அம்பேத்கர் என்ன பாவம் செய்தார்..?

28-11-2010

என் இனிய வலைத்தமிழ் மக்களே..!

அது 1982-ம் வருடம். திண்டுக்கல் புனித மரியன்னை மேல்நிலைப் பள்ளியில் 8-ம் வகுப்பு படித்துக் கொண்டிருந்தேன். ஒரு பகல் பொழுதில் வகுப்பறைக்குள் நுழைந்த அலுவலக பியூனிடம் இருந்து வாங்கிய நோட்டை பார்த்துவிட்டு எனது அறிவியல் ஆசிரியர் அமல்ராஜ் இப்படி கூறினார்.. “அடுத்த வாரம் 'காந்தி' படத்துக்கு உங்களையெல்லாம் கூட்டிட்டுப் போறாங்கப்பா.. டிக்கெட் 1 ரூபாதான்.. கண்டிப்பா எல்லாரும் வந்தாகணுமாம்..” என்று சொல்லி முடிப்பதற்குள் வகுப்பறைக்குள் டெஸ்க்குகள் உடைந்துவிடுவதைப் போன்ற தட்டல்களுடன், சந்தோஷக் கூச்சல்கள். மறக்க முடியவில்லை அந்த உற்சாகத்தை..!

அதேபோல் ஒரு மதியப் பொழுதில் எனது பள்ளிக்கு எதிர் தெருவில் இருந்த 'சோலைஹால்' தியேட்டருக்கு எட்டாம் வகுப்பு படிக்கும் மாணவர்கள் அனைவரும் வரிசையாக அணிவகுத்து சென்று அந்தப் படத்தை பார்த்தது இன்றைக்கும் நினைவுக்கு இருக்கிறது..

'தேசத் தந்தை'யின் இந்த வாழ்க்கை வரலாற்றை பள்ளி மாணவர்களும் நிச்சயம் பார்த்தே தீர வேண்டும் என்று கட்டாயப்படுத்தி பார்க்க வைத்த அந்தப் புண்ணியவான் யாரோ.. அவருக்கு எனது முத்தங்கள். நன்றிகள்..!

அதுவெல்லாம் அந்தக் காலம் என்று கண்களில் ஏக்கத்தை வைத்துக் கொண்டு தொண்டையில் சொற்கள் சிக்கிக் கொண்டு பேச முடியாமல் தவி்த்தபடியே இப்போது சொல்கிறார்கள் 'பாபாசாஹேப் டாக்டர் அம்பேத்கர்' திரைப்படத்தை வெளியிடவே முடியவில்லையென்று..!

காந்திக்கு, அம்பேத்கர் எந்தவிதத்தில் குறைந்தவர் என்று எனக்குத் தெரியவில்லை. காந்தி இந்தியாவின் பெருவாரியான மக்களால் விரும்பப்பட்டவராக இருக்கலாம். 'தேசத் தந்தை' பட்டத்துக்கு உரியவராக இருக்கலாம். ஆனால் அதே சமயம் அம்பேத்கரும் தனது இறுதிக் காலம் வரையிலும் இந்த நாட்டுக்காகத்தான் உழைத்தார். அவரைத் தெய்வமாகத் தொழுத மக்களுக்கும் அவர்களின் வாரிசுகளுக்கும் இன்றளவும் அவர்தான் தந்தை.

சுதந்திரப் போராட்ட தளகர்த்தர்களில் ஒருவர். சாதிய, சமய முரண்பாடுகளின் மூட்டையாகத் திகழும் இந்தியாவில் அடித்தட்டு மக்களுக்காக குரல் கொடுத்த புண்ணியவான்.. எல்லாம் தலையெழுத்து என்று சொல்லி ஒதுங்கிப் போகாமல், முடிந்தால் அசுத்தமான சேரியையும், சுத்தமான அக்ரஹாரமாக்கலாம் என்று முனைந்தவர்.

சுதந்திர இந்தியாவுக்கு அடிப்படைத் தேவையான அரசியல் சட்டத்தை வடிவமைத்துக் கொடுத்தவர்.. சட்ட மாமேதை என்று இன்றைக்கும் சட்ட வல்லுநர்களால் ஆச்சரியத்துடனும், பிரமிப்புடனும் பார்க்கக் கூடியவர்.. இவரது வாழ்க்கை வரலாறு இந்தியாவின் குடிமகன்கள் ஒவ்வொருவரும் பார்க்க வேண்டிய, அறிய வேண்டிய விஷயம். ஆனால் ஏன் முடியவில்லை..?

NFDC என்றழைக்கப்படும் தேசிய திரைப்பட வளர்ச்சிக் கழகமும், மகாராஷ்டிரா அரசும், மத்திய அரசின் சமூக நீதித்துறையும் இணைந்துதான் இத்திரைப்படத்தை தயாரித்திருக்கிறார்கள்.

கடந்த 1991-ம் ஆண்டே மகாராஷ்டிர அரசு இந்தப் படத்தின் தயாரிப்புக்காக 7.7 கோடி ரூபாயை ஒதுக்கியுள்ளது. படத்தில் நம்முடைய மெகா ஸ்டார் மம்முட்டிதான அம்பேத்கராக வாழ்ந்து காட்டியிருக்கிறார். ஜாபர் பட்டேல் இயக்கம் செய்திருக்கிறார். ஆயிரக்கணக்கான நடிகர்களைப் பிடித்து மேக்கப் டெஸ்ட் வைத்து, சோதனை செய்து பார்த்துவிட்டு கடைசியாகத்தான் பொருத்தமான நடிகராக மம்மூட்டி தேர்வு செய்யப்பட்டிருக்கிறார்.

