வெற்றிகரமான 5-ம் ஆண்டு துவக்க விழா..!

23-03-2011

என் இனிய வலைத்தமிழ் மக்களே..!

2007-ம் ஆண்டு மார்ச் 23-ம் தேதியன்று அருமைத் தம்பி பாலபாரதியின் பொற்கரங்களால் துவக்கப்பட்ட இந்தத் தளம் இன்றைக்கு தனது 4 ஆண்டு கால ஓட்டத்தை நிறைவு செய்து வெற்றிகரமான 5-வது ஆண்டைத் துவக்குகிறது..!

எனது முதல் படைப்பைப் படித்துவிட்டு உடனடியாக எனக்காகத் தனிப் பதிவு போட்டு என்னை வலையுலகத்திற்கு அறிமுகப்படுத்திய தம்பி சென்ஷியை இந்த நாளில் மீண்டும் ஒரு முறை நன்றியோடு நினைவு கூர்கிறேன்.

அதேபோல் பெண் பதிவர்கள் பலருக்கும் அறிமுகப்படுத்தும்விதமாக முதல் நாளில் இருந்தே என்னை தொடர்ந்து ஊக்குவித்து வந்த முத்துலட்சுமியக்காவுக்கும் எனது நன்றிகள்..!

ஏதோ எனக்குள் தோன்றியதை எழுதுகிறேன் என்றாலும், அவ்வப்போது நான் செய்து வரும் காப்பி-பேஸ்ட் பதிவுகளைக் கூட எனக்காகப் பொறுத்துக் கொண்டு என்னைத் தொடர்ந்து வாசித்து வரும் எனது  பதிவுலக நண்பர்களுக்கும், வாசகர்களுக்கும் என் மேல் அக்கறை கொண்டு எழுத்தில் எனது வளர்ச்சியை மேம்படுத்த உதவிய எனது பதிவுலக மூத்தோர்களுக்கும் இந்த நேரத்தில் எனது நன்றியினைக் காணிக்கையாக்கிக் கொள்கிறேன்..!

பெரிய, பெரிய பதிவுகளாக எழுதியிருந்தாலும் பொறுமையுடன் படித்துவிட்டு இன்னமும் என்னை நட்புப் பட்டியலில் இணைத்திருக்கும் நண்பர்களுக்கும் எனது நன்றி..! இப்போது பதிவின் நீளத்தைக் கொஞ்சம் குறைத்திருக்கிறேன் என்பதை அவர்களுக்கு மட்டும் தெரிவித்துக் கொள்கிறேன்..!

இந்த நான்காண்டு காலத்தில் இந்த வலையுலகத்தில் நான் கற்றுக் கொண்டது நிறையவே..! அதேபோல் பலனடைந்ததும் அதிகம்தான்.. ஒரு சில நேரங்களில் தளத்தை மூடிவிட்டுப் போய்விடலாம் என்கிற அயர்ச்சி ஏற்பட்டிருந்தாலும், அதனைப் போக்கும் அருமருந்தாக பதிவுலகின் மூலம் எனக்குக் கிடைத்த நண்பர்களின் தோழமை என்னை இங்கேயே இருக்க வைத்தது என்பதை கண்டிப்பாக சொல்ல வேண்டும்..!  தோள் கொடுத்த அந்தத் தோழர்களுக்கு எனது இதயங்கனிந்த நன்றி..!

அரசியல் கொள்கை ரீதியாக மாற்றுக் கருத்துக்கள் இருந்தாலும் எனது அந்தத் தனிப்பட்ட உரிமையை மதித்து, இன்றுவரையிலும் என்னை நட்புக்காகப் பொறுத்துக் கொண்டிருக்கும் அரசியல் சார்பான நண்பர்களுக்கும் எனது நன்றி..!

ஒவ்வொரு புது வருடமும் இந்த வருடம் என்ன செய்யப் போகிறோம்..? என்ன சாதிக்கப் போகிறோம்? என்பதையெல்லாம் யோசிக்க வைக்கிறது.. இதுவரையில் இந்த வலையுலகில் நான் சாதித்தது என்ன என்பது பற்றி எனக்குத் தெரியவில்லை. அது பற்றிக் கவலையுமில்லை.. இந்த சிந்தனாவோட்டத்தை தடை செய்யும்விதமாகவே வலையுலகத் தோழர்களின் நட்பு எனக்குள் எந்நேரமும் ஓடிக் கொண்டிருக்கிறது..!

இங்கே எழுதுவதினால் உலகம் முழுவதிலும் இருந்தும் எனக்குக் கிடைத்த கிடைத்த நண்பர்களே பெரும் சாதனை என்கிறபோது வேறேதுவும் எனக்குப் பெரிதாகத் தோன்றவில்லை..! இதுவே போதும் என்றே நினைக்கிறேன்..!

என்னைப் பின் தொடரும் நண்பர்களுக்கும், பின் தொடராமலேயே தொடர்ந்து கொண்டிருக்கும் நண்பர்களுக்கும், தொடர்ச்சியாக பின்னூட்டமிட்டு என்னை உரமேற்றிக் கொண்டிருக்கும் பதிவர்களுக்கும், தோழர்களுக்கும், வாசகர்களுக்கும் மீண்டும் ஒரு முறை நன்றி கூறிக் கொள்கிறேன்..!

இதுவரையில் எந்த வலைப்பதிவரையும் நான் பொதுவில் கடும்சொல்லை வீசி காயப்படுத்தியதில்லை என்று நினைக்கிறேன்.  தனிப்பட்ட முறையில்கூட மிக நெருக்கமானவராக, எனக்கு உரிமையிருந்தால் மட்டுமே அப்படி பேசியிருப்பேன் என்று நினைக்கிறேன். அதையும் மீறி யாரையேனும் நான் தெரிந்தோ, தெரியாமலோ காயப்படுத்தியிருந்தால் அதற்காக நான் மன்னிப்பு கேட்டுக் கொள்கிறேன்.  மன்னித்துக் கொள்ளுங்கள். 

கடைசியாக, எவ்வளவு கஷ்டத்தை கொடுத்தாலும், தீர்வுக்கு ஒரு வழியையும் காட்டி, அதனை அடைய வேண்டிய வழியையும் சொல்லிக் கொடுத்து என்னை இன்னமும் உங்களிடையே இருக்க வைத்திருக்கும் எனது அப்பன் முருகப் பெருமானுக்கு எனது கோடானு கோடி நன்றி..!

வாழ்க வளமுடன்..!

வலையுலகம் நீடூழி சிறக்கட்டும்..!

Tweet

தமிழ்மணத்திற்கும், சக வலைப்பதிவர்களுக்கும் நன்றி..! நன்றி..! நன்றி..!

28-02-2009

என் இனிய வலைத்தமிழ் மக்களே..

தமிழ்மணம் நடத்திய போட்டியில் எனது பதிவுகளை வெற்றி பெற வைத்த வலைப்பதிவர்கள் அனைவருக்கும் எனது இதயம் கனிந்த நன்றிகள்..

எனது எழுத்தினையும் படிக்கக் கூடிய ஒன்றுதான் என்ற ரீதியில் நீங்கள் அங்கீகரித்திருப்பது, நான் சோர்வடையாமல் இருந்து மேலும், மேலும் எழுதுவதற்கு என்னை மிகவும் ஊக்கப்படுத்துகிறது.

அதிலும் ஒரு பொருத்தமாக நமது எழுத்துலக ஆசான் சுஜாதா அவர்களின் அஞ்சலிப் பதிவு வெற்றி பெற்ற செய்தி, அந்த ஆசான் மறைந்த தினத்தன்றே வெளியானது எனக்கு நெகிழ்ச்சியைத் தருகிறது.

முதல் பரிசு, இரண்டாம் பரிசு என்பது ஒரு அளவீடுதானே ஒழிய, அதுவே முத்திரையல்ல.. இந்த அளவீடுகள் பதிவுக்கு பதிவு, தலைப்புக்குத் தலைப்பு மாறுபடும் தன்மை கொண்டது. பதிவர்கள் பலரும் பலவித குடும்பச் சூழல்களுக்கு மத்தியில் எழுத வருவதே மிகப் பெரிய விஷயம். அந்த வகையில் போட்டியில் கலந்து கொண்ட அனைத்து பதிவர்களுமே தத்தமது வெளிப்பாடுகளை அவரவர்க்கு ஏற்றவகையில் வெளிப்படுத்தியிருக்கிறார்கள். அத்தனை பேருமே வலையுலகின் எழுத்தாளர்கள்தான்.. சிறந்தவர்கள்தான்.. சந்தேகமில்லை..

நேரமும், சந்தர்ப்பமும் அனைவருக்கும் ஒரேவகையில் வாய்க்குமானால் இன்னும் சிறப்பாக பதிவர்களால் எழுத முடியும்.. அது அவர்களுக்கு கிட்டும் என்று நம்புகிறேன்..

ஆரோக்கியமான முறையிலும், நேர்மையான முறையிலும் போட்டியினை நடத்திய தமிழ்மணம் நிர்வாகிகளுக்கு எனது மனமார்ந்த நன்றியினைத் தெரிவித்துக் கொள்கிறேன்..

தொலைபேசியிலும், நேரிலும், பின்னூட்டத்திலும் வாழ்த்துச் சொன்ன அன்பர்கள் அனைவருக்கும் எனது நன்றிகள்..!

வலையுலகம் செழித்து வளரவும், பதிவர்கள் அவர்தம் குடும்பத்தினரும், வாசகர்களும் அவர்தம் குடும்பத்தினரும் நீடூழி வாழ வேண்டி என் அப்பன் முருகப் பெருமானை வேண்டிக் கொள்கிறேன்..

நன்றி

வணக்கம்.

Tweet

என்னைப் பின் தொடரும் பதிவர்கள்..!

24.02.2009

என் இனிய வலைத்தமிழ் மக்களே..!

வலைத்தளங்களின் தொழில் நுட்ப வசதிகள் ஒவ்வொரு மாதமும் மேம்பட்டுக் கொண்டே போகின்றன. அந்த வகையில் வந்த 'பின்தொடர்பவர்கள் பட்டியல்' பல பதிவர்களுக்கும் மிகவும் பயனுள்ளதாக இருக்கிறது.

நமது தளத்தின் மூலமாகவே நாம் அதிகம் பார்க்க விரும்பும் பதிவுகளை அலைச்சல் இல்லாமல் நம்மால் பார்க்க முடிகிறது. அதேபோல் அதிகம் பேர் பார்க்கிறார்கள் என்ற எண்ணிக்கையும் அந்தத் தளத்தின் பெருமையையும், மேன்மையையும் சொல்லாமல் சொல்கிறது.

அந்த வகையில் எனது பதிவு ஒவ்வொரு முறை திறக்கப்படும்போதும் புதிய நபர் யாராவது பின் தொடர்கிறார்களா என்று பார்ப்பதுண்டு. அதன் எண்ணிக்கை கூட, கூட இத்தனை பேர் கவனிக்கிறார்கள் என்பதால்.. இன்னமும் அதிக கவனமாக, ஈர்ப்புத் தன்மையுடன் எழுத வேண்டும் என்று மனம் பரபரக்கிறது.

அந்தப் பட்டியலில் இருப்பவர்கள் யார், யாரென்று பார்க்கலாம் என்று கிளிக் செய்து பார்த்தபோது திடீரென்று ஒரு யோசனை எழுந்தது.. 'அவர்கள் அத்தனை பேரையும் அப்படியே ஒரு பதிவில் இட்டு அறிமுகப்படுத்தினால் என்ன?' என்று என் சிந்தனை சிறகடித்து பறந்தது. அந்த சிந்தனையை சிதறடிக்காமல் இங்கே செய்து முடித்திருக்கிறேன்..

இன்றைய தேதி வரையிலும் மொத்தம் 56 பதிவர்கள் என்னைத் தொடர்ந்து வருகிறார்கள். அவர்களைப் பற்றிய அறிமுகங்கள் இங்கே..

1. இளவஞ்சி

http://konguvaasal.blogspot.com
http://ilavanji.blogspot.com
http://tamilcomic.blogspot.com

நவீன புனைவு எழுத்தாளர். ஆனா இப்பத்தான் 'எழுத மாட்டேன் போ'ன்னு சொல்லி அடம் புடிக்கிறார். 'கொங்குவாசல்' பதிவில் இவர் எழுதியிருக்கும் 'கொங்கு வட்டார வழக்கு மொழி' நமக்கு மிகப் பெரும் உதவி..

2. மோகன்தாஸ்

http://blog.mohandoss.com
http://baavaa.mohandoss.com

வலையுலகின் தலைசிறந்த பெண்ணியவாதி.. பின்நவீனத்திற்கும், முன் நவீனத்திற்கும் ஒரு பெரும் பாலமாக இருக்கும் பெங்களூரு மைனரு.. இவருடைய பின்னவீனத்துவ கட்டுரைகளைப் படித்துப் பாருங்கள், புரியும்..!

3. அதிஷா

http://www.athishaonline.comhttp://athisha123.blogspot.com

"ஏண்ணா இப்படி எழுதுறீங்க?"ன்னு அவனவன் போன்ல பேசி, திட்டி ஓய்ஞ்சுட்டாங்க.. இந்தப் பயபுள்ளை முதல்முதல்லா என்னை பார்த்தப்பவே சிகரெட்டால சூடு வைச்சு கோபத்தைத் தீர்த்துக்கிட்டான்ல..

4. அருப்புக்கோட்டை பாஸ்கர்

http://aruvaibaskar.blogspot.com

ஒரு காலத்துல துக்ளக் அட்டைப் படங்களையும், கருத்துப் படங்களையும் ஸ்கேன் செய்து போடுவதில் நான்தான் முதல் ஆளாக இருந்தேன். பின்பு என்னிடமிருந்து அந்தப் பெருமையைத் தட்டிப் பறித்த புண்ணியவான் இவர்தான்.. நான்தான் இவரோ என்று நினைத்து எனக்கு ஏகப்பட்ட மிரட்டல்களும், அன்பு மடல்களும் போலிக் கூட்டத்திடமிருந்து வந்து குவிந்தது.

5. தென்றல்

http://nanayam2007.blogspot.com
http://thendral2007.blogspot.com

முக்கியமான எனது எல்லாப் பதிவிலேயும் இவர் ஆஜராயிருப்பாரு..

6. அருண்குமார்

http://thamizthoughts.blogspot.com

பெங்களூரு தம்பி.. ஒரு விதத்துல போலியையும், அவனது அல்லக்கைகளையும் காலி செய்து, இன்னிக்கு வலையுலகம் கொஞ்சம் நிம்மதியாக இருக்கிறதுக்கு ரொம்பவே உதவியிருக்கிறவரு.. ஆனா ரொம்ப அடக்கமானவரு.. யார்கிட்டேயும் சிக்காதவரு..

7. வரதராஜ்-துபாய்

http://musikvrdrj.blogspot.com

புத்தம் புதிய திரைப்படங்களை ஆன்லைனில் இறக்குமதி செய்யும் லின்க்குகளை தனது தளத்தில் கொடுத்து வைத்திருக்கிறார்.. ஆளை விடாதீங்க.. பிடிங்க..

8. சுரேஷ்கண்ணன்

http://pitchaipathiram.blogspot.com

'நான் பார்க்கணும்.. பேசணும்'னு விடாம துரத்திக்கிட்டிருக்கேன்.. போன் நம்பரைக் கூட கொடுக்காம டபாய்ச்சுக்கிட்டிருக்காரு அண்ணன்..

9. கூடுதுறை

http://paakeypa.blogspot.com

நான் எப்பல்லாம் சோகக்கதை, ஆன்மீகக் கதையெல்லாம் எழுதறனோ, அந்த நேரத்துல 'டான்'னு வந்து நின்னு கண்ணீரைத் துடைச்சுவிடுவாரு.. அவ்ளோ பாசமானவரு..

