ஊழல்களின் தாயான ஸ்பெக்ட்ரம் ஊழலும் மகன் அ.ராசாவும்..!

18-11-2010

என் இனிய வலைத்தமிழ் மக்களே..!

இந்தியாவே எதிர்பார்த்து காத்திருந்த 2 ஜி ஸ்பெக்ட்ரம் ஊழல் தொடர்பான மத்திய ஆடிட்டர் ஜெனரலின் அறிக்கை நேற்று பாராளுமன்றத்தில் சமர்ப்பிக்கப்பட்டுவிட்டது.

எதிர்பார்த்ததுபோலவே இதற்கு முன்னர் பல இந்திய ஊழல் அரசியல்வியாதிகளை வெளிக்காட்டியதைப் போலவே இந்த ஊழலையும் உரித்துத் தொங்க விட்டிருக்கிறது..!

மொத்தம் 77 பக்கங்களை கொண்டிருந்த இந்த அறிக்கையில், அரசுக்கு ஏற்பட்ட இழப்பு, விதிமுறைகள் எப்படி மீறப்பட்டுள்ளன என்பது தெள்ளத் தெளிவாக சொல்லப்பட்டுள்ளது.

முதலில் அறிக்கையின் முக்கிய அம்சங்களாக பத்திரிகைகளில் வந்த செய்திகளைப் பார்ப்போம்..!

ரூ. 1763790000000. ஒரு சராசரி இந்தியன் இந்தத் தொகையைக் குழப்பமின்றி எழுத்துக் கூட்டிக் கணக்கிட சில நிமிஷங்கள் ஆகும். மொத்தம் ஒரு லட்சத்து எழுபத்தாறாயிரத்து முன்னூற்று எழுபத்தியொன்பது கோடி ரூபாய்கள்.

இந்தியத் தொலைத் தொடர்புத் துறையின் இரண்டாம் தலைமுறைக்கான அலைக்கற்றை ஒதுக்கீட்டில், நாட்டுக்கு ஏற்பட்டிருக்கும் வருவாய் இழப்பாக தலைமைக் கணக்குத் தணிக்கையாளர் அலுவலகம் கணக்கிட்டிருக்கும் தொகை இது.

"3 ஜி' ஸ்பெக்ட்ரம் ஒதுக்கீட்டிற்காக நடந்த ஏலம் மற்றும் அதில் பங்கேற்ற ஆபரேட்டர்கள் குறிப்பிட்ட விலையை வைத்துதான்,   "2ஜி' ஸ்பெக்ட்ரம் ஒதுக்கீட்டில் அதிக வருவாய் கிடைத்திருக்குமே என்ற யூகத்தின் அடிப்படையில் பார்த்தபோது, இதில் ஏற்பட்டுள்ள குளறுபடிகள் தெரிய வந்திருக்கின்றன.

* இந்த துறையின் அமைச்சராக இருந்த ராஜா, விதிகளை மாற்றி, அதாவது வளைந்து கொடுத்து, 2001-ம் ஆண்டு நிர்ணயிக்கப்பட்ட பழைய நுழைவு வரி பற்றி பரிசீலிக்காமல், 2008-ம் ஆண்டில் வந்த புதிய ஆபரேட்டர்களுக்கு ஸ்பெக்டரம் ஒதுக்கீடு செய்துள்ளார். இதில், பிரதமர் கூறிய ஆலோசனையையும் புறக்கணித்துள்ளார்.

*"2ஜி' ஸ்பெக்ட்ரம் ஒதுக்கீடு செய்யப்பட்ட முறை வெளிப்படையாக இல்லை.  மொத்தம் 122 லைசென்ஸ்கள் வழங்கப்பட்டுள்ளன.   இதில் 85 நிறுவனங்கள் நிர்ணயிக்கப்பட்டு இருந்த தகுதி மதிப்பீட்டை பூர்த்தி செய்யவில்லை. இந்த 85 லைசென்சுகளை 13 கம்பெனிகள் பெற்றுள்ளன.  இந்த கம்பெனிகள், நிர்ணயிக்கப்பட்ட மூலதனத்தைக் கொண்டு இருக்கவில்லை.

* வெளிப்படையான அணுகுமுறை இருக்க வேண்டும் என்ற பிரதமரின் ஆலோசனையும்,  இந்த துறையோடு சம்பந்தப்பட்ட அமைச்சர்கள் குழுவை கலந்து ஆலோசித்து செயல்படுங்கள் என்று கூறிய நிதி அமைச்சகத்தின் ஆலோசனையையும் ராஜா பொருட்படுத்தவில்லை.

* தகவல் தொடர்புத் துறை ஆணையத்தின்(டிராய்) வழிகாட்டு நெறிமுறையின்படியும் நடக்கவில்லை. இந்த விஷயத்தில், "டிராய்'  கையை கட்டிக் கொண்டு அனைத்து நடவடிக்கைகளையும் வேடிக்கை பார்த்துள்ளது.

* அனில் அம்பானி தலைமையிலான ரிலையன்ஸ் கம்யூனிகேஷன் நிறுவனத்திற்கு முறைகேடாக சலுகை அளிக்கப்பட்டுள்ளது. இந்நிறுவனத்திற்கு  இரட்டை தொழில்நுட்ப உரிமம் வழங்கப்பட்டுள்ளது.

* இரட்டை தொழில்நுட்ப பயன்பாடு விஷயத்தில், 2003-ம் ஆண்டு கேபினட் எடுத்த முடிவு மீறப்பட்டுள்ளது.  அவ்வாறு கேபினட் முடிவை மீறும்போது, கேபினட் அனுமதி பெற வேண்டும். அந்த நடைமுறையும்  இங்கே  பின்பற்றப்படவில்லை.

* எவ்வித அனுபவமும் இல்லாத, "ஸ்வான்'  நிறுவனத்திற்கு ஸ்பெக்ட்ரம் அலைவரிசை ஒதுக்கீடு செய்யப்பட்டுள்ளது. முன்னுரிமை பட்டியலில் உள்ள நிறுவனத்திற்கு ஒதுக்கீடு வழங்கப்படவில்லை.

