கடந்த 4 ஆண்டுகளில் மிடாஸ் மூலமாக ஆத்தா கொள்ளையடித்தது 5000 கோடி..!

04-05-2016

என் இனிய வலைத்தமிழ் மக்களே..!

கிங் மிடாஸ் கதையைப் படித்தவர்களுக்குத் தெரியும். அவன் தொட்டதெல்லாம் பொன்னாக மாறும். இது, குயின் மிடாஸின் கதை.

ரத்தம் கசிந்த சசிபெருமாளின் சடலத்தில் இருந்து, மதுவிலக்கு என்ற கோஷம் உக்கிரம் பெற்றது. ‘மக்கள் அதிகாரம்’ நடத்திய போராட்டங்களால், அது தமிழகத்தில் தீயாய்ப் பற்றியது. தமிழக அரசியல் கட்சிகள் அனைத்தும், தங்கள் தேர்தல் அறிக்கையில் மதுவிலக்கை வாக்குறுதியாக வைத்துள்ளன. 

ஆனால், முதலமைச்சர் ஜெயலலிதா, தனது தேர்தல் பிரசாரத்தில், “தமிழகத்தில் படிப்படியாகத்தான் மதுவிலக்குக் கொண்டு வரப்படும்” என்று அறிவித்துள்ளார். இந்த அறிவிப்பு மக்களின் நலனுக்காக அல்ல... ஜெயலலிதாவுக்குச் சொந்தமான, ‘மிடாஸ் கோல்டன் டிஸ்டில்லரீஸ்’ என்ற நிறுவனத்துக்கு ஆதரவாகத்தான். 

ஏனென்றால், டாஸ்மாக்  நிறுவனம்  ஜெயலலிதாவுக்குச் சொந்தமானது. அதற்கான ஆதாரங்களை அறப்போர் இயக்கத்தின் ஒருங்கிணைப்பாளர் ஜெயராம் வெங்கடேசன் திரட்டி வைத்துள்ளார். 

அதன் விவரங்கள்...

ஜெயலலிதா ஆட்சி நடந்துகொண்டிருந்த, 2002 காலகட்டத்தில், மிடாஸ் கோல்டன் டிஸ்டில்லரீஸ் என்ற நிறுவனம் தொடங்கப்பட்டது. இந்த நிறுவனத்தின் இயக்குநர்களாக இருந்தவர்கள் ராவணனும் இளவரசியின் மருமகன் டாக்டர் சிவக்குமாரும். 

இந்தக் காலகட்டத்தில், டாஸ்மாக் நிறுவனம், மிடாஸ் நிறுவனத்திடம் இருந்து மதுபானங்களைக் கொள்முதல் செய்துள்ளது. அதன் பிறகு, தி.மு.க ஆட்சிக்கு வந்தது. அந்த ஆட்சியிலும் மிடாஸ் நிறுவனத்திடம் இருந்து மதுபானங்கள் வாங்கப்பட்டுள்ளன. 

அந்தக்  காலகட்டத்தில், குறிப்பாக 2009-10, 2010-11 காலகட்டத்தில், தி.மு.க.வின் ஜெகத்ரட்சகனின் எலைட் நிறுவனம் அதிக அளவு மதுவை டாஸ்மாக்குக்கு சப்ளை செய்து, ஆயிரத்து  450 கோடியை வணிகவரியாக மட்டும் செலுத்தி உள்ளது. அதேபோல், தி.மு.க-வின் ஆசி பெற்ற மற்றொரு நிறுவனமான எஸ்.என்.ஜே., ஆயிரத்து 203 கோடியை வணிக வரியாக செலுத்தி உள்ளது. 

ஆனால்,  அந்தக் காலகட்டத்தில் மிடாஸ் நிறுவனத்தின் வணிகவரி வெறும், 728 கோடி மட்டுமே. அதாவது, தி.மு.க-வின் ஆசி பெற்ற ஜெகத்ரட்சகனின் எலைட் டிஸ்டில்லரீஸ், எஸ்.என்.ஜே. டிஸ்டில்லரீஸ் நிறுவனத்திடம் இருந்து டாஸ்மாக் கொள்முதல் செய்ததைவிட மிடாஸ் நிறுவனத்திடம் இருந்து குறைவாகவே வாங்கியுள்ளது.  

2011-ல் அ.தி.மு.க தனிப் பெரும்பான்மையாக வெற்றி பெற்று ஆட்சியைப் பிடித்தது. தமிழக அரசு நடத்தும் டாஸ்மாக், ஜெயலலிதாவின் மிடாஸ் கோல்டன் நிறுவனத்தில் இருந்து அதிக அளவில் மதுபானங்களைக் கொள்முதல் செய்கிறது.

