தி.மு.க.வை முந்திய அ.தி.மு.க...!

04-04-2011

என் இனிய வலைத்தமிழ் மக்களே..!

தலைப்பைப் பார்த்தவுடன் அவசரமாக கிளிக்கிவிட்டு உள்ளே வந்திருக்கும் அன்புத் தோழர்களே.. இது கண்டிப்பாக செம மொக்கைப் பதிவுதான்..! மன்னியுங்கள்..!

இந்தத் தேர்தலில் போட்டியிடும் தொகுதிகள் எண்ணிக்கையில் முந்திய அ.தி.மு.க. இன்னுமொரு விஷயத்திலும் முந்தியுள்ளது. அதைப் பற்றியானதுதான் இந்தப் பதிவு..!

மொத்தமுள்ள 234 தொகுதிகளில் தி.மு.க., கூட்டணி கட்சிகள், அ.தி.மு.க., கூட்டணி கட்சிகள், பல்வேறு கட்சிகளின் வேட்பாளர்கள் மற்றும் சுயேச்சை வேட்பாளர்கள் என மொத்தம் 2,773 பேர் போட்டியிடுகின்றனர்.

தி.மு.க., - காங்கிரஸ், பா.ம.க., - அ.தி.மு.க., - தே.மு.தி.க., - பா.ஜ., விடுதலை சிறுத்தைகள் கட்சிகளின் சார்பில் போட்டியிடும் வேட்பாளர்கள் மூலம் தேர்தல் கமிஷனுக்கு கொடுக்கப்பட்டுள்ள பிரமாணப் பத்திரத்தில் 679 வேட்பாளர்களின் பிரமாணப் பத்திரத் தகவல்கள், ஆமதாபாத்தை தலைமை இடமாகக் கொண்டும், டில்லியிலிருந்தும் செயல்பட்டு வரும் ஜனநாயக சீர்த்திருத்த இயக்கத்தின் சார்பில் திரட்டப்பட்டுள்ளது.

இந்த தகவல்கள், இந்த அமைப்பின் சார்பு நிறுவனமான தேசிய தேர்தல் கண்காணிப்பு அமைப்பின் மூலம் நேற்று சென்னையில் வெளியிடப்பட்டுள்ளது.

679 வேட்பாளர்களில் 125 பேர் பல்வேறு வழக்குகளில் சிக்கியுள்ளதும், இவர்களில் 66 பேர் மீது கொலை மற்றும் கொலை முயற்சி வழக்குகள் நிலுவையில் உள்ள விவரங்களும் தெரிய வந்துள்ளன. இந்த வேட்பாளர்களில் பலர் கோடீஸ்வரராகவும் உள்ளனராம்.

தி.மு.க., சார்பில் போட்டியிடும் 119 பேரில், 24 பேர் தங்கள் மீது கிரிமினல் வழக்குகள் நிலுவையில் உள்ளதை ஒத்துக் கொண்டுள்ளனர்.

பா.ம.க. சார்பில் போட்டியிடும் 14 வேட்பாளர்கள் மீது கிரிமினல் வழக்குகள் நிலுவையில் உள்ளன.

தே.மு.தி.க.வின் வேட்பாளர்களில் 7 பேர் மீது கிரிமினல் வழக்குகள் நிலுவையில் உள்ளன.

காங்கிரஸ் கட்சியின் சார்பில் போட்டியிடும் 63 பேரில், 6 பேர் மீது கிரிமினல் வழக்குகள் உள்ளன.

பா.ஜ.க. சார்பில் போட்டியிடும் 169 வேட்பாளர்களில், 19 பேர் மீது கிரிமினல் வழக்குகள் நிலுவையில் உள்ளன.

விடுதலைச் சிறுத்தைகள் கட்சியின் சார்பில் போட்டியிடும் 10 வேட்பாளர்களில், 3 வேட்பாளர்கள் மீது கிரிமினல் வழக்குகள் நிலுவையில் உள்ளன.