ஆங்கிலத்தில் மட்டுமல்லாது, இந்தியாவின் பிற 9 மொழிகளில் டப்பிங் செய்யப்பட்ட இந்தப் படத்தின் ஆங்கிலப் பதிப்பு, 1999-ம் வருடம் வெளியாகியுள்ளது. ஹிந்தி பதிப்பு 2000-ம் ஆண்டு டிசம்பர் 15-ம் தேதி வெளியானது.

மிகத் துல்லியமாக ஆய்வு செய்யப்பட்டு எடுக்கப்பட்ட சிறந்த படமாக பத்திரிக்கைகள் இத்திரைப்படத்தைக் கொண்டாடியிருக்கின்றன. இதனால் அந்த ஆண்டுக்கான  சிறந்த  படம், சிறந்த நடிகர் மற்றும் சிறந்த கலை இயக்கம் உள்ளிட்ட பிரிவுகளில் தேசிய விருதுகளை இப்படம் பெற்றுள்ளது. மம்முட்டி இந்தப் படத்தின் மூலம் சிறந்த நடிகருக்கான தேசிய விருதை மூன்றாவது முறையாகப் பெற்றிருக்கிறார்.

இதற்குப் பின் மராத்தி மொழியிலும், பிற சில மொழிகளிலும் டப்பிங் செய்யப்பட்டு மகாராஷ்டிராவிலும் இப்படம் திரையிடப்பட்டுள்ளது.. அத்தோடு இந்தியாவில் உள்ள அனைத்து மொழிகளிலும் டப்பிங் செய்யப்பட்டு வெளியிடப்பட வேண்டும் என்ற நல்ல கொள்கையுடன் அதற்கான நிதியுதவிகூட மத்திய அரசால் ஒதுக்கப்பட்டிருக்கிறது. ஆனால் இந்தத் தகவல்கூட வெளியில் தெரியாமல் போனதுதான் நமது அரசியல் நிர்வாகத்தின் லட்சணம்.

தேசிய திரைப்பட வளர்ச்சிக் கழகம் இத்திரைப்படத்தை தமிழில் வெளியிடுவதற்காக முனைந்தபோது மம்முட்டி நடித்திருக்கிறார் என்பதால் ஒரு சாதாரணமான திரைப்படம் போலவே வெளியிட முயற்சி எடுத்திருக்கிறது.

இதனால் முன்னாடியே போய் வாங்கிவிடுவோம் என்ற சினிமா வியாபார தந்திரத்தின் அடிப்படையில் 'ஆஸ்கர் பிலிம்ஸ்' ரவிச்சந்திரனின் சகோதரரான 'விஸ்வாஸ்' சுந்தர் 'அம்பேத்கர்' திரைப்படத்தை தமிழில் வெளியிடும் உரிமையை பெற்றிருக்கிறார். இது நடந்தது 2007-ம் ஆண்டு என்கிறார்கள்.

ஆனால் 2001-ம் ஆண்டு முதல் 2007-ம் ஆண்டுவரையிலும் இத்திரைப்படத்தை தமிழில் டப்பிங் செய்து வெளியிட முயற்சிகள் செய்யாமல் அப்படியே வைத்திருந்தது ஏன் என்பது மத்திய அரசுக்கும், திரைப்பட வளர்ச்சிக் கழகத்துக்குமே தெரிந்த ரகசியம்..!

திரைப்பட வளர்ச்சிக் கழகம் 3 ஆண்டு ஒப்பந்தத்தின் கீழ்தான் 'விஸ்வாஸ்' சுந்தருக்கு அத்திரைப்படத்தை வழங்கியிருக்கிறது. அந்த ஒப்பந்தம் 2010 செப்டம்பர் மாதத்துடன் முடிவடைகிறதாம். அதற்குள்ளாக அவர் படத்தினை அவரது சொந்த செலவில் டப்பிங் செய்து எத்தனை முறை வேண்டுமானாலும், எங்கே வேண்டுமானாலும், எப்படி வேண்டுமானாலும் திரையிட்டுக் கொள்ளலாம். இதுதான் ஒப்பந்தம்.

ஆனால் படத்தினை வாங்கிய விஸ்வாஸ் சுந்தர் இத்திரைப்படத்தை வெளியிட இன்றுவரையிலும் முன் வரவில்லை. காரணம் ஏனென்று அப்போது தெரியவில்லை. கடைசியில்தான் தெரிந்தது. அவர் ஒரு ஆர்வத்தில்தான் அந்தப் படத்தினை வாங்கியிருக்கிறார் என்று.! ஆனால் தினம்தோறும்தான் நமது திரையுலக நடைமுறை வியாபாரங்கள் மாறிக் கொண்டேயிருப்பதால் இந்த நேரத்தில் அத்திரைப்படத்தை தமிழகம் முழுவதும் தியேட்டர்களில் திரையிட முடியாது என்கிற யதார்த்த உண்மையைப் புரிந்து கொண்டு அமைதியாக இருந்திருக்கிறார்.