* ஸ்பெக்ட்ரம் அலைவரிசை என்பது நமது தேசத்தின் அரிதான சொத்து. இது ஏலம் விடப்படவேண்டும்.

* இதில் பங்கேற்ற புதிய ஆபரேட்டர்களுக்கு எவ்வித விதிமுறையும் பின்பற்றப்படாமல், விலையை நிர்ணயம் செய்ததில் அக்கறையின்றி செயல்பட்டுள்ளனர்.

* வேண்டப்பட்டவர்களுக்கு சலுகை அளிக்கவேண்டும் என்பதற்காக கடைசி தேதியை முன்கூட்டியே வருவது போல் மாற்றியமைத்துள்ளனர்.

* கடந்த 2001-ம் ஆண்டு விலைப்படி, 51 மண்டலங்களுக்கு, லைசென்ஸ் பெற்ற 13 ஆபரேட்டர்கள் கொடுத்த  விலை ரூ.2,561 கோடி. இதே ஆபரேட்டர்கள் "3 ஜி' ஏலத்திற்கு ரூ.12 ஆயிரம்  கோடி முதல் 37 ஆயிரம் கோடிவரை கொடுத்துள்ளனர்.

* தற்போது நடைமுறையில் உள்ள ஆபரேட்டர்களுக்கு ஒதுக்கீடு செய்யும்போது நிர்ணயிக்கப்பட்ட அளவை தாண்டி (6.2 மெகா ஹெர்ட்ஸ்)  தகவல் தொடர்பு துறை அனுமதி வழங்கியுள்ளது.

* இரட்டை தொழில் நுட்ப லைசென்ஸ்  35 வழங்கப்பட்டுள்ளன. இதற்கான மதிப்பீட்டு தொகை 1.52 லட்சம் கோடி ரூபாய். ஆனால், உரிமமாக பெறப்பட்ட தொகை. 12 ஆயிரத்து 386 கோடி ரூபாய்.

* ஒதுக்கீடு உரிமம் பெற்ற நிறுவனங்களில் ஒன்றான, ஸ்வான்' நிறுவனம் தனது 45 சதவீத பங்குகளை "எட்டிசேலட்' என்ற ஐக்கிய அரபு நாடுகளை சேர்ந்த நிறுவனத்துக்கு  4,200 கோடி ரூபாய்க்கு விற்றது.  யூனிடெக் நிறுவனம் தனது 60 சதவீத பங்குகளை டெலினார் என்ற நார்வே நாட்டு நிறுவனத்துக்கு 6,200 கோடி ரூபாய்க்கு விற்றது. தொலைத் தொடர்புத் துறை லைசென்சை பெற  1,661 கோடி ரூபாய் மட்டுமே  "யூனிடெக்'  கட்டியிருந்தது.  லைசென்ஸ் மற்றொரு நிறுவனமான டாடா டெலிசர்வீசஸ் தனது 26 சதவீத பங்குகளை, டோகோமோ என்ற ஜப்பான் நிறுவனத்துக்கு 13 ஆயிரத்து 230 கோடி ரூபாய்க்கு விற்றது.

இப்படி இந்த பங்குகளை யூனிடெக், ஸ்வான் உள்ளிட்ட சம்பந்தப்பட்ட நிறுவனங்கள் 70,022.42 கோடி ரூபாய்க்கு விற்று பயனடைந்தன. ஆனால், தொலைத்தொடர்பு அமைச்சகத்துக்கு 10,772.68 கோடி ரூபாய் மட்டுமே செலுத்தப்பட்டது.  இதனால் ஒதுக்கீடு செய்யப்பட்ட ஒன்பது "2 ஜி' உரிமத்தில் மட்டும் 60 ஆயிரம் கோடி ரூபாய் நஷ்டம் ஏற்பட்டுள்ளது.

இப்படித்தான் நடந்த முறைகேடுகளையும், ஊழலையும் அம்பலப்படுத்தியிருக்கிறது கமிட்டியின் அறிக்கை.

இரண்டாண்டுகளாக இந்தப் பிரச்சினை எழுப்பப்பட்டும் இப்படியொரு ஊழலே நடக்கவில்லை என்றுதான் ஐக்கிய முற்போக்கு கூட்டணியின் தலைவர்கள் அனைவருமே சொல்லி வந்தார்கள்.

ஆனால் இந்திய அரசியலை நன்கு கூர்ந்து கவனித்து வரும் சாதாரண டீக்கடை முனுசாமிகூட சொல்லிவிடுவார் இதில் என்ன நடந்திருக்கும் என்று..? ஆனால் இதனை உணர்ந்து கொள்ள இந்தியாவிலேயே ரொம்ப நல்லவரான நமது பிரதமருக்கு கிட்டத்தட்ட 24 மாதங்கள் ஆகியிருக்கிறது..!

அவருடைய அறிவுரையையும் மீறித்தான் ராசா செயல்பட்டிருக்கிறார் என்பது தெள்ளத்தெளிவாகத் தெரிந்தும் ராசா மீது நடவடிக்கை எடுக்க அவர் தயங்கியதற்குக் காரணம் கூட்டணி ஆட்சி என்பதாலேயே..

இதனால் தயக்கமின்றி இக்கூட்டுக் கொள்ளையை மெளனமாக வேடிக்கை பார்த்த குற்றத்திற்காக குற்றவாளிக் கூண்டில் நிறுத்தப்பட வேண்டியவர்களில் மன்மோகன்சிங்கும் ஒருவராகிறார்.

ஒரு பக்கம் அவரைப் பார்த்தால் பாவமாக இருக்கிறது. இன்னொரு புறம் பார்த்தால் எரிச்சலைத் தருகிறது..! சுப்பிரமணியம் சுவாமி, ராசா மீது வழக்குப் போட அனுமதி கேட்டு விண்ணப்பித்து 15 மாதங்களாகியும் அதன் மீது எவ்வித நடவடிக்கையும் எடுக்கவில்லையே ஏன் என்று உச்சநீதிமன்றம் இன்றைக்கு கேள்வி மேல் கேள்வி கேட்டிருக்கிறது.

