அடுத்தப் பிறவில ஜூலு வம்சத்துலதான் பொறக்கணும் முருகா..!

01-10-2009

என் இனிய வலைத்தமிழ் மக்களே..!

டென்ஷன் வேண்டாம்.. கோபம் வேண்டாம்.. ஆத்திரம் வேண்டாம்னு செவனேன்னு ஒதுங்கியிருந்தாலும் முடியல.. நேத்து பாருங்க..

வழக்கம்போல இணையத்தை மேய்ஞ்சுக்கிட்டிருந்த நேரத்துல பார்த்த இந்த நியூஸை படிச்சவுடனேயே மறுபடியும் டென்ஷன் அதிகமாயி பி.பி. தாறுமாறா எகிறிருச்சு.. என்ன செஞ்சும் பி.பி.யை இப்ப வரைக்கும் குறைக்க முடியலீங்க..

மேட்டர் என்னன்னு கேளுங்க..


தென்ஆப்ரிக்கால 44 வயசான மில்டன் மொபேலி அப்படீன்ற ஒரு லோக்கல் முனிசபல் ஆபீஸ் மேனேஜர் ஒருத்தர், போன வார சனிக்கிழமை ஒரே நேரத்துல 4 பொண்ணுகளை கல்யாணம் பண்ணிருக்காராம்.. அப்புறம் எனக்கு பி.பி. எகிறாம எப்படி இருக்கும்?


Thobile Vilakazi, Smangele Cele, Zanele Langa and Happiness Mdlolo அப்படீன்ற பேரோட இருக்குற அவரோட நாலு மனைவிகளும் ஒருவர் பின் ஒருவராக அவருக்குப் பழக்கமானாங்களாம். ஒண்ணு, இரண்டுன்னு முடிஞ்சவுடனேயே வரிசையா கல்யாணம் பண்ணிக்கலாம்னுதான் நினைச்சாராம்.

ஆனா "லிஸ்ட் தொடர்ந்து மூணு, நாலுன்னு போனதால எல்லாரையும் தனித்தனியா கல்யாணம் பண்ணினா 'பட்ஜெட்' தாங்காதே, அப்படீன்ற நல்ல எண்ணத்துலதான் ஒரே நேரத்துல எல்லார் கழுத்துலேயும் தாலி கட்டினேன்"னு 'ஓப்பன் டாக்' விட்டிருக்கார் நம்ம சிங்கம் மில்டன்.

ஆனாலும் அண்ணனுக்கு இந்தக் கல்யாணத்துலேயே உள்ளூர் ரூபாய்ல ஒரு லட்சம் காலியாம்.. பாவம் இனிமே காசுக்கு என்ன செய்யப் போறார்ன்னு தெரியலை.. ஒருவேளை அந்த முனிசிபாலிட்டில கொடுக்குற சம்பளம், நம்ம அம்பானி சம்பளத்தைவிட ஜாஸ்தியோ என்னவோ?


ஒரு பொண்ணு வந்தாலே வீடு லேசா ஆட்டம் காண்பிக்கும்னு நம்ம டிவி சீரியல் எல்லாத்துலேயும் சொல்லிக் கொடுத்திட்டிருக்காங்க. "இங்க நாலு பேர் ஒண்ணா போறாங்களே என்ன ஆகும்?"னு கேட்டா, "இப்போதைக்கு நாங்க நாலு பேருமே தனித்தனியாத்தான் இருக்கப் போறோம்.. மில்டன் முறை வைச்சு எங்க நாலு பேர் வீட்டுக்கும் வந்து, வந்து போகட்டும்னு எங்களுக்குள்ள பேசி வைச்சிருக்கோம்னு" ஒரு மனைவி பேட்டி கொடுத்திருக்காங்க.. எவ்ளோ நல்ல மனசு பார்த்தீங்களா?


புருஷன் மத்த பொண்டாட்டிகளினால் கஷ்டப்படக்கூடாதேன்னு அவங்களே வட்டமேசை மாநாடு போட்டு பேசி முடிச்சிருக்காங்க.. நல்ல விஷயந்தான்..