இந்த நான்கு நிதியாண்டுகளில் மிடாஸ் கோல்டன் நிறுவனத்தின் வருமானம், நான்கு மடங்காக அதிகரித்து உள்ளது. அதாவது, தன்னுடைய அதிகாரத்தைப் பயன்படுத்தி, பொதுமக்களின் பணத்தை, அரசு கஜானாவில் இருந்து எடுத்து, தனக்குச் சொந்தமான நிறுவனத்துக்கு கொடுத்து உள்ளார்கள். 

அதனால், 300 கோடி ரூபாய் வரி செலுத்தும் நிறுவனமாக இருந்த மிடாஸ் கோல்டன் நிறுவனம், இன்றைக்கு 1,412 கோடி ரூபாய் வரி மட்டும் செலுத்துகிறது. அதன் மொத்தக் கொள்முதல் 2 ஆயிரத்து 280 கோடியாக உயர்ந்துள்ளது. 

2011-12, 2012-13, 2013-14 என மூன்று நிதியாண்டுகளில் மட்டும் மிடாஸ் நிறுவனத்தின் மொத்தக் கொள்முதல், 5  ஆயிரத்து 404 கோடி. ஆனால், இந்தக் காலகட்டத்தில், எஸ்.என்.ஜே. நிறுவனத்தின் கொள்முதல், 3  ஆயிரத்து 900 கோடி. அதாவது 2 ஆயிரம் கோடி குறைகிறது. 

ஆக, தி.மு.க வந்தால், எலைட்டும், எஸ்.என்.ஜே-வும் மதுபானம் விற்று கோடிகளைக் குவிக்கும். அ.தி.மு.க ஆட்சி அமைந்தால், மிடாஸ் நிறுவனம்  சாராயம் விற்று கோடிகளைக் கல்லா கட்டும். தி.மு.க-வுக்கு எலைட்டும் எஸ்.என்.ஜே-வும், ஜெயலலிதாவுக்கு மிடாஸ் கோல்டனும் பொன்முட்டை யிடும் வாத்து.

மிடாஸ் யாருடையது...? 

மிடாஸ் நிறுவனத்துக்கும், ஜெயலலிதாவுக்கும் சம்பந்தமில்லை. அது சசிகலாவுக்குச் சொந்தமானது. ஜெயலலிதாவோடு சசிகலா ஒரே வீட்டில் இருப்பதால், அவர் தனியாகத் தொழில் செய்யக் கூடாதா என்று ஒரு கேள்வி அடிக்கடி எழுப்பப்படும். 

மிடாஸ் நிறுவனம் மட்டுமல்ல... ஹாட்வீல்ஸ் என்ஜினீயரிங், ஜாஸ் சினிமாஸ், ஜெயா ஃபைனான்ஸ், ஸ்ரீஹரி சந்தனா எஸ்டேட்ஸ், ஃபேன்ஸி ஸ்டீல்ஸ் என்று இன்னும் ஒரு டஜன் நிறுவனங்கள் இருக்கின்றன. இவை எல்லாவற்றிலும் சசிகலாவும் அவருடைய உறவினர்களும்தான் இயக்குநர்களாக உள்ளனர். ஆனாலும், இவை எல்லாம் ஜெயலலிதாவின் நிறுவனங்கள்தான். 

2011 டிசம்பர் 19-ம் தேதி, போயஸ் இல்லத்தில் இருந்து சசிகலா துரத்தப்பட்டார். அதற்கு மூன்று நாட்களுக்கு முன்பு, இந்த நிறுவனங்கள் எல்லாம் சசிகலாவிடம் இருந்து பறிக்கப்பட்டு, சோ ராமசாமியின் பெயருக்கு மாற்றப்பட்டன. அதுவும் ஒரே நாளில் 9 நிறுவனங்களில் இருந்து சசிகலா கழற்றிவிடப்பட்டார். மீண்டும் போயஸ் கார்டனுக்குள் சசிகலா வந்ததும், அடுத்த ஆறே மாதங்களில் சோ ராமசாமி கழற்றிவிடப்பட்டு, சசிகலாவின் உறவினர்கள் பொறுப்புக்கு வந்தனர். 

அதாவது, ஜெயலலிதாவுக்கு யார் நெருக்கமானவர்களாக இருக்கிறார்களோ, அவர்கள் அவருக்குச் சொந்தமான நிறுவனங்களில் பொறுப்புகளுக்கு கொண்டுவரப்படுகின்றனர். ஆக, அந்த நிறுவனங்களின் உண்மையான உரிமையாளர் ஜெயலலிதாதானே!