நம்மூரில் சொல்வார்களே.. நாக்கு மேல் பல்லைப் போட்டு பேசியிருக்கிறான் என்று.. அப்படித்தான் இருக்கிறது உச்சநீதிமன்றத்தின் கேள்வியும்.. என்ன பதில் சொல்லப் போகிறார் பிரதமர்..?

ராசா குற்றவாளியா.. இல்லையா.. என்பதை ஊகிக்கவோ, ஏற்கவோ, மறுக்கவோ 15 மாதங்களாகும் என்றால் இவரையெல்லாம் எப்படி பிரதமராக ஒப்புக் கொள்ள முடியும்..?

நேற்றைக்கு தினமணியில் வந்திருக்கும் ஒரு தலையங்கச் செய்தியைப் படித்தபோது இதெல்லாம் நடந்திருப்பது இந்தியாவில்தானா என்ற சந்தேகமே எழுகிறது.

1954-ல் முந்திரா ஊழல் வழக்கில் நிதித்துறை செயலாளர்தான் தவறு இழைத்திருக்கிறார் என்று விசாரணை கமிஷன் குற்றம் சாட்டி, அந்த அறிக்கை பாராளுமன்றத்தில் வைக்கப்பட்ட அதே நாளே அன்றைய நிதியமைச்சர் டி.டி.கிருஷ்ணமாச்சாரி தனது பதவியை ராஜினாமா செய்திருக்கிறார்.

இது குறித்து அவர் நேருவுக்கு எழுதிய கடிதத்திற்கு பதில் கடிதம் எழுதியிருக்கும் நேரு தன் கடிதத்தில் ஒரு ஜனநாயக அரசின் பிரதமரின் கடமையும், பொறுப்பும் என்ன என்பதை தெள்ளத் தெளிவாகக் குறிப்பிட்டிருக்கிறார்.

நேருவின் பெயரை மட்டும் தாங்கிப் பிடித்துக் கொண்டிருக்கும் இன்றைய காங்கிரஸ் கட்சியின் நிலைமை அப்படியே தலைகீழாக இருக்கிறது.

இந்தப் பிரச்சினைக்குள் செல்வதற்கு முன் ஸ்பெக்ட்ரம் விவகாரத்தில் இதுவரை என்னவெல்லாம் நடந்திருக்கிறது என்பதைப் பற்றிப் பார்ப்போம்..!

2007 மே 18 : தி.மு.க.வைச் சேர்ந்த ராஜா மத்திய தகவல் மற்றும் தொலைத் தொடர்புத் துறை அமைச்சராக பதவி ஏற்றார்.

ஆகஸ்ட் 28 : டிராய் (மத்திய தொலைத்தொடர்பு ஒழுங்குமுறை ஆணையம்) அமைப்பு, ஸ்பெக்ட்ரம் ஒதுக்கீடு தொடர்பான சந்தை விலை நிர்ணயம் உள்ளிட்ட பரிந்துரைகளை தொலைத்தொடர்பு அமைச்சக ஒப்புதலுக்கு அனுப்பியது.

ஆகஸ்ட் 28 : ராஜா தலைமையிலான மத்திய தொலைத் தொடர்புத் துறை அமைச்சகம் டிராயின் பரிந்துரைகளை அடியோடு நிராகரித்தது. மேலும் ஸ்பெக்ட்ரம் ஒதுக்கீடு தொடர்பாக 2001-ம் ஆண்டில் நிர்ணயிக்கப்பட்ட அதே நடைமுறையை பின்பற்ற முடிவு செய்தது.

அதாவது ஸ்பெக்ட்ரம் ஒதுக்கீட்டின் சந்தை விலையாக ஜூன் 2001-ம் ஆண்டில் நிர்ணயிக்கப்பட்ட விலையை நிர்ணயம் செய்வதோடு, முதலில் வருபவருக்கே முன்னுரிமை அளிப்பது என்ற நடைமுறையை பின்பற்ற முடிவு செய்தது.

2001-ம் ஆண்டில் 40 லட்சம் மொபைல்போன் சந்தாதாரர்கள் இருந்தனர். ஆனால் 2007 முதல் 2008-ம் ஆண்டு வரையிலான காலத்தில், மொபைல் போன் சந்தாதாரர்களின் எண்ணிக்கை 35 கோடியாக உயர்ந்திருந்தது. இதனால் 2001-ம் ஆண்டில் நிர்ணயிக்கப்பட்ட விலையை வசூலித்ததால், ஸ்பெக்ட்ரம் ஒதுக்கீட்டில் தனியார் நிறுவனங்கள் பெருமளவில் பயனடைந்து அரசுக்கு வரவேண்டிய நிதி வராமல் பெரும் நஷ்டம் ஏற்பட காரணமாக இந்த முடிவு அமைந்ததாக குற்றச்சாட்டு எழுந்தது.

செப்டம்பர் 20-25 : "யூனிடெக்', "லூப்', "டாடாகாம்' மற்றும் "ஸ்வான்' ஆகிய நிறுவனங்கள், "2 ஜி' ஸ்பெக்ட்ரம் ஒதுக்கீட்டு உரிமத்தை பெற்றன. இதில் "யூனிடெக்' மற்றும் "ஸ்வான்' ஆகிய இரு நிறுவனங்கள் தொலைத் தொடர்பு துறையில் எந்தவித முன் அனுபவமும் இல்லாத நிறுவனங்கள். இவை அமைச்சர் ராஜாவுக்கு வேண்டப்பட்ட நிறுவனங்கள் என்று குற்றச்சாட்டுகள் எழுந்தன.

2007 டிசம்பர்: இவ்விவகாரம் தொடர்பாக நிதி அமைச்சக அதிகாரி ராஜினாமா செய்தார், அப்போது, தொலைத் தொடர்புத் துறை அமைச்சக செயலாளர் ஓய்வு பெற்று விட்டார். "ஸ்வான்' நிறுவனத்திற்கு லைசென்ஸ் வழங்குவதற்கு எதிர்ப்பு தெரிவித்ததால் இரு அதிகாரிகள் பணி மாற்றம் செய்யப்பட்டனர். இதன் மூலம் "2ஜி' ஸ்பெக்ட்ரம் ஒதுக்கீடு எளிதாக நிறைவேறியது.

