காளி - சினிமா விமர்சனம்

19-05-2018

என் இனிய வலைத்தமிழ் மக்களே..!

விஜய் ஆண்டனி ஃபிலிம் கார்ப்பரேஷன்  சார்பில் தயாரிப்பாளர் ஃபாத்திமா விஜய் ஆண்டனி இந்தப் படத்தைத் தயாரித்துள்ளார்.

இந்தப் படத்தில் விஜய் ஆண்டனி நாயகனாக நடித்துள்ளார், அஞ்சலி, சுனைனா, ஷில்பா மஞ்சுநாத், அம்ரிதா ஆகிய நான்கு நாயகிகள் நடித்துள்ளனர்.

மேலும், வேல ராமமூர்த்தி, யோகிபாபு, ஆர்.கே.சுரேஷ், ஜெயப்பிரகாஷ், நாசர், மதுசூதனன் ராவ் மற்றும் பலர் நடித்துள்ளனர்.

எழுத்து, இயக்கம் – கிருத்திகா உதயநிதி, ஒளிப்பதிவு – ரிச்சர்ட் எம்.நாதன், படத் தொகுப்பு – லாரன்ஸ் கிஷோர், இசை – விஜய் ஆண்டனி, கலை இயக்கம் – எம்.சக்தி வெங்கட்ராஜ், சண்டை இயக்கம் – ஆர்.சக்தி சரவணன், நடன இயக்கம் – பிருந்தா, உடை வடிவமைப்பு – கவிதா, ரோஹித், உடை – கே.சாரங்கன், தயாரிப்பு நிர்வாகி – ஆர்.ஜனார்த்தனன், நிர்வாகத் தயாரிப்பு – எம்.சிவக்குமார், தயாரிப்பு மேலாளர் – கே.மனோஜ்குமார், பாடல்கள் – மதன் கார்க்கி, விவேக், அருண் பாரதி, தமிழணங்கு, பாடகர்கள் – நிவாஷ் ரகுநந்தன், ஜானகி ஐயர், ஹேமச்சந்திரா, சங்கீதா, தீபக், ஜெகதீஷ், ஒலி பொறியாளர்கள் – எஸ்.சந்திரசேகர், ஆர்.ஜனார்த்தனன், கே.சக்திவேல், ஒலிக் கலவை – ரஹமத்துல்லா, கிராபிக்ஸ் – கலரிஸ்ட் – ராஜராஜன், ஒலி  வடிவமைப்பு – விஜய் ரத்தினம், மக்கள் தொடர்பு – சுரேஷ் சந்திரா, ரேகா-டி ஒன், விஷூவல் எபெக்ட்ஸ் – R Art Works – ரமேஷ் ஆச்சார்யா, ரியா, கார்வன்ஸ் ஸ்டூடியோ, புகைப்படம் – முத்துவேல், பப்ளிசிட்டி டிஸைனர் – கபிலன் செல்லையா, கிப்சன், டிஜிட்டல் பார்ட்னர் – விவோ.

பெண் இயக்குநரான கிருத்திகா உதயநிதி ‘வணக்கம் சென்னை’ படத்திற்கு பிறகு இயக்கியிருக்கும் இரண்டாவது திரைப்படம் இது.

தன் உண்மையான தாய், தந்தையைத் தேடியலையும் ஒரு மகனின் கதைதான் இத்திரைப்படம்.

அம்மா செண்டிமெண்ட்டுக்கு தமிழ்ச் சினிமாவில் எப்போதுமே தனி மவுசு உண்டு என்பதால்தான் இதிலும் அநியாயத்திற்கு அம்மா செண்டிமெண்ட்டை கையில் வைத்துக் கொண்டே திரைக்கதையை அளந்திருக்கிறார்கள்.  

அமெரிக்காவின் நியூயார்க் நகரில் பரத் ஸ்பெஷலாட்டி ஹாஸ்பிட்டல் என்ற பெயரில் மிகப் பெரிய மருத்துவமனையில் மருத்துவராகப் பணியாற்றி வருகிறார் விஜய் ஆண்டனி என்னும் பரத். இவருடைய சொந்த மருத்துவமனைதான் அது.

28 வயதான விஜய் ஆண்டனிக்கு சமீப நாட்களாக ஒரு கெட்ட கனவு தொடர்ந்து கொண்டேயிருக்கிறது. ஒரு பாம்பு ஒன்று வயல் ஓரமாகக் கட்டப்பட்டிருக்கும் மாட்டினை கொத்த வர.. மாடு அதைப் பார்த்து மிரண்டு போய் கயிற்றை அவிழ்த்துவிட்டு ஓடுகிறது. எதிரில் விளையாடிக் கொண்டிருக்கும் ஒன்றைரை வயது சிறுவனை அந்த மாடு முட்ட வர.. அந்தச் சிறுவனின் தாய் சிறுவனைக் காப்பாற்ற இடையில் ஓடி வர.. மாடு அந்த தாயை தூக்கி வீசுகிறது.