நம்ம அண்ணன் மில்டனும் அதையேதான் சொல்றாரு.. "எல்லாரும் ஒரே வீட்ல இருந்தா எனக்குத் தலைவலிதான். அதான் தனித்தனியா அவங்க அவங்க வீட்லயே இருக்கட்டும். நான் ரவுண்ட் அடிச்சுக்குறேன். இத்தனை வருஷமா அதைத்தான செஞ்சுக்கிட்டிருந்தேன்.." அப்படீன்னு நம்ம 'ஆம்பளை புத்தி'யை விட்டுக் கொடுக்காம பேசியிருக்காரு.. நம்ம மானத்தைக் காப்பாத்திட்டாருப்பா..


இதுல இன்னொரு சுவாரசியம் என்னன்னா அண்ணனுக்கு 12 வருஷத்துக்கு முன்னாடியே மேலே சொன்ன நாலு பேர்ல ஒருத்தரான Thobile Vilakazi அப்படீன்ற பெண்ணோட கல்யாணம் நடந்துச்சாம். இப்ப திரும்பி ஒரு தடவை ஜாலிக்கு பண்றாராம்..

அது மட்டுமில்ல.. அண்ணன் பேரைச் சொல்றதுக்கு மொத்தம் 11 பிள்ளைகள் இப்பவே இருக்குதுங்களாம்.. ஆத்தாடி.. தலை சுத்துதா.. விழுந்திராதீங்க.. பக்கத்துல எதையாவது புடிச்சுக்குங்க..

ஆனா இந்த நாலு பேர்ல யாருக்கு, எத்தனை குழந்தைகள்ன்னு அண்ணன் சொல்ல மாட்டேன்னுட்டாராம்.. ஆனா "எனக்கு மொத்தம் 11 புள்ளைகள்"ன்னு நெஞ்சை நிமிர்த்தி சொல்றாரு நம்மண்ணன் மில்டன்.. ஆஹா.. என்ன ஒரு பெருமை.. ஆண் குலத்தின் பெருமையைக் கட்டிக் காப்பாற்றும் அண்ணன் மில்டன் வாழ்க..!

அதுலேயும் இது கிறிஸ்டியன் மேரேஜாம்.. கிறிஸ்டியன்ல்ல இப்படியெல்லாம் செய்யலாமான்னு கேக்காதீங்க. அதுக்குத்தான் ஒரு சுருக்கு வழியிருக்குல்ல?

அதுதான் "எங்க இனத்துல இதெல்லாம் சகஜம்"னு சொல்றாங்க.. இனம்னா சாதாரண இனமல்ல.. தென்ஆப்ரிக்காவில் புகழ் பெற்ற ஜூலு வம்சத்து சிங்கக்குட்டிதான் இந்த மில்டன்..

இந்த வம்சத்துல எத்தனை பெண்களை வேணும்னாலும் கல்யாணம் பண்ணிக்கலாமாம்.. தப்பே இல்லையாம்.. கோர்ட், கேஸுன்னுல்லாம் போகவே முடியாதாம்.. அங்கேயெல்லாம் பெண்ணுரிமை கழகங்கள் இருக்கா? இல்லையா? இது தப்பா? தப்பில்லையா என்றெல்லாம் கேட்கக்கூடாது.. மூச்.. அங்கே இனம் வைத்ததுதான் சட்டமாம்..!


ஏன்னா, அந்த இனத்தில் பிறந்த தற்போதைய தென்ஆப்பிரிக்க நாட்டின் ஜனாதிபதியான ஜேக்கப் ஜூமாவுக்கே அதிகாரப்பூர்வமா மூன்று மனைவிகள். இன்னும் ஒரு மனைவி வெயிட்டிங் லிஸ்ட்ல இருக்காங்க..