2008 ஜனவரி 1-10: அமைச்சர் ராஜா சுற்றுச்சூழல் அமைச்சராக இருந்தபோது முன்னாள் செயலாளராக பணியாற்றிய"சித்தார்த்தா பெகுராவை', தொலைத்தொடர்பு அமைச்சகத்தின் செயலாளராக நியமித்தார்.

பின்னர் தொலைத் தொடர்பு அமைச்சகம் அடுத்த 10 நாட்களில் 2 ஜி ஸ்பெக்ட்ரம் ஒதுக்கீடுக்கான ஒன்பது லைசென்ஸ் உரிமங்களை வழங்கியது. மேலே குறிப்பிடப்பட்ட நான்கு நிறுவனங்களும் ஒதுக்கீடு பெற்றன.

2008, செப்டம்பர்-அக்டோபர்: "ஸ்வான்' நிறுவனம் தனது 45 சதவீத பங்குகளை "எட்டிசேலட்' என்ற ஐக்கிய அரபு நாடுகளை சேர்ந்த நிறுவனத்துக்கு ஏறத்தாழ 4,200 கோடி ரூபாய்க்கு விற்றது.  யூனிடெக் நிறுவனம் தனது 60 சதவீத பங்குகளை டெலினார் என்ற நார்வே நாட்டு நிறுவனத்துக்கு 6,200 கோடி ரூபாய்க்கு விற்றது. தொலை தொடர்புத் துறை லைசென்சை பெறுவதற்கு 1,661 கோடி ரூபாய் மட்டுமே செலவழித்து "யூனிடெக்' நிறுவனம் வாங்கியிருந்தது. டாடா டெலி சர்வீசஸ் தனது 26 சதவீத பங்குகளை டோகோமோ என்ற ஜப்பான் நிறுவனத்துக்கு 13, 230 கோடி ரூபாய்க்கு விற்றது. இந்த பங்குகளை யூனிடெக், ஸ்வான் உள்ளிட்ட சம்பந்தப்பட்ட நிறுவனங்கள் 70,022.42 கோடி ரூபாய்க்கு விற்று பயனடைந்தன.

ஆனால் தொலைத்தொடர்பு அமைச்சகத்துக்கு இந்த நிறுவனங்கள் உரிமத் தொகையாக 10,772.68 கோடி ரூபாய் மட்டுமே செலுத்தின. இதனால் ஜனவரி மாதத்தில் ஒதுக்கீடு செய்யப்பட்ட இந்த ஒன்பது "2 ஜி' உரிமத்தில் மட்டும் 60,000 கோடி ரூபாய் நஷ்டம் ஏற்பட்டதாக குற்றச்சாட்டு எழுந்தது.

மத்திய தொலைத் தொடர்பு அமைச்சகம் ஜனவரி, 2008-ம் ஆண்டு வரையில் 2 ஜி ஸ்பெக்ட்ரம் ஒதுக்கீட்டில் மொத்தமாக 2001-ம் ஆண்டு விலை நிர்ணயத்தின்படி 122 லைசன்ஸ் வழங்கி உள்ளது.

நவம்பர் 15 : மத்திய தலைமை விஜிலென்ஸ் கமிஷன் அமைச்சர் ராஜாவிற்கு நோட்டீஸ் அனுப்பியது. மேலும் இது தொடர்பான தனது விரிவான அறிக்கையை பிரதமர் மன்மோகன் சிங்கிற்கு அனுப்பியது.

2009 அக்டோபர் 21 : 2 ஜி ஸ்பெக்ட்ரம் முறைகேடு தொடர்பாக சி.பி.ஐ., வழக்கு பதிவு செய்தது. இந்த முறைகேடு தொடர்பாக நவம்பர் 29, 2008 , அக்டோபர் 31, 2009 , மார்ச் 8, 2010 , மார்ச் 13, 2010 ஆகிய தேதிகளில் பிரதமர் மன்மோகன் சிங்கிற்கு, ஜனதா கட்சி தலைவர் சுப்ரமணியசாமி கடிதங்களை எழுதி உள்ளார்.

2010 ஏப்ரல் 12 : சுப்ரமணிய சுவாமி டில்லி ஐகோர்ட்டில் "ரிட்' மனு தாக்கல்.

அக்டோபர் 29 : மத்திய புலனாய்வு அமைப்பான சி.பி.ஐ.,க்கு "2 ஜி' ஸ்பெக்ட்ரம் முறைகேடு தொடர்பான வழக்கில், மந்தமாக செயல்படுவதாக கூறி சுப்ரீம்கோர்ட் தனது கண்டனத்தை தெரிவித்தது. "இதேபோன்ற நடைமுறையைத்தான் அனைத்து வழக்கிலும் கடைப்பிடிப்பீர்களா..?' என்று சுப்ரீம்கோர்ட் கேள்வி எழுப்பியது.

நவம்பர் 10: மத்திய கணக்குத் தணிக்கை அலுவலகம், மத்திய நிதி அமைச்சகத்திடம் இது தொடர்பான அறிக்கை ஒன்றை சமர்பித்தது. அந்த அறிக்கையில், 2 ஜி ஸ்பெக்ட்ரம் ஒதுக்கீட்டில் ஏராளமான முறைகேடுகள் நடைபெற்றுள்ளதாகவும், மத்திய தொலைத் தொடர்பு ஒழுங்கு முறை ஆணையத்தின் பரிந்துரைகள் பின்பற்றப்படவில்லை என்றும் தெரிவித்துள்ளது. இதனால் ஒன்றரை லட்சம் கோடி ரூபாய் அளவுக்கு மத்திய அரசுக்கு நஷ்டம் ஏற்பட்டுள்ளதாக தெரிவிக்கப்பட்டுள்ளது.

நவம்பர் 11: மத்திய அரசு சுப்ரீம் கோர்ட்டில் தாக்கல் செய்த பதில் மனுவில் "2 ஜி' ஸ்பெக்ட்ரம் ஒதுக்கீட்டில் எந்தவித முறைகேடும் நடைபெறவில்லை. எனவே இது குறித்து சி.பி.ஐ., விசாரணை தேவையில்லை என்று தெரிவித்தது.

நவம்பர் 14: ராஜா தனது அமைச்சர் பதவியை ராஜினாமா செய்தார்.