10. கொங்கு ராசா

http://raasaa.blogspot.com

இவரைப் பத்தி முன்னாடி தப்பா எழுதிட்டேங்க.. இப்ப திருத்திக்கிறேன்..

இவர் ஒரு மூத்தப் பதிவருங்கோ.. 2004-ல இருந்து எழுதிட்டு வர்றாருங்க.. இவரைப் பார்த்துதான் பல பேரு வலைக்குள்ளாற பூந்திருக்காங்க.. கொங்கு வழக்குப் பேச்சு இவர் பதிவுல விளையாடுதுங்கோ.. போய்ப் பாருங்கோ..

முன்னாடி தப்பா எழுதினதுக்கு மன்னிச்சுக்குங்க..

11. விசு என்கிற பொ.விசுவநாதன்

http://vichumsc.blogspot.com

அண்ணே.. பின்னாடி மட்டும்தான் வருவாரு போலிருக்கு..

12. தமிழ்மகன்

http://tamilmagan.blogspot.com

சினிமாவுலகில் இருந்தும், சந்திக்க முடியாத சூழலால் தொலைபேசியில் மட்டுமே பேசிக் கொள்ளும் நல்லதொரு நண்பர்.

13. வெயிலான்

http://veyilaan.wordpress.com

யாருய்யா இந்தாளு..? கோயம்புத்தூர் பக்கம் போற, வர்ற ஆளுக எல்லாரும் "வெயிலானை பார்த்தேன்.. நல்லா பேசினாரு.. சூப்பரா கவனிச்சாரு.. போக்குவரத்துச் செலவுக்கான பணத்தைக்கூட கைல திணிச்சு அனுப்பினாரு"ங்குறாங்க.. என்னை மட்டும்தான் கூப்பிட மாட்டேங்குறாரு..! வைச்சுக்குறேன் ஒரு நாளு..!

14. விஜயராகவன் சீனிவாசமூர்த்தி

http://sujaarun.blogspot.com

இவரும் புதுமுகம்தான்.. பதிவை படிக்க மட்டுமே செய்வார் போலிருக்கிறது.. பரவாயில்லை.. படிக்கிறாரே அதுவே பெரிய விஷயமாச்சே..

15. அக்னிபார்வை

http://agnipaarvai.blogspot.com

ஒரு பத்து நிமிட தாமதத்தால் டிசம்பர் மாத உலகத் திரைப்பட விழாவில் உட்லண்ட்ஸ் தியேட்டரில் சந்திக்க முடியாமல் போய்விட்டது இந்த நண்பரை.. அடுத்த வருட திரைப்பட விழாவில்தான் சந்திக்க முடியும்போல் உள்ளது.

16. வான்முகிலன்

http://vaanmuhilan.blogspot.com

இப்போதுதான் படித்தேன்.. நீங்களும் படித்துப் பாருங்கள்..

17. சினிமா ரசிகன்

http://kollywoodkondattam.blogspot.com

முன்பெல்லாம் எனது சினிமாப் பதிவுகளுக்கு வரிந்து கட்டிக் கொண்டு வருவார். இப்போது வருவதேயில்லை..

18. மடல்காரன்

http://kbmadal.blogspot.com

நீண்ட நாளாகவே பதிவுலகில் உள்ளார். ஆனால் அவ்வப்போதுதான் தலையைக் காட்டுவார்..

19. வலையில் உலாவும் வாசவன்

http://valaivesumvasavan.blogspot.com

இவரை இப்போதுதான் தரிசிக்கிறேன்.. இவருடைய தளத்தின் முகப்பில் இருக்கும் குழந்தை புகைப்படம் கொள்ளை அழகு..

20. மேத்யூ

http://enbathamil.blogspot.com

தளம் விரியவே இல்லை.. என்ன பிரச்சினை..?

21. நித்யகுமாரன்

http://nithyakumaaran.blogspot.com

உள்ள நுழையும்போது ‘டவுசர் பாண்டி’யா வந்தான்யா.. இப்ப ‘பருத்தி வீரனா’ மாறிட்டான்.. ஆனா ‘சொக்கத் தங்கம்..!’

22. செந்தழல் ரவி

இம்சை.. பெங்களூரு தப்பிச்சு ஹாலந்து மாட்டிக்கிச்சு.. அந்த நாட்டுக்காரங்க எப்படி சமாளிக்கிறாங்களோ தெரியலையே..?

23. மெட்ராஸ்காரன்

http://meeramunna.blogspot.com

நானும் இவருக்குப் புதுசுதான்..

24. அதிரைபோஸ்ட்

http://fromtamil.blogspot.com

பலவித அரசியல் கட்டுரைகளை எழுதி வருகிறார்.. அவ்வப்போது படித்ததுண்டு..

25. சத்யா

http://msathia.blogspot.com

நானும் இப்போதுதான் படித்தேன்.. ஜெயாக்கா கதை மனதை என்னமோ செய்கிறது..

26. பரக்கத் அலி

http://barakathalinews.blogspot.com

நாட்டு நடப்புகளை உடனுக்குடன் வலையுலகில் பரப்பி வரும் பரக்கத்அலி எனது நண்பர்.. கூடிய சீக்கிரம் எல்லாருக்கும் நண்பராகிவிடுவார்.. அவர்கிட்ட எதுக்கும் போன் நம்பர் வாங்கி வைச்சுக்குங்க.. ஆபத்துக்கு உதவும்..

27. சண்முகா இலங்கேஸ்வரன்

http://shanmugha.blogspot.com
http://itvav.blogspot.com

இந்தத் தளத்தைப் பார்த்தவுடன் ஆச்சரியமு்ம், அதிர்ச்சியும் அடைந்தேன். இலங்கை, வவுனியாவில் கணினி பயிற்சி நிலையம் ஒன்றை நடத்தி வருகிறாராம் இந்த இனிய நண்பர் சண்முகா இலங்கேஸ்வரன்.

நான் இதுவரையிலும் இந்தப் பெயரையும், வவுனியாவில் இருந்து பதிவேற்றி வரும் இவரைப் பற்றியும் கேள்விப்பட்டதில்லை.. என்னையும் தொடர்ந்து வந்திருக்கிறார்.. இவ்வளவு நாட்கள் கவனிக்காமல் இருந்தது குறித்து எனக்கே வெட்கமாக உள்ளது.. தளத்திற்குச் சென்று படித்துப் பாருங்கள்.

இவருடைய இந்தத் தளத்தில் பலதரப்பட்ட விஷயங்களையும் சுவாரசியமாக அனாயசமாக எழுதியிருக்கிறார் இந்த கணினி ஆசிரியர்.

28. கண்ணாநேசன்

http://kannanesan.blogspot.com

இவரும் புதுமுகம்தான்.. கொஞ்சம்தான் எழுதியிருக்கிறார்.

29. வேத்தியன்

http://jsprasu.blogspot.com

ஈழத் தமிழர் என்பது எழுத்துக்களில் இருந்து தெரிகிறது.. நானும் இப்போதுதான் படிக்கிறேன்..

30. Shan Nalliya

http://worldtamiltravellersforum.blogspot.com

நான் பார்த்தவர்களிலேயே இவர்தான் அதிகம் பேரைப் பின் தொடர்ந்து ஓடிக் கொண்டிருக்கிறார் என்று நினைக்கிறேன்.

அதேபோல் அதிகமான சொந்தத் தளங்களை வைத்திருப்பவரும் இவராகத்தான் இருப்பார் என்று நினைக்கிறேன்.

உள்ளே சென்று பாருங்கள்..

31. திரட்டி.காம்

http://thiratti1.blogspot.com

திடீரென்று திரட்டியாக உருவெடுத்து நம்மையும் சேர்த்துக் கொண்டு, அதில் தம்மையும் இணைத்துக் கொண்டு பவனி வருகிறார் வெங்கடேஷ்.

32. குடுகுடுப்பை

http://kudukuduppai.blogspot.com

மொக்கைக்கும், சீரியஸுக்கும் மாறி, மாறி பின்னூட்டமிடுவதில் வல்லவர்.. பின்னூட்டங்கள் ஒன்று, இரண்டெல்லாம் போடுவதில்லை. இவருக்கு பிரெஸ்டீஜ் குறைந்துவிடுமாம்.. குறைந்தது 5 அல்லது 10தானாம்..

33. ஷண்முகப்பிரியன்

http://shanmughapriyan.blogspot.com

உதவி இயக்குநரு, கதாசிரியரு, திரைப்படம் இயக்கும் முயற்சியில் உள்ளோர் அப்படி, இப்படீன்னு சினிமாக்காரங்களும் இருக்காங்கன்னு சொல்லிட்டிருந்த வலையுலகத்துல திடீர்ன்னு நம்ம இயக்குநர் ஷண்முகப்பிரியன் ஸாரும் வந்து களத்துல குதிச்சிருக்காரு..

கிட்டத்தட்ட 30 வருட கால திரையுலக அனுபவஸ்தர். இதுவரையில் 4 திரைப்படங்களை இயக்கியுள்ளார். புகழ் பெற்ற, நம்மால் மறக்க முடியாத "ஒருவர் வாழும் ஆலயம்" திரைப்படத்தின் இயக்குநரே நமக்கு வலையுலக நண்பராக வந்திருப்பதில் நிச்சயம் நான் பெருமைப்படுகிறேன். மேலும் 'பாட்டுக்கு நான் அடிமை' ("பிழிஞ்சு காயப் போட்டுட்டேன்" என்ற டயலாக் எத்தனை, எத்தனையோ இடங்களில் பயன்படுத்தப்பட்டது.) 'மதுரை வீரன் எங்க சாமி', 'உதவும் கரங்கள்' என்று 4 திரைப்படங்களை இயக்கியிருக்கிறார்.

திரையுலகில் கதாசிரியர்களுக்கு தனித்துவம் கிடைத்துக் கொண்டிருந்த காலத்தில் நம்ம ஷண்முகப்பிரியன் அவர்களின் கதைகளும் பல நல்ல திரைப்படங்களாக உருவெடுத்துள்ளன..

'உறவாடும் நெஞ்சம்', 'உங்களில் ஒருத்தி', 'உறங்காத நினைவுகள்', 'ஆணிவேர்', 'ஈட்டி', 'ஆயிரம் முத்தங்கள்', 'அன்று முதல் இன்றுவரை', 'சின்னத் தம்பி பெரிய தம்பி', 'வெற்றி விழா', 'தழுவாத கைகள்', 'பிரம்மா', 'மகுடம்', 'ஆத்மா', 'ஒன்ஸ்மோர்' என்று 30-க்கும் மேற்பட்ட திரைப்படங்கள் இவருடைய கதையில்தான் உருவாகியுள்ளன.

மேலும் 'நினைவே ஒரு சங்கீதம்', 'மெல்லத் திறந்தது கதவு', 'ஆஞ்சநேயா' போன்ற திரைப்படங்களின் கதையை இணைந்து உருவாக்கியுள்ளார்.

தமிழ் மட்டுமன்றி கன்னடத்தில் 'உஷா சுயம்வரம்', 'அதறு பதறு' என்று சில படங்கள் இவருடைய கதையில் உருவாக்கப்பட்டுள்ளன.

அவருடைய தளத்தைப் பார்த்து, படித்து முதலில் பயந்துதான் போனேன். அவருடைய முதல் சில பதிவுகளைப் படித்துப் பாருங்கள்.. புரியும்.. பின்நவீனத்துக்கே சவால் விடுவதைப் போல் 'புரியவே மாட்டேன்' என்று அடம் பிடித்தது. பின்பு இப்போதுதான் ஏதோ கொஞ்சம் எனக்கும் புரிவதைப் போல் இறங்கி வந்து எழுதுகிறார்.

நேரிலும் சந்தித்தேன். மனிதர் அற்புதமாகப் பேசுகிறார். நிமிடத்திற்கு நிமிடம் சிரிக்கிறார். இவருடன் பேசும்போது நமது கவலைகள்கூட கொஞ்சம் ஓரம்கட்டப்பட்டு நாமும் உற்சாகமாகிவிடுவோம். இப்போதும் இளைஞர்களுக்கு சமமாக பேசுவதிலும், எழுதுவதிலும் மிக விருப்பமுடையவராக இருக்கிறார் இந்த 60 வயது இளைஞர்.. பழகிப் பாருங்கள் தெரியும்..

34. ஊர்சுற்றி

http://oorsutri.blogspot.com

அன்றாட நிகழ்வுகளின் மீது சாமான்யனுக்கு எழும் கோபங்களை மிக ரத்தினச் சுருக்கமாக சில கட்டுரைகளாக ஆக்கம் செய்திருக்கிறார்.

35. மருள்நீக்கி

http://marulneekki.blogspot.com

சென்ற டிசம்பர் மாதம்தான் எழுதத் துவங்கியிருக்கிறார். ஈழத் தமிழர் என்று நினைக்கிறேன்.. அமெரிக்காவில் இருப்பதுபோல் தெரிகிறது.. மூங்கையன் மொழி என்று பதிவிற்குத் தலைப்பு வைத்துள்ளார். அது என்ன மொழி என்று தெரியவில்லை. அதோடு கூடவே எழுதியிருக்கும் "அன்பெனும் நறவம் மாந்தி மூங்கையன் பேசலுற்றான்.. என்ன யான் மொழியலுற்றேன்" என்ற வார்த்தைகளுக்கு என்ன அர்த்தம் என்று தெரியவில்லை.. புரியவில்லை.. .

36. மகா

http://tamil1234.blogspot.com

இலங்கை மக்கள்பால் அனுதாபத்தோடு பல கவிதைகளையும், வன்னி மக்கள் கொல்லப்பட்ட சம்பவத்தை புகைப்படங்களோடு சொல்லியிருக்கிறார்.

37. சங்கர்

http://www.blogger.com/profile/13602192161584088050

இவர் வலைத்தளம் இல்லாமல் ஜிமெயில் மூலம் இணைப்பு கொடுத்துள்ளார்.

38. விஸ்வநாதன்

http://kundappaviswanath.blogspot.com

ஞாநியின் பாரதிக்கு ஒரு பொட்டு வைத்து மேலும் அழகுபடுத்தி வைத்திருக்கிறார். ஞாநிக்கு இது தெரியுமா என்று தெரியவில்லை.. தெரிந்தால் கோர்ட்டு, கேஸ்.. உறுதி!

39. மாயாவி

http://kundappaviswanath.blogspot.com

இவருடைய தளமும் துவக்கப்பட்ட நிலையிலேயே உள்ளது.

40. ரகு முத்துக்குமார்

http://rithumohitha.blogspot.com

இன்னொரு பாசக்கார அப்பா. 'ரித்துவின் அப்பா' என்ற பெயரில் எழுதுகிறார்.

41. பிரான்சிஸ் சைமன்

http://bryanisaac.blogspot.com

அதிகம் கவிதைகள்தான் உள்ளன. அனைத்துமே சோகத்தைப் பிழிந்தெடுக்கி்ன்றன.

42. பிரபு

http://www.blogger.com/profile/03660633360455517585

இந்த பிளாக்கர் லின்க் மட்டுமே கிடைக்கிறது..

43. IRAPEKE

http://irapeke.blogspot.com

எப்போதும் வாழ்க்கை அழகானதுதான் என்கிறார் இவர்.

44. பொற்கோ

http://porkovaanan.blogspot.com

இப்போதுதான் ஆரம்பித்திருக்கிறார் போல் தெரிகிறது..

45. தண்டோரா

http://vilambarakkaaran.blogspot.com

இந்த மாசந்தான் ஆரம்பிச்சிருக்காரு.. போகப் போகப் பிக்கப் ஆவாருன்றது அவரோட எழுத்துல தெரியுது.. முதல் பதிவே ஆள் எப்படின்னு காட்டுது..

46. பாட்டாளி

http://paattaalinpakkangal.blogspot.com

இதிலேயும் ஒன்றும் இல்லை.. துவக்க விழாவோடு நிறுத்தி வைத்திருக்கிறார்.

