தமிழ்மணம் நிர்வாகத்திற்கு நன்றியும், ஒரு கோரிக்கையும்..!

15-01-2011

என் இனிய வலைத்தமிழ் மக்களே..!

பாராட்டுக்கு மயங்காதவர்கள் உண்டா..? அதுலேயும் என்னை மாதிரியான சராசரிகளுக்கு வலைத்தளங்களில் இத்தனை மணி நேரங்கள் செலவழித்து எழுதுவதற்கு ஏதேனும் ஒரு அங்கீகாரம் கிடைத்துவிட்டால் அது நிச்சயம் எங்களை மென்மேலும் எழுதத்தான் வைக்கும்.

தொடர்ந்து மூன்றாவது ஆண்டாக இந்தாண்டும் தமிழ்மணம் நடத்திய வருடாந்திரப் போட்டியில் கலந்து கொண்டேன். இந்த முறை மூன்று பிரிவுகளில் போட்டியிட்டும் சினிமா விமர்சனப் பிரிவில் மட்டும் இரண்டாம் பரிசு கிடைத்துள்ளது.

வெற்றி பெற்றவர்களின் முழு விபரம் இங்கே உள்ளது 

இந்தாண்டு "மகளிர் பிரிவிற்கு" என்றே தனிப் பிரிவை ஒதுக்கி அதற்கு விருது கொடுத்தமைக்கும் தமிழ்மணம் நிர்வாகிகளுக்கு ஒரு ஸ்பெஷல் நன்றியினைத் தெரிவித்துக் கொள்கிறேன்..!

இந்த முறை தமிழ்மணம் நிர்வாகம் பதிவுகளைத் தேர்வு செய்ததில் சிறிதளவு மாற்றம் செய்திருந்தது. பதிவர்கள், வாசகர்கள் இவர்களையும் தாண்டி நடுவர்களாக சிலரையும் ஈடுபடுத்தி வடித்துக் கட்டும் வேலையையும் செய்திருப்பது நல்லதுதான்..

என்றாலும் இந்த நடுவர்கள் விஷயத்தில் பதிவர்களையே பயன்படுத்தியிருப்பது எனக்குச் சரியான விஷயமாகப்படவில்லை. தமிழ்மணம் நிர்வாகம் எனக்கும் கடிதம் மூலம் இது பற்றித் தெரிவித்தது.

அப்போது நான் அவர்களுக்குக் கொடுத்த பதிலில், “அழைப்பு விடுத்தமைக்கு தமிழ்மணம் குழுவினருக்கு மிக்க நன்றிகள்..! ஆனால் இந்த ஆண்டும் நான் போட்டியில் கலந்து கொள்ளவிருக்கிறேன். இதனால் நான் நடுவராக பணியாற்றுவது கொஞ்சமும் பொறுத்தமாக இருக்காது என்பதால் தங்களுடைய அழைப்பை ஏற்க முடியாமைக்கு வருந்துகிறேன்.

இந்த நேரத்தில் தங்களிடம் ஒரு கோரிக்கை.. போட்டியில் கலந்து கொள்பவர்களை தயவு செய்து நடுவர்களாக வைக்காதீர்கள். அதோடு கூடவே இங்கேயே குழு, குழுவாக இருப்பதால் தங்களுடைய குழுவைச் சேர்ந்தவர்களுக்கு அவர்கள்  வாக்களிக்கும் வாய்ப்பு நிறையவே உண்டு..! சற்று யோசியுங்கள்..!” என்று குறிப்பிட்டிருந்தேன்.

இதற்குப் பதிலளித்த தமிழ்மணம் நிர்வாகம், “உங்கள் மடலுக்கும் பரிசீலனைக்கும் நன்றி. கவனத்தில் கொள்ள வேண்டிய சில கருத்துக்களைச் சொல்லி இருக்கிறீர்கள். ஆனால், இவ்வருடம் முதலில் இம்முறையைச் சோதனை செய்ய முனைகிறோம். ஒரு பிரிவில் போட்டியிடும் பதிவர் நிச்சயமாய் அந்தப் பிரிவுக்கு நடுவராய் இருக்க முடியாது. ஆனால், இருபது பிரிவுகள் இருக்கிற நிலையில், ஒருவர் அதிகபட்சம் மூன்று பிரிவுகளுக்கு மட்டும் போட்டியிடலாம் எனும்போது, மற்ற பிரிவுகளில் நடுவராய் இருப்பது குறையாக இருக்காது என நினைக்கிறோம். அதோடு, முதல் இரண்டு சுற்றுக்களில் பதிவர்-வாசகர் வாக்குகளின் முடிவில் தெரிவாகும் ஐந்து படைப்புக்களே நடுவர் சுற்றுக்குச் செல்லும் என்பதால் அங்கேயே குழுச் சார்பு சற்று விடுபட்டுப் போய்விடும். அதோடு நடுவர் சுற்றிலும் ஒன்றிற்கும் மேற்பட்ட நடுவர்கள் இருப்பதால், மொத்தத்தில் தேர்வு நியாயமானதாகவே இருக்கும் என நாங்கள் நம்புகிறோம். ஏதேனும் பிரச்சினைகள் ஏற்பட்டால் அடுத்த முறை சரி செய்து கொள்ளலாம்.” என்று சொல்லியிருந்தார்கள்.