இதுதான் ஸ்பெக்ட்ரம் ஊழல் வழக்குகளில் இதுவரையில் நடந்த கதை..!

ராசாவின் மீது குற்றம் சாட்டுவோர் வைக்கின்ற குற்றச்சாட்டுக்கள்தான் என்ன..?

2001-ம் ஆண்டு 40 லட்சம் மொபைல் போன்கள் இருந்த காலக்கட்டத்தில் வைக்கப்பட்ட ஏலத் தொகையையே, 35 கோடி மொபைல் போன்கள் புழக்கத்தில் இருந்த 2008-ம் ஆண்டிலும் நிர்ணயிக்க முடியுமா..? இது தவறில்லையா என்கிறார்கள்..?

இது நியாயம்தானே..? 2001-ம் ஆண்டு வாங்கிய நிலத்தை 2008-ம் ஆண்டில் விற்பனை செய்யும்போது நிலத்தின் மதிப்பு கூடியிருக்குமா? குறைந்திருக்குமா? ராசா தான் வாங்கிய ஒரு வீட்டை இப்படி எட்டாண்டுகள் கழித்து அதே விலைக்கு விற்க முன் வருவாரா..? மாட்டார் அல்லவா..? மார்க்கெட் விலைக்குத்தானே விற்க முனைவார். அந்த எண்ணம் இதில் ராசாவுக்கு ஏன் ஏற்படவில்லை என்கிறார்கள்.

ராசா சொல்கிறார் எனக்கு முன்பு இருந்த அமைச்சர்கள் கடைப்பிடித்ததைத்தான் நானும் செய்தேன் என்று.. அவர்கள் கடைப்பிடித்தது வழிகாட்டும் முறையைத்தான். இந்த வழிகாட்டும் முறையின் செயல்பாடுகள் அந்தந்த மார்க்கெட் நிலவரப்படி மாறும் என்கின்ற சிறு புத்திகூட ராசாவுக்கு இல்லையெனில் இவருக்கு எங்கே அமைச்சராகும் தகுதி இருக்கிறது..?

அடுத்தக் குற்றச்சாட்டு இதைவிட முக்கியமானது..! பகிரங்க ஏல முறையை அனுமதிக்காமல் விரைந்து ஓடி வருபவர்களுக்குத்தான் உரிமம் என்று சினிமா தியேட்டரில் டிக்கெட் கொடுப்பதைப் போல் அழைத்தது..! இது ஒன்றே போதும்.. இந்த ராசா பெரம்பலூரில் இருக்கும் ஏதாவது ஒரு தியேட்டரில் டிக்கெட் கிழிக்கக் கூட லாயக்கில்லாதவர் என்று திடமாகச் சொல்லலாம்..!

இதுவரையிலும் இப்படியொரு வினோதமான ஏலத்தை நான் எனது 20 ஆண்டுகால பொது வாழ்க்கையில் கண்டதேயில்லை.. இதிலும் எப்படியெல்லாம் குழப்படி செய்திருக்கிறார் ராசா..!? முதலில் 10 நாட்கள் அவகாசம் என்று சொல்லி காலையில் தங்களது அலுவலக இணையத்தளத்தில் செய்தியை வெளியிடுகிறார்கள். பின்பு மதியம் 2.45 மணியளவில் இன்று மாலை அலுவலக நேரத்திற்குள் முதலில் வருபவர்களுக்குத்தான் உரிமம் என்று அதே இணையத்தளத்திலேயே செய்தியை வெளியிட்டிருக்கிறார்கள்..!

எந்த ஊர்லய்யா இப்படிச் செய்வாங்க..? இதென்ன சைக்கிள் கடையா? சைக்கிளையா ஏலத்துல விக்குறாங்க..! 1661 கோடிக்கான உரிமத் தொகையை இப்படி ஒரே நாள்ல விண்ணப்பத்தோடு, டி.டி.யோடும் மூணு மணி நேரத்துல கொண்டாந்து கொடுத்துட்டு அள்ளிட்டுப் போன்னு சொன்னா.. கேக்குறவன் கேணையனா இருந்தா எருமை மாடு ஏரோப்ளேன் ஓட்டுதுன்னுகூட சொல்வாங்களே.. அந்தக் கதைதான் இது..!

விண்ணப்பம் எத்தனை பக்கங்கள் இருக்கும்? எத்தனை சான்றுகள் கேட்டிருப்பார்கள்..? 1661 கோடியை டி.டி.யா வங்கில எடுக்கணும்.. எத்தனை வேலைகள் இருக்கும்..? யோசிச்சுப் பாருங்க.. இத்தனையையும் செஞ்சு முடிக்க எவ்வளவு நேரம் பிடிக்கும்.. அம்பானிகளாகவே இருந்தாலும் முன்கூட்டியே தெரியாமல் இதனை மூன்று மணி நேரத்தில் முடிக்க முடியாதே..? ஸோ.. இப்படி அவசரம், அவசரமாக நடத்தப்பட்ட இந்த ஏலத்திலேயே ராசாவின் முகத்திரை கிழிகிறது..! ஏதோ ஒன்று நடந்திருக்கிறது..!

அதிலேயும் அன்றைக்கு 3 மணி நேரத்தில் வந்து குவிந்த கூட்டம் அமைச்சரவை அலுவலகத்துக்குள் எக்குத்தப்பாக நுழைந்து அதகளம் செய்திருக்கின்றன. கடைசியில் டெல்லி போலீஸாரும் உள்ளே நுழைந்து லேசான தடியடி நடத்தித்தான் கூட்டத்தை ஒழுங்குபடுத்தியிருக்கிறார்கள். இது எப்படி இருக்கு..?

இப்படி செய்தும் ஸ்வான், யுனிடெக் நிறுவனத்தின் எத்தனாவது நபராக வந்தார்கள்..? அவர்களுக்கு முன் வந்தவர்கள் யார் என்பதற்கெல்லாம் ராசாவிடம் இருந்து இன்றுவரையிலும் பதிலே இல்லை..

