மூடர் கூடம் - சினிமா விமர்சனம்

21-09-2013

என் இனிய வலைத்தமிழ் மக்களே..!

தமிழ்ச் சினிமாவில் புதிய முயற்சிகள் அத்திப்பூத்தாற்போல் நடந்து அதிலும் ஒரு சிலவைகள் மட்டுமே வெற்றி பெறுகின்றன.. கவனத்தை ஈர்க்கின்றன.. பாராட்டும் பெறுகின்றன.. அந்த வரிசையில் இந்தப் படமும் ஒன்று..!

நகைச்சுவை என்ற பெயரில் எதிராளியின் உடல் அமைப்பை மட்டுமே கிண்டல் செய்து அப்படியே படம் முழுவதும் சிரிக்க வைத்துவிடும் வழக்கமான தமிழ்ச் சினிமாவை பொட்டில் அடித்தாற்போல் இதில் அடித்திருக்கிறார் இயக்குநர் நவீன்..!

வெள்ளை, சென்றாயன், குபேரன், நவீன் என்னும் நான்கு பேர் ஒரு வீட்டில் திருடப் போய்.. அது வெற்றிகரமாக முடித்தார்களா என்பதைத்தான் இந்த இரண்டரை மணி நேர கதையாகச் சொல்லியிருக்கிறார்கள்..! இதில் 3 பேர் முட்டாள்கள்.. நவீன் மட்டுமே புத்திசாலி போல் காட்சியளிக்கிறார்..!  இந்தப் புத்திசாலியால்தான் கதை மேலும், மேலும் நகர்கிறது..! 

முதலில் இப்படத்தின் தயாரிப்பாளர் நவீனை எத்தனைவிதமாகவும் பாராட்டலாம்..! இப்படி ஒரேயொடு லொகேஷனுக்குள்.. சின்ன நடிகர்களை வைத்து.. பாடல் காட்சிகள் இல்லாமல்.. பெரிய அளவுக்கான விளம்பரமும் இல்லாமல் எடுக்க துணிந்த அவரது முயற்சிக்குத்தான் தியேட்டர்களில் பெரும் கைதட்டல்கள் பரிசாகக் கிடைத்திருக்கின்றன.. இதனை வாங்கி வெளியிட்டிருக்கும் இயக்குநர் பாண்டிராஜுக்கும் ஒரு பாராட்டு..!

படத்தில் இடம் பிடித்திருக்கும் ஹீரோக்கள் முதல் துணை நடிகராக வலம் வரும் நாய்வரைக்கும் அனைவருக்கும் ஒரு பிளாஷ்பேக்கை வைத்து அதையும் ரசிக்கும்விதமாக படமாக்கியிருக்கும் விதமே அழகு.. மெளனப் படம் காலம்.. அனிமேஷன்.. ஊட்டி மலைப் பிரதேச லொகேஷனில் நடக்கும் வெள்ளையின் பிளாஷ்பேக்.. குபேரனுக்கு முட்டாள் என்ற வார்த்தையால் வரும் கோபம்.. நவீனின் சோகமான பிளாஷ்பேக்.. அந்த நாய் அந்த வீட்டிற்கு வந்து சேர்ந்திருக்கும் கதை என்று அனைத்தையும் மிக நீட்டாக சொல்ல வேண்டிய இடத்தில் கச்சிதமாக சொல்லிச் சேர்த்திருக்கிறார் நவீன்..!

நடிப்பில் அதிக ஸ்கோர் செய்திருப்பது சந்தேகமேயில்லாமல் சென்றாயன்தான்..! இவரையும் நாடோடிகள் பரணியையும் ஒன்றாக நினைத்து நானும் ஆரம்பத்தில் குழம்பித்தான் போனேன்..! வசனங்களையும் தாண்டி அந்த மாடுலேஷனிலும், நடிப்பிலும் சென்றாயன் மிரட்டியிருக்கிறார்..! ஆனாலும் சிற்சில இடங்களில் அவருடைய வெறுமையான முக பாவனையே ஓவர் ஆக்டிங் போன்று தோன்றியதையும் மறுப்பதற்கில்லை..!