இந்தக் கனவு அடிக்கடி தொடர்ந்து வந்து கொண்டேயிருப்பதால் மிகுந்த மன சஞ்சலத்தில் இருக்கிறார் விஜய் ஆண்டனி. இந்த நேரத்தில் திடீரென்று விஜய் ஆண்டனியின் அம்மாவுக்கு கிட்னி பெயிலர் ஆகிறது. அவருக்கு மாற்று சிறுநீரகம் பொருத்த வேண்டிய கட்டாயம் என்பதால் விஜய் ஆண்டனி தனது சிறுநீரகத்தை தானமாக அளிக்க முன் வருகிறார்.

இப்போதுதான் ஒரு உண்மையை விஜய் ஆண்டனியிடம் சொல்கிறார் அவரது தந்தை. விஜய் ஆண்டனி அவர்கள் பெற்றெடுத்த பிள்ளை இல்லையென்றும், வளர்ப்பு பிள்ளைதான் என்றும், தாங்கள் ஒரு அனாதை இல்லத்தில் இருந்து அவரை தத்தெடுத்து வளர்த்ததாகவும் சொல்கிறார். விஜய் ஆண்டனி அதிர்ச்சியாகிறார். ஆனாலும் அம்மா, அப்பா மீதான பாசம் அவருக்குக் குறையவில்லை.

அம்மா வீடு திரும்பிய பின்பும் அந்தக் கெட்ட கனவு அவரைவிடாமல் துரத்தியபடியே இருக்க.. தன்னுடைய சின்ன வயது வாழ்க்கையிலே ஏதோ ஒன்று நடந்திருக்கிறது. அதனால்தான் இந்தக் கெட்ட கனவு தன்னைத் துரத்துவதாக நினைக்கிறார் விஜய் ஆண்டனி.

இதனால் அம்மா, அப்பாவிடம் சொல்லிவிட்டு தனது பூர்வீகம் பற்றி அறிய விரும்பி சென்னை வருகிறார் விஜய் ஆண்டனி. தன்னை அந்த அனாதை இல்லத்தில் கொடுத்துவிட்டுச் சென்றவர் பார்வதி என்றும், அவருடைய ஊர் கடம்பனூர் என்றும் தெரிகிறது.

அந்த ஊருக்குச் செல்கிறார். அங்கேயிருக்கும் ஒரு பெரியவர் பார்வதிதான் விஜய் ஆண்டனியின் தாயார் என்றும் அவர் மாடு முட்டி இறந்துவிட்டதாகவும் சொல்கிறார். தனது தந்தை யார் என்று அறிய முற்படுகிறார் விஜய் ஆண்டனி. அவருடைய தந்தை அருகில் இருக்கும் கனவுக்கரை என்னும் ஊரில் இருக்கலாம் என்று அந்தப் பெரியவர் சொல்கிறார்.

இதனால் கனவுக்கரை ஊருக்குச் செல்லும் விஜய் ஆண்டனி தான் யார் என்பதை சொல்லாமலேயே தனது தந்தை யார் என்பதை அறிய முற்படுகிறார். இதற்காக அதே ஊரைச் சேர்ந்த யோகி பாபுவின் உதவியோடு முதலில் கிளினிக் ஒன்றைத் துவக்குகிறார்.

அந்த கிளினிக்கிற்கு வரும் கிராமத்து மக்களிடத்தில் பார்வதி என்ற பெண்ணைப் பற்றி விசாரிக்கிறார். ஏதும் தெரியவில்லை. அவருடைய முதல் சந்தேகம் ஊர் பண்ணையாரான மதுசூதனன் மீது விழுகிறது. அவருடைய காதல் கதையைக் கேட்ட பின்பு அது பார்வதியில்லை என்று தெரிகிறது.

இதற்கடுத்து வேல ராமமூர்த்தி மீது சந்தேகம் வந்து அந்தக் கதையில் திரையில் விரிகிறது. இந்தக் கதையின் முடிவிலும் அந்த ஹீரோயின் இறந்துவிடுவதால் இதுவும் பார்வதியில்லை என்பது ஊர்ஜிதமாகிறது. கடைசியாக அந்த ஊர் பாதிரியாரான ஜெயப்பிரகாஷ் மீது சந்தேகம் வருகிறது. இந்தக் கதையும் திரையில் விரிகிறது.

கடைசியில் யார்தான் விஜய் ஆண்டனியின் உண்மையான அப்பா..? இறந்து போன பார்வதியின் உண்மைக் கதை என்ன என்பதுதான் படத்தின் திரைக்கதை..!

