நடராசன் மூலமாக இவ்வளவு நகைகள் கிடைத்திருக்குமா? – குன்ஹா தீர்ப்பு விபரம் – 6

20-10-2014

என் இனிய வலைத்தமிழ் மக்களே..!

நீதிபதி குன்ஹா வழங்கிய பரபரப்பான தீர்ப்பின் தொடர்ச்சி…

சசிகலா 1990-91-ம் ஆண்டுக்கான சொத்துக் கணக்கை 1993-ம் ஆண்டு தாக்கல் செய்துள்ளார். அதில், அவர் தன்னிடம் தங்க வைர ஆபரணங்களின் மதிப்பு 12 லட்சத்து 95 ஆயிரத்து 704 ரூபாயும் 5 கிலோ வெள்ளிப் பொருட்களின் மதிப்பு 27 ஆயிரத்து 468 ரூபாய் என்றும் கணக்குக் காட்டியுள்ளார்.

ஆனால், 1991-92-ம் ஆண்டுக்கான சொத்துக் கணக்கை அவர் தாக்கல் செய்தபோது, தன்னிடம் இருக்கும் தங்க வைர ஆபரணங்களின் மதிப்பு ஒரு கோடியே 10 லட்சத்து 13 ஆயிரத்து 946 ரூபாய் என்றும் வெள்ளிப் பொருள்களின் மதிப்பு 70 லட்சத்து 61 ஆயிரத்து 400 ரூபாய் என்றும் குறிப்பிட்டுள்ளார்.

ஒரு வருடத்துக்குள் சசிகலாவுக்கு 1 கோடியே 67 லட்சத்து 52 ஆயிரத்து 174 ரூபாய்க்கு தங்க, வைர ஆபரணங்கள் உயர்ந்துள்ளன.

ஜெயலலிதா, சசிகலா தரப்பில் இதற்குக் காரணமாக, 1991-ம் ஆண்டில் இருந்து 1992-ம் ஆண்டுக்குள் தங்க வைர ஆபரணங்களின் விலை கூடியதாகவும் மேலும் அந்தக் காலத்தில் தங்கம், வைரம் மற்றும் வெள்ளி ஆகியவற்றால் செய்யப்பட்ட ஆபரணங்கள், வாள்கள், கேடயங்கள் போன்றவை அன்பளிப்புகளாகவும் பரிசுகளாகவும் தங்களுக்குக் கிடைத்தன என்றும் குறிப்பிட்டுள்ளனர்.

இந்த இடத்தை நாம் கவனமாகப் பார்க்க வேண்டும். 1991-ம் ஆண்டுக்கான சொத்துக் கணக்கைத் தாக்கல் செய்தபோது, அவர்களுக்கு வராத பரிசுப் பொருள்கள், 1991-க்குப் பிறகுதான் வந்திருக்கின்றன என்பதை அவர்களே ஒப்புக்கொண்டுள்ளனர்.

ஜெயலலிதாவின் வழக்கறிஞர் பி.குமார், நகைகளை மதிப்பிட்ட சுங்கத் துறை அதிகாரி வாசுதேவன் அந்தத் துறையில் நிபுணத்துவம் குறைந்தவர் என்று குறிப்பிட்டுள்ளார். மேலும், அவர் நகைகளின் மதிப்புகளைத் தவறாகக் கணக்கிட்டு அவற்றுக்கு விலை நிர்ணயம் செய்துள்ளதாகத் தன்னுடைய வாதத்தில் சொல்கிறார்.

ஆனால், வாசுதேவன் 10 ஆண்டுகள் இந்தத் துறையில் அனுபவம் வாய்ந்தவர் என்பது அரசுத் தரப்பாலும் சுங்கத் துறையின் மூலமும் நிரூபிக்கப்பட்டு உள்ளது. மேலும் ஜெயலலிதா, சசிகலாவிடம் இருந்த நகைகளை மதிப்பீடு செய்தபோது, அதற்கு மெட்லர் எலெக்ட்ரானிக் என்ற பிரத்தியேக தராசை வாசுதேவன் பயன்படுத்தியிருக்கிறார்.

எடை போடுவதற்கு முன்பு, தராசின் இரண்டு பக்கங்களும் சரியான அளவில் நின்றதையும் அவர் உறுதிப்படுத்தியுள்ளார். அதை ஊழல் தடுப்பு அதிகாரி நல்லம்ம நாயுடு, ஜெயலலிதா தரப்பில் இருந்த பாஸ்கரன், வழக்கறிஞர்கள் சேகர் மற்றும் சந்திரசேகர், கலெக்டர்(சிறப்பு) கிருஷ்ணமூர்த்தி மற்றும் ஜெயலலிதாவின் அத்தை ஆகியோர் ஒப்புக்கொண்டு உள்ளனர்.

மேலும், நகைகளின் தரத்தை அறிய, பொற்கொல்லர்கள் பயன்படுத்தும் உரைகல்லை வாசுதேவன் பயன்படுத்தியுள்ளார். வைரங்களின் தரத்தை 10 S என்ற லென்ஸைப் பயன்படுத்தி கணக்கிட்டுள்ளார். அவருடைய மதிப்பீட்டின்படி, அந்த வைரங்கள் 4-சி எடை கொண்டவை என்பது தெரியவந்துள்ளது.

மேலும், அந்த வைரங்களில் தீட்டப்பட்டு இருந்த பட்டைகள், அதன் தூய தன்மை, வைரங்களின் நிறம் ஆகியவற்றையும் கருத்தில் கொண்டுதான் வாசுதேவன் அவற்றின் மதிப்பைக் கணக்கிட்டுள்ளார். அப்படி அவர் கணக்கிட்டதன்படி, ஜெயலலிதாவின் வீட்டில் இருந்து கைப்பற்றப்பட்ட தங்கத்தின் எடை அளவு 23 கிலோ 113 கிராம் என்பது தெரியவந்தது.

அதன்விலை அன்றைய தேதியில் 91 லட்சத்து 57 ஆயிரத்து 253 ரூபாய். வைரத்தின் விலை அன்றைய தேதியில் இரண்டு கோடியே 43 லட்சத்து 92 ஆயிரத்து 790 ரூபாய். மொத்தமாக தங்க வைர ஆபரணங்களின் மதிப்பு 3 கோடியே 35 லட்சத்து 50 ஆயிரத்து 43 ரூபாய் என்று கணக்கிட்டுள்ளார்.

இது தவிர்த்து போயஸ் கார்டன், வீட்டில் நடத்திய சோதனையில் 42 நகைப் பெட்டிகள் கைப்பற்றப்பட்டு, அவற்றிலும் நகைகள் இருந்தது கண்டுபிடிக்கப்பட்டன. அதில் சில பெட்டிகளில் கைக்கடிகாரங்களும், மற்றவற்றில் 131 நகைகளும் இருந்தன.

அதன் எடை 4 கிலோ 475 கிராம். அதன் மதிப்பு அன்றைய விலையில் 17 லட்சத்து 37 ஆயிரத்து 266 ரூபாய். வைரம் பதிக்கப்பட்ட தங்கக் கம்மல் விலை 47 லட்சத்து 61 ஆயிரத்து 816 ரூபாய் என்று கணக்கிட்டுள்ளார். அதேசமயம், குறுக்கு விசாரணையில், வாசுதேவன் மதிப்பீட்டாளர் மட்டும்தான் என்பதும் விலை நிர்ணயம் செய்யும் வேலையில் அவருக்கு அனுபவம் இல்லை என்பதும் ஜெயலலிதா தரப்பு வழக்கறிஞரால் நிரூபிக்கப்பட்டுள்ளது.

மேலும், வாசுதேவன் எடை போட்ட நகைகளுக்கு விலையைக் கணக்கிடும்போது, 1996-ம் ஆண்டு விலையில் அவற்றைக் கணக்கிட்டு உள்ளார் என்பதும் தெரியவருகிறது. எனவே, வாசுதேவன், கணக்கிட்ட எடையை மட்டும் நாம் எடுத்துக்கொள்ளலாம். விலையின் மதிப்பீட்டில் குளறுபடி உள்ளதால், அதைக் கணக்கில் எடுத்துக்கொள்ள வேண்டாம்.

மேலும், ஜெயலலிதாவின் வழக்கறிஞர் பி.குமார், தன்னுடைய வாதத்தில், ‘அரசுத் தரப்பு பட்டியலிட்டு உள்ள நகைகளில், வரிசை எண் 284 மற்றும் 285-ல் உள்ள நகைகள், முதலமைச்சர் பொறுப்புக்கு வருவதற்கு முன்பே ஜெயலலிதாவிடம் இருந்தவை’ என்றும் ‘அவற்றையும் அரசுத் தரப்பு சேர்த்து சொத்து மதிப்பைக் கணக்கிட்டு குற்றம்சாட்டுகிறது என்றும் தெளிவுபடுத்தியுள்ளார்.

இந்த இடத்தில் நாம் கவனமாக ஆதாரங்களைப் பரிசீலித்து முடிவுக்கு வர வேண்டும்.

ஜெயலலிதாவைப் பொறுத்தவரையில், அவர் 1965-ம் ஆண்டில் இருந்து தொடர்ந்து வருமானவரி மற்றும் சொத்துவரி செலுத்தி வந்துள்ளார். 1987-ம் ஆண்டில் இருந்து 1990 வரையிலான கணக்குகளை அவர் 1992-ம் ஆண்டு செலுத்தியுள்ளார். அப்போது அவரிடம் இருந்த நகைளை கீர்த்திலால் காளிதாஸ் அண்ட் கம்பெனியைச் சேர்ந்த சுப்புராஜ், சாந்தகுமார் ஆகியோர் மதிப்பிட்டுக் கொடுத்துள்ளனர்.

அந்த மதிப்பீட்டில் 7,040 கிராம் வைரம் இடம்பெற்றுள்ளது. இதைத்தான் அவர் பதவிக்கு வருவதற்கு முன்பே அவரிடம் இருந்த வைரங்களாக ஜெயலலிதா தரப்பு வழக்கறிஞர் பி.குமார் குறிப்பிடுகிறார். ஆனால், இங்கு கவனிக்க வேண்டியது என்னவென்றால், 1987-ல் இருந்து அடுத்த நான்கு ஆண்டுகளுக்கான வருமானவரியை மொத்தமாக 1992-ல் தாக்கல் செய்துள்ளார்.

1992-ம் ஆண்டுக்கான வருமானவரியை 1993-ம் ஆண்டு மார்ச் 26-ம் தேதி செலுத்தி உள்ளார். அடுத்தடுத்த ஆண்டுகளில் செய்யப்பட்ட இந்த வருமானவரி கணக்குத் தாக்கலில் மிகப் பெரிய வித்தியாசம் இருக்கிறது.

அது பற்றி வருமானவரித் துறை கேள்வி எழுப்பியபோது, ஓர் ஆண்டில் தங்க வைர ஆபரணங்களின் விலை பல மடங்கு உயர்ந்துவிட்டதாகவும், மேலும், தங்களுக்கு இந்தக் காலத்தில் அதிக எண்ணிக்கையில் பரிசுப் பொருள்கள் கிடைத்ததாகவும் காரணம் சொல்லியுள்ளனர்.

இதையடுத்து வருமானவரித் துறை உதவி ஆணையர், ‘கடந்த ஆண்டில் உங்களுக்கு அன்பளிப்பாக 19 புதிய ஆபரணங்கள் கிடைத்துள்ளன என்றும் அவற்றின் எடை 7,040 கிராம் என்றும் 101.49 சி எடையுள்ள வைரங்களும் கிடைத்துள்ளன என்றும் சொல்லியுள்ளீர்கள். ஆனால், அவற்றை முறையாகப் பட்டியல் இடவில்லை’ என்று சொல்லி நோட்டீஸ் அனுப்பி உள்ளார். அந்த ஆதாரங்கள் நீதிமன்றத்தில் தெளிவாக சமர்ப்பிக்கப்பட்டு உள்ளன. இதன் மூலம் பரிசுப் பொருள்கள் மற்றும் புதிய நகைகள் 1992-க்குப் பிறகே வந்துள்ளன என்பதும் நிரூபணமாகிறது.

மேலும், கீர்த்திலால் காளிதாஸ் அண்ட் கம்பெனி நிர்வாகி சாந்தகுமாரின் சாட்சியத்தில் இருந்து நமக்குத் தெரியவருவது என்னவென்றால், 1992-ம் ஆண்டில்தான் ஜெயலலிதா, சசிகலா ஆகிய இருவரும் நகைகளைத் தரம் பிரிப்பதற்காக இவர்களை அழைத்துள்ளனர்.

இவர்களிடம் கிலோ கணக்கில் நகைகளை மட்டும் கொடுத்து, எந்தெந்த நகைகள் 1987, 1988, 1989, 1990 ஆகிய ஆண்டுகளில் வாங்கப்பட்டவை என்ற விவரங்களை ஆண்டுவாரியாக சசிகலாவே சொல்லி உள்ளார். ஆனால், அவை எல்லாம் உண்மையிலேயே அந்த ஆண்டுகளில்தான் வாங்கப்பட்டவை என்பதற்கான ரசீதுகள் சாந்தகுமாரிடம் காட்டப்படவில்லை. அவற்றை நீதிமன்றத்திலும் அவர்கள் சமர்ப்பிக்கவில்லை. ஒருவேளை 1992-க்கு முன்பே முறையாக ஒவ்வோர் ஆண்டும் வருமான வரி தாக்கல் செய்து, அவற்றில் அந்த நகைகளை ஜெயலலிதா கணக்குக் காண்பித்து இருந்தால், அதுவாவது நம்பும்படியாக இருந்திருக்கும்.

ஆனால், அவசர அவசரமாக 1992-ல் கடந்த மூன்று ஆண்டுகளுக்கான வருமானவரியைத் தாக்கல் செய்து, அவற்றில் நகைகளைப் பிரித்துக் காண்பித்து இருப்பது ஏற்றுக்கொள்ளும்படியாக இல்லை. மேலும், அவற்றின் தரத்தை தற்போது மதிப்பிடுவது வருமானம் மற்றும் சொத்து வரி செலுத்துவதற்காக மட்டுமே என்று சசிகலா, சாந்தகுமாரிடம் கூறியுள்ளார்.

இதிலிருந்து நமக்குத் தெரியவருவது என்னவென்றால், 1991-க்குப் பிறகு அவர்களிடம் குவிந்த நகைகளை பழைய தேதியிட்டுக் கணக்குக் காட்டி வருமான வரியைத் தாக்கல் செய்துள்ளனர். அப்படி வரி கட்டியதால் மட்டுமே ஒரு வருமானம் நல்ல வழியில் வந்த வருமானமாக ஏற்றுக்கொள்ள முடியாது. அந்த வருமானம் எந்த வழியில் வந்தது என்பதை ‘பொது ஊழியர்’ சொல்லியாக வேண்டும். ஆனால், இவ்வளவு ஆயிரக்கணக்கான கிலோ தங்கமும் வைரமும் தனது வீட்டுக்கு எப்படி வந்தது என்பதை ஜெயலலிதாவால் கடைசிவரை சொல்லவே முடியவில்லை. இவை அனைத்தும் சசிகலாவின் பெயரில் இருப்பதை மூத்த வழக்கறிஞர் பி.குமார் நமக்கு நினைவூட்டுகிறார்.

அப்படியானால் சசிகலாவுக்கு இவ்வளவு நகைகள் எப்படி வந்தன? அவர் அதை நிரூபிக்க வேண்டும் அல்லவா? அவர் இந்த நகைகளை எங்கு வாங்கினார்? எப்படி வாங்கினார்? எந்தத் தேதியில் வாங்கினார்? என்ற விவரங்களையும் சொல்ல முடியவில்லை. ஆனால், சசிகலாவின் பெயரில் நகை மதிப்பீட்டு அறிக்கையை மட்டும் ஆண்டுக்கு ஆண்டு தயாரித்து வைத்துள்ளனர். ஒருவேளை அவர் வாங்கவில்லை என்றாலும், அவர் கணவர் நடராசன் மூலமாக இவ்வளவு நகைகள் அவருக்குக் கிடைத்திருக்குமா என்றால், அதற்கும் வாய்ப்பே இல்லை என்பதை அரசுத் தரப்பு சரியாக நிரூபித்துள்ளது.

ஏனென்றால், 1991-ம் ஆண்டு வரை அவருடைய கணவர் ஓர் அரசு ஊழியராகத்தான் இருந்துள்ளார். ஒரு ஸ்கூட்டர் வாங்குவதற்கே அரசாங்கத்திடம் இருந்து 3,000 ரூபாய் முன்பணமாக அவர் பெற்றுள்ளார். எனவே, அவர் மூலமாக இவ்வளவு நகைகள் வந்திருக்க வாய்ப்பில்லை.

இந்த ஆதாரங்களின் மூலம் தங்கமும் வைரமும் ஜெயலலிதாவால் சசிகலாவின் பெயரில் வாங்கிக் குவிக்கப்பட்டன என்பதை அரசுத் தரப்பு நிரூபித்துள்ளது. ஆனால், இதை மறுப்பதற்கு ஜெயலலிதா, சசிகலா ஆகிய இருவரிடமும் ஆதாரங்கள் இல்லை. எனவே, குற்றச்சாட்டு நிரூபணமாகிறது.

நீதிமன்றம் போட்டுக் காட்டிய கணக்கு

வாசுதேவனுடைய மதிப்பீட்டில் குளறுபடி இருப்பதாலும், சாந்தகுமாரின் மதிப்பீடு முன்தேதியிட்டு நடந்திருப்பதாலும், நகைகளின் எடைகளை மட்டும் கணக்கில் எடுத்துக்கொண்டு, அவற்றின் விலையை இந்த நீதிமன்றமே தீர்மானிக்கிறது.

