு நிதி மேலாண்மை சட்டத்தின் கீழ் 4,300 கோடி முதலீடு பற்றிய மோசடிகள் பற்றி குற்றப் பத்திரிகை நீதிமன்றத்தில் தாக்கல் செய்துள்ளனர்.

'2ஜி முறைகேடு பற்றி சிறப்பு நீதிமன்றம் தினமும் விசாரணை நடத்த வேண்டும்’ என்று உச்ச நீதிமன்றம் உத்தரவிட்டதற்கு அடுத்த நாள், அதாவது கடந்த 9-4-11 அன்று அமலாக்கத் துறையினர் தாக்கல் செய்துள்ளனர்.

இந்த குற்றப் பத்திரிகையில் ஸ்வான் டெலிகாம், லூப் மொபைல், லூப் டெலிகாம் மற்றும் எஸ்.டெல் பற்றி கூறப்பட்டு உள்ளதாகத் தகவல்கள் தெரிவிக்கின்றன.

இதற்கிடையில், ஆ.ராசா அண்ட் கோவுக்கு அமலாக்கத் துறையில் இருந்து சம்மன்கள் வழங்கப்பட்டனவாம். மேலும் குற்றப் பத்திரிகையில் இடம் பெற்றுள்ள யுனிடெக், ரிலையன்ஸ் டெலிகாம், ஸ்வான் டெலிகாம் நிறுவனத்தைச் சேர்ந்தவர்களுக்கும் சம்மன்கள் வழங்கப்பட்டன.

இதில் ஆ.ராசா, சித்தார்த் பெஹுரா, ஆர்.கே.சந்தோலியா ஆகியோர் சிறையில் உள்ளதால், அவர்களிடம் விசாரணை நடத்த நீதிமன்றத்தில் அனுமதி கேட்கப்படும். மற்றவர்களிடம் அடுத்த வாரம் விசாரணை தொடங்குமாம்!

நன்றி : ஜூனியர்விகடன்-17-04-2011

Tweet

தயாநிதி மாறன் செய்திருக்கும் ஸ்பெக்ட்ரம் முறைகேடு..!

15-02-2011

என் இனிய வலைத்தமிழ் மக்களே..!

ஸ்பெக்ட்ரம் விவகாரத்தில் ஊழல்கள் எந்த மாதிரியெல்லாம் நடந்திருக்கிறது என்பதற்கு ஆ.ராசா மட்டுமல்ல நாங்களும் சளைத்தவர்களில்லை என்பதற்கு உதாரணமாக சன் நெட்வொர்க்கின் மாறன் சகோதரர்களும் இன்னொரு உதாரணத்தை ராசாவுக்கு முன்பாகவே  நிகழ்த்தி காட்டியிருக்கிறார்கள்.

இந்த மறைமுகமான ஊழலை வெளிக்காட்டியிருப்பது ஸ்பெக்ட்ரம் ஊழல் பற்றி விசாரிக்க பிரதமரால் நியமிக்கப்பட்ட சிவராஜ்பாட்டீல் கமிஷன்தான். அந்த கமிஷனின் அறிக்கையினால்தான் மாறன்களின் இந்த விஞ்ஞான ரீதியான ஊழல் வெளியே வந்துள்ளது.

மலேசியாவின் மிகப் பெரும் பணக்காரர் டி.அனந்தகிருஷ்ணன்.  போர்ப்ஸ் பத்திரிகையின் கணிப்புப்படி அனந்தகிருஷ்ணன் 7.6 பில்லியன் சொத்துக்களோடு உலகத்தில் 89-வது பணக்காரராக இருக்கிறார். சொந்த நிறுவனம்தான் ஏர்செல் கம்யூனிகேஷன்ஸ் நிறுவனம். இந்நிறுவனம் சில ஆண்டுகளுக்கு முன்பு வரையிலும் டிஷ்நெட் என்ற பெயரில் இயங்கி வந்தது.