அடுத்ததைப் பாருங்கள்.. ஏலம் எடுத்த நிறுவனத்தின் லட்சணத்தை.. ஸ்வான், யுனிடெக் என்னும் இரண்டு நிறுவனங்கள்தான் 9 உரிமங்களைப் பெற்றிருக்கின்றன. ஆனால் இவைகள் இந்தத் தொலைத் தொடர்புத் துறையில் முன் அனுபவம் இல்லாதவை.. அனுபவமே இல்லாதவைகளுக்கு இத்தனை கோடி ரூபாய்க்கான உரிமத்தைக் கொடுக்க வேண்டிய அவசியம் என்ன? அவசரம் என்ன..?

அதோடு இவைகள் ரியல் எஸ்டேட் பிஸினஸ் செய்து வந்த சாதாரண நிறுவனங்கள். ஒரு பிளாட் முகவரியை மட்டுமே கொண்ட இந்த நிறுவனங்களுக்கு முக்கியத்துவம் கொடுக்கும் பொருட்டு ஏற்கெனவே தொலைத் தொடர்புத் துறையில் கோலோச்சிக் கொண்டிருக்கும் நிறுவனங்களுக்கு கட்டுப்பாடுகளை விதித்தும், அவைகளுக்கும் தெரியாமலும் பார்த்துக் கொண்டு கச்சிதமாக விற்பனையை முடித்திருக்கிறார் ராசா.

உரிமத்தை வாங்கிய இந்த நிறுவனங்கள் அடுத்து செய்தது என்ன..? அலுவலகம் அமைக்கவில்லை. மாநிலத்திற்கு மாநிலம் ஆட்களை நியமிக்கவில்லை.. தங்களுடைய நிறுவனப் பங்குகளை விற்கும் முயற்சியில் ஈடுபடுகிறார்கள்.  ஸ்வான்' நிறுவனம் தனது 45 சதவீத பங்குகளை "எட்டிசேலட்' என்ற ஐக்கிய அரபு நாடுகளை சேர்ந்த  நிறுவனத்துக்கு  4,200 கோடி ரூபாய்க்கு விற்கிறது. இதைத் தொடர்ந்து யூனிடெக் நிறுவனம் தனது 60 சதவீத பங்குகளை டெலினார் என்ற நார்வே நாட்டு நிறுவனத்துக்கு 6,200 கோடி ரூபாய்க்கு விற்றது.

யோசித்துப் பாருங்கள்.. இப்போது இதில் யார் புத்திசாலி..? வெறும் 1661 கோடிக்கு வாங்கிய உரிமத்தை வைத்து வெறும் லெட்டர்பேட் மட்டுமே வைத்திருக்கும் ஒரு நிறுவனம் தனது நிறுவனத்தின் மதிப்பை 10000 கோடி ரூபாய்க்கு உயர்த்த முடியுமெனில் இதுவெல்லாம் திட்டமிடப்படாமல் தற்செயலாக நடந்தது என்று நம்மால் நம்ப முடியுமா..?

ஒரு உண்மையான தேசபக்தி மிகுந்த அமைச்சனாக இருந்திருந்தால் என்ன செய்திருக்க வேண்டும்..? பகிரங்க ஏலத்திற்கு அத்தனை பேரையும் அழைத்து, அவர்கள் விண்ணப்பங்களைச் சமர்ப்பிக்க வாய்ப்பளித்து குறைந்தபட்ச ஏலத் தொகையாக 10000 கோடியாக நிர்ணயித்து விற்றிருக்க வேண்டும்..!

அப்போது உண்மையிலேயே இந்தத் தொலைத் தொடர்புத் துறையில் இருந்துவரும் அனைத்து நிறுவனங்களும் கலந்து கொண்டிருக்கும் வாய்ப்பு இருந்திருக்கும். ஏலத் தொகை கூடி இப்போது ஆடிட்டர் ஜெனரல் அறிக்கை சுட்டிக் காட்டியிருக்கும் தொகையில் 90 சதவிகித அளவுக்காவாவது இந்திய அரசுக்குப் பணம் கிடைத்திருக்கும்.

ஆனால் இடைத்தரகர்களை வைத்து முன்கூட்டியே பேசி வைத்து, அமைச்சரவையின் தகவல்களை முன்கூட்டியே அந்த நிறுவனங்களுக்கு வெளியிட்டு, அவர்களை மட்டுமே கலந்து கொள்ள வைத்து, அதன் மூலம் அவர்களுக்கு உரிமங்களை கொடுத்துவிட்டு, பின்பு அவைகள் நிறுவனப் பங்குகளை விற்பனை செய்யும்போது கிடைத்திருக்கும் அந்தத் தொகையில் முக்கால்வாசியை ராசா தலைமையிலான ஒரு குழு பிட்டு போட்டு எடுத்துக் கொண்டுள்ளது என்று இந்தியா முழுவதும் நம்பப்படுவதை நானும் நூறு சதவிகிதம் நம்புகிறேன்..!

தொலைத் தொடர்புத் துறையின் வர்த்தகச் செயலகம், தொலைத் தொடர்புக் கட்டுப்பாட்டு ஆணையத்தின் வழிகாட்டுதல்களை மீறியே ஒதுக்கீட்டில் ஏல முறைக்குப் பதிலாக முதலில் வருவோருக்கு முன்னுரிமை முறையைக் கையாள அமைச்சகம் முடிவெடுத்ததாகக் குற்றச்சாட்டுகள் எழுந்தபோதே அரசு நடவடிக்கை எடுத்திருக்க வேண்டும். எடுக்கவில்லையே.

நாடு இழந்திருக்கும் அந்தத் தொகையில் நாடு முழுவதும் தலா ரூ.25 லட்சத்தில் 7,05,516 பள்ளிக்கூடங்களை அமைத்திருக்கலாம்; ரூ 1 கோடியில் 1,76,379 தரமான ஆரம்ப சுகாதார நிலையங்களை அமைத்திருக்கலாம்; ரூ.5 கோடியில் 35,275 கல்லூரிகளை அமைத்திருக்கலாம்; ரூ.100 கோடியில் எல்லா வசதிகளையும் கொண்ட 1,763 மருத்துவமனைகளை அமைத்திருக்கலாம்; 14,69,825 கி.மீ. தொலைவுக்கு சாலைகள் அமைத்திருக்கலாம்; 35,275  கி.மீ. தொலைவுக்கு புதிய மின் ரயில் பாதைகளை அமைத்திருக்கலாம்.