47. ஹாலிவுட் பாலா

http://hollywoodbala.blogspot.com

ஹாலிவுட் திரைப்படங்களை அலசி, ஆராய்ந்து, சாறு பிழிந்து, சக்கையெடுக்கும் புத்தம் புதிய ஹாலிவுட் பதிவர்.

48. சர்வேசன்

http://surveysan.blogspot.com

சொல்லணுமா..?

49. வால் பையன்

http://valpaiyan.blogspot.com

கெட்ட வாலாச்சே.. தெரியுமே உங்களுக்கு.. கொஞ்சம் தள்ளியே நில்லுங்க..

50. மலர்

http://globetrotter360.blogspot.com

புதுசு கண்ணா புதுசு.. "திரட்டின்னா என்னங்கண்ணா?"ன்னு கேட்டு என்னை அலற வைச்சிருச்சு குழந்தை..

51. சுபாஷினி

http://baluthemagician.blogspot.com
http://entamilulagam.blogspot.com
http://iniyasamaiyal.blogspot.com

ஒண்ணுல்ல.. மூணு வைச்சிருக்காகளாம் அக்கா..

52. அத்திரி

http://rajkanss.blogspot.com

வஞ்சகமில்லாம வந்து பின்னூட்டத்தை வாரி வழங்கும் புதுசு..

53. தேனியார்

http://palapponamanasu.blogspot.com

கோபக்காரர்.. சந்தேகம் இருந்தா ரஜினியை பத்தி ஏதாவது சொல்லிப் பாருங்க..

54. அப்பாவி தமிழன்

http://mycamerafotos.blogspot.com
http://tamilwares.blogspot.com
http://technotamil.blogspot.com

இவரும் மூணு தளம் வைச்சுக்கிட்டு பயமுறுத்துறார்.. தமிழ் சாப்ட்வேர் பத்தினது எனக்கு ரொம்ப உதவுச்சு.. மிக்க நன்றிங்கோ..

55. ஜாக்கிசேகர்

http://jackiesekar.blogspot.com

ங்கொய்யால. நீயே இப்பத்தான் 55-வது ஆளா சேர்றியா..? உனக்கெல்லாம் வேப்பிலை அடிக்கணும்யா.. மக்களே.. நம்ம ஜாக்கி, வாழ்க்கையில் மிகவும் அடிமட்ட நிலைமையில் இருந்து உயர்ந்திருக்கும் உழைப்பின் சிகரம்.. பழகுவதற்கு இனியவர்.. வெளிப்படையாகப் பேசுபவர். ‘சிறந்த தங்கமணி’ என்கிற பட்டத்தை தாராளமாக இவருக்கு வழங்கலாம்.

56. தமிழ்நேசன்

http://tamilarnesan.blogspot.com

இவரும் புதியவர். இயற்பெயர் சிவாபிரகாசம். “சராசரி தமிழனின் சமூகம் மீதான பார்வைகளை பிரதிபலிக்கிறேன்” என்கிறார் இவர். வாழ்த்துகிறேன்..

நேற்று 60 பதிவர்கள் இருந்தார்கள். கடைசியாக நான் எழுதிய இந்தப் பதிவில் வந்த "நீயும் எல்.டி.டி.ஆளா?” என்ற அனானி ஒருவரின் கேள்விக்கு "இல்லை" என்று நான் பதிலளித்த 1 மணி நேரத்தில், 4 பதிவர்கள் தங்களது பார்வையை வாபஸ் வாங்கிக் கொண்டுள்ளார்கள். அவர்களுக்கும் எனது நன்றி.

பதிவர்களே..

என்னையும் ஒரு ஆளாக மதித்து "நாங்கள் இத்தனை பேர் உன்னைப் பின் தொடர்கிறோம்..” என்று சொல்லியிருப்பது எனக்கு நிச்சயம் பெருமையளிக்கும் விஷயம்தான்..

நீங்களும் உங்களைப் பின் தொடர்பவர்களை இதே போல் லிஸ்ட் எடுத்து அவர்களது பெயர்களை வெளியிட்டு மற்றவர்களுக்கு அறிமுகப்படுத்தினால், வலையுலகத்தில் பதிவர்கள் ஒருவருக்கொருவர் அறிமுகமாவது பலருக்கும் மிக, மிக சுலபமான வழியாக அமையும்.

ஏதோ எனக்குச் சொல்லத் தோன்றியது.. சொல்கிறேன்..

நன்றி

வணக்கம்.

Tweet

இந்தப் பதிவர்களை விடாதீர்கள்..!

24-02-2009

என் இனிய வலைத்தமிழ் மக்களே..!

தினமும் சென்னைக்கு வந்திறங்கும் புதிய நகரவாசிகளின் எண்ணிக்கையில் பாதி அளவுக்காகவாவது புதிய, புதிய வாசகர்கள் தினந்தோறும் பதிவுலகத்திற்குள் பிரவேசித்தவாறே உள்ளார்கள்.

அப்படி உள் நுழைந்தவர்கள் பதிவுலகின் வாசனையும், கிறக்கமான சூழ்நிலையையும் கண்டு உற்சாகமாகி தாங்களும் ஒரு பதிவர்களாகி எழுத்து ஜமாவில் தங்களை ஐக்கியமாக்கிக் கொண்டே வருகிறார்கள்.

பதிவு எழுதியே நாசமாப் போனவர்கள் பட்டியலில் நான் முதன்மையானவனாக இருந்தும் புதிய புதிய பதிவர்களைப் பார்க்கின்றபோதும், அவர்களுடைய எழுத்துக்களை வாசிக்கின்றபோதும் பதிவுலகின் மாயவலை என்னைக் கைவிட மறுக்கிறது.. நானும் கள் குடித்த குரங்காய் இங்கேயே சுற்றிச் சுற்றி வர வேண்டியிருக்கிறது.

புதிய பதிவர்கள் என்றில்லாமல் நீண்ட நாட்களாக எழுதுபவர்களாக இருந்தாலும் பதிவுலகின் பதிவு அரசியல் தெரியாமல் உழன்று வருவதால், அவர்களுடைய பதிவுகள் பெரும்பாலான பதிவுலகத்தினரை சென்றடைவதில்லை. அப்படி நான் பார்த்த சிலரின் பதிவுகளை இங்கே குறிப்பிட விரும்புகிறேன்.

1. பென்ஸ்

இந்த மனிதர் என்றைக்கு எனது தளத்தை படித்தார்..? எப்படி படித்தார் என்பது தெரியவில்லை. ஆனால் எனக்கு அறிமுகமான நாளிலிருந்து ஒரு பதிவு விடாமல் எனக்குப் பின்னூட்டம் போட்டு தாளித்துக் கொண்டிருக்கிறார். அதுலேயும் ஒரு பின்னூட்டமெல்லாம் போடவே மாட்டார். இரண்டு, நான்கு, ஆறு என மடங்குக் கணக்கில்தான் பின்னூட்டங்களை அள்ளி வீசிக் கொண்டிருக்கிறார்.

இதில் ஆச்சரியம் இவர் ஒரு இலங்கை தமிழர். என்னையும் வாசிக்கும், என்னைப் பிடிக்கிறது என்று சொல்லும் இலங்கை தமிழர். இதைவிட ஆச்சரியம் இவருடைய வயது 71. அப்படியானால் நம்மிடையே இருக்கும் வயதான பதிவர்களில் இவரும் ஒருவர். ஆஸ்திரேலியாவில் குடியிருக்கிறார்.

கொண்ட கொள்கையில் சிங்கம். கொள்கையில் 'சிங்கமாக' இருப்பதால் தீவிரமான 'புலி' எதிர்ப்பாளராக விளங்குகிறார். ஈழத் தமிழில் பேசியும், எழுதியும் பெயரிலி போன்றவர்கள் பல தமிழ் மொழிகளை நமக்குக் கற்றுக் கொடுத்திருக்கும்வேளையில் இவரும் ஒரு மொழியினைக் கற்றுக் கொடுக்கிறார். அதுவும் தமிழ்தானாம்.. படித்துப் பாருங்கள்.. மொழியால் தலை சுற்றினால் அதற்கு நான் பொறுப்பல்ல.. இவருடைய முகவரி இது http://kavanitha.blogspot.com.

2. கலையரசன்

http://kalaiy.blogspot.com

உலக நாடுகளின் தற்போதைய நிலவரம், கலவரம் மற்றும் பிரச்சினைகள் பற்றி துல்லியமாக துப்பறிந்து எழுதுகிறார் பதிவர் கலையரசன். நானும் இவரது தளத்தை மேய்ந்துதான் உலக நாடுகள் பற்றிய எனது பொது அறிவை வளர்த்து வருகிறேன்.. தயவு செய்து மறந்தும் புறக்கணிக்க முடியாத வீடு இவருடையது.. விட்டுவிடாதீர்கள். வாழ்த்துக்கள் கலையரசன்.

3. திருமதி.பிரியா கதிரவன்

SYNAPSE என்பதை தளத்தின் தலைப்பாக வைத்திருக்கும் திருமதி பிரியா மிகச் சிறப்பாக எழுதி வருகிறார். திரட்டிகளில் இணைந்துள்ளாரா என்று எனக்குத் தெரியவில்லை. ஆனால் இட்லிவடை மூலமாக லின்க் கிடைத்து சென்று படித்தேன். அற்புதமாக உள்ளது. அவருடைய இந்த ஒரு பதிவே அவர் யாரென்று காட்டுகிறது.. நானெல்லாம் பிச்சை எடுக்கணும் போல இருக்கு.. வாழ்த்துக்கள் பிரியா.

4. மாடசாமி

ஏற்கெனவே வலையுலகில் இருக்கின்ற பின்னவீனத்துவ சாமிகளையே சமாளிக்க முடியாமல் நாம் தவித்துக் கொண்டிருக்கும்போது, இன்னொரு பின்னவீனத்துவம் அவதாரமெடுத்து வந்திருக்கிறது. பெயர் மாடசாமி. அற்புதமான கணினி கலைஞர். போர்க்குணமிக்கவர். பா.ராகவனின் நான் கடவுள் விமர்சனத்தைப் படித்துவிட்டு கொதித்துப் போய் ஒரு தாக்குத் தாக்கிவிட்டு வந்திருக்கிறார். அதுதான் அவரது முதல் பின்னூட்டம். அதுவே அப்படியென்றால், இப்போது வலையில் உட்புகுந்து பின்னி பெடலெடுக்கப் போவதாகச் சொல்லி பயமுறுத்துகிறார்.

ஏற்கெனவே பல மாதங்களுக்கு முன்னால் ஒரு பதிவை
ஆரம்பித்துவிட்டு, “போடப் போறேன்.. போடப் போறேன்”னு பயமுறுத்துக்கிட்டிருந்தாரு. அதுல இருக்குற படத்தையெல்லாம் பார்த்துட்டு எனக்கு காய்ச்சலே வந்திருச்சு. “சாமி.. இது மாதிரி படமெல்லாம் போட்டீன்னா, எங்க வலையுலக பிள்ளைக கெட்டுப் போயிரும்.. ஏற்கெனவே நாலைஞ்சு பேரு ‘அந்தக் கதை’, ‘இந்தக் கதை’ன்னு சொல்லி பச்சைப் புள்ளைக மனசைக் கெடுத்துப்புட்டாங்க.. நீயும் சேர்ந்து ஆடிராத சாமி"ன்னு கெஞ்சிக் கூத்தாடி அந்தப் போட்டோவை எடுக்கச் சொன்னேன்.

நம்மளோட நல்ல நேரம்.. மாடசாமிக்கு அந்தப் பதிவோட பாஸ்வேர்டு மறந்து போச்சாம். வசதியாப் போச்சு.. “வேற புது தளம் ஒண்ணை ஆரம்பி.. ஆனா, வேற போட்டோவை போடு..”ன்னு பக்கத்துலேயே உக்காந்து ஸார் என்ன போட்டோவை எடுக்குறாருன்னு செக் பண்ணி போட வைச்சு, அவரோட புதிய இந்தப் பதிவை நானே துவக்கி வைச்சிருக்கேன். அது இதுதான்.. http://www.sowkkiyama.blogspot.com.

படிச்சுப் பாருங்க.. பிடிச்சிரும்.. பிடிக்கும்.. ஒரு பின்னூட்டத்தைத் தட்டி விடுங்க.. அப்புறம்தான் தொடர்ந்து எழுதுவாராம்.. இவர் எழுதறதும், எழுதாததும் உங்க கைலதான் இருக்கு.. சொல்லிட்டேன்..

5. மது கிருஷ்ணா

சீனால இருக்காங்களாம்.. IMEANDMYSELF அப்படீன்னு தளத்துக்கு பேரு வைச்சிருக்காங்க.. என்னன்னுதான் புரியல.. ஆனா எழுத்து நல்லாயிருக்கு.. ஏன் இன்னும் திரட்டில சேரலைன்னு தெரியலை.. படிக்க விரும்புறவங்க அங்கன போயி படிச்சிட்டு அப்படியே இவுகளை தொடர்றவங்களைப் பாருங்க.. அது ஒரு உலகம் தனியா இருக்குது போல.. திரட்டிகள்ல சேராம எழுதுறவங்க.. ஆனா நல்லாயிருக்குதேய்யா.. என்ன செய்யறது.. தேடிப் பிடிச்சுத்தான் படிக்கணும் போலிருக்கு.. இவுக முகவரி இது http://mathukrishna.blogspot.com.

6. கோபி

ரஜினியின் அதி தீவிர ரசிகராம். இப்போதுதான் எழுதத் துவங்கியிருக்கிறார். ஆனால் எழுத்து முழுவதுமே ஏதோ மூன்றாம் உலகத்தில் இருப்பவைகள் பற்றியும், அதுகளைப் பற்றியுமே என்று வித்தியாசமாக இருக்கிறது. சென்று படித்துக் கொள்ளுங்கள். இவருடைய முகவரி இது http://jokkiri.blogspot.com.

இந்தப் பட்டியல் மென்மேலும் தொடரும்.

நன்றி..

வணக்கம்..

Tweet

குசும்பனுக்கு ஒரு எச்சரிக்கை

குசும்பா..

அடங்குவாய் என்று நினைத்துத்தான் கால்கட்டுப் போட்டோம்.. நிச்சயம் அடங்க வேண்டும் என்று நினைத்துத்தான் அனைவரும் வாழ்த்துச் சொன்னோம்.. அடங்கியே ஆக வேண்டும் என்று சொல்லித்தான் பரிசுப் பொருள்களை வழங்கினோம்.. இன்னமும் அடங்காமல் ஆடினால் என்ன அர்த்தம்..?

எங்கே பார்த்தாலும் குசும்பன்.. எதில் பார்த்தாலும் குசும்பன்.. குசும்பன் இல்லாத வலைப்பதிவே இல்லை என்பது மாதிரி வலையுலகம் தத்தளித்துக் கொண்டிருக்கிறது.

"அடங்க மறு" என்பதெல்லாம் காட்டில் வாழும் சிங்கங்களுக்கும், கழுதைப் புலிகளுக்கும் மட்டுமே சொன்னது.. குசும்பா உனக்கல்ல..

மொக்கைப் பதிவை போடவே கூடாது, மாட்டேன் என்று கங்கணம் கட்டிக் கொண்டிருந்த, என்னை இப்படியொரு பதிவை போட வைத்துவிட்டாயே கிராதகா..

நான் என்ன சொல்லி வாழ்த்தினேன் ஞாபகமிருக்கிறதா..? “பதினாறும் பெற்று பெருவாழ்வு வாழு..” என்றேன்.. பரவாயில்லை.. இப்போதும் வாபஸ் வாங்க மாட்டேன்.. ஆனால் கூடுதலாக ஒன்றையும் சொன்னேன்.. “பார்சலைப் பிரித்துப் பார்த்துவிட்டு அலமாரியில் வைக்கக்கூடாது.. அட்டை டூ அட்டை படித்துப் பார்த்து அர்த்தம் புரிந்து உணர வேண்டும். உணர்த்தியதை வெளிப்படுத்த வேண்டும்” என்றேன்.. மறந்துவிட்டதா..?