ஆனால் அம்பேத்கரின் சில தொண்டர்கள் சும்மா இருக்கவில்லை. பெரியார் திராவிடர் கழகத்தினர், வே.மதிமாறன் தலைமையிலான இயக்கம், ம.க.இ.க. இன்னும் பிற தோழமை இயக்கங்கள் எல்லாம் இது குறித்து கேள்விகளை எழுப்பிய வண்ணம் இருந்தன.  நாள்தோறும் தனக்கு நடத்தப்படும் பாராட்டு விழாவுக்கு மட்டுமே செவி கொடுக்கும் நமது அன்பு முதல்வருக்கு இதெல்லாம் கேட்கவா போகிறது..?

'அம்பேத்கர் விருதை' மட்டும் ஆர்வத்துடன் ஓடோடிப் போய் வாங்கியவர் இத்திரைப்படம் பற்றிய செய்தியை மட்டும் கண்டும், காணாததுபோல் இருந்துவிட்டார். ஒருவேளை அம்பேத்கரின் பெயருக்கு தமிழ்நாட்டில் ஓட்டு வங்கி இல்லை என்று நினைத்துவிட்டாரோ என்னவோ..? தாத்தாவுக்குத்தான் இப்போது ஓட்டுக்களைத் தவிர வேறு எதுவும் கண்ணுக்குத் தெரியாது..!

இடையில் வே.மதிமாறன் தலைமையிலான இயக்கத்தவர்கள் திரைப்பட வளர்ச்சிக் கழகத்திடம் நேரில் சென்று இது குறித்து கேட்டபோது அவர்கள் விஸ்வாஸ் சுந்தரை கை காட்டியிருக்கிறார்கள். விஸ்வாஸ் சுந்தரிடம் அவர்கள் கேட்டபோது “வாங்கி வைச்சிருக்கிறவனுக்கு படத்தை வெளியிடத் தெரியாதா..? செய்வோம்..” என்று பட்டும் படாமல் சொல்லியிருக்கிறார்.

இது குறித்து பெரியார் திராவிடர் கழகம் உள்ளிட்டவர்கள் சிலர் போராட்டத்தில் குதித்த பின்புதான் படத்தை வெளியிட முயற்சி செய்யும்படி திரைப்பட வளர்ச்சிக் கழகத்தினர், விஸ்வாஸ் சுந்தரை வற்புறுத்தியிருக்கின்றனர்.

தமிழகச் சட்டமன்றத்தில் உறுப்பினர் செல்வப்பெருந்தகை இத்திரைப்படம் பற்றி கேள்வி எழுப்பியபோது, "இத்திரைப்படத்தின் டப்பிங் செலவுக்காக பத்து லட்சம் ரூபாயை அரசு ஒதுக்கியிருப்பதாக" பலத்த கை தட்டலுடன் சொல்லிவிட்டு அமர்ந்துவிட்டார் அமைச்சர் பரிதிஇளம்வழுதி.
  
"அதான் பத்து லட்சம் கொடுத்தாச்சே.. போய் டப்பிங் பண்ணிட்டு படத்தை ரிலீஸ் செஞ்சுக்குங்க.." என்று மறைமுகமாகச் சொல்லிவிட்டார் தாத்தா.. ஆனால் அது சாத்தியமா என்றாவது யோசித்திருக்க வேண்டாமா..? பாவம்.. அவருக்கே அடுத்த பாராட்டு விழா நடத்த ஆள் இல்லாத சோகம்..! என்ன செய்வது..? அவர் கவலை அவருக்கு..!

இந்த நிலையில் கடந்த மே மாதம் சத்தியசந்திரன் என்னும் வழக்கறிஞர், சென்னை உயர்நீதிமன்றத்தில் 'அம்பேத்கர்' திரைப்படத்தை தமிழகத்தில் விரைவில் வெளியிட வேண்டும் என்று கோரி மனு செய்துள்ளார்.

அவர் தாக்கல் செய்த மனுவில், “அம்பேத்கரின் வாழ்க்கை வரலாறு, ஆங்கிலத்தில் படமாக தயாரிக்கப்பட்டது. அதில், நடிகர் மம்முட்டி நடித்துள்ளார். ஜாபர் பட்டேல் இயக்கியுள்ளார். இந்தி, மராத்தி மற்றும் சில மாநில மொழிகளில் இப்படம், ‘டப்’ செய்யப்பட்டது. தமிழில் இப்படத்தை ‘டப்’ செய்ய, 10 லட்சம் ரூபாயை தமிழக அரசு வழங்கியிருப்பதாக அறிவிக்கப்பட்டது. அதன் பின் நடவடிக்கை இல்லை. இந்த படத்தை தமிழில் வெளியிட, உடனடியாக நடவடிக்கை எடுக்கக்கோரி தமிழக அரசுக்கும், தேசிய திரைப்பட வளர்ச்சி கழகத்துக்கும் மனு அனுப்பினேன். இதற்கு எந்த பதிலும் இல்லை. எனவே, அம்பேத்கர் படத்தை தமிழில் வெளியிட தகுந்த நடவடிக்கை எடுக்க வேண்டும்“ என்று குறிப்பிட்டிருந்தார்.