நன்றி : ஜூனியர் விகடன் - 08-05-2016

- ஜோ.ஸ்டாலின்

படம்: தே.சிலம்பரசன்

Tweet

ஆத்தா ஆட்சியின் லட்சணம் - சூரிய ஒளி மின்சாரத்தில் 25000 கோடி நஷ்டம்..!

04-05-2016

என் இனிய வலைத்தமிழ் மக்களே..!

சந்தையில் ஒரு பொருளை ஒரு ரூபாய்க்கு கூவிக் கூவி விற்றுக்கொண்டிருக்கும்போது, அந்தப் பொருளை 3 ரூபாய்க்கு வாங்கினால் என்ன ஆகும்? இரண்டு ரூபாய் நஷ்டம் ஏற்படும். 

இப்படி இரண்டு ரூபாய் நஷ்டத்தில் கோடிக்கணக்கான பொருட்களை வாங்கினால், கோடிக்கணக்கில் நஷ்டம் ஏற்படும். அதைத்தான் செய்துள்ளார்  தமிழக மின்துறை அமைச்சர் நத்தம் விசுவநாதன் என்று பதறவைக்கிறார்கள். 

நஷ்டமான தொகை ரூ.25,000 கோடி என்கின்றனர் மின்வாரிய அதிகாரிகள். மக்களின் பணத்தைக் கோடி கோடியாக அள்ளிக் கொடுத்து, நஷ்டம் ஏற்படுத்தியதற்குப் பிரதிபலனாக அந்தத் தனியார் நிறுவனங்கள், என்ன பிரதிபலன் செய்துள்ளனவோ? இதுதொடர்பாக, சென்னை உயர் நீதிமன்றத்தில் வழக்குத் தாக்கலாகி இருக்கிறது. அதன் சாராம்சம் என்னவென்றால்...

சூரிய மின்சக்தி...

தமிழகத்தில் தி.மு.க ஆட்சி நடந்தபோது (2006 - 2011), மின் தட்டுப்பாடு ஏற்பட்டது. 15 மணி நேரம் ‘கரன்ட் கட்’ என்றாகி தமிழ்நாடு, இருண்ட காலத்தில் இருந்தது. குழந்தைகள் முதல் பெரியவர்கள் வரை அனைத்துத் தரப்பு மக்களும் கடுமையாகப் பாதிக்கப்பட்டனர். குடிசைத் தொழில் தொடங்கி ராட்சத இயந்திரத் தொழில்கள் வரை பாதிக்கப்பட்டன. அவை ஏற்படுத்திய தாக்கமும் மக்களின் மனதில் கிளம்பிய கோபமும், தி.மு.க ஆட்சிக்கு முற்றுப்புள்ளி வைத்து, அ.தி.மு.க ஆட்சி அமையக் காரணமாக இருந்தன. 

தமிழகத்தில் மட்டுமின்றி, இந்தியாவில் பல மாநிலங்களிலும், இதுபோன்ற மின் தட்டுப்பாடு அந்த நேரத்தில் நிலவியது. அதனால், மின்சார உற்பத்தியில் மாற்றுவழி பற்றிய விவாதங்கள் நாடு முழுவதும் கிளம்பின. அதில் கண்டறியப்பட்ட புதிய தீர்வுதான், சூரிய மின்சக்தி. இந்தியாவில் அனைத்து மாநிலங்களும் சூரிய மின்சக்தியை ஒரளவுக்கு முயற்சி செய்தன. தமிழகமும் களத்தில் இறங்கியது. 

2012-ம் ஆண்டு அதற்காக ஒரு கொள்கை வகுக்கப்பட்டது. 2012-ல் தொடங்கி 2015 வரை ஒவ்வோர் ஆண்டும் 1,000  மெகாவாட் சூரிய மின்சக்தியை உற்பத்தி செய்ய வேண்டும் என்று திட்டமிடப்பட்டது. ஆனால், அதற்கான தளவாடங்கள் தமிழக அரசிடம் இல்லை. வழக்கம்போல் தனியாருக்கு டெண்டர்விட முடிவு செய்யப்பட்டது. 

தனியாரிடமும் அதற்கான வசதிகள் இல்லை. அவர்களும் இனிதான் இடம் பார்க்க வேண்டும்; இயந்திரங்களை நிறுவ வேண்டும்; அதன் பிறகுதான், சூரிய மின்சாரத்தை உற்பத்தி செய்ய வேண்டும் என்ற நிலை இருந்தது. ஆனாலும், நாங்கள் அதைச் செய்து கொடுப்போம் என்று பல தனியார் நிறுவனங்கள் போட்டி போட்டுக் கொண்டு வந்தன. 