ஒவ்வொரு நாளும் ஒவ்வொரு மனைவி வீட்டுல ஷிப்ட் டைம் போட்டு டேரா போட்டு நம்ம ஆண் வர்க்கத்தின் இயற்கைக் குணத்தைக் காண்பித்து நமது மானத்தைக் காப்பாற்றி வருகிறார் ஜனாதிபதி ஜேக்கப் ஜூமா. அவரையும் நமது ஆண் வர்க்கத்தின் சார்பாக வாழ்த்துவோம்.

நாட்டின் தலைவரே அப்படி இருக்கும்போது சாதாரணக் குடிமகன் இப்படி இருக்குறதுல என்னங்க தப்பு..?

இவ்வளவு 'வசதி'யும், 'வாய்ப்பு'ம் மிகுந்த அப்படியொரு இனத்தில் ஒரு 'சிங்கமாக' பிறக்க வைக்காமல், இப்படி 'டிவி சீரியல் பார்த்தே சீரழியற தமிழ்நாட்டுல' பொறக்க வைச்சுட்டானே பாவிப்பய முருகன்..

அதாங்க கோபம்.. இதுனாலதான் ஆத்திரம்.. பி.பி.தாறுமாறா ஏறி நிக்குது.. இறங்க மாட்டேங்குது..

இந்நேரம் நானும் அங்கனயே பிறந்து தொலைஞ்சிருந்தா.. ம்.. ம்.. ம்..!!!

"ஒண்ணுக்கே வழியில்லைன்னாலும் ஜொள்ளுக்கு மட்டும் குறைச்சல் இல்லடா.." அப்படீங்குறீங்களா..?

அதுனாலதாங்க கேக்குறேன்.. முருகா.. என் அப்பனே.. சண்முகா.. வடிவேலா.. கார்த்திகேயா.. வேலவா.. கந்தா.. கடம்பா.. கதிர்வேலா.. அடுத்தப் பிறவிலயாச்சும் என்னை அந்த ஜூலு வம்சத்துல ஒரு நல்ல ஆணழகனா, கட்டழகனா பொறக்க வைச்சிரு..

அப்படி செஞ்சீன்னா அங்கேயே ஏகப்பட்ட குன்றுகளும், மலைகளும் இருக்கு. அங்க இருக்குற ஏதாவது ஒரு மலைல உனக்கு ஒரு பிரான்ச் கோவில் வைச்சு நல்லா கல்லா கட்டிர்றேன்.. டீல் ஓகேவா..?

ஏம்ப்பா அங்க தூரத்துல யாரோ கைல வெளக்கமாறு, செருப்பெல்லாம் எடுத்துக்கிட்டு ஓடி வர்றாப்புல இருக்கு.. யாருப்பா இது..?

ஐயோ 'முப்பெரும்தேவிகளா..'? மீ தி எஸ்கேப்பு..!

Tweet

புதிய தென்னாப்பிரிக்க அதிபரின் 6 திருமணங்கள், 4 மனைவிகள், 22 பிள்ளைகள்.. போதுமடா சாமி..!

09-06-09

என் இனிய வலைத்தமிழ் மக்களே..!

சென்ற ஏப்ரல் மாதம் 25-ம் தேதி தென்னாப்பிரிக்காவில் நடந்த பொதுத் தேர்தல் முடிவுகளுக்குப் பிறகு தென்னாப்பிரிக்க பத்திரிகைகள் எழுதித் தள்ளியிருக்கும் தலையாய விஷயம்.. “யார் இந்த நாட்டின் வருங்கால முதல் பெண்மணி..?”

தேர்தலில் 66 சதவிகித ஓட்டுக்களைப் பெற்று வெற்றி பெற்றிருக்கும் ஆப்பிரிக்க தேசிய காங்கிரஸின் தற்போதைய தலைவரும் ஜூலு இனத்தவரின் வசீகரமான புயலுமான ஜேக்கப் ஜூமாதான் தென்னாப்பிரிக்க நாட்டின் அடுத்த அதிபர் என்பதில் யாருக்கும் எந்தச் சந்தேகமும் இல்லை. ஆனால் அதிபரின் மனைவி என்கிற அந்தஸ்து யாருக்குக் கிடைக்கும் என்பதில்தான் பத்திரிகைகளுக்கும், நாட்டு மக்களுக்கும் குழப்பம்.