இந்த நிறுவனமும் 2-ஜி ஸ்பெக்ட்ரம் அலைக்கற்றையை தனது தொழில் பயன்பாட்டுக்காக பெற்றுள்ளது. இது நடைமுறையில் சாதாரணமானதுதானே என்று எண்ணலாம். ஆனால் எந்த வழியில் பெற்றிருக்கிறது என்பதை நிச்சயமாக நூறு சதவிகிதம் சநதேகப்படக் கூடிய அளவுக்கான சூழலில்தான் பெற்றுள்ளது என்று சிவராஜ்பாட்டீல் கமிஷன் சுட்டிக் காட்டியுள்ளது.

டிஷ்நெட் நிறுவனம் 2004 ஏப்ரல் மாதத்தில் 2 சர்க்கிள்களுக்கும், 2005 மார்ச்சில் 5 சர்க்கிள்களுக்கும் ஸ்பெக்ட்ரம் ஒதுக்கீடு கோரி விண்ணப்பம் அளித்துள்ளது. இந்த நேரத்தில் மத்திய தகவல் தொடர்புத் துறை அமைச்சராக இருந்தவர் தயாநிதி மாறன்தான்.

தொலைத் தொடர்புத் துறை ஆணையத்தின் வழிகாட்டுதல் விதிகளின்படி, விண்ணப்பங்கள் ஏற்கப்பட்ட ஒரு மாதத்தில் அவர்களுக்கு ஸ்பெக்ட்ரம் ஒதுக்கீடு செய்யப்பட வேண்டும். ஆனால் பாவம் டிஷ்நெட் நிறுவனத்தினருக்கு அந்தப் பாக்கியம் கிடைக்கவில்லை. ஆனால் நிறையவே சோதனைகள்தான் கிடைத்திருக்கின்றன.

2004 ஆகஸ்ட் 24-ம் தேதியன்று தயாநிதி மாறன் உத்தரவின் பேரில் அவரது தனிப்பட்ட செயலாளர்ர் டிஷ்நெட் நிறுவனம் பற்றி பல கேள்விகளை நோட் செய்து அந்நிறுவனத்திடம் இருந்து அதற்கான பதில்களைப் பெறுமாறு தொலைத் தொடர்புத் துறை அமைச்சகத்திடம் அறிவுறுத்தியுள்ளார்.

அதன்படி, தமிழ்நாடு மற்றும சென்னை சர்க்கிள்களில் இந்நிறுவனம் மற்றும் இதன் துணை நிறுவனத்தின் செயல்பாடுகள், நிறுவனத்தின் நிதி நிலைமை, இந்நிறுவனத்தின் விற்பனைத் தன்மை குறித்தான பத்திரிகை செய்திக் குறிப்புகள், இந்நிறுவனம் லைசென்ஸ் பெற்ற பின்பு வேறு நிறுவனத்திற்கு லைசென்ஸை விற்பதற்கான சூழல் ஏதும் உள்ளதா... ஏற்கெனவே அது போல் செய்யப்பட்டுள்ளதா.. என்றெல்லாம் கண்டறியும்படி அதில் உத்தரவிடப்பட்டிருந்தது.

2005, மார்ச்-5-ல் மேலும் 5 சர்க்கிள்களில் ஸ்பெக்ட்ரம் கோரிய விண்ணப்பத்தினை டிஷ்நெட் நிறுவனம் சமர்ப்பித்த பின்பு மார்ச் 30-ம் தேதியன்று தயாநிதி மாறனின் தனிச் செயலாளர் இது தொடர்பாக தயாநிதி மாறனுடன் கலந்தாலோசிக்கிறார். டிஷ்நெட் நிறுவனம் அதுவரையில் தொலைத் தொடர்புத் துறையின் கேள்விகளுக்கு அனுப்பியிருந்த பதில்கள் அந்தக் கலந்துரையாடலில் பரிசீலிக்கப்படுகிறது.