அவர்களை ஊக்கப்படுத்தும்விதத்தில், ‘புதுப்பிக்கத்தக்க மின்சார ஒழுங்கு முறை ஆணையம் (Reneval energy purchase obligation)’ என ஒரு கொள்கைத் திட்டம் வகுக்கப்பட்டது. ‘சூரிய மின் சக்திச் சட்டம்’ என்று அதற்குப் பெயர் கொடுத்து, 12 செப்டம்பர் 2014-ல் ஓர் உத்தரவைப் போட்டது தமிழக அரசு. 

அதன்படி,

1. தமிழ்நாடு மின்சார வாரியம், தனியார் நிறுவனங்களிடம் இருந்து ஒரு யூனிட் சூரிய ஒளி மின்சாரம் 7.01 ரூபாய் என்ற விலைக்கு வாங்கி விநியோகம் செய்ய வேண்டும்.

2. மின்சாரத்தை அதிக அளவில் பயன்படுத்தும் தனியார் நிறுவனங்கள், தொழிற்சாலைகள் உள்ளிட்டவை, தங்கள் பயன்பாட்டில் 0.5 சதவிகிதம் சூரிய மின்சக்தியைக் கண்டிப்பாகப் பயன்படுத்த வேண்டும். (தமிழகத்தில் உள்ள தனியார் நிறுவனங்கள் 6 ஆயிரம் கோடி யூனிட் மின்சாரத்தைப் பயன்படுத்துகின்றன. அதில், 0.5 சதவிகிதம் என்பது 3 கோடி யூனிட்.)

3. தனியார் பயன்பாட்டுக்கு எவ்வளவு சூரிய மின்சக்தி தேவைப்படுகிறதோ, அந்த அளவுக்கு மட்டுமே தமிழ்நாடு மின்சார வாரியம், சூரிய மின்சக்தியை உற்பத்தி நிறுவனங்களிடம் இருந்து வாங்க வேண்டும். அப்படிப் பார்த்தால், அவர்கள் பயன்படுத்தும் 3 கோடி யூனிட் என்பது 21 மெகாவாட்தான். அவ்வளவு வாங்கினால் போதும் என்று சட்டம் போட்டது.  

இந்தத் திட்டம் போடப்பட்டதும், இதற்காகப் பல நிறுவனங்கள் போட்டி போட்டுக்கொண்டு வந்தன. அவற்றில் 1,500 நிறுவனங்கள் பதிவு செய்ய அனுமதிக்கப் பட்டன. அவற்றில், 52 நிறுவனங்கள் தேர்வு செய்யப்பட்டு, அவை சூரிய மின்சக்தியை உற்பத்தி செய்து தமிழ்நாடு மின்சார வாரியத்துக்கு ஒரு யூனிட் 7.01 ரூபாய்க்கு விற்பனை செய்தன. 25 ஆண்டுகளுக்கு இந்தக் கொள்முதல் நடக்கும். ஆனால், விலை மட்டும் ஆண்டுக்கு ஆண்டு சந்தை நிலவரத்தைப் பொறுத்து மாறுபடும் என்பது சட்டமாக இயற்றப்பட்டது. 

இப்படி போய்க்கொண்டிருந்த நிலையில், தனியார் நிறுவனங்களிடம் இருந்து 21 மெகாவாட் வாங்கப்பட்டது. முதலில் நிர்ணயிக்கப்பட்ட விலைக்கான கொள்முதல் காலக்கெடு, 2015 செப்டம்பர் 12-ல் முடிந்தது. அடுத்து விலையைப் புதிதாக நிர்ணயிக்க வேண்டும். 

அந்த நேரத்தில், மத்திய அரசின் ‘புதுப்பிக்கத்தக்க  மரபுசாரா மின்சக்தி ஒழுங்கு முறை ஆணையம்’ தமிழக மின்வாரியத்துக்கு ஒரு கடிதம் எழுதியது. அதில், ‘இந்த ஆண்டு, சூரிய மின்சக்தியின் விலை 14 சதவிகிதம் குறைந்துவிட்டது. அதனால், நீங்களும் கடந்த ஆண்டு வாங்கிய விலையைவிட குறைவாக வாங்குங்கள். அதாவது, 5 ரூபாய்க்கு வாங்கினால் போதும்’ என்று அறிவுறுத்தியது. 