ஜெயபிரகாஷின் மகன் வெள்ளையை ‘அந்த’  இடத்தில் குத்தியதை நினைவில் நிறுத்தி அடி வாங்குகின்ற காட்சிகளில் கொஞ்சம் கத்திரி போட்டிருக்கலாம். பாவமாக இருந்தது.. அதேபோல் 'மன்னன்' படத்தின் காட்சியைப் பார்த்துவிட்டு நவீனை காதலோடு பார்க்கும் ஓவியாவின் தங்கையின் கேரக்டர் ஸ்கெட்ச் ரொம்பவே ஓவர்தான்..! பய உணர்வோடு பார்ப்பதாகத்தான் அது இருந்திருக்க வேண்டும்.. ஆனால் மாறாக காதல் வருவதென்னவோ தலைகீழ் உணர்வாக தெரிகிறது எனக்கு..! அந்தப் பையன் “மொத மொதல்ல என்கிட்ட ஒரு வேலையைக் கொடுத்திருக்காங்க.. ஒழுங்கா என்னை செய்ய விடுங்க..” என்று சொல்வதுகூட பிள்ளை வளர்ப்பு பற்றி பெற்றோர்களுக்கு சொல்லிக் கொடுப்பது போலத்தான் இருக்கிறது. ஆனால் இதுவும்கூட அப்நார்மல் டைப்புதான்..!

ஓவியாவின் பாத்ரூம் அவசரம்.. பாத்ரூமுக்குள் இன்னொரு திருடன் என்று திரைக்கதைக்குள் புது ஆளை கொண்டு வந்திருக்கும் வித்தைகள்.. அந்த பொம்மை திருடன் சென்றாயனுக்கு அறிமுகமாகும் அந்தக் காட்சியும் ரசனையானது..!  செல்போனில் ஜெயபிரகாஷுக்கு டார்ச்சர் கொடுக்கும் அந்தச் சுட்டிக் குழந்தையை மறக்க முடியுமா..? நடிக்க வைத்ததே தெரியாத வண்ணம் மிக அற்புதமாக நடித்திருக்கிறாள் அந்தச் சிறுமி.. 

நாட்டைவிட்டு ஓடிப் போக முடிவு செய்திருக்கும் ஜெயபிரகாஷின் திட்டம் பணாலாகி.. கடன் கொடுத்த சேட்டு வாங்க வந்து.. கையொடிக்கப்பட்டு பந்தாடப்பட்டு தாவூத்திடம் சரண்டராகும் காட்சிகளும்.. தாவூத் வீட்டில் நடக்கும் இயல்பான காமெடிகளும் இந்த இயக்குநர் நவீனிடம் ஏதோ இருக்குய்யான்னு சொல்ல வைக்குது..!  

குபேரன், வெள்ளையுடன் கூடவே இயக்குநர் நவீனும் தன் பங்குக்கு சிறப்பாகத்தான் செய்திருக்கிறார்..!  ஆனால் ஒரேயொரு முறுகல்.. அவரது வாய்ஸ் மற்றும் மாடுலேஷன்.. இயக்குநர்கள் எல்லோருமே சென்னையின் தியேட்டர்களை மட்டுமே குறியாய் வைத்து ஒலிப்பதிவு கோர்வை செய்கிறார்களோ என்று எண்ணத் தோன்றுகிறது.. மணிரத்னம் டைப்பில் நவீன் பேசும் பல வசனங்கள் கமலா தியேட்டரிலேயே பலருக்கும் புரியவில்லை. மற்றவர்கள் சிரிப்போடு கலந்து கொண்டுதான் சிரித்துத் தொலைத்தார்கள். இங்கயே இப்படியென்றால் மற்ற ஊர்களிலெல்லாம் எப்படியென்று யோசித்துப் பாருங்கள்..!