உனக்காக, உனக்கு நல்ல புத்தி வர வேண்டுமென்பதற்காக அவசரம், அவசரமாக ஓடோடிப் போய் கடையைப் பூட்டப் போன நேரத்தில் கடைக்கார அம்மணியிடம் கெஞ்சிக் கூத்தாடி அந்த விலை மதிக்க முடியாத புத்தகத்தை வாங்கி வந்தேன்..

என் ஸ்கூல் புத்தகத்திற்குக்கூட நான் இப்படி ஒழுங்காக அட்டை போட்டதில்லை. முந்தின நாள் பெய்த மழையோடு மழையாக கடைக்கு ஓடிப் போய் குசும்பனுக்கு சிவப்பு கலர்தான் பிடித்தமானது என்று சொல்லி அதே நிறத்தில் அட்டை வாங்கி புத்தகத்திற்கு அதனைப் போர்வையாகப் போர்த்தி, கூடவே அதற்குப் பொட்டு வைத்து, இரவு முழுவதும் என் தலைமாட்டிலேயே வைத்திருந்து அவ்வப்போது பார்த்துப் பார்த்து வைத்திருந்தேன்.. தெரியுமா உனக்கு..?

சந்திப்பு நாளன்று காலையில் எழுந்தவுடனேயே பல்லைக்கூட விளக்காமல் மறந்து விடுவோமோ என்றெண்ணி எனது பி.எம்.டபிள்யூ., வண்டியின் சைட் பாக்ஸில் எடுத்து வைத்துவிட்டு, அதையும் பத்து நிமிடத்திற்கொரு முறை பூட்டியிருக்கிறதா என்று சோதனை செய்துபார்த்து பைத்தியம் போல் இருந்தேன்.. இதையெல்லாம் நான் அன்றைக்கே http://truetamilans.blogspot.com/2008/04/30.html - இந்தப் பதிவில் எழுதவில்லை.

எழுதியிருந்தால் “கால் லூஸ¤, அரை லூஸ¤, முக்கால் லூஸ¤, முழு லூஸ¤” என்று நீயே அனானி பெயரில் போட்டுத் தாக்கியிருப்பாய் என்பது எனக்குத் தெரியுமடா குழந்தை..

ஆனாலும் அவ்ளோ தூரம் ஆசையாய், அன்பாய், பாசமாய் வாங்கிக் கொடுத்த அந்தப் புத்தகத்தின் ஒரு பக்கத்தையாவது நீ இதுவரையில் படித்தாயா என்பது எனக்குத் தெரியவில்லை. ஊருக்குப் போனதும் ஒரு வரி “புத்தகம் நன்று.. அருமை.. பிடித்திருந்தது” என்று எழுதினாயா..? இல்லையே.. உனக்குத்தான் இங்கே வெட்டித்தனமாக கும்மியடிக்கவே நேரமில்லையே..

எந்தப் பதிவிற்குள் கால் வைத்தாலும் உன் பெயர்தான் இருக்கிறது. அதுவும் ஒரே பதிவில் 20 இடங்களில்கூட பார்த்துத் தொலைத்தேன். இதற்கெல்லாம் எங்கேயிருந்து கிடைக்கிறது நேரம்..? இந்த நேரத்தில் அந்தப் புத்தகம் முழுவதையும் படித்து முடித்திருக்கலாமே.. எனக்கும் சொல்லியிருக்கலாமே..

குசும்பா கடைசியாக கேட்கிறேன்..

இனிமேல் எனக்கு மடல் எழுதி சொல்ல வேண்டாம்.. இதுவரையில் செய்யாததற்கு தண்டனையாக 25 பக்கத்திற்கு அந்தப் புத்தகம் பற்றி உனது பதிவில் விமர்சனம் எழுத வேண்டும்.

எழுதாவிட்டால் நீ அடுத்த முறையும் இங்கு வரும்போது அதே புத்தகம் உன் கையில் திணிக்கப்பட்டு, அங்கேயே அதனைப் பிரித்துப் படிக்கும் ஸ்கூல் தண்டனையும் வழங்கப்படும் என்று எச்சரிக்கிறேன்..

பின்குறிப்பு :

உன்னை மாதிரியே அன்னிக்கு மாயவரத்துல இருந்து நடந்தே வந்தேன்னு ஒருத்தர் கதை விட்டுட்டு, ‘வெங்கட்-தீபா’ மாதிரி லேசா நடிச்சுக் காமிச்சுட்டுப் போனாரே.. அவர்கிட்டேயும் சொல்லி வை.. உனக்கிடப்பட்ட எச்சரிக்கையினால் சுதாரித்து அவர் முந்திக் கொண்டால் நல்லது.. இல்லாவிடில் ‘வெங்கட்-தீபா’ சீரியலில் எப்படி பேசுவாரோ அதே பாணியில் அவருக்கும் கடிதம் வரும்... சொல்லி வை..

நன்றி

வருகிறேன்..

Tweet

என் இனிய மானிட்டரே..

30-08-2008

என் இனிய மானிட்டரே..

நாம் இருவரும் சந்தித்துக் கொண்ட முதல் நிகழ்வை இப்போது நினைத்தாலும் மனம் பூரிக்கிறது.

ஒரு ஞாயிற்றுக்கிழமை காலைப் பொழுதில் வீதியெங்கும் சேறும், சகதியுமாக முந்தின நாள் அடித்த மழையில் பொங்கி வழிந்து கொண்டிருக்க.. உனது பொருத்துனன் உன்னைப் பத்திரமாக பார்சல் கட்டித் தூக்கி வந்தான்.. உனக்கு நினைவிருக்கிறதா..?

வாழ்க்கையில் என் சம்பாத்தியத்தில் நான் வாங்கிய இரண்டாவது அன்புப் பரிசு நீதான் என்ற வகையில் உன் மீது எனக்கு அதிகப் பாசம் உண்டு.

நல்லதொரு துணையுடன்தான் வந்தாய். அருமையான மெளஸ் தம்பி.. மிக நளினமான டிஸைனில் இருந்த உனது சிபியூ அண்ணன்.. தொட்டாலே விரல்கள் பதிவதுகூடத் தெரியாதது போல் பஞ்சு போன்ற கீபோர்டு மச்சான் என்று உன் குடும்பமே அன்று முதல் எனக்குச் சொந்தக்காரர்களாக ஆனீர்கள்.

அன்று முதல் நீயும் நானும் ஓருடல், ஈருடலாக உடன் பிறவா சகோதரர்களாக பவனி வந்த கதையை இன்றைக்கும் நினைத்துப் பார்த்தால் என் கண்ணில் நீர், சொட்டு சொட்டாக கொட்டுகிறது..

என் வயிற்றுச் சாப்பாட்டுக்குப் பிரச்சினை வந்தபோது உங்களை வைத்துத்தான் எத்தனை நாட்கள், எத்தனை வருடங்கள் சாப்பிட்டிருக்கிறேன். அனைத்தையும் இப்போது நினைத்தால் என் குடலே இப்போது எனக்குச் சொந்தமில்லாதது போல் தோன்றுகிறது.

அனாயசமாக ஒரு திரைப்படத்தின் முழு வசனப் பகுதியையும் ஒரே நாளில் தட்டச்சு செய்து கொடுத்து 2000 ரூபாய் சம்பாதித்தது கொடுத்தது நீங்கள்தான் என்பதை நான் மறுப்பதற்கில்லை..

உங்களுடன் பழகிய நாட்கள் இன்றைக்கும் எனக்கு பசுமையான நினைவுகளாக இருக்கிறது.

காலை எழுந்தவுடன் பாத்ரூம் செல்லும் முன்பு, உனக்கு ஒரு குட்மார்னிங் சொல்லி உன்னைத் தடவிக் கொடுத்துவிட்டுத்தான் சென்றிருக்கிறேன். ஒரு நாளும் நான் இதனைத் தவறவிட்டதில்லை. உனக்கே தெரியும்.

எனக்கு சோறு இல்லையென்றாலும்கூட ஒரு நாள்கூட உங்களைச் சுத்தம் செய்யாமல் இருந்ததில்லை.. உங்கள் கண்ணில் தூசி என்றால் என் இதயத்திலேயே ஓட்டை விழுந்ததைப் போல் துடித்துப் போயிருக்கிறேன்.

வெறும் எழுத்துக்களையே பார்த்துப் பார்த்து காஞ்சி போயிருந்த உன்னை குதூகலிக்க வைக்க அவ்வப்போது பல ‘சத்துணவு’களையும் சேர்த்தே கொடுத்திருக்கிறேன். யோசித்துப் பார்த்தாயா..? இதையெல்லாம் வெளியில் சொன்னால், எனக்கு என்னென்ன பிரச்சினைகள் வரும் என்பது உனக்குத் தெரியுமா? இருந்தாலும் ‘வரவிருக்கும் புகழை’ நான் சமாளித்துக் கொள்கிறேன். எனக்கு வேறு வழியில்லை. என்னை மன்னித்துவிடு நண்பனே..

‘சத்துணவு’ ஒன்றா, இரண்டா? எதைச் சொல்வது..? இதோ பார் அந்த லிஸ்ட்டை..

ஸ்ரீதேவி, ராதா, அம்பிகா, ராதிகா, அமலா, பானுப்பிரியா, குஷ்பூ, கவுதமி, ரூபிணி என்று எனது பால்ய கால தேவதைகளை உனக்காகவே நான் சிடிக்களாகவும், டிவிடிக்களாகவும் வாங்கி, வாங்கிப் போட்டுக் காட்டவில்லை..?

‘அக்னி நட்சத்திரம்’ சிடி தேய்ந்து போகும்வரையிலும் விடாமல் அந்த “நின்னுக்கோரி வரணும்” பாடலின்போது அமலாவை நீ ‘ரசி’, ‘ரசி’ என்று ரசித்தாயே தம்பீ.. மறந்துவிட்டாயா..?

‘சிப்பிக்குள் முத்து’ படத்தின் ‘மனசு மயங்கும்; மெளன கீதம்’ பாட்டில் ராதிகாவை நீ ரசிப்பதற்காக 18 முறை தொடர்ந்து ஓடவிட, கீழ் வீட்டு ஓனரம்மா 20 படியேறி வந்து நம்மைத் திட்டிவிட்டுச் சென்றார்களே.. ஞாபகமில்லை..?

‘சத்ரியன்’ படத்தில் வரும் பானுப்பிரியாவின் அந்தமான் தேசத்து பாட்டிற்காக ஜன்னல், கதவு முழுவதையும் சாத்திவிட்டு லைட்டையும் ஆ·ப் செய்து இருட்டு போகஸில் முழுவதையும் ரசித்தாயே.. தம்பீ.. அந்தக் காலமெல்லாம் எங்கே போனது..?

‘மூன்றாம்பிறை’ படத்தில் சில்க் ஸ்மிதாவும், கமலஹாசனும் ஆடும் நடனம் தமிழ்ச் சினிமாவின் முதல் பின்நவீனத்துவ நடனம் என்று பார்ப்போரிடத்தில் எல்லாம் சொல்லி உன்னிடம் உருகி, உருகி காட்டினேனே.. நீயும் வைத்த கண் எடுக்காமல் பார்த்துத் தொலைத்தாயே?

ராதாவின் ‘காதல் ஓவிய’த்திற்காக இதுவரையிலும் 4 சிடிக்களும், 2 டிவிடிக்களும் வாங்கியிருக்கிறேன்.. தெரியும்தானே உனக்கு..?

விக்ரமில் கமல், அம்பிகாவின் காதைக் கடிக்கும் காட்சியின் தரிசனம் பெற வேண்டி வீட்டில் இருந்த தம்பிமார்கள்.. அந்தக் காட்சியைத் திருப்பித் திருப்பி மீடியே பிளேயரில் ஓடவிட.. சிடி வெளியில் வரும்போது வெப்பம் தாங்காமல் வெம்பிபோய் வந்ததே.. நினைவிருக்கிறதா..? அதே விக்ரமில் டிம்பிள் கபாடியாவின் அழகுக்காகவே அதனை save செய்து உனக்காக screen-ல் பதிவு செய்திருந்தனே.. மறந்துவிட்டாயா..?

இவர்கள் மட்டுமா..? ரோஜா, ரம்யா கிருஷ்ணன், ஆம்னி, மந்த்ரா, ரம்பா, மீனா, கவுசல்யா, சங்கவி, சங்கீதா, ஹீரா, மதுபாலா, அபிராமி, சினேகா, சிம்ரன், செளந்தர்யா, ஜோதிகா, லைலா, புவனேஸ்வரி, விந்தியா, மும்தாஜ், மாளவிகா என்று எண்ணிலடங்காத ‘சத்துணவு’களை திகட்டத் திகட்ட ஊட்டினேனே..? இவர்களையெல்லாம் வரிசையாக screensaver-ஆக செய்து கொடுத்து, உனக்கு 10 நிமிடத்திற்கொருமுறை குளுகோஸ் ஏற்றினேனே.. இந்தச் ‘சத்துணவெல்லாம்’ எங்கே போனது நண்பனே..?

விஜய்காந்த்தும், ஆம்னியும் ஏதோ ஒரு படத்தில் வீட்டின் சந்துபொந்திலெல்லாம் ‘புகுந்து’ விளையாடிக் கொண்டிருந்ததைக் காட்டி ‘அது எனக்கு வேண்டும்’ என்று இரண்டு நாட்களாய் அடம் பிடித்தாய்.. உனக்காக பர்மா பஜார் போய் அலையோ அலை என்று திரிந்து வாங்கி வந்து போட்டுக் காண்பித்தேன். அதன் பின்புதானே மேலேயும், கீழேயுமாக ஆடிக் கொண்டிருந்த நீ ஒரு வழியாக சரியானாய்.. இந்தளவுக்கு உனக்கு வந்த நோய்க்கெல்லாம் உடனடியாக மருத்துவம் செய்தேனே..

இவர்கள் மட்டுமா? கண்டம் விட்டுக் கண்டம் தாவுவது போல் பக்கத்து மாநிலத்திலும் போய் உனக்காக ‘லேகியங்களை’ சுட்டு வந்தனே.. நினைவில்லை..

ஷீலா, சீமா, சாரதா, மேனகா, ஊர்வசி, பார்வதி, லிஸி, என்று ஆரம்பித்து போகப் போக அதிலேயே மதி மயங்கிப் போய் ஷோபனா, வாணி விஸ்வநாத், மஞ்சுவாரியார், சம்யுக்தவர்மா, திவ்யா உன்னி, ஜோமோள், காவ்யா மாதவன், கீதுமோகன்தாஸ், ஜோதிர்மயி, மம்தா மோகன்தாஸ், மீரா ஜாஸ்மின், நவ்யா நாயர், விமலாராமன் என்று லேட்டஸ்ட் வரைக்கும் கொண்டு வந்து காண்பித்தனே.. மறக்கலாமா நண்பனே..?

“தெற்கு மட்டும் காட்டி என்ன புண்ணியம்? வடக்கு என்ன பாவம் செய்தது?” என்று நீ கேட்டது எனக்கும் கேட்டது. அதனால் ஐஸ்வர்யாராய், தபூ, மனீஷா கொய்ராலா, சுஸ்மிதாசென், ராணிமுகர்ஜி, ரவீணா டாண்டன், மல்லிகா ஷெராவத், வித்யாபாலன் என்று அழைத்து வந்து நிறுத்தினேனே.. என்னால் மறக்க முடியவில்லை.. உன்னால் எப்படி முடிந்தது நண்பா..?