இவ்வளவு ஏன்..? தமிழகத்தில் நான்கு கோடியே 30 லட்சம் வாக்காளர்கள் உள்ளனர். அவர்களுக்கு ஸ்பெக்ட்ரம் தொகையை பிரித்துக் கொடுத்தால், ஒரு ஓட்டுக்கு 42 ஆயிரம் ரூபாய் தர முடியும். ஐந்து ஓட்டுகள் உள்ள குடும்பத்துக்கு இரண்டு லட்சம் ரூபாய் தர முடியும்.
 

கிட்டத்தட்ட இரண்டாண்டுகளாக இழுத்துக்கோ, புடிச்சுக்கோ என்று ஆடிக் கொண்டிருந்த இந்த பரமபதத்தை முடித்து வைத்த பெருமை நமது போயஸ் ஆத்தாவுக்கே போய்ச் சேரும்..

எத்தனையோ பிரம்மாஸ்திரங்களை தனது அரசியல் வாழ்க்கையில் கண்டிருந்த அரசியல் சாணக்கியர் கலைஞருக்கே அன்றைக்கு போயஸ் ஆத்தாவிடமிருந்து வந்த பிரம்மாஸ்திரம் நிச்சயம் பெரும் அதிர்ச்சியாகத்தான் இருந்திருக்கும்.

கூடவே இதுவரையில் நடந்த ஊழல்களிலேயே ஸ்பெக்ட்ரம் ஊழல்தான் தாய் ஊழல் என்று அறைகூவல் விடுத்துள்ளார். ஒருவகையில் நாம் போயஸ் ஆத்தாவின் தைரியத்தை பாராட்டத்தான் வேண்டும். எத்தனையோ ஊழல் வழக்குகள் தன் மீது இருந்தாலும், அதையெல்லாம் பொருட்படுத்தாமல் துணிந்து, தைரியமாக இன்னமும் தாத்தாவுடன் போராடும் அந்தக் குணம் இருக்கே.. இந்தியாவிலேயே இது மாதிரியான இரும்பு மனம் யாருக்கும் இல்லைதான்.

தனது கூட்டணி என்னும் பிரம்மாஸ்திரத்தை ஏவி இந்தப் பிரச்சினையை தற்போதைக்கு சுமூகமாக முடித்து வைத்திருப்பதற்காகவும் போயஸ் ஆத்தாவுக்கு சோனியாவும், மன்மோகன்சிங்கும் நிச்சயம் மனதுக்குள் நன்றி சொல்லியிருப்பார்கள் என்று நினைக்கிறேன். அவர் இல்லாவிட்டால் மன்மோகனசிங்கும், சோனியாவும் ரொம்பவே கஷ்டப்பட்டிருப்பார்கள்.

ஒரு பக்கம் நாடாளுமன்றம், மறுபக்கம் சுப்ரீம் கோர்ட் என்று இரண்டு பக்கமும் அடியை வாங்கிக் கொண்டு வலிக்காதது போல் நடித்துக் கொண்டிருந்த பிரதமர் என்று சொல்லப்படும் மன்னமோகனசிங்.. எத்தனை நாளைக்குத்தான் வலிக்காத மாதிரி நடிக்கிறது என்பதைப் போல் தனது இயலாமையை சோனியா ஆத்தாவிடம் சொல்லிப் புலம்பிக் கொண்டிருந்த நேரத்தில் நமது போயஸ் ஆத்தா தனது பிரம்மாஸ்திரத்தை எடுத்துவிட.. இதையே சாக்காக வைத்து கூட்டணி பற்றி கட்சிதான் முடிவு செய்யும் என்று மேம்போக்காக நாங்க என்ன வேண்ணாலும் செய்வோம் என்று மன்மோகன் கொடுத்த சிக்னல் நன்றாகவே வேலை செய்தது.

தன்னைப் பற்றி ஜூனியர் விகடனில் வெளிவந்த முதல் கட்டுரையைப் படித்தவுடனேயே வீராவேசமாக எந்த அமைச்சரும் செய்யாத ஒரு காரியமாக நீதிமன்றத்திற்குச் சென்று தடையாணை பெற்றார் ராசா. அதனை உயர்நீதிமன்றம் வரையிலும் சென்று முறியடித்த ஜூ.வி. தனது தொடர் கட்டுரைகளால் ராசாவைத் தொடர்ந்து குறி வைத்தது ஏன் என்று பத்திரிகையாளர்கள் அத்தனை பேருக்கும் தெரிந்தது.
 

இதற்கெல்லாம் முன்பாகவே ராசா இருந்த வனம் மற்றும் சுற்றுச் சூழல் துறையில் நடந்த ஊழல்கள் பற்றி தினகரன் பத்திரிகையில் வெளிவந்த கவர் ஸ்டோரியிலேயே ராசா தன்னைக் குறி வைத்திருப்பது யார் என்பதைப் புரிந்து கொண்டுதான் இருந்தார். அதனால்தான் சுற்றிவளைத்து மாறன்களுக்கு பதிலளித்தபடியே இருந்தார்.

ஆனாலும் இந்தப் பக்கம் குடும்ப லாபியினால் மாட்டிக் கொண்டு தவித்த கலைஞருக்கு அந்தப் பக்கம் ராசாவையும் விட முடியவில்லை. செயற்குழு, பொதுக்குழு என்றால் ராசாவையும், தயாநிதி மாறனையும் அருகருகே அமர வைத்து புகைப்படம் எடுத்து அதனை மட்டும் முரசொலியி்ல் வெளியிட்டு ஒண்ணுமில்லை என்றெல்லாம் சொல்லிப் பார்த்தும் இதன் பின்னணியில் அண்ணன், தம்பிகளின் சித்து விளையாட்டும் இல்லாமல் இல்லை.