ஜெயலலிதாவிடம் இருந்து அரசுத் தரப்பு கைப்பற்றிய நகையின் எடை 27 ஆயிரத்து 588 கிராம். ஆனால், அதில் ஜெயலலிதா பதவிக்கு வருவதற்கு முன்பே அவரிடம் இருந்த நகைகளாக, தற்காப்புச் சாட்சிகளின் மூலம் உறுதிப்படுத்தப்பட்ட அளவு 7 ஆயிரத்து 40 கிராம். எனவே, அவற்றை இந்த வழக்கில் இருந்து தள்ளுபடி செய்துவிடுகிறேன்.

அப்படிச் செய்தால், மீதம் இருக்கும் 20 ஆயிரத்து 548 கிராம் எடை தங்கம், ஜெயலலிதாவின் பதவிக் காலத்தில் சம்பாதித்தவை என்றாகிறது. இதற்கு விலையாக, ஜெயலலிதா தரப்பு மற்றும் அரசுத் தரப்பு என இருவருமே ஏற்றுக்கொண்ட, 1992-ம் ஆண்டின் தங்க விலை நிலவரப்படி கணக்கிடுவது என்று நீதிமன்றம் முடிவு செய்கிறது.

அதன்படி, அந்தக் காலத்தில் 10 கிராம் தங்கத்தின் விலை 4 ஆயிரத்து 334 ரூபாயாக இருந்துள்ளது. அப்படியானால் ஒரு கிராம் தங்கத்தின் விலை 433 ரூபாய் 40 பைசாவாகிறது. அந்த விலையில் 20 ஆயிரத்து 548 கிராம் தங்கத்தைக் கணக்கீடு செய்தால், 20548ஜ்433.4=8905503.20 என்ற விலை வருகிறது.

மேலும், ஜெயலலிதாவிடம் இருந்த வைரங்களின் மதிப்பு 1 கோடியே 62 லட்சத்து 61 ஆயிரத்து 820 ரூபாய் என்று கணக்கிடப்பட்டு உள்ளது. அந்தத் தொகையை தங்க நகையின் மதிப்போடு சேர்த்துக் கணக்கிட்டால், 2 கோடியே 51 லட்சத்து 59 ஆயிரத்து 144 ரூபாய் வருகிறது. இத்தனை மதிப்புடைய தங்கத்தாலும் வைரத்தாலும் இழைக்கப்பட்ட நகைகள் அனைத்தும் ஜெயலலிதாவால் முறைகேடான வழியில் சம்பாதிக்கப்பட்டதாக நீதிமன்றம் அறிவிக்கிறது.

அடுத்த இதழிலும் தொடரும்…

நன்றி : ஜூனியர்விகடன்

Tweet

வாய் பிளக்க வைத்த சுதாகரன் திருமணம்...! - பகுதி- 2

16-10-2014

என் இனிய வலைத்தமிழ் மக்களே..!

ராணி வீட்டுக் கல்யாணம்! சாலையெல்லாம் ஒளிவெள்ளம் பொழிய அந்த வெளிச்சத்தில் உடலெங்கும் வைரமும் தங்கமும் மின்ன தன் தோழி சசிகலா மற்றும் பரிவாரங்களுடன் மாப்பிள்ளை அழைப்பு ஊர்வலத்தில் வந்துகொண்டிருந்தார் முதல்வர்! "இந்த ஒரு திருமணத்துக்கு இத்தனை கோடிச் செலவா..?! திருமணமாகாத ஒரு ஏழைப் பெண்ணுக்கு ஒரு லட்சம் என்று கொஞ்சம் தாராளமாகச் செலவு செய்தாலும் நிச்சயம் ஒரு லட்சம் பெண்களுக்குத் திருமணம் செய்திருக்கலாமே!" ஓர் ஓரத்தில் நின்று பார்த்துக்கொண்டிருந்த மத்தியதரக் குடும்பத்து வாக்காளர் அடித்த வயிற்றெரிச்சல் கமெண்ட் இது..! தமிழகத்துக்கே உரிய ‘விசேஷ நிகழ்ச்சிகளுடன்’ களைகட்டியது செப்டம்பர் ஏழு... கல்யாண நாள்! சேப்பாக்கம் சிதம்பரம் ஸ்டேடியத்தில் ஆறாம் தேதி இரவுத் தூக்கம் போட்டு எழுந்த பல்லாயிரக்கணக்கான தொண்டர்களுக்கும் அவசரம்... ஒட்டு மொத்தமாக அத்தனைபேரும் காலைக் கடன் கழிக்கிற அளவுக்கு அங்கே வசதியில்லை. ஓடினார்கள், அருகிலேயே இருந்த கடற்கரைக்கு. அடுத்த ஓரிரு மணி நேரங்களில் கிழக்கு வெளுத்தபோது, கடற்கரை திறந்தவெளிக் கழிப்பிடமாக மாறியிருந்தது. அடுத்தது - குளியல். ‘‘பக்கத்துல நீச்சல் குளம் இருக்கு டோய்...’’ என்று ஒரு தொண்டர் குரல் விட... ‘திமுதிமு’வென மெரீனா பீச்சை ஒட்டியிருந்த நீச்சல் குளத்தை நோக்கி ஓடினார்கள். ஒரே ஜம்ப்தான்! ‘மாங்கு மாங்கென்று’ சோப்பு வேறு போட்டுத் தேய்த்துக் குளித்துவிட... நீச்சல்குளம் முழுக்கக் ‘குப்’பென நிறைந்துவிட்டது சோப்பு நுரை! இந்த நீச்சல்குளம் ஆரம்பித்த நாள் முதல் சோப்பு போட்டுக் குளித்த முதல் சம்பவம் இதுதானாம்! சரி... ஆறாம் தேதி மாலை நடந்த மாப்பிள்ளை அழைப்பில் இருந்தே தொடங்குவோம்! அந்தி சாயும் நேரம்... அடையாறு சிக்னல் அருகில் உள்ள சுந்தர விநாயகர் கோயிலில் இருந்து மாப்பிள்ளை ஊர்வலம்! மாப்பிள்ளைக்காக அலங்கார சாரட் வண்டி காத்திருக்க, மக்கள் கூட்டமோ ‘மணமகனை’ எதிர்பார்த்து நிற்க... சரியாக 6.30-க்கு வந்தார் சுதாகரன்! அந்தக் கால இளவரசர் கெட்-அப்பில் சிரிப்பு கொப்பளிக்க சுதாகரன் நிற்க... சுற்றிலும் குவிந்திருந்த அமைச்சர்களோ ‘ஏவலர்கள்’ போல அவரையே மொய்த்துக் கிடந்தனர். சில நிமிடங்களுக்குள் வெள்ளை காரில் வந்திறங்கிய ஜெயலலிதா, குத்துமதிப்பாக ஒரு கும்பிடு போட்டு விட்டு வளர்ப்பு மகனைப் பார்த்து வாஞ்சையோடு சிரித்தார்! 6.20-க்குத் தொடங்கியது மாப்பிள்ளை ஊர்வலம். சந்தன மரத்தால் இழைத்துத் தயாரிக்கப்பட்ட ‘சாரட்’ வண்டி என்று முதல்வர் தரப்பில் இருந்தே பெருமையுடன் செய்திகள் அளிக்கப்பட்டிருந்தன! ஆனால், அந்தச் சந்தன அழகை ரசிக்க முடியாதபடி சிவப்புநிற ‘வெல்வெட்’ துணியால் மறைக்கப்பட்டிருந்தது சாரட்! சட்டம் - ஒழுங்கு காப்பது தவிர, கரகாட்டம், ஒயிலாட்டத்துக்கூட இதற்கென ஸ்பெஷல் பயிற்சி பெற்ற போலீஸ் டீம் பயன்படுத்தப்பட்டது! கலைக் குழுக்கள் ஆட்டத்தோடு முன்னே செல்ல... அடுத்ததாக பாண்டு வாத்தியக் குழு பாடிக் கலக்க... தொடர்ந்து சிறப்புப் பாதுகாப்புப்படை அணிவகுத்தது! அதன் பின்னே பார்த்தால் அதிசயம்... ஆச்சரியம்! இதுவரை இல்லாத வகையில் கிட்டத்தட்ட கும்பலோடு கும்பலாக ‘அம்மா’ நடந்து வந்துகொண்டிருந்தார்! அவரை ஒட்டியபடியே ‘நடமாடும் ஜுவல்லரியாக’ உடல் முழுதும் நகை மறைக்க தோழி சசிகலா கம்பீரமாக நடந்துவர... அவரது உறவுக்காரப் பெண்கள் அதைவிட சற்றே குறைந்த நகைகளுடன் சிரிப்பும் சந்தோஷமுமாக நடைபோட்டனர். இருபத்தைந்து நிமிடம் நடந்து சாதனை படைத்த நிலையில், ஜெயலலிதா முகத்தில் களைப்பு பெருகியது. தடித்த வைர வளையல் மாட்டிய தனது வலது கையால் முகத்தை லேசாகத் துடைத்தபடி அவர் திரும்பிப் பார்க்க... கூடவே ஊர்ந்து வந்த அவரது கார் கதவு திறந்தது. ஏறிக் கொண்டார்! அடையாறு பாலத்தைக் கடந்து அமைச்சர்கள் இல்லத்துக்கு அருகே போடப்பட்டிருந்த ‘கோட்டை செட்டிங்கை’ ஊர்வலம் நெருங்கியபோது, முதல்வரின் கார் நின்றது. மீண்டும் ‘வாக்’ செய்ய ஆரம்பித்து விட்டார்! இசைக் கல்லூரி அருகே மதில்மேல் உட்கார்ந்திருந்த அழுக்கு உடை அணிந்த இளைஞர் ஒருவர், அம்மாவைக் கிட்டத்தில் பார்த்தவுடன் அவரை நோக்கி அப்படியே ஓடிவர... சுதாரித்த போலீஸ் பாய்ந்து ஒரே அமுக்காய் கொண்டுபோனது! மீண்டும் காரில் முதல்வர்! நல்லவேளையாக, மாப்பிள்ளை ஊர்வலம் மண்டபம் போய்ச் சேர்ந்த பிறகு சொல்லி வைத்ததுபோல இருபது நிமிடத்துக்கு ‘சோ’வெனப் பெய்தது மழை! திடுக்கிட்ட தொண்டர்கள் ஓடி ஒளிய இடம் பார்ப்பதற்குள், அவர்களை முற்றிலுமாக நனைத்து முடித்தது மழை! உள்ளே மணவீட்டார் நலுங்கு சம்பிரதாயங்களை நடத்திவிட்டு சாப்பிடத் துவங்கியபோது, வெளியே கட்சிக்காரர்கள் பலர் குளிரில் வெடவெடத்துக் கொண்டிருந்தனர்! மறுநாள்... திருமணம்..! போயஸ் தோட்டத்திலிருந்து மெரீனாவரை கட்டப்பட்ட வாழை மரங்கள் அனைத்தும் அவசர கதியில் கட்டப்பட்டதால், முன்னிரவு பெய்த மழைக்கு அனைத்துமே உடைந்து தெருவில் சரிந்து கிடந்தன. குலை இல்லாமல் வாடி வதங்கி அமங்கலமாகக் காட்சியளித்த வாழை மரங்களை மாநகராட்சி வண்டியின் குப்பை லாரிகளில் அவசர அவசரமாக அள்ளி ஏறக்கட்டிக் கொண்டிருந்தனர் மாநகராட்சி ஊழியர்கள். காலை திருமண நிகழ்ச்சிக்குச் செல்லும் முதல்வர், சரிந்து கிடக்கும் மரங்களைப் பார்த்து அப்செட் ஆகிவிடக் கூடாதாம்..! மணமகன் மற்றும் மணமகள் வீட்டார் அடுத்தடுத்து வந்திறங்க... எம்.ஆர்.சி. நகரில் இருந்த அந்த மாபெரும் திருமண வளாகம்(ப்ளேகிரவுண்ட்) கலகலப்பு பெற்றது. பந்தலின் கடைசி வரிசையிலிருந்து பார்த்தால் ‘தகதக’க்கும் தங்க நிறத்துடன் மணமேடை தக்கனூண்டு தெரிந்தது. மேடையில் இருந்தவர்கள் சிறு புள்ளிகளாகத் தெரிந்தனர். பந்தல் அத்தனை நீளம். முக்கால்வாசிப் பேர் க்ளோஸ் சர்க்யூட் டிவியில்தான் கல்யாணத்தை பார்த்தார்கள். மேடைக்கு அருகில் இடம் கிடைத்தவர்கள் ஜெயலலிதா, மணமகன் சுதாகரன் மற்றும் சசிகலா குடும்பத்துப் பெண்கள் அனைவரும் தங்க நிற உடையை யூனிஃபார்ம் போல அணிந்திருந்தது கண்டு ரசித்தார்கள். பிரதமர், ஜனாதிபதி ஆகியோர் வராததால் முதல்வர் அப்செட் ஆனதாகத் தெரிகிறது. "இவ்வளவு தூரம் நேரில் சென்று அழைத்தும் காங்கிரஸ்காரர்கள் புத்தியைக் காட்டிவிட்டார்களே... நல்லவேளை, தேசிய முன்னணித் தலைவர்களாவது வந்திருந்து எனக்கு அகில இந்திய ஸ்டேட்டஸைக் கொடுத்தார்களே..!" என்று ஒரு அமைச்சரிடம் அந்தத் திருமண கலாட்டாவுக்கு நடுவிலேயே சொன்னாராம் முதல்வர். வந்தவர்களை விழுந்து விழுந்து உபசரித்தவர்களில் தலையானவர் தலைமைச் செயலர் ஹரிபாஸ்கர். நாட்டியமாடுவதுபோல் அங்குமிங்கும் ஓடிச் செயல்பட்டவர் பத்மா சுப்பிரமணியம். இடுப்பில் இருந்த ரிவால்வரைத் தொட்டபடியே நடை பழகினார் வால்டர் தேவாரம். பட்டு வேட்டி, பட்டுச் சட்டை சகிதம் மனைவியுடன் வந்தார் முன்னாள் டி.ஜி.பி-யான ஸ்ரீபால். சசிகலாவின் கண்ணசைப்பில் செயல்பட்டவர் இந்திரகுமாரி. தொழிலதிபர்களையும் வி.ஐ.பி-க்களையும் மட்டுமே கவனிக்கும் பொறுப்பு இந்திரகுமாரியுடையது. சசிகலா எங்கு திரும்பினாலும் அங்கே இருந்தார் அவர். யாதவரான பீகார் முதல்வருடன் மிக நெருக்கமாகப் பேசிக் கொண்டிருந்தார் அமைச்சர் கண்ணப்பன். ஒவ்வொரு வி.ஐ.பி.க்கள் தன்னைக் கடந்து சென்றபோதும் எழுந்து எழுந்து நின்றார் முன்னாள் கவர்னர் பீஷ்ம நாராயண் சிங். செம்மங்குடி சீனிவாச ஐயர் வந்தபோது யாரும் அவரை வரவேற்கவில்லை. ‘சிவனே’ என்று ஒரு மூலையில் போய் அமர்ந்துகொண்டார். கமல்ஹாசன் மனைவியுடன் வந்து, சிவாஜி கணேசனையும் மணமக்களையும் பார்த்துப் பேசிவிட்டு, ஜெயலலிதாவைக் கண்டுகொள்ளாமலேயே போய்விட்டார். திருமண மந்திரம் சொல்லும் புரோகிதர்கள் மணமகனின் பெயரை ஒவ்வொரு தடவை உச்சரிக்கும்போதும், தமிழக முதல்வர் டாக்டர் புரட்சித் தலைவி மாண்புமிகு ஜெ. ஜெயலலிதாவின் மகன் சுதாகரன் என்று கூறினார்கள். ஆனால் செவாலியர், நடிகர் திலகம் என்றெல்லாம் அடைமொழி தராமல் ‘சிவாஜி கணேசன் அவர்களின் பேத்தி’ என்று சிம்பிளாகச் சொன்னார்கள். திருமண விழாவில் ஒரு ஸ்பெஷாலிட்டி! திருமண மந்திரங்களில் நிறைய திவ்யப்பிரபந்தங்களும் திருக்குறளும் சொல்லப்பட்டதுதான். முகூர்த்தம் பத்தரையில் இருந்து பன்னிரண்டு மணிக்குள், தாலி கட்டியபோது கரெக்டாக மணி பதினொன்று இருபது! ‘‘இந்தக் கல்யாண விஷயத்திலேயே மிகக் கவனமாக முதல்வர் ஏற்பாடு செய்தது தொண்டர்களுக்கான சாப்பாடுதான். ஒரே மூச்சில் ஒரே சமயத்தில் பன்னிரண்டாயிரம் பேர் உட்கார்ந்து சாப்பிடலாம். நிச்சயம் ஒரு லட்சம் பேருக்கு மேல் இந்தத் திருமணத்தில் சாப்பிட்டார்கள். இதை கின்னஸ் புத்தக நிறுவனத்துக்கு எழுதி அனுப்பப்போகிறோம்!’’ என்று அமைச்சர்கள் பரமசிவம் மற்றும் சத்தியமூர்த்தி இருவரும் சொல்கிறார்கள். இவர்கள்தான் சாப்பாட்டுப் பந்தி ஒழுங்காக நடக்கிறதா என்று பார்க்க வேண்டிய முக்கிய இன்சார்ஜ்! என்னதான் ஏற்பாடு செய்தும் திருமணத்துக்கு வந்தவர்களில் பாதிக்கும் மேலான தொண்டர்கள் சாப்பாடு கிடைக்காமல் சாபம் விட்டுக் கொண்டு சென்றது சர்வ சாதாரணமான காட்சியாக இருந்தது! மொத்தம் எட்டுப் பந்தல்களில் சாப்பாடு போடப்பட்டது! மிக நீண்ட அந்த ஒவ்வொரு பந்தலிலும் ஒரு பாதிவரைதான் இலை போட்டுச் சாப்பாடு வைத்தனர். மறுபாதியில் தொண்டர்கள் வந்து அமருவதும், வெகுநேரம்வரை யாரும் கவனிக்காமல், பசி மயக்கத்துடன் எழுந்து செல்வதுமாக இருந்தனர்! குடிக்க ஒரு இலைக்கு ஒரு பாட்டில் ‘மினரல் வாட்டர்’ வைக்க வேண்டும் என்று ஏற்பாடு’ அந்தத் தண்ணீர் பாட்டில்களை அதிகாரிகள் சிலர் பெட்டி பெட்டியாக கார்களில் கடத்திச் சென்றுவிட்டதாகத் தெரிகிறது. வாசலில், தாம்பூலப் பைகள் அளிக்கப்படுவது கண்ணில்பட்டதும் அதில் இருந்து பழமாவது எடுத்துச் சாப்பிடலாம் என ஆவலுடன் ஓடினர். பல பைகளில் பழம் இல்லை. தேங்காய் மட்டும் இருந்தது. அந்தத் தேங்காயை அங்கேயே உட்கார்ந்து, காலுக்கிடையில் அழுந்தப் பிடித்துக் கொண்டு, நார் உரித்துக் காயை உடைத்து அவசர அவசரமாக பசியாறினர் பலர்! திருமணம் முடிந்ததும்தான் தாமதம்... எம்.ஆர்.சி. நகரையொட்டியுள்ள பகுதிகளில் படுபயங்கர அமர்க்களம்! கடந்த இரண்டு நாட்களாக நடக்கும் கூத்துகளை வயிற்றெரிச்சலுடன் பார்த்துக் கொண்டிருந்த அந்தப் பகுதியில் வாழும் ஏழை மக்கள் பலர், அலங்கார ஆடம்பரப் பொருட்களில் கைக்குக் கிடைத்ததைப் பிய்த்து எடுக்கத் துவங்கினர். சாலையோரங்களில் வைக்கப்பட்டிருந்த ‘பிளாஸ்டர் ஆஃப் பாரீஸ்’ அலங்காரச் சின்னங்கள் அடித்துத் தூள் தூளாக்கப்பட்டன. முதல்வரின் கட்-அவுட்கள் மீது ஏழு வயதுச் சிறுவன் முதல் எழுபது வயது கிழவர் வரை தாங்களாகவே ஏறி, அவிழ்த்து, தரையில் போட்டு உடைத்து, ப்ளைவுட் கட்டைகளை விலைக்குப் போடத் தோளில் தூக்கிச் செல்ல ஆரம்பித்து விட்டனர். ஒரு மூதாட்டி அலங்கார கட்-அவுட் ஒன்றைத் தன் பேரனின் துணையோடு நகர்த்த முடியாமல் நகர்த்திக்கொண்டு போனார். "பாவம்... நாலைந்து நாளுக்கு அடுப்பெரிக்கப் பயன்படும்!" என்று சொல்லி, பார்த்துக் கொண்டிருந்தது போலீஸ். தொங்கிக் கொண்டிருந்த அலங்கார சீரியல் விளக்குகளை ஆங்காங்கே பலர் தங்களுக்கு எட்டியதுவரை பிடித்து இழுத்துச் சுருட்டிப் பைகளுக்குள் போட்டுக் கொண்டனர். இதைப் பார்த்துவிட்டு அதன் உரிமையாளர்கள் பகலிலேயே மின்சாரத்தை அதில் பாயவிட்டனர். இதனால், பலருக்கு ஷாக் அடிக்க... அப்படியும் கட்டைகளைக் காலடியில் போட்டுக்கொண்டு பலரும் அலங்கார விளக்குகளைச் சுருட்டிக் கொண்டுதான் சென்றனர். தாலி கட்டிய மூன்றாவது நிமிடமே மிச்சம் மீதி இருந்த வாழை மரங்கள் கந்தல் கந்தலாகிவிட்டன! நரசிம்மவதாரம் எடுத்த பொதுமக்கள், வாழை மரங்களைப் பிய்த்துக் குதறி உள்ளே இருந்த வாழைத்தண்டை எடுத்துக் கொண்டு ஓடினார்கள். ஏதுமில்லாத ஏழைகள்தான் இப்படியென்றால், திருமண பந்தலிலும் இதே கதிதான்! அங்கு பணியில் இருந்த அரசு அதிகாரிகள், போலீஸ்காரர்கள் எல்லோருமே பைகளில் ‘ஏதேதோ’ அள்ளிக்கொண்டு போனார்கள். பல லட்சம் செலவில் திருமண வளாகத்தில் ஒட்டியிருந்த கலர் பேப்பர்கள், பளபளா பேப்பர்களைக்கூடச் சுருட்டிக் கொண்டு அவர்கள் வீட்டுக்கு விரைந்தனர். திருமணத்தில் டெல்லி அதிகாரிகள்! கடந்த சில ஆண்டுகளுக்கு முன்னர் சென்னையில் ஒரு தொழிலதிபர் தன் மகளுக்குத் திருமணம் நடத்தினார். திருமணம் முடிந்த கையோடு அவருக்கு இன்கம்டாக்ஸ் அதிகாரிகளிடம் இருந்து நோட்டீஸ் வந்தது. அதில் இவ்வளவு செலவு செய்ய ஏது உங்களுக்குப் பணம்...வருமானம் எவ்வளவு?’’ என்று குடைந்து எடுத்துவிட்டார்கள். ஜெயலலிதாவின் வளர்ப்பு மகன் திருமணத்துக்கு, டெல்லியில் இருக்கும் நிதி அமைச்சகத்தின் உத்தரவின்படி டெல்லியில் இருந்து வருமான வரித்துறை உயரதிகாரிகள் ஏழு பேரும் சென்னையில் இருக்கும் வருமானவரி புலனாய்வுத்துறை உயரதிகாரிகள் நால்வரும் சென்றனர். ஒரு தொழிலதிபரின் வீட்டுக் கல்யாணத்தில் லட்ச ரூபாய் செலவு செய்ததற்கு இவ்வளவு கெடுபிடி செய்த வருமானவரித்துறையினர், கோடிக்கணக்கில் செலவு செய்த முதல்வர் மீது என்ன நடவடிக்கை எடுக்கப் போகிறார்கள்...? செப்டம்பர் 13, 1995 ஜூனியர் விகடன் இதழில் இருந்து... - நமது நிருபர்கள் நன்றி : விகடன்.காம்