நாள் முழுவதும் எனக்காக உழைத்து, உழைத்து ஓடாய்த் தேய்ந்து போய் நீயிருந்த நிலையில் குளிர் காற்றும், அதிக வெப்பமும் உனக்கு ஒத்துக் கொள்ளாது என்பதனால் இரவில் உன்னைப் போர்வையால் போர்த்தி வைத்தேன். விடிந்த பின்பு பார்த்தால் இந்தியா மேப்பையே அதில் வரைந்து வைத்திருந்தார் திருவாளர் எலியார்.

அதே எலியார் ஒரு நாள் உனது அன்புத் தம்பி திருவாளர் மெளஸை கொலை செய்துவிட, அன்று மட்டும் நீ மெளன அஞ்சலி செலுத்தும் விதமாக திறக்கவே மறுத்தாய்.. உனக்காக நான் ஆசை, ஆசையாக வாங்கி வைத்திருந்த புத்தகங்களை, எடைக்கு எடை போட்டு கிடைத்த பணத்தில் அருமையான புதிய தம்பியை வாங்கி வந்து கொடுத்தனே..

எலியாரிடமிருந்து உங்களைக் காப்பாற்றுவதற்காக அவருக்கு கடலை மிட்டாய் ஒன்றை வைத்து, அதனை அவர் கடித்து, மென்று, சாப்பிட்டுவிட்டு, கடைசியாக கீழ் வீட்டில் போய் மண்டையைப் போட்டுவிட.. அந்த வீட்டுக்காரம்மா வந்து கத்திய கத்து இருக்கிறதே.. ஞாபகமிருக்கிறதா..? கடைசியில் நான்தானே மூஞ்சு முழுக்க துணி சுற்றிக் கொண்டு அரை நாள் முழுவதும் தேடி அந்த எலியாரைத் தேடிப் பிடித்து தூக்கிச் சென்று அடக்கம் செய்தேன். மறந்துவிட்டாயே நண்பனே..

இவ்வளவும் யாருக்காக? உனக்காகத்தான்.. உங்களுக்காகத்தான்.. “நம்மையே சுத்தி, சுத்தி வரானுக.. எதாவது செய்யணும்னு நினைக்கிறேன். முடியலைன்னு நினைக்கும்போது, செத்துரலாம்போல தெரியுது” என்று சமுத்திரக்கனி போல நான் புலம்பி நிற்கவில்லை..

உன் மச்சான் கீபோர்டு உடல் நிலை சரியில்லை என்று இரண்டு பற்களை துப்பியபோது, உடனுக்குடன் வேறு பற்களை வாங்கி சரி செய்தேன். கொஞ்ச நாள் கழித்து எவ்வளவோ போராடியும் காச நோய் வந்து அவன் உயிரைவிட்டபோது நான் பட்டபாடு கொஞ்சமா? நஞ்சமா? ஆயிரம் ரூபாய் கொடுத்து அந்த புது மச்சானை வாங்குவதற்கு நான் எதை விற்றேன் என்று உனக்கும் தெரியும்தானே..?

புது மச்சான் வந்தவுடன் ஒய்யாரமாக நீ புதிய, புதிய கதைகளையெல்லாம் கேட்டாய்.. எனது முதல் வாசகனாக கதை கேட்டு கருத்துச் சொன்னாய்.. சிரித்தாய்.. கண் கொள்ளாமல் இருந்தது எனக்கு.. யாரோ எங்கிருந்தோ கண் வைக்க.. நீ முதல் முறையாக வைரஸ் காய்ச்சலில் படுத்தாய்..

உன் வியாதிக்கு நான் மருந்தையும், மாத்திரைகளையும் வகை, வகையாக அருந்தினேன்.. ஒன்றா? இரண்டா? உன்னைக் கழட்டிப் போட்டுவிட்டு கையில் பணம் கொடுத்தால்தான் ஆபரேஷன் என்று சொல்லி என்னை மிரட்டி நான் கட்டியிருந்த கோவணத்தையும் உருவிவிட்டானே அந்தப் பொருத்துனன்.. அந்தக் கண்றாவி காட்சியையும் பார்த்துவிட்டுத்தான் நீ கண்ணடித்துவிட்டு எழுந்து வந்தாய்.. நானும் எனது வெட்கத்தை மறைத்து உன்னைத் தூக்கி வந்தனே. இதை எங்கே போய் சொல்வது?

“பட்ட காலிலே படும்; கெட்ட குடியே கெடும்..” என்பார்களே.. அது போலவே இந்த முறை உனது அண்ணன் திருவாளர் சிபியூ ரெண்டு புல் பாட்டில்களை தண்ணி கலக்காமல் குடித்து குப்புறப் படுத்துக்கொண்டார். அவரைச் சரி செய்வதற்கு என்னுடைய ஆறு மாத சேமிப்புப் பணம் ஒரே நாளில் கரைந்ததே.. அந்தக் கொடுமை தெரியும்தானே உனக்கு..?

நீ நன்றாக இருந்தால் உன் அண்ணனுக்கு வயித்து வலி.. உனது அண்ணனுக்கு தலைவலி என்றால், உனது மச்சானுக்கு கால் வலி.. என்று மூவரும் சேர்ந்து என்னை பாடாய்படுத்தினீர்கள்.. நானும் அவ்வப்போது உங்களுக்குத் தேவையானச் ‘சத்துணவு’களையும் கூடுதல் 'ஆயுதங்களை'யும் வாங்கிக் கொடுத்து உங்களைக் கண் கலங்காமல்தான் வைத்திருந்தேன். இவ்வளவு செய்தும், இவ்வளவு பாசமாக இருந்தும் என்னைவிட்டுப் போக உனக்கு எப்படி ராசா மனசு வந்தது..?

நேற்றும் வழக்கமாக உனக்கு ‘குட்மார்னிங்’ சொல்லிவிட்டு உனது முன் அமர்ந்தேன். ‘வணக்கம்’ சொல்லிவிட்டதால் நீ கோபிக்க மாட்டாய் என்று அலட்சியமாக இருந்துவிட்டேன்.

உனக்கு உயிர் கொடுத்த சில நிமிடத்தில் வீடு முழுக்க ஒரு கெட்ட வாடை; எதுவோ கருகுவது போல்.. அக்கம் பக்கம் தேடினேன்.. முகர்ந்து பார்த்தேன் புரியவில்லை; தெரியவில்லை. குனிந்து உன் பின்னால் பார்த்தேன். அரண்டு போய்விட்டேன்.. தீ.. நெருப்புப் பிழம்பு.. ஜோதி என்பார்களே அது போல ஜெகஜோதியாக உனக்குள்ளே ஒரு நெருப்பு கனன்று எரிந்து கொண்டிருந்தது. கோவிலில் பார்த்தால் கும்பிட்டுவிட்டு கண்ணில் ஒற்றிக் கொள்ளும் அந்த ஜோதியை, இப்போது உனக்குள் பார்த்ததும் பயத்துடன் அலறிவிட்டேன்..

பதட்டத்தில், மின்சார சுவிட்ச்சை ஆ·ப் செய்வதற்குள் “டப்” என்ற ஒரே ஒரு சப்தம். ஸ்டோர் ரூம் மாதிரியான வீடாச்சே நமது வீடு. அனைத்து வீடுகளிலும் கரண்ட் கட். காம்பவுண்ட் முழுக்க மயான அமைதி. சாம்பிராணி புகையைத் தவிர வேறு புகையை சுவாசித்திராத நமது வீடு, கந்தக சுவாசத்தை நேற்றுதான் அனுபவித்தது.. அவ்வளவு புகை..

5 வீட்டிலும் ஓடி வந்து என்னிடம் குசலம் விசாரித்தார்கள். சொல்ல முடியவில்லை.. கரண்ட் வர வேண்டும்.. உனக்கு என்ன ஆனது என்று பார்க்க வேண்டும் என்ற பதைப்பில் இருந்த எனக்கு 2 மணி நேரம் கழித்து மின்சாரம் வந்தவுடன் ஓடோடி வந்து உன்னைப் பார்த்த நான் கதறியேவிட்டேன். “ஐயோடா தம்பீ.. இப்படியா நீ இருப்பாய்? அக்ரஹாரத்து அம்பியைப் போல் அழகாக இருந்த நீ, பெருமாள் கோவில் எண்ணைச் சட்டியைப் போல் ஆகிவிட்டாயே..?” கொடுமையடா முருகா..

இதுநாள்வரையில் எனக்காக உன் உடல், பொருள், ஆவி முழுவதையும் ஒப்படைத்திருந்த என் கண்மணியே, இந்திய நேரப்படி நேற்று இரவு 10.52 மணிக்கு நீ உயிரைவிட்டு விட்டாய் என்பதனை சென்னை மாநகராட்சியில் பதிவு செய்ய வேண்டிய கட்டாயத்தில் இருப்பதை கண்ணீரோடு சொல்கிறேன்.

அன்பின் திருவுருவமே.. அடக்கத்தின் அடையாளமே.. தியாக சீலனே.. ஓய்வறியாத உழைப்பாளியே.. ஒப்பற்ற செயல்வீரனே.. சென்று வா.. உனது உழைப்பை, தியாகத்தினை நான் ஒரு போதும் மறக்கமாட்டேன்.. என்றென்றும் நினைவில் வைத்திருப்பேன்..

முருகா! இனி நீயே துணை..!

Tweet

மறுபடியும் ஒரு குழப்பம்..!

29-08-2008

என் இனிய வலைத்தமிழ் மக்களே..!





இந்தப் பதிவில் நான் ஏற்கெனவே சொல்லியிருந்த கமெண்ட்டுகள் இடுபவரின் பெயர்கள் தெரிய வேண்டிய இடத்தில் கேள்விக்குறியாகவே வருகிறது என்ற எனது குழப்பம் இப்போது சரியாகிவிட்டது.

நேற்று முதல் கமெண்ட்டுகளை இடுபவரின் பெயர்கள் தமிழிலேயே தெளிவாகத் தெரிகின்றது.



மேலும் மேற்குறிப்பிட்ட பதிவில் பின்னூட்டம் இட்டிருந்த 'மதுரையின் வாலிபச் சிங்கம்', 'இனமானப் பேராசிரியர்' தருமி அவர்கள் குறிப்பிட்டிருந்த பின்னூட்டப் பெட்டியைக் கிளிக் செய்யும்போது எழுந்த Mouse Cursor பிரச்சினையும் தீர்ந்துவிட்டது.

ஆனால், அந்த மணப்பாறை முறுக்காகக் முறுக்கிக் கொண்டு நிற்கும் பதிவின் தலைப்பு மட்டும் அப்படியே இன்னும் பெரிய, பெரிய சங்கிலித் தொடர்களாக போய்க் கொண்டிருக்கிறது.

இதற்கிடையில் தலைவலி போய் திருகுவலி வந்த கதையாக இப்போது வேறு ஒரு பிரச்சினை.

எனது தளத்தினை எப்போது திறந்தாலும் திறந்த 4 நொடிகளில் தளம் மறைந்து படம் 3, படம் 4-ல் இருப்பது போல வந்து நிற்கிறது.


நான் F5 கீயை அழுத்தி 'மறுபடியும் முதலிலிருந்து ஆரம்பி' என்று கட்டளை கொடுத்தால் சரியாக வருகிறது.


ஆனால் தளத்தில் ஏதேனும் மாறுதல் செய்துவிட்டு மீண்டும் தளத்தினை திறந்தால் முன்பு பார்த்த Google Error Message Page-ற்கே செல்கிறது.

நான் ஒவ்வொரு முறையும் refresh செய்துதான் தளத்தினை படித்துக் கொண்டிருக்கிறேன்.

எனக்கு மட்டும்தான் இப்படியா? அல்லது அனைவரது கம்ப்யூட்டரிலும் இப்படியா என்று எனக்குத் தெரியவில்லை.

தெரிந்த நண்பர்கள் ஏதேனும் தீர்வு இருந்தால் சொல்லவும்..

பின்குறிப்பு : கமெண்ட்டுகளை இடுபவர்களின் பெயர்களை தமிழில் வரச் செய்தது யார் என்று தெரியவில்லை. எந்தப் பதிவராவது அந்த அருஞ்செயலை செய்திருந்தால் உடனேயே எனக்கு தகுந்த ஆதாரத்தோடு மடல் இடவும். கை அரிக்கிறது.. 100 கமெண்ட்டுகளை கொட்டத் தயாராக இருக்கிறேன்..

Tweet

குழப்பம் தீர்த்தால் 100 கமெண்ட்டுகள் இலவசம்!

வலையுலகப் பொறியாளர்களிடம் ஒரு அன்பு வேண்டுகோள்..

ஒரு சிறிய குழப்பம் எனது பதிவில் நடந்து வருகிறது.

குழப்பம்-1

எனது மெயிலுக்கு வரும் கமெண்ட்டுகளில் யார் அனுப்புவது என்கிற இடத்தில் ?????????????????????????? இப்படியே வருகிறது..

அந்த மெயிலை ஓப்பன் செய்து பார்த்தால் மட்டுமே யார் அனுப்பியது என்பது தெரிய வரும்..

இந்தக் கொடுமையைச் சீரமைக்க என்ன செய்ய வேண்டும்?

குழப்பம்-2

வர, வர மாமியார் கழுதையானாள் என்ற கதையாக ???????????????????? என்று கொஸ்டீன் மார்க்காக இருந்த அனுப்பனரின் இடத்தில் இப்போது மெகாத் தொடர் கதையாக இப்படி [&[[[[[#2953 ண ் ம& #3016 த ் த ம ி ழ ன ்] New comment on ந ா& #2985 ு ம ் உ ட ன ே ம ந ் த ி ர ி ய ா க ண ு ம ் -ப க ு த ி -1.]]]]எழுத்துக்கள்தான் வருகிறது.

முன்பெல்லாம் எழுதுபவரின் பெயர்தான் வரும். இப்போது ஏதோ மணப்பாறை முறுக்கு மாதிரி முறுக்கிக் கொண்டு இத்தனை நம்பர்கள் அணிவகுத்து வருவதன் காரணம் என்ன என்று தெரியவில்லை.

இதற்கானத் தீர்வை யாரேனும் வலையுலகப் பொறியாளர்கள் தெரிவித்து அதனை நான் சோதித்துப் பார்த்து அது சரியாக இருந்தால், அந்தப் பதிவர் கை காட்டும் பதிவிற்கு 100 கமெண்ட்டுகள் போடுவேன் என்பதனை எனது அப்பன் முருகப் பெருமான் மீது ஆணையாகச் சொல்கிறேன்.

சீக்கிரமா சொல்லுங்கப்பூ..

Tweet

தமிழ்மணத்திற்கு 'செலக்டிவ் அம்னீஷியா'..?

08-08-08

என் இனிய வலைத்தமிழ் மக்களே..!

இன்று தற்செயலாக தமிழ்மணத்தைப் பார்வையிட்டுக் கொண்டு வரும்போது இது கண்ணில் பட்டது. Print Screen எடுத்து வைத்துக் கொண்டேன்.

ஒரு மாதத்திற்கு முன் "காமக்கதைகள்" என்ற பெயருடன் வந்த பதிவுகளை "ஆ.. அசிங்கம்" என்று சொல்லி தடை செய்த தமிழ்மணம், இன்றைக்கு இது மாதிரியான புகைப்படங்களை அனுமதித்திருப்பது ஏனோ..?

ஒருவேளை இதில் அவர்கள் பார்ப்பது கலை உணர்ச்சியோ.. என்ன உணர்ச்சி இது? நாட்டுக்கு நாடு, மனுஷனுக்கு மனுஷன் மாறிக்கிட்டேயிருக்குது.. என்னவோ போங்க..

தமிழ்மணத்துக்கு ஏதாவது 'செலக்டிவ் அம்னீஷியா' வந்திருச்சோன்னு தோணுச்சு.. அதான் சொல்ல வந்தேன். அவ்வளவுதான்..