கொட்டாம்பட்டி தியேட்டரில் எப்படி இதனை ரசித்திருக்க முடியும்..? இதன் விளைவுதான் படத்தின் தற்போதைய முடிவு.. ‘சூது கவ்வும்’, ‘நேரம்’ படங்களைப்போல பரவலாக பேசப்பட்டு, வசூலில் அவற்றைப் பின்பற்றியிருக்க வேண்டிய படம்.. இப்போதுவரையிலும் சிறு நகரங்களிலும், குறு நகரங்களிலும் ஒரு ஷோகூட ஹவுஸ்புல் ஆகவில்லை என்கிறது கலெக்சன் ரிப்போர்ட்..! சென்னையில்கூட மல்டிபிளக்ஸ்களில் மட்டுமே ஹவுஸ்புல் போர்டு.. அதுவும் ஞாயிற்றுக்கிழமை மட்டுமே.. நான் பார்த்த கமலாவில் பாதி இருக்கைகள் காலியாகத்தான் இருந்தன..!

‘சூது கவ்வும்’ படத்தின் கதை நம்மோடு இணைந்த கதை.. ‘நேரம்’ படமோ கடன் வாங்கிவிட்டு அல்லல்பட்டு நாம் படும் வலியை உணர்த்தியது.. தியேட்டருக்கு வந்தவனும் இதை உணர்ந்தான்.. தியேட்டர் நடத்துபவரும் இதை உணர்ந்திருந்தார்.. மவுத் டாக் என்று சொல்லப்படுவது இதன் மூலமாகவே அதிகமாகி படம் பரவலாகப் பேசப்பட்டு லாபத்தை ஈட்டியது.. ஆனால் இந்தப் படத்திற்கு இதுவே பெரிய மைனஸாகிவிட்டது..! ஒரு வீட்டில் முட்டாள்தனமாக திருடப் போயிருக்கிறார்கள் என்கிற உணர்வே சட்டென்று சாதாரண ரசிகனிடமிருந்து விலகிப் போயிருக்க.. வசனத்தின் மூலம் புரிய வேண்டிய பல காட்சிகளிலும் புரியாமல் இருக்க.. கெட்டது கதை..!

இத்தனைக்கும் படத்திற்கு மிகப் பெரிய பலமே வசனங்கள்தான்.. கம்யூனிஸம் என்றால் என்ன என்பது பற்றி கிளாஸ் எடுத்திருக்கிறார் இயக்குநர். ஆனால் அந்த வசனங்கள் யாருக்குக் கேட்டிருக்கும் என்பதுதான் சந்தேகம்.. கேட்டிருக்க வேண்டிய பாட்டாளிகள்  தங்களது தியேட்டர்களில் இதைக் கேட்டு மவுத்டாக் விட்டிருக்கலாம்..!? நவீன் தனக்கு வைத்திருந்த குளோஸப் ஷாட்டுகளில் மட்டுமே கொஞ்சமேனும் புரிந்தது.. சென்றாயனிடம் “பனிஷ்மெண்ட் ஓவரா இருக்கு.. கொஞ்சம் குறைச்சுக்கலாமே..?” போன்றவைகளுக்கு அழுத்தம் கொடுத்து பேசியிருக்கிறார். இதுபோலவே அனைத்தையும் பேசியிருக்கலாம்..! இட்ஸ் ஓகே.. அடுத்தப் படத்தில் திருத்திக் கொண்டால் நவீனுக்கே நல்லதாக இருக்கும்..!

சென்றாயன் அந்த தமிழ் வசனம் பேசும்போது எழுந்த கைதட்டல் நிசமாகவே மக்களுக்கு இருக்கும் தமிழ் உணர்வை அடையாளம் காட்டியது.. இந்தக் காட்சியின் இயக்கத்திற்காகவே சிறந்த புதுமுக இயக்குநருக்கான விருது நவீனுக்கே வழங்கப்பட வேண்டும் என்று என் மனசாட்சி சொல்கிறது..!