Tweet

ஜெயலலிதா சொத்துக் குவிப்பு வழக்கு - குன்ஹா தீர்ப்பு விவரம் - 4

15-10-2014

என் இனிய வலைத்தமிழ் மக்களே..!

சிவாஜி வீட்டு சீதனம் தையல் கூலி மட்டும்தான்...!

ஜெயலலிதாவின் வளர்ப்பு மகன் திருமணம் பற்றி சாட்சிகள் நீதிமன்றத்தில் பதிவுசெய்த வாக்குமூலங்களையும் 'அந்தத் திருமணத்துக்கு நான் எந்தச் செலவுகளையும் செய்யவில்லை’ என்ற ஜெயலலிதா, ஆதாரங்களுக்கு முன் எப்படி மௌனமாகிப் போனார் என்பதையும் கடந்த இதழில் பார்த்தோம்.

அந்தத் திருமணம் பற்றி ஜெயலலிதாவும் சிவாஜி கணேசனின் குடும்பத்தினரும் சொன்ன, முன்னுக்குப்பின் முரணான தகவல்களை நீதிபதி மைக்கேல் டி குன்ஹா விளக்கிய விதம் பற்றிப் பார்ப்போம்.

என் இதயபூர்வமான நன்றிகள்

''என் வளர்ப்பு மகன் வி.என்.சுதாகரனுக்கும் சத்தியலட்சுமிக்கும் 7.5.1995 அன்று நடைபெற்ற திருமணம் மற்றும் 06.05.1995 அன்று நடைபெற்ற மாப்பிள்ளை அழைப்பு நிகழ்ச்சியில் நேரிலும் வாழ்த்துகள் அனுப்பியும் சிறப்பித்த ஒவ்வொருவருக்கும் என் இதயப்பூர்வமான நன்றிகள்... உங்கள் மீது கொண்டுள்ள அன்பு மற்றும் பாசத்தால் உங்கள் ஒவ்வொருவருக்கும் தெரிவிக்கும் நன்றியாக ஏற்கவும்.''

- ஜெ.ஜெயலலிதா

தமிழ்நாடு முதலமைச்சர்,

அ.இ.அ.தி.மு.க பொதுச் செயலாளர்.

- இது சுதாகரனின் திருமணம் நடந்து முடிந்த பிறகு பத்திரிகையில் ஜெயலலிதா கொடுத்த நன்றி அறிவிப்பு விளம்பரம். அரசுத் தரப்பு சாட்சியான தினத்தந்தி நாளிதழின் மூத்த விளம்பர மேலாளர் சுந்தரேசன் மூலம் நிரூபணம் ஆகியுள்ளது. தினத்தந்தி நாளிதழின் அனைத்துப் பதிப்புகளிலும் 11.09.1995 அன்று இந்த விளம்பரம் வெளியானது என்பதையும் சுந்தரேசனின் சாட்சி உறுதிப்படுத்தி உள்ளது. அவருடைய கூற்றை அரசுத் தரப்பு அந்த நாளில் வெளியான தினத்தந்தி நாளிதழ்களை நீதிமன்றத்தில் சமர்ப்பித்து உறுதிப்படுத்தியுள்ளது. 

இதற்கான கட்டணமாக இரண்டு லட்சத்து 47 ஆயிரத்து 660 ரூபாய் ராக் ஆர்ட்ஸ் என்ற விளம்பர நிறுவனத்துக்கு அனுப்பப்பட்டு உள்ளது. குறுக்கு விசாரணையில், இது அரசாங்கம் சார்பில் கொடுக்கப்பட்ட விளம்பரம் இல்லை என்பது தெளிவாகி உள்ளது. இந்த விளம்பரம் ஆளும் கட்சி சார்பில் கொடுக்கப்பட்டது என்றும் தெரிவித்துள்ளது நல்ல நகைச்சுவை. 

இது தொடர்பாக போலீஸுக்கு சுந்தரேசன் கொடுத்த பில்லில் தமிழ்நாடு முதலமைச்சர் என்பதற்குக் கீழே, அ.இ.அ.தி.மு.க பொதுச் செயலாளர் என்று அச்சடிக்கப்பட்டு உள்ளது. ஆனால், அதே சமயம் அரசாங்கம் சார்பில் கொடுக்கப்படும் விளம்பரங்களில் கட்சியின் பெயரோ, கட்சியில் அவர் வகிக்கும் பொறுப்போ இடம் பெறாது என்றும் ஒப்புக்கொண்டு உள்ளார்.''

'கையும் கணக்குகளுமாகச் சிக்கிய ஆடிட்டர்!’

''அரசுத் தரப்பு சாட்சி ஆடிட்டர் ராஜசேகரன், இந்த வழக்கில் மிக முக்கியமான சாட்சி. இவர் ஜெயலலிதாவுக்கு 84-85, 96-97 ஆண்டுகளில் வருமானவரி, சொத்து வரிக் கணக்குகளைத் தாக்கல் செய்தவர். ஊழல் தடுப்பு போலீஸார் ராஜசேகரனின் வீடு மற்றும் அலுவலகங்களில் சோதனை நடத்தியபோது ஏராளமான ஆவணங்களைக் கைப்பற்றினர். அப்போது, என்னென்ன கைப்பற்றப்பட்டன என்ற மகஜரில் ராஜசேகரன் கையெழுத்துப் போட்டுக்கொடுத்துள்ள பகுதி முக்கியமானது. 

அதில், 1996 அக்டோபர் 17-ம் தேதி, காலை 11.30 மணியில் இருந்து மதியம் 4.00 மணி வரை லஞ்ச ஒழிப்புத் துறை போலீஸார் என்னுடைய வீடு, அலுவலகங்களில் சோதனை நடத்தினர். நல்லம்ம நாயுடு தலைமையில் வந்த போலீஸ்காரர்கள் ராயப்பேட்டையில் உள்ள எனது வீட்டிலும் எண்:57, சுப்பிரமணியம் தெரு, அபிராமபுரம், சென்னை என்ற முகவரியில் உள்ள எனது வீட்டிலும் சோதனை மேற்கொண்டனர். அப்போது அபிராமபுரம் வீட்டில் இருந்து 48 ஆவணங்களைக் கைப்பற்றினார்கள். 

அதில் 928 பக்கங்களைக்கொண்ட 38-வது ஆவணம் 'முழுக்க முழுக்க சுதாகரனின் திருமணச் செலவுகள் தொடர்பான ரசீதுகள், செலவுகள் பற்றிய விவரங்களைக் கொண்டவை’ என்று குறிப்பிட்டுக் கையெழுத்துப் போட்டுள்ளார். 

ஆனால், துரதிருஷ்டவசமாக ஆடிட்டர் ராஜசேகரனை அரசுத் தரப்பு, எதிர்த்தரப்பு... என இருவராலும் குறுக்குவிசாரணை செய்ய முடியவில்லை. அவரை இந்த நீதிமன்றத்துக்குக் கொண்டு வருவதில் இருவருமே தோல்வியடைந்து உள்ளனர். 

அதன் காரணமாக ராஜசேகரனிடம் இருந்து கைப்பற்றப்பட்ட ஆவணங்கள் அனைத்தையும் நாம் ஒதுக்கிவிட முடியாது. ஏனென்றால் இந்தச் சாட்சியிடம் இருந்து கைப்பற்றப்பட்ட ஆவணங்கள் அரசுத் தரப்பு, எதிர்த் தரப்பு என இருவருக்குமே பல வகையில் பயனுள்ளவையாக உள்ளன.

அதில் கிடைத்த முக்கியமான ஆவணங்கள் என்னவென்றால், சுதாகரனின் திருமணம் பற்றி, விவரங்கள் கேட்டு ஜெயலலிதா, சசிகலாவுக்கு வருமான வரித் துறை அனுப்பிய நோட்டீஸ், கோவிந்த் கேப்ஸ், கிரீஸ் மியூசியம் ஃபர்னிச்சர்ஸ், பந்தல் கான்ட்ராக்டர் குமரேசன் நாடார் கொடுத்த ரசீது, பாலு கலர் லேப், குமரன் சில்க்ஸ், நெல் மற்றும் அரிசி விற்பனையாளர் அப்பாஸ், மௌலிஸ் அட்வர்டைசிங் கம்பெனி, ஏ.ஜி.கே. டிராவல்ஸ், ஆங்கர் கேப்ஸ், வின்சென்ட் டிராவல்ஸ், வருமானவரித் துறை ரசீதுகள், அடையார் கேட் ஹோட்டல் ரசீது போன்றவை கைப்பற்றப்பட்டு உள்ளன.''

'போயஸ் கார்டனில் சுதாகரன்!’

''மற்றொரு முக்கிய சாட்சி, ஐ.ஏ.எஸ் அதிகாரி ஜவஹர் பாபு. இவர் 1992 முதல் 1996 வரை போயஸ் கார்டன் இல்லத்தில் முதலமைச்சரின் உதவிச் செயலாளராகப் பணியாற்றிவர். இவருடைய அலுவலகம் தலைமைச் செயலகத்திலும் முகாம் அலுவலகம் ஜெயலலிதாவின் போயஸ் கார்டன் இல்லத்திலும் இருந்து செயல்பட்டுள்ளன. அந்தக் காலத்தில் சசிகலாவும் சுதாகரனும் போயஸ் கார்டனில்தான் வசித்தனர் என்பதையும் சுதாகரனின் திருமண நிச்சயதார்த்தம், நடிகர் சிவாஜி கணேசன் வீட்டில் நடைபெற்றதையும் மணமகன் வீட்டில் இருந்து விலை உயர்ந்த பொருள்கள் பல தட்டுகளில் அங்கு எடுத்துச் சென்றதையும் ஜெயலலிதா அதில் கலந்துகொண்டார் என்பதையும் தனது சாட்சியில் உறுதிப்படுத்தி உள்ளார்.

சுதாகரனின் திருமணம் மற்றும் வரவேற்பு இசைக் கச்சேரிக்காக மாண்டலின் ஸ்ரீநிவாஸ், இசையமைப்பாளர் ஏ.ஆர்.ரஹ்மானைத் தொடர்புகொண்டு பேசியதையும் ஜவஹர் பாபு ஒப்புக்கொண்டு உள்ளார். அதோடு முதல் அமைச்சர்கள், ஐ.ஏ.எஸ் அதிகாரிகள், ஐ.பி.எஸ் அதிகாரிகள், கவர்னர்கள் உள்ளிட்ட 400 வி.ஐ.பி-க்களுக்கு அழைப்பிதழ்கள் அனுப்பியதையும் ஒப்புக்கொண்டு உள்ளார்.''

'வெள்ளித் தட்டுகளில் அழைப்பிதழ்!’