Tweet

தமிழச்சியின் பதிவுகளை நீக்குக - தமிழ்மணத்திற்கு கோரிக்கை

25-02-2008

அன்புள்ளம் கொண்ட தமிழ்மணம் நிர்வாகத்தினருக்கு,

தொடர்ந்த சில வாரங்களாக தமிழச்சி என்னும் பதிவர், தான் எழுதி வரும் இடுகைகளில் முழுக்க, முழுக்க பலரும் பொதுத்தளத்தில் பேச முன் வராத வார்த்தைகளை முன் வைத்து எழுதி வருகிறார்.

அது அவரது தனித்தளம் என்றாலும் அதனை எங்களது கண்பார்வைக்குக் கொண்டு வருவது பொதுத்தளமான தமிழ்மணம் என்பதால் இது கவனத்துக்குரியது..

தமிழ் மொழியின் பால் ஈடுபாடு கொண்ட எண்ணற்றத் தமிழர்கள் தங்களது பொன்னான நேரத்தையும், கணிசமான அளவு பணத்தையும் இதற்காக செலவிட்டுக் கொண்டிருக்கும் இந்த நேரத்தில் இது போன்ற அடாத பதிவுகளையும் நாங்கள் எதிர் கொள்ள வேண்டியிருக்கிறது. இது எங்களுக்கு தேவையற்ற வேலை என்றே கருதுகிறோம்.

இப்போது அது அளவு கடந்து, பின்னூடமிடுபவர்களைக்கூட ஒரு மனிதராகக்கூட மதிக்கத் துணியாத அளவுக்குச் சென்று கொண்டிருக்கிறது.
இப்படி ஒரு பதிவர் தமிழ்மணத்திற்கு தேவையா என்று நீங்கள் யோசிக்க வேணடும்.

தேவையில்லை என்பதால்தான் இந்த மடல்..

தயவு செய்து தமிழச்சியின் பதிவுகளை திரட்டுவதை நிறுத்திக் கொள்ளுங்கள்.

இந்த செயலே அவருக்கு ஒரு எச்சரிக்கையாக இருக்கும்.

தொடர்ந்து, அவர் அப்படி எழுதுவதை நிறுத்திக் கொண்டு கோரிக்கை வைத்தால் பின்பு நீங்கள் சேர்த்துக் கொள்ளலாம்.

நாம் முன் செல்ல வேண்டிய பாதையின் தூரம் நிறையவே இருக்கிறது. நமது சந்ததியினருக்கு நாம் விட்டுச் செல்ல வேண்டியவைகளும் நிறைய இருக்கின்றன. இந்த நிலையில் இது போன்ற முட்டாள்தனங்களுக்கு நமது சக்தியை செலவிடுவது வீணான செயல்.

ஆகவே, விரைந்து முடிவெடுக்கும்படி கேட்டுக் கொள்கிறேன்.

Tweet

வலைப்பதிவுகளில் வைரஸ்கள்-அபாயம்-எச்சரிக்கை

14-08-2007

என் இனிய வலைத் தமிழ் மக்களே..!

அதிசயத்திலும், அதிசயமாக 'கதை' எழுதப் போன நம்ம 'மவராசன்' திடீரென்று ஒரு பாட்டில் பினாயிலை ஒரே மூச்சில் குடித்தவரைப் போல் இன்று பதிவுகளைப் போட்டுத் தள்ளிக் கொண்டிருக்கிறார். என்னவென்று தெரியவில்லை. தலைப்புகளைப் பார்த்தால் படித்தவுடனேயே ராயல் பாருக்கு ஓடிப் போய் ரெண்டு ஸ்மால் கட்டிங் சாப்பிட வேண்டும் போல் தெரிகிறது..

ஆனா.. என் கம்ப்யூட்டர்ல அந்த 'மவராசனோட' http://blog.balabharathi.net இந்த வீடு ஓப்பனே ஆக மாட்டேங்குது.. காரணம் கேட்டா, ஏதோ web filter-ஆமே.. அதை போட்டு என்னையும், என் கம்ப்யூட்டரையும் சில 'வைரஸ்கள்'கிட்ட இருந்து காப்பாத்திருக்கிங்களாம்..

அது 'மவராசன்யா.. வைரஸ் இல்லே'ன்னு 'தல, தல'யா அடிச்சுச் சொல்லிப் பார்த்தேன்.. ம்ஹ¤ம்.. கேக்க மாட்டேங்குறாங்க.. 'மவராசன் மாதிரிதான் தெரியும்.. ஆனா உள்ள விட்டீங்கன்னு வைச்சுக்குங்க.. அப்புறம் உங்க மூளையைக் கழட்டிப் போடுற வைரஸாக கூட மாறலாம்.. எல்லாம் நல்லதுக்கேன்னு நினைச்சுக்குங்க'ன்னு சொல்லிட்டாங்க..

கூடவே நம்ம மா.சிவக்குமார் www.tamilbloggers.org-ன்ற இந்த வீட்ல எதையோ எழுதி விட்டிருக்காரு. ஒருவேளை நம்மளை பத்தி ஏதாவது சொல்லியிருப்பாரோ.. பார்க்கலாம்னு போனா.. அதுவும் ஓப்பன் ஆகலே.. கேட்டா.. அதுவும் தடை செய்யப்பட்ட கொடுமையான வைரஸ்களில் ஒன்றாக இருக்கலாம் என்று எங்களது அலுவலக வைரஸ் எதிர்ப்புக் குழுவினர் கருதுகின்றனர்.

இப்ப நான் என்ன செய்யறது? இந்த 'ரெண்டு வைரஸ்களும்' என்ன எழுதிருக்காங்கன்னு படிச்சுப்போட்டு, யாராச்சும் நம்ம 'வீட்டுல' அதையே ஒரு காப்பி பதிவு போட்டு அனுப்பினீங்கன்னா நல்லாயிருக்கும்..

இல்ல வேண்டாம்.. நீயாச்சும் நல்லபடியா, சூதானமா, புத்திசாலித்தனமா இருந்துக்க ராசான்னு சொன்னீங்கன்னா..

சரீங்க சாமிகளா.. அப்படியே இருந்துக்குறேன்..

அந்த ரெண்டு 'வைரஸ்கள்'கிட்டேயும் இதை மட்டும் சொல்லிருங்க..

"உண்மைத்தமிழனுக்கு Anti Virus கிடைச்ச பின்னாடி இந்த வைரஸ்களை உள்ள விட்டு, படிச்சுப் பார்த்துட்டு அப்புறமா பதில் போடுவாருன்னு.."

படிச்சதுக்கு நன்றிங்கோ..

Tweet

போலி உண்மைத்தமிழன் யார்?

28-06-2007

என் இனிய வலைத்தமிழ் மக்களே..

தெரிந்தோ, தெரியாமலோ நான் உங்களிடமோ அல்லது உங்களிடம் நானோ மாட்டிக் கொண்டு உண்மைத்தமிழன் என்ற பெயரில் குப்பை கொட்டி வருகிறேன்.

'போலிகளிடம் ஏமாறாதீர்கள்' என்ற வசனத்தை ஊதுபத்தி வியாபாரத்திலிருந்து காயகல்பம் வியாபாரம்வரையிலும் நான் கேட்டிருக்கிறேன்.. இந்தப் போலி என்ற முகமூடி போட்ட நபர்களால் உங்களில் சிலரைப் போலவே நானும் என்ன பாடுபட்டிருக்கிறேன் என்பதனை இந்தப் பதிவிலும் , தொடர்ந்து இந்தப் பதிவிலும் நீங்கள் படித்திருப்பீர்கள்.

அதன் பின் சிறிது காலம் அமைதியாக இருந்த போலி உண்மைத்தமிழன் கடந்த சில நாட்களாக வீறு கொண்டு எழுந்து முடி வெட்ட வருபவனுக்கு மொட்டையே அடித்து விடுபவனைப் போல் பின்னூட்டங்களைப் போட்டுத் தள்ளிக் கொண்டிருக்கிறான். நானும் வழக்கம்போல புலம்பித் தள்ளிக் கொண்டிருக்கிறேன்.

என் புலம்பலை கேட்டவர்களில் பலரும் வழக்கம்போல ஆறுதல் சொல்லிவிட்டு, "கொஞ்சம் அட்ஜஸ்ட் பண்ணிக்க கண்ணா.." என்கிறார்கள். சிலர் ஆறுதலையும் சொல்லிவிட்டு, இன்னொரு பக்கம் போலியையும் தெரியாத்தனமாக அனுமதித்து விடுகிறார்கள்.

போலியால் நான் வாங்கிய முதல் குட்டு மோதிரக்கையால் கிடைத்ததுதான்.


நண்பர் மிதக்கும்வெளி ஐயாவின் பெரியார் படம் பற்றிய இந்தப் பதிவில் போய் தன் வீரத்தைக் காட்டியிருக்கிறான் போலி. அதுவும் எப்படி பாருங்கள்?

உண்மைத் தமிழன்(15270788164745573644) said...
சுகுணா ஐயா.. இந்த படம் வெளிவரும் முன்பே எனக்கு தெரியும் படம் நல்லா இருக்காது என்று.. துக்ளக்கில் எழுதியிருந்தார்களே? பகுத்தறிவு கோட்டை கட்ட நினைத்து எதையோ கோட்டை விட்டுவிட்டார்கள்..

இதற்குப் பதில் எப்படி வந்திருக்கும் என்று எதிர்பார்த்தீர்கள்? இதோ இப்படித்தான்..

உண்மைத்தமிழன்,
துக்ளக்கைப் படித்துவிட்டு பெரியாரை அளக்க நினைப்பதைவிடவும் கேணத்தனமான விடயம் வேறொன்றுமில்லை. இதுபோல மொக்கத்தனமாக எதையாவது தொடர்ந்து உளறினால் உங்கள் பின்னூட்டங்களை வெளியிடுவது குறித்து நான் நிறைய யோசிக்கவேண்டியிருக்கும்.



எனக்கு இது தேவையா..?

கோவையில் நடந்த பதிவர் சந்திப்புக்கு நான் போயிருந்த சமயம் பாலபாரதி, "தலைவா.. அதெல்லாம் ஒரு விஷயமே இல்லை. விட்டுத் தொலைங்க.. அவன் உங்களோட ரசிகனா இருக்கான். அதான் ரசிகர் மன்றம்னு பிளாக்கர் ஆரம்பிச்சிருக்கான்.. விடுவீங்களா இதைப் போயி.." என்றார்.

அங்கே வந்திருந்த நண்பர்கள் வினையூக்கி, முகுந்த்ராஜ், மா.சிவக்குமார், மோகன்தாஸ் ஆகியோரும் இதையே முன் மொழிந்தார்கள். சரி விட்டுத் தொலைவோம் என்ற நினைப்புடன்தான் கண்டு கொள்ளாமல் இருந்தேன்.

அதே கோவையில் மிதக்கும்வெளி ஐயாவிடமும் அவர் பதிவில் போட்டிருக்கும் போலியின் பதிவுகளை நீக்கும்படி சொன்னேன்.. நான் இப்படிச் சொன்னதையே கோவை சந்திப்பு பற்றிய இந்தப் பதிவில் எழுதியிருக்கிறார்.

மறுபடியும், மறுபடியும் அவருடைய பதிவுகளில் போலி உண்மைத்தமிழன் தலைகாட்ட ஆரம்பிக்க, நிஜமாகவே எனக்கு அவர் மீது வருத்தம் இருந்தது. ஆனால் இன்றுதான் ஐயா ஒரு கேள்வி கேட்டார்.. "எலிக்குட்டி சோதனை என்றால் என்ன?" என்று.. 'அடக்கடவுளே..!' இவரையெல்லாம் என்ன செய்றது..? வேறு வழியில்லாமல் நானும் அதைச் சொன்னேன். "இனிமே பார்த்துக்குறேன் ஸார்.." என்றிருக்கிறார்.

ஆச்சா.. சென்ற திங்களன்று சகோதரி கவிதாவின் இந்தப் பதிவிலும் ஒரு பின்னூட்டம் போட்டுள்ளான் போலி. அதுவும் எப்படி? MNC-யில் பணியாற்றும் பெண்கள் அனைவரையும் இழிவுபடுத்தும்விதமாக..

கவிதா இதைப் படித்துவிட்டு, இது போலி உண்மைத்தமிழன் எழுதியது என்பதையும் தெரிந்து கொண்டு அதை அனுமதித்து, அதற்கு பதிலும் எழுதினார்.

அவரைப் பொறுத்தவரை அது சரி.. "போலியாக இருந்தாலும் அவன் மனதுக்குள் இந்த எண்ணம் இருக்கே.. அதுக்கு நான் பதில் சொல்லிருக்கேன்.." என்று எனக்கு மெயில் செய்தார். நானோ, "அது தப்பும்மா.. இப்போ போலியோட மனசுக்குள்ள நான்தான் இருக்கேன். என் பேரை ரிப்பேராக்கணும்னுதான் உனக்குப் போட்டிருக்கான்.. மொதல்ல டெலீட் பண்ணிரு.. இல்லாட்டி நாளைக்கும் போடுவான்.. உனக்கு ஒரு வேலை கூட வரும்.." என்றேன்.. "சரி.." என்று பெருந்தன்மையோடு டெலீட் செய்தார். இவரிடம் போலியின் IP அட்ரஸ் கேட்டேன். "ஸாரி ஸார்.. அது என்னுடைய பெர்ஸனலுக்கு மட்டும்தான்.." என்றார். சரி என்றுவிட்டுவிட்டேன்.

இது இப்படி.. இன்னொருவர் 'தோழர்' வரவனையான்.. அவரோட இந்தப் பதிவிலேயும் போய் போட்டுட்டான் போலி.. அவர் எப்பேர்ப்பட்ட ஆளு..? "தலைவா அது போலி போட்டதா..? தெரியாமப் போச்சு.. தூக்கிர்றேன்.." என்றவர், போலியை நீக்கிவிட்டு, அடுத்து இந்தப் பதிவில் அனுமதித்துவிட்டார். "என்ன ஸார்..?" என்று நான் சண்டைக்குப் போனவுடன், "ஸாரி ஸார்.. அசுரன், மாமா, ம.க.இ.க. பிடுங்கி, மயிரு என்ற டென்ஷன்ல இருந்தேன்.. அதான்.. இப்ப தூக்கிர்றேன் தலைவா.." என்றார். சொன்னபடியே டெலீட்டும் செய்தார். "சரி.. உங்களுக்குப் போட்டவரைக்கும் சந்தோஷம்தான் சாமி.. அந்த IP நம்பரை மட்டும் கொடுங்க.. மீதியை நான் பார்த்துக்குறேன்.." என்று ஏதோ பெரிய சிபிஐ கார்த்திகேயன் மாதிரி சவுடால் விட்டேன்.

அடுத்த பத்து நிமிடத்தில் IP நம்பர் டீடெயில்ஸை மெயில் செய்தார் வரவனையான். அது இதுதான்.. அவருக்கு கோடானுகோடி நன்றிகள்..

IP Address:
Host: dsl-TN-static-204.247.22.125.airtelbroadband.in
ISP: Btnl-chn-dsl
Entry Page Time : 26th June 2007 13:01:51
Visit Length: 14 mins 54 secs
Browser: MSIE 6.0
OS: Windows XP
Resolution: 1024x768
Location: Tamil Nadu, Chennai, India
Returning Visits: 5

இது சென்னையில் உள்ள Airtel Company-யின் கனெக்ஷன் நம்பர். ஆனால் நான் IP Address கண்டறியும் வலைத்தளங்களில் இதை செக் செய்தால் ஆத்தாடி.. கலிபோர்னியாவுக்கு போய் நிக்குதுங்கோ.. உள்ளூர்லேயே என்னை அடிச்சுப் போட்டாக்கூட கேட்க நாதியில்லை. இதுல கலிபோர்னியால இருந்து ஒரு உடன்பிறப்பாம்.. நம்பவா முடியுது.. தலை சுத்தி உக்காந்திருந்தேன்.