கோடிகளில் குவித்திருக்க வேண்டிய பணம் இன்னொரு பக்கம் போய்விட்டதே என்ற கோபத்தில் இருந்த டெல்லிவாலாக்கள் ஒரு பக்கம்.. தங்களுக்குப் பங்கே கிடைக்காமல் மொத்தத்தையும் சுருட்டிவிட்டாரே.. நாம்தான் ஊழல் மன்னன் என்றால், இவர்கள் ஊழலுக்கு இலக்கணம் எழுதும் திறமை படைத்தவர்களாக இருக்கிறார்களே என்ற கோபத்தில் இருந்த காங்கிரஸ் தலைவர்கள் இன்னொரு பக்கம்..!

சர்க்காரியா கமிஷன் அறிக்கையிலேயே விஞ்ஞான ரீதியாக ஊழல் செய்து சம்பாதித்துள்ளார்கள் என்று பாராட்டைப் பெற்ற கழகம் திராவிட முன்னேற்றக் கழகம் என்பது இப்போதைய காங்கிரஸ் தலைவர்களுக்குத் தெரிய வாய்ப்பில்லை என்றே கருதுகிறேன்.

ஆக.. திரும்பிய பக்கமெல்லாம் எதிரிகளைச் சம்பாதித்துக் கொண்ட ராசாவுக்கு ஒரே ஆறுதல் கலைஞர்தான். அடுத்து வரவிருக்கும் தேர்தலின் மொத்தச் செலவையும் கவனித்துக் கொள்ள அனைத்து ஏற்பாடுகளையும் செய்து வைத்துவிட்டு காத்திருக்கும் தனது அருமை உடன்பிறப்பை கை கழுவ வேண்டிய கட்டாயம். ஒரு பக்கம் துணைவி, மகள்.. இன்னொரு பக்கம் பேரன், பேத்தி எடுத்த மகன்கள், மருமகள்கள்.. யாருக்காக யார் பக்கம் பேசுவது என்பது தெரியாமல் பந்தபாசத்தில் சிக்கித் தவிக்கிறார்..

அதிகமாகப் பிள்ளை பெற்றாலும், அதிகமாகக் கொள்ளையடித்தாலும் இப்படித்தான் பிரச்சினைகள் வரும் என்று அவர் அறியாததல்ல. இந்தக் குடும்பப் பிரச்சினையில் இருந்து அவர் நல்லபடியாக மீண்டு வர என் அப்பன் முருகப் பெருமானை வேண்டிக் கொள்கிறேன்.

வழக்கு இப்போது சுப்ரீம் கோர்ட்டில் நிலுவையில் இருக்கிறது. ஒரு பக்கம் வருமான வரித்துறையும், சி.பி.ஐ.யும், அமலாக்கப் பிரிவும் விசாரணை நடத்தி வருகின்றன. சுப்பிரமணியன் சுவாமி போட்ட வழக்கில் ராசா மீது வழக்குத் தொடர இனி அவருக்குத் தடையில்லை என்றாகிவிட்டது. இனி சுவாமியே ராசா மீது வழக்கைத் தொடரலாம்.

ஆனால் இந்தக் களேபரத்தில் நாடாளுமன்றம் வேறு சிக்கிக் கொண்டு தவிக்கிறது. தினம்தோறும் பல கோடிகளை செலவழித்து நடக்கும் நாடாளுமன்றம் கடந்த சில நாட்களாக இந்த பிரச்சினைக்காகவே முடங்கிக் கிடக்கிறது.

நாடாளுமன்ற கூட்டுக் குழுவின் விசாரணைக்கு உத்தரவிட வேண்டும் என்று கோரி எதிர்க்கட்சிகள் கோரிக்கை வைப்பதற்கு முக்கியக் காரணம், அத்தனை ஆவணங்களும் அவர்கள் முன் வைக்கப்படும் என்கிற எதிர்பார்ப்பு. இன்னொன்று.. இதில் தேவைப்பட்டால் ராசாவை நேரில் அழைத்து விசாரிக்க முடியும் என்கிற வசதியும் இருக்கிறது என்பதால்தான்.

பொதுக் கணக்குக் குழுவுக்கு பா.ஜ.க.வின் முரளிமனோகர்ஜோஷி தலைவராக இருந்தாலும் அவர் எழுத்து மூலம் கேள்விகளை எழுப்பலாம். அதற்கு அதிகாரிகள் ஏற்கெனவே தயாராக இருக்கும் பதில்களை சமர்ப்பித்தால் கேட்ட கேள்விக்கு இதுதான் பதில் என்று சொல்லி அந்த இடத்தை பில்லப் செய்து அறிக்கையைத் தயார் செய்ய வேண்டியதுதான்..

இதனாலேயே எதிர்க்கட்சிகள் நாடாளுமன்ற கூட்டு விசாரணையை எதிர்பார்க்கிறார்கள். லின்க் எங்கே போகும் என்றே தெரியாமல் இதில் காலைவிட காங்கிரஸ் தயாராக இல்லை. மிக விரைவில் சில மாநிலங்களில் தேர்தல்களும் நடத்த வேண்டியிருப்பதால், குறிப்பாகத் தமிழ்நாட்டில் தனது கட்சிக்கு இதனால் பிரச்சனையாகிவிடுமே என்று பயப்படுகிறார்கள். இதனாலேயே அவர்கள் இதனை எதிர்க்கிறார்கள்..!

மொத்தத்தில் அவரவர்க்கு அவரவர் பாடு. ஆனால் நாட்டு மக்களாகிய நாம் இதனை மறப்பதற்கு என்ன பாடுபட வேண்டியிருக்கிறது என்று அவர்களுக்குத் தெரியாதே....!?


அவசியம் இவைகளையும் படியுங்கள் :


http://truetamilans.blogspot.com/2010/07/blog-post_14.html

அதிகார புரோக்கர்கள் நீரா ராடியா, வீர் சங்வியுடன் திராவிட வாரிசுகளின் கூட்டுக் கொள்ளை..!

http://savukku.net/index.php?option=com_content&view=article&id=163:2010-11-15-20-03-33&catid=1:2010-07-12-16-58-06&Itemid=2



http://savukku.net/index.php?option=com_content&view=article&id=165:2010-11-18-12-48-20&catid=1:2010-07-12-16-58-06&Itemid=2


http://dondu.blogspot.com/2010/11/01.html


http://dondu.blogspot.com/2010/11/02.html


http://dondu.blogspot.com/2010/11/03.html