''இசையமைப்பாளர் ஏ.ஆர்.ரஹ்மான் தனது சாட்சியில், முதலமைச்சரின் உதவிச் செயலாளர் ஜவஹர்பாபு தன்னை தொலைபேசியில் அழைத்து, முதலமைச்சரைச் சந்திக்கும்படி சொன்னதாகவும் இதையடுத்து மறுநாள் தலைமைச் செயலகத்தில் தன்னுடைய தாயாருடன் போய் ஜெயலலிதாவைச் சந்தித்ததாகவும் தெரிவித்தார். அப்போது, ஜெயலலிதா தன்னுடைய வளர்ப்பு மகன் திருமணத்துக்கு இசைக் கச்சேரி நடத்த வேண்டும் என்று கேட்டதாகவும் அதற்கு, தான் சம்மதித்ததாகவும் தெரிவித்துள்ளார். 

இதையடுத்து மறுநாள் பாஸ்கரன் அவரது மனைவியுடன் ஏ.ஆர்.ரஹ்மான் வீட்டுக்கு வந்து, இரண்டு தட்டுகளில் அழைப்பிதழ் வைத்ததாகவும் ஒவ்வொன்றிலும் ஒரு பட்டுச் சேலை, ஒரு பட்டு வேட்டி, அங்கவஸ்திரம், குங்குமச் சிமிழ் இருந்ததாகவும் தெரிவித்துள்ளார். 

பொறியாளர் முத்துச்சாமியும் தான் பந்தல் வேலைகளை மேற்பார்வை பார்த்துக்கொண்டு இருந்தபோது, தனக்கு வெள்ளித்தட்டில் பட்டுச் சேலை, பட்டு அங்கவஸ்திரம், வேட்டியுடன் அழைப்பிதழ் கொடுக்கப்பட்டதாகக் கூறி உள்ளார். 

அதன் மூலம் வி.ஐ.பி-க்களுக்கு வெள்ளித்தட்டுகளில் பத்திரிகை கொடுக்கப்பட்டது நிரூபணமாகி உள்ளது. முத்துச்சாமியிடம் இருந்து பறிமுதல் செய்யப்பட்டு இந்த வழக்கில் இணைக்கப்பட்டுள்ள வெள்ளித்தட்டு மற்றும் பட்டுச் சேலை ஆகியவற்றை வைத்து அவற்றின் விலை இரண்டரை ஆண்டுகளுக்கு முன்பு என்ன என்பதைக் கண்டறிந்து அதைக் கணக்கிட்டு, இந்த மதிப்பீடு தயாரிக்கப்பட்டுள்ளது.

இந்தச் சாட்சியங்களை எதிர்த் தரப்பு குறுக்கு விசாரணையில் உடைக்க முடியவில்லை. மாறாக, கிடைத்த ஆவணங்கள் அனைத்தும் குற்றவாளிகள் தரப்புக்கு எதிராக மிக சக்தி வாய்ந்த ஆதாரங்களாக உள்ளன.''

'பதில் சொல்ல முடியாத ஜெயலலிதா!’

''சுதாகரனின் திருமணம்பற்றி ஜெயலலிதா நேரில் ஆஜராகி, சாட்சி சொன்னபோது, நான் திருமணத்துக்கு எந்தப் பணமும் செலவழிக்கவில்லை. இதை நான் 1995 மற்றும் 1999-ம் ஆண்டுகளில் வருமானவரித் துறைக்கு அளித்த பதிலிலும் தெளிவுபடுத்தி உள்ளேன். 

மேலும், திருமணம் நடைபெற்றது 1995-ம் ஆண்டு. ஆனால், அதற்கான செலவுகள்பற்றி மதிப்பீடு செய்துள்ள தங்கராஜ், அதை 1997-ம் ஆண்டு தயாரித்துள்ளார். அவர் இதுபோன்ற மதிப்பீடுகளைச் செய்வதில் திறமையற்றவர் என்பது அவரது மதிப்பீட்டில் இருந்து தெரியவருகிறது என்று நீதிமன்றத்தில் ஜெயலலிதா சொன்னார். 

ஆனால், அதே ஜெயலலிதா, 1996-97-ம் வருடம் தாக்கல் செய்த வருமான வரி கணக்கில் 'திருமணச் செலவுகள்' என்று குறிப்பிட்டு 25 லட்சத்து 98 ஆயிரத்து 521 ரூபாய் என்றும் ரொக்கமாக 3 லட்சத்து 94 ஆயிரத்து 240 ரூபாய் செலவு செய்ததாகவும் குறிப்பிட்டுள்ளார்.

ஜெயலலிதாவின் ஆடிட்டர் வீட்டில் இருந்து கைப்பற்றப்பட்ட ஆவணங்களின்படி, சுதாகரனின் திருமணத்துக்கு ஆன செலவுகளாக அவர்கள் வருமானவரித் துறையினருக்குத் தாக்கல்செய்த கணக்கில் தெளிவாக 12 லட்சத்து 50 ரூபாய் பத்திரிகைகள் மற்றும் விளம்பரங்களுக்கு செலவு செய்ததாகக் குறிப்பிட்டுள்ளனர். 

உணவுப் பொருள்கள் சப்ளை செய்த அப்பாஸ் என்பவருக்கு கனரா வங்கி மூலம் 23 ஆயிரம் ரூபாய் கொடுத்த கணக்கு உள்பட பல கணக்குகள் தெரிய வருகின்றன.

திருமணத்துக்கான எல்லாச் செலவுகளையும் மணமகள் வீட்டாரே செய்தார்கள் என்றால், பந்தல், விளக்கு அலங்காரம், கார்கள், அழைப்பிதழ் செலவுகளுக்கு ஜெயலலிதா கையெழுத்துப்போட்டு செக் கொடுத்தது ஏன்? என்ற இந்தக் கேள்விகளுக்கு ஜெயலலிதா தரப்பால் பதில் சொல்ல முடியவில்லை.''

பகலில்கூட படிக்க முடியாத ஆதாரம்..!

சிவாஜி கணேசனின் மகன் ராம்குமார், ''என்னுடைய தகப்பனார் நடிகர் சிவாஜி கணேசன். இந்த வழக்கில் சம்பந்தப்பட்டுள்ள மூன்றாவது குற்றவாளி சுதாகரன், என் இளைய சகோதரி சாந்தியின் மகளைத் திருமணம் செய்துள்ளார். அந்த நேரத்தில் எங்களுடைய தந்தை உயிருடன் இருந்தார். 

நாங்கள் இந்தத் திருமணத்துக்கான மொத்தச் செலவுகளையும் ஏற்றுக் கொண்டோம். இதற்காக தனியாக வங்கிக் கணக்குத் தொடங்கினோம். ஸ்டேட் பாங்க், கோபாலபுரத்தில் திருமணச் செலவுக்காக ரூ.92 லட்சம் போட்டு வைத்தோம் என்று சொல்லி உள்ளார். அதிலிருந்து எடுத்து செலவுகளைச் செய்தோம் என்று சொல்லி உள்ளார். 

ஆனால், வங்கிக் கணக்குப் புத்தகத்தை நீதிமன்றத்தில் சமர்ப்பிக்கவில்லை. பலமுறை கேட்ட பிறகு கணக்குப் புத்தகத்தின் ஜெராக்ஸ் காப்பியைச் சமர்ப்பித்தார். ஒரிஜினல் காப்பி இருந்தால்தானே ஜெராக்ஸ் காப்பி எடுக்க முடியும். அப்படியானால் நீதிமன்றத்தில் ஒரிஜினலையே சமர்ப்பிக்கலாமே? ஆனால் சமர்ப்பிக்கவில்லை.

இதைக் குறுக்கு விசாரணை செய்தபோது, இந்த வங்கிக் கணக்கு 14.08.1995-ம் ஆண்டு தொடங்கப்பட்டுள்ளது. ஆனால், அந்தக் கணக்கில் வரவு செலவு விவரங்கள் எதுவும் இல்லை.

கணக்குப் புத்தகத்தின் முகப்பு அட்டையின் போட்டோ காப்பி ஒன்றையும் நீதிமன்றத்தில் தாக்கல் செய்துள்ளனர். அதில் வங்கியின் சீல் இல்லை. வங்கிக் கிளையின் முகவரி இல்லை. அதில் அச்சாகி இருக்கும் விவரங்களை நல்ல வெளிச்சத்தில், பகல் நேரத்தில்கூட படிக்க முடியவில்லை. இதை எப்படி ஓர் ஆதாரமாக ஏற்க முடியும்...? 

மணமகள் வீட்டார்தான் செலவுகள் செய்தனர். அதுவும் மணமகளின் தாய்மாமன் ராம்குமார்தான் அத்தனை செலவுகளையும் செய்தார் என்றால், அதற்கு ஓர் ஆதாரத்தைக்கூட அவர்களால் தாக்கல் செய்ய முடியவில்லை. சுதாகரனுக்கு உடைகள் தைக்க டெய்லருக்கு ஒரு லட்சம் ரூபாய் கொடுத்தது மட்டும்தான் ராம்குமார் செய்த செலவு. அதற்கு மட்டும்தான் ஆதாரம் உள்ளது.

ஆக, பந்தல் போடுவதற்கான உத்தரவுகள் ஜெயலலிதா வீட்டில் இருந்து போய் உள்ளன. அதற்கான செலவுக்கு ஜெயலலிதா  செக் கொடுத்துள்ளார். ஜெயலலிதாவின் வீட்டில் இருந்து அழைப்பிதழ்கள் அச்சடிக்க உத்தரவு வந்துள்ளது. அதற்கான தொகையை ஜெயலலிதா  கொடுத்துள்ளார். வி.ஐ.பி-களுக்கான அழைப்பிதழ்கள் ஜெயலலிதா வீட்டில் இருந்து கொடுக்கப்பட்டு உள்ளன. அதற்கான தொகையையும் ஜெயலலிதா கொடுத்துள்ளார். 

மேலும், பட்டுப் புடவைகள், பட்டு வேட்டிகள், அங்கவஸ்திரங்கள், வெள்ளித் தாம்பூலத் தட்டுகள், பட்டாசுகள், கேரளாவில் இருந்து கொண்டு வரப்பட்ட யானைகள், குதிரைகள், உணவுப் பொருள்கள், இனிப்புகள், வி.ஐ.பி-கள் தங்குவதற்கான ஏற்பாடுகள், திருமணம் நடந்த இடம், வரவேற்பு நடந்த சாலைகள் ஆகியவற்றில் செய்யப்பட்டு இருந்த விளக்கு அலங்காரங்கள், பத்திரிகைகளுக்குக் கொடுக்கப்பட்ட விளம்பரங்கள்,  விலை உயர்ந்த பரிசுப் பொருள்கள்... போன்றவற்றின் மதிப்பு 3 கோடியே 45 லட்சத்து 4 ஆயிரத்து 222 ரூபாய் என்று மதிப்பிடப்பட்டு உள்ளது. இதை மறுக்க முயன்ற ஜெயலலிதா மற்றும் சுதாகரன் தரப்பால் அதற்கான ஆதாரங்களைச் சமர்ப்பிக்க முடியவில்லை.

மாறாக, இந்தச் செலவை அவர்கள்தான் செய்துள்ளனர் என்பதற்கு ஏராளமான ஆதாரங்கள் அரசுத் தரப்பால் சமர்ப்பிக்கப்பட்டுள்ளன.

அடுத்த இதழிலும் தொடரும்...

- ஜோ.ஸ்டாலின்

Tweet

வாய் பிளக்க வைத்த சுதாகரன் திருமணம்-1

13-10-2014

என் இனிய வலைத்தமிழ் மக்களே..!

ஜெயலலிதாவின் அரசியல் வாழ்க்கையில் ஒரு திருப்பத்தையே ஏற்படுத்திய வளர்ப்பு மகன் சுதாகரனின் திருமணம் பற்றி  அந்நாளைய 'ஜூனியர் விகடன்' இதழில் வெளிவந்த கட்டுரையை அந்நிறுவனம் தனது விகடன்.காம் இணைய இதழில் மறுபிரசுரம் செய்திருக்கிறது.

அது இங்கே :

ஃப்ளாஷ்பேக்: வாய் பிளக்க வைத்த சுதாகரன் திருமணம்! (மினி தொடர்: பகுதி-1)

சொத்துக்  குவிப்பு வழக்கில் பெங்களூரு பரப்பன அக்ரஹாரா சிறையில் அடைக்கப்பட்டுள்ள ஜெயலலிதாவுக்கு தீபாவளி பண்டிகைக்குள் ஜாமீன் கிடைக்குமா, கிடைக்காதா என்பதுதான் தற்போதைய சூடான விவாதம். 

18 ஆண்டுகளாக ஆமை நடை போட்ட சொத்துக் குவிப்பு வழக்கில் கடந்த மாதம் 27-ம் தேதியன்று அதிரடி தீர்ப்பு ஒன்றை வழங்கி வழக்குக்கு முற்றுப்புள்ளி வைத்தார் நீதிபதி ஜான் மைக்கேல் டி.குன்ஹா. 

நான்கு ஆண்டுகள் சிறைத் தண்டனை மற்றும் 100 கோடி ரூபாய் அபராதம் வழங்கி, குற்றவாளி அதை செலுத்தத் தவறும்படசத்தில் கூடுதலாக ஓராண்டு சிறைத் தண்டனை பெற நேரிடும் என அதிரடி தீர்ப்பு வழங்கியிருக்கிறார் நீதிபதி ஜான் மைக்கேல் டி.குன்ஹா.      

இந்த வழக்கில் தன் வளர்ப்பு மகன் சுதாகரனுக்கு ஜெயலலிதா நடத்திய தடபுடலான ஆடம்பர திருமணமும் முக்கிய ஆதாரமாக வைக்கப்பட்டிருந்தது. 1995-ல் தமிழகத்தின் முதலமைச்சராக இருந்த ஜெயலலிதா, தமிழர்கள் வாய்பிளக்கும் வகையில் தன் வளர்ப்பு மகன் சுதாகரனுக்கு திருமணம் என்னும் திருவிழாவை நடத்திக் காட்டினார். அப்படி ஒரு பிரம்மாண்டம். 19 வருடங்களுக்கு முன்பு (8.9.95) நடைபெற்ற சுதாகரனின் பிரமாண்ட திருமணத்தை தற்போதைய தலைமுறையினர் கண்டிப்பாக அறிந்திருக்க வாய்ப்பில்லை.

அவர்களுக்காக சின்ன ஃப்ளாஷ்பேக்.  செப்டம்பர் 10, 1995 ஜூனியர் விகடன் இதழில் இருந்து...  

"ஒரு முதல்வரின் மகனுக்குத் திருமணம் எப்படி நடக்குமோ அப்படித்தான் இந்தத் திருமணமும் நடக்கும். அதுபற்றி யாரும் அலட்டிக் கொள்ள வேண்டியதில்லை..!" - தனது வளர்ப்பு மகன் சுதாகரன் திருமணம் பற்றி பத்திரிகைகள் எழுதத் துவங்கியதுமே பொங்கியெழுந்து முதல்வர் ஜெயலலிதா விட்ட அறிக்கை இது...!  

‘எப்படியெல்லாம் இந்தத் திருமணத்துக்கான ஏற்பாடுகள் அமைய வேண்டும்!’ என்று அமைச்சர்களிடம் தன் விருப்பத்தை முதல்வர் விவரிக்க...விவரிக்க வாயடைத்துப் போனார்கள் மந்திரிகள்..!  ‘கற்பனைக்கும் எட்டாத ஆடம்பரத்துடன் இப்படிப்பட்ட ஏற்பாடுகளைச் செய்ய முடியுமா’ என்று திகைப்பு ஒருபுறம் இருக்க...‘அந்த அளவுக்குத் தேவையா’ என்ற தயக்கமான கேள்வியைத் தட்டுத் தடுமாறி ஓர் அமைச்சர் எழுப்பினாராம். ‘‘ஏன்.. யார் என்ன சொல்லிவிட முடியும்! நான் சொல்கிற அளவுக்கு உங்களால் செய்ய முடியுமா என்பதுதான் பேச்சு! இது திருமணமே அல்ல... கட்சியின் மாபெரும் மாநாடு என்று நினைத்துக்கொண்டு செயல்படுங்கள்!’’ என்றாராம் முதல்வர்.

அவ்வளவுதான்!   மின்கம்பங்களில் கரண்ட் எடுப்பது.. ரோடு முழுக்கப் பள்ளம் தோண்டி அலங்கார வளைவு அமைப்பது, நிதி வசூல், காவல் துறை குவிப்பு என்று புகுந்து விளையாடத் துவங்கினார்கள் அமைச்சர்கள்!  

நான்காம் தேதி இரவு மணி பதினொன்றரை...! வழக்கமான அணிவகுப்பு ஆர்ப்பாட்டங்கள் இல்லாமல், முன்னும் பின்னும் ஓரிரு கார்கள் தொடர போயஸ் தோட்டத்தில் இருந்து கிளம்பினார் முதல்வர். அவருடன் தோழி சசிகலா இல்லை...!  அடையாறு சிக்னல்வரை சென்று அங்கிருந்து கடற்கரையில் கண்ணகி சிலைவரை அதிவேகமாக ஒரு முறை சென்றது முதல்வரின் கார்..! வரிசையாகச் செய்யப்பட்டிருந்த வண்ண வண்ண சீரியல் செட் அலங்காரங்கள், அமைச்சர்களும் கட்சிப் பிரமுகர்களும் வைத்திருந்த கட் - அவுட்கள், சாலை நெடுக அமைந்திருந்த அலங்கார வரவேற்பு மேடைகள் ஆகியவற்றைப் பார்த்து திருப்தியடைந்தார் முதல்வர். 