அப்பத்தான் பெங்களூர்ல இருந்து ஒரு அனானி எனக்கு போன் செஞ்சாரு.. "இதெல்லாம் போலி பிராக்ஸி வேலை ஸார்.. IP நம்பரையே மாத்திக் கொடுத்து உங்களை ஏமாத்துறாங்க.. அது நிச்சயம் கலிபோர்னியா நம்பரா இருக்காது. அதே மெட்ராஸ் நம்பராத்தான் இருக்கும்..." என்றவர் சில உறுதியான முன் உதாரணங்களையும் சொல்லி இருந்த மூளையையும் தலைகீழா புரட்டிட்டார்.. அந்த அனானிக்கும் எனது நன்றிகள்..

அடுத்து நம்ம மிதக்கும்வெளி இன்னொரு பதிவைப் போட்டாரு. அது இதுதான். அவரு இருந்ததே வெளியூர்ல.. அங்கன இருந்துக்கிட்டே சென்னைல நடந்த வலைப்பதிவர் கூட்டத்தைப் பத்தி அப்படியே நிசமா பக்கத்துல உக்காந்து எழுதின மாதிரி எழுதியிருந்தாருப்பா. 'புரிஞ்சுக்குங்க'.. அதுலயே என்னைப் பத்தியும் ஒரு பாரால...

"பதினைந்து பக்கங்களுக்குக் குறையாமல் பதிவு போட்டும் பின்நவீனம், மார்க்சியம், மொக்கை, ஜல்லி என்று எந்த பதிவாக இருந்தாலும் பின்னூட்டம் போட்டு கருத்துரிமையைக் காப்பாற்றிவரும் உண்மைத்தமிழன் ஊருக்குச்சென்றுவிட்டதால் சந்திப்புக்கு வரமுடியாது என்று தகவல் தெரிவித்திருந்தார். ஆனால் அவரை சென்னை நந்தனம் சிக்னலில் கைலியுடன் பார்த்ததாக பட்சிகள் தெரிவிக்கின்றன." - இப்படி எழுதிருந்தாரு..

நானும் அதுக்குப் பதிலா ஒரு பின்னூட்டம் போட்டிருந்தேன்.. போட்டுட்டு அவர்கிட்ட போன்ல பேசினா ஒரு குண்டைத் தூக்கிப் போட்டாரு. "உங்க போட்டோவோடயே இப்ப கமெண்ட்ஸ் வருதே.. தெரியாதா உங்களுக்கு?" அப்படீன்னு அசலாட்டா சொன்னாரு. "வரவனையான் பதிவுல நேத்து பார்த்தேன்"னாரு.. 'அதெப்படி போட்டோவும் வந்துச்சு.. வர்றதுக்கு சான்ஸ் இல்லையே'ன்னு தலையைப் பிச்சுக்கிட்டிருந்தேன். அதுக்குள்ள மிதக்கும்வெளி ஐயாவோட அதே பதிவிலேயே வந்துட்டான் போலி. இதைப் படிச்சுப் பாருங்க..

உண்மைத் தமிழன்(15270788164745573644) said...
வெளியே மிதக்கும் அய்யா.. என்னை நந்தனம் சிக்னலில் கைலியோடு பார்த்த அய்யா லக்கிலுக் அய்யா தான்.. அவர் பதிவர் சந்திப்பில் இதை எல்லாரிடமும் சொல்லி மானத்தை வாங்கியது இல்லாமல் உங்களிடமும் சொல்லிவிட்டாரா அய்யா.. அவர் நல்லா இருக்கட்டும் அய்யா..

இதைப் படிச்சப்புறம்தான் எனக்கு ஒரு விஷயம் நல்லாத் தெரிஞ்சது.. போலி உண்மைத்தமிழன் கலிபோர்னியால இல்ல.. இங்கனதான் மெட்ராஸ்ல என் பக்கத்துலதான் சுத்திக்கிட்டிருக்கான்னு..

எப்படின்னா மிதக்கும்வெளி ஐயா, தன்னோட பதிவுல "என்னை கைலியோட பார்த்ததா ஒரு பட்சி சொல்லுச்சு.." என்றுதான் எழுதியிருக்கிறார். கமெண்ட்ஸ் போட்ட நான்தான் "பேண்ட் அணிந்திருந்தேன்.." என்று திருத்தினேன்..

ஆனால் இந்த போலி உண்மைத்தமிழன் , தம்பி லக்கிலுக் அனைவரிடமும் உண்மைத்தமிழனை நந்தனம் சிக்னலில் பார்த்ததைச் சொல்லிப் பரப்பியதாக சொல்கிறான்.

இங்கே ஒரு விஷயம். 24-06-2007 ஞாயிறு மதியம் 2.45 மணிக்கு நந்தனம் சிக்னலில் சிக்னலுக்காக காத்துக் கொண்டிருந்தபோது, என்னைப் பார்த்துப் பேசியது தம்பி லக்கிலுக்தான். நான் அப்போதே சொன்னேன், "என்னால் கூட்டத்துக்கு வர முடியாது. எனக்கு ஒரு வேலை இருக்கிறது.." என்று.. "சரி.. முடிந்தால் வரப் பாருங்கள்.." என்று சொல்லிவிட்டுச் சென்றார் லக்கிலுக்.

இப்போது போலி உண்மைத்தமிழன் சொல்வதைப் படித்துப் பார்த்தால் மிதக்கும்வெளி ஐயாவும் வெளியில் சொல்லாமல் இருக்கும்போதே, போலி உண்மைத்தமிழனுக்கு என்னைச் சந்தித்தது லக்கிலுக்தான் என்பதும், லக்கிலுக் அனைவரிடமும் சொல்லி, அனைவருக்கும் அது தெரிந்திருக்கிறது என்றும் சொல்லியிருப்பதைப் பார்த்தால், அந்தச் சந்திப்பிற்கு வந்த பதிவர்களில் யாரோ ஒருவர்தான் இந்தப் போலி உண்மைத்தமிழன் என்று எனக்கு சந்தேகம் வருகிறது.

அன்றைய கூட்டத்திற்கு வந்திருந்தவர்களில் நான் யார் மீது குற்றம்சாட்ட முடியும்? யாருக்கு என் மீது தனிப்பட்ட கோபம் இருக்கிறது என்று எப்படி கண்டுபிடிப்பது?

சரி இவர்களில் ஒருவர் இல்லை என்றால், லக்கிலுக் சொல்லித்தான் அனைவருக்கும் தெரிந்தது என்றால் போலி உண்மைத்தமிழனுக்கும், லக்கிலுக் சொல்லித்தானே இது தெரிந்திருக்க முடியும். அப்படியானால் லக்கிலுக் என்னைச் சந்தித்ததை யாரிடமெல்லாம் சொன்னார் என்பதை கொஞ்சம் வெளிப்படுத்தினால் நான் அவர்களிடம் கேட்க ஏதுவாக இருக்குமே...

மேலும் அந்தச் சந்திப்பிற்கு வந்திருந்த அனைவரிடமும் என்னைச் சந்தித்ததை தம்பி லக்கிலுக் சொன்னாரா என்பதிலும் எனக்கு சந்தேகம் இருக்கிறது. காரணம் திங்கட்கிழமையன்று(25-06-2007) நான் நண்பர் மா.சிவக்குமார் அவர்களிடம் பேசியபோது "லக்கி என்னிடம் எதுவும் சொல்லவில்லையே.." என்றார். ஸோ.. லக்கிலுக் தேர்ந்தெடுத்த சிலரிடம் மட்டும் சொல்லியிருக்கலாம். அந்தச் சிலரில் ஒருவர் இந்த போலி உண்மைத்தமிழன் இருக்கலாம் என்பது எனது கணிப்பு.

"விட்டுத் தொலை சாமி.. காமெடி பண்றானுகய்யா.. புரிஞ்சுக்க மாட்டேங்குறீங்களே. நொச்சா இருக்கய்யா நீரு..." என்று பாலபாரதி சொன்னாலும், நேற்று என் பெரும் மதிப்பிற்குரிய பத்திரிகையாளர், ஆசிரியர் திரு.மாலன் அவர்களின் இந்தப் பதிவில் போலி உண்மைத்தமிழன் விளையாடியதை 'காமெடி' என்று என்னால் ஏற்றுக் கொள்ளவே முடியாது. இதனால்தான் இந்தப் பதிவையே நான் போட வேண்டி வந்தது..

திரு.மாலன் அவர்கள் பத்திரிகையியலில் எனது குருவுக்கு குருவானவர். பெரும் மதிப்பிற்குரிய வலைப்பதிவர். அவரிடம் போய் "என்ன உளறுகிறீர்கள்..?" என்று கமெண்ட்ஸ் போட்டால் இதை எப்படி 'காமெடி' என்று ஒத்துக் கொள்வது?

நல்லவேளை.. நான் அந்தப் பதிவில் கமெண்ட் போட்ட போதுதான் போலியின் கமெண்ட்டையும் படித்தேன். உடனேயே பதில் கமெண்ட்டையும் நான் போட்டேன். பின்பு இரவில் திரு.மாலன் அவர்களை போனில் தொடர்பு கொண்டு அந்த போலியின் சார்பாக நான் மன்னிப்பு கேட்டு.. எனக்கு எத்தனை சிரமங்கள்..

இவர்கள் மட்டுமல்ல.. பல பதிவர்களுக்கும் இது போல் பதிவுகளைப் போட்டு அதை அவர்கள் எலிக்குட்டி சோதனை செய்து பார்த்து தடை செய்திருக்கிறார்கள். அவர்களுக்கு எனது நன்றிகள்..

இன்னும் எத்தனை பேரிடம்தான் நான் மன்னிப்பு கேட்பது? கண்டு கொள்ளாமலேயே சென்றுவிடுங்கள் என்றால்.. மாலன் ஸாரிடம் நான் எதுவுமே சொல்லாமல் இருந்தால், அவர் என்னைப் பற்றி என்ன நினைப்பார்? நாளைப் பொழுதுகளில் நான் அவரிடம் பேச வேண்டிய கட்டாயம், சந்திக்க வேண்டிய அவசியமும் கண்டிப்பாக இருக்கிறது. அப்போது, "அது நான் இல்லை ஸார்.. போலி.." என்று நான் சொல்ல முடியுமா?

காமெடி செய்வதற்கும் ஒரு அளவு உண்டு.. மிதக்கும்வெளி, வரவனையான், டோண்டு ஸார் என்றால் நண்பர்கள் என்ற ரீதியில் போனில் பேசி தீர்த்துக் கொள்ளலாம். மற்ற எல்லாரிடமும் இதே போல் தினமும் பேச வேண்டும் என்றால் எனக்கு இதுதான் வேலையா..?

எனது கருத்துக்களுக்கு எதிர் கருத்துக்கள் அந்தப் போலியிடம் இருக்கிறது என்றால் அனானியாகவோ, அல்லது வேறு ஒரு பெயரிலோ போட்டுத் தொலைய வேண்டியதுதானே.. எதற்கு எனது முகமூடி..? நான் கோபப்படுவது இதற்குத்தான்..

எனக்குக் கிடைக்கின்ற சொற்ப நேரத்திலேயே பதிவுகள் போட முடியாமல் தவித்துக் கொண்டிருக்கிறேன் நான்.. இந்த லட்சணத்தில் பொழுது விடிந்து, பொழுது போனால் ஒவ்வொருவரின் வீட்டுக்கும் சென்று ஒப்பாரி வைக்க வேண்டும் என்றால் எப்படி?

"கண்டு கொள்ளாமல் விட்டுவிடுங்கள்.." என்று அண்ணன் மா.சிவக்குமார் திரும்பத் திரும்பச் சொல்கிறார். ஆனால் நட்பே பெரிதென்று நினைக்கும் எனக்கு போலியின் ஒவ்வொரு கமெண்ட்டும், என்னை அனைவரிடமிருந்தும் தூரத்திற்குத் தூக்கிச் செல்வதைப் போல் தெரிகிறது.

அதனால்தான் பல வலையுலக நண்பர்களின் எதிர்ப்பையும், அறிவுரையையும் மீறி இந்தப் பதிவைப் போட்டிருக்கிறேன். வலைத்தமிழர்கள் தங்களைச் சந்தேகப்பட்டுவிட்டேன் என்பதற்காக என்னைத் தவறாக நினைக்க வேண்டாம். சூழல் என்னை அப்படி கேட்க வைத்துள்ளது. நீங்களே ஒரு நிமிடம் யோசித்துப் பாருங்கள்.. முட்டாள்தனமாக இருந்தால் சிரித்துக் கொள்ளுங்கள். எனக்குக் கவலையில்லை.

ஒருவர் மீது துப்பாக்கி குண்டு பாய்ந்திருந்தால் குண்டு எந்தத் துப்பாக்கியிலிருந்து வந்தது என்பதனைத்தான் முதலில் கண்டுபிடிக்க வேண்டும்.. இப்போது அது யாருடைய துப்பாக்கி என்பதனை தம்பி லக்கிலுக்தான் சொல்ல வேண்டும்.. இது அவருடைய கடமையும்கூட..

"இல்லை.. இல்லை.. வலைப்பதிவர் கூட்டத்துக்கு வந்தவர்கள் யாராவது வெளி நண்பர்களிடம் சொல்லியிருக்கலாம்.. அவர்களில் ஒருவர் உங்களுடைய போலி உண்மைத்தமிழன் இருக்கலாம்.." என்று லக்கிலுக் கருதினால் இது எனது தலையெழுத்து என்று நினைத்துக் கொள்கிறேன்.

ஆனாலும் வலைப்பதிவர்களுக்கு கடைசியாகவும் ஒரு வேண்டுகோள். இது மாதிரியான போலிகளை நீங்கள் அனுமதித்தால், அது அவர்களை ஊக்கப்படுத்துவதைப் போல் ஆகும். இதே IP நம்பரில் இருந்து மேற்கொண்டும் கமெண்ட்ஸ் வந்தால் எனக்குத் தகவல் தெரிவித்தால் என்றென்றும் உங்களுக்கு நன்றியுடையவனாக இருப்பேன்..

நன்றி..

சிறுகுறிப்பு : 24-06-2007 அன்றைய வலைப்பதிவர் கூட்டத்திற்கு நான் வர முடியாததற்குக் காரணம்.. எனக்கு, இந்த உண்மைத்தமிழனுக்கு கடந்த 5 ஆண்டுகளாக அவ்வப்போது 'பிச்சை' போட்டு வரும் பெரியவர் ஒருவர், டைப்பிங் வேலைக்காக என்னை அழைத்திருந்தார். தட்ட முடியவில்லை. அதோடு அந்த வேலைக்காக அவர் கொடுத்த 200 ரூபாய்தான், உண்மைத்தமிழனின் இன்றைய நாள்வரையிலான 4 நாள் சாப்பாட்டுக்காக செலவானது.. ஒவ்வொருவருக்கும் ஒவ்வொரு கஷ்டம். புரிந்து கொள்வீர்கள் என்று நினைக்கிறேன்..

Tweet

வலைப்பதிவர்களுக்கு ஒரு அன்பான வேண்டுகோள்

என் இனிய வலைத்தமிழ் மக்களே..

தலைவலி வந்தா தைலம் தேய்க்கலாம். போனாலும் போயிரும்.. கால்வலி வந்தாலும் இதே மாதிரி தைலத்தைத் தடவலாம். ஒரு கால் வலியாச்சும் போகும்.. வயித்து வலி வந்தா.. அதுக்கும் 'தைலம்தான் தடவுவேன்'னு அடம் புடிச்சா என்ன ஆகும்? உண்மைத்தமிழன் நிலைமைதான் ஆகும்..

இந்த வலை உலகத்துக்குள்ள காலெடுத்து வைக்கும்போதே சின்னப் புள்ளைக்குப் படிச்சுப் படிச்சுச் சொல்றாப்புல சொன்னார் நம்ம 'தல' பாலபாரதி.