மார்க்சிஸ்ட் கம்யூனிஸ்ட் கட்சி வேட்பாளர்களில் 3 பேர் மீதும், இந்திய கம்யூனிஸ்ட் கட்சி வேட்பாளர்களில் 1 நபர் மீதும் கிரிமினல் வழக்குகள் உள்ளன.

ஆனால், அ.தி.மு.க., சார்பில் போட்டியிடும் 160 வேட்பாளர்களில்  43 பேர்  மீது கிரிமினல் வழக்குகள் நிலுவையில் உள்ளனவாம்.

இதுதான் இந்தப் பட்டியலில் அதிகம்..!

ஆக மொத்தம் தி.மு.க.வை இந்த ஒரு விஷயத்திலாவது அ.தி.மு.க. முந்தியிருக்கிறது என்று ரத்தத்தின் ரத்தங்கள் நிச்சயம் பெருமைப்படலாம்..!

கிரிமினல் பின்னணியில், நாகப்பட்டினம் பி.ஜே.பி. வேட்பாளர் முருகானந்தம்தான் முதல் இடத்தில் இருக்கிறார். இவர் மீது சீரியஸ் வழக்குகள் 13, ஐ.பி.சி. வழக்குகள் 34 உள்ளன. இவற்றில் 5 கொலை முயற்சி வழக்குகளும், பயங்கர ஆயுதம் வைத்துத் தாக்கியதாக 3 வழக்குகளும், வன்முறையைத் தூண்டும் வகையில் பேசியதாகவும், கூட்டுக் கொள்ளையில் ஈடுபட்டதாகவும் தலா ஒரு வழக்கும் உள்ளன!

அடுத்த இடத்தை ஜெயங்கொண்டம் பா.ம.க. வேட்பாளர் ஜெ.குருநாதன் என்ற காடுவெட்டி குரு பிடிக்கிறார். இவர் மீது சீரியஸ் ஐ.பி.சி. கேஸ் 8, சாதாரண ஐ.பி.சி. வழக்குகள் 38 உள்ளன. இதில் ஒரு கொலை முயற்சி வழக்கு, வன்முறையைத் தூண்டும் வகையில் பேசியதாக 3 வழக்குகள், ஆபாசமாகப் பேசியதாக 2 வழக்குகள் உள்ளன!

அந்தியூர் தி.மு.க. வேட்பாளர் என்.கே.பி.பி.ராஜா மீது திருட்டு தொடர்பான 2 வழக்குகள் (ஐ.பி.சி. செக்ஷன் 379), அவதூறாகப் பேசிய 2 வழக்குகள், கடத்தல் தொடர்​பான ஒரு வழக்கு, பயங்கர ஆயுதம் வைத்துத் தாக்கியதாக ஒரு வழக்கு ஆகியவை நிலுவையில்!

பட்டுக்கோட்டை தே.மு.தி.க. வேட்பாளர் என்.செந்தில்​குமார் மீது மூன்று கொலை முயற்சி வழக்குகளும், பயங்கர ஆயுதம் வைத்துத் தாக்கியதாக ஒரு வழக்கும் உள்ளது.

ஆண்டிப்பட்டி அ.தி.மு.க. வேட்பாளர் தங்கத்தமிழ்ச்செல்வன் மீது 2 கொலை முயற்சி வழக்குகளும், மற்றும் பயங்கர ஆயுதம் வைத்துத் தாக்கியதாக ஒரு வழக்கும் உள்ளன.

திருவாரூரில் போட்டியிடும் முதல்வர் கருணாநிதி மீது இரு தரப்பினர் இடையே பகைமையைத் தூண்டியது உட்பட 3 வழக்குகள் நிலுவையில் உள்ளன. (தாத்தாவின் இத்தனை வருட சர்வீஸ்ல 3 கேஸ்தானா..?)

ஸ்ரீரங்கத்தில் போட்டியிடும் ஜெயலலிதா மீது சீரியஸ் ஐ.பி.சி. வழக்குகள் எதுவும் இல்லை என்றாலும், அவதூறு, சொத்துக் குவிப்பு உள்ளிட்ட 8  வழக்குகளும் உள்ளன.

நன்றி : ஜூனியர் விகடன் உள்ளிட்ட பல்வேறு பத்திரிகைள்