 அடுத்து, திருமணம் நடக்கும் எம்.ஆர்.சி. நகருக்கு விரைந்தார். வழக்கமான வேட்டி, சட்டை, தோள் துண்டு இல்லாமல் அத்தனை அமைச்சர்களும் பாண்ட் அணிந்து மிடுக்குடன் காத்திருந்தது வித்தியாசமான காட்சி! அதிலும் மூத்த அமைச்சர் எஸ்.டி.எஸ். லூஸான வெள்ளைச் சட்டையும் க்ரே கலர் பேன்ட்டும் அணிந்து ‘துறுதுறு’ப்புடன் நின்ற காட்சியைப் பார்க்க சக அமைச்சர்களுக்கேகூட ஜாலியாகத்தான் இருந்தது..!  நாவலர், இந்திரகுமாரி, மதுசூதனன் தவிர மற்ற அமைச்சர்கள் எல்லாம் அங்கிருந்தனர்.  

முதல்வரின் கார் வந்ததும் அதன் பின்னே ஓடித் திருமணம் நடக்கப் போகும் மாபெரும் மைதானத்துக்குள் சென்றார்கள். கிட்டத்தட்ட ஒரு மணி நேரம் கழித்துத்தான் முதல்வர் அங்கிருந்து கிளம்பிச் சென்றார். உள்ளே என்ன நடந்தது..?   அமைச்சர் ஒருவரின் உதவியாளரும், சில போலீஸ் அதிகாரிகளும் நமக்குச் சொன்ன தகவல் திகைப்பை உண்டாக்கியது! 

தஞ்சை மாவட்டம் திருக்காட்டுப் பள்ளிப் பகுதியைச் சேர்ந்த ராமமூர்த்தி ஐயர் உள்ளே முதல்வருக்காக காத்திருந்தார். அவர் பெரிய மாந்திரீகர்!  முன்னாள் பிரதமர் சந்திரசேகர், கவர்னர் சென்னாரெட்டி ஆகியோர் பயபக்தியுடன் வணங்கும் திருவக்கரை வக்கிர காளியம்மன் கோயிலில் நாற்பத்தெட்டு நாட்கள் விசேஷ பூஜை நடந்ததாம். மாந்திரீக வார்த்தைகளும் குறிகள் போட்ட அகலமான தங்கத்தகடுகளை அந்தக் கோயிலில் வைத்து விசேஷ பூஜை செய்தார் ராமமூர்த்தி ஐயர். அவற்றைத்தான் திருமணப் பந்தலுக்குக் கொண்டு வந்திருந்தார்...!  

ஜோதிடத்தில் நம்பிக்கை உள்ளவர்கள், பிறர் பொறாமைப்படும் வண்ணமாக ஏதாவது நிகழ்ச்சி நடத்தும்போது, திருஷ்டிபடாமல் இருக்க சில பரிகாரங்கள் செய்வதுண்டாம்..! அதில் மிக மிக ‘காஸ்ட்லி’யான ஒரு பரிகாரத்தைச் செய்யத்தான் அந்த மாந்திரீகர் வரவழைக்கப்பட்டிருக்கிறார்.   திருவக்கரை கோயிலில் வைத்து மந்திரிக்கப்பட்ட தங்கத் தகடுகளை, மண விழாப் பந்தலின் எட்டுத் திக்குகளிலும் புதைத்தார்கள். அத்துடன் வைர வைடூரியன் உட்பட நவமணிகளையும் போட்டுப் புதைத்துச் சாணத்தால் மெழுகியிருக்கிறார்கள்!  கூடவே, ராஜ கம்பீரமாக மிகப்பெரிய தூண்களுடன் அமைக்கப்பட்டுள்ள மணமேடையிலும் ஒவ்வொரு அடி இடைவெளிட்டு மந்திர வார்த்தைகள் பொறித்த தங்கத் தகடுகள் புதைக்கப்பட்டதாம்..!  

இந்தியா முழுவதும் இருந்து வி.ஐ.பி-க்கள் முதல் சாதாரண கட்சித் தொண்டர் வரை வரப்போகிற இந்தத் திருமணத்தில் யாராவது ஏதாவது ஆபத்து உண்டாக்கிவிடக்கூடும் என்ற கவலை இருக்கிறது! அப்படி அபாயம் உண்டாக்க வருபவரின் மனத்தை மாற்றி, எதிர்ப்புக் குணத்தைப் போக்கி திருப்பியனுப்பிவிடக்கூடிய ‘வசிய சக்தி’ இந்தத் தகடுகளுக்கு இருப்பதாக மேலிடம் வரை நம்புகிறார்கள்!  

மந்திர வார்த்தைகள் பொறித்த தகடுகள் புதைக்கப்படுவதை முதல்வர் உட்பட அமைச்சர்கள் பயபக்தியுடன் பார்த்துக்கொண்டிருந்தனராம்! எல்லாம் முடிந்து திருப்தியுடன் முதல்வர் கிளம்பிப் போன பிறகு, மூத்த அமைச்சர் எஸ்.டி.எஸ் அடித்த கமென்ட்தான் மற்றவர்களைத் திகைப்படைய வைத்தது..! “மற்ற அரசியல்வாதிகள் எல்லாம் எந்தப் பிரச்னையும் அரசியல் ரீதியாகத்தான் பார்க்கிறார்கள். ஆனால், நம்ம அம்மா எதையும் மாந்திரீக ரீதியாக அணுகறாங்க. அதான் வெற்றிமேல் வெற்றி கிடைக்குது..!” என்றார் எஸ்.டி.எஸ்..!  

போலீஸ் படையையும் முதல்வர் நம்பத்தான் செய்கிறார். திருமணம் நடக்கும் இடம் கடலோரம் என்பதால் கடல் வழியாகத் சந்தேகத்துக்கிடமான ஆட்கள் ஊடுருவி விடக்கூடாது என்பதில் உஷாராக இருக்கிறார்கள். தமிழ்நாடு அரசுக்குச் சொந்தமான பூம்புகார் கப்பல் நிறுவனத்தின் கப்பலில் ஏறி, போலீஸ் கடலில் சுற்றி ரோந்து வர ஆரம்பித்துவிட்டது! இது தவிர, பந்தலை ஒட்டியுள்ள பகுதியில் கடலோரப் பாதுகாப்புப் படையினர் நிறுத்தி வைக்கப்பட்டுள்ளனர்.  தமிழகத்தின் அத்தனை மாவட்டங்களில் இருந்தும் படை படையாக வேன்களில் வந்து குவிந்திருக்கும் போலீஸாருக்கென மூன்று நாட்களுக்கு முன்பிருந்தே சென்னை நகரின் பல திருமண மண்டபங்கள் ஒழித்துத் தயார் செய்யப்பட்டுவிட்டன! 

திருமணம் நடக்கும் இடத்தில் அமைக்கப்பட்டிருக்கும் பிரமாண்டமான பந்தல்களில் உள்புறமிருந்து பார்த்தால் ஓலையே தெரியாது! பல லட்ச ரூபாய் செலவில் பிளாஸ்டர் ஆஃப் பாரீஸ் போட்டு அலங்கார வேலைகள் செய்யப்பட்டுள்ளன.  மணமேடை ஒரு அரண்மனையின் ராஜ தர்பார் போலவே அமைக்கப்பட்டிருக்கிறது. வெளிப்புறம் இருந்து பார்த்தால் ‘கண்’பட்டுவிடும் என்பதால் அதற்குத் தனியாக ஓர் ஓலைத் தடுப்புப் போட்டு மறைத்திருக்கிறார்கள். திருமணத்தன்று ஓலைத்தடுப்பு பிரிக்கப்படும்போது, அந்த மணமேடையின் வெளிப்புறம் பதிக்கப்பட்டுள்ள விலை மதிப்புள்ள கற்களும், அலங்கார அமைப்பும் அனைவரையும் வாய் பிளக்க வைக்கப் போகிறது!  

திருமண வளாகத்துக்கு உள்ளே மூன்று விதமான பங்களாக்கள் அசுரவேகத்தில் கட்டி முடிக்கப்பட்டுவிட்டன..! ஒன்று - முதல்வர் தங்கியிருப்பதற்கான (சகல வசதிகளும் கொண்ட) ஏ.ஸி. மாளிகை! இன்னொன்று சசிகலாவின் மிக நெருங்கிய உறவினர்கள் தங்குவதற்கு! மூன்றாவது, சிவாஜி குடும்பத்தினருக்கு..! இந்த மூன்று மாளிகைகளையும் இப்போதே போலீஸ் சூழ்ந்து நிற்கிறது..! கடுமையான பாதுகாப்பு..!   

எம்.ஆர்.சி. நகர்ப் பகுதியில் உள்ள பல வீடுகளுக்குள் கடந்த திங்கட்கிழமை போலீஸும் முக்கிய அதிகாரிகளும் புகுந்தனர். "நீங்களெல்லாம் வெளியேறிவிடுங்கள்! திருமணத்துக்கு முன்தினமும், திருமண தினத்தன்றும் இந்த ஏரியவுக்குள் லட்ச லட்சமாக ஆட்கள் ஆக்கிரமித்துவிடுவார்கள். அப்போது உங்களால் வீட்டை விட்டு வெளியில் வரமுடியாது. எனவே, நீங்களெல்லாம், உங்களுக்கு விருப்பப்படும் ஓட்டல்களுக்குப் போய்க் குடும்பத்தோடு தங்கிக் கொள்ளுங்கள். பிறகு ஓட்டல் ‘பில்’லைக் கொடுத்தால் பணத்தைக் கொடுத்து விடுகிறோம்..!" என்றார்கள்.   

எதிர்த்துப் பேசத் திராணியற்று மூன்று தெருக்களில் வசித்த குடும்பங்கள் வீடுகளைப் பூட்டிக் கொண்டு கிளம்பிவிட்டன. ‘‘ஓட்டல் பில்’’லை யாரிடம் கொடுத்து எப்படிப் பணம் வாங்குவது? அது நடக்காத காரியம் என்று எங்களுக்கு நன்றாகத் தெரியும்!’’ என்று புலம்பியபடியேதான் கிளம்பினர் அவர்கள்.   

வேறு பலர் வீடுகளில் நாய் வளர்க்கிறார்கள். அதை எந்த ஓட்டலில் தங்க அனுமதிப்பார்கள். அதேபோல் இடம் பெயர முடியாமல் உள்ள பல நோயாளிகளும் அங்குள்ள சில வீடுகளில் உள்ளனர். அந்தக் குடும்பங்கள் வீட்டை காலி செய்ய முடியாது என்று சொன்னதால், பலத்த மிரட்டலுக்கு ஆளாகியுள்ளனர்..! இவர்களுக்கெல்லாம் போலீஸ் அடையாள அட்டை அளித்துள்ளது. அதைக் காட்டினால்தான் தெருவை விட்டுப் போக முடியும் திரும்ப முடியும். அ.தி.மு.க.வின் முன்னாள் அமைச்சரும் தற்போதைய வை.கோ. கட்சிப் பிரமுகருமான அழகு. திருநாவுக்கரசு வீட்டுக்கும் அடையாள அட்டை தரப்பட்டுள்ளது..!  

திருமணத்துக்கு வருபவர்கள் தொழிலதிபர் எம்.ஏ.எம்.ராமசாமி குடும்பத்துக்குச் சொந்தமான செட்டிநாடு வித்யாஷ்ரம் பள்ளியைத் தாண்டித்தான் செல்ல வேண்டும்..! வருகிற 11-ம் தேதியன்று அங்கு கால் வருடப் பரீட்சை! ஆயிரக்கணக்கில் பந்தல் அமைப்பாளர்களும் பொதுப் பணித்துறை அதிகாரிகளும் அரசியல்வாதிகளும் போலீஸும் அந்தப் பகுதியைச் சூழ்ந்துவிட்டதால் கடந்த ஒன்றாம் தேதி முதல் செயல்பட முடியாமல் விடுமுறையில்தான் உள்ளது பள்ளி..!  பாடங்களைச் சரிவர நடத்தி முடிக்காததால் பரீட்சை எப்படி எழுதப் போகிறோம் என்று புரியாமல் தவித்தபடி உள்ளனர் குழந்தைகள்..!

வி.ஐ.பி.க்கள் உட்காரும் இடம் என தேர்ந்தெடுக்கப்பட்ட பகுதியில் இடைஞ்சலாக இருந்ததால் கிட்டத்தட்ட நாற்பது மரங்கள் வெட்டி வீழ்த்தப்பட்டன!   தனது வளர்ப்பு மகன் திருமணத்துக்கு வரும் வெளி மாநில வி.ஐ.பி.க்கள் எந்த சிரமும் இன்றி, குழப்பம் இன்றித் தங்களுக்கு ஒதுக்கப்பட்டுள்ள இடத்தில் சென்று அமர வேண்டும் என்பது முதல்வரின் விருப்பம்..!  இந்தப் பிரச்னையை அழகாகத் தீர்த்து வைக்க முன் வந்தது கல்வித் துறை..! 

தமிழகத்தின் முக்கியமான சில கல்லூரிகளுக்கு அவசரச் செய்தி சென்றது! ஒவ்வொரு கல்லூரியும் தங்களிடம் பயிலும் மிக அழகான பத்து மாணவிகளைத் தேர்ந்தெடுத்து சென்னைக்கு முன் கூட்டியே அனுப்பி வைக்க இருக்கின்றன..!  மணமகன் வீட்டுச் செலவிலேயே விலை உயர்ந்த பட்டுச் சேலை ஜாக்கெட் தைத்து அளிக்கிறார்கள்! இந்த மாணவிகள்தான் வரவேற்பு கமிட்டி! புன்னகைத்த முகத்துடன் வி.ஐ.பி-க்களை வரவேற்று அழைத்துச் சென்று அவரவர் இடங்களில் அமர்த்த வேண்டும்! திருமணம் முடிந்த பிறகு தலைக்குப் பத்தாயிரம் ரூபாய் இந்த மாணவிகளுக்கு அளிக்கப்படும் என்றும் கல்வித்துறை அதிகாரிகள் சொல்கிறார்கள்..!  

ஆறு மற்றும் ஏழாம் தேதிகளில் சென்னை நகரின் பியூட்டி பார்லர்கள் (அழகு நிலையங்கள்) பெரும்பாலும் புக்’ செய்யப்பட்டுவிட்டன. சசிகலா குடும்பத்துப் பெண்களின் விசேஷ அலங்காரத்துக்காக..?  

தனது திருமண நிகழ்ச்சி பற்றி அநாவசியமான விமரிசனங்கள் பத்திரிகைகளில் வருவதை வளர்ப்பு மகன் சுதாகர் விரும்பவில்லையாம். இதனால் திருமணத்துக்கு நிருபர்கள் வர அனுமதியில்லை! பத்திரிகை புகைப்படக்காரர்களுக்கு நிச்சயம் அனுமதியில்லை! ஆளுங்கட்சிக்கு வேண்டிய மிகச் சில பத்திர்கை ஆசிரியர்கள் மற்றும் சில நிருபர்கள் மட்டும் அனுமதிக்கப்படுவார்கள் எனத் தெரிகிறது!  

என்.டி.ஆர்., தேவகௌடா, லல்லு பிரசாத் யாதவ், பைரான்சிங் ஷெகாவத், பிஜுபட்நாயக் ஆகியோர் முதல்வர் எதிர்பார்க்கும் முக்கிய அரசியல் வி.ஐ.பி-க்கள்!  இத்தனை திருமண ஆர்ப்பாட்டங்களுக்கும் இடையில் மிகுந்த கவலையுடன் இருப்பவர்கள் மூன்று அமைச்சர்கள்! கண்ணப்பன், எஸ்.டி.எஸ் மற்றும் செங்கோட்டையன் ஆகிய மூவர்தான் இவர்கள்!  

‘அன்பளிப்புகளைத் தவிர்க்கவும்’ என்று திருமண அழைப்பிதழில் அச்சிட்டிருந்தாலும் அதற்கு நேர் எதிரான ‘பாலிஸி’தான் கடைப்பிடிக்கப்படுகிறது. திருமணத்துக்குத் தேதி குறிக்கப்பட்ட தினத்திலிருந்தே பணமாகவும், பொருளாகவும் வசூல் தொடங்கிவிட்டது அனைவரும் அறிந்த சேதி!  ஆனால், திருமணத்தன்று வருகிற கட்சி முக்கியஸ்தர்களிடமும் தொழிலதிபர்களிடமும் கண்டிப்புடன் திருமணப் பரிசுகளை வாங்க வேண்டியது மேற்சொன்ன மூன்று அமைச்சர்களின் பணிதான்..! 

பரிசுப் பொருட்கள் மற்றும் செக், டிராஃப்ட், சூட்கேஸ் எதுவானாலும் திருமண வளாகத்துக்குக் கொண்டு வரக் கூடாது என்பது முன்கூட்டியே சொல்லப்பட்டுவிட்டது! அதை இந்த மூன்று அமைச்சர்களின் வீடுகளுக்கே கொண்டு சென்று கொடுத்துவிட வேண்டும்..! லட்சம், கோடி எல்லாம் சாதாரணமாக ‘டீல்’ செய்யும் இந்த அமைச்சர்களே மிரண்டுபோயிருக்கிறார்களாம்.  பரிசுப் பொருட்களைப் பெற்று, சரியாக கணக்கு சொல்லி அவற்றைப் பத்திரமாக ஒப்படைக்கும்வரை இவர்களுக்கு நிம்மதி கிடையாது! பல கோடி செலவு செய்து நடக்கும் இந்தத் திருமணத்துக்கு என்னென்ன பரிசுப் பொருட்கள் வரப்போகிறது என்று மத்திய அரசு அதிகாரிகளும் தீவிரமாகக் கண்காணித்துக் கொண்டிருப்பதுதான் அமைச்சர்களின் கவலைக்கு முக்கிய காரணம்..!