ஆனால், அப்படி வாங்கினால் தனியார் நிறுவனங்கள் கொடுக்கும் கமிஷனை குறைத்துவிடும் என்பதற்காக, நத்தம் விசுவநாதன் அதே 7.01 ரூபாய்க்கு வாங்கவே திட்டம் போடுகிறார். 

அமைச்சர் திட்டப்படியே, அடுத்து ஒரு 6 மாதங்களுக்கு காலக்கெடுவை நீடித்து, தமிழ்நாடு புதுப்பிக்கத்தக்க மரபுசார மின்சக்தி ஒழுங்கு முறை ஆணையம் இப்போது உத்தரவு போட வேண்டும். அந்த ஆணையத்தில் ஒரு தலைவர், இரண்டு உறுப்பினர்கள். அவர்களில் தலைவர் அக்‌ஷய்குமாரும் ஓர் உறுப்பினர். ராஜகோபாலும் அமைச்சர் சொல்படி, விலை குறைந்த பொருளை, இரண்டு ரூபாய் கூடுதலாகக் கொடுத்து கோடிக்கணக்கில் வாங்க உத்தரவு போட்டனர். ஆனால், மற்றோர் உறுப்பினரான நாகல்சாமி, அப்படிச் செய்ய முடியாது என்று சொல்லிவிட்டார். 

ஆனால், அதையும் மீறி அந்த உத்தரவு போடப்பட்டு அதே விலையில் மின்சாரம் வாங்கப்பட்டது. எவ்வளவு வாங்கப்பட்டது என்றால், 947 மெகாவாட் வாங்கப்பட்டது. இதில், ஒரு மெகாவாட்டுக்கு 8 கோடி ரூபாய் நஷ்டம் என்கிறார் நாகல்சாமி. அப்படிப் பார்க்கப் போனால், 7 ஆயிரத்து 576 கோடி ரூபாய் நஷ்டம்.

சட்ட விரோதமாகப் புகுத்தப்பட்ட அதானி குழுமம்..

21 மெகாவாட் மின்சாரம் மட்டும் தனியார் நிறுவனங்களிடம் இருந்து வாங்கினால், போதும் என்று சூரிய மின் சக்தி சட்டம் இயற்றப்பட்டு நடைமுறையில் இருக்கிறது. இந்த நேரத்தில், அதானி குழுமத்தைக் கொண்டு வந்து ஜெயலலிதா முன்னிலையில் நிறுத்தினார் அமைச்சர் நத்தம் விசுவநாதன். 

அவர்களோடு ஜெயலலிதா முன்னிலையிலேயே ஒப்பந்தம் போடப்பட்டது. 648 மெகாவாட் மின்சாரம் வாங்க போடப்பட்ட அந்த ஒப்பந்தம், சட்ட விரோதமானது. அதில் நடைபெற்ற முறைகேட்டை கணக்கிட்டால், 5 ஆயிரத்து 184 கோடி ரூபாய்.

இதுபோக, சூரிய மின் சக்தி உற்பத்தி செய்யும் நிறுவனங்கள் பதிவு செய்வதற்கு ஒவ்வொரு நிறுவனத்திடம் இருந்தும் 50 லட்சம்வரை கை மாறியதாகவும் புகார் கிளம்பி உள்ளது. அந்தக் கணக்குப்படி 1,500 நிறுவனங்கள் பதிவுசெய்யப்பட்டு உள்ளன. இதில் ரூ.750 கோடி வரை ஊழல் நடைபெற்றதாக ஒரு புகார் சொல்லப்பட்டு உள்ளது. 

இந்தப் புகார்கள் அத்தனையையும் தொகுத்து, சீனிவாசன் என்பவர் லஞ்ச ஒழிப்புத் துறையில் புகார் கொடுத்தார். அவர்கள் நடவடிக்கை எடுக்கவில்லை. 

இதையடுத்து சென்னை உயர் நீதிமன்றத்தில் அவர் வழக்குத் தொடுத்தார். வழக்கறிஞர் மணிவாசகம் நடத்திய வழக்கில் உத்தரவிட்ட சென்னை உயர் நீதிமன்றம், இதில் உரிய நடவடிக்கை எடுக்கும்படி லஞ்ச ஒழிப்புத் துறைக்கு உத்தரவிட்டுள்ளது. 

தமிழ்நாடு மின்சார வாரியத்துக்கு நத்தம் விசுவநாதனால் பல கோடி ரூபாய் நஷ்டம் ஏற்பட்டுள்ளது என்றால், அது தமிழக அரசுக்கு நஷ்டம். தமிழக அரசின் நஷ்டம் என்றால், அது ஜெயலலிதாவுக்கு நஷ்டம் அல்ல... தமிழக மக்களுக்கு நஷ்டம்.