ஆட்டோ டிரைவர் வேடத்தில் வரும் ரவுடிகள்.. பொம்மையைத் தேடி வரும் ரவுடி.. வடசென்னை சேகராக வரும் ரவுடி.. தாவூத் இப்ராஹிம் மற்றும் அவனது அடிப்பொடிகள் என்று பலரது கேரக்டர் ஸ்கெட்ச் பலமாகவே படமாக்கப்பட்டிருக்கிறது.. இதனாலேயே படத்தின் சுவாரஸ்யங்கள் இடைவேளைக்குப் பின்பு மேலும் சர்ரென்று பறக்கிறது..! கிளைமாக்ஸின் அந்த டிவிஸ்ட்டுகள் அபாரமானவை..! ஆளாளுக்கு சென்னை தமிழ் பேசி கிளைமாக்ஸை பறக்க வைத்திருக்கிறார்கள்.. 

கோடிகளில் சம்பாதித்து நாட்டைவிட்டு ஓடிப் போக நினைக்கும் ஒருத்தருக்கு நாட்டுல ஒரேயொரு பிரண்ட் மட்டும்தானா இருப்பாரு..? எத்தனை திருடனுங்க இருந்திருக்க மாட்டானுங்க.. எப்படியாவது யார்கிட்டயாவது போன்ல சொல்லி தப்பிச்சிருக்கலாமேன்னு நாம லாஜிக் யோசிக்கலாம். ஆனா இயக்குநர் அது நமக்குத் தேவையில்லாத விஷயம்ன்னு சொல்லிட்டாரு.. திருட வர்றவங்கதான் முட்டாளுகன்னா வீட்ல இருக்கிறவங்களும் அது மாதிரியேதான் இருக்கணுமான்னு இன்னொரு கேள்வியும் வருது..! அனுபமாவின் கேரக்டர் ஸ்கெட்ச்சை பார்த்தாலே இதுவும் ஒரு காமெடி பேமிலி மாதிரியாத்தான் இருக்கு. ஆனா முதல் காட்சில வெள்ளையை சீக்கிரமா வெளிய அனுப்புறதுக்காக “காபியாச்சும் குடிச்சிட்டுத்தான் போகணும்”ன்னு சொல்ற அந்த வழக்கமான அத்தைகளின் பீலிங்கையும் காட்டியிருக்காங்க.. ஸோ.. படத்தை ரொம்ப ஆராயக்கூடாது.. அனுபவிக்கணும்.. இதுவொருவித சுகமான அனுபவமாகத்தான் இருக்கிறது.. தயவு செய்து மிஸ் பண்ணிராதீங்க..! 

மூடர் கூடம் - அவசியம் பார்க்க வேண்டிய படம்..!

Tweet

கேடி பில்லா கில்லாடி ரங்கா - சினிமா விமர்சனம்

01-04-2013

என் இனிய வலைத்தமிழ் மக்களே..!

பசங்க, வம்சம், மெரீனா என்று வேறு வேறு எளிய கதைகளில் யதார்த்தமான நகைச்சுவையுடன், சுவாரஸ்யமான திரைக்கதையுடன், அழுத்தமான இயக்கத்துடன் நம்மைச் சந்தித்த இயக்குநர் பாண்டிராஜ், தற்போதைய டிரெண்ட்டுக்கு ஏற்றாற்போல் திசைதிரும்பி புல் அண்ட் புல் காமெடி கச்சேரியை கொடுத்திருக்கிறார்..!

இரண்டு மணி 10 நிமிடங்கள் உங்களுக்காக.. அதையும் தாண்டிய கடைசி 10 நிமிடங்கள் எனக்காக இந்தப் படத்துல எடுத்திருக்கிறேன் என்று பேட்டிகளில் கூறிய பாண்டிராஜின் கூற்று சரியானதுதான் என்றாலும், படத்தைக் கொடுத்திருக்கும்விதம் அந்தக் கடைசி பத்து நிமிடத்தை நினைத்து பார்க்க முடியாத அளவுக்கு இருக்கிறது என்றுதான் நான் சொல்வேன்..!

இரண்டு வெட்டி ஆபீஸர்கள்.. அரசியலில் நுழைந்து கவுன்சிலராகி பணம் பார்க்க வேண்டும் என்பதே ஆயுட்கால லட்சியமாகக் கொண்டிருக்கிறார்கள்..! அவர்களது கனவு பலித்ததா இல்லையா என்பதுதான் கதை..! 