ஆனால் முடிவுகள் எதுவும் எடுக்கப்படாமல் மீண்டும் அது தொடர்பான ஷோகேஸ் நோட்டீஸ்கள் டிஷ்நெட் நிறுவனத்துக்கு அனுப்பப்பட்டுள்ளன. பொதுவாக இது போன்ற கேள்விகள் மொபைல் போன் நடத்தும் நிறுவனங்கள் மற்றும் அதன் நெட்வொர்க்கில் சேவை நடத்தும் நிறுவனங்களிடம் கேட்க வேண்டிய கேள்விகள். ஆனால் தயாநிதி மாறனோ தொலைக்காட்சி சேனல்களை ஒருங்கிணைத்து நடத்தும் ஒரு நிறுவனத்திடம் இது போன்ற கேள்விகளை முதல்முறையாகக் கேட்டிருப்பதாக கமிஷன் குறிப்பிட்டுள்ளது.

இதன் பின் என்ன நடந்தது என்பது சம்பந்தப்பட்ட இரு தரப்பினருக்கு மட்டுமே தெரிந்ததாக இருக்கலாம். ஒருவழியாக டிஷ்நெட் நிறுவனம் ஒரு வழியாக 2006-ம் ஆண்டு நவம்பர் 1-ம் தேதியன்று ஸ்பெக்ட்ரம் அலைக்கற்றை ஒதுக்கீட்டைப் பெற்றுள்ளது.

டிஷ்நெட்டின் இந்த வி்ண்ணப்பத்திற்கான பதிலைத் தெரிவிக்காமல் 26 மாதங்கள் தாமதித்து, அலைக்கற்றையை ஒதுக்கீடு செய்து கொடுத்ததால் அத்தனை மாதங்களும் இதற்கென ஒதுக்கப்பட்ட ஸ்பெக்ட்ரம் அலைக்கற்றையினால் அரசுக்குக் கிடைதிருக்க வேண்டிய வருவாய் வராமல் அரசுக்கு இழப்பு ஏற்பட்டுள்ளதாக கமிஷன் கூறியுள்ளது.

இதில் என்ன நடந்திருக்கும் என்று இந்தியத் திருநாட்டின் மக்களாகிய நாம் யூகிக்கக் கூடிய அளவுக்கான ஒரு செயல் இதற்கு 4 மாதங்கள் கழித்து நடந்துள்ளது.

அது என்னவெனில், 2007-ம் பிப்ரவரி 22-ம் தேதியன்று டெல்லியில் கூடிய பொருளாதார விஷயங்களுக்கான மத்திய கேபினட் மந்திரிகளின் கமிட்டி, மொரீஷியஸ் தீவை சேர்ந்த சவுத் ஆசிய எண்ட்டர்டெயிண்மெண்ட் ஹோல்டிங்ஸ் என்ற நிறுவனம், 2007-ம் ஆண்டு துவக்கப்பட்ட மாறன்களின் சொந்த நிறுவனமான சன் டைரக்ட் டி.டி.ஹெச்.ச்சின் மொத்த மூலதனத்தில் 20 சதவிகிதம் அளவுக்கு முதலீடு செய்து  கொள்ள அனுமதித்தது.

இந்த மொரீஷியஸ் ஹோல்டிங் நிறுவனம் மலேசியாவின் ஆஸ்ட்ரோ நிறுவனத்துக்கு முழுமையாகச் சொந்தமானது. இந்த ஆஸ்ட்ரோ நிறுவனமும் அனந்தகிருஷ்ணனுக்குச் சொந்தமானது. அதாவது டிஷ்நெட்டின் சகோதர நிறுவனம்.

இப்போது புரிந்திருக்குமே..? இதில் நாம் சந்தேகப்பட இருக்கும் ஒரே விஷயம் இதுதான்.. எனது நிறுவனத்தில் முதலீடு செய். உனக்கு வேண்டியது கிடைக்கும் என்று மாறன்கள் பிளாக்மெயில் செய்து அந்த முதலீட்டைப் பெற்றிருக்கலாம் என்பதுதான் எனது கருத்து..!

இதில் டிஷ்நெட் நிறுவனத்திற்கும் பங்குண்டு என்பதால் இரண்டு பணக்காரர்கள் மோதிக் கொண்டு, பின்பு தங்களுக்குள் சமாதானமாகி கை கோர்த்துக் கொண்டதாகத்தான் நாம் நினைத்துக் கொள்வோம். ஆனால் இதில் இருக்கும் அதிகாரத் துஷ்பிரயோகத்தை நாம் நினைப்பதே இல்லை.