மனுவை அப்போதைய தற்காலிக தலைமை நீதிபதி தர்மாராவ், நீதிபதி சசிதரன் அடங்கிய, ‘முதல் பெஞ்ச்’ விசாரித்தது. விசாரணை முடிவில் தீர்ப்பாக, “படத்தின் வினியோக உரிமை ஏற்கனவே வழங்கப்பட்டுவிட்டது. தமிழக அரசிடம் வரிச் சலுகை பெறும் நடவடிக்கையில், வினியோகஸ்தர் ஈடுபட்டுள்ளார். வரிச் சலுகை பெற்ற உடனேயே, படத்தை வெளியிட நடவடிக்கை எடுக்கப்படுமென திரைப்பட வளர்ச்சிக் கழகத்தின் வக்கீல் தெரிவித்துள்ளார்.  தமிழக அரசு டப்பிங் செலவுகளுக்காக 10 லட்சம் ரூபாய் வழங்கியுள்ளது என்றும், படம் விரைவில் வெளியாவதில், தமிழக அரசும் ஆர்வமாக உள்ளது என்றும், அரசு பிளீடர் ராஜா கலிபுல்லா தெரிவித்துள்ளார்.

எனவே, வரிச்சலுகை குறித்து இரண்டு வாரங்களில் தமிழக அரசு முடிவெடுக்க வேண்டும். படத்தை எவ்வளவு விரைவில் வெளியிட முடியுமோ அவ்வளவு விரைவில் வெளியிட, தேசிய திரைப்பட வளர்ச்சி கழகத்துக்கு உத்தரவிடப்படுகிறது. எப்படியானாலும் இன்னும் நான்கு வாரங்களுக்குள் படத்தை வெளியிட வேண்டும்" என்று மே 15-ம் தேதி உத்தரவு பிறப்பித்தது.

அடுத்த ஒரு மாதத்திற்குள் படம் நிச்சயம் வெளியாகிவிடும் என்று அம்பேத்கர் பக்தர்களும், சினிமா ஆர்வலர்களும் ஆவலோடு காத்திருந்தார்கள். ஆனால் படம் வெளியாகவில்லை. படம் வெளியாக சென்னை உயர்நீதிமன்றம் விதித்திருந்த கெடு ஜூன் 16-ம் தேதி முடிவடைய இருந்தது.

அதற்குள்ளாக ஜூன் 7-ம் தேதியன்று  தமிழில் அம்பேத்கர் படத்தை வெளியிட, 90 லட்ச ரூபாய் நிதி உதவி வழங்க தமிழக அரசு,  மற்றும் புதுச்சேரி அரசுக்கு உத்தரவிடக் கோரி சென்னை உயர்நீதிமன்றத்தில் மனு ஒன்றைத் தாக்கல் செய்தார் விநியோகஸ்தர் விஸ்வாஸ் சுந்தர்.

அவர் தாக்கல் செய்த மனுவில், “அம்பேத்கர் படத்தை ஆங்கிலத்தில் ஜபார் பட்டேல் என்பவர் இயக்கியுள்ளார். இதற்கு தேசிய திரைப்பட வளர்ச்சி கழகம், ஸ்பான்சர் செய்துள்ளது. 2000-ம் ஆண்டு இப்படம் வெளியானது. இப்படத்தின் தமிழகம், புதுச்சேரி, கேரள மாநிலங்களின் வினியோக உரிமை பெற, 2007-ம் ஆண்டு ஒப்பந்தம் மேற்கொண்டேன். வரும் 2010, செப்டம்பர் மாதம் அந்த உரிமை முடிகிறது. தமிழ் மொழியில் அம்பேத்கர் படத்தை வெளியிட நடவடிக்கை எடுத்துள்ளேன். இதுவரை நேரடியாகவும், மறைமுகமாகவும் இந்தப் படத்திற்காக 30 லட்சம் ரூபாய்வரை செலவு செய்துள்ளேன். பிரின்ட் செலவு, போஸ்டர், விளம்பரம் என, மேற்கொண்டு 90 லட்ச ரூபாய்வரை செலவு செய்ய வேண்டியுள்ளது. இந்தத் தொகையை அரசு வழங்கினால், படம் சுமுகமாக வெளியாகும். அடித்தட்டு மக்களின் முன்னேற்றத்துக்காக பாடுபட்ட, வாழ்க்கையை தியாகம் செய்த அம்பேத்கர் பற்றிய திரைப்படத்தை பொதுமக்கள் பார்க்க முடியும். ஏற்கனவே, தனியார் ஒருவர் தயாரித்த பெரியார் படத்துக்காக தமிழக அரசு நிதி உதவி வழங்கியுள்ளது. எனவே, தமிழில் அம்பேத்கர் படத்தை வெளியிட ஏதுவாக 90 லட்ச ரூபாய் நிதி உதவியை வழங்க தமிழக அரசு, புதுச்சேரி அரசுக்கு உத்தரவிட வேண்டும்.”  என்று குறிப்பிட்டிருந்தார்.

இம்மனு நீதிபதி வெங்கட்ராமன் முன் விசாரணைக்கு வந்தது. தமிழகம், மற்றும் புதுவை அரசுகள் இந்த அளவுக்குப் பணம் தர முடியாது என்று சொல்லிவிட்டதாகச் சொல்கிறார்கள்.

ஆனாலும் எவ்வளவு தைரியம் பாருங்க இவருக்கு..? டப்பிங் செலவுக்கே பத்து லட்சம் ரூபாயை ஆட்டைய போட்ட இவருக்கு மேலும் 90 லட்சம் கொடுத்தால் படத்தை ரிலீஸ் செய்வாராம்..? எப்படி..?