இன்றைய இளைஞர்களுக்கு ஏற்றாற்போல் அவர்களை பிரதிபலிக்கும் ஹீரோக்களாக சிவகார்த்திகேயன் மற்றும் விமல். சிவகார்த்திகேயனின் அப்பாவான இயக்குநர் மனோஜ்குமார், ரயில்வே ஸ்டேஷன் மாஸ்டர்.. விமலின் அப்பாவான டெல்லி கணேஷ் சொத்து சேர்த்து வைத்திருந்தாலும், தன் மகன் சொந்தக் காலில் நின்று வாழ்க்கையில் ஜெயித்துவிட மாட்டானா என்ற நம்பிக்கையுடன் இருப்பவர்.. இரண்டு அப்பாக்களின் அறிவுரைகளும் செவிடன் காதில் ஊதிய சங்காகவே இருக்க.. வாழ்க்கை கற்றுக் கொடுத்த பாடத்தின் மூலம் இவர்கள் உண்மையை உணர்ந்து வாழ்க்கையைத் துவங்கும்போது இருவரது குடும்பத்திலும் ஏற்படும் இழப்பையும், சோகத்தையும் மிக அழகாகப் பதிவு செய்திருக்கிறார் இயக்குநர்..!

இவர்களுக்குள் ஏற்படும் காதலைக்கூட மிக இயல்பாக ஆரம்பித்துவைத்து படம் முழுக்க வரும் நகைச்சுவையில் இவர்களது காதல் கொடுக்கும் டைமிங்சென்ஸ் காமெடியும் படத்துக்கு மிகப் பெரிய பலம்..! இந்தக் காதல் டிராக்குகள்தான் தியேட்டர்களில் அதிகமாகவே கைதட்டலை வாங்குகின்றன..! விமல்-பிந்து மாதவி ஜோடியைவிடவும் சிவகார்த்திகேயன்-ரெஜினா ஜோடி கொஞ்சம் கூடுதலாகவே ஸ்கோர் செஞ்சிருக்காங்க..!

சிறந்த நடிகையாக தெரிய வேண்டுமெனில் சிறந்த இயக்குநரால் ஆட்டுவிக்கப்பட வேண்டும் என்பது சினிமா நியதி. 'கண்ட நாள் முதல்' படத்தில் கேட்பாரற்று கிடந்த  ரெஜினாவை இப்போது தமிழகமே பாப்பா என்கிறது..! பாண்டிராஜுக்கு நீதான் தேங்க்ஸ் சொல்லணும் பாப்பூ..! தர்மத்தின் தலைவன் ரஜினி ஸ்டைலில் கார்த்திகேயன் செய்யும் அலப்பறைதான் மிக அதிகம்..! டைமிங்சென்ஸ் உள்ள செய்தித் தொகுப்பாளராகவும் வேலை பார்த்த அனுபவம் இருக்க.. ஏற்ற இறக்கத்துடன் எங்கே கடி ஜோக்காக உருமாறுமோ அதே இடத்தில் அதே பாணியில் வசனங்களை பேசியிருக்கிறார் சிவா.. மிகச் சிறந்த தேர்வு இவர்தான்..! 

விமல்.. இனியும் முழித்துக் கொள்ளாவிட்டால் ரொம்பவும் கஷ்டம்தான்..! பிந்துமாதவியிடம் அடி உதை வாங்கிவிட்டு அதனை வெளியில் சொல்லாமல் நாகரிகமாகச் சொல்லி சமாளிக்கின்ற காட்சியில் மட்டுமே இவரை நடிகராகப் பார்க்க முடிந்தது.. இறுதிக் காட்சியில் டெல்லி கணேஷிடம் பேசும்போதுகூடவா அப்படியே இருக்க வேண்டும்..? இது போன்ற கேரக்டர்களில் தொடர்ந்து நடித்துக் கொண்டேயிருந்தாலும், போகப் போக ரசிகர்களுக்கு போரடித்துவிடும்..!