"ஒரு மூணு மாசத்துக்கு யாருக்கும் பின்னூட்டம் போடாதீங்க தலைவா.. உள்ள என்ன நடக்குது? என்ன பண்றாங்கன்னு பாருங்க.. இது ரத்த பூமி.. எசகுபிசகா எங்கிட்டாச்சும் கால் வைச்சீங்கன்னா போச்சு, யானைக் கால் மாதிரி வீங்கிப் போயிரும்.. ஜாக்கிரதை.. பேசாம உங்க பதிவுல மட்டும் உங்களுக்குப் பிடிச்சமானதைப் போட்டுக்கிட்டே போங்க.. யாரு வூட்டுக்குள்ளேயும் போய் சவுண்டு விடாதீங்க.. இங்கன இருக்குறவுக அல்லாரும் சக்கரைப்பாகுல இருந்தே சக்கரையைத் தனியாப் பிரிச்சு எடுக்குற ஆளுக.. பாட்டிலை பார்த்தே கிக் எம்புட்டுக்கு ஏறும்னு அலம்புற ஆளுக.. அம்புட்டுத்தான்.. சொல்லிப்புட்டேன்.. அப்புறம் உங்க இஷ்டம்.."

- அப்படின்னு கிளிப்பிள்ளைக்கு பாடம் சொல்லிக் கொடுக்குற மாதிரி கொடுத்தாரு. கேட்டனா? கேட்டானா இந்த உண்மைத்தமிழன்.. என்னமோ போன பிறவில அரிச்சந்திரன் பரம்பரைல பொறந்த மாதிரி 'நான் நினைச்சதைத்தான் பேசுவேன்.. பேசுறதைத்தான் எழுதுவேன். யாருக்கும் பயப்பட மாட்டேன்'னு ஏறுக்கு மாறா குதிச்சுப்புட்டு.. போகக்கூடாத இடத்துலேல்லாம் நுழைஞ்சு இப்போ பாருங்க..

பேச வேண்டியவங்ககிட்டல்லாம் சண்டை.. பார்க்கப் போறவங்ககிட்டேயெல்லாம் பிரச்சினை.. எந்தப் பக்கம் பார்த்தாலும் "எவன்டா அவன் உண்மைத்தமிழன்?"னு அக்கறையா விசாரிக்குறாக.. என்னத்துக்குன்னுதான் தெரியலை..

இவனை இப்படியே விட்டா சரிப்பட்டு வராதுன்னுட்டு நம்மாளுக வழக்கம்போல சூனியம் வைச்சிட்டாக.. ஒண்ணா, ரெண்டா..?

நான் போக முடியாத இடத்துக்கெல்லாம் போய் அங்கன என் பேர்ல, ஒரு ஸ்பெஷல் அர்ச்சனைத் தட்டை வாங்கி 108 தேங்கா உடைச்சு சாஷ்டாங்கமா பூஜையே நடத்தியிருக்காக..

எம்புட்டு பேருங்குறீங்க.. "மடத்தமிழன், பொய்த்தமிழன், சிங்காரத்தமிழன், செத்ததமிழன், சாகப் போறத் தமிழன், உண்மைத்தமிழன்-1, உண்மைத்தமிழன்-2, போலி உண்மைத்தமிழன், உண்மைத்தமிழன்-1, உண்மைத்தமிழன்-2, உங்கள் தமிழன், உ.தமிழன், ஊ.தமிழன்..." அப்படி, இப்படின்னு பொளந்து கட்டிருக்காங்க..

ஒவ்வொரு இடத்துக்கும் பின்னாடியே ஓடிப் போய் "அது பொய்யி.. நான்தான் நெசமான உண்மைத்தமிழன்"னு கத்திக் கத்தி.. இந்த வேகாத வெயில்ல என் அழகு மூஞ்சி, இன்னும் கொஞ்சம் கருத்துப் போச்சு கண்ணுகளா..

இதை இப்படியே விட்டா என் கலரையே மாத்திருவாகன்னுட்டு ஆலோசனை கேட்டேன்.. மொதல் போலிக்காக அங்கன போய் ஒரு ஒப்பாரி வைச்சனே.. அந்த மவராசனே இதுக்கு ஒரு ஐடியா கொடுத்தாரு. அவர் உங்களுக்கெல்லாம் ரொம்பப் புடிச்சமானவருதான்.. 'டோண்டு ராகவன்' அப்படீன்னு பேரு.

அவர் சொன்னாரு.. "உண்மைத்தமிழன்.. இதெல்லாம் இந்த வலைத்தளம்ன்ற போர்க்களத்துல ரொம்ப சகஜம்.. நான் எத்தனை விழுப்புண், அம்புக் காயங்கள்லாம் பட்டிருக்கேன்னு நோக்குத் தெரியுமோ..? என் வலைத்தளத்துல வந்து படிச்சுப் பாரு.. அப்ப புரிஞ்சுக்குவ.. அவுங்க நாலு ஸ்டெப் எடுத்தா நாம பதினாறு ஸ்டெப் எடுக்கணும். அப்பத்தான் இந்த யுத்த பூமில ஜெயிக்க முடியும்.. மொதல்ல உங்க பேரோட டிஸ்பிளே நம்பரையும், போட்டோவையும் போட்டுக்கோங்கோ.. அதான் நல்லது. அப்படி போட்டா சுலபத்துல யாரும் உங்களை ஏமாத்தி உங்க பேர்ல நாமத்தை அவன் போட முடியாது.. நீங்க ஒருத்தர் மட்டும்தான் நாமத்தைப் போட முடியும்னு. என் 'எலிக்குட்டி' சோதனையும் நீங்களா இல்லையான்னு காட்டிக் கொடுத்திரும்..." இப்படி அக்கறையா, பொறுப்பா, ஒரு பெரிய மனுஷன் தோரணைல அட்வைஸ் செஞ்சாரு..

"சரிங்கய்யா.. ஆகட்டும்ய்யா.. அப்படியே செஞ்சுப்புடறேன்" அப்படின்னு நானும் சொல்லி ரெண்டு நாளாச்சு.. மறுபடியும் கொஞ்சுண்டு சோம்பேறித்தனம். இடைல நம்ம 'தல' பாலபாரதிகிட்ட இதைச் சொல்லிப் புலம்பினேன்.. வேற யார் நம்ம போனை எடுப்பாக? 'போட்டோ போட்டிருங்க தலைவா'ன்னு சொன்னார். போட்டோவுக்கு எங்கன கனெக்ஷன் கொடுக்கிறதுன்னு தெரியலைன்னு சொன்னேன்.. "அல்வா கிண்டறதுல இருந்து அண்டார்டிகாவரைக்கும் நல்லா வக்கனையாப் பேசுங்க.. உருப்படியா ஒண்ணு தெரிஞ்சு வைச்சுக்காதீங்க.." அப்படின்னு கொஞ்சுண்டு கோபத்தோட பாலபாரதி ஒரு லின்க் செஞ்சு அனுப்பி வச்சாரு..

நம்ம நேரம் பாருங்க.. அது வொர்க் ஆகலை.. "அப்துல்கலாமே வந்தாலும் இப்படித்தான் சாமி செய்யோணும்.. அதிசயமா உங்களுக்குத்தான் வர மாட்டேங்குது.. மொதல்ல உங்களையே டோட்டலா ஆபரேஷன் பண்ணணும்னு நினைக்கிறேன்.. வேற வழியிருக்கான்னு பார்க்கலாம்.." அப்படின்னாரு பாலா. சரி.. 'அப்புறம் பார்த்துக்கலாம்'னு நானும் விட்டுட்டேன்..

ஒரு நாள் முழுக்க பின்னூட்டம் போடலியா? நம்மாளுக புரிஞ்சுக்கிட்டாக.. 'பய ஆ•ப் ஆயிட்டான் போலிருக்கு'ன்னுட்டு.. மறுபடியும் என் பேர்ல ஒரு இடத்துல தாலியக் கட்டிட்டாங்க. கட்டின இடமாச்சும் நல்ல இடமா இருக்கக்கூடாதா?

நம்ம வரவனையான் செந்தில் வூட்டுக்குள்ள போய் வூடு கட்டிருக்கானுக.. என்னத்த சொல்றது? நானே அவரைப் பார்த்து பயந்து போய் ஒரு ஓரமா ஒதுங்கிப் போய் நின்றுக்கேன்.. இப்படியா பண்ணுவாக..?

அவருக்கும் ஒரு போனை போட்டு விஷயத்தைச் சொன்னேன்.. "தலைவா.. இதெல்லாம் ஒண்ணும் செய்ய முடியாது.. நீங்க நிறைய எழுதிறீங்கன்னு பார்த்துட்டுத்தான் போடுறாங்க.. வேண்ணா உங்க போட்டோவையும், டிஸ்பிளே நம்பரையும் சேர்த்துக்குங்க.. வேற வழியில்லை.. இல்ல.. டெய்லி இது மாதிரியே ஒவ்வொருத்தனுக்கும் போன் போட்டு புலம்பிக்கிட்டேத்தான் இருக்கணும்... உங்க பொழைப்ப பார்க்க முடியாது.."ன்னாரு..

"போட்டோவே ஏறலையே சாமி.."ன்னேன்.. "நெட்ல போட்டோ ஏத்துறதுக்கு ஏகப்பட்ட சைட் இருக்கு தலைவா. அங்கன எதுக்குள்ளயாவது போய் உங்க போட்டோவை ஏத்துங்க.. அங்கேயிருந்து லின்க் கொடுங்க"ன்னாரு வரவனையான்.. "நான் யூஸ் பண்ற சிஸ்டத்துல வெப் பில்ட்டரிங் போட்டதுல இருந்து நம்ம படம் காட்டுற மச்சான், 'ஓசை செல்லா' சைட்ல இருக்குற 'இதய தெய்வம்' நமீதா போட்டோகூட இப்ப கொஞ்ச நாளா தெரியமாட்டேங்குது ஸார்.."னு புலம்பினேன்.. "அப்ப ஒண்ணும் பண்ண முடியாது.. சூனியத்தை முழுசா நீங்களே வாங்கிக்குங்க.." அப்படீன்னு சொல்லி முடிச்சிட்டாரு.

சரிதான்.. வேற வழியில்லை.. போட்டிருவோம்.. அப்படீன்னு நினைச்சு நேரம் இல்லாததால கொஞ்சம் ரெஸ்ட்ல இருந்தேன்.. அதுக்குள்ள மறுபடியும் வரவனையான்கிட்டயே போய் வேலையைக் காட்டிட்டான் 'பொய்த்தமிழன்'. சரி இதுக்கு மேல தாங்காதுப்பான்னுட்டு 'தல' பாலபாரதிக்கு போனை போட்டேன்.

மனுஷன் பாவம்.. என்கிட்ட இருந்து போன் வந்தாலே 'ஐயையோ.. வந்துட்டானா பாவி'ன்னுவாரு. அம்புட்டு நல்ல பேரு நமக்கு அவர்கிட்ட.. மேட்டரைச் சொன்னேன்..

"மாப்ளை சைட்லயே போட்டுட்டானுகளா.. சரி தலைவா.. கூட்டிட்டு வந்த பாவத்துக்குக் கடைசியா ஒரு உதவி பண்ணித் தொலையறேன்.." அப்படின்னுட்டு என்னோட டிஸ்பிளே நம்பரை அவரே மெயில் அனுப்பினாரு.(உண்மைத்தமிழன் எவ்வளவு அப்பிராணின்னு பார்த்துக்குங்க.. அதைக்கூட பார்க்கத் தெரியலை).

அதை வைச்சு என் பேருக்குப் பக்கத்துல டிஸ்பிளே நம்பரை வைச்சு அட்டாச் பண்ணியாச்சு.. ஆசைக்கு, நம்ம இனமானப் பேராசிரியர் திரு.தருமி அவர்களின் வீட்டுக்குள்ள போய் ஒரு வம்பிழுத்து வைச்சிட்டு வந்துட்டேன்.

திருப்திக்கு மறுபடியும் வரவனையான் ஸார் வீட்ல போய் 'பொய்த்தமிழனைப்' பத்தி ஒரு புகாரை பதிவு செஞ்சு வைச்சேன்.

ஆனாலும் நம்ம டோண்டு ஸார் விடலை. அவருக்குத் திருப்தியாகலையாம். மறுபடியும் போனை போட்டார்.

"உண்மைத்தமிழன் இதெல்லாம் என்னோட 'எலிக்குட்டி' சோதனைக்குப் பத்தாதாக்கும். போட்டோ போட்டே ஆகணுமாக்கும்.. இல்லேன்னா இதையே காப்பி, பேஸ்ட் பண்ணி போட்டு உங்களை பல் விளக்க வைச்சிருவாங்கோ.. அனுபவஸ்தன் சொல்றேன். கேளுங்கோ.." அப்படின்னு இன்னும் கொஞ்சம் பொறுப்பா அட்வைஸ் பண்ணார்(கண்ணுல தண்ணி வருது ஸார்.. உண்மைத்தமிழன் மேல எம்புட்டு பாசம் பாருங்க..)

சரி.. இவ்ளோ பெரிய மனுஷன்.. நம்மளையும் ஒரு மனுஷனா மதிச்சு போன் பண்ணி அக்கறையா சொல்றாருன்னு அதையும் கேட்டுத்தான் செய்வோமே.. என்ன காசா? பணமா? அப்படின்னுட்டு மறுபடியும் என் போட்டோவை எப்படியோ ஒரு இடத்துல வைச்சு அட்டாச் பண்ணிப்புட்டேன்..

போட்டோவைத் திறக்கும்போது பக்கத்துல சின்னப்புள்ளைக யாரும் இல்லாம பார்த்துக்குங்க.. "உன் படத்தைப் பார்த்து குளிரடிச்சுப் போச்சு.. ஜனனி கண்டுபோச்சுன்னு" அப்பால யாரும் புலம்பக் கூடாது. அதான் முன்னாடியே சொல்லிட்டேன்..

போட்டோவை பாருங்க.. 'குவாலியர் இளவரசன்' மாதிரியில்லே..? சொல்ல மாட்டீகளே.. எல்லாம் பொறாமை.. பொறாமை.. தெரியுது.. தெரியுது..

இப்ப இதையெல்லாம் எதுக்காகச் சொல்ல வந்தேன்னா..?

வலையுலகத் தெய்வங்களா..

இனிமே உங்களுக்கு 'உண்மைத்தமிழன்'னு பேர் போட்டு எதுனாச்சும் கடுதாசி வந்தா.. அதுல என்னோட டிஸ்பிளே நம்பர், இந்த குவாலியர் ராஜகுமாரனின் 'அழகு' போட்டோ இருக்கான்னு செக் பண்ணிப்புட்டு.. அப்புறமா அதுக்கு பெர்மிஷன் கொடுங்க.. இல்லேன்னா பட்டுன்னு மூஞ்சில அடிச்சாப்புல 'முடியாது'ன்னு சொல்லி வெளிலேயும் சொல்லிருங்க.. அப்பத்தான் நானும் தெரிஞ்சுக்குவேன்ல பாசக்காரப் பயலுக எத்தனை பேர் இருக்காங்கன்னு..?

'இதுக்கேண்டா இப்படி ஒப்பாரி வைக்கிற மாதிரி, இருபத்தொரு பாரால எழுதித் தொலைஞ்சிருக்க. நாலு லைன்ல எழுதித் தொலைய வேண்டியதுதான..?' அப்படீன்னு நீங்க அல்லாரும் மனசுக்குள்ள திட்டுறது இந்த உண்மைத்தமிழனின் மனசுக்கும் கேட்குது.. ஆனா என்ன செய்ய?

கீபோர்ட்ல கை வைச்சா நிக்க மாட்டேங்குது சாமி.. சதாப்தி எக்ஸ்பிரஸ் மாதிரி கை போய்க்கிட்டே இருக்குது.. என்னத்த செய்றது..?

அதுனால..

வேணாம்.. போதும்..

இத்தோட முடிச்சுக்குறேன்..

Tweet