மொதல்ல இந்தப் படத்துக்கு டப்பிங் செலவே அதிகப்பட்சம் 5 லட்சம்தான் செலவாகியிருக்கும். இதில் நிறைய கதாபாத்திரங்களும், பல்வேறு மொழி பேசுபவர்களும் இருப்பதால்தான் இந்தச் செலவு. இல்லையெனில் 2 லட்சத்திலேயே முடித்துவிடலாம். 

இவர் எவ்வளவு தொகைக்கு திரைப்பட வளர்ச்சிக் கழகத்திடம் இருந்து வாங்கினார் என்றே தெரியவில்லை. இதில் இப்போதைக்கு படத்தை சுமூகமாக வெளியிடணும்னா 90 லட்சம் கொடுன்னு கிட்டத்தட்ட மிரட்டல் பாணியில்தான் கேட்டிருக்கிறார். 'சுமூகமா வெளியிடணும்'ன்னா என்ன அர்த்தம்னு இவர்கிட்ட மறுபடியும் விளக்கம் கேட்க வேண்டும். படத்தி்ன் வசூலே கேள்விக்குறியாக இருக்கும் நிலையில் 90 லட்சம் ரூபாயை கேட்டதே சுருட்டத்தான் என்பதை திரையுலகில் இருப்பவர்களே ஒத்துக் கொள்வார்கள். நல்லவேளை கொடுக்காதவரையிலும் சந்தோஷமே..!

அதே சமயத்தில் ஏற்கெனவே உயர்நீதிமன்றம் அளித்திருந்த தீர்ப்பை மதிக்காமல் விநியோகஸ்தர் படத்தினை வெளியிட தாமதப்படுத்துகிறார் என்று கூறி வழக்கறிஞர் சத்தியசந்திரன் நீதிமன்றத் தீர்ப்பை அவமதித்ததாக மீண்டும் முறையீடு செய்தார்.

இப்போது தேசிய திரைப்பட வளர்ச்சிக் கழகத்தினர் ஆஜராகி ஒரு குண்டைத் தூக்கிப் போட்டார்கள். “படத்தின் பிரதிகள் சிதைந்திருப்பதால், மூலப் பிரதியைப் பெற்று அதனைச் சரி செய்ய வேண்டியுள்ளது. இதற்குச் சற்று கால அவகாசம் வேண்டும்..” என்றார்கள்.

இதற்கு ஒத்துக் கொண்ட உயர்நீதிமன்றம் இறுதியாக வரும் டிசம்பர் 3-ம் தேதியன்று அப்படத்தினை எப்படியும் வெளியிட்டாக வேண்டும் என்று இறுதி உத்தரவினை வெளியிட்டார்கள்.

இந்த நேரத்தில் தமிழ்நாடு முற்போக்கு எழுத்தாளர் சங்கத்தினர் எடிட்டர் லெனின் அவர்களின் உதவியோடு தேசிய திரைப்பட வளர்ச்சிக் கழகத்தின் உயர் அதிகாரிகளை நேரில் சந்தித்து படத்தினை வெளியிட பெரும் முயற்சி எடுத்திருக்கிறார்கள்.

தமிழில் டப்பிங் செய்யப்பட்ட பிலிம் ரோல் பிரதிகளே 5-தான் உள்ளதாம்.  இப்போது பெரும்பாலான திரையரங்குகளில் கியூப் சிஸ்டம் கொண்டு வந்திருப்பதால் இதில் இருக்கும் டெக்னிக்கல் சிரமங்களையும் கவனிக்க வேண்டியிருப்பதாக திரைப்பட வளர்ச்சிக் கழகத்தினர் இப்போது புலம்பிக் கொண்டிருக்கிறார்கள்.

இதன் பின்புதான் படத்தை வெளியிட அனைத்து ஏற்பாடுகளும் நடந்துள்ளன. ஆனாலும்  ஊர், ஊருக்குத் திரையரங்குகள் கிடைப்பதில்  நடைமுறைச் சிக்கல்கள் முளைத்திருக்கின்றன.

முற்போக்கு எழுத்தாளர்கள் சங்கத்தின் சார்பாக அந்த அமைப்பைச் சேர்ந்தவர்கள் பல்வேறு ஊர்களில் இருக்கும் திரையரங்குகளில் இப்படத்தைத் திரையிட வேண்டி அணுகியிருக்கிறார்கள். 

“இப்ப இதையெல்லாம் யார் ஸார் பார்க்கப் போறா.. விடுங்க ஸார். தியேட்டர் வாடகைகூட கிடைக்காது..” என்று வெளிப்படையாகவே தியேட்டர் உரிமையாளர்கள் சொல்லியிருக்கிறார்கள்.

இன்னும் சில திரையரங்கு உரிமையாளர்கள் தங்களது திரையரங்கை லீஸுக்கு விட்டுவிட்டதாகச் சொல்லி ஒப்பந்ததாரர்களைக் கை காட்டியிருக்கிறார்கள். ஒப்பந்ததாரர்களோ மறுபடியும் ஓனர்களையே கை காட்டியிருக்கிறார்கள்.. இப்படி எந்தப் பக்கம் திரும்பினாலும் தியேட்டர்கள் கிடைக்காது என்ற பதிலே கிடைத்திருக்கிறது.