விஜய் ஆண்டனி தனக்கு செட்டாகும் கேரக்டர்களில் மட்டுமே தான் நடிப்பதாக முதல் படத்தில் இருந்தே சொல்லி வருவதால் அவருடைய நடிப்பு வித்தியாசமாக இருக்கும் என்றெல்லாம் எண்ணாமல் படத்திற்கு வந்தால் படத்தை ஒரு திரைப்படமாக எண்ணி பார்த்துவிட்டு வரலாம்.

ஒரே மாதிரியான வசன உச்சரிப்பு, முக பாவனைகள்.. இவற்றுடன் 10 படங்களைத் தாண்டிவிட்ட விஜய் ஆண்டனியின் திறமையை நினைத்து ஆச்சரியப்படுகிறோம். அப்படியும் படத்தை ஓட வைத்துவிடும் திறமையும் இவர் தேர்வு செய்யும் இயக்குநர்களுக்கும், தேர்வு செய்யும் கதைக்கும் உண்டு. அத்தகைய கதைத் தேர்வுக்காகவும் விஜய் ஆண்டனியை பாராட்டலாம்.

இந்தப் படத்தில் இடையில் வரும் மூன்று கதைகளிலும் விஜய் ஆண்டனியே சின்ன வயது நாயகர்களாக நடித்திருக்கிறார். கொஞ்சம் மேக்கப்பில் கவனம் செலுத்தி மாற்றியிருந்தால் கவன ஈர்ப்பு பெரிதாக இருந்திருக்கும்.

ஷில்பா மஞ்சுநாத்துடனான காதல் போர்ஷனில் சின்ன வயது நாசராக விளையாடும் விஜய் ஆண்டனிதான் கொஞ்சம் ரசிக்க வைக்கிறார். இதற்கு தோதான இயக்கம், கலை இயக்கம், லொகேஷன்.. என்று பல காரணங்களும் உண்டு.

‘பத்திரிகையாளர்களுக்காக’ என்று சொல்லி ரொமான்ஸில் புகுந்து விளையாடியிருக்கும் விஜய் ஆண்டனி முதல்முறையாக ‘லிப் டூ லிப்’ கிஸ்ஸும் அடித்திருக்கிறார். இப்படி கிஸ் அடிக்கச் சொன்னது எந்தப் பத்திரிகையாளர் என்று விஜய் ஆண்டனியே சொன்னால் தெரிந்து கொள்வோம். சரி.. எங்க பெயரைச் சொல்லி வாழ நினைக்கிறார். வாழட்டும்..

ரோமியோ-ஜூலியட் நாடகம் என்று சொல்லி அம்ரிதாவுடன் அவர் ஆடும் ஆட்டமும், பாடல் காட்சியும் கொஞ்சம் எரிச்சலூட்டுகிறது. வேறு திரைக்கதை செய்திருக்கலாம். அவசரத்தனமாக அம்ரிதா செய்யும் வேலையினால் ஏற்படும் சோகம் விஜய் ஆண்டனியையும் தாண்டி ரசிகனைத் தொடவே இல்லை என்பதுதான் சோகத்திலும் சோகம்.

ஜெயப்பிரகாஷ்-சுனைனா காதல் கதையில் இருக்கும் ஈரமும், காதலும்தான் படத்தின் ஹைலைட். ஆண்டாண்டு காலமாய் நீடித்திருக்கும் சாதி பாகுபாட்டையும் தைரியமாய் இதில் காட்டியிருக்கிறார் இயக்குநர். 30 ஆண்டுகளுக்கு முந்தைய தமிழ்நாடு என்றில்லை.. இன்றைக்கும் இது போன்ற சாதிய கொடுமைகள் தமிழ்நாட்டில் இருக்கின்றன என்பதை இயக்குநர் தனது செயலான மாமனாரிடம் எடுத்துச் சொன்னால் நன்றாக இருக்கும்.

சுனைனா, அம்ரிதா, அஞ்சலி, ஷில்பா மஞ்சுநாத் ஆகிய நான்கு ஹீரோயின்களில் அதிகம் கவர்பவர் ஷில்பாதான். வயதான வேல ராமமூர்த்தியால் கவர்ந்து வரப்பட்டு கட்டாய மனைவியாய் ஆக்கப்பட்டிருக்கும் அவருக்கே பிராக்கெட் போடுகிறார் கொள்ளைக்காரரான சின்ன வயது நாசர்.

இந்தக் கதையில் இருக்கும் அத்துமீறலையும் தாண்டிய காதலை ருசிகரமாக படமாக்கியிருக்கிறார் இயக்குநர் கிருத்திகா. இத்தனை தைரியசாலியாக இருக்கும் ஷில்பா ஏன் வேல ராமமூர்த்தியிடம் அடங்கிப் போயிருக்கிறார்.. எப்பவோ அவரை போட்டுத் தள்ளிவிட்டுப் போயிருக்கலாமே என்கிற கேள்வி எழாமல் இல்லை.