தனது மூலதனமான கண்ணை வைத்தே சீன் வைத்த பாண்டிராஜுக்கு பிந்துமாதவியும் ஒரு தேங்க்ஸ் சொல்லணும்..! நொடியில் இவர்களது பேச்சும், காதலும் வளர்வதும், அதற்கு கண்ணை வைத்தே கொண்டு சென்றிருக்கும் திரைக்கதையும் சூப்பர்..! இவருடைய குடும்பத்தினரின் கேரக்டர் ஸ்கெட்ச்.. பிந்து மாதவியின் அப்பா போடும் கண்டிஷன்கள்.. அவரது அம்மாவின் பேச்சுக்கள் என்று நகைச்சுவையை கலந்து கட்டியடித்திருக்கிறார் இயக்குநர்..!

வீட்டோடு மாப்ளையாகி வேலை வெட்டியில்லாமல் ஊரைச் சுத்தும் சூரி போன்று நாட்டுல நிறைய பேர் இருக்கத்தான் செய்றாங்க..! எப்போதெல்லாம் விமலும், சிவகார்த்திகேயனும் போரடிக்கத் துவங்குகிறார்களோ அப்போதெல்லாம் சூரிதான் இடையில் புகுந்து நம்மையும் சமாளிக்கிறார்.. அவர்களையும் சமாளிக்கிறார்..! மனைவியிடம் 'வாடா' 'போடா' என்ற பேச்சையும் கேட்டுவிட்டு அப்படியும் கடைசியாய் பணத்தை வாங்கிக் கொண்டே வெளியேறும் அந்தப் ‘பொறுப்பு’ள்ள இளைஞன் கேரக்டராகவே இருந்து காட்டியிருக்கிறார் சூரி...!  

இவ்வளவு சிறந்த நகைச்சுவை வசனங்களை எழுதும் திறமையுள்ள பாண்டிராஜ் இதனை தேக்கிவைத்துவிடாமல் மீண்டும் தனது நகைச்சுவை ராஜபாட்டையை தொடர்ந்து நடத்த வேண்டும் என்றே விரும்புகிறேன்.. இதன் உச்சக்கட்ட காமெடி, ஓட்டு எண்ணிக்கை அன்று நடக்கும் அடிதடி காட்சிதான்..! இதைக்கூட இவ்வளவு நகைச்சுவையாக எடுக்க முடியுமா என்று ரொம்பவே யோசிக்க வைத்திருக்கிறார் இயக்குநர்..!

எப்போதெல்லாம் இளைஞர்கள் தியேட்டர்களில் சோர்வடைவார்களோ அந்தந்த இடங்களில் எல்லாம் அவர்களுக்காகவே ஸ்பெஷல் பூஸ்ட்டாக காமெடி வசனங்களை அள்ளித் தெளித்திருக்கிறார்..! பாராட்டுக்கள்..! இதேபோல் பிந்து மாதவியும், விமலும் ஒருவரையொருவர் அடித்துக் கொள்ள முனையும் காட்சிகளெல்லாம் வயிறே புண்ணாகிவிட்டது..! எப்படிங்கய்யா இப்படியெல்லாம் ஐடியா வருது..?

மானம், ரோஷம், வெக்கமெல்லாம் நண்பர்களுக்குள் பார்க்கவே கூடாது என்று    ஆரம்பத்திலேயே சொல்லிவிட்டதால் எந்தவொரு லாஜிக்கையும் நாமும் பார்க்காமலேயே இருக்கலாம்..! இறுதிக் காட்சியில் மனோஜ்குமாரின் அந்த விபரீத முடிவும், அதன் உண்மைத்தன்மை பற்றி பின்பு  விவரிக்கும் காட்சியும் நூறு சீரியல்களுக்கு சமம்.. 500 எபிசோட்களில் சொல்லி முடிக்க வேண்டிய கதையை கடைசி 10 நிமிடங்களில் மட்டுமே சொல்லி முடித்திருக்கிறார் இயக்குநர்..!