  

இத்தனைக்கும் மத்தியில் தேர்ந்த ஜோதிடர்கள் சொன்ன ஒரு கருத்து திரும்பத் திரும்ப நினைவுக்கு வந்து சம்பந்தப்பட்டவர்களை வாட்டுகிறது! ஜோதிடர்கள் சொன்னது -“திருமணத்துக்குக் குறித்த தேதி சரியில்லை! செப்டம்பர் ஏழாம் தேதி சனி- செவ்வாயைப் பார்க்கிறான். அதுவும் வக்கிரப் பார்வை! பெரும் தீவிபத்துகளும் ரயில் விபத்துகளும் நடந்தது இந்தக் கிரக நிலையில்தான்!”  

இன்னொரு பக்கம், இந்தியாவிலேயே இதுவரை நடக்காத இந்தப் பிரமாண்ட திருமணத்தல் மணமகளுக்குத் திருஷ்டிபடுமோ என்ற கவலையும் இருக்கிறது. திருமணம் முடிந்த கையோடு, அந்தப் பகுதியில் ஏதாவது பந்தலை வலியக் கொளுத்தி திருஷ்டி கழிக்கலாமா எனவும் யோசிக்கப்படுகிறது!  

படங்கள்: சு.குமரேசன்  

நன்றி : விகடன்.காம்

Tweet

சொத்துக் குவிப்பு வழக்கு - குன்ஹா தீர்ப்பு விவரம் - 3

11-10-2014

என் இனிய வலைத்தமிழ் மக்களே..!

வருமானத்துக்கு அதிகமாகச் சேர்த்த சொத்துகள் மட்டுமல்ல, வருமானத்துக்கு அதிகமாக செய்த செலவுகளும்தான் ஜெயலலிதாவை இன்று சிறைக்குள் அடைத்துள்ளது. பெங்களூரு சொத்துக் குவிப்பு வழக்கில், வருமானத்துக்கு அதிகமாக செய்த செலவுகளுக்கு அடிப்படை உதாரணமாகத் திகழ்கிறது ஜெயலலிதாவின் அன்றைய வளர்ப்பு மகன் சுதாகரனின் திருமண அத்தியாயம்.

ரசீதுகள், வருமான வரி அலுவலகத்தில் தாக்கல் செய்யப்பட்ட கணக்குகள், சாட்சிகள், பொதுப்பணித் துறை அதிகாரிகளின் மதிப்பீடுகள் என சுதாகரனின் ஆடம்பரத் திருமணத்தை ஜெயலலிதா நடத்தியவிதத்துக்கு எதிராக ஏகப்பட்ட ஆதாரங்களைத் தாக்கல் செய்தது லஞ்ச ஒழிப்புத் துறை. ஆனால், அவற்றை இல்லை என்று மறுப்பதற்கு ஜெயலலிதா தரப்பிடம் எதுவும் இல்லை. அதை நீதிபதி குன்ஹா தன்னுடைய தீர்ப்பில் விவரித்துள்ள விதம் இதுதான்...!

திருமணச் செலவு விவரம்..!

''ஜெயலலிதாவின் வளர்ப்பு மகன் சுதாகரனுக்கும் நடிகர் சிவாஜி கணேசனின் மகள் (சாந்தி) வயிற்றுப் பேத்தி சத்தியலட்சுமிக்கும் ஜூலை 7, 1995 அன்று திருமணம் நடைபெற்றது. அதில் பந்தல்கள் அமைப்பதற்கு 5 கோடியே 21 லட்சத்து 23 ஆயிரத்து 532 ரூபாயும் உணவு, தண்ணீர், தாம்பூலம் கொடுத்த செலவு 1 கோடியே 14 லட்சத்து 96 ஆயிரத்து 125 ரூபாயும் நான்கு லட்சம் ரூபாய்க்கு வெள்ளித் தட்டுகளும் அழைப்பிதழ்களைத் தபாலில் அனுப்பிய வகையில் 2 லட்சத்து 24 ஆயிரம் ரூபாயும் செலவாகியுள்ளது. இந்தத் திருமணத்துக்காகச் செய்யப்பட்ட அனைத்து செலவுகளையும் அரசுத் தரப்பு, ஆறுமுகம், தங்கராஜன், ரமேஷ், வின்சென்ட், பிரேம்குமார், சலபதி ராவ், மகாலிங்கம், ஸ்ரீநிவாசன், ஏ.ஜி.கிருஷ்ணமூர்த்தி, கே.பி.முத்துச்சாமி, இசையமைப்பாளர் ஏ.ஆர்.ரஹ்மான், ஏ.செல்வராஜ், கே.என்.தியாகராஜ சுவாமி, ராஜசேகரன், ஐ.ஏ.எஸ் அதிகாரி எஸ்.எஸ்.ஜவஹர், டி.கிருஷ்ணராவ், என்.நல்லம்மா நாயுடு ஆகிய சாட்சிகளைக்கொண்டு நிரூபித்துள்ளது.''

பந்தலோ பந்தல்..!

''அரசுத் தரப்பின் 181-வது சாட்சி தங்கராஜன். பொதுப்பணித் துறை உதவிப் பொறியாளரான இவர்தான், சுதாகரன் திருமணச் செலவுகளை மதிப்பிட்டவர். திருமணத்துக்குப் பந்தல் அமைத்த ஆர்க்கிடெக்ட் விஜயசங்கர், ஆர்ட் டைரக்டர் தோட்டா தரணி, கோபிநாத், தோட்டா தரணியின் உதவியாளர்கள் ரமேஷ், சீனிவாசன், மின்விளக்கு அலங்காரம் செய்த எலெக்ட்ரீசியன் பி.எஸ்.மணி, சையத் முகமத் ஆகியோரைச் சந்தித்து ஆதாரங்களைத் திரட்டி இந்த மதிப்பீட்டைச் செய்துள்ளனர். திருமணம் நடைபெற்றபோது, பொருள்களின் விலை சந்தை மதிப்பில் என்ன இருந்ததோ, அந்த விலையை வைத்தே கணக்கிட்டு உள்ளனர். அதன்படி, சுதாகரன் திருமணச் செலவாக இவர்கள் கணக்கிட்ட தொகை ரூ.5 கோடியே 91 லட்சம்..!

திருமண வரவேற்புக்காக எம்.ஆர்.சி நகரில் 2 லட்சத்து 35 ஆயிரத்து 200 சதுர அடியில் பந்தல் போடப்பட்டு, அதன் இரண்டு பக்கமும் தென்னை ஓலைகளால் ஆன தட்டிகள் வேயப்பட்டு இருந்தன. அதன் செலவு மதிப்பீடு 18 லட்சத்து 81 ஆயிரத்து 600 ரூபாய். உணவு பரிமாறிய இடத்தில் 2 லட்சத்து 16 ஆயிரம் சதுர அடியில் அமைக்கப்பட்டு இருந்த பந்தலின் மதிப்பீட்டு¢த் தொகை ரூ.17 லட்சத்து 28 ஆயிரம்.

வி.ஐ.பி-க்கள் சாப்பிடுவதற்கு தகரத்தில் அமைக்கப்பட்ட பந்தல் 24,000 சதுர அடி. அதன் செலவு மதிப்பீடு 3 லட்சத்து 84 ஆயிரம் ரூபாய். முகப்புப் பந்தல் மற்றும் அதில் இருந்த வேலைப்பாடுகள் 1 லட்சத்து 57,000 சதுர அடி. வண்ணக் காகிதங்களால் செய்யப்பட்டு இருந்த வேலைப்பாடுகளின் செலவு மதிப்பீடு 66 லட்சத்து 35 ஆயிரம் ரூபாய். இரும்பு, செங்கல் பயன்படுத்தி அமைக்கப்பட்ட மணமேடை, மணமக்கள் ஓய்வறை, வரவேற்பு அறைகள், கழிப்பறைகளின் மதிப்பு 35 லட்சத்து 22 ஆயிரம் ரூபாய். ஏ.சி-களின் செலவு மதிப்பீடு 3 லட்சம் ரூபாய்.

2,500 வி.ஐ.பி நாற்காலிகளுக்குச் செலவான தொகை ஒரு லட்சத்து 25 ஆயிரம் ரூபாய். 10,000 சாதாரண நாற்காலிகளுக்குச் செலவு 1 லட்சத்து 50 ஆயிரம் ரூபாய். சாப்பாட்டு அறையில் 12,800 சேர்கள் போடப்பட்டு இருந்தன. அதன் செலவு மதிப்பீடு ஒரு லட்சத்து 28 ஆயிரம் ரூபாய். 4,800 சமையல் மேசைகள் போடப்பட்டு இருந்தன. அதன் செலவு மதிப்பீடு 48,000 ரூபாய். வி.ஐ.பி சமையல் மேசைகளுக்கான செலவு 2 லட்சத்து 72 ஆயிரத்து 880 ரூபாய். மேலும் ஏழு லட்சத்து 28 ஆயிரத்து 527 ரூபாய் சாலைகளில் செய்யப்பட்டு இருந்த அலங்காரங்களுக்குச் செலவான தொகை என்று மதிப்பிட்டு உள்ளனர். இதுபோக, மூன்று வேளை உணவு, குடிநீர், பட்டாசுகள், டோங்கா நடனம், யானை, குதிரை வண்டிகள், வீடியோ, இசை நிகழ்ச்சி, பரத நாட்டியம் என்ற வகையில் செலவான தொகை என மொத்தமாக ரூ.5 கோடியே 91 லட்சத்தை மதிப்பிட்டு உள்ளனர். இவர்களின் இந்த மதிப்பீடு தொடர்பாக நீண்ட குறுக்கு விசாரணை நடத்தப்பட்டு 80 பக்கங்களில் அது பதிவும் செய்யப்பட்டுள்ளது.''

பந்தல் அமைக்கச் சொன்னது சசிகலா..!

''அரசுத் தரப்பின் இந்தச் சாட்சிகளை எதிர்த்து வாதிட்ட ஜெயலலிதா தரப்பு வழக்கறிஞர் பி.குமார், ''சுதாகரனின் திருமணம் நடைபெற்று இரண்டரை ஆண்டுகள் கழித்து தயாரிக்கப்பட்ட இந்த மதிப்பீடுகள் ஏற்றுக்கொள்ளத் தக்கவை அல்ல. அதை மதிப்பீடு செய்துள்ள இந்தச் சாட்சிகள் சுதாகரனின் திருமணத்தை நேரில் பார்க்காதவர்கள். அங்கு அமைக்கப்பட்டு இருந்த வேலைப்பாடுகள், பந்தல்கள் பற்றி இவர்களுக்கு என்ன புரிதல் இருக்க முடியும்? எனவே, இந்தச் சாட்சிகளை ஏற்றுக் கொள்ளக்கூடாது’ என்று வாதிட்டார்.

மூத்த வழக்கறிஞர் பி.குமாரின் வாதம் நியாயமானது. அதே சமயம் அரசுத் தரப்புச் சாட்சி உதவிப் பொறியாளர் தங்கராஜ், எப்படி இந்த மதிப்பீட்டுக்கு வந்தார் என்பதைக் கவனமாகப் பார்க்க வேண்டும்.

அரசுத் தரப்பு சாட்சியாகப் பொதுப்பணித் துறையின் மூத்த இன்ஜினீயர் முத்துச்சாமி விசாரிக்கப்பட்டார். இவர்,  அரசு நிகழ்ச்சிகளில் பந்தல் அமைக்கும் பணிகளை மேற்பார்வை செய்பவர். முதலமைச்சர் ஜெயலலிதாவின் உதவிச் செயலாளராக இருந்த ஐ.ஏ.ஏஸ் அதிகாரி ஜவஹர் பாபு, முத்துச்சாமியைத் தொலைபேசியில் அழைத்து, ''முதலமைச்சர் வீட்டில் நடைபெற உள்ள திருமணம் குறித்து உங்களிடம் பேச வேண்டும். எனவே, போயஸ் கார்டன் வீட்டுக்கு வாருங்கள்'' என்று கூறி உள்ளார். அதன்படி முத்துச்சாமி மறுநாள் ஜவஹர் பாபுவை சந்தித்து, சசிகலாவிடம் அறிமுகமாகியுள்ளார். இதையடுத்து சசிகலா, அவரிடம் 'சுதாகரன் திருமணத்துக்கான பந்தல் அமைக்கும் வேலைகளை எல்லாம் நீங்கள் கவனித்துக் கொள்ளுங்கள்’ என்று கூறியுள்ளார்.

முத்துச்சாமியின் சாட்சிப்படி, பந்தல்கள் அமைப்பதற்கு விஜய சங்கர் வரைபடம் தயாரித்துக் கொடுத்துள்ளார். அதன்படி, அந்தப் பந்தல்களை அமைப்பதற்கான இடம், மட்டம் ஆகியவற்றை மட்டும் முத்துச்சாமி குறித்துக் கொடுத்துள்ளார்.''

ஜெயலலிதா மேற்பார்வை செய்தார்..!

''இதையடுத்து எம்.ஆர்.சி நகரில், ஐந்து முக்கிய பந்தல்கள் 70x50 அடியில் போடப்பட்டு உள்ளன. தூத்துக்குடி ராஜப்ப நாடார் அதை செய்து கொடுத்துள்ளார். 8 தென்னை ஓலைகளால் வேயப்பட்ட பந்தல்கள் 60ஜ்450 அடியில் அமைக்கப்பட்டு உள்ளன. வி.ஐ.பி-களுக்கான உணவுப் பந்தலை 60x200 அடியில் மன்னார்குடி ராஜகோபால் என்பவர் அமைத்துக் கொடுத்துள்ளார். சமையலறை பந்தல்கள்

45x1,356 அடியில் குமரேசன் நாடார் என்பவர் அமைத்துக் கொடுத்துள்ளார். திருமண மேடை, மணமக்கள் ஏ.சி-கள், அவர்களுக்கான ஓய்வறைகள், கழிப்பறைகள் போன்றவற்றை எத்திராஜ் அமைத்துக் கொடுத்துள்ளார். இதற்கான செலவுகள் அனைத்தும் ஜெயலலிதாவின் குடும்பம் ஏற்றுக்கொண்டதாக கூறி உள்ளார். வி.ஐ.பி-களுக்கான அமரும் இடம், அதில் உள்ள வேலைப்பாடுகள், அவர்களின் உணவறைகள் போன்றவற்றை ஆர்ட் டைரக்டர் கோபிநாத் செய்து கொடுத்துள்ளார். தண்ணீர் வசதிக்காக 5 போர்வெல்களை பால்தாசன் என்பவர் போட்டுக் கொடுத்துள்ளார். அதுபோக, லாரிகள் மூலமாகவும் தண்ணீர் சப்ளை நடந்துள்ளது. சி.எஸ்.சந்திரசேகரன் என்பவர் மின் இணைப்பு கொடுத்துள்ளார். இதற்காக 2-10 கே.டபிள்யூ ஜெனரேட்டர்களையும் 4 மொபைல் ஜெனரேட்டர்களையும் அவர் பயன்படுத்தி உள்ளார். இந்த வேலைகள் நடந்து கொண்டிருந்தபோது, 'ஜெயலலிதாவும் சசிகலாவும் அவற்றை மேற்பார்வையிட்டனர்’ என்றும் முத்துச்சாமி சாட்சியம் அளித்துள்ளார்.''

ஜெயலலிதா செக் கொடுத்தார்..!

மணமகளின் தந்தை நாராயணசாமி இவர்களுக்குக் கொடுத்த தொகை போக மீதித் தொகை அனைத்தையும் ஜெயலலிதா கொடுத்துள்ளார். அதுவும் தன்னுடைய பெயரில் செக் கொடுத்துள்ளார். அவை அனைத்தும் வங்கியில் இருந்து பெறப்பட்ட ஆதாரங்களின் மூலம் நிரூபிக்கப்பட்டு உள்ளன. பால்பாபு என்ற வட இந்திய அலங்கார நிபுணருக்கு போயஸ் கார்டனில் இருந்து, 1 லட்சத்து 50 ஆயிரம் ரூபாய் செக் கொடுக்கப்பட்டு உள்ளது. அடையாறு விநாயகர் கோயிலில் இருந்து எம்.ஆர்.சி நகர் வரையிலான பாதையை செப்பனிட்டு இரண்டு பக்கமும் விளக்குகளால் அலங்காரம் செய்த சுப்பிரமணி மற்றும் சாமி ஆகியோருக்கு ஜெயலலிதா தன்னுடைய பெயரில் செக் கொடுத்துள்ளார்.

இப்படி... பந்தல் தொடங்கி, சுதாகரன் திருமணத்தில் நடைபெற்ற அனைத்து வேலைகளையும் மேற்பார்வை பார்த்த முத்துச்சாமியிடம் விசாரித்துத்தான் பொறியாளர் தங்கராஜ், பந்தலுக்கான செலவு மற்றும் இதர விஷயங்களை மதிப்பிட்டுள்ளார். அதுவும், திருமணம் நடந்த 1995-ம் ஆண்டில் அந்தப் பொருள்கள் சந்தையில் என்ன விலைக்கு விற்றதோ அந்த விலையிலேயே மதிப்பிட்டுள்ளார்.

65 ஆயிரம் அழைப்பிதழ்கள்...