பாடல் காட்சிகளில் கிளாமரை சேலையிலேயே காட்டியிருக்கும் ஷில்பா சில வசனக் காட்சிகளில் விஜய் ஆண்டனியையும் சேர்த்தே காப்பாற்றியிருக்கிறார்.

ஷில்பாவுக்கு அடுத்து தேறியிருப்பவர் அம்ரிதா. மதுசூதனன்ராவின் கல்லூரி காதலியாக வருபவர்.. காதலை ஏற்றுக் கொள்ளாமல் தவிர்த்துவிட்டு பின்பு ஒரேயொரு நாடகத்தின் மூலமாய் காதலை ஏற்றுக் கொண்டு டூயட் பாடுவதும், இவரும் கடைசியாய் பரிதாபமாய் உயிரை விடுவதுமாய் கதையை நகர்த்த பெரிதும் உதவியிருக்கிறார்.

அஞ்சலிக்கு இப்படியொரு சோகமான கேரக்டரா.. அதிகமான காட்சிகளே இல்லாமல்.. டூயட்டுகளும் இல்லாமல்.. காமாசோமா மருத்துவராக இவரைக் காட்டியிருப்பது ஒன்றுதான் படத்தில் மிகப் பெரிய மைனஸாக இருக்கிறது. நாட்டு மருத்துவராக இருக்கும் இவரே பொறுப்பில்லாத இளைஞியாகவும் காட்டப்படுவது இவரது கேரக்டரை சிதைத்துவிட்டது.

சுனைனா அமைதியான ஆனால் ஆழமான சிந்தனை கொண்ட பெண்ணாக தோன்றியிருக்கிறார். தன் ஒருத்தியால் நல்லாயிருக்கும் ஊரில் பிரச்சினை வேண்டாம் என்றும், ஜெயப்பிரகாஷின் வாழ்க்கையும் தடம் புரள வேண்டாம் என்று நினைத்து அவர் எடுக்கும் முடிவுதான் விஜய் ஆண்டனி இப்படி நாடு விட்டு நாடு வந்து தேடியலையும் காட்சிக்கான அடிப்படை காரணம்.

இதனை தெளிவாகச் சொல்லியிருந்தாலும் கடைசியாக சுற்றி வளைத்து மூன்றாவது கதையில் சொல்லியிருப்பதால் அப்பாடா.. இப்போதாவது சொல்லி முடித்தார்களே என்ற ஏக்கப் பெருமூச்சுதான் வந்தது..

இப்போதைக்கு பல படங்களைக் காப்பாற்றி வரும் நகைச்சுவை நடிகர் யோகி பாபுவும் படத்தின் முற்பாதியை தாங்கிப் பிடித்திருக்கிறார். தனது டயலாக் டெலிவரியில் சிற்சில இடங்களில் சிரிக்கவும் வைத்திருக்கிறார். புன்னகைக்கவும் வைத்திருக்கிறார்.

வேல.ராமமூர்த்தியின் உடல் மொழியும், நடிப்பும்தான் அந்தக் கேரக்டருக்கே கெத்து சேர்க்கிறது. இவர் இது போன்று இன்னும் எத்தனை கேரக்டர்தான் நடிப்பார் என்று தெரியவில்லை. போரடிப்பதற்குள் மாற்றிக் கொள்வார் என்று எதிர்பார்க்கிறோம்.

ஜெயப்பிரகாஷ் தனது இயல்பான நடிப்பால் கொஞ்ச நேரம் வில்லன் இவர்தானோ என்று நினைக்க வைத்துவிட்டார். அந்த அளவுக்கு நடித்திருக்கிறார். மதுசூதனன் ராவும் நடிக்க வைக்கப்பட்டிருக்கிறார்.

ரிச்சர்டு எம்.நாதனின் ஒளிப்பதிவு கிராமத்துக் கதைகளையும், காட்சிகளையும் முழுமையாக படமாக்கியிருக்கிறது. கல்லூரி காலங்கள் மற்றும் அமெரிக்கா என்று சொல்லி இங்கேயே எடுக்கப்பட்டிருக்கும் சில காட்சிகளில்கூட ரிச்னெஸ் தெரிகிறது. காதல் காட்சிகளிலும், குளோஸப் காட்சிகளிலும் மெய் மறந்து பார்க்க வைத்திருக்கிறது கேமிராவும், கேமிரா கோணங்களும்தான். இயக்குநருக்கும், ஒளிப்பதிவாளருக்கும் தனித்தனி பாராட்டுக்கள்..!

விஜய் ஆண்டனியின் இசையில் ‘அரும்பே’ பாடல் மிக அருமை. மீண்டும், மீண்டும் கேட்க வைக்கும் இசையுடன் அமைக்கப்பட்டிருக்கிறது. இதேபோல் ‘அம்மா அழுகிறேன்’ பாடல் அம்மா செண்டிமெண்ட்டை ரசிகர்களிடத்தில் உருவாக்குகிறது. ‘யுகம் நூறாய்’, ‘போராயோ’ பாடல்களும் கேட்கும் ரகம்தான்..

