கார்த்திக்-அனிதா - திரை விமர்சனம்..!

11-04-2009

என் இனிய வலைத்தமிழ் மக்களே..!

பெயரே வித்தியாசமாக இருக்கிறதே என்பதாலும் அழைத்துச் சென்ற முருகன் விரும்பியதாலும்தான் இந்தப் படம் பார்க்க வேண்டியிருந்தது.

ஒரு காலனி. இரண்டு எதிரெதிர் வீடுகள். பல ஆண்டுகளாக மாமன், மச்சானாக பழகிய இரண்டு குடும்பங்கள்.. இதில் ஹீரோ கார்த்திக்குக்கு அம்மா இல்லை. அப்பாதான் எல்லாம். அவர் அரசு ஊழியர். பையனுக்காக தானே சமைத்துவைத்து ஊட்டிவிடாத குறையாக சாப்பிட வைத்து அன்பைப் பொழிகிறார். ஹீரோயினான அனிதா வீட்டில் அப்பா, அம்மா, ஒரு தங்கை இருக்கிறார்கள். இதுதான் ஹீரோ, ஹீரோயின் குடும்பங்களின் பின்னணி.



கார்த்திக்கும், அனிதாவும் ஒரே கல்லூரியில் படிக்கிறார்கள். எலியும், பூனையும் மாதிரி.. அவ்வப்போது ஆள் மாற்றி ஆள் ஒருவர் காலை ஒருவர் வாரி விடுகிறார்கள். தங்களுக்குள் சண்டையிட்டுக் கொள்கிறார்கள். ஈகோ பிரச்சினையும் இருவருக்குள்ளும் தலைவிரித்தாடுகிறது.

வழக்கம்போல கார்த்திக்கின் நண்பர்கள் கூட்டம் 4 பேர். ஏதோ தங்களால் முடிந்த அளவுக்கு ஏற்றி விடுகிறார்கள்.. மாட்டி விடுகிறார்கள்.. அவ்வளவுதான்..



அனிதாவின் மாட்டிவிடும், காட்டிக் கொடுக்கும் வேலையினால் கார்த்திக் கல்லூரியில் இருந்து ஒரு மாதத்திற்கு சஸ்பெண்ட் ஆகிறான். கார்த்திக்கும் பதிலுக்கு அனிதாவை இதெல்லாம் ஒரு பிகரா என்று அவளை சைட் அடிக்க வந்த வீராதிவீர இளைஞர்களிடம் மாட்டிவிடுகிறான்.

இந்தச் சூழலில் அவளுக்குத் திருமணம் நிச்சயமாகிறது. இப்போதுதான் அனிதாவுக்குள்ளே இருந்த வெள்ளையுடை தேவதை வெளிப்படுகிறாள். தான் கார்த்திக் மீது காதல் கொண்டிருப்பதாக அவளுக்குத் தெரிகிறது.

கார்த்திக் லவ் அனிதா என்று எழுதப்பட்ட பத்து ரூபாய் நோட்டு ஒன்று கூடுதல் கதாபாத்திரமாக நடித்து படத்தினை முடித்துவைக்கப் படாதபாடு படுகிறது. நிச்சயத்தார்த்தம் முடிந்த பின்பு இந்த ரூபாய் நோட்டு கார்த்திக்கின் கைக்கு கிடைக்க அப்போதுதான் அனிதா தன்னை இதுவரையிலும் விரும்பியதை நினைத்து வருத்தப்படுகிறான் கார்த்திக். அவளிடம் நேரிலும், மறைமுகமாகவும் மன்னிப்பு கேட்கிறான்.

ஒரு நாள் கார்த்திக்கின் தந்தை அந்த பத்து ரூபாய் நோட்டை பார்த்துவிடுகிறார். அவர் முன்பே சொல்லியிருந்ததுபோல் மறுநாள் காலையில் அந்த பத்து ரூபாய் நோட்டைக் கையில் வைத்தபடியே பி.பி. ஏறி, அதனால் ஹார்ட் அட்டாக் வந்து இறந்து போய்கிடக்கிறார். கார்த்திக்கு அனிதாவின் குடும்பம் ஆறுதல் சொல்கிறது.


கார்த்திக்-அனிதா இருவருமே தங்களுக்குள் இருக்கும் காதல் உணர்வை மூடிமறைக்க முயற்சி செய்து முடியாமல் தவிக்கிறார்கள். கார்த்திக்கிற்கு அனிதாவின் கணவனாக வரப் போகிறவனே பெங்களூரில் ஒரு வேலை தேடித் தருகிறான். கார்த்திக் பெங்களூர் கிளம்பிச் செல்லும் வேளையில் மறுபடியும் அந்த ரூபாய் நோட்டு வெளிப்படுகிறது. இந்த முறை அனிதாவின் அப்பாவின் கண்களில் பட்டுத் தொலைக்கிறது.

கடைசியாக கார்த்திக் பெங்களூருக்கு ஜூட் விட்டானா இல்லாட்டி அனிதாவுடன் ஜூட் விட்டானா என்பதுதான் கிளைமாக்ஸ்..