மௌலிஸ் அட்வர்டைசிங் நிறுவனத்தின் நிர்வாக இயக்குநர் ரமேஷ். இவரையும் ஐ.ஏ.எஸ் அதிகாரி ஜவஹர் பாபு தொலைபேசியில் தொடர்புகொண்டு, முதலமைச்சர் வீட்டுத் திருமணத்துக்கான அழைப்பிதழை வடிவமைத்து அச்சடிக்க வேண்டும் என்று கூறியுள்ளார். இதையடுத்து ரமேஷ், தன்னுடைய நிறுவனத்தில் வடிவமைத்து அழைப்பிதழ்களை ஜெயலலிதா வீட்டில் காண்பித்து, ஒப்புதல் பெற்று, அதன்பிறகு 65 ஆயிரம் அழைப்பிதழ்கள் தமிழ், ஆங்கிலம் என இரண்டு மொழிகளில் அச்சடித்துக் கொடுத்துள்ளார். அந்த அழைப்பிதழ் நீதிமன்றத்தில் சமர்பிக்கப்பட்டுள்ளது. அதோடு 5,000 வாகன அனுமதி அட்டைகளும் அச்சடித்துக் கொடுத்துள்ளார். இதற்கு 11 லட்சம் ரூபாயை ஜெயலலிதா செக் மூலம் கொடுத்துள்ளார். இது சந்தேகத்துக்கு இடமின்றி நிரூபணமாகி உள்ளது.

மற்றொரு சாட்சி டிராவல்ஸ் நிறுவனம் நடத்தும் வின்சென்ட். சுதாகரனின் திருமணத்துக்காக விருந்தினர்களை அழைத்து வர கார்களை அனுப்பியவர். 1995 செப்டம்பர் 5-ம் தேதி முதல் 13-ம் தேதி வரைக்கும், இவர் 10 கார்களை அனுப்பி உள்ளார். அதற்காக இவர் பெற்ற தொகை ரூ.27 ஆயிரம். அதற்குக் கொடுக்கப்பட்ட செக்கில் ஜெயலலிதாதான் கையெழுத்திட்டு கொடுத்துள்ளார்.''

இன்னும் பணம் பாக்கி வைத்துள்ளார்கள்!

''பந்தல் அமைக்கும் சலபதியின் சாட்சிப்படி, மக்கள் தொடர்பு அதிகாரியாக இருந்த சச்சிதானந்தம், தன்னிடம் நேரில் வந்து முதலமைச்சரின் வளர்ப்பு மகன் திருமணத்துக்கு மேசை நாற்காலிகள் வேண்டும் என்று கேட்டு அதற்காக முன்பணமாக ஒரு லட்சத்து 30 ஆயிரம் ரூபாய்க்கான செக் கொடுத்தார். மேஜை நாற்காலிகளை எம்.ஜி.ஆர் பிலிம் சிட்டியில் அமைக்கப்பட்டுள்ள பந்தல்களில் வைக்குமாறு சொன்னார். அதை நான் செய்தேன் என்று குறிப்பிட்டுள்ளார். இவரைத் தொடர்புகொண்ட அடையாறு பார்க் ஷெரட்டன் ஹோட்டல் மேனேஜர் நவீன்,  சுதாகரன் திருமணத்துக்கான அலங்கார வேலைகளுக்குத் தேவையான பொருள்கள் மற்றும் துணிகளைக் கொடுக்கும்படி கேட்டதாகவும், அதற்கு ஜெயலலிதா பெயரில் 57 ஆயிரத்து 250 ரூபாய்க்கு செக் கொடுத்தார் என்றும் குறிப்பிட்டுள்ளார். இதுவும் வங்கி ஆவணங்களின் மூலம் தெளிவாக நிரூபிக்கப்பட்டு உள்ளது. இதில் வேடிக்கை என்னவென்றால், இந்த வழக்கு தொடரப்படும் வரை இன்னும் இவருக்கு 2 லட்சத்து 66 ஆயிரம் ரூபாய் பாக்கி வைத்துள்ளனர் என்பதையும் இந்தச் சாட்சி பதிவு செய்துள்ளார். இந்தச் சாட்சிகளின் மூலம் அழைப்பிதழ்கள் எத்தனை அச்சடிக்கப்பட்டன, எத்தனை நாற்காலிகள் போடப்பட்டன என்பது தெளிவாக நிரூபணமாகிறது. இதன்மூலம் அதற்கான செலவுகள் மதிப்பிடப்பட்டு உள்ளன'' என்று நீதிபதி கூறியுள்ளார்.

விளம்பரங்களும் வாகனங்களும், ஆடிட்டர் மூலம் சிக்கிய ஆணித்தரமான ஆதாரங்கள்... இதற்கு ஜெயலலிதா அளித்த விளக்கம் அடுத்த இதழில்!

நன்றி : ஜூனியர்விகடன்

Tweet

ஜெயலலிதா சொத்துக் குவிப்பு வழக்கு-குன்ஹா தீர்ப்பு முழு விவரம்-2

10-09-2014

என் இனிய வலைத்தமிழ் மக்களே..!

ஜெயலலிதாவின் சொத்துக் குவிப்பு வழக்கில் நீதிபதி ஜான் மைக்கேல் டி.குன்ஹா அளித்த தீர்ப்பின் சில பகுதிகளை 'ஜூனியர் விகடன்' இதழ் தமிழாக்கம் செய்து பதிவு செய்து வருகிறது. அதன்  இரண்டாம் பாகம் இது :

'ஜெயலலிதாவுக்குத் தெரியாமல் இவை எல்லாம் நடந்ததா?''

ஜெயலலிதாவின் முழுமையான கவனத்துக்கு உட்பட்டு, அவரது விருப்பப்படியே, அவருக்காக சசிகலா, சுதாகரன், இளவரசி ஆகியோர் தவறான வழிகளில் பணம் மற்றும் சொத்துகளை வாங்கினர் என்பதைத் தன்னுடைய தீர்ப்பில் குன்ஹா நிறுவி உள்ளார். அதனைப் பார்ப்போம்:

"1996-ம் ஆண்டு இறுதியில் ஜெயலலிதா, சசிகலா, சுதாகரன், இளவரசி ஆகியோரிடம் இருந்த சொத்துகளின் கையிருப்பு மதிப்பு  55 கோடியே 2 லட்சத்து, 48 ஆயிரத்து 215 ரூபாய். அந்தக் காலகட்டத்தில் இவர்கள்  8 கோடியே 49 லட்சத்து 6 ஆயிரத்து 833 ரூபாய் செலவு செய்துள்ளார்கள். ஆக, மொத்தம் 63 கோடியே 51 லட்சத்து 55 ஆயிரத்து 48 ரூபாய். இவர்களால் வரவுக் கணக்கு காட்டப்பட்டவை  9 கோடியே 91 லட்சத்து 5 ஆயிரத்து 94 ரூபாய் மட்டுமே. இதன்படி பார்த்தால்  கணக்குக் காட்டமுடியாதவை 53 கோடியே 60 லட்சத்து 49 ஆயிரத்து 954 ரூபாய் என்ற முடிவுக்கு நீதிமன்றம் வருகிறது...!"

"நடராஜன் மூலமாக சொத்துகள் வரவில்லை!"

கணக்கில் காட்ட முடியாத இந்தத் தொகையை ஜெயலலிதாவும் மற்றவர்களும் தங்களின் பூர்வீகச் சொத்தாக காட்ட முடியாது. ஏனென்றால், ஜெயலலிதா 1991-ம் ஆண்டுக்கு முன்பு தன்னுடைய சொத்துகளாக அதிகாரப்பூர்வமாகக் காட்டியுள்ள தொகை இரண்டு கோடிகள்தான்.  இதை அரசுத் தரப்பு மிகத் தெளிவாக நிரூபித்துள்ளது. சசிகலாவும், இளவரசியும் நீதிமன்றத்தில் தாக்கல் செய்த ஆவணங்களே அதற்குப் போதுமானவையாக உள்ளன. 

அரசுத் தரப்பு சாட்சி ஆர்.கிருஷ்ணமூர்த்தியின் வாக்குமூலம் மற்றும் ஆவணங்களின்படி, சசிகலாவின் வருவாய் ஆதாரம் அவருடைய கணவர் நடராஜன் மட்டும்தான். நடராஜன் அரசுப் பணியில் இருந்தவர். அவர் மக்கள் தொடர்பு அதிகாரியாக இருந்தபோது மோட்டார் சைக்கிள் வாங்குவதற்கான முன் பணமாக 3 ஆயிரம் ரூபாய் பெற்றுள்ளார். அதன் பிறகு 1987-ம் ஆண்டு அரசாங்கத்தில் வாங்கிய லோன் மூலமாக ஒரு வீட்டை வாங்கி உள்ளார். அதற்குத் தெளிவான ஆவணங்கள் உள்ளன. அவற்றின்படி நடராஜன் சசிகலா தம்பதியரின் சொத்து மதிப்பு அவ்வளவுதான். அதன்பிறகு 1988-ம் ஆண்டில் அவர் தன்னுடைய வேலையை ராஜினாமா செய்துவிட்டார். இதன்மூலம் கணவர் நடராஜனின் வகையில் சசிகலாவுக்கு மிகப் பெரிய சொத்துகள் எதுவும் வந்து சேரவில்லை என்பது ஊர்ஜிதமாகிறது.

170-வது அரசுத் தரப்பு சாட்சி கிராம நிர்வாக அதிகாரி ஜெயராமனின்  வாக்குமூலத்தின்படி சாமிநாதன் மன்னையார் மற்றும் அவருடைய இளைய சகோதரர் பழனிவேல் ஆகியோருக்குச் சொந்தமாக இருபத்து நான்கரை ஏக்கர் நிலம் மட்டும் இருந்தது நிரூபிக்கப்பட்டு உள்ளது. சாமிநாதன் மன்னையாரின் மகன்தான் சசிகலாவின் கணவர் நடராஜன். அதுபோக சாமிநாதன் மன்னையாரின் மனைவியும் நடராஜனின் தாயாருமான லீலாவதி பெயரில் மூன்றரை ஏக்கர் நிலம் இருந்ததும் அதற்கான ஆவணங்களும் சமர்ப்பிக்கப்பட்டுள்ளன. ஆக, மொத்தமாக நடராஜனுக்குக் கட்டிய வீடு, நிலம் என்ற வகையில் சிறிய பகுதி நிலங்கள்தான் இருந்தன. இதன் மூலம் சசிகலாவின் கணவரின் பூர்வீகத்தில் இருந்தும் பெரிதாக எந்தச் சொத்துகளும் வரவில்லை. இதை சசிகலா தரப்பு நீதிமன்றத்தில் மறுக்கவில்லை.

"போயஸ் கார்டனுக்கு வந்த பிறகே சசிகலா வருமானவரி செலுத்தினார்...!"

சசிகலாவுக்கு அவருடைய தந்தை வழியில் ஏதாவது சொத்துகள் வந்திருக்க வாய்ப்பிருக்கிறதா என்று பார்த்தால் அதுவும் இல்லை. விவேகானந்தன் பிள்ளை என்பவர்தான் சசிகலாவின் தந்தை. அவர் திருத்துறைப்பூண்டி மற்றும் வேதாரண்யத்தில் நாட்டு மருந்துக்கடை நடத்தி, குடும்பத்தைக் காப்பாற்றி வந்துள்ளார். அதற்கான ஆவணங்கள் மற்றும் ஆதாரங்கள் நீதிமன்றத்தில் அரசுத் தரப்பால் சமர்ப்பிக்கப்பட்டுள்ளன. 

விவேகானந்தன் பிள்ளைக்கு அவருடைய தந்தை வழி சொத்தாக இருந்த 81 சென்ட் நிலத்துக்குப் 10-க்கும் மேற்பட்ட பங்காளிகள் உரிமை உடையவர்களாக இருக்கிறார்கள். அதனால், அந்த 81 சென்ட் நிலம் முழுமையாக விவேகானந்தன் பிள்ளைக்குச் சொந்தமானது.இல்லை என்பதும் நிரூபணமாகி உள்ளது. விவேகானந்தனுக்கு சசிகலா தவிர, வனிதா என்ற மகளும் ஆறு மகன்களும் வாரிசுகள். ஆக, சசிகலாவுக்கு அவருடைய பூர்வீகச் சொத்துகள் பெரிதாக எதுவும் இல்லை.

இந்த இடத்தில் மிக முக்கியமாக கவனிக்க வேண்டிய விஷயம் என்னவென்றால், ஜெயலலிதாவுடன் சேர்ந்து போயஸ் கார்டனில் நிரந்தரமாகத் தங்க ஆரம்பித்த பிறகுதான் அவர் வருமானவரி கணக்கே தாக்கல் செய்ய ஆரம்பித்துள்ளார்.

"சுதாகரனுக்கு ஆண்டு வருமானம் ரூ.44 ஆயிரமே...!"

அரசுத் தரப்பு சாட்சி பாலகிருஷ்ணனின் வாக்குமூலத்தின்படி சுதாகரனின் ஆரம்ப காலகட்ட சொத்து மதிப்பு தெரிய வருகிறது. சுதாகரன் தமிழ்நாடு வீட்டு வசதி வாரியத்தில் வீடு வாங்குவதற்காக விண்ணப்பித்தபோது, அவர் தன்னுடைய வருமானச் சான்றிதழை இணைத்துள்ளார். கிண்டி தாலுகா எல்லைக்குட்பட்டு மாம்பலம் தாசில்தார் அளித்த வருமானச் சான்றிதழ் அது. அதில் சுதாகரனின் வருமானம் ஒரு வருடத்துக்கு 44 ஆயிரம் ரூபாய் மட்டுமே. 1992-ம் ஆண்டு வரையிலும் சுதாகரனின் நிலை இதுதான். அரசுத் தரப்பு வைத்துள்ள இந்த வாதங்களை மறுத்து, தனக்கு வேறு வருமானங்கள் இருந்தன என்று சுதாகரனால் நீதிமன்றத்தின் முன் நிரூபிக்க முடியவில்லை. அதன் பிறகுதான் சுதாகரனின் சொத்துகளின் மதிப்பு கற்பனை செய்ய முடியாத அளவுக்கு உயர்ந்துள்ளது. அது எப்படி, எந்த வழியில் வந்தது என்று அவரால் எந்தக் கணக்கையும் காட்ட முடியவில்லை.

"இளவரசிக்கு ஆரம்பத்தில் சொத்துகள் இல்லை...!"

இளவரசியைப் பொறுத்தவரையில் அவருக்கும் பூர்வீகச் சொத்துகள் இல்லை. அவருடைய கணவர் அரசாங்க வேலையில் இருந்து பிறகு இறந்துவிட்டார். அவர் இறந்த பிறகு, இளவரசிக்கு வந்த அரசாங்கப் பணப் பலன்கள் மட்டும்தான் இளவரசியின் சொத்து. அதோடு வீட்டு வசதி வாரியத்தில் வீடு வாங்குவதற்காக, இளவரசி சமர்ப்பித்த வருமானச் சான்றிதழில் அவருடைய ஆண்டு வருமானமாக 48 ஆயிரம் ரூபாய் மட்டுமே குறிப்பிடப்பட்டு உள்ளது. மற்றபடி, 1996-க்குப் பிறகு இளவரசியின் பெயரில் இருந்த சொத்துகள் அனைத்தும், அவர் ஜெயலலிதாவின் போயஸ் கார்டன் வீட்டில் குடியேறிய பிறகு சம்பாதித்த சொத்துகள்தான். இவற்றை இளவரசியால் மறுக்க முடியவில்லை. இந்த அடிப்படையில், ஜெயலலிதா, சசிகலா, சுதாகரன், இளவரசி ஆகியோருக்குப் பூர்வீகச் சொத்துகள் என்று மிகப் பெரிய சொத்துகள் எதுவும் இல்லை என்பது ஆணித்தரமாக நிரூபிக்கப்பட்டுள்ளது.

"புதிய புதிய நிறுவனங்களை ஆரம்பித்தார்கள்"

மயிலாப்பூரில் உள்ள கனரா வங்கி அதிகாரி அளித்த சாட்சியின்படி சேமிப்பு வங்கிக் கணக்கு எண்-24621 வி.என்.சுதாகரனால் 1992-ம் ஆண்டு தொடங்கப்பட்டது. 105 ரூபாய் செலுத்தி இந்த வங்கிக் கணக்கை சுதாகரன் தொடங்கியபோது, அவர் கொடுத்தது 36, போயஸ் கார்டன் என்ற முகவரிதான். அதன் பிறகான காலகட்டத்தில் இந்த வங்கிக் கணக்கில் பல லட்சக் கணக்கில் பணப் பரிமாற்றம் நடைபெற்றுள்ளது. அதற்கான ஆதாரங்கள் அனைத்தும் தேதிவாரியாக, எண்ணிக்கைவாரியாக வங்கியிடம் இருந்து அரசுத் தரப்பு சேகரித்து நீதிமன்றத்தில் சமர்ப்பித்துள்ளது. 

சுதாகரனின் இந்த அக்கவுன்டுக்கு சசிகலா, வினோத் வீடியோ விஷன், மெட்டல் கிங், ஆஞ்சநேயா பிரின்டர்ஸ் ஆகிய அக்கவுன்ட்களில் இருந்து பணம் வந்ததும், போனதும் நிரூபணமாகியுள்ளது. அப்படி பணம் வருவதற்கும் போவதற்குமான பரிவர்த்தனைகளில் சசிகலாவும் சுதாகரனும் கையெழுத்திட்டுள்ளனர். 

மாவட்டப் பதிவாளர் தங்கவேலு அளித்த சாட்சியம், ஆவணங்களின்படி ஜெ.எஸ். ஹவுசிங் டெவலப்மென்ட், ஜெ.ஜெ. லீசிங், கிரீன் ஃபார்ம் ஹவுஸ், ஜெ. ஃபார்ம் ஹவுஸ், ஜெ. ரியல் எஸ்டேட், ஜெயா கான்ட்ராக்டர்ஸ் அண்டு பில்டர்ஸ், மெட்டல் கிங், மார்பிள் மார்வெல்ஸ் போன்ற நிறுவனங்கள் ஜெயலலிதா பதவியில் இருந்த காலகட்டத்தில் ஜெயலலிதா, சசிகலா, சுதாகரன், இளவரசி ஆகியோரால் தோற்றுவிக்கப்பட்டு உள்ளன. 