பெண் இயக்குநர் என்பதால் இப்படிப்பட்ட காட்சிகளையெல்லாம் இவரால் இயக்க முடியாது என்ற கேள்விக்கே இடம் கொடுக்காமல் ரொமான்ஸ் காட்சிகளை முழு ஈடுபாட்டுடன் இயக்கியிருக்கிறார் கிருத்திகா.

அம்ரிதா, ஷில்பாவுடனான காதல் காட்சிகளே இதற்கு சாட்சி. இதேபோல் சின்ன வயது நாசராக நடிக்கும் விஜய் ஆண்டனிக்கு வைத்திருக்கும் சண்டை காட்சிகளும் அபாரம் என்று சொல்லும் அளவுக்கு இருக்கிறது. சண்டை இயக்குநருக்கு ஒரு பாராட்டு..!

என்னதான் விஜய் ஆண்டனி அமெரிக்க மருத்துவர் என்றாலும்கூட டி.என்.ஏ. பரிசோதனைக் கூடத்தை அவர் ஒருவரே அக்குகிராமத்தில் அமைப்பது போலவும், அதில் அவர் ஒருவரே பரிசோதனை முடிவுகளை சோதனை செய்வது போலவும் காட்சியமைத்திருப்பது கொஞ்சம் ஓவரான ஹீரோத்தனம்..!

இதேபோல் மெடிக்கல் செக்கப் என்ற பெயரில் மக்களை அழைத்து சோதிப்பதெல்லாம் சமீபமாக உருவானதுதான். போலியோ சொட்டு மருந்துக்கு சிறப்பு கேம்ப் அமைப்பது எந்தக் காலத்தில் இருந்து துவங்கப்பட்டது என்பதையும் இயக்குநர் கொஞ்சம் தெரிந்து கொண்டு திரைக்கதையில் இணைத்திருக்கலாம்தான்..!

நடிகர் விஜய் ஆண்டனியும், இயக்குநர் கிருத்திகா உதயநிதியும் மென்மேலும் இதைவிடவும் சிறந்த திரைப்படங்களை கொடுக்க வாழ்த்துகிறோம்.

ஒரு பொழுது போக்கு சினிமாவாக நினைத்தால், இத்திரைப்படம் அதற்குத் தகுதியான படம்தான்…!

Tweet

சலீம் - சினிமா விமர்சனம்

31-08-2014

என் இனிய வலைத்தமிழ் மக்களே..!

ஆச்சரியமாக இருக்கிறது. முதல் படத்தின் தொடர்ச்சியாக இரண்டாம் படத்தின் கதையையும் கொண்டு வருவதென்பது ஒரு ஹீரோவாலும், இயக்குநராலும் மட்டும் முடியாது.. தயாரிப்பாளரும் நினைக்க வேண்டும். இங்கே 2 தயாரிப்பாளர்கள் கூட்டணியுடன் அதனை செய்து காட்டியிருக்கிறார்கள் விஜய் ஆண்டனியும், இயக்குநர் நிர்மல் குமாரும்..!

முதல் பாகமான ‘நான்’ படத்தில் இந்துவாக இருந்து சந்தர்ப்பவசத்தால், முஸ்லீமாக அடையாளம் காட்டி தவறான வழியில் மருத்துவ சீட்டை பெற்று மருத்துவம் படிக்கும் விஜய் ஆண்டனியின் வாழ்க்கையில் நடக்கும் குறுக்கீடுகளை காட்டினார்கள்..

இதில் மருத்துவப் படிப்பை முடித்துவிட்டு சேவை செய்யும் மனப்பான்மையோடு நல்ல மருத்துவனாக இருக்க முயலும் ஹீரோவை, சிலர் மனதளவில் தாக்கிவிட.. இதன் பக்க விளைவுகள் என்னவாகின்றன என்பதுதான் கதை..!

சலீம் இப்போது ஒரு பெரிய கார்ப்பரேட் மருத்துவமனையில் மருத்துவராக இருக்கிறார். திருமணத்திற்கு பெண் பார்த்திருக்கிறார். அந்தப் பெண்ணும் இவரைப் பார்க்க வருகிறார். ஆனால் அந்தப் பெண் கூப்பிட்ட போதெல்லாம் உடனுக்குடன் ஓடி வரும் கணவர்தான் தனக்கு வேண்டும் என்று எதிர்பார்க்கிறார். சலீமுக்கு அப்படியொரு டார்ச்சரை கொடுக்கிறார்.