இதிலென்ன குழப்பம் என்கிறீர்களா..? மனிதருக்கு தற்போது மூன்று மனைவிகள் இருக்கிறார்கள். அதனால்தான் இந்தப் பரபரப்பு..

ஜேக்கப் ஜூமா இதுவரையில் ஆறு திருமணங்கள் செய்திருக்கிறார். இதில் ஒரு மனைவி இறந்துவிட்டார். இன்னொரு மனைவியை விவாகரத்து செய்துவிட்டார். இப்போது அன்னாருடைய அதிகாரப்பூர்வப் பட்டியலில் இருப்பது மூன்று மனைவிகள். கூடவே வெயிட்டிங் லிஸ்ட்டிலும் ஒரு மனைவி காத்திருக்கிறார்.

என்ன தலை சுற்றுகிறதா..? விஷயத்தைக் கேள்விப்பட்டவுடன் எனக்கும் இப்படித்தான் இருந்தது.

இவருடைய முதல் மனைவியின் பெயர் Sizakele Khumalo. 1959-ம் ஆண்டில் இருந்தே இவருடன் ‘பழகி' வந்த ஜூமா, 1973-ம் ஆண்டுதான் இவரைத் திருமணம் செய்துள்ளார். இவருக்குக் குழந்தைகள் இல்லை.

இவருடைய இரண்டாவது மனைவி Nkosazana Dlamini. இவர் மூலமாக ஜூமாவிற்கு நான்கு மகள்கள் உள்ளனர். இந்த மனைவியை கடந்த 1997-ம் ஆண்டிலேயே முறைப்படி டைவர்ஸ் செய்துவிட்டார் ஜூமா. இந்த மனைவி 1999ம் ஆண்டில் இருந்தே தென்னாப்பிரிக்கா அரசில் கேபினட் மினிஸ்டராக இருந்து வருகிறார். கடந்த அதிபரின் ஆட்சியின்போது வெளியுறவுத் துறை அமைச்சராகவும் இருந்திருக்கிறார்.

மூன்றாவது மனைவி Kate Zuma. அவர் தனது அருமைக் கணவரின் காதல் லீலைகளைப் பொறுக்கமாட்டாமல் 2000-வது ஆண்டு தற்கொலை செய்து கொண்டாராம். இவர் மூலமாகவும் ஜூமாவுக்கு ஐந்து குழந்தைகள்.

2008-ம் ஆண்டு, ஜனவரி மாதம் 8ம் தேதி Nompumelelo MaNtuli என்ற பெண்ணை நான்காவதாக திருமணம் முடித்துக் கொண்டார் ஜூமா. ஆனால் இவர்களது காதல் வாழ்க்கை இதற்கு முன்பே நடந்து கொண்டிருந்ததால் 2002-ம் ஆண்டு பிறந்த ஒரு மகளும், 2006-ம் ஆண்டு பிறந்த ஒரு மகனும் உள்ளனர். பிள்ளைகள் பிறந்த பின்புதான் ஊரார் பேச்சுக்காக திருமணம் செய்தாராம்.

ஐந்தாவதாக Thobeka Stacy Mabhija என்கிற பெண்ணிற்கு அவர்களுடைய ஜூலு வம்சத்தின் கலாச்சாரத்தின்படி வரதட்சணை என்றழைக்கப்படும் லபோலோவைக் கொடுத்து ‘முன்பதிவு' செய்துள்ளாராம். ஆனாலும் அதற்குள்ளாக இவர் மூலமாகவும் ஜூமாவுக்கு இரண்டு குழந்தைகள் உள்ளனர். கடைசிக் குழந்தைக்கு மூன்று மாதங்கள்தான் ஆகிறது.