ஒவ்வொரு நிறுவனத்திலும் இவர்கள் இரண்டு பேராகவோ அல்லது மூன்று பேராகவோ அல்லது அனைவருமாகவோ பங்குதாரர்களாக இருந்துள்ளனர். மேலும், இந்த நிறுவனங்களைப் பதிவு செய்ய தன்னுடைய மேலதிகாரி எஸ்.அய்யர் தனக்கு உத்தரவிட்டதாகவும் அவருக்கு முதலமைச்சர் தொலைபேசியின் வாயிலாக உத்தரவிட்டதாகவும் மாவட்டப் பதிவாளர் தங்கவேலு தன்னுடைய சாட்சியத்தில் தெரிவித்துள்ளார். ஜெயலலிதா பேசினார் என்பது நிரூபணமாகவில்லை என்றாலும் அவருடைய அலுவலகத் தொலைபேசியில் இருந்து அந்த உத்தரவு வந்துள்ளது நிரூபணமாகி உள்ளது.

சுதாகரன் நடத்திய 'சூப்பர் டூப்பர் டி.வி’ நிறுவனம் தொடங்க இளவரசியும் சுதாகரனும் கையெழுத்திட்ட விண்ணப்பத்தைக் கொடுத்துள்ளனர். அதை வணிகவரித் துறை அதிகாரி கண்ணனின் சாட்சியம் உறுதிப்படுத்தி உள்ளது. அதுபோல, வணிகவரித் துறை அதிகாரி, சுந்தர்ராஜ் அளித்த சாட்சியத்தின்படி, ஆஞ்சநேயா பிரின்டர்ஸ் நிறுவனத்துக்கான விண்ணப்பத்தில் சசிகலாவும் சுதாகரனும் கையெழுத்திட்டு விண்ணப்பித்து உள்ளனர். அதுபோல, மார்பிள்ஸ் மார்வெல்ஸ் நிறுவனத்துக்கான பதிவைப் பெற அளித்த விண்ணப்பத்தில் சசிகலாவும், சுதாகரனும் கையெழுத்துப் போட்டுள்ளனர். இதன் மூலம் இந்த நிறுவனங்களைத் தொடங்கி நடத்தியவர்கள் இவர்கள்தான் என்பது சந்தேகத்துக்கு இடமின்றி உறுதியாகியுள்ளது.

"எந்த நிறுவனமும் செயல்படவில்லை...!"

ஜெயலலிதா, சசிகலா, சுதாகரன், இளவரசி ஆகியோர் ஏற்று நடத்திய நிறுவனங்கள் அனைத்திலும் இவர்கள் யாரும் முதலீடாக எந்தத் தொகையையும் போடவில்லை. பங்குகளை விற்றும் முதலீடுகளைத் திரட்டவில்லை. நிறுவனத்தில் வந்த லாபம் இவர்கள் நால்வரைத் தவிர வேறு எந்தக் கணக்குக்கும் போகவில்லை.  

சசிகலாவுக்கும், இளவரசிக்கும் ஆடிட்டராக இருந்த பாலாஜி அளித்த வாக்குமூலம் மிக மிக முக்கியமானது. அவர் கூற்றுப்படி, இந்த நிறுவனங்கள் எந்தக் காலகட்டத்திலும் எதையும் உற்பத்திச் செய்யவில்லை. பொருள்களை வாங்கி விற்கவும் இல்லை. ஆனால், நிறுவனங்களின் கணக்குகளில் மட்டும் பணப் பரிவர்த்தனைகள் தொடர்ந்து நடந்து கொண்டே இருந்தன என்று குறிப்பிட்டு உள்ளார். இதையடுத்து அந்த நிறுவனங்களின் வங்கிக் கணக்குகள் மற்றும் பணப் பரிவர்த்தனைகள் பற்றிய ஆதாரங்களை அரசுத் தரப்பு நீதிமன்றத்தில் அளித்துள்ளது. 

அப்படிச் சமர்ப்பிக்கப்பட்ட வங்கிப் பரிவர்த்தனை விவரங்களைப் பார்க்கும்போது மலைப்பாகவும் ஆச்சர்யமாகவும் இருக்கிறது. மூலதனமே இல்லாத ரப்பர் ஸ்டாம்ப் நிறுவனங்களும், எந்த வியாபாரத்திலும் ஈடுபடாத நிறுவனங்களும் ஒவ்வொரு முறையும் பல ஆயிரங்களிலும் லட்சங்களிலும் பணப் பரிவர்த்தனை செய்துள்ளன. இப்படி பணத்தைச் சுற்றி வளைத்துப் போட்டு எடுப்பதற்காகவே, 1991-க்கு முன்புவரை 12 வங்கிக் கணக்குகளை மட்டுமே வைத்திருந்த ஜெயலலிதாவும் சசிகலாவும், அதன்பிறகு 52 வங்கிக் கணக்குகளைத் தொடங்கியுள்ளனர்.

"வாங்குபவர் விவரமே இல்லாத பத்திரங்கள்"

வடக்குக் கடற்கரை சப்-ரிஜிஸ்ட்ரார், தோட்டக்கலைத் துறை அதிகாரி ராதாகிருஷ்ணன் ஆகியோர் சாட்சியம் மிக முக்கியமானவை. அவர்கள் அளித்த சாட்சியத்தில், அவர்கள் மேலதிகாரிகளின் உத்தரவுப்படி ஜெயலலிதாவின் போயஸ் கார்டன் வீட்டுக்கு அழைக்கப்பட்டு, விதிமுறைகளைப் பின்பற்றாமல், பத்திரங்களைப் பதிவு செய்துள்ளனர். அவர்கள் பதிவு செய்த நிலங்களின் பத்திரங்கள் அனைத்தும் அடிமாட்டு விலைக்கு, பத்திரப் பதிவு செய்து கொடுத்துள்ளனர். மிகவும் அதிர்ச்சியான விஷயம் என்னவென்றால், அதில் ஆறு பத்திரங்கள் யார் வாங்குகிறார் என்ற விவரம் இல்லாமல், பெயர்கூட குறிப்பிடாமல் பதிவு செய்யப்பட்டு உள்ளன. இப்போது அதை ஒவ்வொன்றாக யாருடைய அனுபவப் பாத்யதையில் இருக்கின்றன என்று பார்த்தால் அவை அனைத்தும் ஜெயலலிதாவுக்காக வாங்கப்பட்டுள்ளன என்பது தெரியவந்துள்ளது.

"போலியான ஆதாரங்கள்...!"

'நமது எம்.ஜி.ஆர்’ வங்கிக் கணக்கில் பல்வேறு தேதிகளில் 423 முறை (ஒவ்வொரு முறையும் பல ஆயிரக்கணக்கில் மற்றும் லட்சங்களில்) வரவு வைக்கப்பட்ட பணத்துக்குக் கணக்கு இல்லை. அதுபோல ஜெயா பப்ளிகேஷன், வினோத் வீடியோ விஷன், மஹாசுப்புலெட்சுமி கல்யாண மண்டபம், ஆஞ்சநேயா பிரின்டர்ஸ் போன்றவற்றில் வரவு வைக்கப்பட்ட பல கோடி ரூபாய்களுக்கு எந்த விளக்கமும் ஜெயலலிதா தரப்பால் சொல்ல முடியவில்லை. 

இது தொடர்பாக ஜெயலலிதா தரப்பு வைத்துள்ள பேலன்ஸ் ஷீட், லாப - நட்டக் கணக்கு விவரங்கள் அனைத்தும் போலியாகத் தயாரிக்கப்பட்டு இருப்பதும் ஆடிட்டர்கள் மற்றும் ஆதாரங்களின் அடிப்படையில் நிரூபிக்கப்பட்டு உள்ளன. ஆனால், பணத்தை வங்கிகளில் போட்டதும், அவற்றை வேறு கணக்குகளுக்கு மாற்றச் சொன்னதும் சசிகலா என்பது அரசுத் தரப்பு சாட்சி ஜெயராமன் மூலம் உறுதிபடத் தெரியவந்துள்ளது.

ஜெயராமன் போயஸ் கார்டனில் வேலை பார்த்த கார் டிரைவர். அவரிடம் ஒவ்வொரு முறையும் பை மற்றும் சூட்கேஸில் லட்சக்கணக்கான ரூபாய்களை வைத்து, நிரப்பப்பட்ட வங்கி சலான்களைக் கொடுத்து வரவு வைக்க சசிகலாதான் உத்தரவு பிறப்பித்துள்ளார். அதை ஜெயராமன் செய்துள்ளார். அதாவது அந்தப் பணத்தை, இவர்கள் நடத்தும் நிறுவனத்தின் கணக்குகளில் வரவு வைத்து, அவற்றை நிறுவனத்தின் பணமாக மாற்றி, அதன் பிறகு நிறுவனத்தில் இருந்து தங்கள் பெயரில் உள்ள வங்கிக் கணக்குக்கு மாற்றிக் கொண்டுள்ளனர்.

"யாருக்காகச் செய்தார்கள்...?"

சசிகலா, சுதாகரன், இளவரசி ஆகியோர் ஜெயலலிதாவுக்காகவே இப்படிப்பட்ட வேலைகளில் ஈடுபட்டுள்ளனர். ஜெயலலிதா தரப்பு வழக்கறிஞர் இதை மறுத்து, 'சசிகலா, சுதாகரன், இளவரசி ஆகியோர் போயஸ் கார்டன் வீட்டில் வசிக்க மனிதாபிமான அடிப்படையில் மட்டுமே ஜெயலலிதா அனுமதி கொடுத்திருந்தார். அதில் வேறு எந்த நோக்கமும் இல்லை. அதுவும் மிகக் குறுகிய காலம்தான் அவர்கள் அந்த வீட்டில் இருந்தார்கள். அவர்கள் அங்கிருந்தபோது நடந்த வேலைகள் எதுவும் ஜெயலலிதாவின் கவனம் பெற்று நடந்தவை அல்ல’ என்று குறிப்பிட்டு இருந்தார்.

மேலும், 'ஜெயா பப்ளிகேஷன் நிறுவனத்தைப் பொறுத்தவரை சசிகலாவுக்கு ஜெயலலிதா பவர் கொடுத்துவிட்டார். அதனால், அந்த நிறுவனத்தில் நடந்த எதுவும் ஜெயலலிதாவுக்குத் தெரியாது’ என்று தற்காப்பு வாதத்தை முன்வைத்தார். இந்த வாதத்தை ஏற்க முடியாது. ஏனென்றால், ஜெயலலிதா, சசிகலாவுக்கு 'பவர் ஆஃப் அட்டர்னி’ கொடுத்திருந்தாலும் இல்லை என்றாலும், ஜெயா பப்ளிகேஷனில் ஜெயலலிதாவும் சசிகலாவும் சமமான அதிகாரம் படைத்த பங்குதாரர்கள் என்பது மாறப் போவது இல்லை. அப்படி பங்குதாரர்களாக இருக்கும்போது, பவர் கொடுக்க வேண்டிய அவசியமும் இல்லை. ஒருவேளை கொடுத்திருந்தால், அதைச் சொல்லி ஜெயலலிதா தன்னை தற்காத்துக் கொள்ள முடியாது. ஏனென்றால், ஜெயலலிதா சசிகலாவுக்குக் கொடுத்த பவர் என்பது, சசிகலா சுதந்திரமாக ஜெயா பப்ளிகேஷனின் நிர்வாகத்தைக் கவனித்துக் கொள்ளவும், அதன்மூலமாக தான் மறைமுகமான உரிமையாளராக இருப்பதற்காகவுமே. அதாவது தன்னுடைய ஏஜென்டாக சசிகலாவை அவர் நியமித்து உள்ளார். ஆனால், அந்த நிறுவனத்தின் மூலம் நடைபெற்ற பணப் பரிமாற்றங்கள் உள்ளிட்ட அனைத்துச் செயல்பாடுகளும் ஜெயலலிதாவின் ஒப்புதலுக்குப் பிறகே நடைபெற்றுள்ளன. அதற்காக ஆதாரங்களை அரசுத் தரப்பு கொடுத்துள்ளது. 

ஜெயா பப்ளிகேஷனின் நிர்வாகத்தில் முழுமையாக தலையிடும் அதிகாரம் படைத்தவர்களாக  ஜெயலலிதாவும், சசிகலாவுமே இருந்துள்ளனர். மேலும் அங்கு நடைபெற்ற பரிவர்த்தனைகள் அனைத்தும் ஜெயலலிதாவுக்கு தெரியாமல் சசிகலாவோ அல்லது சசிகலாவின் பங்கு இல்லாமல் ஜெயலலிதாவோ செய்யவில்லை. அந்த நிறுவனத்துக்கு வந்த பணம், நிறுவனத்தில் இருந்து வேறு வங்கிக் கணக்குகளுக்கும் போடப்பட்ட பணம் என அனைத்தும் இருவருக்கும் தெரிந்தே நடந்துள்ளது.

"ஜெயலலிதாவுக்கு இது தெரியாதா...?"

தன்னுடைய வீட்டில் வசித்த சசிகலா, சுதாகரன், இளவரசி ஆகியோர் இதுபோன்ற வேலைகளில் ஈடுபட்டது தனக்குத் தெரியாது என்று ஜெயலலிதா சொல்வதை ஏற்கவே முடியாது. ஒரு மாநிலத்தின் முதலமைச்சர், தன்னுடைய வீட்டில் இருக்கும் தன்னுடைய சகாக்களின் நடவடிக்கை பற்றி எதுவும் தெரியாது என்று சொன்னால் அதை எப்படி ஏற்க முடியும்...? அதுபோல அந்த மூன்று பேரும் தன்னுடைய வீட்டில் வசிக்கவே இல்லை என்று ஜெயலலிதாவால் மறுக்கவும் முடியாது. 

வாக்காளர் பட்டியலில் சசிகலா, சுதாகரன், இளவரசி ஆகியோருக்கு 36, போயஸ் கார்டன் முகவரிதான் இருக்கிறது. மேலும் ஜெயலலிதாவிடம் நடத்திய விசாரணையில், சசிகலாவும் இளவரசியும் என்ன காரணத்துக்காக அங்கு வசிக்கிறார்கள் என்று கேட்கப்பட்டபோது, அதற்கு பதில் சொல்ல விரும்பவில்லை என்று பதில் அளித்துள்ளாரே தவிர, அவர்கள் தன்னுடன் வசிக்கவே இல்லை என்று கூறவில்லை. மேலும், சசிகலாவும் இளவரசியும் ஜெயலலிதாவுக்கு ரத்த பந்தமோ அல்லது வேறு வகையில் சொந்தமோ இல்லாதபோது அவர்கள் ஏன் தன்னுடன் வசிக்கிறார்கள் என்பதை ஜெயலலிதாவால் தெளிவுபடுத்த முடியவில்லை.

இந்தக் கேள்விக்கு சசிகலாவும், இளவரசியும்கூட பதில் சொல்லவில்லை. இத்தனைக்கும் அவர்களுக்குத் தனியாகக் குடும்பம் இருக்கிறது. இருவரும் திருமணமானவர்கள். அவர்கள் ஏன் தங்களுடைய குடும்பத்தைப் பிரிந்து ஜெயலலிதாவுடன் இத்தனை ஆண்டுகளாக ஒரே வீட்டில் வாழ வேண்டும்? அதற்கு என்ன காரணம்? ஜெயலலிதாவுக்கு வரும் பரிசுப் பொருள்கள், ஜெயலலிதாவின் பெயரைப் பயன்படுத்தி தவறான வழிகளில் சம்பாதித்த பணம்... ஆகியவை அனைத்தும் சசிகலாவின் வழியாக வந்துள்ளன. அவற்றை ஜெயலலிதா வீட்டுக்குக் கொண்டு சேர்க்கும் வேலைக்காக இளவரசி பயன்படுத்தப்பட்டுள்ளார்.

சசிகலாவும் இளவரசியும் நடத்திய நிறுவனங்கள் பற்றித் தனக்கு எதுவும் தெரியாது என்றும் ஜெயலலிதாவால் சொல்ல முடியாது. ஏனென்றால், சசி என்டர்பிரைசஸ் நிறுவனத்துக்கு ஜெயலலிதா ஒரு கோடி ரூபாய் கொடுத்துள்ளார். மேலும், அவர்கள் நிறுவனம் வாங்கிய வங்கிக் கடன்களுக்கு எல்லாம் ஜெயலலிதா தன்னுடைய பெயரில் ஷ்யூரிட்டி செக் கொடுத்துள்ளார். இதன் மூலம் அவர்கள் அனைவரும் கூட்டாகச் சேர்ந்து, தாங்கள் என்ன செய்கிறோம் என்பதை அறிந்தே செய்துள்ளனர். ஜெயலலிதா, சசிகலா, சுதாகரன், இளவரசி ஆகியோரின் பெயர்களில் உள்ள இந்தச் சொத்துகள் எப்படி வந்தன என்பதற்கு இவர்களால் கணக்குச் சொல்ல முடியவில்லை. அதை அரசுத் தரப்பு சரியாக நிரூபித்துள்ளது...'' என்று நீதிபதி குறிப்பிட்டுள்ளார்.

தீர்ப்பு தொடர்கிறது-!

- ஜோ.ஸ்டாலின்

நன்றி : ஜூனியர்விகடன் 12-10-2014

Tweet