இயல்பாகவே மிக நல்ல மனிதராக இருக்கும் சலீம் வரப் போகும் மனைவிக்காக எவ்வளவோ விட்டுக் கொடுத்து போகிறார். ஆனால் அவரது மருத்துவத் தொழில் அதனை செய்யவிடாமல் தடுக்கிறது. புரிந்து கொள்ளாமல் இருக்கிறார் வருங்கால மனைவி.

இந்த நேரத்தில் ஒரு இரவு வேளையில் 4 ஆண்களால் கசக்கி எறியப்பட்ட ஒரு பெண்ணை காப்பாற்றி தன்னுடைய மருத்துவமனைக்கு கொண்டு வந்து சேர்க்கிறார் சலீம். போலீஸுக்கும் தகவல் சொல்கிறார். ஆனால் விடிந்தபோது அந்தப் பெண் அங்கில்லை. ஏற்கெனவே சலீம் மீது மிக கோபத்தில் இருக்கும் மருத்துவமனையின் எம்.டி. அன்றிரவு ஹோட்டலுக்கு அனைத்து மருத்துவர்களையும் அழைத்து அவர்கள் முன்னிலையிலேயே சலீமை அவமானப்படுத்தி டிஸ்மிஸ் என்கிறார்.

இந்த விரக்தியில் மதுவருந்திவிட்டு வெளியே வரும் சலீம் போதையில் மப்டியில் இருக்கும் இன்ஸ்பெக்டர் அருள்தாஸிடம் ரூல்ஸ் அண்ட் ரெகுலேஷன் பேசுகிறார். சலீமை ஸ்டேஷனுக்கு கொண்டு போய் அமர வைக்கிறார். முந்தைய நாள் கல்யாணம் கேன்சல் என்று மணப்பெண்ணே சொல்லிவிட்டுப் போன விரக்தியில் இருக்கும் சலீமுக்கு மாமனார் போன் செய்ய.. அதையும் பேசவிடாமல் தடுக்கிறார் இன்ஸ்பெக்டர்.

கடுப்பான சலீம் போனை தூக்கிக் கொண்டு ஓட.. பின்னாலேயே போலீஸும் விரட்ட.. ஒரு தேடுதல் வேட்டைக்கப்புறம் சலீம் பிடிபடுகிறார். ஆனால் அவரை சிறையில் வைக்க ஜாமீன் கிடைக்காத வழக்கு பிரிவுகளின் கீழ் வழக்கு பதிவு செய்திருப்பதாக இன்ஸ்பெக்டர் சொல்லிவிட்டு அவனது மாமனாரிடமும் இதைச் சொல்ல முயல.. இப்போது சலீம் அந்த போலீஸ் காரை விபத்துக்குள்ளாக்குகிறார். இன்ஸ்பெக்டரின் துப்பாக்கியை பறிமுதல் செய்துவிட்டு அங்கிருந்து தப்பியோடுகிறார்.

மீண்டும் ஹோட்டலுக்கு வந்து தனது மருத்துவமனை எம்.டி.யையும், சகாக்களையும துவம்சம் செய்துவிட்டு ஒரு தீர்மானத்தோடு வெளிநாடு செல்ல கிளம்புகிறார். போகும் வழியில் அவர் சந்திக்கும் அந்த பாதிக்கப்பட்ட பெண்ணின் அப்பா வழிமறித்து தனது மகளையும், மனைவியையும் மீட்டுக் கொடுக்கும்படி சொல்ல.. சலீமின் மனம் மாறுகிறது.

இப்போது அவர் எடுக்கும் முடிவுதான் படத்தின் சுவையான இரண்டாம் பகுதி.. மாநில உள்துறை அமைச்சரின் மகனையும், அவது 3 நண்பர்களையும் ஹோட்டல் அறைக்குள் அடித்துப் போட்டு கட்டிப் போட்டு பிணைக் கைதிகளாக்கி போலீஸிடம் பணயம் பேசுகிறார். அது எதற்கு என்பதும் முடிவு என்ன என்பதுதான் மிச்சம் மீதிக் கதை.

இதில் இருக்கும் சஸ்பென்ஸை உடைத்தால் இனி படம் பார்க்கப் போகும் அன்பர்களுக்கு சுவையிருக்காது என்பதால் அதனை முற்றிலுமாக தவிர்க்கிறேன்..!

முதல் பாதியில் சலீமின் குண நலன்களை வெளிக்காட்ட விரும்பி பல காட்சிகள் நம் பொறுமையை சோதிக்கின்ற அளவுக்கு வைத்திருக்கிறார்கள். ஆனாலும் மனைவியாக வரப் போகின்றவர் செய்யும் டார்ச்சர்கள் படம் பார்ப்பவர்களையே டென்ஷனாக்குவதால் படம் முதல் பாதியும் ஓகே என்ற நிலைமைக்குத்தான் உள்ளது.