ஆனாலும் என் மனம் இதற்கும் ஒப்பவில்லை. இதனால் மீண்டும் அவர்களுக்கு இவ்வாறு பதிலளித்தேன்.

“தங்களுடைய பதிலுரைக்கு மிக்க நன்றிகள் ஸார்..! எனக்குத் தெரிந்த விஷயம் கட்டுரைகள் எழுதுவது மட்டுமே.. நான் வேறு எந்தப் பிரிவிலும் தெளிவானவனோ, மிகப் பெரும் பண்டிதனோ இல்லை. அத்தோடு மற்ற பிரிவுகளில் நான் வித்தகனும் இல்லை. தகுதியே இல்லாமல் நடுவராக இருந்து பணியாற்ற என் மனம் ஒப்பவில்லை.. உங்களது அழைப்புக்கு மிக்க நன்றி.. என்னை நடுவர் குழுவில்  பரிசீலிக்கக்கூட வேண்டாம்..! விட்டுவிடுங்கள்..”

- இவ்வாறு குறிப்பிட்டிருந்தேன்.

தமிழ்மணம் நான் போட்டியிடாத பிரிவுகளை எனக்கு அனுப்பினாலும் அதனை பரிசீலிக்கும் அளவுக்கு எனக்குத் திறமையுள்ளதா? தகுதியுள்ளதா? என்பதே எனக்குத் தெரியாத நிலையில் அதனை ஏற்றுக் கொள்வது நியாயமில்லைதானே?

ஆனாலும் அழைப்பு விடுத்தமைக்கு மிக்க நன்றிகளை தமிழ்மணம் நிர்வாகிகளுக்கு தெரிவித்துக் கொள்கிறேன். அடுத்த வருடம் இந்த சிறிய குறையையும் நிவர்த்தி செய்து பதிவுகளைத் தேர்ந்தெடுப்பார்கள் என்றே நம்புகிறேன்.

இன்னொரு முக்கிய விஷயம். சென்ற ஆண்டே "2008-தமிழ்மணம் விருது" பெற்றவர்களின் பதிவுகளை ஒரு புத்தகமாகக் கொண்டு வருவதாக தமிழ்மணம் நிர்வாகிகள் கூறியிருந்தார்கள். அதற்கான ஒப்புதலைக்கூட 2009, ஏப்ரல் 20-ம் தேதிக்குள் அனுப்பி வைக்கும்படி இமெயிலில் கேட்டிருந்தார்கள். நானும் அனுப்பியிருந்தேன். இதோ இப்போது.. ஓராண்டை நெருங்கிவிட்டது.. அந்தப் புத்தகம் என்ன ஆனது என்று தெரியவில்லை.

நிச்சயம் அதுவொரு நல்ல முயற்சிதான்..! தமிழ்மணம் நிர்வாகம் விரைந்து செயலாற்றி அந்தப் புத்தகத்தை வெளிக்கொணர வேண்டுகிறேன். தொடர்ந்து இந்த வருடம் வெற்றி பெற்ற பதிவர்களின் புத்தகத்தையும் சேர்த்து வெளியிட்டால் சிறப்பாக இருக்கும்.

சென்னை பதிப்பாளர்களிடம் நேரில் சென்று பேசும் வேலைகள், மற்றும் பதிப்பு வேலைகள் தொடர்பாக தமிழ்மணம் நிர்வாகத்தினருக்கு உதவிக்கு ஆள் தேவையெனில் அந்த உதவியையும் செய்ய நான் தயாராக இருக்கிறேன்..! எப்படியோ புத்தக வடிவில் அவைகள் வெளிவந்தால் போதும்..!

மேலும், சீனியர் பதிவர்கள் என்ற ரீதியிலும், ஏற்கெனவே இரண்டு வருடங்களாகத் தொடர்ந்து விருதுகளைப் பெற்று வந்திருக்கிறார்கள் என்பதாலும் இந்த ஆண்டு அண்ணன்மார்கள் வினவு, கோவியார் இருவரும் இந்தப் போட்டியில் கலந்து கொள்ளவில்லையாம்.

இவர்கள் இருவரைப் பற்றியும் வலையுலகமே நன்கறியும். இவர்கள் அளவுக்கு நான் எழுத்திலும், பேச்சிலும் பெரியவன் இல்லை. தொடர்ந்து எழுதி வந்து இப்போதுதான் அனைவரும் படிப்பதுபோல் சீர்ப்படுத்தி வரும் மாணவனாகவே என்னை நான் உணர்கிறேன். எனவே அடுத்தாண்டு நடக்கும் தமிழ்மண விருதுப் போட்டிகளில்கூட நான் நிச்சயம் கலந்து கொள்வேன் என்பதை எனது அப்பன் முருகனின் தலை மீது அடித்து சத்தியம் செய்கிறேன்..!

எனக்கு வாக்களித்த பதிவுலகத் திலகங்களுக்கும், வாசகர் செல்லங்களுக்கும், உற்சாகமளித்த தோழர்களுக்கும், எப்போதும் தட்டிக் கொடுக்கும் தமிழ்மணம் நிர்வாகத்திற்கும், பரிசளிக்கக் காத்திருக்கும் நிறுவனங்களின் உரிமையாளர்களுக்கும் எனது கோடானு கோடி நன்றி..!