அரசியல் காட்சிகளில் இத்தனை அழுத்தமாக கூட்டத்தைக் கூட்டி படத்தைக் கொடுத்திருக்கும் பாண்டிராஜின் சிரத்தையை பாராட்டத்தான் வேண்டும்..! வனவாசத்தில் வரும் ஒரு காட்சியை இதில் நைஸாக புகுத்தியிருக்கும் பாண்டிராஜுக்கு எனது பாராட்டுக்கள்..! கவுன்சிலராக பிளான்போட்டு ஒவ்வொரு ஓட்டாக கவர் செய்யும் அந்த நகைச்சுவைகள் ரொம்பவே சுவாரஸ்யம்.. இவர்கள் கொடுத்த பில்டப்பை பார்த்தபோது நிஜமாகவே ஜெயித்துவிடுவார்களோ என்ற எண்ணத்தை நமக்குள் ஏற்படுத்துகிறது..! விழுந்தது வெறும் 31 ஓட்டுகள் என்பதையும், அதற்கு விமல் கொடுக்கும் சமாதானத்தையும் இப்போது நினைத்தாலும்..????? 

கேர்லெஸ்ஸாக வேட்பாளர் விண்ணப்பத்தை பதிவு செய்திருப்பது.. இதனைத் தெரிந்துகூட விமல் முகத்தில் தெரியும் அந்த சாந்த சொரூபம்.. அதைவிட அதிர்ச்சி..! வேட்பாளர் பரிசீலனையில் வேட்பாளர் உடன் இருக்க வேண்டு்ம் என்பதுகூடவா இவர்களுக்குத் தெரியாது..! நினைத்த மாத்திரத்தில் டாஸ்மாக்கில் பழைய பாட்டில்களை விமல் அண்ட் கோ கையகப்படுத்துவது என்பதெல்லாம் படத்திற்காக திணிக்கப்பட்ட அவசர கதைகள் என்று தெரிவதால் மன்னிக்கலாம்..!

எல்லாம் சரிதான்.. ஆனால் எனக்குள் இந்தப் படம் கொடுத்த ஒரு ஏமாற்றமும் மிகப் பெரியது.. இன்றைய இளைய சமுதாயத்தில் பத்தாம் வகுப்பு, பன்னிரெண்டாம் வகுப்பு மாணவர்களே மது அருந்துவது பரவி வரும் வேளையில் இப்படி நிமிடத்துக்கு நிமிடம் தண்ணியடிப்பது போன்ற காட்சிகளை வைத்திருக்கத்தான் வேண்டுமா..? அது அவசியம்தானா..? ஏதோ ஒரு காட்சி.. இரண்டு காட்சியென்றால் ஓகே.. படம் முழுவதிலும் அப்படியே என்றால், படம் பார்க்கும் சிறார்களுக்கு இதெல்லாம் சகஜம்தானே என்ற எண்ணமும் வந்துவிடாதா..? கடைசியாக டைட்டில்போடும்போது பாண்டிராஜும் சேர்ந்து தண்ணியடிப்பதுபோல காட்சிகள் வர.. ரொம்பவே வெறுத்துப் போனேன்..! இவ்வளவு சிறந்த நகைச்சுவைப் படத்திற்கு விழுந்த திருஷ்டிப் பொட்டுவை போல இந்தக் காட்சியும் அமைந்துவிட்டது..! 

குடியினால் வரும் தீமைகள் பற்றி இரண்டு அப்பன்களுமே படத்தில் பேசவில்லை.. சொல்லவில்லை.. இயக்குநரும் சொல்லவில்லை.. ஆக, குடியை நியாயப்படுத்தும்விதமாக அமைந்துவிட்டது இப்படம்..! இத்தனை குடிகார காட்சிகளைக் கொண்ட இப்படத்திற்கு நியாயமாக ‘ஏ’ சர்டிபிகேட்டுதான் கொடுத்திருக்க வேண்டும்.. ஆனால் ‘யு’ கொடுத்து புண்ணியத்தைக் கட்டிக் கொண்டிருக்கிறது சென்சார் போர்டு..! இதற்கு இந்த போர்டு இருந்தாலென்ன..? இல்லாமலேயே போனால்தான் என்ன..? 

Tweet