படத்தின் பிற்பாதியில் சஸ்பென்ஸ் திரில்லராக மிக வேகமாக பறக்கிறது.. அடுத்தது என்ன என்பதை யூகிக்காத அளவுக்குக் கொண்டு சென்றிருக்கிறார்கள். நர்மதாவின் தந்தையைச் சந்தித்தது.. அந்த போலீஸ் இன்ஸ்பெக்டரை தாக்கி பிரிட்ஜுக்குள் வைத்திருப்பது.. வடசென்னை தாதாவை வரவழைப்பது.. உள்துறை அமைச்சரை வரவழைப்பது.. ஒவ்வொரு முடிச்சாக சுவாரஸ்யமாக அவிழ்ப்பது என்ற திரைக்கதையால் கடைசிவரையிலும் டென்ஷனை கூட்டியிருக்கிறார்கள்.

முதல் பாகம் ஓகே.. இரண்டாம் பாகம் டபுள் ஓகே.. மூன்றாம் பாகமும் வரப் போகிறதாம்.. அதனால் தொடரும் என்றே போட்டு முடித்திருக்கிறார்கள்..!

நான் படத்தில் பார்த்தே விஜய் ஆண்டனிதான். சலீமாக நடித்திருப்பதால் புதிதாக எதையும் செய்யவில்லை. அதே சாந்தமான முகம். அமைதியான, அடக்கமான, அலட்டல் இல்லாத நடிப்பு. ஆனால் இப்படியே தொடர்ந்து எத்தனை படங்களில் நடிப்பாரென்று தெரியவில்லை.. கிளைமாக்ஸ் காட்சிகளில் மட்டும் கண்ணீர் சிந்துகிறார். ஆனால் அது மனதைத் தொடவில்லை. ஆனால் காட்சியமைப்பு மட்டுமே உருக்குகிறது..!

இவருக்கும் சேர்த்து வைத்து நடித்திருக்கிறார் ஹீரோயின் அக்சா. படபடவென எண்ணெய் சட்டியில் பொரியல் வெந்ததை போல இவர் வெடிக்கின்ற அழகே அழகு.. தக்காளியாக இருக்கும் இவரது முகம் கோபத்தில் மேலும் சிவந்து போகிறது.. பாடல் காட்சிகளில் கொள்ளை அழகாக இருக்கிறார்.. போலீஸாரிடம் படபடவென பேசும் காட்சியில் நச் என்று இருக்கிறது அவரது கேரக்டர் ஸ்கெட்ச்.. பாராட்டுக்கள்.. டப்பிங் குரல் என்றாலும் அது தெரியாத அளவுக்கு நடித்திருக்கிறார். நடிக்க வைத்திருக்கிறார் இயக்குநர்.. வெல்டன் டைரக்டர்..

கிரைம் பிரான்ச் டெபுடி கமிஷனர் செழியனாக நடித்திருக்கும் சந்திரமெளலி அடக்கமாக தனது பாணி நடிப்பைக் காட்டியிருக்கிறார். உள்துறை அமைச்சரிடம் வந்து நீயும் பிடுங்கு என்று கோபத்துடன் சொல்லும்போது அரங்கம் அதிர்கிறது.. ஒரு காவல்துறை அதிகாரியாக தன்னுடைய கடமையைச் செய்யும்போதும் வரும் குறுக்கீடுகளை அவர் எதிர்கொள்ளும்விதத்தில் காவல்துறை மீது கொஞ்சம் பரிதாபத்தையும் சம்பாதித்துக் கொடுத்திருக்கிறார்.

ஓரிடத்தில் கிடைத்த சந்தர்ப்பத்தில் ஒரு உண்மையை உரைகல்லாக்கியிருக்கிறார்கள் வசனகர்த்தாக்கள்.. “நீ எந்த நாட்டு தீவிரவாதிடா..? முஹாஜிதீனா? லஷ்கர் இ தொய்பாவா?”  என்று டெபுடி கமிஷனர் செழியன் கேட்கும்போது “என் பேரை வைச்சு இப்படி முடிவெடுக்காதீங்க ஸார்.. எல்லாரும் அப்படி இல்ல.. வேணும்னா என் பேரை விஜய்ன்னும் ஆண்டனின்னும் வைச்சுக்குங்க..” என்று சலீம் திருப்பி பதில் சொல்வதும் நல்லதொரு பதிலடி.. வசனங்கள்கூட மிக சின்னதாக.. ரத்தினச் சுருக்கமாக அழகாக இருக்கின்றன..!