டிசம்பர் 3-ம் தேதிக்கு நாள் நெருங்கிவிட்டதால் சென்னையில் திரையரங்குகள் கிடைக்காமல் அல்லல்பட்டு கடைசியாக தற்போது சென்னை ஐநாக்ஸ் காம்ப்ளக்ஸில் ஒரு அரங்கில் மட்டும் பாபாசாகேப் டாக்டர் அம்பேத்கர் திரைப்படத்தினை டிசம்பர் 3-ம் தேதி முதல் ஒரு வாரத்திற்கு திரையிட ஏற்பாடு செய்துள்ளார்கள்.

தமிழகத்தில் 1800 திரையரங்கங்கள் நாள்தோறும் இயங்குகின்றன.  ஒரு வருடத்திற்கு சுமாராக 120 படங்கள் வெளியாகின்றன, 800 கோடிக்கும் குறையாமல் வர்த்தகமும் நடக்கிறது. ஆனாலும், இந்த இந்தியத் திருநாட்டின் விடுதலைக்கு வித்திட்ட, அரசியல் அமைப்பை உருவாக்கிக் கொடுத்தவரின் வாழ்க்கை வரலாற்று திரைப்படத்திற்கு தியேட்டர்கள் கிடைக்கவில்லை. இதென்ன கொடுமை..?

கடந்த சனிக்கிழமையன்று 4 பிரேம்ஸ் பிரிவியூ திரையரங்கில் பத்திரிகையாளர்களுக்காக அம்பேத்கர் திரைப்படம் திரையிட்டுக் காண்பிக்கப்பட்டுள்ளது.

இந்த நிலையில் இத்திரைப்படத்தினை தமிழகத்து மக்களிடத்தில் எப்படி கொண்டு செல்வது என்பது பற்றி கடந்த வெள்ளிக்கிழமையன்று சென்னையில் ஒரு கூட்டத்திற்கு ஏற்பாடு செய்திருந்தது முற்போக்கு எழுத்தாளர்கள் சங்கம்.

இக்கூட்டத்திற்கு நானும் சென்றிருந்தேன். கூட்டத்தில் பேசிய முற்போக்கு எழுத்தாளர் சங்கத்தின் பொதுச்செயலாளர் தமிழ்ச்செல்வன், படத்தினை வெளியிட வேண்டி முற்போக்கு எழுத்தாளர் சங்கம் தற்போது எடுத்து வரும் நடவடிக்கைகளை பட்டியலிட்டார். மேற்கொண்டும் என்ன செய்யலாம் என்பது பற்றிய ஆலோசனைகளை கூறுமாறு வந்திருந்தவர்களிடம் கேட்டுக் கொண்டார்.

கூட்டத்தில் எடிட்டர் லெனின்  பேசும்போது தான் திரைப்பட சங்கங்கள், பிரமுகர்கள் மத்தியில் இத்திரைப்படம் பற்றிய செய்திகளைக் கொண்டு செல்வதாகக் கூறினார். அடுத்த வாரம் முழுவதும் திரைப்படவுலகத்தில் இதனை பரப்புவதற்கு தான் ஏற்பாடு செய்வதாகக் கூறினார்.

பின்பு திரைப்பட இயக்குநர் மீரா கதிரவன், வழக்கறிஞர் சத்தியசந்திரன், நமது சக வலைப்பதிவர் கார்ட்டூனிஸ்ட் பாலா, மேலும் பல அம்பேத்கர் இயக்கங்களைச் சேர்ந்தவர்களும் பேசினார்கள். ஆலோசனைகளையும் வழங்கினார்கள். தொலைக்காட்சி மூலமாக நாம் பரப்புரை செய்ய வேண்டும். இப்படியொரு திரைப்படம் வெளியாவதை நாம் மக்களிடத்தில் கொண்டு போக வேண்டும் என்றே பலரும் தெரிவித்தார்கள்.

ஒரு கட்டத்தில் மீண்டும் எழுந்து வந்து மைக்கை பிடித்த லெனில் மிகவும் உணர்ச்சிவசப்பட்டுவிட்டார். “ஒரு பிரதி 5 லட்சமோ, 6 லட்சமோ.. நாம கேட்டு வாங்கிருவோம். நானே என் சொந்தச் செலவுல வாங்கித் தரேன்.. ஊர், ஊருக்குக் கிடைக்கிற தியேட்டர்ல போடுவோம்.. வர்ற மக்கள்கிட்ட ஒரு ரூபா வாங்குவோம்.. அது போதும்.. தியேட்டர் கிடைக்கலைன்னா என்ன கல்யாண மண்டபம் கிடைத்தால்கூட போதும். அங்கேயே ஸ்கிரீனை கட்டி போட்டுக் காட்டுவோம்..” என்று கொந்தளித்தார்.

உண்மையாகவே லெனின் ஸாரின் இந்தச் செயலுக்கு நாம் மண்டி போட்டுத்தான் வணங்க வேண்டும். அப்படியே வணங்குகிறேன்..!

இக்கூட்ட இறுதியில் மாணவர்கள் மத்தியில் அம்பேத்கரின் வாழ்க்கை வரலாற்றை கொண்டு செல்லும் விதத்தில் இத்திரைப்படத்தினை தமிழகம் முழுவதும் அரசே பள்ளி, கல்லூரி மாணவர்களுக்காகத் திரையிட வேண்டும் என்று கோரி தீர்மானமும் நிறைவேற்றப்பட்டு அரசுக்கு அனுப்பி வைக்கப்பட்டுள்ளது.

இந்த நேரத்தில் எனக்குள் ஒரு கேள்வி எழுகிறது..!