நன்றி : ஜூனியர் விகடன் 08-05-2016

- ஜோ.ஸ்டாலின்

படங்கள்: ஆ.முத்துக்குமார், மீ.நிவேதன்

Tweet

2016 சட்டமன்றத் தேர்தல் - தி.மு.க. - காங்கிரஸ் கூட்டணி திரும்பவும் ஏன்..?

14-02-2016

என் இனிய வலைத்தமிழ் மக்களே..!

ஐயோ பாவம் தாத்தா..!

இரண்டு பிரதமர்களைத் தேர்ந்தெடுக்கும் அளவுக்கு ஒரு காலத்தில் சகல அதிகாரத்துடன் இருந்தவர், இன்றைக்கு கூட்டணி வைக்க கட்சிகளைத் தேடிக் கொண்டிருக்கிறார்.

தி.மு.க. கூட்டணி மந்திரி சபையில் இருக்கும்போதே தன் தலையில் தானே மண்ணையள்ளிப் போட்டுக் கொள்வதை போல 2-ஜி ஊழலை வெளிப்படுத்தியது காங்கிரஸ் அரசு. தி.மு.க.வை பலவீனப்படுத்த நினைத்து அவர்கள் வெளியிட்டது கடைசியில் அவர்களையே வீட்டுக்கு அனுப்பிவிட்டது. ராகுல் செய்த முட்டாள்தனத்தில் இதுதான் தலையாயது..! கூடவே குடும்பத்துலேயே குழப்பம் விளைவிப்பதை போல சன் டிவியின் மேக்ஸிஸ் ஊழலையும் நாள் கணக்கில் புள்ளிவிவரங்களோடு வெளியிட்டு அசத்தியது காங்கிரஸின் உளவுத் துறை.

இன்னொரு பக்கம் பலத்த பாதுகாப்பு நிறைந்த சி.பி.ஐ. அலுவலகத்தில் இருந்த விசாரணை டேப்புகளே ஒவ்வொன்றாக தானாகவே வெளியானது. அதிலும் நேராக எதிர்க்கட்சி வக்கீலின் கையிலேயே டேப்புகள் கிடைப்பதை போல தீயாய் வேலை செய்த காங்கிரஸின் உளவுத்துறையை பாராட்ட வார்த்தைகளே இல்லை. பிரசாந்த் பூஷனுக்கு பக்கபலமாக இருந்து அவரது கேஸுக்கு அனைத்துவித உதவிகளையும் செய்தது சாட்சாத் இதே காங்கிரஸ் கட்.சிதான்..!

தகத்தகாய சூரியனான தனது தம்பி ராஜாவை சிறை புகாமல் காப்பாற்ற நினைத்தார் தாத்தா. முடியவில்லை. அடுத்து தனது ஆசை மகளையாவது காப்பாற்றலாமே என்று துடியாய் துடித்தார். அதுவும் முடியாமல் போனது. அந்தத் தள்ளாத வயதிலும் வி்மானம் ஏறி டெல்லி ஆத்தாவை சந்தித்து மனு அளிக்கப் போனார்.. இவர் ஜன்பத் ரோட்டில் டெல்லி ஆத்தாவிடம் கருணை மனு போட்டுக் கொண்டிருந்த கிட்டத்தட்ட அதே நேரத்தில் அவரது பாச மகளுக்கெதிராக சி.பி.ஐ., குற்றப்பத்திரிகையை நீதிமன்றத்தில் தாக்கல் செய்து தாத்தாவின் நெஞ்சை நேரடியாக தாக்கியது..

என்னத்த செய்தும் டெல்லி பட்டத்து இளவரசரின் கோபம் தணியவில்லை என்பதை மட்டும் உணர்ந்து அவரை கூல் செய்ய அம்புகளையெல்லாம் அனுப்பி வைத்தார்கள். குலாம் நபி ஆசாத்தும், அகமது பட்டேலும் ஒருவர் மாற்றி ஒருவர் நல்ல பிள்ளை நாடகமாடி ராகுலுக்கும் இதற்கும் சம்பந்தமில்லை என்றார்கள். 

இனி இந்தக் கூட்டணி கதைக்குவாது என்பது தெரிந்துதான் ஆட்சியிலிருந்து விலகிக் கொண்டும், கூட்டணியில் இருந்தும் விலகினார் தாத்தா. கையோடு அடுத்து வந்த சட்டமன்றத் தேர்தலில் தாங்கள் தோல்வியடையப் போகிறோம் என்று தெரிந்தே வலிக்காத மாதிரியே நடித்தும் தோற்றார்கள்.