அப்பாடா.. இப்படி கொஞ்ச பேரோட தியேட்டர்ல உக்காந்து படம் பார்த்து ரொம்ப நாளாச்சு.. எப்பப் பார்த்தாலும் கசகசன்னு கூட்டத்தை அடைச்சுக்கிட்டு.. மூலைக்கு மூலை விசில் சப்தமும், குசுகுசுன்னு பேச்சும் இல்லாம நிம்மதியா வரிசைக்கு ஒருத்தர்ன்னு உக்காந்திருந்தோம். தியேட்டர்ல மொத்தமே 20 பேர்தான். இந்த 20-ல் ஒரு மகளிர்கூட இல்லை என்பது இன்னும் விசேஷம். படத்தின் தலைவிதி இதிலேயே தெரிந்திருக்குமே..

ரத்தன் என்கிற புதுமுகம் கார்த்திக்காக நடித்திருக்கிறார். ஹீரோயின் மஞ்சு கேரள வரவு. ஹீரோயினைக் காட்டிலும் ஹீரோ பரவாயில்லை நடிப்பில்தான். ஹீரோயின் சிரித்துப் பேசும்போது நன்றாகத்தான் இருந்தது. ஆனால் கிளைமாக்ஸில் அவர் அழுவதைப் பார்த்து எனக்கும் அழுகை, அழுகையாக வந்தது.. ஏன் இப்படி நடிப்பு வராதவர்களைப் போட்டு இம்சை பண்றாங்கன்னு தெரியல.. முகம் அழகா இருந்தா மட்டும் பத்தாது.. நடிப்பும் வேணும் என்பது நமக்குத் தெரியுது.. இயக்குநருக்குத் தெரியலைன்னு நினைக்கிறேன்..


கோட்டா சீனிவாசராவ் கார்த்திக்கின் தந்தை கேரக்டருக்கு.. எப்பவும்போல நடிப்பை நிறைவை செய்துவிட்டு போய்விட்டார். அனிதாவின் அப்பாவாக ராஜன் பி.தேவ். கத்திக் கூப்பாடு போடாத அமைதியான கேரக்டர் என்பதால் இவருக்கும் பெரிதாக ஸ்கோப் ஒன்றுமில்லை..

உயிரோடு இருப்பவர்களிடம் புகைப்படத்தில் இருப்பது போல் வைத்துக் கொள்கிறோம் என்றாலும் இப்போதெல்லாம் கல்லா கட்டியாக வேண்டும். இறந்து போனவர்கள் என்றால் கேட்கவே வேண்டாமே.. அதுதான் ரொம்ப நாள் கழித்து ஸ்ரீவித்யா இதில் புகைப்படத்தில் மட்டுமே காட்சிளிக்கிறார் கார்ததிக்கின் அம்மாவாக..

நகைச்சுவை என்று பார்த்தால் கார்த்திக் அரை லூஸான அடடே மனோகரை தன்னுடைய அப்பா என்று சொல்லி கல்லூரிக்கு அழைத்து வந்து பிரின்ஸிபாலிடம் பேச வைக்கும்போது லேசான நகைச்சுவை மிளிர்கிறது.. கூடவே சிங்கமுத்துவின் கதையோடு ஒட்டாத இரண்டு காமெடி காட்சிகளும் இனி ஒரு மாதத்திற்கு சேனல்களில் சக்கைப் போடுபோடும் என நினைக்கிறேன்..



ஜாக் ஆனந்த் என்பவர் இசையாம். டைட்டிலில் பார்த்தேன்.. இருந்த மூன்று பாடல் காட்சிகளிலும் 20 பேரில் 15 பேர் எழுந்து வெளியே ஓடினார்கள்.. பாடல் காட்சிகளில் காட்சிப்படுத்துதல் நன்றாகத்தான் இருந்தது. ஆனால் உட்கார வைப்பதற்கு அதுவே பத்தாதே..



என்னதான் புதுப் புது இசையமைப்பாளர்கள் ரவுண்டடித்தாலும் பழைய பாடல்களுக்கு இருக்கும் மவுசே தனிதான் என்பதை இந்தப் படத்தின் இயக்குநர் உணர்ந்துதான் இருக்கிறார். அதனால்தான் சிட்டுக்குருவி படத்தின் என் கண்மணி படப் பாடலைப் பொருத்தமாக இதில் இணைத்திருக்கிறார். வேறு வழியில்லை அவருக்கு.


படத்தின் இயக்குநர் ஸ்ரீஹரி சுந்தர்.சி.யின் சீடராம். படத்தில் அது மிஸ்ஸானதால் குருவுக்கும் பெருமையில்லை.. சிஷ்யனுக்கும் பெருமையில்லை..

குத்துப் பாட்டில்லை.. இரட்டை அர்த்த வசனம் இல்லை.. நெளிய வைக்கும் காட்சிகள் இல்லை என்று எவ்வளவுதான் விளம்பரப்படுத்தினாலும் படத்தில் சரக்கில்லை என்றால் தேறுவது கஷ்டம்தான் என்பதற்கு இந்தப் படமும் ஒரு உதாரணம். தாராளமாக குடும்பத்துடன் சென்று பார்க்கலாம்..

மொத்தத்தில், ஒரு மதிய நேர டிவி சீரியல் திரைக்கதையில் உருவான தில்லான சினிமா..!