காந்தி திரைப்படம் வெளிவந்தபோது அப்போது படித்துக் கொண்டிருந்த 6-ம் வகுப்பு முதல் 12-ம் வகுப்பு வரையிலுமான மாணவர்களுக்கும், கல்லூரி மாணவர்களுக்கும் கட்டாயமாக பார்க்க வைக்கப்பட்டது போல்  இந்த அம்பேத்கர் படத்தினை இப்போதைய மாணவர்கள் மத்தியில் கொண்டு போக இந்த மைனாரிட்டி தி.மு.க. அரசுக்கு ஏன் தோணவில்லை..?

வெறுமனே 10 லட்சம் ரூபாயை மட்டும் தந்துவிட்டு ஒதுங்கிவிட்டால் போதுமா..? பெரியார் படத்திற்கு மட்டும் 92 லட்சம் ரூபாயை தூக்கிக் கொடுத்து, படம் வெளியிடுவதற்கான அனைத்து வசதி, வாய்ப்புகளையும் செய்து கொடுத்த இந்த மைனாரிட்டி தி.மு.க. அரசு, அம்பேத்கரை மட்டும் திரும்பிப் பார்க்க மறுப்பது ஏன்..? அம்பேத்கர் என்ன பாவம் செய்தார்..? இத்தனைக்கும் அம்பேத்கரின் பிறந்த நாளைக்கு மாலை போட மட்டும் தாத்தா மறப்பதில்லை.

காந்தி திரைப்படத்தினை வெளியிட்டதுபோல இந்தத் திரைப்படத்தினையும் மொத்தமாக தமிழக அரசே வாங்கிக் கொண்டு தமிழகம் முழுவதும் ரிலீஸ் செய்யலாமே..?

ஊர், ஊருக்கு ஏதாவது ஒரு திரையரங்கை வாடகைக்கு எடுத்து அங்கே படத்தினை சலுகை விலையில் முழு வரிச்சலுகையுடன் வெளியிடலாமே..? மாணவர்களை அழைத்து வந்து காண்பிக்கலாமே..? தமிழக அரசுக்கு இந்த யோசனை ஏன் வரவில்லை..? அரசு ஒரு உத்தரவிட்டால் உடனேயே செய்துவிடலாமே..? ஏன் இந்த எண்ணம் இந்த மைனாரிட்டி அரசுக்கு உதிக்கவில்லை. பாபாசாகேப் அம்பேத்கர் மைனாரிட்டி மக்களின் தலைவனாகவும், தந்தையாகவும், காவலனாகவும் இருப்பதுதான் இந்த மைனாரிட்டி அரசுக்கு உறுத்தலாக இருக்கிறதோ என்னவோ?

இன்னும் வெளியாகாத ராடியாவின் டேப்பில் குடும்ப ரகசியங்கள் இன்னும் என்னென்ன புதைந்து கிடக்கிறதோ என்கிற குழப்பத்தில் தாத்தா இருக்கலாம். பிள்ளைகள் இருக்கலாம். இவர்களுடைய மதி கெட்ட மந்திரிகளும் இருக்கலாம்.. ஆனால் அம்பேத்கர் பெயரையும், புகைப்படத்தையும் வைத்துக் கொண்டு தமிழகத்தில் அரசியல் நடத்தி வரும் பெரிய இயக்கத்தினர்கள் என்ன செய்கிறார்கள் என்றும் எனக்குப் புரியவில்லை.

சென்னை, அண்ணா சாலையில் காலை 8 மணி முதல் மாலை 8 மணிவரையிலும் ஒரு ஓரமாக சேர் போட்டு உட்கார்ந்து போகும், வரும் டாடா சுமோ கார்களைப் பாருங்கள். அதன் முன், பின் பக்கக் கண்ணாடிகளில் எந்தத் தலைவரின் புகைப்படம் அதிகமாக ஒட்டப்பட்டிருக்கிறது என்று.. நிச்சயம் அம்பேத்கர்தான்.. ஆனால் அவரது வாழ்க்கை வரலாற்றை வெளியிடத்தான் அத்தனை அமைப்புகளுக்கும் அக்கறையில்லை..!

இப்போது இருக்கின்ற குறைவான நாள் இடைவெளியில் எப்படி இந்தப் படத்தைப் பற்றிய செய்தியை வெளியிட்டு கூட்டத்தைக் கூட்டி படத்தைப் பார்க்க வைப்பது.? இது நாம் மட்டுமே பார்க்கக் கூடியது அல்ல.. நிச்சயம் மாணவ சமுதாயத்தினர் அவசியம் பார்க்க வேண்டிய படம். அதற்கான முயற்சிகளைக்கூட இந்த அம்பேத்கர் படத்தை வைத்து புரட்சி அரசியல் பேசும் சில புண்ணாக்குகள் செய்ய முன் வரவில்லை என்பது வெட்கக்கேடானது..

சோனியாகாந்தி தன்னைத் தவறாக நினைத்துவிடப் போகிறார் என்பதற்காக டெல்லிக்கு அப்பாயிண்ட்மெண்ட் கேட்டுக் காத்திருந்த திருமாவளவனுக்கு இனி அம்பேத்கர் தேவையில்லை என்று நினைக்கிறேன்.. ஆளும் தரப்புடன் கூட்டணியில் இருப்பது தனக்கும், தன் கட்சிக்காரர்களுக்கு மட்டுமே என்று நினைத்துவிட்டார் போலும்..