முதலில் இது போன்ற சொந்தத் தொழில் செய்யும் அமைச்சர்கள் அந்தத் துறைகளுக்கே அமைச்சர்களாகக் கூடாது. அது ஒரு தார்மீக நெறி. இந்த நெறியைப் பின்பற்ற மாட்டோம் என்றுதான் இன்றைக்கு அனைத்து அரசியல் கட்சிகளும் வரிந்து கட்டிக் கொண்டு போட்டோ போட்டி போடுகின்றன.

இன்றைக்கும் 'முரசொலி'யிலும், 'தினகரனிலும்' அரசுத் தரப்பு விளம்பரங்கள் வந்து கொண்டுதான் இருக்கின்றன. இதுவே  தவறானது. தார்மீக நெறிகளுக்கு முரணானது. அரசுப் பணியில் இருக்கும்போது அது தொடர்பான எந்தவிதமான சலுகைகளையும், பணிகளையும் தாம் ஏற்பதில்லை என்ற கொள்கையையுடையவன்தான் உண்மையான அரசியல்வாதியாக இருப்பான். இங்கே எல்லாருமே அரசியல்வியாதியாக இருப்பதால்தான் 'முரசொலி'யும், 'தினகரனும்' அரசு விளம்பரங்களை வெளியிட்டு காசை அள்ளுகின்றனர்.

இவர்களைக் கேட்டால் அவர்கள் போயஸ் ஆத்தாவைக் கை காட்டுவார்கள். "அவர்களது ஆட்சியில் 'நமது எம்.ஜி.ஆரி.லும்', 'மக்கள் குரல்' பத்திரிகையிலும் விளம்பரங்கள் வரவில்லையா..? எங்களிடம் மட்டும் ஏன் கேட்கிறீர்கள்..?" என்பார்கள்..! இதுவும் உண்மைதான்..!

'நமது எம்.ஜி.ஆரின்' பொற்காலமே ஜெயலலிதாவின் ஆட்சிக் காலம்தான். அப்போதுதான் அந்தப் பத்திரிகை அரசு விளம்பரங்களால் ஜொலித்துக் கொண்டிருந்தது..! பக்கம், பக்கமாக ஏதோ டெலிபோன் டைரக்டரி போல பக்கங்களைத் திணித்துக் கொடுத்தார்கள். இவர்களும் இதனை நாகரீகம் இல்லாத செயல் என்றுகூட நினைப்பதில்லை. வந்தவரைக்கும் அள்ளு என்பதுதான் அனைத்து அரசியல்வியாதிகளின் எண்ணமாகவும் இருக்கிறது.

இதில் மாறன்களை மட்டும் குற்றம் சொல்லி என்ன ஆகப் போகிறது..? சரி விடுங்கள்.. இன்னொரு விஷயத்தைப் பார்ப்போம்..

2-ஜி ஸ்பெக்ட்ரம் ஒதுக்கீட்டை முன் வைத்து டாடாவும், ரிலையன்ஸும் இன்றைக்கு வார்த்தைகளால் மோதிக் கொண்டுள்ளார்கள்.
 

இரட்டைத் தொழில் நுட்ப உரிமம் நடைமுறைக்கு வருவதற்கு முன்பாகவே சில தொலைபேசி நிறுவனங்கள் அதற்கான அனுமதியைப் பெற்றுவிட்டதாக டாடா டெலிசர்வீஸஸ் நிறுவனம் குற்றம்சாட்டியிருந்தது. 2007, அக்டோபர் 17-ம் தேதியன்று இரட்டைத் தொழில் நுட்ப உரிமம் பற்றிய அரசின் கொள்கை வெளியிடப்பட்ட பின்பு தனது விண்ணப்பத்தினை சமர்ப்பித்த ஒரே நிறுவனம் தான் மட்டுமே என்கிறது டாடா. பிப்ரவரி 2006-ம் ஆண்டில் இருந்து காத்திருந்து ஒன்றை ஆண்டுகள் கழித்தே தங்களால் இரட்டைத் தொழில் நுட்ப உரிமத்தை பெற முடிந்தது என்கிறது டாடா.