“காங்கிரஸுடனான கூட்டணியில் இருந்து விலகியது எங்களுக்கு கிடைத்த பொங்கல் பரிசு..” என்று அப்போதே சொன்னார் காங்கிரஸின் தற்போதைய தலைவர் இளங்கோவன்.  “இனி ஒரு போதும் துரோக காங்கிரஸுடன் கூட்டணி இல்லை..” என்றார் தாத்தா.

   

“கடைசிவரையில் பதவி சுகத்தை அனுபவித்துவிட்டுத்தானே போனார்கள். இதனால் எங்களுக்குக் கவலையில்லை...” என்று ஜெயந்தி நடராஜன் மூலமாக சொல்ல வைத்து மூக்குடைத்தார் இளவரசர்.

இரு கட்சிகளுமே மத்தியிலும், மாநிலத்திலும் ஆட்சியை இழந்து இன்றைக்கு தவித்து வரும் வேளையில் ஏன் இந்த புதிய மானம் கெட்ட முயற்சி..?  அரசியில் நிரந்தரப் பகைவர்களும் இல்லை.. நிரந்தரமான நண்பர்களும் இல்லை என்று சொல்லி தப்பிப்பார்கள்.. அவர்களுக்குத்தான் இரட்டை நாக்குகளாச்சே.. அது இப்போது நான்காககூட ஆகியிருக்கும். 

உச்சநீதிமன்றத்தின் தீர்ப்பு ஜெயலலிதாவுக்கு பாதகமாக வரும் என்று தி.மு.க. உறுதியாக நம்புகிறது. அந்த இடைவெளியை நாம் சரியாகப் பயன்படுத்திக் கொள்வோம் என்று எண்ணுகிறது. பா.ஜ.க. அதிமுகவுடன் கூட்டணி வைக்க விரும்பாததுபோல நடிக்கிறது. ஆனாலும் கூட்டணிக்கு ரகசியமாக அலைந்துதான் வருகிறது. 

தே.மு.தி.க.வுடன் மட்டுமே கூட்டணி வைத்தால் இரண்டாவது, மூன்றாவது இடம் வேண்டுமானால் கிடைக்கலாம். ஒரு சீட்டுகூட கிடைக்காது என்பது தமிழிசைக்கு மட்டுமல்ல அமித்ஷாவுக்கே தெரியும்.. அ.தி.மு.க. அழைத்துவிட்டால், தே.மு.தி.க.வை டீலில் விட்டு பா.ஜ.க. விலகிவிடும். கடைசியாக தே.மு.தி.க. அந்தரத்தில் நிற்க வேண்டியதுதான்..!

மச்சான் தேனாகப் பேசியிருந்தாலும், மனைவி தேளாகக் கொட்டியிருந்தாலும் தாத்தாவும், தளபதியும் தே.மு.தி.க.வுக்கு சிவப்புக் கம்பள வரவேற்பு கொடுக்க்க் காத்திருக்கிறார்கள்.  இப்போது தேர்தல் களம் வோட்டு விகிதத்தை வைத்தே நிர்ணயிக்கப்படுவதால் தே.மு.தி.க.வை இழக்க அவர்கள் விரும்பவில்லை. 

ஆத்தா ஜெயிலுக்கு போனால் அதிமுக, பா.ஜ.க.வுடன் கூட்டணி  என்று செய்தி வரும். தே.மு.தி.க. தனித்துவிடப்படும். அதனால்தான் இப்போதே வந்தால் சீட்டுகள்கூட  கிடைக்கும் என்று ஆடித் தள்ளுபடியை போல அறிவாலயத்தில் கூவிக் கொண்டிருக்கிறார்கள்.

பா.ஜ.க.வோடு போனால் சீட்டுக்களுடன் கரன்சி நோட்டுக்களும் நிறைய கிடைக்கும். தேர்தல் செலவை சமாளிக்கலாம் என்று எண்ணுகிறார் மனைவி. தி.மு.க.வோடு போனாலும் கரன்சி கிடைக்கும். அதற்கு நான் கியாரண்டி என்று அக்காவோடு மல்லுக் கட்டி வருகிறாராம் தம்பி. இப்போது கரன்சி முக்கியமா.. அல்லது சீட்டுகள் கிடைத்து ஒரு தலைவராக தான் சட்டமன்றத்திற்கு நடப்பது முக்கியமா என்பதை முடிவு செய்ய முடியாமல் தவியாய் தவிக்கிறார் கேப்டன்.