அவர் நினைத்திருந்தால்கூட இதனைச் செய்திருக்கலாம். அரசுகளை கட்டாயப்படுத்தி, நிர்ப்பந்தப்படுத்தி பள்ளிக் கல்வித் துறையின் மூலமாக மாணவர்கள் மத்தியில் இத்திரைப்படத்தினை கொண்டு சென்றிருக்கலாம்.. ம்ஹூம்.. என்ன செய்வது..? நமக்கு வாய்த்த தலைவர்கள் சொந்தக் காரணங்களுக்காக அரசியல் செய்பவர்களாக வந்து தொலைத்திருப்பதால் நாம் கொடுத்து வைத்தது அவ்வளவுதான்..!

டிசம்பர் 3-ம் தேதி சென்னையில் மட்டும்தான் அம்பேத்கர் திரைப்படம் வெளியிடப்படவுள்ளது. அது சமயம் அன்றைக்கு திருவிழா போல் கூட்டத்துடன் படப் பெட்டியை ஊர்வலமாகக் கொண்டு சென்று தாரை, தப்பட்டை முழங்க ஒடுக்கப்பட்ட மக்களின் தந்தையாகத் திகழும் அம்பேத்கருக்கு நன்றி செலுத்தவிருப்பதாக கூட்டத்திற்கு வந்திருந்த பலரும் தெரிவித்தார்கள்.

இதுவும் இத்திரைப்படத்தின் விளம்பரத்திற்கு பேருதவியாய் இருக்கும் என்று நினைக்கிறேன். நிச்சயம் தவறுமில்லை. யார், யாருடைய கட்அவுட்டுக்கோ பால் அபிஷேகம், பீர் அபிஷேகம் செய்யும் மூடத்தனமான ரசிகர்கள் மத்தியில் நாட்டுக்காக உழைத்த உத்தமர் ஒருவருக்கு இதுகூட செய்யவில்லையென்றால் எப்படி..?

நான் கொஞ்சம் அரசியல் ஆர்வலன்.. நிறைய சினிமா ஆர்வலன். உங்களுக்கே தெரியும். அந்த வகையில் ஒரு சினிமா ரசிகனாக மம்மூக்காவின் நடிப்பைக் காண ஆவலோடு காத்திருக்கிறேன். அம்பேத்கரின் அரசியல் வாழ்க்கை என்ன என்பதை அரசியல் ஆர்வலனாக அறிந்து கொள்ளவும் துடித்துக் கொண்டிருக்கிறேன்.

படம் மூன்று மணி நேரம் ஓடுகிறது என்கிறார்கள். இதனால் ஐநாக்ஸ் திரையரங்கில் திரையிடப்படும் நேரம் தெரியவில்லை. இது பற்றி இணையத்தள வசதியுள்ளவர்கள் அன்றைக்கு இணையத்தில் பார்த்து தெரிந்து கொள்ளவும்..

நமது வலையுலகப் பதிவர்கள் அத்தனை பேரும் தயவு செய்து  இத்திரைப்படத்தினை கண்டுகளித்து இது பற்றிய விமர்சனங்களையும், செய்திகளையும் வெளியிட்டு இந்த நாட்டுக்கும், அரசியல் சட்ட மாமேதையான நமது அம்பேத்கருக்கும் நம்மால் நம் வாழ்க்கையில் முடிந்த ஒரேயொரு உதவியாக இதைச் செய்ய வேண்டுமாய் அன்போடு வேண்டிக் கொள்கிறேன்..!

இப்படத்தினை வெளியிட காரணமாகவும், ஊக்கமாகவும் இப்போதும் இருந்து வரும் அத்தனை நல்ல உள்ளங்களுக்கும், வே.மதிமாறன் தலைமையிலான இயக்கத்தினருக்கும், பெரியார் திராவிடர் கழகத்தினருக்கும், ம.க.இ.கழகத்தினருக்கும், தமிழக முற்போக்கு எழுத்தாளர் சங்கத்திற்கும், வழக்கறிஞர் சத்தியசந்திரனுக்கும், எடிட்டர் லெனினுக்கும், இன்ன பிற பெயர் தெரியாத அம்பேத்கர் இயக்கத் தோழர்கள் அனைவருக்கும் எனது இதயங்கனிந்த நன்றி..!

படத்தில் நடித்துள்ளவர்கள் :

Mammootty - Dr. Babasaheb Ambedkar

Sonali Kulkarni  - Ramabai Ambedkar

Mohan Gokhale - Mahatma Gandhi

Mrinal Kulkarni  - Dr. Kabir

Ma Jivan Mary - Rosa Epstein

Tirlok Malik - Lala Lajpatrai

Alisa Bosschaert

Govind Namdeo

Anjaan Srivastav

Rahul Solapurkar

Stacie Kellie  - Patron

Crew Members

Director : Jabbar Patel

Producer : Madan Ratnaparkhi

Written by : Daya Pawar, Arun Sadhu , Sooni Taraporevala

CINEMATOGRAPHER : Ashok Mehta

MUSIC_DIRECTOR : Amar Haldipur

Film Editing by : Vijay Khochikar

Set Decoration by : Sophie Newman

Art Direction by : Nitin Desai

Makeup Department : Vikram Gailkwad

Costume Design by : Bhanu Athaiya

Sound Department : Pramod Purandare

Other crew : Shyam Benegal , Dr. Y.D. Phadke

படத்தின் டிரெய்லர்