இது குறித்து ரிலையன்ஸ் கம்யூனிகேஷன்ஸ் நிறுவனம் வெளியிட்ட மறுப்பு அறிக்கையில், 2-ஜி ஸ்பெக்ட்ரம் ஒதுக்கீட்டில் இரட்டை தொழில் நுட்பத்துக்கான (GSM, CDMA) உரிமம் பெறுவதில் எங்கள் நிறுவனம் விதிமுறைகளை மீறி செயல்படவில்லை. ஆனால், பழைய ஜி.எஸ்.எம். ஆபரேட்டர்களால்தான் அரசுக்கு ஒரு லட்சம் கோடி ரூபாய் இழப்பு ஏற்பட்டுள்ளது என்று டாடா நிறுவனத்தை மறைமுகமாக குற்றம் சாட்டியுள்ளது.

இதற்கு பதில் அளித்துள்ள டாடா டெலி சர்வீசஸ் நிறுவனம், “ரிலையன்ஸ் நிறுவனத்துக்கு எல்லா தொலைத் தொடர்பு வட்டங்களிலும் இரட்டை தொழில் நுட்பத்துக்கான லைசென்ஸ் 2008 ஜனவரி மாதமே கிடைத்துவிட்டது. ஆனால் எங்களுக்கு விண்ணப்பித்து 83 நாள்கள் தாமதத்துக்கு பிறகுதான் லைசென்ஸ் கிடைத்தது. டெல்லி உள்ளிட்ட சில பகுதிகளிலும், 39 வணிக மாவட்டங்களிலும், 9 தொலைத்தொடர்பு வட்டங்களிலும் மூன்றாண்டுகள் காத்திருந்தும் எங்களுக்கு இன்னமும் இரட்டை தொழில் நுட்பத்துக்கான ஸ்பெக்ட்ரம் அலைக்கற்றை ஒதுக்கீடு செய்யப்படவில்லை. இத்தனைக்கும் நாங்கள் விதிமுறைகளை முறையாக பின்பற்றி வந்திருக்கிறோம். இதனால் ரிலையன்ஸின் குற்றச்சாட்டு எங்களுக்குப் பொருந்தாது” என்று கூறியுள்ளது.

இதற்கும் பதிலளித்துள்ள ரிலையன்ஸ், சர்ச்சைக்கிடையான முறைகளில் டாடா டெலிசர்வீசஸ் உரிமத்தைப் பெற விரும்பியதால்தான் டெல்லி உயர்நீதிமன்றம் 2008-ம் ஆண்டு டாடா நிறுவனத்தின் விண்ணப்பத்தினை ஏற்காமல் தள்ளுபடி செய்தது. உடனேயே ரத்தன் டாடா டாடா டெலிசர்வீசஸ் நிறுவனத்துக்கும், தனக்கும் எவ்விதத் தொடர்புமில்லை என்பதுபோல் நடந்து கொண்டதையும் நினைவுபடுத்தியுள்ளது. ஆக.. இப்போது லஞ்சம் கொடுத்து காரியம் சாதிப்பதில்கூட நமது ஆட்கள் அடித்துக் கொள்கிறார்கள் என்பது தெளிவாகிறது..!

லஞ்சம் தர மாட்டேன். முறைகேடுகள் செய்ய மாட்டேன். நேர்மையாக நடந்துதான் வியாபாரம் நடத்துவேன் என்பதெல்லாம் வெறும் கோஷமாகிவிட்டது. யார் முதலில் முந்துவது.. யார் அதிக சேவையை பரவலாக்குவது.. இதற்காக எப்படி, யாரை, எங்கே வெட்ட வேண்டும் என்றுகூட பகாசூர நிறுவனங்கள் மோதிக் கொண்டிருக்கும் நிலையில் நாம் அரசியல்வியாதிகளை மட்டுமே திட்டிக் கொண்டிருக்கிறோம் என்று நினைக்கிறேன்.

ங்கொய்யால.. மொதல்ல இவனுகளைத்தான் போட்டுத் தள்ளணும் போலிருக்கு..!

Tweet