இன்னொரு பக்கம் மக்கள் நலக் கூட்டணி தேர்தல் பிரச்சாரத்துக்கே பாய்ந்துவிட்டார்கள் என்பதும் அறிவாலயத்திற்கு சற்று கலக்கத்தைக் கொடுத்திருக்கிறது.  அவர்களது கூட்டணியை இனிமேல் உடைக்கவோ, முறிக்கவோ வாய்ப்பில்லை என்பதால் அவர்கள் பக்கம் திரும்பாமலேயே இரு கட்சிகளும் யோசிக்கின்றன.

கட்சி ஆரம்பித்த நேரத்திலிருந்தே ஜி.கே.வாசன் அ.தி.மு.க. வாசலிலேயே காத்துக் கொண்டிருக்கிறார். அப்போது இருந்தே 4 சீட்டுதான் என்று தூதுவர் ஞானதேசிகனிடம் சொல்லி வந்திருக்கும் அடிமை அமைச்சர்கள், சென்ற மாத கடைசியில்தான் 10-க்கு ஏறி வந்திருக்கிறார்கள். இது கடைசியில் 20 ஆகிவிடும் என்கிற எதிர்பார்ப்பில் காத்திருக்கிறார் ஜி.கே.வாசன். அவருக்கும் வேறு வழியில்லை.

  

கட்சி ஆரம்பித்து இது முதல் தேர்தல் என்பதால் வாக்கு சதவிகிதத்தைக் காட்ட வேண்டும். கட்சிக்கான அங்கீகாரத்தை பெற வேண்டும். வைகோ, ராமதாஸ், திருமாவளவன் போல தானும் ஒரு அரசியல் தலைவருக்கான அந்தஸ்தில் வலம் வர வேண்டும் என்று நினைக்கிறார். ஆக.. இவரும் தி.மு.க. அணிக்கு வரப் போவதில்லை.

மிச்சம் மீதியிருக்கும் சின்ன சின்ன கட்சிகளை வைத்து லோக்கலில் கூட்டத்தை சேர்க்க முடியுமே தவிர, அது வெற்றி பெற வைக்கும் அளவுக்கான வாக்குகளாக மாறாது என்பதை தாத்தாவும் புரிந்து கொண்டிருக்கிறார். 

இன்னொரு பக்கம் 2ஜி வழக்கின் தீர்ப்பும் விரைவில் வெளிவர இருக்கிறது. இனிமேல் தீர்ப்பில் ஏதும் மாற்றம் செய்து தப்பிக்க நினைப்பது முடியாது என்பது இந்திராகாந்திக்கே அல்வா கொடுத்த தாத்தாவுக்கு தெரியாததல்ல. ஆகவே எது வந்தாலும் சந்திப்போம் என்ற மனத்திடத்துடன் பா.ஜ.க. உறவை தூர வைத்தார்கள்.

இதேபோல் ஆசிய கண்டத்தின் மிகப் பெரிய பணக்கார குடும்பம் என்கிற பவுசோடு இந்தியாவின் புதிய பிரதமரான மோடியை சந்திக்க டெல்லியிலேயே 10 நாட்கள் தவம் கிடந்தும் மாறன் சகோதரர்களுக்கு மோடியின் முகம் பார்க்கும் வாய்ப்பு கிடைக்கவே இல்லை. அருண் ஜெட்லி மட்டுமே அனுசரணையாகப் பேச.. ராஜ்நாத் சிங்கோ பைல்கள் மூலமாக சகோதரர்களை விரட்டும் வேலையும் நடந்திருக்கிறது..! ஆக பேரன்கள் மூலமாகவும் பா.ஜ.க.வை வளைக்க முடியாத துர்பாக்கியம் தாத்தாவுக்கு..!

இதையெல்லாம் மனதில் வைத்துதான்... எதையாவது செய்து கூட்டணியை பெரிதாக்க நினைத்து வேறு வழியில்லாமல் மானம், ரோஷம், வெட்கத்தையெல்லாம் அறிவாலய வாசலில் குழி தோண்டி புதைத்துவிட்டு ‘அன்னை சோனியா’ என்றும், ‘வருங்கால இந்தியாவே ராகுல்தான்’ என்றும் சொல்ல தயாராகிவிட்டது தி.மு.க.

ஆக மொத்தம் அரசியல் களத்தில் யாருக்கும் வெட்கமில்லை என்பதை தி.மு.க. நேற்றைக்கு திரும்பவும் காட்டிவிட்டது. அடுத்தது அ.தி.மு.க. முறை.  இதற்கு உச்சநீதிமன்ற சொத்துக் குவிப்பு வழக்கின் இறுதித் தீர்ப்பு வரும்வரைக்கும் நாம் காத்திருக்க வேண்டும்..!

Tweet