ஆறாவதாக Bongi Ngema என்கிற பெண்ணுக்கும் லபோலா கொடுத்த ‘புக்கிங்' செய்து வைத்துள்ளார் ஜூமா. இவர்களது திருமணம் அநேகமாக 2010-ல் நடக்கலாம் என்று தென்னாப்பிரிக்க பத்திரிகைகள் ஜோஸியம் சொல்லிக் கொண்டிருக்கின்றன. இவர் மூலமாகவும் ஜூமாவுக்கு ஏழு மாத ஆண் குழந்தை உண்டு.

இது இல்லாமல் 2002-ம் ஆண்டு சுவாசி நாட்டு இளவரசியான Sebentile Dlaminiக்கு 10 கோட்டை லபோலா கொடுத்து வைத்திருந்தாலும், ஜூமா அவரை இன்னமும் திருமணம் செய்யவில்லையாம். எதற்கோ காத்திருக்கிறார் போலிருக்கிறது..?

இது போன்ற முறைப்படியான திருமணங்கள் மூலமாக மட்டுமல்ல.. Minah Shongwe என்ற பெண்ணுடன் வாழ்ந்த வாழ்க்கையினால், எட்வர்ட் என்ற 30 வயதுள்ள ஒரு மகன் இருக்கிறார்.

இப்படி 4 திருமணங்கள், 2 காத்திருக்கும் திருமணங்கள், 1 காதல் வாழ்க்கை என்ற இவருடைய தனிப்பட்ட கேரியரின் மூலமாக இவருக்கு மொத்தம் 22 குழந்தைகளாம்.

67 வயதான ஜேக்கப் ஜூமா 2004-ம் ஆண்டு தென்னாப்பிரிக்காவின் துணை அதிபராக பதவி வகித்திருக்கிறார். அந்தக் காலக்கட்டத்தில் அவருடைய பைனான்ஸியல் அட்வைஸர் செய்த ஊழல் மற்றும் லஞ்சம் வாங்கிய குற்றங்களுக்காக துணை அதிபர் பதவியிலிருந்து நீக்கப்பட்டார். பின்பு இந்த ஊழல் வழக்குகளில் இருந்து விடுவிக்கப்பட்டுள்ளார்.

2005-ம் ஆண்டு 31 வயதான ஒரு பெண், ஜூமா தன்னை கற்பழித்ததாக புகார் கூறியது தென்னாப்பிரிக்காவை பரபரப்படையவைத்தது. பாதிக்கப்பட்ட அந்தப் பெண் எய்ட்ஸ் நோயால் பாதிக்கப்பட்டவர். வழக்கு விசாரணையின்போது அந்தப் பெண்ணுடன் கட்டாய உடலுறவு கொண்டதை ஒப்புக் கொண்ட ஜூமா, ‘மேட்டர்' முடிந்தவுடன் உடனேயே தான் குளித்ததாகவும், அதனால் தனக்கு எய்ட்ஸ் நோய் தொற்றாது என்றும் தெம்பாகச் சொன்னார்.

அப்போது இதனை எதிர்த்து தொண்டு நிறுவனங்களும், மருத்துவர்களும், மருத்துவ அமைப்புகள் எதிர்க்குரல் கொடுத்தன. ‘இது ஆண்கள் உறை போடாமல் இருக்க ஆதரவு தருவது போல் உள்ளது..' என்று கண்டித்தனர். கோர்ட்டில் நீதிபதியும் கண்டித்தார். ஆனாலும், Minah Shongwe என்கிற தனது காதலி அளித்த சாட்சியத்தினால் இந்த வழக்கில் இருந்து ஜூமா பின்னர் விடுவிக்கப்பட்டுள்ளார்.

ஜூமாதான் அடுத்த அதிபர் என்பது உறுதியானவுடன் பத்திரிகைகள் “யார் நாட்டின் முதல் பெண்மணி..?” என்கிற கேள்வியை ஜூமாவிடம் கேட்டதற்கு “அது ஒரு பெரிய விஷயமே இல்லை.. பார்த்துக் கொள்வோம்..” என்று பட்டும் படாமல் பதில் சொல்லித் தட்டிக் கழித்து வந்தார்.