அடுத்து பாராட்டுக்குரியவர் உள்துறை அமைச்சராக நடித்திருக்கும் இயக்குநர் ஆர்.என்.ஆர்.மனோகர். அரசியல்வாதிகளுக்கே உரித்தான கவுரவமே முக்கியம் என்கிற கொள்கையை பின்பற்றுபவராக இருக்கிறார். அறிமுக்க் காட்சியில் இருந்து கிளைமாக்ஸ்வரையிலும் மகன் மீது பாசம் உள்ளவராகவும், பின்பு மகனையே போட்டுத் தள்ளும்படி அடியாட்களுக்கு சிக்னல் கொடுப்பவராகவும் மாறுவது இன்றைய அக்மார்க் அரசியல்வியாதிகளுக்கு ஒரு எடுத்துக்காட்டுதான்..!

ஒளிப்பதிவாளர் கணேஷ் சந்திரா அசத்தியிருக்கிறார். முதல் காட்சியில் இருந்து முற்றும்வரையிலும் பிரேம் பை பிரேம் அழகுதான்.. பாடல் காட்சிகளில் இன்னும் கொஞ்சம் அழகைக் கூட்டியிருக்கிறார். பிற்பாதி விறுவிறுப்புக்கு எடிட்டரும் ஒரு காரணம்.. ஹோட்டல் அறைக்குள் நடக்கும் சண்டை காட்சியை தொய்வில்லாமல் மிக அழகாக தொகுத்திருக்கிறார் எடிட்டர். பாராட்டுக்கள்..!

‘உன்னை கண்ட நாள் முதல்’, ‘மஸ்காரா மஸ்காரா’ பாடல்கள் அருமை. நினைத்தாலே இனிக்கும் படத்தின் ‘சிவ சம்போ’ பாடலை இதில் ரீமிக்ஸ் செய்து கொலை செய்திருக்கிறார்கள். இது ஒன்றுதான் இப்படத்தின் மன்னிக்க முடியாத குற்றம்..! இப்படத்தின் பின்னணி இசையும் குறிப்பிடத்தக்க அளவு தனது பங்களிப்பை சிறப்பாகவே செய்திருக்கிறது. சொந்தப் படமென்றால் சாதாரணத்தைவிடவும் மிக நன்றாகவே இசையமைப்பார்கள் போலிருக்கிறது.

இது போன்ற படங்களில் லாஜிக்கெல்லாம் பார்க்கவே கூடாது என்றாலும் சிலவைகளை சொல்லியே ஆக வேண்டும்.. அவ்வளவு பெரிய மருத்துவமனையில் சிகிச்சையளிக்கும் மருத்துவர்கள் பணம் வாங்குவது என்பது அறவே கிடையாது.. அது தனி பில்லாக ரிசப்ஷனிலேயே கட்டிவிடச் சொல்வார்கள். சின்ன மருத்துவமனையில் மட்டுமே அது சாத்தியம்..

“5 ரூபாய் வாங்கியிருக்கிறீர்களே…” என்று சலீமை எம்.டி. கடிந்து கொள்வது.. பின்பு அதே எம்.டி. “தனது மருத்துவமனையின் இந்த வருட வருமானம் 132 கோடி..” என்று சொல்வது மிகப் பெரிய முரண்பாடு..!

சமீப காலமாக இது போன்ற திரில்லர், சஸ்பென்ஸ் போன்ற படங்களில் போலீஸை மிகக் குறைவாகவே எடை போட்டதுபோலவே காட்சிகளை அமைக்கிறார்கள் நமது இயக்குநர்கள்..

ஒரே சமயத்தில் கதவை உடைத்துக் கொண்டும், ஜன்னல் பக்கம் உடைத்துக் கொண்டும் உள்ளே போனாலே கதை முடிந்துவிடும்.. போலீஸுக்கு எத்தனையோ வழிகள் இருக்கின்றன. உள்துறை அமைச்சர் என்பதால் பேசியே சமாளிக்கலாம் என்பதால் இத்தனை பெரிய திரைக்கதையோ..?

கிளைமாக்ஸில் அவ்வளவு அதிகமான போலீஸ் படைகளைத் தாண்டியும் சலீமால் குருவை வெளியில் கொண்டு போக முடியுமென்பது படத்தின் மிகப் பெரிய லாஜிக் ஓட்டை.. இருந்தாலும் படத்தின் இறுக்கமான இயக்கத்தினால் நன்கு ரசிக்க முடிந்தது..! அந்த கிளைமாக்ஸ் டிவிஸ்ட்கூட சூப்பர்தான்..!

முயலைகூட சீண்டிக் கொண்டேயிருந்தால் அது ஒரு கட்டத்தில் தன்னால் முடிந்த அளவுக்கு திருப்பிக் கடிக்கத்தான் செய்யும். அதைத்தான் இந்தப் படத்தில் முடிந்த அளவுக்கு நம்பகத் தன்மையோடும், சமூக அக்கறையோடும் சலீம் செய்து காட்டியிருக்கிறார். அடுத்த பாகம் எப்படியோ..?

சலீமுக்கு நிச்சயம் ஒரு சலாம் போடலாமுங்கோ..!

Tweet