ஆனாலும் பத்திரிகைகள் படிக்காத முதல் மனைவியைவிட, கடைசியாகத் திருமணம் செய்து கொண்ட இருவரில் ஒருவரை அதிகாரப்பூர்வ மனைவியாக்கிக் கொண்டால் வெளிநாடுகளில் பெயரெடுக்க உதவும். ஆட்சி நிர்வாகத்தில் ஜேக்கப்பிற்கு அது நிச்சயம் பேருதவியாக இருக்கும் என்றெல்லாம் யோசனைகளையும், ஆரூடங்களையும் வழங்கியுள்ளனர்.

கடந்த மே 9-ம் ஜோகன்னஸ்பர்க்கில் நடந்த வண்ணமிகு விழாவில் தென்னாப்பிரிக்காவின் புதிய அதிபராக பதவியேற்றுக் கொண்டார் ஜேக்கப். அப்போது தனது முதல் மனைவி Sizakele Khumaloக்கு ‘அதிகாரப்பூர்வ நாட்டின் முதல் பெண்மணி' என்கிற அந்தஸ்தை கொடுத்து பிரச்சினைக்கு தற்போது முற்றுப்புள்ளி வைத்துள்ளார்.



இந்த விழாவிற்கு அவருடைய மற்ற இரண்டு மனைவிகளும், 22 பிள்ளைகளும் வந்திருக்கின்றனர். பிள்ளைகளின் குரூப் புகைப்படங்கள் கிடைக்காமல் பத்திரிகைகள் திண்டாட, கடைசி இரண்டு மனைவிகள் மட்டும் புகைப்படக்காரர்களுக்கு வஞ்சகமில்லாமல் தீனி போட்டுள்ளனர்.


ஜேக்கப்பின் ஜூலு வம்சத்தில் பல தார மணம் என்பது சாதாரணமானதுதான் என்கிறார்கள். நாடு, தலைவர், அதிபர் என்பதெல்லாம் இரண்டாம்பட்சமாகி தான் பிறந்த சமூகமே முக்கியம் என்கிறார்கள் தென்னாப்பிரிக்க ஜூலு வம்சத்தினர்.


இன்னமும் இந்த ஜூலுக்களிடையே பெருத்த செல்வாக்கு பெற்றவர் ஜேக்கப்தான். அதனால்தான் அவருடைய அரசியல் வாழ்க்கையையே அஸ்தமிக்க செய்வது போல் வந்த ஊழல் வழக்கு மற்றும் கற்பழிப்பு வழக்குகளையும் தாண்டி அவரால் அதிபர் நிலைமைக்கு வர முடிந்தது என்கிறார்கள்.

தன்னுடைய நான்காவது திருமணத்தன்று நான்காவது புது மனைவியுடன் ஜேக்கப் போட்ட ஆட்டம்தான் இது..!

வெற்றி அறிவிப்பு வெளியான பின்பு நான்காவது மனைவியின் வெற்றிப் புன்னகை

டைவர்ஸ் செய்த மனைவியும், ஒரு மகளும்..!

நான்காவது மனைவியும், முதல் மனைவியும்

அவனவன் ஒரு கல்யாணத்தை பண்ணிட்டே ராத்திரி வீட்டுக்குப் போறதா? இல்ல ஆபீஸ்லயே இருக்கிறதான்னு தவிச்சுக்கிட்டிருக்கான். இதுல பொழுது விடிஞ்சு பொழுது போனா வீட்டுக்காரம்மாக்களின் தொல்லைகள் என்கிற தலைப்பில் யாராவது ஒரு பதிவர் புலம்பித் தள்ளிக் கொண்டிருக்கிறார்.

ஆனால் நம்ம ஜேக்கப்பை பாருங்கள். மூச்சுவிட முடியாத சர்வதேச அரசியலில் செயலாற்றிக் கொண்டே ஒரு மனிதர் எவ்வளவு ஜாலியாக வாழ்க்கையை அனுபவித்திருக்கிறார். ம்.. இதுக்கெல்லாம் ஒரு கொடுப்பினை வேணும்..!

Tweet